|
|
|
 Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: الأزهرى2 وود الموج وبقية الشباب ...
اسمعوا الكلام ده...
الواحد لما يعرس ليهو واحدة بمية وللا مئتين بقرة ما بيعنى إنو بقرو ضاع خلاص...
شوف...
اخت المرة الأصغر منها طوالى ... لو جاء واحد عرسها ... بيرجعوا ليك نص بقرك الدفعتوا او ربع البقر الجبتو على الأقل. |
شوف يا ابو الزهور كلام شول ده صاح..لانو انت لما تجيب البقر
ماكل البقر بمشى لابو العروس بدو منو اعمامها واخوالها
وازواج اخواتها..بالمثل لما تتزوج اختها بدوك من البقر الجديد
لكن المشكله مش ادوك بقر والله لو مشيت بالبقر ده نمولى والا الخرطوم
هم بعرفوا البقر العندك زاد كم والا نقص كم حتى لو ماتت بقرة انت
لازم توريهم الجلد بتاعها ولو ولدت بقرة هم برضو بكونو عارفين
يعنى مافى طريقه تبيع بقرة او تتصرف فيها..بس اللبن والسمن
فقط اما البقرة تحتفظ بيها لانو فى نطاق ضيق البت ممكن يطلقوها
ويرجعوا البقر كلو لصاحبه يعنى ما تعمل فيها مجنون وتلفح
ليك بقرة..
يازول الجماعة ديل فى البقر ده مفتحين تفتيحة لما تحيرك..
راجعين ليكم للبقر..
بعدين لو اخوك مات الكبير فيكم لازم يجيب خروف ويضبحوا وياكلو نص ونص
بقسموه وتتزوج انت زوجة اخوك لكن الاولاد البتنجبوا ما تبعك
تبع اخوك..
انا اتمنى شول ومحسن والاخوان يورونا كتير من عادات اهل الجنوب
فى الافراح وفى الاتراح،،،،
| |
 
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
الأخ الحبيب شول
أحزنني هذا القرار .
آمل أن تظل معنا فوجودك مهم ويثري النقاش .
لا تعلم كم أسعدتني مداخلاتك والمعلومات المهمة التي زودتنا بها .
أخي الكريم
أشهد الله رب محمد والمسيح أنني أحب أهلي في الجنوب واحلم باليوم الذي ننعم فيه جميعاً بالسلام السياسي والإجتماعي .
حاول أن تبقى معنا, لاتسمح للحظة ضيق آنية أو غضب عابر من شئ ما أن تاخذك منا .
أتمنى أن يظل هذا المنبر وطن لنا جميعاً .
لك خالص الود والتحية والإحترام .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
الاخ العريس ازهرى وباقى العرسان....سلام عليكم
اها يا عريس والدايرين يعرسو ربنا يتم ليكم عرسكم وغايتو رسلو لينا ايام السمايات بجيكم.لكن الواحد ماحيقدر يواصل معاكم فى البوست دا على الرغم من اهميتو ولو واصلته فيهو وجبنا ليكم صورنا حيكون فى خرخرة ومشاكل وانا شايف انتو لسه ماجاهزين لى نوع كلامنا لسه بدرى عليكم والسبب الاتى:
:
مدخل ...
وعفوا من هسي كان حسيتو اني داخل من باب الخروج...
الأخ ابو بكر والأخوة المتواجدون وغير المتواجدين بالمنبر ...
ليكم جميعا تحية من القلب ...
فيما يخص موضوع سحب البوستات ، اولا احب الناس تعرف انا ما كاتب ساذج ولا اعتباطي قبل ما اجي هنا قريت قوانيين المنبر كما لم يفعل احد ...وعارف البي والعلي وعارف حقوقي وواجباتي والتزاماتي تجاه البكتبوا وتجاه المنبر ...
لكن في ملاحظة بسيطة جدا فيما يتعلق بالناس البطالبوا بحسب البوستات عملا بالمقولة المريحة الجواب بكفيك عنوانو ... والمقولة دي مقولة مفخخة احيانا بتعني الشئ وضدو في نفس الوكت ...
