|
|
 تداعيات عثمان مرزبة الامنجي الداير يتوب...!!!!
|
عثمان مرزبة يد طالوش وصدر صبة وعضلات تبش تبشنة تاريخية وفي بدايات بزوغ فجر عضلاته الرهيبة في كراكير ذلك الحي الفقير اشتهر سريع بين اقرانه كدشماني لا يشق له غبار وحامي حمي الفريق في حفلاته ومبارياته الكروية مع فريق الحنالفة
ورغم كل الخصائص العنيفة الا ان مرزبة كان ودودا وبشوشا ومحبوبا بين اهل الفريق لما طلت عليه من شهامة ونخوة
وتسخير مبرر لعضلاته التبشية وهوكاتو الذي وصفت بانها تفوق حقنة الملاريا من يد التمرجي الشهير (دنقولة)....!!!
|
|
 
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
هكذا نمي وشب (مرزبة) وسط اسرته التي لاتقوي من شظف العيش علي توفير وجبات كافية له ولاخوانه الكثر ليجد لنفسه
طريقا وعملا في الاماكن المطرفة من الاسواق ليمارس العتالة الكروباوية في مخازن كبار التجار في المدنية...وسارت الامور ورغم صعوبتها سلسلة وشريفة وظل مرزبة ممارسا لتسخير هولاكاته وضرباته اللاذعة بكل نبل ونخوة حية تقي الفريق من مستهبلي الحفلات وصعاليك الحلال وحرامية النسوان.....
الا ان حط في سماء الحي وبعد غياب طويل في اروقة الجامعات ومعسكرات الجبهجية (علي) ابن ذلك الحي الفقير الذي ظهرت عليه بوادر نعمة وثروة وعربة من النوع الليلي علوي ادهشت عند حضوره بها ذات عصرية من عصريات الحي
كل الفتية المتجمعين في ميدان الدافوري وشهقو عاليا عندما صاح احدهم بان صاحب هذه العربية هو (علي) ود ناس عثمان
بتاع الطاحونة الحفتان داك ياااااااااااااخي
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
كانت ايامات الجبهجي (علي*) التي قضاها في اججازته تلك ايامات زاخرة بالشمشمة والاشاعات وسط الفريق عن سر التحول الفجائي الذي حل علي اسرة (عثمان الحفتان) من كراسي ليبيا والسور الطوبي والجير والخرفان التي ضبحت وبالاضافة الي زيارات بعض علية القوم من جبهجية المدينة الذين زارو ولاول مرة ذلك الحي الفقير ويحملون مالذ وطاب من خراف وبطيخ وبلح بركاوي لم يتذوقه (مرزبة) ذات يوم....
كان يمكن ان تمر زيارة 0(علي ) الجبهجي دون ان يلتفت الي مهارت (مرزبة) الاساسية في الدشمان والهوكات ولكن حصلت المعجزة عندما قرر كبار اللصوص مجازفة منزل عثمان الحفتان ذات ليل وتضرب الكواريك عاليا للغوث والمساندة اللوجستية ليطل مرزبة اول الناجدين ويطقطق الحرامية ويقبض عليهم ويربطهم في لمحة كالبرق مما اعجب علي الجبهجهي الذي قرر في ليله ذلك تسخير مقدرات هذا المارد لخدمة المشروع الحضاري بكل السبل ضد الاوباش من معارضي الخراطيم
والمارقين....!!!
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
ياريت لو نمت اليوم داك وخليت الحرامي سرق وطلع ديش الجبهجي الملعون ده...!!!هكذا وصل مرزبة سريعا الي قرار محاولة مسح تاريخيه العجيب الدموي...ولمن وصلت مع ( علي الجبهجي ) بالليل ديك نزلني في معسكر بعيييييييد في طرف الخراطيم ونقة (وس وس وس) في اضان زول عندو دقن كبيرة وفي النهاية قال ليهو (جزاك الله خير ) وفرتق....!!!!
استلموني يا معلم وحلقوني صلعة من قول تيت وجرحو ليك فروة راسي دي لمن امنت....!!!
