|
|
 اركلوجيا الكنفوت...وصهيل الدخن وكرنفالات ام جنقر....!!!
|
من الضروري الاعتراف والاقرار بان جمر الحي والاشواق الذاهبة الان بكثافة صوب الكنفوت والدخن وكرنفالات ام جنقر قد ولعته الاستاذة سلمي الشيخ سلامة في كتاباتها الطاعمة الموشحة بالحنين والدعاش في صفحتها بالفيس بوووك بعنوان قمر الدين ومارست فيها صهيلا عبث بالاشواق الرمضانية ورحل بنا عبر غيمة رمضانية موغلة في السخانة والرطوبة الخليجية صوب مراتع الصبا وفيافي كردفان ام خيرا جوووه وبره...
وسنعود
|
|
 
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
الدخن في ذلك المنزل العتيق الذي تقوده الحبوبة الاسطورية فاتتي يلعب دور اساسي في كل لوجستيات الغذاء لكل افراد ذلك المنزل الذين يناهزون العشرات بالاضافة الي ضيوف افردت لهم مساحات شاسعة في ركن ظل يحمل دوما اسما مميزا وهو الضرابة البرة..!!!
ارتال الجوالات من عيش الدخن في الغالب لا تاتي من الاسواق بل يحملها لوري ضارب في القدم كتبت علي خلفيته قدم الخير ياتي في بدايات مواسم الدرت محملا بالدخن وبعض الشرموط من صيد الغزلان
دخن حصدته الايادي النبيلة في الزراعة المطرية في احدي الفيافي ...التي لا تبعد كثيرا عن منطقة ابيي الاستراتيجية ولحوم الغزلان هو نتاج غزوات الصياد الماهر ابكر سودانيز الذي تربطه بحبوبتي صلات دم افريقي ضارب في الجذور ورايتها كثيرا تناديه باخوي سودانيز
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
وليلة حضور هذه التجريدة الدخنية كانت ليلة مميزة وبها دراما لشخوص يحبون بعضهم رغم التفاوت في كل الاشياء فهذا هو عبدالله خليل الشهير بلهب يداعب الجميع وهو يحمل شوالات الدخن بمهنية عتالية عالية يحسده عليها اي فور كلفت حايم في الشواطي والمواني الافرنجية وهذا ود كوور ذلك العتاللي المرح الذي يداعب الحبوبة باحد اللغات الافريقية الاتية من غربها وهو ابن مضول ومريال باي ومدينق اويل وتخومها الساحرة حيث مراتع الدينكا الساحرةوذلك هو ادم الطاهر ذلك السائق الماهر يقدم منفستو حمولته للحبوبة ذاكرا عدد الشولات التي سينزلها في مخزن البيت فهنالك شولات اخري ستذهب الي بيوت اخري تربطنا بهم صلات قرابة ودماء ويشاركون هذه البيت الكبير في لوجستي الدخن وشرموط الصيد البري
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
دخول الدخن الي مخزن البيت واحتلال مساحاته المخصصة بجانب بعض جولات الويكة والطماطم الناشفة التي لها المقدرة علي منافسة اي كوتشيب حايم في مطاعم كنتكي العالمية...يعني هذا الدخول الموسمي لكرنفالات الدخن وجولة ومرحلة اخري من مراحل معالجته والاحتفاء به كغذاء اساسي ومهم وواهب الجميع لطاقة تدوير اشيائهم الحياتية وسرعان ما تخش وتمرق الجرادل الي ارض ذلك المخزن وهي معاول لاداء مهام دخنية محددة ومعروفة ومبرمجة عبر روتين موسمي لا يتغير الا فيما ندر
وسنعود
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
العزيز كيكي
سلامات ومل عام وانتم بخير
مع قرب زمن الإفطار ما باقي لي إلا والبحث عن قاموس لفك طلاسم العنوان لكن نجدتني آخر كلمة.. فلولا أم جنقر هذه لكنت وضعت نفسي من عيال الخرتوم...
اصبحت ام جنقر غريبة في خواطري تطل على مع مقدم كل رمضان وآخر حتى صارت الخطوات منها 21 عاما بالتمام والكمال..
آه يا زمان الحزن فينا..
فأنت لا تعرف التراجع..
تدفع فينا بالتشفي
وبالتخفي للرحيل..
ولكن هيهات.. رمضان فينا بطل
يتقدمنا بالعشق الجميل لتلك الروابي المترعة بالكونفت..
وحتما سيكون عهدنا بك قادم
أم جنقر
أن جنقر..
تحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Abdlaziz Eisa)
|
Quote:
مع قرب زمن الإفطار ما باقي لي إلا والبحث عن قاموس لفك طلاسم العنوان لكن نجدتني آخر كلمة.. فلولا أم جنقر هذه لكنت وضعت نفسي من عيال الخرتوم...
اصبحت ام جنقر غريبة في خواطري تطل على مع مقدم كل رمضان وآخر حتى صارت الخطوات منها 21 عاما بالتمام والكمال..
آه يا زمان الحزن فينا..
فأنت لا تعرف التراجع..
تدفع فينا بالتشفي
وبالتخفي للرحيل..
ولكن هيهات.. رمضان فينا بطل
يتقدمنا بالعشق الجميل لتلك الروابي المترعة بالكونفت..
وحتما سيكون عهدنا بك قادم
أم جنقر
أن جنقر |
يا سلام يا عبد العزيز ياخي
ورمضان كريم وتصوم وتفطر بالف خير وبركة
وحزينة وملانة حنية هي تداعياتك علي ظلال ام جنقر والكنفوت وسيرة رمضانات الشواطي والمواني والمنافي البعيدة عن الوطن في زمانات الطفابيع وتهتك الاوطان...