طيب الجواب دا احتمال يكون من جواهوا وردة واحتمال جواهو قصيدة من نزار قباني ، واحتمال جواهو سوناتا الفها واحد بيعاني من ظلم حبيبتوا الرافضة تتنازل وتسمع ليهو ... واحتمال جواهو حل وامل ... واحتمال يكون جواهو لغم زاتو ... فنحنا لازم نفتح الجواب دا عشان نشوف الجواهو شنو ... كان لغم ولا كان رسالة حب ...
لكن مشكلتنا انو بنرمي الجواب في زبالة التاريخ ، في الوقت الممكن الرسالة المشت مزبلة التاريخ دي تكون هي رسالة لخدمة التاريخ وتشريع للتاريخ ، وتفكيك للتاريخ ... وليس لتفخيخ التاريخ ، لكن المؤسف انو الواحد بكتفي بس بالعنوان وجري للزبالة بدون حتي القاء مجرد نظرة ولو عابرة – يا حبيبي تكفي زي ماقال الفنان - علي المحتوي والمضمون البتشيلوا الرسالة جوه ... ومافي زول بفهم انو دايما الجوه اهم من البرا ...
والمسالة في نهاية البسكويت ما مجرد شريعة اسلامية عليها بالظاهر ... وشهادة اربعة ولا خمسة تكفي لقطع راس زول ... طيب السؤال هنا للناس البطالبوا بسحب البوستات دي هل هم مختصين بعلم اللغة وعلومها المختلفة من مجاز وايحاء وادوات اللغة الكروباوية والسلاخية ، وفي النهاية دا كلوا اسموا ادوات اللغة ... طيب الاشكالية الممكن يقع فيها المنبر دا ، وانا شايف المنبر دا اللي هو حقك هنا بالضرورة وحقنا برضوا طول ما نحنا كلنا لسه اسمنا سودانيين ، ممكن المنبر دا يقدم خدمة ويلعب دور اكبر من كدا ، سوا كان الخدمة دي بطريقة عورة ولا عرجة ولا كسيحة ولا عميانة ولا طرشة ولا مقعدة مكسرة مرة واحد ...
الكلام دا بقولوا مبطن بحب لكل زول سوداني موجود في المنبر دا ولي بكري ابو بكر بشكل خاص ... انا عارف المتاعب الانتا فيها يا بكري والفيها كل الناس ... انا زاتي عايش معاك هنا في البلاد دي يا بكري ابو بكر ... البلد الما بكون عندك فيها وكت عشان حتي تفتح الشباك، ما بكون عندك وقت عشان تقرا كل الرسايل الفي البورد دا ودي عملية مضنية ومجهدة ..
طيب اختراحي البسيط ... في المنبر دا انا بعرف ناس كويسين جدا مختصين باللغة وبعرفوا علم اللغة وعلي دراية علمية باللغة دي وعارفين مداخلها ومخارجها وابوابها السرية ... فقبل ما تودي البوستات لي الزبالة ولا نوديها للخور ممكن نعمل حاجة نرسل البوستات دي للناس ديل ونطلب رايهم قبل ما نمتثل ونستجيب لي مطالبات السحب البتهل من قولت تيت (الشريعة ليها بالظاهر ) دي لي سبب واحد انو نتفادي المطبات التاريخية الممكن تحصل ، وعشان نتفادي احراج الاخرين الممكن ما يكونوا علي علم بما يسمي فنون اللغة وقواعدها وعلمها ... وبكتفوا بالعنوان ، مع انو كلمة (عنوان) دي علم قايم بذاتو وفيهو كتب بتدرس في مادة الصحافة والاعلام .... فمثلا هسي انا ممكن اكتب كواحدة من الفنون والاعيب اللغة (الهلال انهزم ستة صفر من حي العرب بورسودان) اها هنا بجوا الناس البقروا بس بي عيونهم وبس عشان العنوان دا ويورطوا ليك لحدي الصفحة التالتة عشان يلقوا موضوع الخبر دا ...وفي النهاية يلقوهو فريق (هلال جوبا) الجماعة ناس الجواب يكفيك عنوانو كانو مفتكرنوا هلال العاصمة ... لكن هنا الداقس منو ... الجريدة الحققت اكبر نسبة مبيعات من الخبر دا ... ولا الجامعة ناس (الجواب بكفيك عنوانو) المن ما شافوا الخبر جروا للاكشاك وما اتذكروا انو هلال الخرطوم ما عندو لعبة اليود داك ...؟؟
