قيام رابطة الاعلاميين السودانيين بالرياض .. ( صور )

Quote: من مداخلات وكتابات كتيرين في المنبر وفي هذا البوست تلقاهم وكأنّهم هم وحدهم الشرفاء، هم وحدهم الوطنيين ، المؤتمر الوطني ماشغال بي هتافاتهم البايخة المليئة بالشتم والإساءة، المؤتمر شغال بي برنامج ماشغال بي هتافات عشان كدة عشرات القيادات تترك أحزابا وتأتي للمؤتمر، عشان فيه رؤى وفيهو فكر ، طبعا قالوا بيشتروهم بالقروش ، وده منهجهم في الكذب والتضليل والإساءات مستحيل يكون الهندي يباع ويشترى ، مستحيل ناس السماني الوسيلة ودكتور مضوي الترابي يباعوا ويشتروا ومبارك الفاضل لمّن يكون مساعد رئيس الجمهورية يكون اشتروه ولمن يمرق وينبذ يكون شريف نضيف !!! والاتحاديين شغالين بموسم الهجرة من الحزب ، هجرة بالكووووم ، في الأول قالوا المؤتمر قاعد يشتريهم ، أسع بقوا يجوا للمؤتمر تجار ورأسمالية !!!! الحزب الشيوعي أكلتو الأرضة وأوراقو انتهت لكن شغال بنهج الإساءة للطرف الآخر واغتيال الشخصية ، ناس (قوات التحالف) وناس (المناطق المحررة) ها ها ها ها .. وناس (قريعتي راحت ) عرفو إنو البيعملو فيهو ده وهم وهم وهم عشان كدة جو راجعين ، يجو راجعين إن شاء الله يجو راجعين ، وطبعاً الناس عارفين إنو النبذ والشتيمة مابتبني حزب ، والله الهم الأول ل(الرفاق) وأدعياء (النضال) الهم الأول هو تكسير العملاق وهو المؤتمر الوطني ، عشان كدة لو قامت رابطة للإعلاميين بالمملكة يقولوا المؤتمر شق جمعية الصحفيين !! شوف الفهم ده !! رابطة لكل (الإعلاميين) تكون شق (للصحفيين) !! طبعاً المقصود الأول والآخر هو المؤتمر الوطني ، عثمان حسين مات قالوا ليه ناس المؤتمر ينعوه ؟! يعني جارين ورا المؤتمر الوطني بإديهم وكرعيهم ، وماعارفين إنو الجبل الراسي مابينزاح بقولة أوف أوف ، عشان كدة نصيحتي ل(المناضلين) مايلتحقوا بالمؤتمر الوطني ، بس يعملو برامج داخل أحزابهم ، يعني يكون في ورق وفيهو خطط وبرامج وفكر ، مش يقضوا أعمارهم وأوقاتهم في أوف أوف عشان يزيلوا الجبل الثابت ده ، ده مابينزال بجنس سواتكم دي... والله والله القاعة الكان فيها الجمعية العمومية (قاعة الشلال بالله أمشو زوروها) والله متواضعة للغاية وكراسي بلاستيك تعبانة ومنصة عملوها الإخوة ويعني حكاية حقت ناس عندهم هم وعندهم ولاء للعمل ، لكن بتاعين الكذب الصراح يقولوا التجهيزات الضخمة دي مابتقومبها إلا السفارة !! والله شاي وموية نقصت في الآخر !! والله القاعة مليانة بتشكيلات المهنة من مختلف التخصصات ، حوالي عشرين مصمم ومخرج ، وحوالي تلاتين من المصورين والممنتجين والمخرجين ، وحوالي عشرة من الإعلام الإلكتروني ، وحوالي تسعين من المحررين وحوالي تسعة من الذين يقودون العمل الإعلامي بمؤسسات إعلامية خاصة ، يعني عوض أحمد