|
|
|
 Re: شاهين .. فريدة .. محسن . (Re: shaheen shaheen)
|
هذه الحكايات ربما تكون قد حدثت بالفعل .. او ربما لم تحدث .. او ربما كنت اتمنى ان تحدث .
لا احد يدرى .
اتمنى على كل حال ان ترسم على شفاهكم ابتسامة .. او على الجبين تقطيبة تعجب .
لكم منى التحايا والسلام .
| |
 
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
غريب (1)
انا الغريب الان .. انا من نظر , وابتعد .
وهو القريب الان .. هو من امسك اليد , وانحنى هامسا على الاذن .
اللقاء كان صدفة , حرارة صيف هذه المدينة بشع كالعادة
- شاهين .. معقول !! .
- اصلو ما ممكن .. فريدة ؟ .
- اهلا وسهلا .
- اخبارك ؟ .
تصافحت الايدى .. قبل عشر سنوات , كانت المصافحة تنتهى بقبلة على الجبين والفم .
الان , كانت اللحظة مربكة .. كانت الاسئلة من اجل سد فراغ التحديق الغبى , دون اهتمام حقيقى .
- من متين فى الخرطوم يا فريدة ؟ .
- انا جيت السودان لى شهر .
- والله ؟ .
كانت تمسكنى من خصرى من الخلف .. نهودها كانت ترتاح على ظهرى
- الشارع يا مجنونة .
- جبان .
الصحف اليومية انتقلت من اليد اليسرى الى اليمنى .
- انتا لسه فى عوارة السياسة والجرايد , والكتابة ؟ .
- لسه .. انتى لسه فى السعودية ؟ .
- سعودية شنو كمان ؟ زمان مشينا منها .. نحنا هسع فى استراليا لينا سبعة سنين .
- ما شاء الله .. والله كويس .
العمر يجرى بهذه السرعة ؟ .
- ناس البيت كيف ؟ .
- كويسين .. تمام التمام , الحمد لله .
- شنو شابكنى الحمد لله , ما شاء الله .. انتا خليت الشيوعية وبقيت كوز ؟ .
- يا ريت .
انتقلت الصحف اليومية من اليد اليمنى الى اليد اليسرى .
- الجاى داك زوجى .
طويل , غبى , له وجه حمار
- الجاى داك ود عمى , جاى من البلد عشان داير يسافر السعودية .
- ومالو شكلو كده , غبى وعندو وش زى وش الحمار .
- حرام عليك .. ده انسان طموح , وبكرة بعد ما يسافر ويغترب ما فى زول حيقدر يتكلم معاهو .
عندما اقترب نظر لى بغضب ظاهر
- محسن .. ده شاهين , صديق عزيز .
- اهلا , اهلا .
كانت نبرة اللغة النوبية ثقيلة , تتكسر عندها الكلمات العربية .. وقف بعيدا عنا , غريبا منا , ينظر بعيدا .
- شاهين .. ده محسن زوجى , شاهين ده كان صديق عزيز .
- اهلا , اهلا .
كانت اللغة النوبية ثقيلة .
- بعد اذنك استاذ شاهين , نشوفك تانى .
- طيب مع السلامة .
امسك يدها وانحنى هامسا على اذنها .. كركرت بعدها فى ضحكة انثوية خافتة , سعيدة .
وقفت انظر لهما , غريبا عنهما , وحيد .
نظرت الى الصحف اليومية , كان المانشيت الرئيسى فيها كلها بعبارات مختلفة
(رئيس الجمهورية .. التحول الديمقراطى يحتاج لتضافر الجهود) .
انتقلت الصحف من اليد اليسرى الى اليمنى , اخذت اضرب بها على فخذى وانا ادندن نغمات اغنية نوبية قديمة عن الغريب الذى يتخبط فى غربته بعيدا عن حلفا القديمة .. ومضيت فى حال سبيلى .
(انتهت)
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
تغيير طفيف (2)
هذه هى سنتى الرابعة بالنسبة للساقين معا
الساق الاولى تم بترها قبل ست سنوات .
الثانية بعدها بسنتين .
انا قوى مثل (حلوف) .. امارس نفس هواياتى التى كنت امارسها وانا امشى على ساقين , القراءة , كتابة القصص والاشعار .
فقط انقطعت عن العمل .. نعتمد الان على راتب زوجتى الشهرى , لا اطفال واشكر الله على ذلك .. فقط اشتكى من زوجتى (فريدة) , عندما كنت امشى على قدمين كانت تنادينى
- شوشو حبيبى .
حتى اننى فى رقعة الدعوة لحفل عرسنا , طلبت من صاحب المطبعة ان يكتب
(عقد قران الوجيه شوشو على ست الحسان فيفى) .
لكنه نظر لى بغيظ
- بس كده يا عريس الناس ح يقولوا العريس ده خول .
منذ ان بدأت ازحف على بطنى قبل اربع سنوات من الان , حدث تغيير طفيف فى لهجة (فيفى)
- يا زفت الطين .. غسل الحمام كويس بعد ما تنتهى من خراءك ده .. ما معقول تقلب بطنى كل يوم .
- يا فيفى لازم نستحمل بعض .. احنا ما لينا غير بعض .. انا بحبك فيفى , بحبك جدا .
- (..) امك .
ظهر فى حياتنا مثل ملائكة جدران الكنيسة .. ظهر (محسن) , ابن الجيران الوسيم , المهذب , القادم من (انجلترا) بعد غيبة طويلة .
- ازيك يا عم شاهين , صحتك كيف ؟ .
- السكرى قتلنى قتل يا ابنى محسن .
- شد حيلك .. المؤمن مصاب .
- المشكلة انى ما مؤمن .
تصيح (فريدة) من الغرفة البعيدة
- تعال يا محسن اشتكى ليك من عمك شاهين .
- اتفضل يا ابنى .. بس لو سمحتا تكلم خالتك فيفى انى لسه بحبها .
اختفى فى الغرفة البعيدة لمدة ساعة , سمعت بعدها صوت مياه (الحمام) تتدفق على الارضية , ثم صوت (فريدة)
- كفاية .. يا ولد كفاية الليلة .
دخلت غرفتى متوردة الجبين , يشع من عينيها بريق الحب القديم المفقود .
- محسن طلع ؟ .
- مرق لكن جاى بكرة .
- ده ولد ممتاز ومحترم .. انا عايزو يسكن معنا هنا عديل .
ردت فى ابتهاج
- اعمل ليك العشاء يا شوشو ؟ .
صحت فى فرح
- معقول اقنعك بالسهولة دى انك تقولى لى شوشو من جديد .
- كيف , ودى دايرة كلام يا شوشو .
وضعت راسى على الوسادة المتسخة باثار اللعاب ورائحته
- شكرا يا ربى .. شكرا يا ربى .
رفعت صوتى ليصل اليها فى (المطبخ)
- انا من الليلة ح ابداء الصلاة يا فيفى .
- اعمل اى حاجة تريحك يا شوشو , بس لما تخش الحمام غسل الخراء بتاعك من المقعد .
قلت لنفسى همسا
- لكن محسن ده لما يرجع انجلترا ح اعمل شنو ؟ .
(انتهت)
......
شاهين.
(عدل بواسطة shaheen shaheen on 05-15-2008, 11:23 AM)
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
كوكا كولا (3)
هذه العبارة كانت قاصمة الظهر
- انتا حلفاوى جلف , ما متحضر .
- كيف يعنى اكون ما متحضر وانا حلفاوى ؟ نحنا الحلفاويين ناس الحضارة ذاتها , هسع متحف السودان ده فيهو تمثال لزول من اهلك ناس الجزيرة ؟ .
- غبى .. غبى .
الحكاية ليست عنصرية , رغم ان (فريدة) ارادت تصويرها كذلك وهى تعلن بيان انهاء العلاقة عبر سماعة الهاتف فى الساعة الحادية عشر ليلا بالتوقيت المحلى لمدنية (امدرمان)
- شاهين اعتبر اى حاجة بينا انتهت , وبكرة ح ارسل ليك الدبدوب مع اختى .
- هو حصل شنو يا فريدة ؟ انتى فجأة شتمتينى ونحنا قاعدين فى الكفتريا بدون اى سبب .
- عشان انتا عنصرى , كيف يعنى ما فى تمثال فى متحف السودان لواحد من اجدادى ناس الجزيرة .
- ما دى الحقيقة يا فيفيان , مش كده وبس , احتمال ذاتو وقت ما نحنا كان عندنا ممالك نوبية قديمة , انتو ما كنتو اتخلقتو .
- انتا حلفاوى جلف , ما عندك ذوق لا فى الكلام ولا حتى فى تصرفاتك .
- يا زولة اسمعى , بكرة رسلى الدبدوب , بلاش كلام فارغ .
صحيح ان العلاقة بيننا كانت قصيرة , 6 شهور فقط .. وصحيح ايضا اننى اهديتها (دبدوب) ضخم , اسود , بحجم قامة الانسان , اشتريته من (القاهرة) واعتز به كثيرا , واقول لكم اننى احببتها خلال تلك الفترة .. احببتها جدا , والدليل اننى كنت اشترى (اسكراتش) كل يوم للحديث معها حتى وقت متأخر .
الحكاية ببساطة , هو نمط الاختلاف فى مفهوم الحياة .. رغم ان فارق العمر بيننا ليس كبير , انا فى الثالثة والاربعين , وهى فى الثالثة والثلاثين .. رغم انها حذفت بعد ذلك اربع سنوات لاسباب غامضة
- كل سنة وانتى طيبة فيفيان , 23 ابريل عيد ميلادك ال 33 .
- سجمى يا يمة .. ده يا دوب يا ود الناس , عيد ميلادى ال 29 .
- لكن انتى فى اول مقابلة قلتى انك يوم 23 ابريل ح تكونى 33 سنة .
- شاهين والله كده ازعل منك , وتانى ما اتكلم معاك .. انتا بتكون سمعتا غلط .
- يا زولة ما مشكلة .. 29 , 53 , انا بحبك , عندى ليك هدية متواضعة , بره فى العربية الهدية بتاعت عيد ميلادك .. تعالى نشيلها سوا عشان عندى غضروف .
- انتا جايب لى شوال اسمنت ؟ .
- اسمنت شنو يا بت ؟ .. جايب ليك دبدوب .
- سجمى يا راجل وما قادر تشيل دبدوب ؟
- ده دبدوب ما عادى , حاجة كبيرة خالص , ولو شلتو براى مع الغضروف ممكن يجينى شلل رباعى .
حملنا (دبدوب) سويا بصعوبة شديدة .. هى من جهة القدمين وانا من جهة الراس والكتفين
- كان مفروض اشترى ليك معاهو سرير كبير عشان يرقد فيهو .. لكن معليش عيد ميلادك الجاى .
- وهسع غضروفك ده ما ح يكون عندو اثار جانبية ليلة الدخلة ؟
- لا ما تخافى .. ليلة الدخلة الناس بتنزل , ما بتشيل .
بقية الايام فى العلاقة كانت عادية .. هى مشغولة فى الامتحانات , وانا فى الاستعداد لحفلة العرس , اتصل بها بشكل يومى للسؤال عنها وعن اخبار (دبدوب) .
حتى كان يوم (الكفتريا) الشهير
- الو شاهين .. الليلة اخر يوم فى الامتحانات , لازم تعزمنى فى مكان محترم .
- خلاص يا عروسة اختارى انتى المكان .
- فى كفتريا فى بحرى اسمها الصلات الطيبة .
- دى بتاعت المعوقين ؟ .
- معوقين شنو انتا كمان ؟ .. دى كفتريا جديدة لنج , فيها صالة بلياردو , ونافورة ضخمة , ومزيكا اجنبية .
- امرنا لله .. بجيك الساعة ستة فى البيت ونتحرك من هناك .
- يا سلام عليك يا حلفاوى يا عسل .
قائمة الاسعار , هى التى حركت امعائى , وجعلتنى اشعر بالغثيان
- داير اقول ليك حاجة يا فريدة .. بس ما تفهمينى غلط , ممكن ؟ .
- يا سلام , شايف الجو الراقى ده , والناس الراقيين ديل .. داير تقول شنو يا حبيبى شوشو يا عسل ؟
- ده كلو استهبال فى استهبال .. الناس ديل حرامية , والقاعدين هنا ديل طلائع البرجوازية التافهة .. ناس بتحب الاستعراض والفشرخة الفارغة .
- شنو ؟ .
تراجعت فى مقعدها , ونظرت لى بغضب
- براحة .. يعنى عاينى قائمة الاسعار , سعر علبة مياه غازية كوكا كولا 20 جنيه , معقول الكلام ده , يعنى لو شربنا اتنين ح ندفع 40 جنيه غير البقشيش , واحنا ممكن من اقرب دكان نشترى صندوق كولا بسعر اقل من كده كتير ونشرب منه نحنا والجيران لحدى ما يجينا اسهال .
- معقول يا شاهين بتفكر بالطريقة دى ؟ .
- فيفيان لازم نكون واقعيين .. انا بالمناسبة ضد المياه الغازية والوجبات الامريكية طول الخط , دى حاجات ضارة بالصحة .. انا ضد تدويل نمط التغذية الامريكى , لانو ما مناسب معانا .. انتى عارفة القراصة بتاعتنا فى البلد عندها قيمة غذائية اكتر من سندوتشات الجماعة ديل , وفيها فيتامين A و B و C .
- يعنى عايز تعزمنى قراصة وملوحة ؟ .. انتا بتتكلم جد ? .