اها هنا يا بكري دي الورطات التاريخية ... انت ممكن يجيك زول قاعد في المنبر دا ليهو عشرة سنين ومساهماتوا ما بتفوت ليها 25 وعشرين سطر في الفترة دي كلها ... لانو مشغول بمهمة تاني ... وشغال حارس للعناوين وكركون للألفاظ ... وهو زاتو ما يكون عارف التكتح عن فنون اللغة والاظرط منو يكون ما عارف اللغة زاتوا – ودا بقودنا لي كلام جاي ورا عن موضوع وفنون الكتابة والجهل بفن اللغة البادي للورطات الما بنعرف نتخارج منها كيف - ويلا هاك يا ماسنغر وهاك يا تلفون ، وكان الله في عون العنوان السيدو كتبوا بي طريقة ما عجبت الكركون الديدبان والشاويش النبطشي اللغوي في البورد ... ودا انا عندي بوست خاص للناس القالوا ليك يجدعوني الزبالة ، بس انا وهم وانا حا اطلعهم ليك ما بعرفوا عربي ، واحسن ليهم من هسي يمشوا يقروا كتب علم اللغة الحديثة والمعاصرة ... مش الكتب الدرسوها ليهم في معهد علوم الاتصال واللغات العربي بالسودان ... وبالمناسبة للي الماعارفين الكتب دي بالفرنسي والانجليزي ، ما اترجمت لحدي الليلة امشوا للناس العربوا البلد دي وخليهم يقروها ليكم ويوروكم هي شنو .. وعشان ما نمشي بعيد ممكن تطلبوا المساعدة من البروفيسور يوسف فضل دا احسن زول بعرف انجليزي في السودان واكتر زول بطالب بالتعريب ...
ويا بكري ... انا اقول ليك كلام ... ( السمع والبصر والشم واللمس واللذوق ) اها الحاجات البين القوسين دي كلها في ناس بعتبروها ادوات تعليم للقراية والفهم والمعرفة وناسين مرة واحدة انو في دراسة تانية اسمها علم الاحياء – بيولوجي – عندو قسم خاص لدراسة العقل ...( افلا يعقلون ...؟)- وهسي افلا يعقلون البين قوسين دي هل دي معاناها العقل كجهاز عصبي ....؟؟!!
اها جنس الناس البجوا بالادوات الزي دا ديل هم البطيحوا بالسودان كلوا ويلحقوهو البوستات اللحقوا امات طه ... كدي يا بكري ليك وللاخوان الباقين ... واخوانا نبطشيات اللغة بالبورد .... في بوستات هنا الناس بقولوا عليها عنصرية ... وممكن جدا دلالات البوستات دي عنصرية ، لكن يا بكري العنصرية دي موجودة بينا وعايشة كل يوم وكل لحظة ... وما حتنتهي الا بالاعتراف بيها كحقيقة واقعة قدامنا ، ونديها مشروعية الحق والقول والكلام ... وكل زول من حقوا يقول انا عنصري ... وانا عبد وانا مهمش بعدين نجي نتحاور ليه انت عنصري وليه انت حاسي مظلوم والكلام دا ... وزي مابقول علماء النفس النو الانسان البكون عندو مشكلة نفسية مهما حاولت تساعدو ما بجيب نتيجة الا هو يعترف انو مريض نفسيا ثم بعد داك دي اول خطوة في العلاج ، لكن طول ما نحنا بندسدس ونغتغت ونقول والله الجرح دا طاب خلاص ، من بره ... لكن من جوا الجرح دا شايل الصديد والوساخة ومسمم ، ما حا نصل لي اي حتة ... لانو الجرح الشكلوا كويس من بره ... من جوه ما طاب ولازم نمشي المستشفي ونجيب الدكتور ويفتح الجرح دا ويتنضف من جوه عشان الحمي في النهاية لحتودي للموت بسبب التسمم ... ومع الاسف انحنا في مرحلة الحمي والهضربة دي ... لكن مازال في امل ننقذ المريض قبل ما يحصل تيتانوس ... والتيتانوس دا في بعض الحالات ممكن ما يتحصل وبكون علاجو القطع (الانفصال و الانفصالات) ...