ولقيت روحي في عنبر فيهو (ناس عيونهم) حمر خلااااص ومافي زول بتكلم مع التاني....!!!
نوم مافي و كوابيس وقرمت زااتو لفريقنا وحفلاته ورجفت يا معلم من الهواء والدقاني (علي ) وناسو ديل مودني ويين.. يارب.!!!!!!
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
وكانت هذه هي ضربة البداية وانطلاق ساعة الصفر عند مرزبة الي كراكير وبيوتات التعذيب وفقد استطاع الدقانة نزع الرحمة والرافة من قلبه ودور ليك في البشرية الخونة والمارقين اعداء الله ديل..
شي خلع اضافر
وشي ضرب هووكات في الرقبة
والبطن وشلاليت..جوز ومرات اربعة لساتك فووق
وشي مسمامير في الراس
وشي الطيارة قامت وارنب نط
وشي يا معلم طشت ملااااااااااااااااااان موية يرفعو الخاين العميل عدو الله اربعة ساعات ونص لمن يااامن زااااااااااااتو..!!!
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
Quote: وكانت هذه هي ضربة البداية وانطلاق ساعة الصفر عند مرزبة الي كراكير وبيوتات التعذيب وفقد استطاع الدقانة نزع الرحمة والرافة من قلبه ودور ليك في البشرية الخونة والمارقين اعداء الله ديل..
شي خلع اضافر
وشي ضرب هووكات في الرقبة
والبطن وشلاليت..جوز ومرات اربعة لساتك فووق
وشي مسمامير في الراس
وشي الطيارة قامت وارنب نط
وشي يا معلم طشت ملااااااااااااااااااان موية يرفعو الخاين العميل عدو الله اربعة ساعات ونص لمن يااامن زااااااااااااتو..!!! |
ابداع !!
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
والشرتيت دور يا معلم وكل كاسوري والتاني الجنيهات دي تتطاقش واخوك ورت معاهو ورة شديدة
اشتريت رقشة
شوية شوية اشتريت امجاد
شوية شوية يا معلم ركبت عربية (جياد)..
والحلة والفريق بقيت افط عيد وامشي العيد التاني وبعد شوية رخيت ليك حنان الحلة زااتهم
(مالي ومالهم يا معلم عرست لي واحدة خرطومية ديري لاند تقيل)
ارضع بالليل وبالنهار امشي اطقطق ليك الكافرين اعداء الثورة ديل والقصة واااارة يامعلم
ونعود
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
اها يوم كده ما معلم جانا بوكسي ملااااااااان غنائم و فارات قالو ديل (اعداء الله) كفار...وجدعوهم ليك يا معلم في
(السلخانة) حيث قلع الاضافر والشلاليت من طرف...!!
وخشيت عليهم بسوط لزوم التسخينة والتجهيز و(دق الخروف) وتجهيزه للنفخ والسلخ...!!!
شووو شوووين وضرب من اطرف...!!!
الله..! !
اشوف ليك (علاء الدين) ود عمك ادريس امام الجامع بتاع الفريق...!!!
يا الله ياخي
علاء الدين ادريس ده الجابو شنو مع الكافرين واعداء الله(علاء الدين ده بقي كافر ولاشنو)....!!!!
مع بواقي عدم الرحمة اللسع في القلب ديك قطعت ليك واحد شوووووووو في علاء الدين ده لمن ختاها في حنانو
ونواصل
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
Quote: يا معلم عملو لي (تجوال ابن لذينة ) في الصور المعلقة في الحيطة وقالوا لي شفت ديل..ديل يا مرزبة كفار واعداء الوطن وخونة ومارقيين وواقفين ضد الله زااتو...
بصراحة حكاية زول يقيف ضد الله ..ما سمعت بيها الا عند زولي الابو دقن الكان حايم معاي في تفريجة الصور..