رمضان البيت السوداني ظل ضاجا ونشطا وعالي الحماس في تجويد وتوضيب موجودات الارض السودانية التي كانت عامرة بخير الزرع والضرع السوداني....ولكن يظل القول هو قولك بان رمضان فينا قد (بطل) وصرنا نستحلب الزكريات والايام القديمة ونتدردق في سحب ومزن مرورها حتي ولو كان كورة او قرعة ام جنقر
وتحياتي وكل الود
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
Quote: كنت بتاكلوا ملاح الشرموط بلحم الغزلان ...وبعد دا يجى مصطفى عثمان
يقول ليك كنتو جيعانيين ..غزلان (راسا عديل) ...
عفيت منكم ..متابعين اركلوجيا رمضان فى مدارات دينقا ام ديار |
هلا هلا والله..
ومصطفي عثمان اسماعيل ده طفيوع مجنون في راسو وعاوز يشوه حاجات الشعب الجميل لصالح مشروعهم الحضاري المكلوج المشيد علي الزيف والخداع وهنبتة اشياء هذا الوطن..
والخير يا محمد كان راقد هبطرش لحم صيد ولحوم وزين ولو درت لحم ابو شوك برضو موجود
ثم العسل وحاجات رهيبة ياخي بتاتي من فيافي (ناما) التي سرقت منها مدينة هجليج الاضواء
فناما هذه يا محمد منطقة كان فيها تجربة زراعة قطن بالري المطري ناجحة جدا وهي ارض غنيانةوحسع تورت ليها بترول ما يديك السكة في تخومها...
فان اهدت الوطن الان بترولا يتشاجر فيهو الشريكان فقد اهدتنا زمان خيرات وعوالم ضاجة من البادية
واه يا زمانات ناما ياخي وزمانات الهداي الاسطوري الراحل حمودي ول دلا
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
Quote: بصراحة يا ممراح
ام جنقر دي مرتبطة معاي بالتايفويد عشان كدة ما تشكرا لي
كنا بنمشي نجيبا من السوق الشعبي امدرمان ونمشي مصنع الطحنية بتاع اشرف زهير
ونعمل خلطة ام جنقر والطحنية
بعد فترة شعرت باعراض ملاريا وفحصت وطلعت تابفويد
اظن صاحبة ام جنقر لا تلااعي شروط النضافة |
هلا يا خلي
وام جنقر العوقتك دي ام جنقر المركز
فانها ام جنقر الفيافي والوديان المدهشة عندما عبرت واتت الي المركز حيث الاقتصاد السبهلل وام جنقر السلفكة
ولكن ام جنقرنا ديك يا خليل هي ام جنقر غير
وليها طقوس واحترام وماسمعت لي بمرة خنبة عملت ليها ام جنقر لووووووول
وعندها نسوان متخصصات ونضاف يقال عليهم (عاديات) الزولة فيهم بتكون متملكة لكل كيمياء ام جنقر ...
________
وبعدين يا خليل ام جنقر البتاكلوها بالطحنية دي بطلت طواالي جنقرتها
وصارت اكلة بندرية لا بتشبه ام جنقرنا ديك ولا حاجة
فممكن كجلابة تشوفو ليها اي اسم تاني ممكن تسموها (ام جنقارة) لووووووول
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: طارق ميرغني)
|
| Quote: اجمل ما اكلته من لحم وشرموط في حياتي |
يا طارق ميرغني سلامات ورمضان كريم... أكيد إنت ما أكلت حُبارة Freshمشوية على جمر طلح؟ وبعدها شية نفس الغزال قبل أن يجففوها... والعشاء بكون (أم تفيفة) من لحم الزراف بالدهن! طبعاً (أم تفيفة) دي بالإنجليزي أسأل منها عبد الكريم يقول ليك.
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
| Quote: اجمل ما اكلته من لحم وشرموط في حياتي |
هلا يا طارق
ورمضان كريم وتصوم وتفطر بكل خير وعافية انت والاسرة الكريمة
ويا سلام يا طارق علي ملاح شرموط الغزال
ياخي ده ملاح تاريخي واسطوري وتاكل كل صوابعك العشرة بوراهو..
وبتعمل بمهنية عالية وحتي اضافات الويكة لزوم الملايقة تتم بمعايير (لووول) وكميات محسوبة بحرفنة
والناس الاكلوك ملاح شرموط الغزال ديل اكرموك وعزوك معزة عالية تستحقها يا صديقي الفنان
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
اكثر المستخرجات الدخنية التي تحظي بالاهتمام والتوضيب هي تلك الشهيرة المسمية بالدامرقا وللدامرقا طقوس وعدة شغل مميزة واكثرها تميزا هي البرم السوداء اللون التي ظلت تقبع ولسنين طويلة في دوولو ودلو هذا هو اسم المخزن والمطبخ الكبير والشهير الذي احتل تلك القطية المميزة التي شيدت لكي تكون مطبخ اخرج المئات من الصواني الشهية والعصايد التي هي ليس بخمج وكان الدخول اليه لنا نحن معشر الصغار لا ياتي الا لتادية غرض مراسلي او بالتلصص علي مكوناته في غياب الامهات والخالات والحبوبة التي ظل دوما تصدر الفورمانات الحازمة والجادة والموشحة بضربات ام دلدوم لكل من تسلل الي ارض ذلك التكل المقدس
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
Quote: يا كيكى رمضان كريم , دى كتابة طاعمة ياخى بتخلى الواحد فى حنين لواقع
لم يعيشه بل يتمناه , انداح يا صديق وأكتب لنا عن كردفان كما كتبت لنا من
قبل عن ودالنيل محل القمرى قيل , ودعنا بخيال طفل لم تكدر صفوه عنت الحياة
نعيش لحظات ممتعة فى تخوم وطن يعلم الله وحده بمصيره فى ظل هذا الواقع الكريه . |
هلا يا فيصل
وتحياتي ورمضان كريم وتصوم تفطر بالف خير وبركة
ويا سلام يا فيصل علي كردفان وتلك الربوع والفيافي الملانة حنية ودعاش وطبيعة كانت غنية تهب الجميع الخير
والسفر والتحليق الي تلك الازمنة والامكنة والشخوص يورث في الوجدان مرارة وحزن مخيف كون هذا الواقع الجميل صار مهددا في كل اركان ذلك الوطن الحميم