- والله العظيم فيها فوائد اعلى وصحية اكتر .. انا زمان كنتا يسارى للاسف الشديد , وفاهم الناس دى كويس .. ده يا فريدة راسمال طفيلى .. وغالبا ما يكون غسيل اموال , عايز يربح بسرعة عن طريق انو يصور للناس انك لازم تشترى علبة كوكا كولا لحبيبتك وتدفع فيها اضعاف سعرها الاصلى .. وده كلام خطاء .. يعنى لو كل سودانى عزم حبيبتو قراصة وتركين وبعدها كباية كركدية بيكون قدم خدمة لاطفالو الجايين لانو صحة الام بتكون حديد .. وفى نغس الوقت وفر قرشو .
تراجعت اكثر فى مقعدها
- اصلو ما معقول .. انتا بخيل للدرجة دى ؟ .
- ما حكاية بخيل .. انا مستعد هسع اديك ال 40 جنيه هدية .. انا بتكلم عن قصة انك تدفع قروش فى حاجة ضارة بالصحة .. عارفة مرة عملوا تجربة فى قزازة كولا , رموا فيها اسنان بشرية بتاعت زول ميت .. تصدقى بعد اسبوع الاسنان دى ذابت فى قزازة الكولا .
- الله يقرفك .
- ده ضحك على الدقون .. اى ناس جادة فى علاقة حبها , ما لازم تنخدع بالمظاهر .. وين الحب الرومانسى بتاع زمان ؟ بتاع شارع النيل وكيس التسالى وترمس جنينة الحيوانات وكباية الشاى , كان حب صحى , كانوا زمان عندهم عقل .. الحب يا فريدة اننا نجمع القرش فوق القرش عشان المستقبل , الله ما خلق الحب عشان ناس الكفتريات يبقوا مليونيرات على حسابنا .
ضربت حقيبتها الجلدية بعنف على سطح المنضدة الزجاجية الغاخرة
- انتا حلفاوى جلف , ما متحضر .
هنا فقدت اعصابى .. أياك وان تشتم اهلى فى حلفا الجديدة والقديمة .. هذا خط احمر .. أياك
- كيف يعنى اكون ما متحضر وانا حلفاوى ؟ نحنا الحلفاويين ناس الحضارة ذاتها , هسع متحف السودان ده فيهو تمثال لزول من اهلك ناس الجزيرة ؟ .
- غبى .. غبى .
تركتنى فى (الصلات الطيبة) وهرولت للخارج .
مرت شهور على هذه الحادثة وعلى انهاء العلاقة واستعادة (دبدوب) .. قابلتها صدفة امس فى شارع صغير يتقاطع مع شارع (البلدية) .. كانت تمسك بيد شاب طويل وغبى وله وجه مثل الحمار , كان كل منهما يمسك فى يده الاخرى زجاجة كوكا كولا من الحجم العائلى الكبير وهى تناديه بصوت مثير جنسيا
- محسن .
(انتهت) .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
اعتذر لكم جميعا
ما ورد فى مقدمة هذه المجموعة القصصية على لسان (نيتشة) غير صحيح .. من قال :-
الحياة مرض عضال .
هو الاخ العزيز (سقراط) فى لحظة احتضاره , وليس صديقى الملحد المرحوم (نيتشة) , حتى ان العبارة الكاملة للنص (السقراطى) هى :-
- ما الحياة سوى مرض عضال , انا مدين لأسيلبيوس المخلص .
وطبعا لا احب ان يسألنى احد عن من هو لأسيلبيوس المخلص هذا ؟ .. لاننى لا اعرف .
كنت قد وجدت (نيتشة) يناقش هذه العبارة فى كتابه الرائع الذى قرأته قبل سنة (أفول الاصنام) .. ظننت مع التقدم فى العمر وعدم التركيز الذهنى ان القائل هو حبيبى (نيتشة) غفر الله له زعزعة ثوابتى .
عموما سوف اترك الاقتباس كما هو فى المقدمة دون تعديل حتى اتعلم فن الاقتباس الصحيح بواسطة الرجوع للمصدر , دون الركون لذاكرة الشيخوخة الخربة .
شكرا .. شكرا .. شكرا .. شكرا للابنة والصديقة وطبيبة المستقبل د/ وجيدة , التى نبهتنى عبر سماعة الهاتف ان الاقتباس غير صحيح .
ان تعرف طالبة جامعية سودانية (سقراط) و (نيتشة) , هذا يعنى ان المشروع الحضارى فى طريقه نحو الانهيار .
اعتذر لكم جميعا .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
| Quote: شاهين .. فريدة .. محسن |
شاهين
مبدع
شاهين
مجنون كلمات
ياخى عنوان بوستك انا قريتو
شاهين فردة محسن
يعنى محسن خالد
والله ما شفت الياء
لما دخلت ولقيت شاهين من حلفا
وفريدة من الجزيرة
بجد انت مبدع
اسف للازعاج
نسيبك فى ابداعك
قاعد فى البوست
لما اكمل الكوكا كولا
بتاعة الصندوق
مش رخيصة
تانى بشرب
سلام
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
أصرار (4)
25 مايو 2005
- الو .. فريدة ؟ .
- شاهين ؟ .
- مشتاق ليك .
- عرفتا نمرتى الجديدة من وين ؟ .
- يعنى قايلة انا ممكن استسلم بسهولة كده ؟ .
- شاهين .. ارجوك , انا يادوب جاية من كسلا , انا يا دوب خلصتا شهر العسل .
- انتى ليك 45 يوم , و13 ساعة , وعشرة دقايق , من عرسك .
- وكم ثانية ؟ .
- لا , دى صعبة ما قدرتا احسبها .
- ارجوك .. لو بتحبنى بالجد , ما تضرب لى تانى , انا فى ذمة راجل .
- ومحسن ده راجل ؟ .
- ارجل منك .
- ما اظن .. انتى عموما جربتينا نحنا الاتنين وممكن تحكمى .
- يعنى انا شكشوكة ؟ .
- ................................
- مالك ما بترد , عموما شكرا جزيلا , ولو سمحتا تانى ما تضرب لى ممكن ؟ .
- ................................
- ok .. فى حياتك يا شاهين , اتعلم انو لما بت تديك جسدها , ده معناها انها بتحبك وبتديك اغلى حاجة عندها , ولما عواطفها تتغير وتمشى لزول تانى , ده ما بيكون مبرر انك تهددها بالماضى .. ok ؟ .
- ..............................
- ما عايز تتكلم ؟ .. يلا ما السلامة , انا ذاتى ما عايزة اسمع صوتك , فى ستين الف دهية .
13 يونيو 2005
- الو .. نعم ؟ .. عايز شنو يا شاهين ؟ .
- انتى لسه بتحبينى ؟ .
- اكيد .
- انتى بتتكلمى جد ؟ .
- بالجد .. يعنى بعد ما قلتا لى انى شكشوكة , عايزنى ما احبك كيف ؟ .
- اولا انا ما قلتا الكلمة دى , ثانيا انتى عارفة انا بحترمك قدر شنو .
- شنو اولا , وثانيا , تقول قاعدين نناقش الميزانية فى البرلمان .. انتا قلتا انى جربتكم الاتنين , وده كلام ما بيقولو انسان محترم , ناهيك عن انو يقولو لزولة بيفتكر انو بيحبها .
- حلوة جملة (ناهيك عن) .. هسع القاعد فينا فى البرلمان منو ؟ .
- ها ها ها ها .. دمك بقر .
- انا قلتا كده بعد ما انتى قلتى انو محسن ارجل منى .. انا ما فى زول ارجل منى فى الدنيا دى كلها .
- يا ولد لا .. انا كده ح يجينى فشل كلوى .
- ما مسحتى نمرتى من موبايلك ليه ؟ .
- .....................................
- عارفة ده معنو شنو ؟ .
- ..................................
- معنو انك لسه ما قادرة تنسى شاهين , مش كده ؟ .
- ...................................
- يعنى ما عايزة تتكلمى ؟ .
- .................................
- يلا فى ستين دهية , انا ذاتى ما عندى رصيد لواحدة زيك .
2 اغسطس 2005
- الو .
- كيفك ؟ .
- تمام .
- ضربت ليك قبل شوية وما رديتى .. كنتى نايمة ؟ .
- محسن كان قاعد , ارجوك شاهين , اتصالاتك دى ممكن تخرب بيتى .
- انا عايزو يتخرب فرفورة .. ممكن اشوفك ؟ .. مشتاق ليك شديد .
- لا .. لا .. لا .. نتفق من هسع مقابلات لا , انا سمحتا ليك تتكلم معاى فى الموبايل احتراما لمشاعرك .. لكن مقابلات لا .. ok ؟ .
- ok .. كفاية اسمع صوتك .. ارجوك اطلبى الطلاق .
- انا حامل يا شاهين .
- ..........................
- ما فى مبروك ؟ .
- لا , ما فى .
- الموجات الصوتية قالت انهم تيمان .
- كمان ؟ .. لا حول ولا قوة الا بالله .
- ها ها ها ها ها .
- انا عندى الهام انو محسن ح يموت , و نحنا ح نرجع لبعض .
- لو عندك الهام عايز من فرفورة شنو ؟ .
- بطلى تخفيف دم .. انا منتظر انو محسن يموت .
- ابرأ واستبرأ يا يمة , ابو التيمان انشاء الله يعيش مية سنة .
- عندى اصرار ومستعد انتظرك مية سنة واعقد عليك وهم بيدفنو فى المقابر .
- ها ها ها .. يلا مع السلامة عشان محسن راجع هسع .
- ما تغيرى الشريحة لو سمحتى .
- حاااااضر , ما تخاف .. يلا مع السلامة .
- مع السلامة .. انا منتظر .
3 اكتوبر 2005
- الو .. فرفورة , محسن لسه ما مات ؟ .
- اهلا شاهين .. طولتا ما ضربتا .
- انتى مالك صوتك تعبان ؟ .
- تعبانة شديدة والله يا شاهين من الحمل .. طوالى طراش واسهال ودوخة فى الراس .
- شدى حيلك .. انا منتظر .
- يا ود انتا لسه فى حركات الاوهام بتاعتك دى ؟ .
- لسه .
- عاين معليش عشان انا ما ح اقدر اتكلم كتير .
- لا ما فى مشكلة ماما .. اقفل الخط ؟ .
- معليش .. وبكرة ام محسن واخواتو جايين من حلفا الجديدة , ح يكونوا معنا لحدى الولادة , ما تضرب لى الا لو ضربت ليك مس كول .. ok ؟ .
- حااااضر فرفورة .. يلا مع السلامة .
1 يناير 2006
- الو .. شاهين .
- فرفورة شخصيا ! .. شنو يعنى انتى ضربتى لى , محسن مات ؟ .
- شنو حركات امبارح دى ؟ .
- ما قدرتا والله يا فريدة .. مشتاق ليك وعايز اشوفك .
- عندك اصرار غريب .. تقوم تقعد فى الدكان الجنب بيتنا من المغرب لحدى ما الزول يقفل ؟ .
- انتى عارفة شربتا كم حاجة باردة ؟ .
- كم ؟ .
- 15 .. هسع عندى وجع بطن شديد .
- ها ها ها ها .. انا كنتا بعاين ليك من قدة الباب , حالتك تحنن .
- ما مرقتى ليه ؟ .. حرام عليك , انا عايز بس اشوف وشك .
- شكلى بقى بشع .. بطنى زى الكرة الكفر .. عليك الله خلى قصة الدكان دى , ما تجيب لى الهواء . . مفروض تخاف على سمعتى .. ok ؟ .
- حاااااضر .. انا منتظر بس محسن يموت .. عاملة شنو مع تعب الحمل ؟ .
- اتعودتا , شكلها ح تكون قيصرية .. يلا مع السلامة , عشان اخوات محسن ديل زى كلاب الحراسة .
9 ابريل 2006
- ايوه .
صوت امرأة عجوز .. تلعثمت
- م م م معليش .. دى مش نمرة استاذة فريدة .
- فريدة مات يا ولدى وهو بيولد تعيشى انتى .
- انتى منو ؟ .. ماتت كيف ؟ .
- انا ام جوزو .. انتا بترطن ؟ عشان ما بنقدر نتكلم عربى .. انتى مين ؟ .
- انا منتظر .
(انتهت) .
شاهين.
(عدل بواسطة shaheen shaheen on 05-18-2008, 02:48 PM)
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
الغائب حتى يعود (5)
- استاذ شاهين لو سمحتا .. استاذ محسن عايز يقابل سيادتك .
صوت السكرتيرة ينساب عبر الهاتف الداخلى
- محسن ؟ .. محسن منو ؟ .
- هو قال انو صديق قديم .
معقول ؟ .. سبحان الذى يبعث العظام وهى رميم .. من الممكن ان يكون هو ؟ .. بعد كل هذه السنوات الطويلة يعود ؟ .. عشرين عاما كاملة
- خليه يتفضل .
انظر للباب فى تقرب وقلق .. افتح صفحات كتاب ضخم باللغة الالمانية التى لا اعرف منها غير تحية الصباح , هذا يعطى الانطباع بالاهمية .
دقات رقيقة على الباب المعدنى الاخضر
- اتفضل .
ينفرج الباب مثل افلام الرعب الامريكية فى بطء قاتل .. وتظهر القامة الطويلة والشكل الغبى , ووجه الحمار .
هو ؟ .. نعم هو
- محسن ؟ .
- شاهين .
اصابع نحلية واصابع قصيرة بدينة .. كف يد جافة مثل صخر جبال صحراء (العتمور) , وكف يد قصيرة طرية تلتقيان عند المصافحة .
عناق لا احبه .. تفضحنى قامتى القصبرة , اصبح مثل الرقم صفر وهو يقترب من الرقم واحد لتشكيل الرقم الزوجى الشهير
- من متين فى البلد التعيسة دى ؟ .
- من اول امبارح .
- اتفضل .. اتفضل , ده كرسى كبار الزوار .
هل يعرف ؟ .
- ده مكتب شنو ؟ .