كيف زول يقيف ضد الله..؟؟
ايوووه ديل يا معلم دايرين طقطقة وهوووكات من النوع التقيل عشان ياامنو.....!!! |
كيكي يا مبدع
باسم الدين إستباحوا كل المحرمات
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
يامعلم نسيت ليك تعليمات الضرب والسلخ الاداني ليها الضابط ابو دقن وجريت علائ الدين جنباوي
عشان افهم السالفة شنو وليييييييه الناس ديل جابو هنا وهو ود عمك سيد الدين زاااتو وامام الفريق...!!!
وفهمني ليك علاء الدين بانو المعاهو ديل كلهم اولاد الفريق وجابوهم هنا لانو (علي الجبهجي) شال الميدان بتاع الكورة في الفريق وجاب صينين وخواجات داير يبني عمارة كبيرة وعريضة...وكسر سوق الحلة محل ناس عمك (فريني) وعمك عمر سمك وجهجهة ليك باكات الحلة والبشرية والامة دي بقت حق االاكل والشراب في تلتلة
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: khaleel)
|
Quote: مرزبة مثال للشخص المعتوه
كان يخيف اعتي المعتقلين وله عبارة شهيرة يخيف بها المعتقلين
وهي عبارة
اكلك وللا امك بتشاكلك |
نعم ياخلي
هذا هو مرزبة المعتوه عديم الرحمة والشفقة
والذي يعذب ويضرب الشرفاء بكل دم بارد...
تونبه الان الجرائم والشتائم والهووكات التي اطلقها في تلك الاجساد الطاهرة
ود اللذينة
| |
|
|
|
|
|
|
|
|
|
Re: تداعيات عثمان مرزبة الامنجي الداير يتوب...!!!! (Re: عبدالكريم الامين احمد)
|
واها ظاهرنا وشترنا يا مرزبة الناس ديل بالحجار فجابونا... هنا... بالبوكسي...!!!
لتطل سحابة علي خفيف من الحنية من الشفقة بعد سنين طويلة من القساوة والرحمة التي نزعت من قلبه وهطلت بعض زكريات الحي وايامه الاولي فيه ولكنه قمع كل ذلك سريعا عندما تذكر الرقشة والامجاد والقبضة الثمينة والعافية في الرضاعة الكافية حيث (الديري لاند )ابو شحم ولحم في انتظاره ليلا...
وكمان معقول يسمع كلام الاولاد المطاميس ديل..ويكضب كلام (شيخ) علي...!!!
حسع بكون يازول شيخ علي ده شال الميدان عشان ينبي جامع كبيرررر ومستشفي وروضة
ولاولاد الصعاليق ديل دايرين يلعبوا كورة بالعصر وبالليل يتدردقو مع الجكس في الميدان...
يازول هووي شيخ علي ده ما بكضب وهيييييع يا زول ده علي ابو دقن...!!اولاد مساخيت صعلوقين
وووقعت ليك كاسوري في ناس (علاء الدين) اعداء الدين الكفار ديل من طرف ودورت فيهم هووكات تقيلة وعيال حسودييييين خلاص (تخيل زول فيهم رمش مافي)..ولاقال لي براحة يا مرزبة احنا اولاد فريقك....
| |
|
|
|
|
|
|
|
|
|
Re: up (Re: خالد عبد الله محمود)
|
Quote: كيكي يا حرامي ..
ده مش فلم أحمد زكي و محمود عبد العزيز وممدوح عبد العليم (نسيت أسم الفلم والله ) ؟؟ |
هلا ياخالد
واقسم ليك بالله العظيم
لاشفت فيلم احداثو تتشابه مع هذه الاحداث ولاسمعت بيهو زاااتو..
وان تطابقت هذه النقة في اي جزئية منها مع فيلم و حدث او حكاية مشابه في مكان اخر..
فاشهد بانني هو من نجرها من راسي المدوقس...ده..!!!