طيب انحنا نعمل شنو هنا يا بكري ... الحاجات دي تتارشف وتتطبع في كتب وتتنشر وكل زول يقراها ... ولو عملنا كدا بنكون قدمنا خدمة للتاريخ ... وبعد داك تتعمل ليها دراسات تحلليلة ونفسية ونرص الكتب دي كلها في المكتبات وتكون متاحة لاي زول يقراها ويتعلم ، وتكون ذخيرة للاجيال القادمة عشان علي الاقل يعرفوا بلادتنا كانت لي ياتو درجة ... ويعرفوا ان سذاجتنا وعباطتنا الخلتنا تشاكل ونتداوس ونقتل بعض وملايين راحوا المقابر واطفال ماتوا من الامراض والملاريا ... بسبب حاجة بليدة ... وبسبب انو انحنا قضينا سنين وقرون ( بنتشاجر حول الالفاظ بس ) ولا عملنا مستشفيات ولا مدارس ولا تجارب نورثها للاجيال الجاية ...
هسي انا محسن طه دا بي طلب من (كركونات اللغة وضباط نبتشيات الالفاظ – شوفتوا العسكرية دي كيف ...؟) كلامي الجدعتوا الزبالة التاريخية دا ... كان ممكن اجيكم بنوع الكلام دا (علاقة التمفصل والتقاطع في اطار الذمكان والمكان هي التي تحدد الفهم الجغرافي وطبيعة التمفصل التاريخي) انا ممكن اكتب كلام زي وما في زول حا يعرف انا عنصري وى ما عنصري ولا جنسي شنو زاتو، ومافي زول حا يفهم انا بتكلم عن شنو ... وممكن جدا يجي زول برضوا يطالب بسحب البوست لانو مافهم او فهموا وما عايز الناس يفهموا ...
كان ممكن تعرفوا اذا انا عنصري ولا غير عنصري من كلامي البفتكروهو الناس خستكات سااااااااي وكلام سامبلا ساكت بيشيلوا الهوا ... من الكلام البنزل في البوستات حقتي ، عشان لو في يوم جا واحد قريبي من الجنوب وبقت عندو سلطة في الوطن دا وقال عايز يشغلني وزير في الدولة ، تقولوا ليهو لا الزول دا عنصري وما عايزنوا ... لكن ما دام انتو ما بتدوا نفسكم فرصة انو تعرفوا حقيقة انا عنصري ولا ما عنصري بقراية الكلام البفتكروهو بعض حراس الالفاظ مشين ومثير للفتنة ... كيف ممكن تدافعوا عن حق انكم ماعيزني اكون وزير في البلد دي ، هنا بتجي اهمية الكلام الموثق المكتوب ... والدليل الما ممكن اجادلكم فيهو انا نفسي ولا ممكن انكروا ...
طيب يا بكري والآخرون في بوست هنا انا كجنوبي – وآسف جدا للأستخدام المفردة دي يعني لاني بفتكر نفسي سوداني زي زي اي زول لانو الجنوب والشمال ليس الا مفهوم جغرافي ليس الا ... غايتو نقول شنو حتي لو مثقف لسه بقولوا مثقف جنوبي مش مثقف سوداني – في بوست نزلوا اخونا الازهري 2 اسموا (مسابقة ملكة جمال جنوب السودان وتوجد صور) ... في البوست دا مشينا وبعض الاخوان الجنوبيين ديل علي الاقل نغرفهم بعاداتنا وثقافتنا في الجنوب ، وفي زول جا قال انو البنات ديل عريانات والشخت واللحم والحاجت دي... طيب السؤال هنا ليه ما جا واحد من اخوانكم الجنوبيين ديل طالب بسحب البوست دا رغم انو البوست دا قدم اكبر اهانة لي اخواتنا الجنوبيات ولا الفكرة اساسا انو ديل بنات جنوبيات يعني ممكن يتقال فهم اي كلام يعني وما يهم ، ولا انحنا الجنوبيين الفي البورد معاك هنا ما رجال... ؟؟؟؟
لكن اجاوب ليك ليه انحنا كجنوبيين ما طابنا بسحب البوست ...