الوح قبضتى فى الهواء
- بتاع كلو .. خدمات , تسويق , سمسرة
- نشاط اقتصادى غير حقيقى .
(..) امك .. هل ما زال هذا (الشيوعى) المتخلف يطرح شعارات الاطفال (المنغوليين) الساذجة ؟
- الدنيا اتغيرت يا محسن .. والاتحاد السوفيتى فى ذمة الله , البركة فينا .
ينفرج الثغر الرجولى عن نصف ابتسامة باهتة .. الاصابع النحيلة تخرج علبة (سجائر) اجنبية حمراء اللون
- بتدخن .
- شكرا .
- ممكن ادخن ؟ .
- اتفضل طوالى , ما عندك مشكلة .. تشرب شنو ؟ ..لسه بتحب القهوة السادة يا مثقف ؟ .
- لا .. شكرا شاهين , الصحة ما زى زمان .
- كباية موية باردة ؟ .
- شكرا .. ما تزعج نفسك .
هل يعرف ؟
يتمدد فى الكرسى الوثير , يفرد رجليه الطويلتان الى الامام .. تلامسان قدمى وانا اجلس فى مواجهته , ابعدها عنهما فى توتر .
- عشرين سنة .. مش كده ؟
- من 1980 , واحنا هسع سنة 2000 .. بالظبط كده .
- فى ليبيا لسه ؟ .
ينفرج الثغر الرجولى عن نصف ابتسامة باهتة
- USA .
تشتمون امريكا وتهرعون اليها ؟ .. يا كلاب الشعارات .
- فريدة كويسة ؟ .
سؤال يوم القيامة .. تعرف انه قادم , وتندهش عندما يأتى
فقط صوت جهاز تبريد الهواء هو الذى منح هذا المشهد الموسيقى التصويرية المناسبة له .. هدير خافت , فى نعومة وانسياب .
ثوانى مثل حسابات اهل الكهف .. كل ثانية هى سنة كاملة
اذا هو يعرف .
- كويسة .
- انا قاعد اسبوع فى السودان وبعد كده راجع امريكا وما اظن ارجع السودان تانى .
الحمد لله
- ضميرك مرتاح يا شاهين ؟ .
اذا هو يعرف
- الاتحاد السوفيتى انهار يا محسن .
ما علاقة هذا , بذاك ؟
نهض على قدميه وضع يده الطويلة على كتفى وانا اجلس وراسى منحنية الى الارض
- سنة 1980 ما كان لسه انهار .. انا قاعد فى بيت ناس ابوى فى الامتداد , لو عندك اى وصية لى خلال الاسبوع ده انا موجود وانتا عارف البيت .
- بعد عشرين سنة جاى بتفتش على فريدة ؟
لم يسمع الجملة الاخيرة لانه كان قد خرج .
(فريدة) يا بنك (الخرطوم) .. (فريدة) خريجة المحاسبة , الموظفة الجديدة فى البنك , قصيرة القامة مثلى , مكتنزة الارداف , اللون الخمرى , والضحكة المشرقة
- انتى رطانية يا فريدة .
- انا محسية .
- وانا حلفاوى .. يا الله دى صدفة غريبة خالص .
كاننى اكتشفت الذرة
- لو محتاجة تفهمى اى حاجة فى الشغل , او لو زول اتساخف عليك , تعالى لى طوالى , مفهوم ؟ .
- حااااضر استاذ شاهين .
- احنا اهل يا بت , رطانة زى بعض , ولازم شوية عنصرية فى البنك ده .
- ها ها ها .. شكرا كتير ليك استاذ شاهين .
تحية الصباح
- صباح الخير فريدة .
تحية المغادرة
- يلا بالسلامة فريدة , خلى بالك من نفسك .. اشوف وشك بكرة بخير .
عرفت عالم العطور الباريسية الرجالية , ومعنى الاحذية الايطالية الجلدية .. عرفت كيف اخفى فى مهارة جزيرة صغيرة من الصلع فى مقدمة الراس .. الاقتراب بحذر .. خطوة , خطوة .
فقط انت يا (محسن) كنت فى حوجة الى اسبوع واحد فقط .. يوم (الاحد) منقولا من فرع (الابيض) , ويوم (الاحد) التالى كانت رقعة الدعوة (دعوة عامة .. خطوبة الاستاذ محسن على الانسة فريدة) .. وفى نفس يوم (الاحد) هذا نقلونى الى المستشفى بعد ان سقطت على الارض فى غيبوبة .
اصبح البنك عذاب .. قطعة من جهنم .. طلب النقل هو الحل الاخير
- عايز اتنقل فرع حلفا الجديدة يا سيادة المدير .
- انتا يا زفت مجنون ولا شنو ؟ .. هو الناس بتبكى عشان تتنقل العاصمة .. انتا عايز تمشى الاقاليم الكحيانة دى ؟ .
- ظروف اسرية خاصة .
- خلاص يا شاهين انتظر حركة التنقلات الجاية .
- ممكن اشوف واحد يبدلنى فى فرع حلفا .
- اصبر عليك الله .. بعد الترقيات انا بشوف ليك الموضوع .
- شكرا سيادتك .
اقترب منى (محسن) .. اصبح يتودد لى .. هل يعرف ؟ .. انا احبها فى صمت , هل تعرف ؟ , وهل يعرف ؟
- فريدة قالت انتا حلفاوى .
- فعلا .
- الرطانة ديل ناس كويسين شديد , وفيهم نسبة كبيرة من اليساريين .. انا شايقى بالمناسبة .
طظ فيك , وفيهم
- شايف طوالى فى يدك كتاب , لو بتحب الكتب انا عندى كمية كويسة .
- شكرا .
ابتعد عنى ايها (الشايقى) اللعين
- شاهين اقرأ البيان ده بعدين فى البيت .
بيان من الحزب الشيوعى السودانى
لقد اقترب ليل السلطة العسكرية المايوية من الانتهاء .. والصبح قريب
- شاهين اقرأ الكتاب ده .. ده كتاب جميل جدا .
الاشتراكية البديل الحتمى
- عندك مانع تكون عضو فى الجبهة الديمقراطية لموظفى البنوك ؟ .
- انا بس السياسة دى ..
- شاهين الناس بتجهز نفسها عشان اسقاط نميرى , وانا شايفك انسان ناضج فى مناقشاتك ونوعية الكتب البتقرأها, انا بثق فيك , يوم الخميس الساعة سبعة ح يكون فى اجتماع تمهيدى لتشكيل جبهة ديمقراطية لفرع بنك الخرطوم فى العاصمة , الاجتماع فى بيت ابوى فى الامتداد .. تعال اسمعنا ونحنا بنتكلم انا بثق فيك جدا , وهم كمان .
يدى سريعة على الالة الكاتبة , كنت الافضل فيها فى المدرسة التجارية
السيد/ رئيس جهاز الامن القومى
يوم الخميس القادم , سيكون هناك اجتماع للمعارضة السودانية , بقيادة بعض العاملين فى بنك الخرطوم لمناقشة اسقاط النظام وتفجير جميع بنوك العاصمة فى توقيت واحد لشل الاقتصاد السودانى وفى نفس الوقت التحرك العسكرى لزعزعة الثورة الظافرة والمنتصرة .
مكان الاجتماع فى بيت اسرة موظف فى بنك الخرطوم فرع البرلمان , هو يسكن فى الامتداد .
مواطن مخلص امين .
هذا من اجلك يا (فريدة)
تحركت الى محل طباعة اخر , اطلب منهم ان اكتب انا بنفسى لاننى مستعجل واجيد الكتابة على الالة وسوف ادفع الثمن كاملا .. اياك ان تكتب على نفس الالة مرتين , سيعرفون انك نفس الشخص .. قلت لكم , انا اذكى طالب تعامل مع الالة الكاتبة فى كل تاريخ المدارس التجارية السودانية
سرى وخاص جدا
الرفيق محسن تم تدريبه فى فترة تواجده فى مدينة الابيض بواسطة عناصر ليبية على التفجير سيقدم لكم شرحا وافيا عن المطلوب .. السلطات الليبية معكم قلبا وقالبا , نرجو مدنا بتقرير الاجتماع فورا , هناك نقود سيتم تسليم نصفها عن طريق الرفيق محسن , والنصف الاخر بعد التنفيذ
الخطاب الثانى هذا استقر يوم (الاربعاء) فوق سقف الغرفة القريبة من الشارع فى البيت الامتدادى الانيق .
انا الشيطان والملاك
- فريدة خليك قوية .. واصلى شغلك عادى , الحياة لازم تستمر .
- وااى .. وااى يا شاهين , دى قضية كبيرة , فيها استخبارات وامن قومى وتفجيرات .
انا الشيطان والملاك
- انتى لسه صغيرة وحلوة .
العطور الباريسية , الاحذية الايطالية , شرائط الاغانى النوبية , الترقية فى الوظيفة .. سقطت (اليمامة المحسية) فى شباك الصياد النذل , الصبور .
وبعد كل هذا تعود ؟ .. ترفع الستار عن المسرحية التى انتهت ؟ .. سمعت انك خرجت من المعتقل وذهبت الى (ليبيا) , لماذا تعود ؟ .. انا على استعداد لخوض معركة جديدة يا وغد .
- شاهين المسلسل بداء .
- الاولاد وين ؟ .
- مشوا مع امى فى الجريف .
كانت تستلقى على السرير .. (فستان) البيت الشفاف بديع على الجسد البرونزى .. مثل تماثيل المتحف الاثرية , كلما تقدم بها الزمن , كانت اغلى
ارتميت عليها .. زرعت قبلاتى فى كل مكان من جسدها الشهى
- يا ولد المسلسل .. دى الحلقة الاخيرة .
- انا مستعد اقتل اى زول يقرب منك يا فريدة .. عارفة كده ؟ .
- انتا جاى من الشغل تعبان شديد .. ها ها ها .
فتحت ساقيها , وغصت فيها
اخرجت من فمها اللحن البديع
- احى , لا .. المسلسل .
(انتهت)
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
هذه تحية خاصة جدا .. جدا
وهذا شكر ووفاء لانسان نبيل , يحمل عناء ان يتابع متابعة نقدية دقيقة كل ما اكتب .
انسان نبيل يتكبد مشاق الاتصال الهاتفى المستمر للتعليق , والنقد .
تحية اليك يا ابو ندى .
اعلم انك لن تحب هذه التحية العلنية , لكنك تستحقها .
شكرا ليك يا استاذ/ صديق حسن .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
طيار حربى (6)
انا مجرد سائق لطائرة صغيرة تقوم برش المحاصيل فى مشروع (حلفا الجديدة الزراعى) .. حتى اننى املك التواضع المطلوب لكى ارفض ان امنح وظيفتى المؤقتة هذه لقب (طيار) .
خالتى فى (حى الزهور) هى التى كانت تقوم بتسويق هذه الدعاية غير المبررة
- شاهين ابن اختى جاى من البلد .. هو طيار كبير فى شركة برتغالية .
يبدو ان هذه الدعاية قد تسربت فى كل انحاء (حى الزهور) , حيث اننى اجد باستمرار ترحيب واحترام مدهش من (عوطلجية) المنطقة المنتشرين حول اعمدة الانارة
- كيف يا كابتن ؟ .
- انشاء الله يا خال حوادث الاختطاف بتاعت منظمة التحرير الفلسطينية ما تكون مؤثرة على الشغل عندكم ؟ .
- جاى من لندن ؟ .. ولا نيويورك ؟ .
وخالتى تغضب لو كشفت السر
- الدنيا مظاهر يا ابن الغالية .. وبعدين مافى زول ح يراجع الاوراق .. ولد جيرانا ممرض فى مدنى , وهسع بالدعاية اتعمل اخصائى باطنية وبيكسب احسن الف مرة من ناس كلية الطب .
انا منتسب فى جامعة القاهرة فرع الخرطوم, كلية القانون , وهذا هو سبب زياراتى المتكررة (للخرطوم) .
ضجرت من رائحة المبيدات الحشرية النفاذة .. اتمنى بقية عمرى ان اضع حول رقبتى تلك (الكرفتة) البديعة , وارتاح من الرائحة
- سلام عليكم .. انتا شاهين ؟ .
- اهلا وسهلا .
- معانا هنا فى الجامعة ؟ .
- انا منتسب فى قانون .. سنة تالتة .
- انا فريدة من حى الزهور , ساكنة جنب ناس خالتك .. معاك فى قانون برضو سنة اولى .. برلومة .. ها ها ها .
- اهلا وسهلا .. دراسة القانون حاجة جميلة .
- بس القانون كلامو كتير بيعمل صداع نصفى .. ممكن اعزمك حاجة باردة وسندوتش .
- أأأأ .. مافى مانع .. ok .
- ok ؟ ده انجليزى ؟ .. ماشاء الله عليك .. انتا بتتكلم كم لغة ؟ .
- نعم ؟ .. أأأأ , يعنى ما كتير .
كوب عصير اصفر مجهول الهوية , وسندوتش (طعمية) عجيب عليه سائل حارق
غمزت بعينها وهى تنحنى لتقترب من راسى , ظهر لون (السنتيان) من فتحة صغبرة , احمر بنقاط سوداء
- انا عارفة السر يا متواضع .
- سر شنو ؟ .
- انتا طيار فى الخطوط الجوية البرتغالية .
- مافى حاجة بتدسا فى البلد دى ؟ .
- انا من زمان بتمنى اتزوج طيار واسافر معاهو حول العالم .
- والله كويس .
- متعبة ؟ .
- الشنو ؟ .
- شغلانة الطيار .
- المشكلة بس الريحة .
- ريحة شنو ؟ .
اصبحت زائرة مستديمة فى بيت خالتى , ورفيقة تجوال طويل بين طرقات (أداب) و (قانون) فى الصباح , ومحل (حلوانى الانتفاضة) فى المساء
- انتا العلاقة شنو بين القانون والطيران ؟ .