وياخالد ياخي لمن اترس لي قصة معقول اترس فيلم مصري..؟؟
ياخي ادينا معاك مساحة وزمن يارجل
| |
|
|
|
|
|
|
|
|
|
Re: up (Re: عبدالكريم الامين احمد)
|
البحير (اميركرتونة) تخيل امير كرتونة الفارة الكنا بنطقطوا لمن كان عامل فيها بجازف الجكس
تف لي في وشي...زي السلامة عليكم وقال لي شنوووووو..؟؟؟
قال لي (مرزبة يا سفاح ياتافه)...!!!!
يا معلم انا وفردتي (دبشك) ضايرنا ليك العيال ديل ورقدناهم سلطة وامير جبت ليهو هواء بعد يومين
ساقو لسلخانة (قلع الضفر)... قلعوا ليهو خمسة ضفر زي السم من (كراعو الشمال) سبعة يوم بمشي زي ود الطهور.....!!!!
اها بعد سبعة يوم خارجو الاولاد الصعلقوقين ولمدة شهر كل واحد فيهم ضروري يجي يعمل تمام
وبلم ليك فيهم ببقطع فيهم كف كفين وانا ماشي....!!!!
| |
|
|
|
|
|
|
|
|
|
Re: up (Re: عبدالكريم الامين احمد)
|
والقصة وااااااره مع اخوك...وره شديدة خلاص
وشوية شوية من مكاتب الالزامية الجبنا خشيت لي في موظفة مرطبة و(بايركس) وعندها 5 رقشات
ومربطة يا معلم (قندول عيش الريف ما زيها) خشيت ليك معاها في اقرب عرس جماعي(رافسنجاني) ودبلت الدفاع بتاعي ...وبقيت عندي جوز وااحدة في بحري والثانية في امدرمان........!!!!
اها مع الترطيبة والنغنغة اخوك بقي اسمو (شيخ مرزبة) وبقيت اشتغل تعذيب خسوسي..!!!
ماخليت ليك حبشي ومصري وارتيري وجزائري وتونسي والخواجات ديل تقطع في الواحد فيهم (كف دبل جنت) تخلي وشو زي الطماطم....!!!!
| |
|
|
|
|
|
|
|
|
|
Re: up (Re: عبدالكريم الامين احمد)
|
اها يوم كده يامعلم مع العصرية كده اسمع ليك صوت بوكسي خاشي تووش واشوف ليك جلاكين ممكن زي عشرة جلكين كده مربطين ليك عيونهم..ومربطين ليك اياديهم من الخلف... طيارة قامت علي خفيف...
اها صفارة السلخانة ضربت ولفحت ليك السوط بتاعي.... عشان ندور كاسوري في غنيمة الكفار
اعداء الدين...والعملاء ديل....
| |
|
|
|
|
|
|
|
|
|
Re: up (Re: عبدالكريم الامين احمد)
|
شوووو شوووو سوط سوطين القي ليك روحي بضرب في عمك ادريس امام الجامع....
يا الله ياخي..
عرفنا علاء الدين ولدك يا حاج ادريس بقي كفار...انت كمان بقيت كفار... سبحان الله والدنيا دي خربت ولاشنو...
شوووو شووووو في الجلكين الجنبو....القاهو ليك منو...عمك عمر سمك...!!!
حتي انت يا عمر سمك بقيت كافر..
لاحولا علاء الدين ده خرب الحلة والفريق ده كلووو ولاشنو...
منو..؟؟
ده عمك فريني...!!!!
يا الله ياخي الحلة دي قصتها شنو ياربي كلها بقت كفار ولاشنو...؟؟؟؟
لا ياولدي احنا يانا نحنا الزمان زاااتنا بس زولك (علي الجبهجي) ده كسر الدكاكين ولمن قمنا وكوركنا اهو جو ناس قبضونا وجابونا بالبوكسي هنا...!!!!
| |
|
|
|
|
|
|
|
|
|
Re: up (Re: عبدالكريم الامين احمد)
|
سحابة اخري من الحنية طلت سريعا في قلب (مرزبة) الذي غادرت الشفقة والرحمة مواني ومرافي قلبه من اثر التعذيب والنعمة والون تو ابو ديري لاند في بحري وامدرمان وضباب سيرة الرقشات الرقدت هبطرش والامجاد والاتوس ودكان الاتصالات والشرتيت الوفير الذي يهيه اليه (علي الجبهجي) من دون حساب لايزال في الافق...
