|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: سيف النصر محي الدين محمد أحمد)
|
مرحبا بالاستاذ الهادي هباني ولازلنا نتذكر طلاته علينا بمنابر اركان النقاش بأسيوط ولا زال ذلك المنظر محفورا في اذهاننا عندما كان هباني يعتلي المنبر حيث قام افراد من الاتجاه الاسلامي بالهجوم عليه وعلى الاستاذ اسامة حمد النيل الكاشف حتى سالت دمائه(الكاشف) ويومها حاول الكيزان ادعاء ان هذا لم يكن دما انما كان مسرحية تم وضع الصبغة على فميص الكاشف ، لقد لاحظنا بأم اعيننا ذلك المنظر، ومحاولات دهاقنة الكيزان تبرير الحاصل وسط دهشتنا جميعا ، كنا شهودا، حاول الكيزان الاتصال بنا فردا فردا يومها رفضنا شهادة الزور وكنا برالمة في ذلك الوقت ،،، الف مرحبا بك الحبيب هباني اضافة حقيقية لهذا المنبر . الدخري داؤد
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: Shazaly Magzoub)
|
الهادي إدريس هباني سليل بحر ابيض ،،،، خريج اسيوط الاقتصادي اللامع المثقف الحقيقي المناضل الهادي الرجل المهذب خريج الجبهة الديمقراطية بمصر
مرحب به قلم جديد في سودانيز أون لاين ،، من تصاريف القدر ان نرحب باستاذنا هباني ومعلمنا نحن تلاميذه في الجبهة الديمقراطية بمصر درسنا علي يديه برنامج مرحلة الثورة الوطنية الديمقراطية ،،، فهباني من أكثر الذين يفهموا البرنامج ويستطيع أن يوصله لكل الناس بكلام مبسط ومرتب ،،، في حلقات الدراسة داخل الجبهة الديمقراطية أو في الندوات الجماهيرية ،،،، هباني من الذين يجمع عليهم الناس لتواضعه وتهذيبه وثقافته العالية ،،، وعلاقاته الحميمة مع كل الناس ،،،، بكل تأكيد هو مكسب حقيقي لقراء وأعضاء سودانيز أون لاين ،،، متحدثاً في السياسة والثقافة والأدب والأقتصاد والحكي ،،،
لا ننسي فهو كان من قيادات الاعتصام الشهير الذي قام به آلاف الطلاب السودانيين عام 1986م وأحتلوا فيه السفارة السودانية في القاهرة ،،، وأنتصرت فيه إرادة الطلاب وتم تحقيق كل مطالبهم في ملحمة كبري شهدت وحدة طلابية تاريخية ،،، وسمح القول في خشيم سيدو ،،، يا ريت يجي هباني ويحكي لينا
نرحب باستاذنا الهادي إدريس هباني مرة أخري ،،،،،
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: Hololy)
|
هباني جا يا الشاذلي ?
يا اجملنا ... يا عز الضحكات المجلجلة.. ابو الحكاوي الما اتسمعت ... كم دفعة اندهشت و انت تشرح مرحلة الثورة الوطنية الديمقراطية بهدوئك الصوفي ... ثم و تشنج اصابع يدك اليسري في تشنج جيفاري اذا استدعي التشنج ... و لنا لقاء طويل حول الثورة و مالاتها لاحقا... هويدا عثمان !!... وينا الزولة الجميلة يا جماعة ... واحدة من اركان الزمن البديع... تعلمنا منها كيف نضحك و نحن نموت ... لها و لزوجها فيصصل ننحي الهامات .
قرفة ... انت وين يا يتيم الراسمال ?... العزيز الدخري ..كيفك .... مشتاقيييييين شديد والله .
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: Shazaly Magzoub)
|
عبدالكريم.....أخو صاحبك صاحبك
لك شكري وتحاياي لمن نشوفك انت زي صلاح ولاصلاح زيك
سيف النصر...... ونحن ايضا لم نكن سعيدي حظ بلقياك بأرض المحروسه
دمت لقايي وفارد احضانك لكل الجميلين .
نهال ....سمعنا بيك كتير وجينا بيتكم لكن ...وأه من لكن ...العتب على بنت خالتك .
سعدنا بوجودك وترحيبك برفيقنا وصديقنا الحبوب .
الدخري ......الزوول الدغري ماأنت النصيحه مامشحود عليها وبتبراك محل ماماشي .
ايها الاسيوطي الصدووق لك مني أحر التحايا .
زهير .....صاحب المبادره المابتتلحق لك الود كله.
