صُوَر لمّة وغداء بورداب الرّياض (جمعة 23 مايو)

(( بورداب الرياض ... غداء و لمة جمعة ( 23 مايو ) ))

كانت لمّة جميلة
سعدت بوجودي وسط هذه الكوكبة الفريدة
يلاّ نبطّل مجاملات وندخل في الجّد

جيت للرّياض من المنطقة الشرقيّة
وكانت لمّة
بورداب
وبوردابيّة
(أستاذة حليمة ما تصُرّي لي)
وأصدقاء بورداب
وجلاّبيّة بيضاء مكويّة
و 3 أشناب
شنب مُصطفَى صديق البورداب
وشنب هاشم خلف الله
وشنب دكتور محمّد حسن
رغم فارق الألوان الشّنبيّة بين الأخير والأوّلين
وتشابه لون شنب الأخير ولون بعض شعر مُصدّق الفنّان
وكان هناك صلاح شتات
وقعدة كوشتينة
ومعتصم دفع الله العريس كلّما يحجز يجي يلقى زول استولى على القيم
مع ملاحظة أنّ هذا قبل الزّواج
بعد شويّة الموضوع قلب جد
أبو جُهينة وقف وفجأة بقى يُنادّى بالرّيّس
ومال فين الموتسيكلات والعاآآآآآآآآآآآ ؟؟
كلام ناس أخوان أخوان جد
مُش أخوان أخوان بيقطّع الأضان وإنّما جمع مُذكّر سالم لأخو أخوان
وأخت
وكلام كتير ما طلع عن الأعمال الخيريّة وعن دعم كُلّ محتاج ومحتاجة
وآراء عن السُّبُل والوسائل
ما في زول إشتغل برأيي
ولا زولة
وأنا ما قُلت ولا كلمة
الخيمة سخّنت بالجّماعة
فكانت السّهلة خير مستقبِل لأفواج الجّلاليب والعباية
وبمحتوياتها من بشر

المهم

شالوا منّي قروش قالوا لإيجار الاستراحة وأنا على سفر
المهم إنفضّ الإجتماع بعدما شالوا قروشي
وبعد ما ظهر حُمّيدة
وبعد شويّة ظهر أورقن (خائن)
وساوند سيستيم أخون
وسمّاعات مأجورة
وقُرشي منصور فنّان أكثر خيانةً
أُجبِرت أقعد وراء الأورقن
وأنا راجل على سفر
ويدّيني بيفكّروا في الدّركسون أكتر من العزف
راجيني مشوار سواقة 4 ساعات تقريباً ويقول ليك حفلة
غايتو بتذكّر عزفت 3 أغنيات
ما عارف قُرشي غنَّى منّهن كم
ولا متذكّر الأغنيات كانت شنو ولا عزفتها في ياتو سلّم ولا أصانسير
غايتو بتذكّر بعد تالت أغنية السّاعة كانت تمانية بالليل
وعرفت روحي واصل بيتي منتصف الليل بتوقيت الصّحراء
وبتذكّر عُمر الفاروق لاقاني وأنا مستعجل مارق
وشبكني بتاع الأورقن وما بتاع الأورقن
قُلت ليهو ما تشيل هم بنغلبهم في مقبرة الأبطال
ركبت عربيتي وأنا أتأبّط ((CD))
أهداني إيّاه البوردابي الجّميل صديقي محمّد يس علي بدر
أجمل هديّة والله جد جد
(( CD )) للعزيز أستاذنا أحمد ساطور
ومعاهو فردة كوشتينة حمراء
سأهديها بدوري للصّديق البوردابي عوض عكاشة
في السّكّة كانت عندي غشوة لإقليم الإحساء
أو الحسا على قول السّعوديين
مدينة إسمها الهفوف ولا الهبوب ما عارف
ساعدني في الوصول ليها موبايلياً زميل المنبر خال معتصم العريس
العريس معتصم ما الخال
الخال البوردابي الدّمّامي (محمّد بابكر)
الأقواس حتّى لا يُعتقد أنّ إسمه الدّمّامي
وصلت بيتي السّاعة واحدة بالليل
وإتّصل بي البوردابي الرّاقي
العزيز محمّد يس علي بدر
قال لي عاوز أطمئن إنّك وصلت بخير
غيرو ما في زول إشتغل بي
ولا زولة
لهذه اللحظة
ما في زول عارفني وصلت ولا شالتني الهبوب
الغريبة ضرب لي عوض عكاشة من الدّمّام
قال لي الغداء كان شنو ؟

الصُّور جاية
بعد شويّة
جايبة معاها لعب وحاجات

ولو في تمبس ولاّ لؤي شمّت ولاّ زول من ناس تحميل الأغاني
عارفني عزفت شنو ولاّ قُرشي غنّى معاي شنو وسجّل حاجة يجيبها لينا هنا




عُمران حسن صالح ما جاء
إتّصلت أسأل منّو
زوجتو وأمّو وولدو قالوا لي عندو غداء بورداب
إتّصالي كان زي السّاعة تمانية ونُص بالليل كدا





هذا البوست برعاية
هذا البوست نتيجة طبيعيّة لتأخير الرّغيف وأكل السّلطة بالقُرّاصة

أنـا في البـعـيـد مُـشـتـاق لهـمـسـة من الوطن يا نـسـمـة