ورغم هيبة عمك ادريس وطعونية سن عمك عمر سمك وفريني الا مرزبة لم يتواني في ضرب اولئك الجلاكين ضرب غرائب الابل الجلكونية وينفذ تعليمات ضابط ابودقن في ضرورة تفسيح هولاء الجلاكين الاشرار اعداء الله والثورة واعداء التنمية وتاديبهم حتي يتادبوا ويقعدو في التراب بلاش لولوة
ودكاكين معاهم....
ونعود
| |
|
|
|
|
|
|
|
|
|
Re: up (Re: عبدالكريم الامين احمد)
|
كيكى يا سيناريست يا رهيب
وان عاد صاحبنا من غيه وغيبوبته فقد وصل السيل الزبى ولات ساعة مندم
فعلا شبيه بذلك الفلم الذى اشار اليه خالد ولكنى اصدقك بانك لم تشاهدة وان كان جميلا
| |
|
|
|
|
|
|
|
|
|
Re: up (Re: حامد محمد حامد)
|
Quote: وان عاد صاحبنا من غيه وغيبوبته فقد وصل السيل الزبى ولات ساعة مندم
فعلا شبيه بذلك الفلم الذى اشار اليه خالد ولكنى اصدقك بانك لم تشاهدة وان كان جميلا |
هلا ياحامد
وحبابك ياخي..
ومرزبة قصتو عجيبة فجميعنا في انتظار معرفة هل يعود وعيه ام لا..
خالد بالجد خلعني بالفيلم المصري وشوقني في نفس اللحظة اني اتفرج في ذلك الفيلم حتي اري التقاطعات بينه
وبين هذه السرديات...وبالتاكيد بكون فيلم مميز طالما فيهو الاسطوري احمد زكي
| |
|
|
|
|
|
|
|
|
|
Re: up (Re: عماد شمت)
|
كيكي يامبدع سلام:
ياخي ادخلتنا الحدث من جيث لا ندري ...داخلنا نتعاطف مع علاء الدين وابوه....
وندين تغول رأس المال علي الممتلكات العامة ...وبالتاكيد مثل هذه الفعايل لابد ان تختلط
مع الة لاتعذيب ...بعدين ياخي ميرزبة هذا اختار بنفسه ان يبتعد عن الفريق والحلة ام ان العمل
يتطلب ذلك...حتي يتم الاجهاز علي ماتبقي في موانيه من رحمة
تحياتي لصلاح والعائلة الصغيرة والكبيرة
| |
|
|
|
|
|
|
|
|
|
Re: up (Re: ibrahim alnimma)
|
Quote: ياخي ادخلتنا الحدث من جيث لا ندري ...داخلنا نتعاطف مع علاء الدين وابوه....
وندين تغول رأس المال علي الممتلكات العامة ...وبالتاكيد مثل هذه الفعايل لابد ان تختلط
مع الة لاتعذيب ...بعدين ياخي ميرزبة هذا اختار بنفسه ان يبتعد عن الفريق والحلة ام ان العمل
يتطلب ذلك...حتي يتم الاجهاز علي ماتبقي في موانيه من رحمة
تحياتي لصلاح والعائلة الصغيرة والكبيرة |
هلا يا ابراهيم
ومشتاقين ياخي
وراس المال الطفيلي الجبان يا ابراهيم يحمي اشيائه بتشويه افراد من صلب هذا المجتمع الطيب
وتفريغ انفسهم من شحنات الرافة والشهامة وتحويلهم الي مسخ يهوي الاموال والطفيلية المنومة باسم الرب..