حللي .......يارفيق الزمن الجميل دمت
لازلنانعاتب انفسنا على تفريضنا في لقياك حسب موعدنا المضروب .
كل وروووووووووووووووووووووووووووود الدنيا لك بالاصاله والوكاله .
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: salah elamin)
|
بالله كلكم صايدة اتاري يا زناتي وصلاح الآمين وسيف النصر و الناظر هباني الجاسينا ده؟؟
مرحب بكم نحن ناس الوجه البحري جينا نرحب بالناظر وزعيم الاخوة الصعايدة بالمنبر!
, وبالله اعتصام السفارة داك منعني منه الشديد القوي يعني لو كنت طيبة ومشيته كان اتشرفت بمعرفتكم كلكم؟؟!! سمعت انه من نجومه كان صلاح جلال الزميل الانصاري!! واذكر كان يقالعنه زميل لان لغته تشبه لغة ناس الجبهة الديمقراطيه!!
من صحباتي بنات اسيوط الجميلة بت بورتسودان اميرة عبد الفتاح خريجة تجارة لو تذكرونها,وعلى فكرة حضرت لتخريجها باسيوط لكن الآن لا اذكر شيئاوفالمشغوليات مسحت اي حاجة ,,وفقط اذكر ان الصعيد فيه شبه كثر من السودان...شوراعه الترابيه والجهنميات المزروعة تشبه السودان.
مرحبا بهباني الديمقراطي واذكر من محن الهبانيه انهم اشهر اسرة تضم فطاحلة الشيوعين وفطاحلة الكيزان!!
ومعك نفتقد الناظر عمدتنا منبريا هشام هباني.
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: زهير الزناتي)
|
الاخ/ بهاء تحياتنا واشواقنا الشديدة وتحياتنا عبركم للزميلة الدكتورة أمل الخاتم. الأخت / تراجي طالما تذكرنا اسيوط وايامها الجميلة ، ان الشخصية المعنية في كلية التجارة هي زميلتنا أميرة عبدالعزيز عوض من بورتسودان حيث كانت يوما ما رئيس اسرة شيكان (كلية التجارة جامعة أسيوط ) وكنت يومها شخصي السكرتير العام لهذه الجمعية ايام فعلا جميلة ، نأمل ان يستعاد ولو جزء منها في هذا المنبر الاسفيري . الاخ شاذلي / الحمد لله على السلامة اخيرا سوف تتاح لنا فرصة التواصل عبر هذا الفضاء ، لكن الناظر ماشايفو ظهر لحدي الان . الاخ / عنكبة والله مشتاقين شديد .
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: ياسر شبيكة)
|
الشاذلي و زهير بتشاكلوا على الضيفان و ده ما غريب عليهم ،،،،، ما هو زهير من بلد المرغنية ،،،،،،، و برضه شاذلى ود مرغنية و أبوه الصديق (الإمام) كان من أعلام الإتحاديين و قياداتهم و هو من الناس البنوا حركة الوسط فى بورتسودان و أطرافها ،،، و أصلوا أبوهو سمّاهو الصديق عشان يجسد وحدة بلدنا و لأنه "الخلاف لا يفسد للود قضية" ،،، و الشاذلي برضه سمى ولده الهادى (الإمام) مش عشان يجسد الوحدة و لكن لأنه الوحدة هى المتجسده فيهو ،،، و زى الناس ديل البتتجسد فيهم وحدة بلد حدادى مدادى ،،، بعربه و زنجو و نوبتو و عجمو بكونوا سمحين بلحيل ،،، و مسامحين و بالهم طويل و عقلهم كبير و قلبهم أبيض و بكونوا جمال شيل ،،، و ياما أبو الهادى ما استحملنا و شال همنا و اتقدمنا و حفظ سرنا ،،،،،، الباشمهندس عبدالكريم الأمين افتقدناك فى محافل الدوحة و كان سفرك دون سابق إنذار ،،، لك و للمدام ألف تحية ،،، محمد سيد أحمد لنا لقاء قريب و لا زلت مواظبا على الاستمتاع بمكتبتك الغنية فى فضاءآت بكرى أبوبكر ،،،، سيف النصر ،،، سيف بخيت ،،، مجدى أحمد الشيخ ،،، لكم الود و الحب و التحية و الأمل و الرغبة فى تواصل و تعارف حقيقى ،،،،،، و فضاءآت بكرى لها ملكات