الذي نرفع الاكف حتي يعود كما هو موحد مليئا بالخير واهله الطيبين ومتحررا من سطوة زيف النخب ولصوص الشعب
وكل الود والتقدير يا فيصل
ومعا الي فيافي دينقا ام الديار وايامها العتيقة وصهيل الدخن
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
اولي مراحل دراما الدامراقا هي الكنفتة والكنفتة هي تقشير حبيبات الدخن واستخراج القشور التي تغطي سطح حبة الدخن ولقد برعت في ذلك الحبوبة التومة زوجة جدي يايا او عمر سندة وهو من نواحي كفيا كنجي وجد في هذه الاسرة اهلا ومسكنا وعشرة امتدت حتي مماته وورثه المنداي وسامبل وعفاف وفطيم وساروا علي دروب العشرة والانتماء والترابط مع الجميع.......التومة لها مقدرات تقشير وكنفتة عالية تحسدها عليها قشارات الفول في النهود وقد كانت تودي وصلتها الدخنية بمصاحبة اغاني وترانيم افريقية غامضة مليئة بالشجن والفرح والمرح وكانت هذه الاعمال الكنفوتية عند التومة تمتد لايام توديها بكل حب ومرح
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
| Quote: اولي مراحل دراما الدامراقا |
عبد الكريم ... بمناسبة عيش الدامرقا.. أكيد ناس محمد عبد الرحمن وجماعتو ما سمعوا حكاية أم بتّاري الغشّ الجماعة. لمن ضرب الدامرقا بتقلية شرموط الغزال وقام للصلاة وهو ما بعرف التكتح في القرآن قام قرأ: (الكرم وما أدراك ما الكرم... عيش دامرقا ييكة لحم .. بشيل كي وبلقم .. دمّ درسي الكبير إنترم)
التفسير: عيش دامرقا: عصيدة دخن مقشور. ييكة: ويكة. كي: كدا. بلقم: من اللقمة. دمّ: لمن. درسي: ضرسي. إنترم: إنكسر.
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
لااود ان امارس الاسقاط السياسى على هذه (النستلوجيا) ..لكن لااعتقد
ان هناك الان غزلان ليطبخ منها ملاح (الشرموط) ..فقد بلغ الحال مرحلة
(المس كول) ..والمس الكول مصطلح يطلقه اهل السودان على كمية اللحم
التى تقل فى وزنها عن ربع الكيلو ..فالمعتاد ان ياتى احدهم للجزار
طالبا (مس كول) ..وهى بالكاد تكفى لاعطاء (الحله) نكهة اللحم ...
فالمستهلك لايستطيع شراء ربع الكيلو من اللحم واكتفى بهذا المس كول .
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: لااود ان امارس الاسقاط السياسى على هذه (النستلوجيا) |
هلا
ونستلوجيا دي خوفتني عديل كده وابو خليل بالله ما يشوفوها يقول الممراح ده بقي مثقفاتي في غيابو الفات ده لووووول
وده زمانات (المس كول) يا محمد في كل الاشياء فقد صارت كل الاشياء مس كولية اللحن واللون
والبلد خيرو وافر وارضه وغاباته تضج بالكثير ولكنها النخبة وسلطة الجبهة الاسلامية الزيف التي هنبتت كل الاشياء وحولتها الي بور بلقع
وحولت اللحمة الي لحمة مس كووول ورسائل...
وكررررررر علي اللحمة المس كوول دي ياخي او كما قالت النعمة بت هدوي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
Quote: لتى تقل فى وزنها عن ربع الكيلو ..فالمعتاد ان ياتى احدهم للجزار
طالبا (مس كول) ..وهى بالكاد تكفى لاعطاء (الحله) نكهة اللحم |
يا محمد عبد الرحمن بمناسبة المس كول دي
اتذكرت بشير ود عبد الرازق لما مشي للامين ود حاج الطيب الله يرحمو
وقال عليك الله يا اللمين ادينو كمونية للكلاب بتاعتي
وبشير عائز يضرب الكمونية فطور وغداء
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: .لكن لااعتقدان هناك الان غزلان ليطبخ منها ملاح (الشرموط) |
محمد عبد الرحمن ... يوم ما ربنا يرفع قدمك على السودان – إن كنت خارجه- أديني خبر. أوديك كردفان الجنوبية تاكل شرموط فريش بتاع غزال في الفطور... نصطاد ليك الوزين (الأوز) من البحيرة قدامك .. نشويه ليك في جمر الطلح للغداء. نديك عسل بشمعه تصفي بيدّك.. والعشاء (أُم تفيفة). وبعدها شاي حليب صاموطي.. بكره الفطور –كان الله حيانا- لبن رايب عليهو كباية سمن بلدي وشوية عسل نحل أصلي... كفاك ولا أزيدك؟
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
| Quote: كنت بتاكلوا ملاح الشرموط بلحم الغزلان |
وكذلك فى تلك الاجواء أكلنا لحم أسد!!!! حدث ان أصطاد جارنا محمد مدنى رحمه الله بسيارته أسدا ذات ليله مظلمة فتم جلب الاسد الى الحى وسلخه ثم إطعام جل ابناء حى لحم ذلك الاسد ورغم حرمة لحم الهزبر شرعا لكن لم يفلح الدين السنى الحنيف فى إزاله بعض العوالق الوثنية المحليه من السلوك الدينى للكثير من السودانين ..الحكمة فى تناول لحم ذلك الاسد بواسطة الاولاد هو التشبع بالفروسية عبر لحم هذا الليث الذى تحول لقربان مقدس وعادة اكل لحوم القرابين المقدسة قديمة عند العرب فى الجاهليه كمانبهنا عبدالله الطيب 1921-2003 فى إستطراده لتفسير ايات غزوات احد بسورة ال عمران حين علل بقر بطن سيد الشهداء حمزة عم النبى صلى الله عليه وسلم وقطع "......" بواسطة هند بنت عتبة أكلة الاكباد ولوكها للكبد فى محاولة لإكتساب شجاعة من أشلاء أسد الله حمزة مثلما فعلنا فى صغرنا بلحم ذاك الاسد بحى الجلابة بالمجلد..