وكل التحايا ياابراهيم
وستصل تحياتكم انت وعماد الي الاخ ابو صلاح باذن الله
| |
|
|
|
|
|
|
|
|
|
Re: up (Re: عماد شمت)
|
Quote: واصل ياجميل
مع تحياتي لك وللاخ صلاح والاسرة الكريمة |
هلا ومرحب يا عماد
وكل التقدير والشكر علي المرور الي مدارات مرزبة العجيب
| |
|
|
|
|
|
|
|
|
|
Re: up (Re: عبدالكريم الامين احمد)
|
يا باشمهندس سلامات
سرد جميل ومشوق نتمني تواصل نشوف تداعيات التوبة بدت كيف ..
بعدين لا شفنا فيلم يشبه دا لا حاجة
ولا في تقاطع لا تواصل
جيراننا عندهم بوليس سياسي
ونحن امن جبهة ...
بعدين ناسهم بيكوركوا وولادنا صناديد
ود وتقدير
| |
|
|
|
|
|
|
|
|
|
Re: up (Re: HAIDER ALZAIN)
|
| Quote: تداعيات عثمان مرزبة |
يا كيكي اختار اما انت من العباسية أو الديم ؟؟
سيناريو مشوّق ..
| |
|
|
|
|
|
|
|
|
|
Re: up (Re: Mohammed Ibrahim Othman)
|
Quote: يا كيكي اختار اما انت من العباسية أو الديم ؟؟
|
هلا يا ود ابراهيم
ونفسي ياخي اكون من العباسية او الديم فهي احياء ضاجة بالشخوص وفيها عوالم مدهشة
ولكن انا من حتات كثيرة فيها وهج وروح العباسية والديم
| |
|
|
|
|
|
|
|
|
|
Re: up (Re: HAIDER ALZAIN)
|
Quote: بعدين لا شفنا فيلم يشبه دا لا حاجة
ولا في تقاطع لا تواصل
جيراننا عندهم بوليس سياسي
ونحن امن جبهة ...
بعدين ناسهم بيكوركوا وولادنا صناديد |
هلا ياحيدر الزين وحبابك
وبالفعل كل اشيائنا تختلف عن اولاد بمبة ديل علي كل المستويات
حارتهم ليس هي حارتنا والشخوص واسقاطاتها ليس كمثل شخوصهم الهشة..
وكل تقدير علي المرور وسنواصل في حكايات مرزبة وسيرة تداعيات توبته
وكن بخير
| |
|
|
|
|
|
|
|
|
|
Re: up (Re: Siddig A. Omer)
|
يا سلام يا عبد الكريم علي الابداع و الخيال الخصب
وين كانت هذه المواهب زمان في الكلية ؟؟؟
بالمناسبة حامد محمد حامد الدخل معاك ده اسم علي اسم
لذلك وجب التنبيه عشان ما يحصل ما لا تُحمد عقباه
و نبقي رواية سودانيزاونلاين القادمة تأليف المهندس عبد الكريم
و الله مشتاق ليك كثير تحياتي لكل الشباب بطرفكم
| |
|
|
|
|
|
|
|
|
|
Re: up (Re: Hamid Elsawi)
|
تخارج الجلاكين العشرة ما بين كدمة في العين اليسري واليمني وما بين ورم سلاخي في وش عمك عمك سمك
وفتلة شاسي عند الرزين عمك فريني...ورغم كل القسوة والشواء والكبع النضيف الذي مارسه مرزبة وفردته (دبشك) ضد هولا الرجال الاشاوس الا انه لم يحرك ساكنا ولم ترمش عينه الا بقليل من الحنية قمعا سريعا عندما هطلت في مخيلته سيرة الترطيبة والشرتيت والفكة التي كانت تاتي اسبوعي في شكل حوافز ومنح وظروف شحمانة ولحمانة جنيهات وفكة....
وليوواصل مرزبة في سكة الديري لاند وليجد له من ست الكوفير (ثريا) زوجة ثالثة تضح الي قلبه القاسي بعض السكينة ومزيدا من رضعات الديري لاند والرضع الليلي الوفير....!!!
