سؤال للقلب....(شعر جدا حداسي قاليك)

Quote: قد سألت القلب يوما يا فَقُر مالَك عَلَيَا أصحيح ما رواه البعض انك كاسر ركبتك في عيون بنية ام ترى ما زعموا زورا شيلُ حالٍ و عباطة نية ضحك القلب مني ثم قال لست ادري ! ايها القلب اتدري كم جكسايةً نظرت إليكا وهل الشاطئ يدري كم مرةً اشوكشت بيكا وهل الأنهار تدري كم انا شفقان عليكا ما اللذي الخفقات قالت حين ثارت لست ادري ! كم فتاةٍ مثل ليلى ضيعتها عامل ملحلح أنفَقَتِ الساعات تبكي و انت غالبك ليها تشرح كلّما حدَّثتَ أصغتْ وانت يا سجمان مترتح وكيف طارت منك تسأل؟ لست أدري ! إنت في صدري يا قلب عامل فيني مقلب اسال الستر عليك وانت لا هاميك تلعب كلما طالعت دامة انا ابعد وانت تقرب وأُراني كلَّما أوشكت أدري لست أدري ! فيك مثلي أيَّـها السجمان نار عشقك حاصلة حاصلة إنّما أنت بلا فهم تهيم بكل من تلقاها فاصلة إنَّما أنت بلا حَنِكٍ وحنكاتي يا قلب واصلة فلماذا يا ترى أمضي وتبقى؟ لست أدري ! أبو حتوت 15- حزيران -2008 أي زول عمل فيها ناقد و بتذوق الشعر في أنثى النار الليلة الله يقدرها عليه و ما يجي يتذوق معاي عصيدتي دي

Quote: ود البشرى ازيك) فهمتها و (فته حموووودي) كذلك النبي يا خوانا ود حلال يناغم لي عماد عبدالله كان صاحي الليجي يشرح لي باقي العجين دا بعوسوه كيف