تحية لامجنقر والكنفوت وهى قشر حبات الدخن عندما يطحن فى الفندق ويمثل طعام جيد للحمير يوضع لها على طبق ..
تحية لمن كانوا يتحلقون فى ذلك الضرا فى أفطار رمضان ادم حلاق واولاد اجبر وحسن بنزى والدوخ وعمدة والسر وفاروق وبابو جقجوق وحسين نيتو وعمر ابوحديد وعبدالرحمن خال فايزة والارجوز ومكى والرحمة لمن رحل ..
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: احمد الامين احمد)
|
| Quote: وكذلك فى تلك الاجواء أكلنا لحم أسد!!!! |
هلا يا احمد
وكنت تخلي الجماعة ديل علي لحم الغزال فالبورداب ديل تقول ليهم اكلنا لحم اسد او في مقولة اخري (البرعص) حيجروا مننا
وتاني في كرتلة ما حنلم فيهم لووووووول..
ويا سلام ياخي علي الجد الوقور محمد مدني عليه الرحمة والخلود فقد كان عراب للحي ورجلا علي الوقار والاحترام
وبمجرد وجودك معه في الطريق المودي من السوق الي الحي كانت دعوة للالتزام والانضباط واتباع قوانين الطريق والصمت بكل احترام وتقدير
والتحية لذلك الضرا العامر والمحضور من ثقافات واثنيات عديدة شكلت الوجدان الجمالي لذلك الحي اللاتيني
التحية لادم حلاق وعمدة والسر ود خالتي حليمة زكريا
والتحية للخال محمدو عندما يزور ذلك الضرا في مرات معدودة ومحسوبة ومبرمجة بعناية ويلهبها بالمرح والحكاوي
والرحمة والخلود للخال محمد صالح عبدالكريم ذلك البادبوبي وابن المدينة الذي جبل علي نقل قيم البادية وثقافتها وحكاويها
الي تلك الجلسات الموشحة بابري تاريخي وعصيدة ليها ضل وشوربة تطرب عندما تتفرج الي ادم حلاق وهو يشربها بطريقته المميزة
وسنتابع
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: احمد الامين احمد)
|
ياسلام يا عبد الكريم
والبركة في رمضان الذكرك الدخن ومشتقاته العالية القيمة الغذائية
وشرموط الصيد دا براه حاجة تانية خالص ... أذكر ونحن صغار كان لوالدي
صديق من جهة حمرة الشيخ وكان يجلب لنا سنويا شوالا (جوال) من شرموط الصيد
وكنا نأكل منه حتى قبل أن نطبخه ...
وذكرتنا الأيام الخوالي وبرضو أحد أصدقاء الوالد يدعى محمد تمباك
كان له لاندروفر عتيق يتجول به في ربوع النيل الأبيض وكردفان يبيع التمباك
وكان في زمان عودته من ربوع كردفان يأتي محملا بأطايب الصيد والطيور
عندي إحساس إنو محمد مدني جاركم في مداخلة أحمد الأمين هو صديق الوالد
أيضا ود المدني والذي قضى قسطا كبيرا من عمره تاجرا في الجنوب ...
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: مرتضى احمد عبد القادر)
|
Quote: يا سلام يا عبد العزيز ياخي
ورمضان كريم وتصوم وتفطر بالف خير وبركة
وحزينة وملانة حنية هي تداعياتك علي ظلال ام جنقر والكنفوت وسيرة رمضانات الشواطي والمواني والمنافي البعيدة عن الوطن في زمانات الطفابيع وتهتك الاوطان...
رمضان البيت السوداني ظل ضاجا ونشطا وعالي الحماس في تجويد وتوضيب موجودات الارض السودانية التي كانت عامرة بخير الزرع والضرع السوداني....ولكن يظل القول هو قولك بان رمضان فينا قد (بطل) وصرنا نستحلب الزكريات والايام القديمة ونتدردق في سحب ومزن مرورها حتي ولو كان كورة او قرعة ام جنقر
|
عزيزي كيكي
عايز أكتب كلام عن العزيزة أم جنقر لكن مداخلة الأخ ابو خليل خلتني أتراجع واحتفظ بالنكهة بين الحشا المهجور.. وبين زماني الفات..
ما شاء الله..
مشيت الفطور وعلى التراويح أجي ألقى البوست تقيل وملان..
رمضان تكفينا
ومن ماضينا نستخلص الجمال والأمل في النهوض مرة أخرى يا وطن..
تحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Abdlaziz Eisa)
|
..نحن ناس عطبرة فول وقراصة ساكت و اول مره اسمع بام جنقر لما جيت جامعة الخرطوم
وبديت اول ما بديت المعرفة والصداقة في الجامعة مع بنات كردفان... وعن طريق صويحباتي الموضوع جره وبقى فيه خلط وشباب كردفان وكده .. المهم بدينا شويه شويه نعرف البلاد السمحة ديك
ومره كنت خالطه لي كردافي من المثقفاتية ..بتاعين الانطلوجيا والسريالية
اها سيرة ام جنقر جات..قمت سألته ام جنقر دي شنو
قال لي دي : ام جنقر دي مديدة دخن بخلفية درااااشه وكده
حبي لكردفان وطيبتها
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Manal Mohamed Ali)
|
Quote: ومره كنت خالطه لي كردافي من المثقفاتية ..بتاعين الانطلوجيا والسريالية
اها سيرة ام جنقر جات..قمت سألته ام جنقر دي شنو
قال لي دي : ام جنقر دي مديدة دخن بخلفية درااااشه وكده |
هلا يا منال رمضان كريم وحبابك في كرنفالات ام جنقر...