- والله ما عارف .
اصبحت اخاف من رعشة حبها , احببتها .. استيقظ وافكر فيها , انام وافكر فيها .. (فريدة) يا فريدة , يا بنت الجزيرة
سوف اكتب يوما ما قصيدة عنها بهذه القافية
اغانى (ام كلثوم) فى الليل .. واشعار (نزار قبانى) فى لحظة شروق الشمس .. واتصالات مزعجة مع (حلفا الجديدة) فى الظهيرة لتمديد الاجازة اسبوع اخر
- فريدة انا .. أأأأ .
- اتكلم عليك الله .
- انا بحبك .
- يا الله يا شاهين انا منتظرة الكلمة دى من اول يوم عرفتك فيهو .
- بالجد ؟ .
- انا بموت فيك .. بعبدك عديل كده .. تعرف انا مفكرة ادرس ضيافة جوية فى مصر عشان نكون فى طيارة واحدة وما نتفارق خالص .
- أأأأأ .
صدقونى اهم الاشياء فى العلاقات العاطفية هى الصراحة المطلقة بين الطرفين .. قررت ان اكشف لها سرى الخطير , اختيار المكان ضرورى .. قررت ان اتكلم فى (حلوانى الانتفاضة) لسببين , الاول هو الاسم الذى احبه بسبب ميولى السياسية , والثانى ان لديهم (بسبوسة) بالسمن البلدى
- فريدة انا ما طيار .. أأأأ , يعنى قصدى ما طيار بالمفهوم العند الناس .
- شنو ؟ .. كيف يعنى ؟ .
- انا سواق فى طيارة رش صغيرة .
توقفت قطعة (البسبوسة) فى منتصف حلقها تماما
- انا انسان فاشل يا فريدة .. بحاول اكون انسان محترم , وعشان كده انا بقرأ الجامعة من جديد .
- يعنى انتا ما طيار فى الخطوط الجوية البرتغالية ؟ .
تحول وجهها الى ثمرة (طماطم) .. وانحدرت دموع مالحة من العيون الجميلة
- انا شغال فى شركة بلغارية وما برتغالية.. شركة وقع ليها عطاء رش مشروع حلفا الجديدة وهى طلبت ناس خريجين ثانوى .. كان مفروض نمشى بلغاريا عشان كورس تدريب , لكن حتى دى ما حصلت واتدربنا فى حلفا ذاتها .
- يعنى انتا ما بتسافر لندن , وامريكا , والنمسا ؟ .
- انا غير حلفا الجديدة والخرطوم ما مشيت حتة تانية فى حياتى .. انا انسان فاشل يا فريدة , لكن حبك ممكن يعمل منى انسان جديد .
- وبتتكلم كم لغة ؟ .
- اتنين .. رطانة وعربى .
انفعلت وارتفع صوتها فى حدة قاسية
- يعنى ما بتلبس بدلة الطيارين وتنزل فى فندق خمسة نجوم ومعاك بنات شعرهم اصفر ؟ .
- نحنا بنلبس ابرول .. ومرات لو فى زول معاى فى الطيارة بقرب من بيتنا فى القرية وبنط منها لحوش البيت , والزول التانى بيواصل السواقة عادى جدا .
- انتا ما عندك مستوى .. انسان منحط .
حملت حقيبتها وخرجت فى خطوات مترنحة
- انا بحاول اكون انسان محترم يا فريدة .. بحاول .
نظرت الى طبقها .. ربع كيلو من (البسبوسة) بالسمن البلدى عليها (ذبابة) كبيرة تنظر لى فى حيرة
صاحب المحل سياسى قديم , ضجر من السياسة وتفرغ لصناعة الحلويات , كان يهز راسه مع نغمات (ام كلثوم) التى كانت تغرق المحل بالشجن
- اهل الحب صحيح مساكين
لما الحب نده على قلبى
ما ردش قلبى جواب
ياما الحب حاول يحرمنى
ياما عيون شغلونى .. لكن ولا شغلونى
الا عيونك انتا .. دول بس اللى خدونى
وبحبك امرونى .
امرونى احب .. لقيتنى بحب
لقيتنى بحب .. وادوب فى الحب .
قلت لصاحب المحل وانا انهض فى تثاقل
- انا بكرة راجع حلفا الجديدة يا حاج محسن .. اشوف وشك بخير .
لمس كتفى فى حنان
- اوعا تخلى الظروف تهزمك يا ولدى .. النسوان ديل اوسخ حاجة فى الدنيا .. شد حيلك , والشغل ما عيب .
خرجت لليل (حى الزهور) الهادى .. التاسعة مساء , نباح كلاب وضجة سكارى واصوات نشرة الاخبار الرسمية فى التلفاز
وضعت يدى فى جيوب بنطالى ورفعت صوتى الى اقصى درجة تذبذب حبالى الصوتية
- ياما عيون شغلونى .. لكن ولا شغلونى
الا عيونك انتا .. دول بس اللى خدونى
وبحبك امرونى .
علق شباب متسكع بجوار اعمدة الانارة
- ابو الزفت الكابتن مشعشع , وواقف لمبة .
- ديل يا حبة بيشربوا ويسكى من الاسواق الحرة .
(انتهت) .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
شاهين كيفنك..
اتخيل لي كدا احسن ... جرعات دسمة وكاملة... ما مهم انها مقطعة لانو اي جرعة بتكون كاملة، موش تخلينا مجهجهين أيام "عيونك يا حماده" وحالياً مع "احلام بت الصول" نقعد ننتظر بفارغ الصبر...
تعرف مرات عديدة ادخل البورد بحثاً عن إضافة لـ مقتل احلام (عامل هايلايت على اسمك)، وعندما اجد شاهين ولا اجد احلام اغادر البورد...
اليوم فقط قررت قراءة شاهين .. فريدة .. محسن (الاجزاء الاولى)
كن بخير
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
استاذ/ سيف بشير
اولا انا عاجز عن الشكر .. شكرا لتشجيعك المستمر .
واعتذر بشدة عن الانقطاع عن رواية (أغتيال دكتورة/ احلام حسب الرسول)
المسودة الاصلية فقدتها , والان اكتب فيها من جديد .
وانت تعرف السودان وظروف السودان .
اعتذر واشكرك .
شكرا لهذه الثقة والاهتمام بما اكتب .
شكرا .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
والله يا ابن الكلب لسه صعلوق كلام
ولسه فنان و رهيف و بتحب البنات
استمتعت جداَ بي الاعترافات اعلاه
و ضحكت كثيراَ .. اختلط عندي ابوالشوش و شخوصه
لكني سعدت جدا انكـ الكاتب
صدقني .. سعدت جدا.
زمان كنت علي يقين انكـ راوي خطير
رغم إختباءكـ خلف حبائل النوبيين الشهيره
الصمت و الضحكـ و النكتة السريعة
حدثنا اكتر و احكـ اكثر
كيف هو الحب بطرفكم الان يا (اربعيني) ؟
ايييييييييييييييييييييه دنيا
كبرنا يا ابوالشوش 
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
- شنو شابكنى الحمد لله , ما شاء الله .. انتا خليت الشيوعية وبقيت كوز ؟ .
- يا ريت .
انتقلت الصحف اليومية من اليد اليمنى الى اليد اليسرى .
الاخ شاهين
.. صراحة دخلت هذا البوست لكى اعقب على صديقى خدر واتابع ردوده .. ولكن فاجاتنى السناريوهات المدهشه.. دقة فى الحوار ..البحث عن مفارقات .
التكنيك فى الحوار يكشف - بلا حوجة للوصف - عن منطق الشخصيات والحالة النفسية للشخصية
انت سنارست متمكن اتمنا ان تحاول بهذه الذاكره النوبية المساهمة فى دعم الدراما السودانية ..
يبدو لى الوقت غير كافى لهذه الامنية.. لانه لايكفيك لتعيد كتابة بعض الحوارات الضعيفه يبدو لى انك تنطلق من ذاكره ماكره
على اية ساترصد كتاباتك لانها ممتعه وهذا شرط اساسى فى الكتابة
ارجو ان نتعرف اكثر
( وطظ فى خدر سبب المعرفه)
- سامحنى لاننى لم اصبح الذى تتمنى - .
انا لو فى مكان ابوك والله ما اسامحك
مع تحياتى
عماد براكة
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
تفاضل وتكامل (7)
فقال يسوع (( يا أبتاه , اغفر لهم , لانهم لا يعلمون ماذا يفعلون))
(انجيل لوقا23)
*********
مثل جميع اساتذة الرياضيات العباقرة فى العالم , لا اهتم بمظهرى .
اعتقد ان المظهر العام هو نوع من انواع الاهتمامات التافهة .. ماذا يعنى ان تلبس قميص متناسق الالوان مع البنطال ؟ .
او ان تكون الوان الجوارب متناغمة مع ما ترتدى ؟ .. هذا سخف .
كانت هذه قناعاتى منذ ايام الثانوى
- سرح شعرك ده يا شاهين او احلق صلعة .. ما معقول , دى مدرسة ولا نادى غجر ؟ .
التصحر الوراثى , قدم حلا لهذه المعضلة مع التقدم فى السن
فى تاريخى محاولة وحيدة فاشلة للتقرب من الجنس الاخر .. محاولة زواج من استاذة (كيمياء) تم اجهاضها , والسبب كما قالت وسيط هذه المحاولة
- هى بس قالت يعنى أأأأ .. مظهرك يا استاذ شاهين .. معليش انتا ما بتهتم بمظهرك , والنسوان اهم حاجة عندهم المظهر .
- دى زولة عويرة .. مظهر شنو ؟ .. داروين وانشتاين ونيوتن ما كانوا بيهتموا بمظهرهم وطريقة لبسهم .
- داروين وانشتاين ونيوتن ديل منو كمان ؟ .. اساتذة معنا هنا فى المدرسة ؟ .
- ديل موظفين كبار فى وزارة التربية .
- طيب يا استاذ عليك الله ما تخليهم يشوفوا لى قصة النقل لواحدة من مدارس امدرمان تكون قريبة من الموردة .
- حااااضر .
الدروس الخصوصية ليست من علامات العبقرية .. .. لكن المعايش جبارة , واسعار الكتب نار
- استاذ شاهين .. انا عمك محسن , ابو طالبة اسمها فريدة هى ممتحنة شهادة السنة دى .
- والمطلوب ؟ .
الاذكياء لا يتحدثون كثيرا .. فقط كلمات مقتضبة .. الاغبياء والنساء هم من يثرثرون
- سمعتا انك واحد من اشطر اساتذة الرياضيات فى الخرطوم .
- عفوا يا حاج ما الخرطوم بس .. السودان كلو .
حرك رجليه فى ضيق .. واخذ ينظر (لمروحة) السقف العتيقة
- بتى فريدة عندها مشكلة فى الرياضيات .. وياريت لو عندك وقت لدروس خصوصية .
- مافى مانع .. ممكن يومين فى الاسبوع .
- لكن يومين بس مش شوية ؟ .. عشان هى ضعيفة شديد فى المادة دى .
- انا الحصة بتاعتى بعشرين حصة بتاعت اى زول تانى من اساتذة الرياضيات الما حافظين حتى جدول الضرب .
حرك رجليه فى ضيق
قطعة من الحلوى هذه الطالبة (فريدة) .. قامة قصيرة , لون خمرى , ابتسامة مشرقة , غباء مدهش
واحتياطات امنية مشددة
- معليش يا استاذ نحنا جعليين .
باب الغرفة مفتوح , وامامه مباشرة سرير خشبى كبير يجلس عليه الحاج (محسن) وينظر الينا طيلة الوقت
احيانا يصيح
- تعالى يا حاجة اقعدى مكانى , عشان داير ابول .
وتأتى امرأة مثل الفيل , تجلس مكانه وهى تحدق فينا دون ان يرمش لها جفن , واحيانا تتضايق وتصرخ من الضجر
- يا حاج .. انتا لسه ما انتهيت من البول عشان دايرة امشى للجيران .
- معليش يا استاذ عشان نحنا جعليين وبنخاف على شرفنا شديد .
احيانا فى لحظة التسليم والتسلم هذه , كانت (فريدة) تضرب فخذها بفخذى بسرعة وخفة وتحدى , تيار من الحرارة كان يصعد لراسى مباشرة مع كل ضربة
هذه الضربات السريعة كانت تجعل من ليلى , ليلا قلقا , اضع يدى على مكان الانتصاب واحركها بقوة صعودا ونزولا .. يسيل السائل السحرى اللزج بين اصابعى , انام مبتلا
الحصة الاخيرة .. كان الجو غريب داخل منزلهم , صمت غريب , وجوه منتفخة من اثار البكاء , توتر حاد
(فريدة) حرمتنى من الضربات السريعة بالفخذ , كانت شاردة
- معليش يا استاذ .. دقيقة بس .. دايرة اطرش .
الحاج (محسن) يجلس على السرير الخشبى وهو يدمدم
- استرنا يارب من الفضيحة .. الله يستر , الله يستر .
كانت هناك تحركات مريبة خارج الغرفة , امرأة فيل اخرى , يبدو انها توأم الفيل الاولى , تهمس للحاج (محسن) وينظران لى
هل اكتشفوا لعبة ضربات الافخاذ السريعة ؟ .. انهم جعليين , هل لديهم سيوف واسواط (عنج) فى الغرفة الاخرى
- عندكم زول مات يا فريدة ؟ .
- ياريت يا استاذ لو كان فى زول مات .
ظهرت الفيل الثانية على باب الغرفة
- فريدة تعالى دقيقة .
بعدها مباشرة الفيل الاولى
- استاذ شاهين .. انا واختى وعمك حاج محسن ماشيين مشوار .. بعد اذنك .