أبو حتّوت
أولاً: وفي البدء
العصيدة رقم (1)
وماحنا مستينّين للربع الثاني؛ كدا كيّة في المابينا.
أولاً؛ ودا كلام مهم: يا أحباب ود البشرى
انتو بالجد حلوين ورايعين
والأمل كله معقود عليكم؛ في إصلاح كل العوج.
لأنكم مؤهلون لذلك؛ ووالله دا ما كسّير تلج؛
عشان أنا حبيت الشقي لي حبي
اللي ما فيه لغوسة؛ لي صاحبو ود أختي
الراجل دا ما سكا لي بالواحدة؛
لاقيني حساس شوية؛ هاريني هري؛
لو عرفتو الناس اللي اشتغلوا مدرسين ليه بيكونوا حساسين
بتعذروهم؛ أما هذا البخيل الذي أصبح يدرس كورسات مدفوعة القيمة؛ أو كما قال صاحبه؛(ودا ما كلامي ؛ دا مقتبس من كلام صاحبو).
لقد كان يتوعد؛ ويهدد منذ فترة؛ وكله مسجل في تاريخ البورد.
جاء وفتح هذا البوست؛ مع سبق الإصرار والترصّد.
وهذا الرجل البخيل بنشحت فيه شحدة ما معبرنا؛ وقد أولى البرالمة الجدد؛ بكورساته مدفوعة الثمن؛ عليه مستعينين بالمولى عز وجل؛ وبعد توضيحات الأساسي لمن لم ينقش من قبل؛ نقول أننا سنبدأ منذ الآن كي تتوضح كل مراحل طبخ الفتة والعصيدة؛ مع أنه بخيل.
العصيدة الملخوخة الأولى: ( وهي الكلام العادي)؛ مع العلم أني قد صرحت له من قبل؛ أني لست شاعراً؛ وأكررها لست شاعراً ولا ناقداً؛ ولكني أحب هؤلاء؛ حتى ود البشرى أحبّه لأنه شاعر.
أولاً لأن الشعراء الشعراء بالجد؛ ماتوا وقد حصدت هذه السنة الكبيسة عدداً؛ الشاعر الحقيقي لا يحتمل هذا الواقع؛ لذا تجدهم يموتون.
ثانياً: وهذا أهم من أولاً:
تحياتي واحتراماتي الكثيرات
لأحباب ود البشرى الكثيرين والكثيرات
أولاً: لستم المقصودين بهذه المخاطبات
ولكننا نقصد من ورائكم بعض الحاجات
فلا تقوموا علينا هبّة كتلك الهبّات
فنحن من غيركم لا نساوي حاجات
أسمعتموني أيها البهوات
لقد وجه حبيبكم ود البشريات
نحونا كثيراً من الانتقادات
ومنها كمية من أشعاره المشتبهات
وعلى الرغم من أننا نفينا علمنا من قبل بالشعر والشاعرات
فهو دوماً يصر أن يصمنا بهذه الترّهات
وأكرر القول يا ود البشريات
لست شاعراً ولا أية حاجات
وجدّدت وصمنا بالنقد والنقّادات
لست عارفاً بالنقد والنقادات
ولكني كبني البشر أؤمن بسهولة الانتقادات
فكل ما قلته للفلانات
أنني أريد أن أفهم الكلامات
وطالما أنت مغرم بالانتقادات
ألا فابشر ببحر من المجادلات
أها يا ود البشرى خد دي عصيدة زي حقتك
وشوف يا زول العصيدة دي ما ليك انت
دي موجهة لي ناس تانيين
ما تقعد تحسب في الكلمة(1،2،3،...إلخ)
وهنيئاً مريئاً
الفتة أم توم أريتا تدوم
يا ناس الفتة المندمجين كوم في كوم
جارين طوالي من كوم لي كوم
مارقين مخصوص للفتة أم توم
جغمات بالليل؛ وانصاص الليل عند اللزوم
بتفتّوا كلام زي عوض دكّام
سايطين سايطين في الكذب حرام
كل شي عرفناه؛ الكذب علام؟
جونا السراي؛ تعظيم سلام
لكن انتو السهرانين في الفارغة ملام
شمار في مرقة دا موت زؤام
لحم الميتين ماكلينّه دوام
عرفنا الفتّة تقلبها عصيدة يا حوّام
حمودي وحمدي قال أعلام
طق حنكاً ساي ما فيش إلزام
لي زول بي حكمة والدنيا ظلام
وينك يا حكيم والكلمة تمام
الاستنكار داير لو نظام
والشجب براه ما رام قدّام
ناس دان وأدان ما هم خُدّام
خلّوها الخلطة مسبوكة تمام
ناس قيل وقال؛ ما شغل تمام
واللمّة السمحة محسوبة تمام
يا ليك يا عليك يا ود جضاّم
يا شفت سمعت شايفك علاّم
كتابة كتبت؛ كتبوها كرام
وين بحت لسرّك إن قعد إن حام
ما خلاص ما نشرت والحاصل حام
يا ابن الناس لو ليها دوام
ما كانت جاتك؛ بي صقيرها الحام
يا أخي الزم بيتك بتقولها دوام
روح جنب الحيط؛ عاين قدّام
اقرأ واستقرئ بيقولها هُمام
كان جات يوم شكرة تلفاها أمام
خلّيه اليمشي في جنب الحيط
لكن إت عارف للأمر تمام
أخلص في نصيحتك لي ناس قدّام
الشادو قصورهم جُدُر أوهام
راجين خمسينهم والفورة تمام
يا خي الخمسين قضيتها سنين من الأعوام
قول لي شن سوّت؛ والعافية تمام
باقيلك تاني في شي لي قِدام
ما روّح عمرك سنين وأعوام
فتّة اللّي تفتِتَّك يا زول حوّام
كمان في جديد دي عصيدة شام
للشام يا خَيُّو بالمرّة تمام
دريان بالحولك تمشيلي الشام
قريبك ديّة ما صايبو زؤام
شوية نزلات معاها زكام
ما تشوفلو علاجاً يا وليد علاّم
البوز المادّي زي بلح الشام
شبرين وزيادة خلّيه ينطام
وات الله أدّاك كلام وكلام
علام الجبن علام وعلام
امرق لي نصيحتك لي زول نضّام
يشتم في ديّة ويسب في داك من غير نظام
يائس مستمرئ في شكرة نفسه كأنه هُمام
خائف من شتمو يا حليف الشام
شن سوّى لغيرك عشان تنضام
ساكّيلي الكورة وقعدات الشيشة والفورة تمام
طابق لابتوبّك والكرت الأزرق يا ود دكّام
عوض دكّام كان سادّي الفرقة ما كان بنضام
كان يصلح ناس؛ وياما همام
كان وقت الجد تلقاه تمام
قوم نفِّض توبك يا همّام
يالله سدّ الفرقة بالإلهام
ما الله ادّاك كلام وكلام
استثمروا غادي ولي قدام
خلّي الكلمات زي بلسم شافي لي دولَ أنام
هم محتاجين للكلمة الطيبة ما فيها كلام
جرّب بس فنّك وإلهامك لي ناس إلهام
خلّيك حنيّن؛ زولاً متبيّن لي كل نظام
زولك متوحّد؛ كمان مستوحش من إكمام
خلّيه يحس بي إنو أمان؛ ما فيه ملام
بلدنا الحلوة عاد؛ ما فيها نظام
من الأبوات والجيل الفات رابطينّو زمام
مهما اتباعدت؛ أو قول فارقت؛ راجينا نظام
إنك في الرجعة، العودة الحلوة؛ بتضوقا تمام
يا سماحة القلدة، والحضنة السمحة؛ بعد ليل وغمام
بعد حرّة وفرّة والشردة البرّة؛ الناس تنضام
السجن في طرّة؛ والموية العكرة يجيك جمّام
لكن؛ يا ود البشرى
برضي داير منك انت رد؛ ما منّهم هم
وشكراً
مع تحياتي لكل الأحباب المشاركين في هذا البوست
الردود التفصيلية كان الله أحيانا لي قدّام