وكويس ماقال ليك ابو الشباب ده (ام جنقر منتج دخني ذو بنية وعي كنفوتية)
وبعدين ام جنقر الشوفتيها في الخرطوم دي ما حنعدها ليك فمن الضروري تاخدي ليك هبرة ذات اجازة الي ربوع كردفان
وتتعمل ليك ام جنقر بالمواصفات العالمية
ثم ااشربي و قارني لووووول
وتحياتي وتقديري يا منال
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: جعفر محي الدين)
|
Quote: صديق من جهة حمرة الشيخ وكان يجلب لنا سنويا شوالا (جوال) من شرموط الصيد
وكنا نأكل منه حتى قبل أن نطبخه |
هلا يا جعفر وحبابك يا صديق مدارات الزمن السمح
ورمضانك كريم
ويا سلام ياخي علي اكل لحم الصيد قبل طبخه
تخيل نفس الفكرة دي كنا بنعملها وقدينا ليهم زي ديشليون شوال بالجنبة كده
فالقصة طاعمة ولذيذة شديد...
وويا سلام يا جعفر علي صاحب والدكم (محمد تمباك ) ده ومتعة الدنيا هو ان تجلس وتتونس مع شخص جوال بنفس هذه الصفات
بكون حافظ ونسة جميلة وعوالمه بتكون ملانة ياخي بالشخوص
وننتظر احمد يفتيك في امر ود مدني ده
وتحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: احمد الامين احمد)
|
احمد الامين احمد
| Quote: وكذلك فى تلك الاجواء أكلنا لحم أسد!!!! |
يعني الجواك اسد ...ههه
كما يقولون اهل الشامبيون الجواك بطل
كيكي
ماتقول نحن اولاد خرتوم وتقشر بينا بأم جنقر
زات المفعول السحري والتي ضيف القوه كأكل لحوم الاسود
يالله ذكرتني صاحبي على غانم من كادقلي
ام جنقر كان تجينا فرش من كادقلي نقنج بها داخل المعسكر
ونضيف ليها السمسم المسكر مع الحليب (لزوم تخفيف شوية )
تاني مافي نوم للصباح غايتو الناس كان بتتعب معانا في الملعب
تاني يوم نخرج كل الطاقات في الملعب عفيص شديد
يوجد بتاع ام جنقر في شارع الصحافة زلط بالخرطوم ممتازة نوعا ما
----------------
ام جنقر شربناها في الخرتوم والسعودية لكن حقيقة تختلف من بتاعت الجبال
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: وليد عبد اللطيف)
|
ياسلام يامنال على ام جنقر ذات الخلفية الدراشة ..
عجبتنى جدا الخلفية دى ..اوعدكم بعد ماتنتهى هذه
(النستلوجيا) اشرع فى دراسة بمعاونة كيكى
(دراسة مقارنة بين ام جنقر وام على من حيث
فائدتها الغذائية للانسان) ...وحتى ذلك..
ننتظر اكمال اركلوجيا الكنفوت وكرنفالات
ام جنقر التى يبدو ان صاحبها مازال (يتحاوم)
فى دواعيس الوكرة ...
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: ناذر محمد الخليفة)
|
Quote: بسأل من صحبي الحبشي ..
دحن ما جا ماري عليك بي جاي يبارك ليك رمضان ؟! |
لوووووول
ورمضان كريم يا ابو النيز وتصوم وتفطر بالف خير وبركة
والحبشي زااتو يصوم يفطر بالف خير وبركة...
والزول ده مشي وووين اوع يكون ربطوه بس
وياريت يمر علينا بجاي وياخد ليهو قرعة قرعتين من ام جنقر دي
وبالمرة يعمل لينا ايضا سافوتة سافوتين فلقد خرمنا ليهو عديل كده لووووول
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
Quote: ياسلام يامنال على ام جنقر ذات الخلفية الدراشة ..
عجبتنى جدا الخلفية دى ..اوعدكم بعد ماتنتهى هذه
(النستلوجيا) اشرع فى دراسة بمعاونة كيكى
(دراسة مقارنة بين ام جنقر وام على من حيث
فائدتها الغذائية للانسان) ...وحتى ذلك..
ننتظر اكمال اركلوجيا الكنفوت وكرنفالات
ام جنقر التى يبدو ان صاحبها مازال (يتحاوم)
فى دواعيس الوكرة |
هلا وعدنا ياخي من دواعيس الوكرة حيث الانصاري تمساح وردمنا عصيدة حتي غلبتنا السواقة
عصيدة انصارية معتقة جدا جدا شكلها كده من زمن ود تورشين...
وغايتو يا محمد انا كن نضمت معاك في النستلوجيا والانطاكية الجابتها منال ديك الرهط الا يطلعني كرعيني منهم لوووول
بالذات صحبك ابوخليل جنو وجن والمثقفاتية
ولكن مقبولة الدعوة للتحليق في الوعي الام جنقري المتواجد بكثافة فيما يسمي بام علي لوووووول
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: (دراسة مقارنة بين ام جنقر وام على من حيث فائدتها الغذائية للانسان) |
محمد عبد الرحمن: مجال المقارنة مفقود بالمرة بين أم جنقر وأم علي. أم جنقر وكل مشتقات الدخن والمأكولات التي تصنع منه تُعمل للعريس قبل شهور من دخلته. والمثل بقول: أم جنقر وأم حليبين من الكورة إلى... ، وأم علي دي ما جايبة دخل في المواضيع الأهمّ والأكثر أهمية. أنا ما بفسِّر وإنت ما تقصِّر. والزول البياكل الدخن ما بنوم الليل .. بكون مساهر في العبادة بأنواعها. كلك مفهومية.
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: وليد عبد اللطيف)
|
Quote: ماتقول نحن اولاد خرتوم وتقشر بينا بأم جنقر
زات المفعول السحري والتي ضيف القوه كأكل لحوم الاسود
يالله ذكرتني صاحبي على غانم من كادقلي
ام جنقر كان تجينا فرش من كادقلي نقنج بها داخل المعسكر
ونضيف ليها السمسم المسكر مع الحليب (لزوم تخفيف شوية )
تاني مافي نوم للصباح غايتو الناس كان بتتعب معانا في الملعب
تاني يوم نخرج كل الطاقات في الملعب عفيص شديد |
هلا يا وليد ورمضان كريمياخي وتصوم وتفطر بالف خير وبركة..