صوت الباب الخارجى وهو يغلق , وبعدها سكون عميق .. ثوانى وظهرت (فريدة) على باب الغرفة عارية تماما .. كما ولدتها امها الفيل الاولى , نهود صغيرة متماسكة , شعر عانة كثيف , مذهل .. لون خمرى بديع , وابتسامة ساخرة .. حركت اصبع يدها فى اشارة
- تعال يا عمو .
رقدت فى سرير المراقبة الخشبى امامى مباشرة
- تعال يا عمو اديك درس فى علم الاحياء , باب الاعضاء التناسلية .
هل انا مرغوب من النساء والمراهقات الى هذه الدرجة ؟
تحركت كأننى فى حلم .. الاربعينى الذى لم يتذوق لحم النساء فى حياته .. الاربعينى مجنون الرياضيات .. الاربعينى الذى عرف عضوه جميع انواع صابون الاستحمام والغسيل فى اوقات الهيجان والاحتياج
خرج فحيح من صوتى
- وناس البيت يا فريدة ؟ .
- ما تخاف يا عمو تعال .
اقتربت من السرير , لمست اللحم الخمرى لاول مرة فى حياتى , وضعت فمى على فمها
- زح خشمك من خشمى , ريحة خشمك فظيعة .. ارضعنى هنا .
كرتان من اللحم الطرى الهش , وحلمتان بلون وشكل القرنفل
اجمل لحظة فى تاريخ الانسان الحديث - بعد الخروج من الكهف - , ليست فى حل معضلة رياضية .. اجمل لحظة هى ان تضع فمك فى ثدى فتاة صغيرة السن , وجميلة
لا ادرى ما الذى حدث بعد ذلك .. شعرت بضربة قوية على ظهرى والفيل الاولى والثانية فوق راسى , و (فريدة) عارية تحتى وهى تقاوم الرغبة فى الضحك
- يا حلفاوى يا ود الحرام .. نحنا جعليين .. يا واطى .
واحدة فيهما كانت توجه لكمات بقبضة اليد العارية , والاخرى كانت تستخدم (شبشب) بلاستيك
- انتا قايل بناتنا زى بناتكم الحلفاويات يا ود الكلب .
فجأة ظهرت عصا خشبية كبيرة كلها (مسامير) .. تكومت على السرير الذى اصبح خاليا بعد خروج (فريدة) من ساحة المعركة
- لا .. لا .. لا عليكم الله انا زول عيان عندى سكرى و غضروف .. انا زول وحيد فى الدنيا دى .. انا زول مسكين .
انخرطت فى بكاء مرير
(حشرة) تافهة , ضاع عمرها فى حل مسائل بلا معنى .. (حشرة) مشغولة بالرياضيات فى غابة (أسود) .. اربعينى لم يتذوق لحم النساء فى حياته
- بكرة دى يا خول يا ود الحرام تجى تتقدم وتتزوج فريدة .
- انتا عارف لو ما جيت بكرة .. برسل لناس البلد فى شندى و ح تعرف شغلك والله بنجيك المدرسة ونضبحك عديل .. بكرة دى الساعة خمسة تكون هنا والعقد طوالى بعد صلاة المغرب وتسوق فريدة على الفندق .
- نحنا احفاد المك نمر .. ما بنرضى الحقارة فى الشرف .. الله اكبر عليك .
المك (نمر) الذى شرد ؟
عقد قران متواضع فى مساء اليوم التالى , بلا اى ضجة .. وترتيب حجز غرفة بائسة فى فندق (شهداء الميل اربعين) .
فى الطريق الى الفندق انهارت (فريدة)
- دايرة اطرش .. انا تعبانة .. تعبانة شديد .
توجهنا الى اقرب عيادة طبيب .. العيادة خاوية , والطبيب مشغول بمتابعة مبارة فى كرة القدم فى جهاز التلفاز الذى امامه على المنضدة
- مالك يا عروسة ؟ كفارة .
- عندى طراش ودوخة فى الراس و ..
- تعالى وراء الستارة .
جلست احدق فى الفراغ .. كان الطبيب يمد راسه من بين فتحة فى الستارة كل دقيقة
- المريخ لسه ما جاب قون ؟ .
- لسه شوية .
- الفريق النيجيرى ده خطر .. الله يستر .
- الله يستر .
- ارفع صوت التليفزيون شوية لو سمحتا .
خرجا من وراء (الستارة) بعد ربع ساعة
- لسه تعادل ؟ .
- لسه .. خير ؟ .. فريدة عندها شنو ؟ .
- مبروك المدام حامل فى شهرين ودى شوية فيتامينات .. عشان صحتها ضعيفة .
يكتب (الروشتة) وهو يحدق فى الشاشة
- حامل كيف ؟ .. احنا لسه ما وصلنا الفندق !! .
- بتحصل كتير الزمن ده .. نمرة 10 ده خطير , تصدق الفلاتى ده ممكن يجيب قون فى المريخ .. الله يستر .
- الله يستر .
خرجنا .. كانت تسير وراسها على الارض , دموعى كانت تنحدر على قميصى .. انبعثت ضجة قوية وتصفيق وصراخ من كل انحاء الشارع
مسكت يدى وهى تواصل النظر للاسفلت المتهالك
- المريخ جاب قون يا شاهين .. مبروك علينا وعلى الشعب السودانى كلو .
- الله يستر يا فريدة .
- انتا بتشجع الفريق النيجيرى ؟ .
(حشرة) تافهة , ضاع عمرها فى حل مسائل بلا معنى .. حشرة مشغولة بالرياضيات فى غابة (أسود) .
عبقرى غبى , لم يفهم الحياة والناس , ولا يريد ان يفهم .
(انتهت) .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
خدورى
طارق ابوعبيدة
هل تعرف ؟
واحدة من طموحاتى ان اكتب تاريخ الكلاكلة فى شكل رواية .
القرية التى صارت بقدرة قادر شبه مدينة , عرجاء , عجوز .
عن الاصدقاء المشتركين الذين تركوا السياسية , وعن الذين تركوا الدنيا .
شكرا جزيلا لك , لانك تقراء ما اكتب .. تقدير من مبدع مثلك , هو وشاح .
الحب الاربعينى مكانك سر .. اذا كان لم يثمر فى العشرينيات و الثلاثينات .. فكيف بالله عليك ونحن نقف على عتابات الاربعين ؟ .
همى .. واحباطى .. وخوفى .. وفشلى .. سخريتى من فئة الطبقة الوسطى التى انحدرت - وانا معها - ..
تغيير القيم والمعايير .. الخيانة العاطفية , والخيانة الزوجية , وخيانة التاريخ الشخصى .
الكتابة , والمشى لمسافات طويلة , هما بهجتى الوحيدة فى ارض المليون ميل مربع .
انا تنتظرنى مقابر (الكلاكلة شرق النموذجية) .. فاى مقبرة تنتظرك انت يا (هولندى) ؟ .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
Quote: الكتابة , والمشى لمسافات طويلة , هما بهجتى الوحيدة فى ارض المليون ميل مربع .
انا تنتظرنى مقابر (الكلاكلة شرق النموذجية) .. فاى مقبرة تنتظرك انت يا (هولندى) ؟ . |
السطرين ديل يا وغد كفيلات بأن يجعلوني اكتب ما يملاء ورقتي A4 عما حدث و سيحدث لي
الله يقويني و امسكـ القلم .ز وانت عارف ابخوكـ ابو الكسل من الكتابه الجد جد
قطع شكـ سأعود و اخبركـ بكل شي
__
سيف و براكة ديل اصحابي شباب زي الورد, لكـ ان تحتفي انهم ينتظرون طوفان قلمكـ
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
لحظات لن تعود (8)
(الخميس) وغدا (الجمعة) .
يزغرد صوته
- خميسك يا شوش .
- بعتا قميصك يا دين ؟ .
لا يدخل .. يرمى الكلمات من فوق الحائط الطينى القصير .. احتمى انا بظل حائط الغرفة من لهيب الحر
- ما تتأخر .
- جهز المسائل .
يعود هو بعدى من العمل .. كلانا عطالة مقنعة .. (الخميس) لنا وحدنا , لا مكان (لفريدة) .. من السابعة والنصف مساء حتى منتصف الليل .
يدخل انيقا , معطرا , (طاقية) خضراء , (جلابية) بلدية نظيفة , يحتضن (العود)
- يا عزابى يا كحيان .
الاشياء مرتبة .. الارضية الرملية (مرشوشة) .. منضدة خشبية صغيرة فى المنتصف بين سريرين , عشاء دسم .. (حلة كوارع) يتصاعد منها البخار .
- كاس يا شوش .
- عرقى من ناس ماريا .
- سجمنا من عرقى ماريا .
وحدنا .. سنوات طويلة ونحن نشرب بمفردنا , انا وهو فقط .. لا نحب صعاليك الحى , ولا جلسات شرابهم التى يتم اقحام السياسية فيها , لا نحب مشاجراتهم السخيفة .
انا وهو فقط
يدندن
- مافى حتى رسالة واحدة
بيها اتصبر شوية .
- الله عليك يا محسن .
- سرع الكاسات يا شوش .
ينزل الى الساق .. ويصعد الى الراس
- سجمنا من عرقى ماريا .
يدندن
- الشوق والريد
والحب البان فى لمسة ايد .
- وااى .. وااى .. وااى .
ادور مثل الفراش
- ليك يا هاجر ليك رسالة
لو روحك يوم تنسى دلالها .
صوت رجولى قوى , صوت مثل عرق (الذهب) فى منجم بعيد على اطراف صحراء كلها (ديناصورات) متوحشة
- ان تكن انت بعيدا فى الثرى
فخيل الشعر يجتاز الثريا .
- وااى .. وااى .. وااى .
اليد مكان القدم , اتبول وراء (المزيرة) .
- سجمنا من جسمك يا ماريا ومن عرقيك .
سنوات طويلة ونحن نشرب بمفردنا .
اعارة لزوجته (فريدة) فى المملكة العربية السعودية .. اربع سنوات كاملة , اربع سنوات افتقدت فيها دندنة (العود)
- محسن وفريدة رجعوا من السعودية يا شاهين .
ذقن كبيرة .. جلباب ابيض قصير .. (سبحة) انيقة
- شيخ شاهين .. لسه انتا عايش ؟ .
ادخل فى احضان كلها رائحة نفاذة من العطور (النبوية) الشريفة
- اتغيرتا يا محسن !! .
- الدنيا كده يا شاهين .. الثابت الوحيد هو ربنا سبحانه وتعالى .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
الرصاصة لا تزال فى جيبى (9)
- انتى فريدة ؟ .
- نعم استاذ شاهين .
انظر لها من فوق (نظارتى) الطبية
- خريجة اعلام 2006 ؟ .
- نعم .
- واشمعنى يعنى اخترتى جريدتنا دى ؟ .
- بابا زميل استاذ محسن رئيس التحرير .
- استاذ محسن ده واحد من اهم الصحفيين فى الشرق الاوسط .
- فعلا .. انا معجبة بيهو شديد , وهو طوالى مع بابا فى الشغل والبيت .
(محسن) المنبحط ؟
(محسن) الذى تربى فى كنف الشمولية (المايوية) ؟
(محسن) الذى طالب براس الشعب فى 26 مارس 1985 ؟
(محسن) الذى طالب براس (نميرى) فى 1986 ؟
- مفروض تدربى معاى هنا فى القسم السياسى ؟ .
- يا ريت استاذ .. ده شرف كبير لى .
- بتحبى السياسة ؟ .
- والله بصراحة ما شديد .
- احسن .. بتقرأى شنو من الجرايد .
- الدار و حكايات ومجلة سيدتى وحواء .
- ممتاز .. ممتاز ح يكون عندك مستقبل زى عمك محسن .
صغيرة وحلوة .. قصيرة القامة .. لديها (تسريحة) كلاسيكية
- عمرك ؟ .
- 23 سنة .
- بدون خصم ؟
- هاها ها .. لسه ما حصلتا مرحلة الخصم .
- رئيس فرنسا منو ؟ .
- أأأأأأ .. ها ها ها .. لا دى صعبة شوية مافى خيارات ؟ .
- فعلا صعبة , عمك محسن ذاتو ما يكون عارف الاجابة .. طيب رئيس امريكا .
- جورج بوش .. مش كده ؟ .
- عظيم يا بنتى .. عظيم .
تقف بيننا عشرين عاما كاملة .. عشرين عاما لتتعلم وتفهم معنى كلمة (صحافة)
- الزول ليه بيكون صحفى ؟ .
- عشان الشعب .
- عشان الشعب ولا عشان يأكل عيش ؟ .
- هاهاها .. والله بصراحة اعتقد عشان يأكل عيش .. عمو محسن وعد بابا انو ح يدينى عمود يومى بعد ما انتهى من التدريب .
- بابا بيشتغل شنو ؟ .
- عميد فى جهاز الامن .
- انتو الظاهر عليكم اسرة وطنية .
- وعندنا كمان عمى استشهد فى انقلاب هاشم العطا بتاع الشيوعيين سنة 1950 .
- عليه رحمة الله .. والشهيد كان مع الانقلاب ولا ضدو ؟ .
- لا هو كان بصراحة ماشى الدكان يشترى فول وسردين فى نفس يوم الانقلاب , قاموا الشيوعيين قصدوا وضربوا طلقة فى راسو .
- هم الشيوعيين كده , مجرمين .. ضد الدين , وضد الفول والسردين .
- هاهاها .. لما مشوا المشرحة لقوا الرصاصة مكتوب فيها صنع فى الاتحاد السوفيتى ولا اله والحياة مادة .
- لا حول ولا قوة .. والكلام المكتوب فى الرصاصة بالعربى ؟ .
- لا .. بالروسى , عشان الروس بيتكلموا روسى .. ما بيعرفوا عربى .