لسبب بسيط جدا الناس الجابو البوست واولهم الازهري 2 جايين بنية انو الناس مفروض يعرفوا بعض وفرصة انو نحنا نعرف بعض عبر اللغة ومالفاهيم ولاافكار والثقافة بدل البندقية البنتحاور بيها من قبل خروج الانجليز بي سنة من 1955 وفرصة لي اخوانا الشماليين لمن يجوا الجنوب ما يجوا كعساكر ودبابيين ومبشرين رسايل حضارية ، يجونا كعلماء اتثربولوجي وفلكور واثنوغرافيا وغيرو من العلوم البتعالج الاشكالات في العالم المعرفي ... وكان ممكن اهمل فيها ديدبان بتاع لغة ونقول في زول قال الفاظ جارحة وحاجات ما محترمة مست بي اخواتنا... لكن هل تقفيل البوست دا حصل ولا رد شرف ... بالعكس انتو وانحنا بنكون اتحرمنا من معرفة بعض بطريقة سلمية واخوية وجميلة ... بكلمة مش بي مسدسات وكلاشنكوفات ومدفعيات ...
لكن انا مدرك لاهمية البوست دا ... وسيد البوست لمن جا ، جا كديدبان بتاع لغة وطالب واحد من الاخوان بسحب كلمة شخت لا نو وقعها ما مستحب علي الاذن ... طيب ما ياهو من حق الزول داك يجي يقول كلامو عشان نعرف كلامو دا شنو وبي ياتو زاوية هو بعاين وبيشوف اهلنا واخواتنا في الجنوب ...؟ ونديهو تدريبات ديبلوماسية في التعامل مع ثقافات وعادات الشعوب الاخري ، لانو الزول ممكن يكون عندو ود عمر في السلطة ويعينوا لينا وزير في الهند وهو ياهو لابس نضارة اتجاه واحد ، اها يقوم يلقي الهنود بقدسوا البقر ويقوم يقتل البقر دا ويتسبب لينا في ازمة ديبلوماسية بين السودان والهند ... ولا ممكن يسبب لينا ازمة حميمية هنا في البورد دا ونتشاكل ونبذ بعض وفرتق ... اذا الموضوع موضوع الفاظ ولغة ورجالة وشرف وحاجات بالشكل دا .
واقول ليك يا بكري والاخوان البوست دا انتو حتقفلوا مش ىنو نحنا حا نطلب لكن ناس الازهري واصحابهم الجايين يعرسوا بناتنا ديل هم اليطالبوا ... لانو لمن نجيب صورنا ونجي نشرح انحنا العرس بيكون عندنا كيف التلفونات حا تتطاقش ليك يا بكري ... علي الرغم من انو انحنا ثاقفتنا وعاداتنا دي بتتدرس هنا في الجامعات الغربية دي كمرجعية في ارقي الجامعات ، والمؤسسات المعرفية كعلوم ودراسات راقية ... وبالنسبة لينا كجنوبيين تراثنا الثقافي وعاداتنا الشفاهية دي نلقي لينا فرصة نكتبها ونوثقها كاضافة لينا ولي باقي الثقافات السودانية...
لكن الموضوع كان عضلات وبلنجات لفظية ولغوية كان ممكن ندق الجرس في المنبر دا ونقول ليك قفل البوست دا ... وانحنا عارفين كويس انو السودان دا لسه ما عندو الاستعداد عشان يعرفنا ... وكل الناس البقروا في البوست دا بفتكروا الموضوع هزار ولعب ... لكن مشروع التحرر والوعي دا مافي زول جاهز ليهو في السودان دا عشان كدا لحدي هسي بنحبي ، وكلنا ضحايا التاريخ والحروب ...
وعايز اقول ليك يا بكري يا اخوي في الوطن المنبر دا قدم خدمة للتاريخ احتمال الكتيرين ما مدركنها ، وما مقدرين حجم المسؤلية الهم بعملوا فيها بس بالقلم دا، والمنبر دا لسه حيقدم لي قدام اكتر واكتر لو بس الناس سابت موضوع الشعبطة علي العناوين والالفاظ واللغة والكلام المابودي ولا بجيب .