وام جنقر فعلا طاقة الف ولياقة مية مية
وانا لو مسكت محل عمك شداد ح اعمل وحدة لتغذية اللعيبة علي مستوي السودان قوامها ام جنقر دي بس لووووول
وما شفت ولدنا كاكي بفرررررررر ماشاء الله زي المركب مكنة ارنب دي كلها من تربية وشراب الام جنقريات باكرا هههههه
وتحياتي وحبابك في الام جنقر
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: الصادق اسماعيل)
|
و(النبى نوح) فى ا لموروث السودانى تقال عند المغارب حيث يعتقدون
ان الاستنجاد بالنبى نوح يكفى الانسان شر العوارض ..
شكرا لاحمد الامين الذى التقط القفاز وواضح ان لحم الصيد عند اهلنا
فى المجلد وماجاورها لايؤكل فرش ...يؤكل بعد ان يأخذ حقه من التخزين
ويصبح بعد مرور الزمن عليه هينا سهل الاكل للاكلين ...وسعيدين بهذه
السياحة فى ربوع دينقا ام ديار ..,ياريت احمد يشتغل لينا (ون تو)
مع كيكى سياحة رمضانية فى ديار دنقا ام ديار ...
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: الصادق اسماعيل)
|
Quote: بوست ممتع
ونطالب بمداخلة دسمة من الأديب (آكل الأسود) أحمد الأمين
كيكي
البوست دا حدوا العيد.
ورمضان كريم. |
هلا يا الصادق ورمضان كريم وتصوم وتفطر بالف خير وبركة
وشكرا علي الحضور الي ساحة الكنفوت وفعلا نتمني ان يحلق بنا الاخ احمد عميقا فالرجل خبير بتلك الدروب
ولو ابو صلاح صحبك ترك عزلته الاسفيرية المجيدة وجانا بجاي بكون الامر سيجة وتمت...
والناس ديل عندهم كل اركلوجيا النقة بتاعة الدخن وتباعته
وتحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبدالكريم الامين احمد)
|
| Quote: وليها طقوس واحترام وماسمعت لي بمرة خنبة عملت ليها ام جنقر لووووووول |
عبد الكريم الأمين تصوم وتفطر على خير... يازول الجماعة ديل إتكلم معاهم بالعربي .. ما بعرفوا إنجليزي .. هسع باقي ليك في زول فهم (مرا خنبة يعني شنو؟) غيري أنا؟
آل أم جنقر بالطحنية آل... بعد شوية حيجوا يسوا لينا أم حليبين بالبيبسي ويقولوا عليها أم حليبين؟
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: دا يجى مصطفى عثمان يقول ليك كنتو جيعانيين ..غزلان (راسا عديل) ... |
محمد عبد الرحمن.... بمناسبة جيعانين دي.. في سنين الجفاف والتصحر التي ضربت غرب السودان في نهاية ثمانيات القرن الماضي.. لم نتأثر نحن في مناطق جنوب شرق كردفان (منطقة أبو جبيهة بالتحديد) ذلك الأثر كما في المناطق الآخرى. قال أحد شيوخ العرب عندنا: (نحن في أبو جبيهة ما بنجوع ولا الجوع بكتل فينا عندنا 16 أكلة بلا نار). وقد كان وخرجنا سالمين من تلك السنون العجاف وأفدنا غيرنا بخيرنا.
تصوم وتفطر على خير.
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
Quote: هلا يا محمد ولحمة الصيد الناشف ده حمي خفيفة
فاخوك جراد كفففف
فار بوص وكديس خلا كررررررررف
برنتا وورل لببببببب
وفي نمل ذو ريش لذيذ كده لذة تاريخية في جوبا اسمو (النقونق) ده تضربو وهو مشوي بالكيومت (الكيومت هي الدكوة)
بالاضافة الي وجبة دبيب مع صينين عيونهم صغار كده جو حفروا الامتداد الجديد لكنانة في بدايات التسعينات
وماعارف غايتو لحم الدبيب ده حرام ولاحلال ولكن غايتو لذيذ لووووول |
يا خليل أنا شايف تلغي فكرة شرا الأخطبوط بول دي وتواصل الاستعانة بخدمات الشبح قسطنطين،
لأنو بول دا في وجود كيكي بالنيوتريشن هيستري العجيب دا ما حا يواصل معانا لربع النهائي
على الأقل قسطنطين شبح (دا لو طلع صاحبك دا ما بياكل الأشباح ذاتا!) لوووول
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: فى كم جيهة ..الكواهله والبقارة والمسيرية وكلو ..ربنا يديم المحبة .. |
أخي محمد عبد الرحمن... سلامات
أولاً شكراً على الإهتمام. ثانياً: البقارة كقبائل وليست قبيلة تنقسم إلى:
1- أولاد حيماد: أولاد حميد في أبو جبيهة. التعايشة: في رهيد البردي. الهبانية: في برام.
2- أولاد عطية: الحوازمة في جنوب كردفان. المسيرية (حُمُر و زُرُق) في جنوب كردفان. سلامات: جنوب كردفان. رزيقات: جنوب دار فور. بني هلبه: في عد الفرسان جنوب دارفور.
3- أولاد راشد: يحسبون في السودان مسيرية ولكن في تشاد يسمون أولاد راشد وهم أغلبية في شاد.
وأظنك سمعت بالقول المشهور: (الساير عطية والمقيم حيماد والدخان البتلتل داك راشد الولاّد، تاكل ناقتي إنت يا ال...... الداج؟) قصة حرب قديمة لا داعي لسردها لأنها حتزعِّل قبيلة بالسودان.
هنالك رزيقات أبّالة وهم أبناء عمومة الرزيقات البقارة في الضعين. لكنهم يرعون الإبل في شمال دارفور.