عمر معروف إعلامي بارز وهو يدير مؤسسة إعلاميّة كبيرة ، إيهاب مكي صحفي محترف في مجموعة أوربت وفي سونا ، محمّد خير عوض الله إعلامي معروف مدير تحرير لعدد من المطبوعات ومدير تحرير بمؤسسة إعلامية شاملة ، معاوية التوم إعلامي لامع ومعروف ، أمين عثمان ممنتج ومخرج ومنتج تلفزيوني قدير وهو بالبي بي سي ، الرشيد حسن مخرج تلفزيوني مقتدر ، الأستاذ الكبير السر مصطفى من مؤسسي أكاديميّة السودان لعلوم الاتصال ، أربعين عاماً قضاها في المهنة وتأهيل المنتسبين للمهنة ، هؤلاء من أعضاء اللجنة المزايدة على شنو ؟؟ عشان كدة نصيحتي لأهل التضليل والكذب الصريح أن يمشو يحيوا أحزابهم الميتة بدل التهريج والجري وراء المؤتمر الوطني ، الصادق المهدي عرف إنو الجبل الثابت ماتزحو أوف أوف ، عشان كدة راجع حساباتو وتصالح مع المؤتمر ، وقبل يومين وصف قياداتكم بالبعر ، رجاءاً لا تشقوا جمهور الإعلاميين من صحفيين وغيرهم ، وناس حسين رئيس الجمعية ماقالو كلامكم ده لأنهم يعرفوا حقيقة الأشياء ، مافي إنقسام دي متاجرة رخيصة وجري وراء المؤتمر مافي داعي ليها ، وإذا المؤتمر الوطني عندو هذا الكم الضخم من الإعلاميين بتخصصاتهم ، فهذا شرف له وماكان بيغلبوا يعلنها رابطة لعضويته . شوفولكم شغلة غيرها . بعدين مسألة السفارة دي حقوا ماتقولوها تاني ، لأنوا السفارة دي حقت السودانيين ومطلوب منها ترعى مصالحهم ، لكن في الزمن المقلوب زمن (المناضلين) أصبح الدخول في أحضان الأجنبي شرف !! والارتزاق من سفارات الأجنبي كرامة !! ورعاية سفارة بلدك خيانة !! ده من ناحية ، لكن من ناحية تاني الناس ديل كل يوم في السفارة يشربو الشاي مع ده ويتبادلوا الضحكات مع ده ، ويضيعوا وقت المسؤولين ، ولو أردتم أرشيف احتفالات وبرامج جمعية الصحفيين كلها مليئة بمسؤولي السفارة ، وحسين بح صوته يرحب بسعادة فلان وسعادة فلان ، وده شيء طبيعي وشيء صحيح ، وده المطلوب منه ، لكن رابطة الإعلاميين مطلوب منها تكون على خصام مع السفارة !! لماذا ؟ عشان تكون شريفة !! من ناحية تالتة السفارة هي التي منحتهم الأراضي التي كوّنوا بها أمولاً طائلة (!!) لكن طبعاً هذه الأموال يأخذونها باعتبارها حلال عليهم لأنّهم جزء من الوطن وده جزء من حقّهم ، لكن لو رابطة الإعلاميين كوّنت أموال من السفارة كما فعلت جمعيّة الصحفيين ، فهذا خطأ وتكون أموال سحت حرام !! نحن في زمن الكيل بمكيالين وأكثر !! والأفضل ملف جمعية الصحفيين ده نخليهو من مصلحتكم نتركه ونحن مانود التشهير برموز في الجمعية ولا نرغب في الحديث عن الفساد المالي أو المؤسسي ، الأفضل يا إخوة نترك مسائل التشهير دي مابتتحمّلوها والله مابتتحمّلوها ، وهي ذاتا ماحاجة كريمة وأنا شخصياًَ لا أميل إليها فلا تضطرونا ليها ، أقعدو ساي . ود الباوقة