ياخوى خلينا نعمل حمله زى حقة ( سناء ) بحثا عن هذا الولد فى غياهب دغيم ولا حلفا الجديده ,, الولد ده ثروه قوميه ,, يعنى فى العمر ده ويكون عندو كل هذا الاحساس والتفاعل مع الموسيقى بهذا التناغم , ويظهر إنو كمان مضهد بدليل هروبو المفاجى عندما لمح أحد أفراد أسرته , خوفا من الضرب على مـا إقترفه من جمال ومهاره . ياناس حلفا , كان قديمه ولا جديده , بالله أخدو بيد هذا الشبل فهو مشروع فنان خطير , ليس بالضروره فى الرقص , فطفل فى هذه السن ويحمل فى دواخله هذا الانفعال بالتأكيد فنان فى كل شئ . ألحقوووووووه ,,,
05-02-2008, 00:01 AM
عاطف عبدون
عاطف عبدون
تاريخ التسجيل: 02-27-2008
مجموع المشاركات: 3701
Quote: ياناس حلفا , كان قديمه ولا جديده , بالله أخدو بيد هذا الشبل فهو مشروع فنان خطير , ليس بالضروره فى الرقص , فطفل فى هذه السن ويحمل فى دواخله هذا الانفعال بالتأكيد فنان فى كل شئ . ألحقوووووووه ,,,
دا كلام جمييييييييل
جد دا ود ما طبيعي
ود مسكون ابداع
05-02-2008, 04:23 AM
hanouf56
hanouf56
تاريخ التسجيل: 06-02-2002
مجموع المشاركات: 1776
ارجع لشرائط الحلفات الحديثة .. كل الشباب والشابات برقصو الان مثل هذا الولد (تحديث لزوم موكبة العولمة)
تحاول ترقص معاهم بالاسلوب المحدد (محسي او حلفوي) بتلقي نفسك برة الزمن .. الان الرقص عبارة عن رقص مختلط ما بين اسلوب المحس والحلفاوية والشايقية .. سرعة في الايقاع .. تماسك بشكل عجيبة.. صفقة خماسية (تولع الايد) .. رقصة الجرجار .. كلها ممزوجة في اغنية وحدي .
شوف الشباب ديل برقصو كيف
05-02-2008, 10:23 AM
ALazhary2
ALazhary2
تاريخ التسجيل: 09-06-2003
مجموع المشاركات: 4966
اللحن نوبي يشدو به المحس والسكوت والفديجا لكنه اصلا لدهب خليل كما يبدو لي .. اللغة النوبية لغة شدو chanting وكل النوبيين يرقصون رقصات مناطقهم كلها منذ الصغر وليس فينا من لم يرقص في عرس او حفلة نوبية منذ الطفولة حتي الكهولة ..هذا الشافع موهوب وله حس عالي عبر عنه باقتدار في رقصه النوبي والذي هو من متابعة لصيقة لطفل ذكي لرقصات نوبية يراها باستمرار ..هذا ليس من جيل الفضائيات ولا رقصات البرييك التي تبهر شباب السودان الذي يفتقد معرفة لما هو اكثر تعبيرا وجمالا من ارثه مثل الذي عبر عنه هذا الطفل الجميل ..
يا خى كلامك الفوق ده جبته من ويين ؟ الطفل ده نسخة مطورة من دهب خليل (دهب شار) وشار بالرطانة طبعا هو المغنى هذا الطفل من عمق المنطقة النوبية ، ويرقص على أنغام لحن دهب شار الذى اخذ طابعا سريعا بحكم سرعة الزمن الذى نعيش فيه الآن
وآآآآفيلقو
05-02-2008, 10:37 AM
ALazhary2
ALazhary2
تاريخ التسجيل: 09-06-2003
مجموع المشاركات: 4966
شكرا ازهري اتنين طبعا زي ما قال ليك فيصل يا عاطف الود ده عمل تسخينة شفت من الثانية 21 لحدي 28 كدة الود عمل حركة بتاعة معلمين كبار وبعد داك حركات اليدين المفتوحة دي بشتغلها الزول البمسك القروب كلو... وبعد داك شوف الحركة لما يعطش الايقاع اما الحركة الاخيرة من الثانية اريعين ده ده شغل ناس محترفين وجدانهم عالي وزمنهم مقسم مع الاحساس بأجزاء من الثانية والامانة لله الله يديه الصحة والعافية الوليد رقاص وبنوع في الرقيص والفيديو الجابه محمد ادريس (هنوف) برضو بيدل علي تطور الرقصة النوبية مع تقدم الزمن والآلات
ياخي كان في قروب في الاهلية ايامنا الفي الجامعة ديل لمايدخلوا الحلقة الناس بخلوا الفنان والبنات السمحات ويقبلوا علي القروب....
