|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: اساسي)
|
أساسي أنت متهم بالوهمية من جانبي ، ومتهم بالتردد من البعض، ومتهم بالوسامة من البعض الآخر ، فماذا أنت قائل ، ، بعدين ليه مخبي صورتك ؟ الحكومة وإنت من جماعتها ، والمعارضة ما عندها حيلة تعمل ليك حاجة ، ، تعرف السبب شنو ؟ الصورة التي وضعتها ليست صورتك ، تكون وضعت صورة زول تاني مع كلام يودي ف داهية ،، يا أساسي ما في زول في المنبر ده فاهمك زي ما أنا فاهمك .. اظهر وبان عليك الأمان ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Rawia)
|
العزيزة راوية سلامي واحترامي أهلا بالتوقيع الذي رجع سالما ، وما أراه دائما أن الريدة كلمة شاملة ، تحمل في داخلها العديد من معاني الحب والوداد والوئام ، وتعبر عن أشواق مستمرة ، وأن من يحمل الريدة فهو يحمل قلبا كبيرا ،، لذا كنا نسمع أمهاتنا وحبوباتنا وأجدادنا وآباءنا يستخدمون هذه الكلمة ويعبرون بها عن حميميتهم ، وهي كلمة ليست خجولة ككلمة الحب ، لأنها كما قلت أشمل من ذلك ،، أنا حاولت ألقى البوست اللي كتبتي فيهو الكلام اللي فرّحك لكن ما قدرت ، ، إما أكتبي مرة تانية أو أرفعي البوست ، وأشاركك الفرحة ، وأتمنى لك دهرا من الأفراح .. لن اقبل شفاعتك في أساسي ، فهو شخص وهمي يحترف المشاكسة ،، ولا يمكن أن يكون اسمه السماني ، فاسم السماني ينتمي لمجموعة نعرفها وتعرفنا ونعرف قدرها وتعرف قدرنا ، وهو لا يمت لتلك المجموعة بصلة ، لسبب بسيط هو أن مجموعة السمانية مجموعة مستنيرة ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Rawia)
|
لوووول يا راويه ,, صابره على صبر ,, و الله لو تعرفى الحقيقه ,, ما بتستاهل القصة دى ,, انا زولة "ربة منزل" بسيطة جدا (و طالبه على جنب كده) ,, حياتى ما فيها اى حكايات و لا روايات .....ما عايزه اخرب الصوره (الاكيد اكتر اثارة من الحقيقه) ,, انت عارفه ,, زى ما قالت لى واحده سودانيه اول ما جيت البلد دى و انا مازلت (عروس) ,, "العرس مسييييخ ,, مش كده؟؟" يادوب فهمت كلامها ,,,,
غايتو الكلام الدقاقه (بضم الدال) _ على قول عماتى_ نسيناهو زمااان
لكن ما تفهمى من الكلام ده انه روحى ماشابه (ها ها ها)
(عدل بواسطة Outcast on 03-30-2004, 03:34 AM)
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: PLAYER)
|
سلامك على العين والراس ياود الإصول صاحب البوست تعرف انا جيت مارة بجاي وكنت مستجلة لكن كلام ابوساندرا غلبنى اتجاوزه ... عموما البوست جميل عايز وقفة ورد ... التحايا ليك ولكل آل ود قاسم والتأسفات لعدم الذوق المامقصود ... وكترضية بسيطة كدا نحاول ننزل جزء من صورتنا في مقبل الايام القليلات القادمات واثني على وسامة اساسي شوف عين واحتراماتي برضو ...