- والله العظيم ؟ .
- بالجد والله .. وبابا لسه محتفظ بالرصاصة دى .
- طيب ما تحاولى تكتبى عن الحاجة دى .
- عندى حاجة جاهزة .. مقال بعنوان الرصاصة لا تزال فى جيبى .
- ده مقال ولا فيلم ؟ .
- لا , مقال .. وبصراحة بابا ساعدنى فيهو كتير .
انبعثت نغمات شجية مرحة من داخل حقيبتها الصغيرة الانيقة
- بعد اذنك دقيقة يا استاذ شاهين .. ممكن ارد ؟ .. ده خطيبى .
- اتفضلى .
تدفقت ينابيع حب وحنان من عينيها وهى تتحدث
ايوه .. معليش .. معليش .. لا , ما تمشى , انا قربتا انتهى .. خليك واقف تحت .. دقيقتين بس .. يلا مع السلامة .
- خطيبك عمرو كم ؟ .
- 27 سنة .
- بتحبيهو ؟
ابعدت منى عيونها المستديرة فى خجل طفولى
- شديد .
- شديد ساكت ؟ .. ولا شديد جدا , جدا .
- يعنى .. اكيد جدا , جدا , جدا .
- شغال شنو ؟ .
- ماشى ابوظبى بعد بكرة .
- اقول ليك حاجة وما تزعلى منى ؟ .
ابوها (عميد) فى جهاز امنى .. و (محسن) على ما يبدو (عقيد) فى نفس الجهاز
- اتفضل يا استاذ انتا زى ابوى .
- مالك ومال السياسة والصحافة ؟ .. ده كلام فارغ يا فريدة , ضياع عمر بدون معنى .. انا لو لقيت انسانة تحبنى شديد جدا , جدا .. كنتا خليت الكلام ده كلو .. انزلى لخطيبك وانسى قصة الرصاصة والشيوعيين والشعب .. اقرأى حواء وسيدتى واحضرى قنوات دريم وروتانا وافلام كارتون , عيشى حياتك وشبابك , اتزوجى وسافرى مع خطيبك وما ترجعوا البلد دى تانى .. البلد دى ادبخانة .
اخذت تنظر لى فى اندهاش
- ده نفس كلام خطيبى .
- ده انسان عاقل .. انتى مفروض تتعلمى منى .. ودى نصيحتى ليك .. فى السودان ده ابعدى من السياسة والصحافة وحاولى تطلعى منه عشان تكونى انسانة متوازنة نفسيا .. وهسع انزلى لخطيبك .
- شكرا ليك كتير .. انتا انسان عظيم يا استاذ شاهين .
- انا لو عظيم ما كنتا ح اكون قاعد فى الكرسى ده .
خرجت فى خطوات شابة ينتظرها مستقبل باهر
- انا بس لو لقيت انسانة حلوة زيك تحبنى شديد جدا , جدا , جدا .. كنتا بقيت انسان تانى .
(انتهت)
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
- بابا بيشتغل شنو ؟ .
- عميد فى جهاز الامن .
- انتو الظاهر عليكم اسرة وطنية .
- وعندنا كمان عمى استشهد فى انقلاب هاشم العطا بتاع الشيوعيين سنة 1950 .
- عليه رحمة الله .. والشهيد كان مع الانقلاب ولا ضدو ؟ .
- لا هو كان بصراحة ماشى الدكان يشترى فول وسردين فى نفس يوم الانقلاب , قاموا الشيوعيين قصدوا وضربوا طلقة فى راسو .
- هم الشيوعيين كده , مجرمين .. ضد الدين , وضد الفول والسردين .
- هاهاها .. لما مشوا المشرحة لقوا الرصاصة مكتوب فيها صنع فى الاتحاد السوفيتى ولا اله والحياة مادة .
- لا حول ولا قوة .. والكلام المكتوب فى الرصاصة بالعربى ؟ .
- لا .. بالروسى , عشان الروس بيتكلموا روسى .. ما بيعرفوا عربى .
- والله العظيم ؟ .
دى حوار مدهش يا شاهين يدل على تشخيص لواقع حالى ..
هذة الصحفية او لاعلامية بنفس جمالها وما تحمله من غباء.. سنشاهدها فى احدى البرامج الهامه على
الفضائية السودانية.. واثناء نجوميتها البراقة بفضل ود فضل المولى
عامل راسو الكبير دا..
ستندقد صحيفتكم.. وعبثا تحاولون الاعتزار.. بلقاء صحفى مع المزيعة الجميلة المثقفة التى ترد
على اجابة خاطئة : بل هو - الكاتب الراحل الـطيب صالح -
عفوا صديقى شاهين بعض القصص تحتاج لمجهود.. فعبقريك لا تنسجم معها فهى تحتاج لنوع خاص من التكنيك والصياغة
انا عارف الكلاكة واللفه وعدم الزمن
انشر كتاباتك .. فلقد تجاوزت سن النبوه
ممتعه كانت القصه الاخيرة.. لا زالت رصاصتها فى جيب ذاكرتى
ساكتب موضوع خاص اتناول فيه كتاباتك.. وننتقدها ونميزها عن غيرها \
حتى تلك السانحه
تحياتى
عماد براكة
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
أشجار النخيل (10)
وقفت لا اصدق نفسى .. انظر فى تعجب يا سادتى
ادركت عندها ان (الكلاكلة) قد اكملت دائرة السقوط النهائى .. عرفت عندها اننى لن اعود الى هذا الشارع مجددا
سنوات طويلة وانا امارس رياضة (المشى) .. تجولت فيها حتى حفظت عن ظهر قلب كل المعالم الهامة .. ذرعتها طولا وعرضا , عندما كانت شبه( قرية) , وعندما تصابت وصارت شبه (مدنية) .. استطيع ان اصف لك بدقة موقع منزل فيها عليه بوابة خارجية عجيبة الشكل فى شكل (كاس) رياضية من (الاسمنت) على الجانبين .
للشوارع عندى فيها ذكريات , وذكريات .. فذاك طريق كنا نمشى فيه ونحن ما زلنا طلاب مرحلة ابتدائية نتعلم حروف الهجاء والمديح وقصائد وطنية عن وطن لا نعرفه – هل هناك اسخف من القصائد الوطنية ؟ - .
على هذه الشوارع عرفت معنى (القبلة) الاولى , على ثغر فتاة طائشة كانت اكبر منى كثيرا , منحتنى (القبلة) فى شارع مظلم امام بيتها مباشرة , ومست فى حنان اعضاء حساسة من جسدى , ربما كانت ستمنحنى المزيد لولا (كلب) ضال اصر على تعكير التجربة الاولى باطلاق نباح متواصل , خشينا معه خروج الجيران للبحث عن اللصوص , افترقنا على موعد لم يحدث .. وكثيرا ما اتعمد الان المرور فى نفس الشارع , اقول ربما ستتذكر بعد كل هذه السنوات الوعد القديم وتمنحنى (القبلة) الثانية , وجدتها ذات مرة وقد تحولت الى (دبابة) مصفحة ضخمة , ترتدى (فستان) بيت متسخ قديم , تقف امام نفس المنزل , فى نفس الشارع - الذى حاولت فيه اغتصابى - , وهى تسب الدين والانتماء العرقى لطفل صغير عارى تماما وعليه اثار (براز) من الخلف , طالبة منه الدخول الى المنزل .. قلت ربما تتذكر , وقفت وانا انظر لها وابتسم فى اشراق , ردت على رومانسيتى الحالمة ردا اوجعنى
- فى شنو يا ود الحرام ؟ .. بتعاين ليا وتتبسم زى الفتاة المفتوحة .. انتا قايل ده بيت شكش ولا شنو ؟ .. امشى طير من هنا بلاش كلام فارغ .
حملت الطفل من ذراعه فى عنف وهو يصرخ , واغلقت الباب بقوة
عرفت عندها اننى الوحيد الذى يتذكر فى شبه (المدنية) هذه
ما حركنى دائما هو ذاك المنزل الرائع البديع , شد انتباهى .. اصبح مركز جولاتى المكوكية .. اتوقف وانظر اليه , اتغيب سنوات واعود اليه
غابة من اشجار النخيل , غابة حقيقية .. والمنزل فى منتصف هذه الغابة , تستطيع لو وقفت على امشاط ارجلك ان تلمح ثلاث غرف طينية تحتضن بعضها البعض فى وداعة .. فى موسم الاثمار يتحول المنزل الى جنة (عدن) تنقصها انهار (اللبن) و (العسل) .. ثمار خضراء , تنقلب الى صفراء , ثم حمراء غامقة
كتبت معظم اشعار فترة المراهقة الطويلة امام هذا المنزل .. شربت من (مزيرة) انتصبت امامه , ماء باردا .. اصبحت عندى (فوبيا) الدخول اليه , ان اراه من الداخل , المس سيقان (النخيل) الشامخة , اقول لمن يسكن فيه
- والله انتو فى سعادة .. دا اجمل سكن فى السودان كلو .
منعنى الحياء من خوض التجربة
ترقبت من يسكن فيه .. عرفتها هى فى البداية , سمعت من تناديها وهى تهم بالدخول
- يا فريدة .. الاخبار شنو ؟ .
كانت قصيرة القامة - انا اعشق المرأة القصيرة - .. ترتدى (توب) اخضر كأنها صنعته من (جريد النخيل) .. عرفت بعد ذلك (محسن)
- يلا يا محسن عشان ما نتأخر .
صادفتهما كثيرا بعد ذلك .. اعجبتنى حياتهما وسط هذه الغابة .. يضع يده على كتفها وهما يسيران ملتصقان , يتهامسان .. حبل من الحرير يربط بينهما فى مودة وانسجام
طلبت من صديق يهتم بالرسم ان يأتى ويرسم لى هذا المنزل , لكنه مات فى حادث سير قبل ان تتحقق الامنية
اقتطعت (القضارف) من عمرى سنوات بعيدا عن (الكلاكلة) .. وعندما عدت ذهبت الى موقعى المفضل فى المساء .. كان الصمت يلف المكان , أشجار (النخيل) كانت حزينة عليها غبار كثيف .. شعرت بالقلق
قلت لاول عابر سبيل
- ناس البيت ديل وين ؟ .
- وين كيف ؟ .. ديل ليهم مدة هاجروا امريكا .. عقبالنا يا ابو الشباب .
شعرت بطعنة نجلاء .. شعرت بالعطش , كانت (ازيار المزيرة) محطمة عليها (طحالب) خضراء .
عدت بعدها من جديد فى الاجازة التالية احمل حول رقبتى (كاميرا)
- عايز اصور بيت عندى معاهو ذكريات حلوة .
بناية أسمنتية عبيطة تحتل المكان القديم .. طلاء خارجى كثيف غبى .. لا شجرة (نخل) واحدة
- الحصل شنو ؟ .
خرجت هى .. عرفتها على الفور .. ترتدى (بنطلون جينز) و (تى شيرت) ابيض يبتسم فيه (ميكى ماوس) , معها فتاة صغيرة تتحدث الانجليزية بطلاقة
اعترضت طريقهما فى جنون
- ده شنو يا فريدة ؟ .. الحصل شنو ؟ .. اشجار النخيل وين ؟ .. المزيرة وين .
تراجعت الفتاة الصغيرة فى هلع
- MAMY .
وقفت (فريدة) فى ثبات , نظرت فى عيونى مباشرة .. وبعدها انفجرت فى البكاء .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
الشاهين
ما حصل فتحت ليك بوست، وصادف خاتي لي (حلة) في النار وما حرقت.. مشكلتك معاي شنو ياخ!
أنا مطالبك بي مكونات حلة كاملة (الطيارة قامت)، و(لفة) جلاي عشان أنضف الحلة..
__
والله دي متعة وحراق حلل!
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
العزيز جدا / عماد براكة .
تحية لانك تفكر فى كتابة نقدية لهذه المجموعة .. احتاج للنقد الشديد , فى جوانب التكنيك والصياغة والحوار , النقد هو وقود الكتابة للتحرك نحو الامام .
سوف اتابع باهتمام تلميذ يتلمس الطريق .
مودتى .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
الصديق القديم _ لنج _ شاهين
اولا لك التحية والاحترام
ساحول ان اكتب دراسة نقدية .. اجارى بها كتاباتك المدهشة .
انت لا تحتاج للنقد بالمفهوم الكلاسيكى بل نحتاج نحن لنقد شخوصنا داخل كتاباتك .. وتوضيح
سيرة جيل محبط , ومن تكرار الحسرات تاهت منه الذاكره .. كما قلت : حتى طعم القبلة لم يعد فى البال
ومن وجهة نظرى المتواضة جدا هنال بعض القصص اشعر بها كانت مستعجله فى خروجها واذا وجدت زمن
كافى ونار هادئة بتعمل حريقة فى مطبخ الاخ ياسر صاحب الحلة المحروقة
ودا تاكيد لمتعة كتاباتك
ستكون الدراسة مفصل عن القصص ولى طلب ولو ارسلت لى هذه الكتابات على الايميل بكون افضل
[email protected]
لنا لقاء
عماد براكة
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
أفتتاح رسمى (11)
- معليش .. معليش فريدة .. أأأأ الظاهر عشان الارهاق وتعب السهر .
- لا ما مشكلة .. الايام جاية كتير حبيبى .
اتصبب عرقا .. حاولت المستحيل
فشلت فى الليلة الاولى .. ما كنت اخاف منه قد حدث , ارتخاء تام .. لا يستجيب ابن (الكلب) , يرفض الانتصاب
ارتديت ملابسى .. نظرت لى فى جزع وهى تضع قطعة من القماش على جسدها العارى
- ماشى وين ؟ .
- نازل الريسبشن , عايز ادخن سيجارة واشوف لو عندهم كروت شحن عشان الرصيد بتاعى خلص .
