سؤال للقلب....(شعر جدا حداسي قاليك)

Quote: ياخ قلت مافي داعي اهو نعمل خاطر لحمووودي لكن حمووودي زاتو عواليق طلع و بياع درجة اولى فإن الله هون ابوي جهز حالك لمساجلات عصدية و ثردية طويلة الربع القادم إن شا الله

حموووودي ذنبه شنو؟

تطلّع لي ود أختي كضّاب؛

زول لقاك عيّان؛ وما قصّر على الرغم من إنو سيادتك عامل برميل كامل فتّة.


وبعدين تعال دي كباية شاي أم راس نيفة؛

يا زول يا ترد علي أو ترفع الراية البيضاء

وبعدين ما تقول لي الربع القادم وشنو

أنا داير الردود دي حسّع؛ القاعد ليها منو الأرباع حقّتكم دي.

وهاك دي بمناسبة المرض اللي طلعت حمودي كضاب فيه.

Quote: حاشاها الخراب كان بيك بقت عمرانة بت سالم الفايتة البنات جمال و رزانة خليني احكيلك شو صار عَلَيْ بامانة شوية نزلة و التهاب و مافي سخانة

طبعاً دا كلامك؛ سمح

هاك اللخوخة دي

والحس صوابعيك وراها






بالله ده مرض يرقدو بيه الناس كان ما دي حمودية
بالعسل يا ناس
ليك حق يا حمودي تقول مرضاً ما بتقال
لكن الحناكيش لسّاع زمنهم دال
شوية نزلة والتهاب كمان بياخدولو إجازة
قال زين الشباب وبيشتم الشياب
الشايب منو يا زينة الشباب
الشياب شايلين (الدغت) والسكري والقلب
ما بشكو ولا بتشكو ماشين في الدرب أرباب
تقول لهم إت (حناخد زمنّا وزمن غيرنا
كان هو الشايب انت العايب
أبعد من ديل تصبح خاطرك طايب
خد من دهنهم واملأ حياك أطايب
كم مسجد عتيق بتشوفو يا متعايب
كل شيّاً عتيق تلفاه مفرح وشايب
الشباب شباب القلب؛ ما هو التهزّو هبايب
نزلة والتهاب يا عايب
الناس في البلد شايلين الملاريا حبايب
طالعين نازلين والملاريا حبايب
لو ادينا كل زول لي صداعو إجازة
ما خربت خلاص؛ والآخرة دار عمار
سواك الإله خليفة للإصلاح فقط والدنيا ما لها عمار
لا تضيع وقت في الفارغة والمقدودة
بعدين الدقايق في الحساب موجودة
والقال بستريح في الدنيا حكايته ما محمودة
قالوا لك بتكدح لين تلاقي بنودة
بعدين تستريح الراحة ما موجودة
في الضل والشجر والنهر والمودودة
كان داير العسل تلقاه هناك ببرودة
داك بيت الحمد؛ كيف يرقشن جلمودة
وداك بيت السعد راح توردنّه ورودا
قال حمودي العسل شايتين في الغزل لحدودة
وين طعم العسل في الدنيا أم جلمودة
مليانات مشاكل شرق غرب لحدودة
والشكل المدور في الحويش لي جودة
والنبذ المرصرص في المشي والعودة
سايبن كل ديل شابكينلي في حمّودة
كان للمساسيق مقفول الدرب لي دودة
تنخر في العظام الـ للبلد ممدودة
وانت تخش وتمرق ماك سائل المقدودة
انصحهم كمان واللا خايف يقولولك مردودة
خليهم يقولوا؛ أخير من يقولوا أب ذمّة مفقودة



أنا عارف لا انت لا حموووووودي

ما عندكم وقت لي قراية

عشان كدا محاربين بوستاتنا

ما قلنا شي

أعتقونا سيبونا في حالنا



الردود كان ما جات سريعة

الّلخ والعجن بالهظار الجد حيبدوا

حناخد زمنّا وزمن غيرنا قال

العجيبة في ناس بيرددوا بي وراك



نحن في انتظار أبو شيمة قال؛ وقالت

وأنا في انتظار أي الحمّووووديين يصل أولاً