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: PLAYER)
|
بلير الأنف يشم رائحتين ، طيبة ومهضومة وطيبة لكنها تصيب الآخرين بالحساسية ، وأحسن حاجةالواحد يكون بلا رائحة ، يعني سليقة ، عشان ما حد يشمو .. اساسي ما مكروه ، بس هو بيكرّه الناس ،، ومرات في ناس حاول يكرههم والله حبيتو حب شديد خلاص ،، إنت يا بلير ما مكروه ، بس زي ما قلت ليك خليك بدون ريحة ،، ما تحاول تتعطر ،،
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Raja)
|
رجاء العزيزة أنتظر مشاركاتك الجاية بشوق أكبر ، ، اساسي ما بيشبه ناس السماني ، ويكون الصورة اللي نزلها مش صورتو ، وتلاقيه اتردد عشان شكّ إنو في ناس ممكن تتعرف على صاحب الصورة ، هو من هواة جمع الصور ، ماشايفاهو جاب صورتي وختاها ، أنا ما أديتو صورتي ، هو جمعها ضمن مجموعة صور ، ولو مشينا لي بوردات تانيات يمكن تلاقيهو خاتيها على أساس إنها صورتو ، وكمان يمكن الناس هناك بيقولوا ليهو يا خال ،، الوليد فعلا وسيم وربنا يخليهو لي أمو لكن أبوهو جني جنو ، مش براهو ، هو وأصحابو وصاحباتو ،، والمشى منهم من البورد إن شاء الله ما يجي ، والما قادر يدخل إن شاء الله عنّو ما دخل ، واللابد إن شاء يبقى لابد على طول ،، ونبقى أنا وأصحابي وصاحباتي ، بس ، ما معانا ولا زول من المقاشرنهم ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
1- ودقاسم النظام ركائزه الأمن والاعلام ينزعج جدآ ويهاب الاعلام المضاد ، فتراه يضيق على ، ويضيق ب الصحف التي تجابه بنشر الحقائق مثل الايام وكلنا نعرف كيف عطلها وكبدها خسائر مالية كبيرة. المنبر الحر مقروء في السودان وزي ما قال البعض هنا تجد الشاشة الصفراء في اي مقهى انترنيت ، والمنبر يحوي كتابات معارضة وفاضحة لما يدور في السودان من {عمايل } السلطة ، هذا سلاحها وهي في ذات الوقت تخشاه جدآ{ الاعلام} ولو كان لديها طريقة كانت منعت الانترنت في السودان ، مؤكد انها تراقبه ، وطريقتها الوحيدة هي تخريبه إما بتوجيه أذنابها إغراق المنبر ببوستات فارغة ، او عن طريق الهاكرز ، ويمكن الرجوع للاسابيع القليلة المنصرمة لتعرف . ،،الغيرة كعبه يا صديق ، أها الملكة ردت عليك رد وسيم بيشبها ،مالك تلفعت بالصمت ،،سؤالك لنادوس2000 في محلو ، وننتظر معك الإجابة وحتى ترد سوف إستمتع بغواية البياض
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: أبو ساندرا)
|
أبو ساندرا كيفك الملكة ، ملكة فعلا ، ربنا يديها العافية ،، بس أنا ما عايز أسيب صحوبيتها ليك ولبناتك وأمهم براكم ، ومال نحن وين نلقى أصحاب ؟ أعرف أن السلطة تستخدم الإعلام والأمن كركائز لأمنها ، وأعرف أن المنبر الحر مقروء ،، لكن أرى أن السلطة تبالغ في استخدام هاتين الركيزتين ، وتضخم حجم المعارضة ، وكأنها تريد أن تقول أنها متربص بها ومغدور بها ومعرقل عليها ،، وأنا لا أرى أن هذا فعلا موجود ، نحن هنا في المنبر لا نعمل بتنسيق ، ولا نعمل تحت تنظيم ، ولا نأتمر بأمر كائن من كان ، نحن فقط أفراد من الشعب - صحيح ربما تكون لبعضنا انتماءات سياسية - ونعمل من منطلق إحساسنا بالظلم ومن منطلق أن بلادنا في حاجة لكلمتنا ، وأن لشعبنا دين علينا ، ، وهناك أيضا تضخيم لما يمكن أن تفعله السلطة بنا ، فهي وإن بقيت كل هذه السنين وبهذا الحجم من تكميم الأفواه ، غلا أن الشعب ظل يناضل ضدها وهي قد سجنت وعذبت وقتلت ، إلا أنها لن تتمكن من سجن أو تعذيب أو قتل كل الشعب ،، لو أن السلطة تستعيد عقلها وتعرف أنها بهكذا عداوة إنما تعادي شعبها ومن يعادي الشعب فلن يعادي إلا نفسه ، ولو أننا عرفنا كم هي جبانة تلك السلطة التي تحاول قهر شعبها ةتهاب كلمة الحق ، لكنا وصلنا - كلانا - إلى أن خير الوطن يكمن في قبول الآخر ، وفي إطلاق الحريات ومنح كل ذيث حق حقه وفي وحدة أبناء الوطن الواحد ،،
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
ود قاسم العزيز التحية لك وللأسرة الكريمة
حقيقة موضوع الصور ده جميل جداً فالواحد يسرح بخياله بعيدا ليبني صورة حسب كتابات الفرد منّا وعندما تلتقيه تجد ان الواقع يختلف عن الخيال . اشكر بت العباسي لتذكرها الشافعين بتاعيني وانا وضعت صورهم لأسباب مختلفة . منها رحمة بالزملاء والزميلات من صورتي حلبي ونشفان والرأس اصلع واعتلاه الشيب ( والله انا ضغير ) بس نعمل شنو لموية الملح
واسبب الآخر هي للنظر في اوجه هؤلاء الأطفال فهي لا تقل عبرة عن صور ضحايا التعذيب وابناء الجنوب ودارفور فللنظر لصورهم ولنشفق عليهم الا يكفي عبرة بأن نشأتهم بعيدا عن الوطن قمة الحرمان ؟
اما من الشخصيات التي قابلتها من البورد الأخ هشام يازول ومن كتاباته كنت اعتقد انه كبير جدا في العمر وطلع يختلف عن الخيال كلية وكذلك عندما ذهبنا للقاء الأخ اساسي حقيقة لم اصدق ان الذي امامي هو اساسي فالصورة والشخصية تختلف اختلافا تاما من الخيال فكنت اتوقع انسان مشاكس ومتلقي حجج فوجدت انسان هادئ ومتعقل . وكذلك هو كان يضع صورة مختلفة لي واظنني خيبت ظنه .
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ali othman)
|
علي عثمان لك التحية فعلا يا علي ، جميلين الأطفال ، وأطفال الغربة حرموا من النشأة بالوطن ، وحرموا من اللعب في ميادين مدننا وفي ساحات قرانا ، وبالرغم من أنه توفرت لهم بعض الألعاب الحديثة والعيش النظيف ، لكن نجدهم منكمشين كثيرا من الناحية الاجتماعية ،، ونحن هنا في الرياض التقينا أكثر من مرة ، وكان الاخوة فعلا سودانيين أولاد بلد ، فيهم الأصالة وحلاوة المعشر ،، وقد تحدثت إلى هشام أكثر من مرة وتحدثت إليك أكثر من مرة ، وتحدثت إلى أساسي مرة واحدة ، وأجد ما يجمعني بأساسي فهو سليل اسرة اتحادية ، وكمان اتحاديين زمان محبوبين لدي أكثر من اتحاديين اليوم ،، لكني ما زلت لا اقبل شفاعة في أساسي ،، لكم التحية جميعا .