جميل الرقص النوبي خاصة لقروب متفاهم
الرحمة لدهب شار وحسين الالا الذين تركوا احساسا بطعم النيل استقي منهم وردي ليكون فنانا ذا شأن ايضا
تحياتي
05-02-2008, 06:26 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
سلمااااااااات ويفيجلوا ما شاء الله عليه الشافع دا مباااااااااااااااااااااااااالغة ياخي انا ناوية أقفل الاوضة وأرقص زي رقصة الشافع دا (عشان ما أضطر أجري بعد ما اندمج في الرقصة وكدا)على اللحن النوبي الشجي دا تصدقوا رجعتوني لحلفا وايام حلفا يا سلاااااااااااااااااااااااااام
*** تخريمة انت يا اخوي لميت في الجنى دا من وييييييييييييييييييييين
تحياتي ليه وربنا يحفظه دا يعتبر ثروة نوبية وكدا في مقابل الهجمة الشرسة اللي سات المنطقة في الاونة الاخيرة وشوية شوية الاطفال النوبيين بقوا ما عندهم ارتباط بالمنطقة وثقافتها يعني مثلا اقل شئ نلاحظ ان معظم الاطفال البنشئوا اهلهم بيطلعوهم بيتكلموا عربي يعني شوية شوية حنجد اللغة النوبية اندثرت وأصبح الجيل الجديد كله صار بيتكلم عربي ...
تحياتي على البوست الجميل
05-03-2008, 06:55 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
Quote: بالصدفة في يوتيوب لقيت المقطع دا وطوالي نسخ ولصق في بوردنا الجميل وإتوقعت إنه يعجبكم زي ما أعجبني .
نكرر ونقول ماشاء الله على ولدنا .
الازهرى المرهف...
انت بس اغتس لينا فى اليوتيوب ده ..... ومحل الغتسان التانى بتاع الصور وجيب ولقط كم صورة كده لانك دائما مابتتحفنا بكلماتك ....وتنور عيونا بالوان الصور من لون الاحبار السوداء العمتنا دى .....تسلم
الولد حلاته وصلاتى على النبى مافيه كلام .... الله يغطيه ويحفظه يارب....(مازال الولد رغوة) زى مابقولوا اهلنا
ودمت
05-04-2008, 05:49 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
تعرفي الليلة بالصدفة لقيت في البوست بتاع أستاذنا قاسم مداخلة لي واحد من الزملاء فيها روابط لي مقاطع فيديو عبارة عن برامج قدمتيها في النيل الازرق .
طبعاً أنا ماعندي قناة النيل الازرق دي لأنها مشفرة وبي قروش وأنا زي ما إنتي عارفة عزابي مقطع بلم في حق الزبادي والأندومي (الحمد لله على كل حال) (بس ناس وزارة التعليم العالي شكيناهم علي الله كان مرتباتنا كلها شايلنها مصاريف و أقساط جامعات لي أخوانا) .
أعاين أعاين ياربي دي ناهد بشير؟
معقول بس تكون الإعلامية المتميزة دي ناهد البشير الأنا شابكها تاني ماتجي بي عمودك وكملتي اكلنا ؟
أمانة ما إتلومت يا الأزهري .
يا أستاذة ناهد المابعرفك بجهلك , والله سعدت جداً بمعرفتك وإنو المطعم بتاعي بجو فهو ناس نجوم ومشاهير .
ماشاء الله يا أستاذة ناهد سبحان من أنعم عليك بالذوق والادب والطيبة والموهبة زي مابقولوا أهلنا (خلقة وأخلاق) أصلاً قبل ما أعرف إنك إعلامية متميزة غمرتني مشاعر أخوتك وكان ليك (قبول) من أول كلمة كتبتيها وأعتقد إنو (القبول) بي لهجة أهلنا السودانيين صفة وهبة لازم تكون في المذيع أو الإعلامي , هسع شوفي المذيع الإسمو حماميزو دا ماعندو (قبول) بالتكتحه والناس كلها مكجناه .
وتاني يابت العم الغداء والعشاء نرسلو ليكم (دليفري) لأنو الناس المشهورين ديل يستحقوا خدمة خمسة نجوم . بس من فترة لي فترة زوروا مطعمنا عشان تعلموا لينا دعاية مجانية وكدا .