أمّا عن نفسي فأنا حميدي من أبو جبيهة. وبالتالي أنتمي لمجموعة قبائل البقارة. (كثيرون يقولون قبيلة البقارة. البقارة ليست قبيلة بل مجموعة قبائل تحترف رعي الأبقار والضأن).
علاقتي بالكواهلة وهم من جهينة أيضاً كما قبائل البقارة، بجدي لأمي ولهذا لي دماية في الكواهلة. بس خلي بالك كواهلة شمال كردفان مش أي كواهلة تانيين)
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: حبيب نورة)
|
زين الرجال كيكي
كيف حالك و رمضان كريم
بوست دسم يثير الشرى في جسم ( الزول ) أتابعه بشقف و
إستمتاع عالي و أضحك ( سيد فول جرى ) قد تجمع فيه و تكسر عليه
أكلة الأسود و الضباع و النمور من كل إسفير و عتمور....
و لولا إشفاقي على القراء لقنا إن ( إنادم ) ذاته لحمه طاعم
كما و رد في سرد الحبوبات .
إركلوجيا الكنفوت ( هلبت ) ( تفرت ) كل أصدقاء الصبى
نتوقع دخول صديقي صلاح الأمين ليكتمل الثالوث المبدع و أصحابهم.
وشكرا
حامد شارف
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Hamid Sharif Abdelrasoul)
|
Quote: إركلوجيا الكنفوت ( هلبت ) ( تفرت ) كل أصدقاء الصبى
|
هلا يا حامد
وكل سنة وانت بالف خير وبركة وتصوم وتفطر علي الف خير..
واركلوجيا الكنفوت غابت والله وجابت والعرداية بتاعتها صارت ظليلة ووريفة بوجودكم جميعا
وكورة الدخن ناويين نسوقها في كل استخدامات الدخن
حيث البليلة بالبلح واللبن
وعصيدة الجير وطريقة صناعتها حتي تطل للعيان في الاعياد والمناسبات الرهيبة كعصيدة بيضاء فاقع لونها تسر الناظرين
ودايرين ايضا نشر لينا دخن( بتاع دامرقا) في الفضاية بتاعة الحوش ونشيل (مطرق) ونقعد نجاجي في غنماية السريرة
ولو الدكتور ابو القاسم قور وضب لينا اركلوجيا المكنفتة باللبن الحكاية بتكون مية مية
والبوست حيكون بالتاكيد بوست ساكوبيس
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
Quote: معقول انا مابعرف انوالبقارة هى مجموعة قبائل تمتهن
رعى الابقار؟ ..انا (ودام نخيل) خلى بالك ..القصة ومافيها
انا قلت اكتر وجهاتك التى تتحدث عنها ..لذلك ادخلتها
لك بين المسيرية والكواهله ..هذا كل مافى الامر ..
|
هلا
كنتونا شكلو كده عاوز يلخنك درس
او كما قال صالهو زول ناس ابو خليل داك
ولازلنا محلقين في المدارات والعوالم القديمة الضاجة
وسنتابع
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عمر التوم)
|
| Quote: تعرف انا بعمل في قاموس صغير لكل المصطلحات المذكورة اعلاه, لانو عندي زول مساح قديم شق الفيافي دي كلها ماشي حدو تشاد والجنوب واكيييد بيكون لابد ليهو على كم حاجة كده...لي عودة وبيدي النجيضة |
هلا يا عمر وتحياتي ورمضان كريم
ومرحب بيك شديد في المدارات الكردفانية والايام العتيقة
ونتمني لك التوفيق والسداد في امر القاموس الذي حتما سيكون اضافة اساسية ومهمة وياريت يشرح المهتمين في هذا الاتجاه
حتي تعم الفائدة...
وتحياتي الحارة للاخ المساح القديم وشوقتني لمعرفته والالتقاء به فوجود مساح جاب تلك الفيافي في حدود تشاد والجنوب بفيافها وقراها وغاباتها الرائعة بالتاكيد هو كنز كبير ومخزن لحكاوي وتجارب رائعة نتمني ان نقراها منه
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: سلمى الشيخ سلامة)
|
Quote: شكرا ليك يا حبيب يا جميل
لانه الرمضان دا فى الابيض ليهو طعم خاص وروح خاصة
شكرا ليك على نقلنا الى اماكن لم يتح لنا ان نعشها
وتحياتى للام القادمة
تحياتى لك ومحبتى التى لن تزوى قط |
هلا سلمي ورمضان كريم وتوصمي بالف خير ودهشة
وياخي شكر ليك انتي وعلي مشروعك الكتابي الراقي النابع من جوف ونبض هذا البلد وناسو الرائعة
ورمضانات الازمنة ديك والامكنة الباقية في الذاكرة بالتاكيد ليها طعم وروح مميزة وصارت قلوبنا وحروفنا تسافر اليها في كل رمضان من رمضانات البلاد البعيدة..
وشكرا يا سلمي كونك ولعتي جمر الحي وجعلت من السفر صوب هذه الاشياء ممكنا في هذا الزمن القاسي الصعب
وتحياتي واشواقي الكثيفة
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: فيصل عثمان الحسن)
|
Quote: قال لى يا خى سفروق ده كن صاب سلاح كان جلى عود وراح .
|
هلا يا فيصل وتحياتي يا زول يا وطن
والسفروق فعلا سلاح صيدي ذو كفاة ومقدرة عالية ولكن الشرط الاساسي هو انا يتوفر مستخدم مدرب وحريف وفنجري
ووجود شخص بهذه المواصفات تاكد بان عشاك يوماتي مضمون
------------
وبمناسبة السفروق والرماية دي يا فيصل
كنا في رحلة عمل في مناطق كردفان البعيدة ومعانا ضابط و كان رتبته رائد
وهو من الدفع الطلعوها ناس البشير ديل ولحقوها السوق العسكري بطريقة القطر قام
المهم ونحن في السكة ماشين لاقتنا اسراب من الجداد وادي وبوجود هذا الضابط قلت لروحي الليلة حنشبع في الجداد ده شبع رهيب
فلقد كان جداد كثير وراكي بكثافة..!!!