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Raja)
|
لا حولة بالله البوست دا انا ما دخلت تاني والشمار دا كله اتقال فيني وانا غايب منه لكن والله دي معنويات عديل كدا بالله يا رجا وراوية وملكة سبا وعلي عثمان انا طحنية كدا وما عارف لووووووووووول الله يخليكم رفعتوا روحي المعنوية لكن والله اشك انكم ما كنتو لابسين نظارات اليوم داك هاهاهاها من الليلة حاغير اسمي لي اساسي الشايف نفسه ورافع سعر والله لا وسيم لا الله قال بس انتو العيونكم وسيمة وبتشوف الدنيا حلوة لكن تاني كدي اسمع واحد يقول لي قوشام طوالي بجي طاير البوست دا
ويا ود قاسم تعال هنا حارق رزك مالك وبعدين شفاعة شنو فيني ليك يازول ما تفكها كبيرة كدا وخت الكورة واطة وكان داير تستفذني عشان اكون اساسي الانت عاوزه دي ما بتلقاها عندي انا اساسي كدا دايرني اقبلني زي ما انا عاوز ما قبلتني عليك يسهل وعلي يمهل رجا اليوم داك ما كنت متردد وما نزلت الصورة لاني عاوز انزلها نزلتها عشان الاخ يحي ابن عوف قال لي ما بتكلم مع زول مجهول نزلت ليهو صورتي وكتبت ليهو اسمي يعني حماقة(سمانية) ساكت وحزفتها عشان انزل الشعار الملظلم الغياظ دا ولانه راح مني اضطريت ارجعها تاني وبرضو في زول رسل لي رسالة قال لي قالوا نزلت صورتك وشلتها عليك الله نزلها تاني اشوف اساسي دا عامل كيف يعني ما ترردد زي ما فهمتي وخلاص لكن برضو معنويات الليلة في السماء
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: اساسي)
|
أساسي والله لو ما حسابا لأصولك الاتحادية كان وصلتك في جدة وفشيت غبينتي ،، كل الناس القالوا عنك كلام كويس أنا مصدقهم في كل شئ إلا في كلامهم عنك ،، يا أخي إنت من دخلت البورد عملت كم شكلة ، اتحرشت كم مرة بالناس ، مش إنت قربت تطفش لينا شيري من البورد ؟ في زول في بالي يا أساسي كان قدرت تطفشو والله ليك جائزة ، ويمكن تكون جائزتك إني أخلي ليك البورد طائعا مختارا ،، إنت عارفو مش ؟ يا هو ذاتو ، الزول الزمان إنت بديت حملة تطفيشو وبعدين هوّنت ، أو جعلوك تهوّن ،،
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
ود قاسم وناس البيت سلام
رجاء لوووووووووووول شكارتها دلاكتها امها وخالتها
تعرفي الصورة ما جديدة نزلها تراث قبل شهر في بوستك بتاع عيد ميلادي
بعدين صورة الحاجة كشحها بكري في موية الغسيل الاخيرة لكن بمشي افتشها واجي اخد بيها ساتر ما بقدر على الشكل انا
اساسي انا غايتو راي من راي ناس رجاء ديل شفت الصورة
وبضمن ليك ختها وقلبك قوووووووي
| |
|
|
|
|
|
|
صورتك واسمك المنبري هما صورة وتصوُّر ... (Re: ودقاسم)
|
* الأخ أبوقاسم الأعزاء والعزيزات البرادِبة ( البرادبة هذه ليست دعوة لتقبيل البورد – من قبيلة –ولكنها محاولة للتخلص من التصنيف الجندري الذي توحي به كلمة بورداب! )
لكم جميعاً المحبة...
لا أود أن أضيف قولاً ثقيلاً الى هذه الصفحة التي أجدها مساحة إبداعية خفيفة الظل. غير أني أجدها مساحة تفكـُّرية أيضاً ، في شأن هذا المنبر وفي ما يعنيه لمرتاديه وزواره المختلفين والمتباينين جنساً و نوعاً ، ومن حيث خلفياتهم الثقافية، مواقع إقاماتهم سواءً في الدياسبورا أو في داخل السودان، الخ... ويبدو لي أن هذه التباينات ، بالإضافة طبعاً للمزاج الشخصي ونظرة كل منا الخاصة تجاه العالم والأشياء ، تحدد رؤيتنا لما تعنيه هذه المساحة الإسفيرية لكل منا... يقول أبوقاسم في افتتاحه لهذه الصفحة Quote: الصور بالمنبر ،مهما كانت ، تدل على شجاعة نادرة يتمتع بها أصحابها |
وقد لاحظت أن الكثير من المعلقات/ـين في هذا البوست يعلنون ضيقهم أو عدم ارتياحهم لإستعمال بعضنا للأسماء الحركية ، أو عدم إنزالهم صورهم الحقيقية...
في إعتقادي أنه ينبغي أن لا ننسى أن هذا الوطن الذي اتفقنا على تسميته بـ "الإفتراضي" ، هو مساحة من نوع خاص ومختلف. إنه فضاء نتشكل فيه بأحلامنا وتصوراتنا ، برؤانا وكتاباتنا ، ونتشكل فيه بشخصياتنا الروائية والإسفيرية والإبداعية ، ويحضرني هنا مثال سجيمان الذي قال أبوقاسم عن صورته أنه متأكد تماماً أنها حقيقية! وقد علقت الزميلة البوردابية راوية على صورتي بسؤال طريف عن "الزعَّلك منو مدينا قفاك؟" قلت لها حينها أن هذه الصورة تعبير عن حالة وجودية ، وكنت أعني ذلك!
