أحداث الإثنين الدامية وتوقعات انفجارها مجددا في أي وقت من الأن !!

Quote: أها يا حضرات الحمد لله وبعد تعب شديد ومدافرة شديييدة وصلنا للنوع الأخير من أنواع الجغمزة في التكتيكات دي ألا وهو (طالع للريبة والتلاف).. طبعا بتكونوا مستغربين من إسم المغرسة دي لإنكم بتعرفوا الطلوع للريبة والتلاف على الطبيعة لكن ما سمعتو قبال كدة بإنو في طلوع أوتومسفيري لليفة والترا.. (بسم الله !!قصدي الريبة والتلاف) مش دا المحيركم ؟؟!! وأنا أقول ليكم صبرا أل بورد بكري وأل الأبراد المجاورة عشان أوريكم الشغلة الإستعصت عليكم دي ... الناس البتطلع للريبة والتلاف في المنبر دا بيكونوا ظاهرييييييين وواضحييين للزول المتابع كويس وهم زااااتم ما بيقدروا يدسوا طلوعم للشغلة دي .. والقصد يا جماعة الخير بكل بساطة إنو معانا ناس في البورد دا الله يهديهم ما سجلوا معانا عشان يستفيدو ولا عشان يتثقفوا ولا حتى عشان يقروا الأخبار والتحليلات .. ديل سجلوا فضول منهم ساااكت كدي !! وما عارفين إنو الشغلة كبيرة قدر دا وما فاهمين إنو أنحنا في موقع عالمي أي زول بيقراهو وبيمثل راي عام ماممكن نتجاهلوا مهما عملنا ومهما سوينا . أها الجماعة ديل أغلبم جايين من غرف الشات والماسنجرات والمواقع بتاعت التسلية دي البيكون فيها نظام تتعرف على زول ولا زولة تقوم ترسل ليو كرت موسيقى فيهو قلوب وأغنية هابطة لي نانسي عجرم .!! أو يكون فيها تبادل أغاني ترسل ليو غنية لي جواد العلي يقوم يرسل ليك خواطر فيل بتاعت نور الجيلاني يبكيك ويبكينا معاك !! المهم وبإختصار إنو الطالعين للريبة والتلاف سجلوا في المنبر دا شماراات كدي وجو يعرفوا الحاصل خاتين في راسم إنو الشغلة إمتداد لي مواقع الترفيه وتقضية الوكت .. أها بعد فترة كدى إكتشفوا إنو الشغلة كبيرة شوية هيلمانة وأحزاب سياسية وبيانات وبطيخ !! يعني نظام ترسل لي زول كرت مرسوم فيهو أرنب ولا غزالة ولا شافع عريان ما في هنا.. ولو حصلت وزول رسل ليك إلا يكون على سبيل التدقيسة وفي مناسبات معينة .. أها في الحالة دي بيحصل لي نوعية ديل (إنحباط أوتومسفيري) من البورد لكن ما بيمشوا منو.. وزعلة ساااااكت كدي يقوموا يمددوا من إقامتم هنا عشان يفشوا غبينتم وزعلم بمناسبة وبدون مناسبة .. وديل بتعرفم من طريقة مداخلاتم البتكون قمة في الشتارة والبشتنة وبتكون ما عندها أي علاقة بالموضوع نهائي . دا غير إنو بيكونوا إنطباعيين جدا .. يعني يقروا ليك موضوع كدة إنتا تكون كاتبوا وما يعجبم .. أها يقوموا كل ما يجوا داخلين المنبر دا يفتشوا لي مداخلاتك عشان يعكروا ليك أخلاقك ويكرهوك العيشة ساي كدة .. الحاجة الداير أضيفا إنو الطالعين للريبة والتلاف ديل من الصعب جدا إنك تناقشم أو تفتح معاهم موضوع حوار لسبب بسيط .. إنو هم ما بيجوا المنبر طوالي لإنهم أساسا ما مهتمين بيهو كتير ولمن يجوا بيعملوا ليهم كم مداخلة عشوائية كدة وبيختفوا طوالي إسبوع إسبوعين ومرات شهر شهرين إنت تكون ما قادر تلم فيهم .. بعدين في تكتيك غريب شوية بيتبعوهو الجماعة ديل .. إنهم لمن يفتحوا صفحة المنبر ما بيسجلوا للدخول طوالي . بيكونوا أوف لاين وبيراقبوا الناس المستهدفنهم بي حذر شديد أها لمن يلقوا فرصة بيعملوا دخول سريع وبيكتبوا جغاميزم وسرعة كدة بيعملوا خروج تاني بعد الإرسال.. وبيقنصوا في راس المنبر لحدي ما يلقوا فرصة تانية يتجغمزوا ويطلعوا تاني ..