اها يا معلم يوم مع العصرية كده اشوف ليك (سلخانة النسوان) خاشي ليها بوكسي ملان نسوان ملية عجيبة وكواريك وسكلبة في السماء (واااااي واااااي) يا جبهجية يا حرامية ...ونبذ نسوان تقيل....مشيت اكشف القي ليك يازول زميلاتنا في اخوات نسيبة بطقطن ليهن في نسوانين كثاااااااااار خلاص,,,
| |
|
|
|
|
|
|
|
|
|
Re: up (Re: عبدالكريم الامين احمد)
|
الله ياخي
اشوف ليك خالتي نفيسة ام علاء الدين...وحجة خديجة وحجة كلثوم شنكارات ...
يا الله ياخي نسوان الحلة ديل كمان متين بقن كفار...!!
علاء الدين دي خرب الحلة دي ولاشنو...عمك ادريس بي كفار وخالتي نفيسة ونسوان الحلة كلهن بقن كفااار...
يا الله ياخي القصة دي شكلها كده باظت من كبارها...!!!
(الحمد الله انا زااتي اتخارجت من الحلة دي كان انا زااااااااتي بقيت اكبر كفار )....!!!
ياحجة نفيسة مالكم...والجابكم هنا محل سلخانة الكفار دي شنو يا حجة..؟؟
منو...عثمان مرزبة,,,... ولامنو..؟؟؟
تفففففففففف عليك يا وسخ يا تافه...!!!
نفيسة دي يا معلم وقعت ليك فيني نبذ وشتم تقيل....
وعرفت منها بعد النبذ داك بانهن جابوهم هنا لانو نسوان الفريق ظاهرن وشترن علي الجبهجي بالحجار لانو
كسر المدرسة الفي الحلة وقال داير يبني مدرسة جديدة للوليدات بالقروش....!!!!!
لم يفكر مرزبة كثيرا في كلامات النسوان الكفار ناس حجة نفيسة ديل واتخارج سريع سريع من سلخانة النسوان ليترك الي اخوات نسيبة تجضيم العجوزات الشمطانات و(تقطيع اوصالهن) ومعط شعرهم وضربهن ضرب عجائز الابل الكافرة...!!!!
| |
|
|
|
|
|
|
|
|
|
Re: up (Re: عبدالكريم الامين احمد)
|
Quote: مات ابراهيم فى عهدهم لانه رفض أن يذهب الى مستشفياتهم.... وقال قولته المشهورة "انا أبو دقن....أمشى للداكسين ديل".....فمات......
ذهبت الى الخرتوم ابحث عنه بعد ما يقارب العشر سنوات تحت شجرته الشهيرة بجانب "بابا كوستا" القديم....فلم اجده و لم أجد شجرته فقد رحلت معه و كل احبائه....له الرحمة والمغفرة...
استمر ....يا مان...نحنا هنا....
|
يا سسسسسسسلام يا صديقي يا فردتي الذي اشتاقه
ويا سلام علي ابراهيم دكس
انهم ملح الارض وسادتها يا صديق نشتاقهم في هذه الغربة البعدية ونجتر ايامهم وجنونهم وحياتهم الضاجة بالجمال
والحب والطيبة والتواضع وهم احرف الناس في كل الاشياء..
نعم يا صديقي سنحكي ونتونس ونمارس التحليق من صلب الحارة السودانية الملانة بناس جميلين زي ابراهيم دكس
وعمر كلتش وعباس كرونة..واسامة كورنر..
كن بالف خير يا صديق
ومشتاقين بالجد..
وتحياتي لكل الشباب بالخور
ولصديقي التاريخي الدري
| |
|
|
|
|
|
|
|
|
|
Re: up (Re: عبدالكريم الامين احمد)
|
Quote: يا سلام يا عبد الكريم علي الابداع و الخيال الخصب
وين كانت هذه المواهب زمان في الكلية ؟؟؟
بالمناسبة حامد محمد حامد الدخل معاك ده اسم علي اسم
لذلك وجب التنبيه عشان ما يحصل ما لا تُحمد عقباه
و نبقي رواية سودانيزاونلاين القادمة تأليف المهندس عبد الكريم
و الله مشتاق ليك كثير تحياتي لكل الشباب بطرفكم |
هلا يا دفعة هلا..