ومن البديهي أن بعضنا يشعر أيضاً – كسودانيين وسودانيات يحيا أغلبهم في المهاجر القسرية أو الإختيارية – بالرغبة في إعادة صنع ذلك الوطن الذي نحـِنُّ إليه ونفتقده في هذا الفضاء الإسفيري ، لذا نستصحب اليه كل عاداتنا الثقافية والإجتماعية السودانية... وتلك أيضاً رؤية إبداعية ، إذ أننا ندرك أننا في الواقع ننتج عالماً متخيلاً نستعيد فيه العالم الطبيعي الذي نفتقده. ذلك لا يعني أن العالم المتخيل الذي ننتجه لا معنى له ، وإنما يعني فقط أنه أيضاً عالم من طبيعة أخرى ، إنه "حوش" إلكتروني وإسفيري... ما أريد أن أقوله أن هنالك خيارات مختلفة لكيفية الحياة في هذا الوطن الإفتراضي ، وكل منا يختار بطريقة أو أخرى الأسلوب الذي يحيا من خلاله في هذا الوطن. وبما أن المنبر ليس متخصصاً في شأن إجتماعي أو ثقافي أو سياسي بعينه ، فسيمشي الناس في زقاقاته الإسفيرية بأزيائهم المختلفة وأسمائهم وألوانهم المتباينة ، وسيحيون فيه بطرقهم التي يفضلون. ولعل أجمل ما في ذلك كله هو قبولنا لخيارات بعضنا البعض.
في صفحة أخرى كتبت هذه الكلمات: نـمـنمة ٌ ذاتـية Quote: الإسم : الفضاء 2
لقد اخترتُ اسماءَ كثيرة من قبل ، واختارتني أسماء أخرى كثيرة: خذ هذه وتأمَّل ... أسماء أخرى ، لاتحصى ولا تعد.........
هذا عن الأسماء في المكان. أما الإسمُ في فضاء الأسـافير* الجديدة فإنه – مثلما هو في الحياة اليومية – يمثلُ معضلة ً وجودية ً وربما روحية ً أيضاً... ولأنّ الإسم – في معانيه الظاهرة والخفية – هو خيارٌ جمالي ووجوديّ ، فإنه يظلُّ دائماً ، مثله مثل الهوية الشخصية ، موضعَ سؤالٍ وبحث ، لأنه في نهاية الأمر مسألةُ وجودٍ ، وسؤال ٌ عن الذات. سيان إذاً: في العالم أو في فضاء الأسافير: أن تختار اسماً ، أو رسماً، هو أن تختار وجوداً ، أن تبتكر سرداً روائياً لما تريد أن تكونه على صعيد الآن وفي كل فضاءٍ ممكن. إنه الفضاء إذاً... أينما ما مضيت ، أحالك الى السؤال عن الذات ، وأحالك الى أزمته! فلأتفاءل هنا وأتذكر أن الفضاء هو للحرية أيضاً(....) ولكن الأزمة َ الوجودية َ تتعمق أكثر عندما نحيا أيضاً في فضاءات الشتاتِ الراهنة. لقد اخترتُ اسميَ الإسفيري ، فردة ، وأنا ابحث عن تحققات أخرى في فضاءاتٍ أخرى. وقد حملتـُه معي الى فضاء سودانيز أون لاين بعد أن انغلقت تلك الفضاءات ، آملاً أن تُكتب له حياة ٌ إسفيرية جديدة هنا. ولكن سودانيز أون لاين فضاءٌ سودانيٌّ منفردٌ في طبيعته: إنه فضاءٌ يعادي الفضاء! بيت إفتراضي ، حوش تسكنه عادات المكان (الحقيقي) الذي جاءت منه المخلوقات الإسفيرية التي تسكنه وتجوبُ فضاءاته! إنه فضاءٌ إسفيري مثقلٌ بالجاذبية ، بذاكرة المكان الطبيعي والفيزيائي حتىَّ وكأنه لايطير! إنه فضاءٌ يصرُّ على اقتباس المكان الفيزيائي... إنه يهزم التكنلوجيا (الى حين ، فيما أظن!) عندما يكدِّسُ فضاءاتها بكل رموزه الثقيلة الوزن ، بالذاكرة التي تحرك الأحجار ، وبالشجر الذي يوميءُ للهواء بالعطرِ فيـثقلُه. إنه – في كلمةٍ واحدة – قد هزم إسميَ الإسفيري وأسكنني مرةً أخرى في المكان الأول! هل أشكره على كل هذا ، أم ألعنه..؟
لقد اخترتُ اسماءَ كثيرة من قبل ، واختارتني أسماء أخرى كثيرة: وهاأنا أختار– مرة ً أخرى – الإسم الذي اختارني! أكتبُ هذه الكتابة إذاً لأحررَ فردة َ من غربته ، وأمنح الإسمَ الذي أختارني غربة ً أخرى يعاني بها وفيها. .