سحرية فى توطيد أواصر التقارب و الصداقة نهال لك و لهويدا "تعلوب" التحية و عندى ليها هى و فيصل و عيالهم صور فى اليمن ،،، و لدوخرى الحوبة ،،، لازلت محفورا فى الذاكرة و ها هى فضاءآت بكرى تقربنا و تعيد الشباب لتلك الزكريات التى لا تنسى ،،،، لك الود و التحية و يا الأرباب الطبيب راجل الطبيبة ما أصلوا إنتو الإتنين حاجة تانية لوحدها فريدة و متفردة لها سحرها الخاص و طابعها الإستثنائى لكم حبى و أنت يا حلولى يعجبنى فيك حبك لورد القرنفل الأحمر فهو يبعث في ذاكرتنا حكاية ليبوند سنغور و كلماته الرقيقة لزوجته و هو عائدا من المنفى أو الإعتقال "كنت أود أن أشترى لك باقة من ورد القرنفل الأحمر ،،، لكن الرفاق كانوا جياعا فابتعنا بثمنه خبزا أسمر" ،،، لا زلت أذكر شقتك القريبة من كلية الهندسة بالمنصورة و أنت تستقبلنا و صديقى مدحت الجزلى حاسر الرأس حافى القدمين ،،، و كانت مائدتك دائما تعج بالطعام الجيد ،، الخضروات الطازجة ،، الشاى المدنكل ،، و الحديث الجيد ،،، لك منى كل الحب ،،، عنكبة أو بالأصح "أنكبة" نشتهى فيك "فى جدك و هزلك" حبك لتبادل الحديث المفيد و القول السديد و التحليل و صياغة النتائج و الخلاصات و روحك المبادرة و ولعك الشديد بالمعرفة ،،،،، و وعدنا لك بلقاء قريب بالحرم مع تجديد دعوتنا المفتوحة لك لزيارتنا بالدوحة ،،،، دكتور صلاح الأمين صديقى الرقيق ،،، الود و الشوق و الحب لك و لصديقى أسياس أفورقى الصغير ،،، تراجى مصطفى البت المبدعة من يومها ،،، عروس البحر "بورتسودان" أيضا مدينتى حيث تخرجت من مدرسة البحر الأحمر الثانوية العليا ،،، و لنا ذكريات جميلة فيها ،،، ترانزيت التى قضينا فيها ثلاثة سنوات ، ديم شاطئ ، خور كلاب ، ديم المدينة ، حى العظمة ، حى العرب ، و ترب هدل ، سلالاب و سلبونا ،، ،،، و كنا بنشوفك فى كثير من المناسبات الطلابية فى بورتسودان ،،، و أيضا كنت أتابع نشاطات رابطة طلاب البحر الأحمر خاصة بالإسكندرية و دورك البارز فيها ،،، و أحمدى الله أنك ما تعرفت علينا لأنه كان وقعتى فى شر أعمالك و جندناك فى الجبهة الديمقراطية ،،، نور الدين ود البدرى صاحب المبادرة و الدعوة الكريمة الوفي الهميم حمامة السلامة الشايل هم الناس و كايس أخبارهم لك منى الود و الحب و الامتنان ،،،،،، و حمد الله على السلامة لك و للوالد و الوالدة و تقبل الله طاعاتكم و شكر سعيكم ،،، و سوف نسجل لكم زيارة للتبرك و المباركة و نيل حظنا من موية زمزم ،، دكتور شبيكة الصيدلى المخضرم و الفنان الرقيق المبدع و الإدارى المحنك سلام و ود و عرفان ،،،
| |
|
|
|
|
|
|
Re: تنادوووووا للترحيب بفتى النيل الابيض النبيل و أحد رفاق مصر( الهادي هباني ) (Re: Shazaly Magzoub)
|
التحايا لكل المتداخلين والمارين ومرحبين بود الناظر .
الا في سؤال واقف لي زمن في حلقي ... أين قرفه ؟
معلوم انه يمتلك باسوورد
ومعلوم جدا مره قاعدين نشوفوا متحاوم في المنبر
ومعلوم ايضا انه رشحت اخبار عنه في اعياد الكريسمس وبصحبته صديقه خطاب كانوا في ضيافة عبد الباقي
وخرجوا خلستا من داره وقابلهم جليد حده من حركة سيارتهم
قرفه هذا والاسم الحركي محمد احمد هو وهباني استظلوا بظل اسيوطي سنيينا عدده
اين انت ايها الجميل لا بتهني ولابتعزي الباسورد ده خايفوا يكمل ولاسنو ؟
| |
|
|
|
|
|
|
|