الثانية صباحا .. نزلت اجرجر قدمى
اتحدث الى نفسى او الى عضوى
- الله يخيبك يا وسخ .
هل سيحدث شرخ بينى وبينها ؟ .. ليلة (الدخلة) هى الاهم .. الذكرى التى تبقى .. واحدة من نساء البلد شتمت زوجها بشكل علنى امام الجميع
- انتا راجل ؟ .. انتا شغال بصباعك من ليلة الدخلة لحدى هسع يا خايب .
جلست فى (الريسبشن) المهجور , اشعلت سيجارتى ونظرت لاصبعى
- والله دى تبقى مصيبة .
جاء يمسح عيونه من اثر النوم
- فى حاجة يا عريس ؟ .
- لا .. زهجان شوية وداير اشرب سيجارة .
- زهجان كده من اول يوم ؟ .
نفخت الدخان على هيئة سحابة كبيرة بيضاء
- اعمل ليك معاى شاى ؟ .
- عملت ليك ازعاج ؟ .
- لا بالعكس مفروض اكون صاحى لحدى الصباح دى الوردية بتاعتى .
وضع كوبين من الشاى على المنضدة , رائحة (نعناع) قوية تسللت لانفى
ضرب فخذى كأننا اصدقاء من ازمنة قديمة
- ولا يهمك .. بتحصل كتير .
- الشنو ؟ .
- ما شرط تحصل فى اليوم الاول او التانى او حتى التالت .. لكن اكيد ح تحصل .
- متأكد ؟ .
- عارف .. انا شغال فى الفندق ده لى حداشر سنة .. عارف عملت كم كباية شاى بالنعناع الساعة اتنين صباحا لناس كانوا مدبرسين زيك كده ؟ .
- كم ؟ .
- كتير .
- اسم الكريم منو ؟ .
- انا محسن .. انتا شاهين , شايف اسمك فى الدفتر , والعروسة فريدة .
- متزوج يا محسن ؟ .
- انا طالب فى كلية الطب .. وبشتغل هنا فى الريسبشن وردية ليل .
- وبتمشى الكلية متين ؟ .
- بمشى الصباح عادى .
- وبتنوم متين ؟ .
- يعنى .. مرة ما يكون فى ضغط شغل بنوم وانا قاعد على الكرسى .. مرة بين المحاضرة والمحاضرة بنوم فى نجيلة الكلية .
- وناس البيت وين ؟ .
- فى سنجة .. انا جيت الخرطوم براى , نومتا فى الشارع , سرقتا , لحدى ما الحاج المرحوم صاحب الفندق شغلنى عامل نطافة .. رجعتا تانى للمدرسة وامتحنتا والحمد لله انا هسع فى خامسة طب , ومن عامل نطافة بقيت موظف ريسبشن .
- ماشاء الله عليك يا محسن .. ماشاء الله عليك .
- المهم الاصرار يا عريس , الحياة تحدى , بس ما تستسلم , فى كم زول فى نفس ظروفى دى انحرف وضاع .. الدنيا ما ذكاء , الدنيا اصرار .
- متأكد فى امل يا دكتور .. أأأأ يعنى عدم الانتصاب وكده ؟ .
- بتحصل يا عريس .. دى حاجة عادية , بس احنا فى السودان عندنا مفهوم بدوى متخلف عن انك لازم تفتح زوجتك نفس يوم الدخلة ولازم الدم ينزل يغرق ملاية السرير , ولازم القضيب يكون واقف زى السيف .. الانتصاب محتاج حالة نفسية معينة , ما أمر , يعنى ما ممكن تقول ليهو انتصب , ينتصب .. والزول فى السودان بيكون يوم عرسو مرهق ومتوتر .
- افرض لو ما قدرتا فى الايام الجاية ؟ .
- برضو المشكلة شنو ؟ ما ح تكون نهاية الدنيا .. فى ناس كتيرة ما بتقدر تفض غشاء البكارة بتمشى للطبيب هو البيعمل العملية دى .. شوف يا عريس , المقدرة الجنسية مختلفة عند الناس زى النظر والسمع والشم , فى ناس عندها قدرة تمارس جنس اربعة مرات فى اليوم وفى ناس ما عندها القدرة دى , فى زول فحل لكن ما بيشبع المرأة عاطفيا , وزول تانى اقل منه فحولة لكن قادر يشبع زوجته عاطفيا وجسديا وانسانيا .
- انا ما عارف .. أأأأ انا اتكلمتا بصراحة شديدة وانا ما بعرفك .
- انتا بالمناسبة نزلتا الريسبشن هنا مش عشان تشرب سيجارة .. انتا نزلتا عشان تلقى زول تتكلم معاهو .
- انا خايف .. فريدة دى بت عمى , وكده ممكن تكون فضيحة .
- فى زول يا شاهين عندو موية بيضاء فى عيونو هل ممكن دى تكون فضيحة ؟ .. فى زول عندو بواسير هل ممكن تكون دى فضيحة ؟ .. دى حاجة عادية , السبب ممكن يكون عضوى او نفسى فى الحالة دى الزول بتعالج والحب والتفاهم والصراحة بين الطرفين بتساهم فى العلاج .. افرض لا مافى اى امل , الناس تنفصل بكل هدواء وحب واحترام .. والدنيا ما بس جنس ونسوان , فى مجالات تانية كتيرة ممكن الزول يشبع فيها ذاتو .. مفهوم الفحولة فى الخطاب الشعبى السودانى ده مفهوم غبى , بتاع القرن 19 , هسع لو عندى زولة بحبها وهى بتحبنى بس ب بوسة او لمسة ممكن نصل ذروة الاشباع الجنسى .. الحب فوق الجنس يا شاهين وهو الاهم .
- ياأأأأأه يا محسن .. ياأأأأأه .. ما تتخيل كلامك ده ريحنى قدر شنو ؟ .
- اطلع ارتاح يا شاهين .. نوم عشان شكلك تعبان .. وبكرة انزلوا اتفسحوا , اتكلموا , احكوا نكت , قربوا من بعض , اتكلم معاها بصراحة عن اى حاجة فى حياتك , خليها صحبك وابوك وامك واختك , وبكده اكيد ح تكون عشيقتك .
- بالجد انتا انسان نادر .. بالجد .
- عارف انا قلتا الكلام ده لكم زول فى الريسبشن هنا ؟ .
- كم ؟ .
- كتير .
- وبرضو الساعة اتنين صباحا ؟ .
- برضو اتنين صباحا .
نهضت من مقعدى
- شكرا ليك دكتور .. شكرا كتير .. ده الكرت بتاعى فيهو ارقام تلفوناتى .. لازم نبقى اصحاب .
اهم الاشياء الحب بين البشر , فليكن الحب فى الارض يكنس هذا العفن
أمين .
(انتهت)
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
تمباك وأشياء اخرى (12)
- محسن .. محسن .
يرفع راسه , ينظر للسماء , ثم يعود للنوم من جديد
- محسن .. محسن .
اطلق صفيرا خافتا من فمى .. يرفع راسه وينظر للسماء مرة اخرى
- لا هنا يا محسن .. انتا قايل الوحى ولا شنو ؟ .. انا شاهين , هنا بره الحيطة , داير سفة .
دائما ما لا امتلك ما يكفى من (التمباك) لقضاء ليلة طويلة من الارق , ليلة طويلة افكر فيها فى تلك الافخاذ السمراء المخروطة بمخرطة الهية قديرة .. (فريدة) والدة (محسن)
لا تهتم .. لا تعرف ان النار بدأت تسرى فى عروقى .. لا تعرف اننى لم اعد طفلا , بداء صوتى يتغير بصورة مزعجة , شعيرات خفيفة ظهرت على الشفة العليا .. اصبحت انظر باستمتاع (لتيس) جارنا وهو يفعل الاعاجيب فى تلك (الغنماية) الضامرة
- محسن قاعد يا خالة ؟ .
- تعال ادخل يا شاهين .. محسن فى الادبخانة .
ترقد على ظهرها .. بين اصابعها (سيجارة) , (قميص نوم) يظهر من تحته اللحم الاسمر بكل تفاصيل التفاصيل
- المدرسة كيف ؟ .
- كويسة .
- شدوا حيلكم الامتحان قرب .. انتا ومحسن لازم تخشوا الثانوى العالى الاكاديمى .. ما تبقوا فى قصة مصرية وتجارية وصناعية والخمج ده .
ترفع رجلها , ينزلق القماش الحريرى اكثر .. اشتعل بالنار , اغرق فى سحابات التبغ التى تخرج من فمها , فى تضاريسها المذهلة
- يا محسن امرق سريع .. الثانوى العام ده مرحلة مهمة فى تاريخ الزول يا شاهين .. لازم انتا ومحسن تكونوا دكاترة عشان تريحونا يا ولدى .
وهى راقدة على ظهرها , تنفرج الساق فى شكل مثلث قائم الزاوية , محور ارتكازه هناك , فى ذلك الكهف العجيب .
- انا عايز ابقى محامى .
- وا حلاتى يا ناسى .. والزول يقراء شنو عشان يبقى محامى ؟ .
- قانون .
- ولو داير يبقى قاضى ؟ .
- يقرأ اداب .
- ربنا يوفقكم ويحقق مرادكم , الزمن بقى صعب يا ولدى .. يا محسن امرق انتا عندك امساك ولا شنو ؟ .
تنهض من على السرير
- امك قاعدة فى البيت ؟ .
- قاعدة .
- والله متلومة معاها مفروض اغشاها خشم خشمين .. لكن الملاريا لسه ما مرقت من الجسم .
تعطينى ظهرها وهى تتجه للغرفة الاخرى , اجزاء كبيرة من القماش الحريرى (تنحشر) فى ذلك التجويف الخلفى , تخرجه بحركة سريعة من يدها .
اتعذب .. اجلس مع (محسن) فى الغرفة البعيدة واتمنى لو تأتى
احلم بها جالسة داخل (الطشت) النحاسى الكبير , عارية .. احمل منها (الكوز) انحنى على (جردل) الماء , اجعل الماء يتدفق على جسمها
- عايز اشرب موية الحمام حقتك يا خالة فريدة .
- اشرب يا ولدى .
- بس اوعا امى تعرف .
انهض من نومى
ثلاث بيوت فى الظلام الحالك اصل بعدها الى بيتهم .. اصعد على تل الرمل الصغير , اضع يدى على حافة السور الطينى المتأكل .. انظر لها , بعيدة هناك , جوار الغرفة الاولى , تنام وتحتضن الطفلة الصغيرة , كتلة عجيبة فى هذا الظلام
(محسن) يرقد جوار الحائط تماما , لو سقط عليه لمات فورا .. اهمس له
- محسن .. محسن .
يرفع راسه , ينظر للسماء , ثم يعود للنوم من جديد
- لا هنا يا محسن .. انتا قايل الوحى ولا شنو ؟ .. انا شاهين , هنا بره الحيطة , داير سفة .
ينهض وهو يفرك عيونه .. يرفع (المرتبة) , يحمل علبة (النيفيا) ويتجه نحوى
- ما معقول يا شاهين .. كل يوم .
- معليش يا محسن .. الخرمة كعبة .
كانت هناك .. بعيدة , شهية .. ترتدى (قميص نوم) يمنعنى الظلام من تحديد لونه .
(انتهت) .
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
إنا لله يا شاهين ...
الخاتم قال شنو ؟
أظنو أظنو ..
قال أدخلو للناس من هنا ..
من المشاغل و المشاعل الإنسانية البسسسيطة .. و عبقرية ..
من الآداب و الفنون و الثقافة و الفكر ..
النور بيجي منها ..
و يدخل للناس .. برضو منها .
و لتسقط السياسة .
......
ياخي متعتني ..
يديك العافية .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
تسقط السياسة
تسقط السياسة
تسقط السياسة
ولتحيا الاشعار والقصص والمسرحيات والاغانى والمقطوعات الموسيقية .
لتحيا الشعارات المكتوبة على عربات النقل الثقيلة من نوعية
الجامبو يتكلم .. والاسفلت يتألم
يعيش الناس وحكايتهم اللذيذة
تسقط السياسة
تسقط نشرات الاخبار
تحيا قصص الحب العبيطة
تسقط السياسة
وتحيا يا عماد عبدالله .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
تنبيه من الاستاذ/ سيف بشير عبر الماسنجر
فى قصة (تمباك وأشياء اخرى) وردت جملة غير صحيحة نحويا كان يفترض ان اقول
ثلاثة بيوت فى الظلام الحالك اصل بعدها الى بيتهم
وليس كما ورد
ثلاث بيوت
باعتبار ان العدد يخالف المعدود فى التأنيث والتذكير
شكرا ابو السيوف .. شكرا
اعتذر عن الخطاء .. تحية للتنبيه .
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
أيس كريم (13)
نتسابق انا وهو
- البيصل الاول منو ؟ .
عندما ترتفع صرخة من مكان مجهول
- بيوت .. بيوت .
ننطلق فى مرح صاخب .. كأننا اسرى مركز اعتقال جماعى , نعود للاوطان بعد دهر
- الحصة الخامسة والسادسة مافى.. بيوت .. بيوت .
نضع حقائبنا خلف ظهرنا باحكام .. وننطلق باتجاه مدرسة البنات , نلمحها من بعيد , تجلس امام باب بيتهم الطينى القديم المواجه للمدرسة , ترانا ترفع يدها مشجعة
- اها الليلة السبق التانى منو ؟ .
- الليلة شاهين سبق محسن .. وامبارح محسن كان الاول .
امامها (صبارتين) , واحدة برتقالية اللون والاخرى حمراء
- داير ايسكريم موز يا فريدة .
- وانا داير ايسكريم عرديب .