|
| |
|
|
|
|
|
|
Re: صورتك واسمك المنبري هما صورة وتصوُّر ... (Re: farda)
|
يا ملكة سبأ نحنا ذاتو اتعقدنا ياخي / تى ...
يا جندرية الكلام دا ما صاح ياخي / تي
البورد دا بعدين بحمونا ندخلو ....
بالله خلوا الحركات الاقصائية دي ....
اظنو دا اسلوب جديد لمنعنا - قسرا - من دخول البورد بالتنسيق مع الخال الحبيب ود قاسم
| |
|
|
|
|
|
|
Re: صورتك واسمك المنبري هما صورة وتصوُّر ... (Re: farda)
|
فردة لك التحية اتفق معك على حكاية الافتراضية والتشكيل المزاجي ، لكن الصور عموما تجعل الوطن الافتراضي أجمل ، تحسسك بأن حولك أشياء ولست وحدك ،، هي مثل حركة الناس في الشوارع ، وعدمها مثل السكون ،، أما الصور الحقيقية فهي تعبر عن أناس يمشون بيننا ،، والصور غير الحقيقية كصورة سجيمان فهي في كثير من الأحيان وخاصة إذا كان الوقت متأخرا خلال الليل فغنها تتبدى لي شيئا يخيفني ،، لكنها في نفس الوقت تضحك زوجتي حتى قبل قراءة كلام سجيمان ،، لك الشكر على المشاركة القيمة ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
.. . والله يا بشاشا يا اخوى انا خايف يكون وشك يلعن قفاك .. جست كدينغ لانو السبب معروف انت زول متأبط شراً من سنوات طوال واستشهد ب د. نجاة وماما دومه .. وعلى التعتر ليك ما بتعامل الجنس اللطيف برقه ..بتخوفهم عديل كدا وبتنهرزون اها دايما ناس الشر والناس الخشنين ديل بكونوا شينين عديل كدا ناقتف يعنى .. ونو هارد فيلنغ بليز والله بنهزر ..
ود قاسم بعاين ليك من النفاج و بقول ليك لم تتحدث عن الرمزية !! ولا دا كلام كبار .. فاهم ولا اجى باللفة؟
وتحية لناس الصور الحلوووة بدون فرز .. وخصوصا لجنس اللطيف ..