وياخي ايام الكلية ديك يا حامد مع دروينغ2 ودق العيش العجيب داك
باقي ليك في قلب ولا قوي علي هييك كلامات... ديل يا حامد سلخونا سلخة خروف ياخي ههههه
حامد محمد حامد
تشابه وتطابق اسامي رهيب والغريبة حامد قبل كده علي ما ازكر عامل بوست عن التشابه بتاع الاسامي في المطارات
كل الود واظهر كثير يا حامد حتي يعود الزمن الجميل
| |
|
|
|
|
|
|
|
|
|
Re: up (Re: عبدالكريم الامين احمد)
|
القي ليك شيخ علي راكب المرة سرج وهاجرها ليك هجرة عجيبة خلاص...!!!
ده شنو ...ده...!! يا وسخ
راكب في المراة دي برضها كفار ولاشنو...!!
والراس جاط وسخن ...
اكتل شيخ علي ده وانسي الرقشات والشرتيت والامجادة والترطيبةو رضع الديري لاند الثلاثي الابادة
ديري في الخرطوم...ديري في بحري ديري لاند في امدرمان
يا الله,, ياخي اسوي شنو...!!!
اقوم اكتلو حسع يودوني انا كمان سلخانة الكفار ويلمو فيني ناس (دبشك) واحتمال يركبوني انا زااتي ويخلو خشم صفارتي ملح ملح..... اسوي شنو ياااخي ..!!!
اطقطق الزول ابو دقن الوسخ ده واخليهو صواميل تاني ما ينفع... والتجي تجي ولاشنو..؟؟؟
قول طقطقتو ح اقبل وين تاني يا ناسسسسسسسسس...
وفاصل ونواصل
| |
|
|
|
|
|
|
|
|
|
Re: up (Re: عبدالكريم الامين احمد)
|
الحلة دقيت شبابها ناس علاء الدين وكرتونة وكل الفرد دق العيش وما خليت ليهم جمبة....
الحلة نغشمت جلاكينها ناس عمك ادريس وعمر سمك وفريني
الحلة عيني في نسوانها وخالتنا ناس نفيسة وكلثوم شنكارات... بدقو فيهم دق السنين فعملت نايم!!!!
اقبل وين تاني يا اااناس...!!!
من ديك يا اسطي عرفت شيخ علي ده دجال وتافه...وانا بقطع فيهو كففففففففففف وبقول ليهو اقطع وششششششك من قدامي
وكف خطافي في المرة اقطعي وششششششششششك وطلقانة بالثلاثة,,,,!!
اتذكرت ليك ناس فريقنا المظلومين...واهلي ودمي الدقيتهم دق عيش... وبكيت..!!
نعود
| |
|
|
|
|
|
|
|
|
|
Re: up (Re: عبدالكريم الامين احمد)
|
ويواصل مرزبة في مناجاته يقول
قعدت الليل داك كلو ببكي .....
وداير اتوب...
داير انتقم من علي الخرب بيتي و اخرتها القاهو راكب لوج في جووه بيتي..
داير ناس الحلة يسامحوني
وداير ارجع الفريق لناس علاء ومولانا ادريس وكرتونة وكلثوم شنكارات..
ومعلون ابو الدقن وملعون ابو الترطيبة وملعونة السلخانة
داير ارجع واشتغل عتااااااااااااااااالي...!!
واشاكل واضارب مع ناس الحلة ضد الناس العاوزين يكسروا المدرسة يكسرو السوق يقلعو الميدان...؟؟؟
النهايييييييييييييييييية
ي
| |
|
|
|
|
|
|
| |
عبدالكريم الامين احمد
عبداللطيف حسن علي
Nader Abu Kadouk
khaleel
خالد عبد الله محمود
حامد محمد حامد
عماد شمت
ibrahim alnimma
HAIDER ALZAIN
Mohammed Ibrahim Othman
Siddig A. Omer
Hamid Elsawi
فيس بوك
تويتر
انستقرام
يوتيوب
بنتيريست