اها اخونا الضابط ده عمل رتكاز ونشن بطريقة عسكرية مميزة وضرب كففففففففف
تخيل الجداد كلو طار والراجل جلا الحكاية
من الديشليون جدادة ما ضرب ولا واحدة
الغربية المشهد ده تكرر زي مرتين كده وبالجد الزول ماعارف يضحك ولاعارف يضارب الضابط الطفش مننا الجداد ده
وطبعا مافي طريقة تضحك فيهو لانو ما من الذوق
ولكن تحت تحت كده الواحد كان ميت جدا جدا من الضحك
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Siddig A. Omer)
|
Quote: ايمانى لا يتزعز ابداً بأن شياطين الحكى....لا يصفدون بل يطلقون لكى يتحفونا...بلآمل.....
والله رجعتونا ذى كم سنة كده....
واصلوأ عنكم ما سكتوأ.... |
هلا يا صديق وحبابك يا الفردة القاعد بعيد
ورمضان كريم وتصوم وتفطر بالف خور ودهشة
ونعم يا صديق الحكي والتحليق صوب تلك العوالم امره قاعد علي الهبشة
وواقل دفرة من الحنين والاشواق بنلقي روحنا مسافرين عبر غيمة وريفة الي تلك البقاع الرائع اهلها
وتحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: محمد عبدالرحمن)
|
| Quote: ..ويكفى النيل ابونا والجنس سودانى .... |
محمد عبد الرحمن.. لو لم يخني حدسي فأنت عطوي والله أعلم.
بصراحة حكاية النيل أبونا دي عندنا فيها رأي... لأننا نحن عيال غرب.. ولاّ أنا غلطان؟ إن شاء الله الجماعة إياهم ما يقوموا يقبلوا علي ويقول عنصري جهوي وهلم جرا. زي ما قالت المغنية: لقيتني كيف؟
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Osman Musa)
|
Quote: ممكن تكون أحسن كتير من ال CORN FLAKES بتاع الخواجات ده .
يكون فيها فايتمينات بالجملة وPROTEIN عالى . وقالوا بتفيد وجع الركب |
هلا يا ابوعفان ورمضان كريم وتصوم وتفطر صحة وعافية وانت في تلك البعيدة
وام جنقر فعلا فيها كل الكارزيما بتاعة الكرون فليكس وتفوقها في الفائدة بكم سنة ضوئية كده
لكن حاجاتنا ما بنعرف نكشكرر ليها بطريقة علمية ونسوقها علي مستوي عالمي فالا لكن ام جنقر اليوم متجدعة في سيوبرماركاتت لوس انجلوس
واروبا زي الترتيب..
ونعم ام جنقر قادرة وعبر كم كباية كده منها
علي توضيب الركب ولك بعدها ان تصيح وتهتف كما صاح عادل امام ذات فيلم
انا ركبي حديد والاهلي حديد لوووووووول
وتحياتي
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: Nazik Eltayeb)
|
Quote: لحمة غزلان!!!!!!!!
دايرة ابلغ حرس الصيد بالجريمة......حسادة بس |
هلا يا نازك ورمضان كريم وتصومي بالف خير ودهشة
وانتي عارفة يا نازك حرس الصيد ده في الوعي الشعبي بتاع الفيافي ديك حكايتو حكاية ومكجن بدرجة بعيدة
اول شي بسموه (بوليس الككو) لووووول
فعشان كده بالله خليك زولة حنينة ما توري لينا بوليس الككو ده يجي يقبضنا باثر رجعي وخاصة بعد حكاية لحم الاسد دي
لووووول
وتحياتي وتقديري
| |
|
|
|
|
|
|
|
|
|
Re: اركلوجيا الكنفوت...وصهيل الدخن وكرنفالات ام جنقر....!!! (Re: عبد المنعم سليمان)
|
Quote: غايتو جنس حكاية
الزول دا بتاع آبل باي وباسكن روبنز شابكم ام جنقر ودخن ودخان
الحكايات دي هو ما دخلها بل اكلها سماعا من الاخوة الكرام احمد وصلاح
دا بتاع ام جنقر دا ..؟
دا والله يضوق ام جنقر ساي يدوه جلكوز في حنانو لامن يآمن ..
___
الحمد لله ال ما قال اكل لحمة الاسد الداك
لانه البياكل لحم الاسد ملاسي ما بقدر ياكل لحمو (هههههه)
قال ام جنقر قال
ام جنقر بنت عبد المطلب |
هلا يا بيجو وحبابك
| Quote: دا والله يضوق ام جنقر ساي يدوه جلكوز في حنانو لامن يآمن |
والله يا بيجو انتي زولة حقاااااااااارة ويوم الم فيك مطرف الا تعرفييييييي الله واهد(اوكما قال ام جمينا)
ومافي شي بخلينا نجاجي المرجف الشهير بملاسي ومن لف لفه في الاسفير ده الا لحم الاسد الاكلناه ده
حسع انت لو كان ضربت معانا لحمة الاسد دي زمان كان عرفت ضايرت المدعو عمار محمد ادم مش كل مرة عامل ليك كرو كرو في راسك المدقوس ده لووووووول
| |
|
|
|
|
|
|
| |
عبدالكريم الامين احمد
Abdlaziz Eisa
محمد عبدالرحمن
khaleel
cantona_1
احمد الامين احمد
جعفر محي الدين
مرتضى احمد عبد القادر
منتصرمحمد زكى
وليد عبد اللطيف
حبيب نورة
ناذر محمد الخليفة
Abuelgassim Gor
الصادق اسماعيل
Ashraf el-Halabi
عبد المنعم سليمان
Kabar
عمر التوم
سلمى الشيخ سلامة
Siddig A. Omer
طارق جبريل
Elsanosi Badr
Nazik Eltayeb
Osman Musa
فيس بوك
تويتر
انستقرام
يوتيوب
بنتيريست