اساسي برق بوجوج سااى والله عرف ليك مره نور ومره ضلام يا اضلم بس اسمع مقولة انا بقولها دايما للحاقدين على ارض الواقع كل جميل مستهدف .. وانت زي كدا
سلاموز
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
الشريكات الكريمات والشركاء الكريمين غبت شوية ، كنت أكتب بوست ( المتعجرفة الصغيرة ) ، ورجعت فلقيتكم أكثر ألقا ، ، وجدت عدة أحداث : 1- كلام عسل من حسين ملاسي( لا أثق بعسله الذي يقدمه لي فهو يزجيه بالماء ) 2- لطف ومداعبات من أساسي ( الهدوء الذي يسبق العاصف ) 3- وهو الأهم صورة الجندرية ( عيني باردة ) على فكرة نزلها تمبس في بوست التهنئة بعيد الميلاد،، سأعود إليكم تفصيلا ،، ويا رجاء أحيي انسيابك ، وكما قلت أننا نهلنا من منبع واحد ، بالرغم من أنك أخذتي أكثر .. حاولوا تحصلوا على جائزة بشاشة لوصف وجه نوبي مألوف ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
عما قريب حأبطل الكسل وانشر صورتي كالتزام ومسؤلية شخصية عن ما انشر هنا، وبالمرة نعرف انطباعات الناس عننا،من باب حب الاستطلاع، مهما كانت قبيحة او قاسية!
اهو اسلوب لل Fund Raising مابطال، حجة اوتجارة يعني!
فخدوا راحتكم للاخر ويا الجندرية ليكي امان الله!!!
المطلوب رسم عديل كده ذي شغل اخوي طناش، وبالمناسبة دي يا ريت يا طناش لو تبتدر المنافسة دي بي ريشتك المبدعة.
ايضا لا مانع من الرسم بالقلم من دون اي مواصفات او شروط، واللي عندو غبينة معاي، دي فرصة يفشها علي مزاجو. الجوائز كالاتي:
A)عن كل لوحة تجسد صورة بشاشة "المتخيلة" سأتبرع للمنبر ب مبلغ عشرة دولارات (10.00$) لحدي مية دولار(100.00$) كحد اقصي.
B) اللوحة الاقرب للاصل حيفوز صاحبها بقيمة المكتبة الالكترونية مدفوعة للادارة كتبرع.
C)الرسم بالكلام ماخاشي المسابقة حتي لا نؤثر سلبا او ايجابيا علي انطباعات المشاركين.
D)الاتية اسماءهم وكل من يعرفني شخصيا او شاف صورتي "مين عارف" يمتنعون: ترهاقا، الموصلي، رضي، سمعة،دكتور متوكل، دكتور حيدر، وكل من يعرفني ولا اعرفه بحكم الاسماء المجازية او المستعارة!!
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Alia awadelkareem)
|
العزيزة عالية لك التحية والله تصوري أنا خاتي الصورة في بالي وفي حساباتي ، وقربت أرسل ليك ماسينجر عشان أقول ليك الصورة صورتك في ذاك الزمن وللا صورة بنتك؟ لكن البوست ده بصراحة تمت فيه مشاورات كثيرة قبل نزوله ، خوفا من الزعل ، ، والصورة حقيقة من الصور التي تزين البورد ، وصور الطفولة حقيقة تستاهل بوست لحالها ،، عتابك في محلو ، والزعل مرفوع يا عالية ، وكلو هنا اخوان ،،
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
ود قاسم سلام... والله البوست من عنوانه خلاني أفكر في حته خت الصورة ده... رغم إني كنت بفكر في الموضوع من فترة... المهم إني لما قريت موضوعك.. اتذكرته موضوعي الفي راسي ده... وتزامن القرار معه...
يا جماعة أعفوا لينا بالله أذيناكم.. لكن نسوي شنو (المصور ما جاب شي من عنده)... طبعا العبارة دي عند والدتي.. لما أجي اشكي ليها أقول ليها الصورة طلعت شينه.. تقول لي (هو جاب شي من جيبه!)....
بنت الحسين
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: Raja)
|
العزيزة رجاء صورة بت الحسين واحدة من أهم منجزات هذا البوست ، ولم يكن ليأتينا هذا الحصاد لولا مجهودك الجبار ،، لكن حكاية صورة أساسي دي ما تسكتي تخليها ، أنا متأكد إنو الصورة المعروفة لدى الجكس هي ليست صورته الحقيقية ، بل ربما يكون قد وجدها وقتها في مكان ما ، أو ربما يكون أساسي مسئول عن ملفات الموظفين في الشركة ، ،، اتركوا أساسي فهو لا صورة له لأنه ليس حقيقة ..