افتكر انو البوستات العنصرية – زي ما بتسموها – دي مفروض يتعمل ليها ارشيف خاص منفصل وتكون متاحة ومفتوحة لاي زول عايز يعمل تحليل ولا دراسة ولا بحث ، ونطالب علماء النفسيات يعملوا لينا دراسة للحالات دا ، اها زمان كانت المشكلة الجنوب هسي جات دارفور والساقية لسه مدورة وما هتقيف وانا اراهنكم علي الكلام البقول فيهو دا، النزيف دا ما حيقيف الا الكلام دا كلوا يطلع بره ونحللوا عشان نعرف انو كيف وصلنا لي مرحلة زي دي وليه دا زاتو حصل ... وما كل مرة نتفاجا بالخطابات المدمرة والملغمة ... ودا كلوا عشان حاجة واحدة انو ما نعيد الاخطاء التاريخية الغبية العملناها ...
وختاما...
انا محسن دا قاعد في كندا وبقطع جزء مهم جدا من وقتي اللي هو بالدولار ، وبشتغل غسال صحون في مطعم ، عندي اهلي هسي في الخرطوم ممكن يبقوني وزير او ضابط في الامن اذا انتو بتفتكروا انو الموضوع ضياع زمن طيب انا ما موفرة لي سلطة وعندي قبيلة عندها قوة ... لكن في زول هنا سال نفسوا انا ليه بضيع زمني هنا اتحاور واتناقش واقول واكتب في كلامي الفارغ الكتير دا، وهل صعب انو الواحد يمشي يبقي بتاع امن ويضبح وقتل وينهب ويسرق ويملا جيوبوا بالدولارات ويبني قصور ...
لكن في لحظة الواحد ممكن يعمل كل القلتوا دي بسبب ناس بطردوك بس بي سبب الالفاظ والكلمات والعناوين وممكن تتحول لي حاقد وهاك يا ضبح ... والله الرفاهية النحنا بنمارسها معاكم هنا دي بسبب الممكن والمحتمل وانو ممكن يوم نبقي ناس مع بعض في زريبة السودان المساحتها مليون ميل وما شايلة الناس... وزي ماقالوا النفوس كان طابت اللقمة بتاكل مية...
والاستفزاز والاستعجال ممكن يدمر اي حاجة حلوة جوانا وجواكم وتستمر حركة التاريخ في الكراهية والكراهية المتبادلة بسبب زول ما عارف انا بقول في شنو وياريت لو عندوا الاستعداد او الرغبة يفهم انا بقول في شنو... والله انحنا الوقت البنكتب بيهو ونتحاور بيهو هنا كان ممكن نستثمروا في الخرطوم وكان ركبنا عربات مرسيدس وعملنا قروش ولاقيناكم في بوابة مطار الخرطوم وجدعنا ليكم اي كتاب في البحر ... مش لانو نحنا فاهمين الكتاب دا بس عشان العنوان ما عجبنا ... ولو جينا للسرقة والاونطا مافي زول احسن من زول ... والناس الشردوا الاساتذة في جامعة الخرطوم وغيرها ديل وطردوهم واعتقلوهم وضربوهم وعذبوهم ديل احسن مننا بي شنو .-الطردوا الاساتذة ديل هم صحي جنوبيين ولا حاجة تانية ...؟!!- وهسي الجانب السئ هو القاعد يتقدم في السودان رغم انو الجانب الايجابي موجود لكن الناس بتدس الجانب الاكويس دا وبطلعوا التاني السئ لانو الجانب السئ دا هو الفيهو القروش والعمارات والعربات ...
ويا بكري انا بتكلم معاك برؤية مختلفة وبي فكرة مختلفة وبتعامل معاك علي اساس اختلافك التاريخي دا ، المنبر دا ممكن يتحول لي دار نشر وممكن يساهم في تعديل مسار البلد دي بطريقة مما ممكن يصل ليها زول تاني لا بسياسة ولا بي مظاهرات ... ما تسمع كلام الناس البشعبطوا في الكلام وهم ما مقدمين اي حاجة في البورد دا ...