تفتح (الصبارة) بحركة رشيقة .. تنحنى وهى جالسة على (البنبر) , وترفع الغطاء بيدها اليسرى .. تبدو الاكياس البلاستيكية مثل الاصابع الطويلة , رائعة فى الوان متعددة , تغرس يديها وتخرج واحدا
- ده ايسكريم عرديب يا محسن .. موز الا جوه فى التلاجة يا شاهين .. تعال معاى عشان تعزل ليك واحد كبير , محسن اقعد لى فى البنبر هنا لحدى ما نجى لو بعتا لى خمسة بديك واحد مجانى .. تعال يا شاهين .
ندخل انا وهى .. نمر على الجثة التى ترقد فى طريق سعادتنا
- ديل ناس منو ؟ .
- انا فريدة يا حبوبة .
- دايرة شنو ؟ .
- دايرة اشيل ايسكريم من التلاجة .
تقبضنى من يدى .. هناك فى الركن البعيد يرقد سرير معدنى قديم ارتفع فيه الصداء من كل اتجاه , وعليه (مرتبة) متسخة
تجلس عليه
- تعال اقعد لى فى حجرى يا حلبى .
- انتا لسه فى سنة سادسة ؟ .
تداعب شعر راسى
- لسه .
- وداير تبقى شنو بعد ما تكبر .
- داير ابقى قاضى شرعى .
- انا بحبك .
تضع لسانها داخل تجويف اذنى
- وانا ذاتى بحبك .
- بالجد ؟ .
انفاسها حارقة على عنقى .. صوتها يبداء فى الفحيح
- دايرة اوريك صورة قلة ادب .
عدد قديم متأكل من مجلة (سمر) , امرأة نصف عارية يقبلها رجل وسيم وهو يضع يده على فخذها .. فخذ ابيض مستدير
- ديل بحبوا بعض زينا كده .. نعمل زيهم ؟ .
- نعمل .
تتجرد من ملابسه وتجردنى .. نهودها صغيرة , لا رطل لحم واحد على الجسد الصغير المضروب بسوء التغذية
نرقد على الهيكل الحديدى وتبداء هى العمل .. يطلق الهيكل صريرا مزعجا .. تصرخ الجثة من الخارج
- ديل ناس منو ؟ .
- عمرك كم ؟ .
- 12 سنة .
- احنا قدر بعض .
تصعد فوقى .. تتحرك ببطء , تضغط على جسدى .. تتحرك بسرعة .. الهيكل الحديدى المتهالك تحتنا يصرخ , يصرخ , يصرخ
- مجدى .. مجدى .. اااه .. مجدى .
- ديل ناس منو .
- أأأنا ما مجدى .. انا شاهين .
- مجدى .. مجدى .. مجدى .
رائحة عرق الابط قوية .. روائح اخرى غريبة
يصرخ , يصرخ , يصرخ .. تهداء الضجة فجأة , يتوقف صرير هيكل الصداء
- م م م مجدى .
تنام فوقى بسكون تام .. ثم تنهض
- انتا لسه ما بقيت بالغ ؟ .
- لسه .. السنة الجاية .
- الله يصبرنا .. انا بحب الاولاد الحلب لما يكونوا سمان وقصار .. شكلهم لذيذ .. يلا قوم البس هدومك .
- مجدى ده منو ؟ .
نخرج سويا
- ديل ناس منو ؟ .
- يا حبوبة ما تمرقى دينى .. انا فريدة ؟ .
- فريدة منو ؟ .
- مجدى ده منو ؟ .
فى الشارع يجلس (محسن) سعيدا على (البنبر)
- بعتا ليك عشرة .
- خلاص شيل ليك اتنين هدية .
نمضى نحن .. وتجلس هى وحبات من العرق على الجبين
- مع السلامة يا حلبى .. بكرة .
- ما لقيت ايسكريم موز فى التلاجة ؟ .
- شطب .. انتا يا محسن بتعرف زول اسمو مجدى ؟ .
- مجدى ده منو ؟ .
(انتهت) .
......
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
Quote: - ما لقيت ايسكريم موز فى التلاجة ؟ .
- شطب .. انتا يا محسن بتعرف زول اسمو مجدى ؟ .
- مجدى ده منو ؟ . |
مجدي ده مش بتاع مجلات ميكي؟؟
ولاالبسوق العجلة ام انوار؟؟؟
قال لي استاذي: اكتب عن تجاربك من وجهة نظر
من يختلف معك وجودها باراء من يتفق معك
ترى كم من كل هذا ينطبق على غيري؟؟
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
عشان خاطر عيون المرحوم (14)
- السلام عليكم .. معاى استاذ شاهين لو سمحتا ؟ .
- اهلا وسهلا .. انا شاهين .
- معاك فريدة .
- اهلا , اهلا بيك يا فريدة البركة فينا كلنا فى محسن .
- فقد .. فعلا فقد كبير يا شاهين .
- معليش يا فريدة انا ايام الوفاة كنتا فى بورسودان عشان كده ما جيت البكاء .
- ما مشكلة كفاية كتابتك عن المرحوم فى المنبر .
- كيف يا استاذة ؟ .. المرحوم ده كان واحد من احسن الناس البيكتبوا فى المنبر .
- شكرا على البوست بتاع جمع اعمال المرحوم فى كتاب .
- دى اقل حاجة تتعمل يا فريدة .. وشايف تعليقاتك جميلة فى البوست .
- ما تتخيل محسن ده كان بالنسبة لى شنو ؟ مش بس حبيب , ده كان اب روحى , ده كان ....
صمتت تغالب بكاء
- كلنا لها يا فريدة شدى حيلك ماما .. واحسن هدية تتقدم للمرحوم قبل الذكرى السنوية الاولى هى تجميع اى حاجة كتبها فى المنبر فى شكل كتاب .
يأتى صوتها متقطعا , مرهقا
- ممكن نتقابل عشان نفكر بصوت مسموع .
- مافى مانع فريدة .
- خلاص لو بتقدر تجينى البيت , انا ساكنة فى بحرى المزاد , اخر محطة .. من يوم وفاة محسن وانا ما قادرة امرق للشارع .
- فريدة ما تعملى فى نفسك كده .. الزول لازم يواجه المشاكل والاحزان .. ارجعى تانى اكتبى الكتابات الظريفة بتاعاتك فى المنبر .
- ما قادرة .. والله ما قادرة , غايتو ربنا يصبرنى .. ح تقدر تجينى متين ؟
- الليلة بعد ما اطلع من الشغل , يعنى ممكن اكون معاك زى الساعة ستة ونص .
- خلاص بس اول ما تصل بحرى المزاد اخر محطة اضرب لى تلفون وانا برسل اخوى الصغير يجيبك البيت عشان الوصفة صعبة شوية .
- خلاص .. شكرا ليك .
لم اتخيل المنزل هكذا .. هذا ليس منزلا عاديا , اشبه بالقصر , فخم , الوان متناسقة بديعة , ثلاثة طوابق ترتفع فى شموخ .
- ده بيت ناس فريدة ؟ .
- ايوه يا عمو .
- متأكد ؟ .
- اهى ديك فريدة .
واقفة على شرفة الطابق الاول .. ملاك فى ملابس كاملة السواد .. رفعت يدها وصوتها
- اتفضل يا استاذ شاهين .. ميدو دخل عمو فى الصالون .
اغوص فى سجاد ناعم طرى , اجلس على كرسى وثير .. نوع من المنازل التى تشعر فيها انك متسخ مهما فعلت , انظر لحذائى فى قلق
- اصلوا ما اتخيلتك كده يا فريدة .
- كيف ؟ .
- يعنى اولا انتى ما بتنزلى صورتك فى المنبر , ومن نوعية كتاباتك افتكرتك اكبر من كده .
- ما بحب قصة الصور فى المنبر .. لكن انتا زى صورتك بالظبط .
اين اهرب من قبحى ؟ .
- شغال وين يا شاهين ؟ .
خادمة من الممكن ان تكون فلبينية او كورية او صينية .. تحمل اكواب من عصير شهى , تحدثت معها (فريدة) بلغة غريبة , لغة فلبينية او كورية او صينية
- قلتا لى شغال وين ؟
- محامى .
مكتب محاماة صغير فى عمارة قذرة تتحول فيها المكاتب الى غرف نوم بعد الثالثة ظهرا
- بتحب عصير التوت .. معليش مفروض كنتا اسألك تشرب شنو .
- لا كويس .. بحب التوت جدا .
لم اشاهد ثمار (التوت) الا فى صور المجلات الدعائية
- محسن كان معجب جدا بالبوستات بتاعتك فى المنبر .
- الله يرحمو كان اديب وشاعر كبير .. محسن ده كان استاذ .
- تعرف فى اليوم الفكرتا انى اكتب بوست عن تجميع كتابات المرحوم فى كتاب لقيت البوست بتاعك .
من حسن حظى
- افتكر انو لما الكتاب يتعمل محتاج تدشين راقى يتعزم فيهو ناس من الجرايد ونقاد .. يعنى لازم تكون فى دعاية كويسة .. انا شخصيا متبرعة باتنين مليون جنيه , مناسبة ؟ .
- احنا مفروض فى الاول يا فريدة نشوف تكاليف الطباعة كم .. وعايزين كم نسخة , ونوعية الورق , وبعد كده نشوف ايجار قاعة زى الشارقة مثلا بيكلف كم عشان تدشين الكتاب بعد كده بنقدر نحدد التكاليف المالية .
تضرب باظافر طويلة نظيفة على كوب (العصير) الزجاجى .. تنظر بعيدا
- ما مشكلة .. انا شخصيا متبرعة باتنين مليون جنيه , بعد كده ممكن نكتب بوست فى المنبر لو فى اى زول عايز يتبرع عشان المشروع ده .
- انتى والمرحوم عرفتو بعض عن طريق المنبر ؟ .
- لا .. احنا كنا مرتبطين من ايام الجامعة , ومن زمان بنحب بعض وبنحب نكتب اشعار وقصص , محسن اشترك فى البداية فى المنبر وبعدين انا .
نهضت على قدمى
- خلاص انا الليلة بكتب البوست .. والبركة فيك مرة تانية , شدى حيلك .
- ماشى كده طوالى ؟ ما تقعد تتعشاء معنا .
- شكرا ليك فريدة , عندى مواعيد كتيرة , مرة تانية نقعد ونتكلم عن محسن .
نهضت هى الاخرى
- انا بالمناسبة مسافرة القاهرة بكرة .. ماشية اقعد مع ماما زى كم شهر .. ما اظن اقدر اكتب بسهولة تانى فى المنبر , دقيقة بس اكتب ليك ال email بتاعى عشان نكون على اتصال , وبرضو اتابع معاك .
رفعت سماعة الهاتف الثابت الذى بجوارها وتحدثت بلغة غريبة , لغة فلبينية او كورية او صينية , جاءت الخادمة تحمل ورقة بيضاء وقلم (رصاص) عجيب الشكل
- ده ال email بتاعى .
- يلا شكرا ليك .. تمشى وترجعى لينا بالسلامة .. وعليك الله واصلى الكتابة فى المنبر ما تحرمينى من ابداعك .
- بحاول .. شكرا ليك .. شرفتنا شاهين .
مدت لى يد طرية .. يد لم تعرف الغسيل وكنس الاتربة
قلت - محاولا اطالة مدة تلاقى الكفين -
- انا ما شفتا اخلاص فى الحب يا فريدة زى اخلاصك للمرحوم محسن .
ابعدت عيونها عنى فى ضيق واضح
- شكرا .. ميدو , يا ميدو .. تعال وصل عمو شاهين لحدى المحطة .
عندما خرجنا التفت ورائى كانت تقف على شرفة الطابق الاول وتنظر لنا انا و (ميدو)
- فريدة دى خالتك يا ميدو ؟ .
- عمتى .. احنا مسافرين بكرة مصر يا عمو شاهين .
- انتا ماشى مع عمتك ؟ .
امسك الطفل يدى فى فرح
- ماشيين كلنا نحضر عرس فريدة .
- فريدة ح تتزوج ؟ .. ح تتزوج منو ؟ .
- مهندس عايش فى امريكا , درس معاها زمان فى الكلية .
- خلاص ارجع يا ميدو انا عرفتا المحطة .
- مع السلامة يا عمو .
حشرت راسى عبر النافذة
- السوق العربى يا ريس ؟ .
رد السائق فى قرف
- اركب .. ايوه عربى .
صعدت وجلست على مقعد جوار النافذة .. اخذت انظر للناس بحياد تام لا حب و لا كراهية .
وما زال طعم عصير (التوت) فى اللسان .
(انتهت)
......
شاهين.
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
آستاذ شاهين أشكرك علي هذا العقل المبدع المتمرد و رهافة احاسيس غير مسبوقة- منذ 3 ايام تسبق قرآتي لقلمك قراءتي للاخبار اليومية - كم هائل من التعطش لقراءة المزيد - اشكرك علي دخولك يومياتى في ضباب اوروبا بكتاباتك , لك الشكر و التحية . مريم
| |
|
|
|
|
|
|
|
|
|
Re: شاهين .. فريدة .. محسن . (Re: shaheen shaheen)
|
يا استاذة/ مريم عثمان
انا اخاف من هذا الكلام
| Quote: Eloquent, powerful articulation from a very enthralling and fascinating brain. Give us more to devour |
شكرا .. شكرا .. شكرا
اتمنى ان استحقه .. ولكل الاشياء الجميلة ايضا , اشكرك جدا .
| |
|
|
|
|
|
|
| |
shaheen shaheen
كمال سالم
abuguta
طارق جبريل
saif basheer
خدر
imad braka
ريهان الريح الشاذلي
Yassir Tayfour
Emad Abdulla
Walid Safwat
rosemen osman
فيس بوك
تويتر
انستقرام
يوتيوب
بنتيريست