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: omer ibrahim)
|
ود قاسم إزيك وعلَّك طيب، وبنمسى على كل الحبايب المشاركين يكاد يكون يا ودقاسم أننا لم نلتقى أو نتقاطع فى أى بوست سابق ولكن من المؤكد أننى أقرأك وأتابع كتاباتك وبوستاتك البديعة .. راقت لى فكرة البوست والمداخلات الطريفة من الشباب .. ومن كم يوم قررت أجيك زائر وبى صورتى العاجبانى فكرتها .. أقصد فكرة تصميمها .. أها .. بحثت عنها سَلقَط مَلقَط .. مالقيتها .. هذا المساء ومن ما جيت من الشغل حلَفتَ إلا ألقاها وأشاركك والجميع هذا البوست اللطيف .. أها .. رايك شنو مو شحمانة؟
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
أستاذنا العزيز ودقاسم أسعد الله أيامك باليمن أعجبنى هذا البوست مع إن صورتى مع البير الملازم لحياتى تحد من حرية المناورة والمثل القديم قايل من شب على شئ شاب ودخلوه الكتاب .. من مساوى اقصد محاسن الصور اول مره حاولت ان انزل صوره لشخصى الغير فوتوجنك ولله فى خلقه شئون !! طلبت من الاخ بكرى ابوبكر ان يساعدنى فاول تعليق قال لى كنت فاكرك اصغر من كده .. تخيل مدى الصدمة والتعاسة التى اصابتنى وانا مازلت إبن .... سنه أجمع تسعتاشر وردى على اربعه سنيين + خمسة سنين لابوالامين + السنين العشت فيها معاك هنايا = النتيجة الحتمية المره التى توصلنا اليها ولكن !! يبقى العشم دايما فى المثل الشجر الكبار فيه اللالوب يديك العافية اخى ودقاسم وانت تدثر بنا من نفاج الى اخر فى هذا البيت الكبير جعلتنى اترنم بى .. توعدنا وتبخل بالصوره ياروعتنا لك التحية والحب
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: esam gabralla)
|
عصام جبرالله مريم بت الحسين امها قالت ليها المصوراتى ما بجيب حاجه من عندو لووووول
اما انت انا شفت صورتك فى عرس خدر محكر تتحنن وتعليقى اى انت وبهاء العباسى افضلوا كدا اوعوا تكبروا ماكلين عمركم فى بطنكم كبر يا يمه محمد العباسى وصلع وقامت ليه كرش .....البتلدوهو فى اخر بطانكم يا عجايز ياحجيريين
والحنه عجبتنى ليك انشاء الله تضوقا يا عصام ياود ام الحسن
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: ودقاسم)
|
العزيز ود قاسم شكرا لك يا غالي عن دائم السؤال عن سفري اتضح ان موضوع السفر داير دبارة من شيخك ابشرا اندهو لينا يخارجنا من هذه القاهرة التي قهرتنا وباقي لي المخارجة من مصر عايزة عصا موسى ! وذي ما قال حميد الشاعر :
يا بحر الحاصل لاك ناشف لا القلم الفي يدي عصا موسى
اها يا ودقاسم البنشف لينا البحر ده منو قول يا مدد اما وساطة العزيزة راوية راوية داقة طناش ومتآمرة مع خالد الحاج البورد مليان صور جكس ونحن لينا الله وعيشة السوق خالد
| |
|
|
|
|
|
|
Re: صورتك في المنبر ، لا توجد ، موجودة ، خجولة ، رسمية ، أم جريئة ؟ (Re: خالد العبيد)
|
خالد ابو شرا مش شيخي ، هو جدي ، أنا بشوفوا ليك الليلة ، بعمل ليهو كول ( call ) ، وأشوف معاهو موضوعك ،، للعلم أن ألشيخ يوسف أبوشرا متوفي منذ أكثر من 300 سنة ،، لكن حتشوف يا خالد .. راوية بتدلل علينا شوية ، بس أكيد هي خاتانا في بالها ،، أنا عارفها ما بتقصر ، وخالد الحاج مشغول جدا بالتوسط للكيزان في البورد ، يا أخوي هو مالو الأيام دي ، شعر بالكبر وللا شنو ؟
| |
|
|
|
|
|
|
|