واتمني يا بكري انك تلقي وقت تقرا الكلام دا ، قبل ما يمشي مزبلة التاريخ الاسفيري ...
سلامتاكم
لاكو
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
شكراً يا أزهري2 على البوست الطريف
والذي أبرزت مداخلاته الجميلة عادات وتقاليد الزواج
عند الإخوة الجنوبيين ...
من مداخلة صديق الموج قبل الأخيرة أتضح لي أن
بعض عادات الزواج لديهم موجودة عندنا بمسميات أخرى
مثلاً:
1- ماكل البقر بمشى لابو العروس بدو منو اعمامها واخوالها
وازواج اخواتها.
زي دي نحن ما بنعملها في الزواج
بتكون عند الموت للورثة
------------
2- بالمثل لما تتزوج اختها بدوك من البقر الجديد
بنسميها صرفة الصندوق ( الختة)
-------------
3- هم بعرفوا البقر العندك زاد كم والا نقص كم حتى لو ماتت بقرة انت
لازم توريهم الجلد بتاعها
ده عندنا أسمو مسمار جحا
--------------
4- يعنى مافى طريقه تبيع بقرة او تتصرف فيها..بس اللبن والسمن فقطدي بقى بنعملها في المكتبة العامة تقرا وبعدين ترجع الكتاب الرف.
----------------
5- اما البقرة تحتفظ بيها لانو فى نطاق ضيق البت ممكن يطلقوها
ويرجعوا البقر كلو .والمثل في دي بقول سد الدين أتقل من سد المال .
---------------
6- بعدين لو اخوك مات لازم تتزوج انت زوجة اخوك .
دي موجودة لدى شركات التأمين وإعادة التأمين
----------
قبل الخروج أثمن اختيارك في بداية البوست
لكن ماعارف انت أكتر حاجة عجبتك في البنية دي
وخلت ود الموج ينافسك بشدة عليها شنو يا أزهرينا؟
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: شول ياعب بطل الجن بتاعك ده تعال راجع..
شول صديقى الاثير.. هذا المنبر سوق كبير..وليس مدينة فاضلة
ارجوك بحق السماء والملائكة والرسل والانبياء ان تعود،،، |
ود الموج اها رجعنا
ود التاج الناس ديل ما عارفين حاجة ساى بصراحة فى حاجات كتير مشابهة بس مافى زول بيدى نفسو فرصة عشان يعرف.
أزهرينا رجعنا يا جميل بس والله موجوع فى البيحصل فى البلد ده ياخ.
نرجع لى ورا شوية يا جماعة الخير..
فى واحد جا ناطى هنا وشبكنا البنات ديل عرايا والجمال الحقيقى ما تعرف جمال النفس لا الجسم او على الأقل ده الأنا فهمته...
بقول ليهو التالى...
شوف يا زول ... ده نحن كده ... يا تقبل بينا كده او بلاش ما تعرفنا زاتو لانو المعرفة البيكون مشروطة ده المرجع البلد لى ورا.
اعرفنى زى ما انا وكفى...
__________________________
لو جبنا الصور الحقيقة لبناتنا على الطبيعة (ناس الريف) والله كلكم تجفلوا والخوف البوست ده يمشى الخور عديل!
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: صديق الموج)
|
سعيد جداً بعودة الأخ الحبيب شول
وقريت مداخلة أخونا الحبيب محسن طه وأحزنتني جداً وإن شاء الله أرجع ليها بالتفصيل فيما يخصني . ولحدي الوقت داك يكون محسن رجع والنفوس هدأت .
أشكر كل الإخوة الزملاء المتداخلين .
أستاذي العزيز صديق الموج
أعتذر لك وللإخوة عن غيابي عن المنبر لظروف خاصة تتعلق بالعمل وكمان زهجة شديدة بسبب الاحداث الأخيرة.
إن شاء الله نتواصل في موضوعنا دا والذي أجده مهماً كما المح محسن في مداخلة سابقة .
لكم جميعاً خالص الود والتحية والتقدير
| |
|
|
|
|
|
|
| |
صديق الموج
شول اشوانق دينق
ALazhary2
عمر التاج
فيس بوك
تويتر
انستقرام
يوتيوب
بنتيريست