نرجع لي موضوعنا : طبعاً يا أستاذة ناهد (تاني لازم نسبق إسمك بلقب الأستاذة) الفراغ كميات هنا ونحمد الله على النعمة المغبون فيها الناس .ومافي غير الإنترنت دا وجمهورية سودانيز اونلاين حقت الريس بكري ومن حقوق المواطنة الصالحة إنو الزول يعمل لخدمة مواطنيه عشان كدا الواحد بحاول قدر المستطاع يسعد سكان الجمهورية الجميلة دي .
قداسة(اليويتيوب) وآية الله العظمى (قوقول) وسماحة العلامة (فليكر) بيساعدونا في المهمة دي وماقصروا معانا تب .
إن شاء الله الواحد يجيد فن الغطس وربنا يرزقه يخرج ليكم الدرر من أعماق بحور النت .
ولدنا الرقاص الفوق دا لؤلؤة بضة صيدت من شط اليوتيوب والحمد لله عجبت اهلنا النوبة والعرب كمان .
تحياتي وتقديري لمرورك الكريم (بعدين في بوست المطعم في سؤال موجه ليك )
05-03-2008, 06:52 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
Quote: يعني مثلا اقل شئ نلاحظ ان معظم الاطفال البنشئوا اهلهم بيطلعوهم بيتكلموا عربي يعني شوية شوية حنجد اللغة النوبية اندثرت وأصبح الجيل الجديد كله صار بيتكلم عربي ...
يا عزيزتي طالما بقي نوبي واحد ستبقي اللغة النوبية .. والتعريب القسري وكسياسة دولة سبق الاستقلال حيث صارت اللغة العربية هي لغة العمل والتعليم وبالتالي اللغات السودانية الاخري ومنها النوبية تعرضت الي تحديد استعمالات لا تتجاوز الحديث في المنازل والقري ..اما في المدارس وفي المنطقة النوبية فكان التحدث بالنوبية مدخل لعقاب جسدي وحتي ولو قابل احد المدرسيين تلاميذا خارج المدرسة ووجدهم يتحدثون النوبية .. ثم اتت الهجرة الكبري بسبب السد العالي قبل 45 سنة ورحل نصف النوبيين عددا الي خشم القربة وفي منطقة تحاصرها اللغة العربية ولغات اخري والذي حدث هو انه بقدرما تحدث النوبيون بتلك اللغات تحدث من عاشرهم وبقي بالقرب منهم اللغة النوبية .. هذا في السودان اما في مصر فما زالت قري النوبة المهجرة اكثر تمكسكا بنوبيتهاوارثها وتلي الهجرة بعقدين من الزمان اهتمام نوبي اكاديمي باصول اللغة النوبية وصارت اسر كثيرة في العاصمة مثلا كانت قد منعت عن ابنائها اللغة النوبية تهتم بها وبكتابتها وقامت فصول لتعليمها بعد ان تضافرت جهود فرديةبرعاية مركز الدرسات والتوثيق النوبي ( ومؤسستة الاستاذة سعاد ابراهيم احمد ) في تحقيق حروف اللغة النوبية واصدار كتيب لتعليم النوبية وتوجد نسخ منه عند المركز او لدي سعاد ... هذا في التاريخ الحديث اما التاريخ القديم فلقد فرضت اللغة النوبية علي كل من اتي الي ارض النوبة او تزوج منها وحتي الكنيسة التي سبقت دخول الاسلام كتبت الانجيل باللغة النوبية 0 ارجو الرجوع الي صفحاتي النوبية http://thenubian.net في هذا الصدد كما توجد مراجع اخري في الشبكة العتكبوتية )
05-03-2008, 05:34 PM
Mannan
Mannan
تاريخ التسجيل: 05-29-2002
مجموع المشاركات: 6701
سلام يا ابوالزهور شكرا على هذا البوست الراقى ارجو ان نتمكن من معرفة تفاصيل اوفى عن هذا الطفل الجميل ذو الموهبة الفنية العالية..
النوبة مليئة بالمواهب الرائعة ونرجو ان نجد الامكانية لرعاية هذه المواهب .. ولا زلت اذكر الطفل النوبى العبقرى حفيد الشاعر النوبى الراحل مرسى صالح سراج.. كلما اذكر عجزنا وقلة حيلتنا فى رعاية هؤلاء الصغار المبدعين والاذكياء اصاب باحباط شديد واتحسر على عجزنا... يجب ان نبحث عن حلول وهناك رجال مثل مو ابراهيم يمكنهم ان يرعوا هذه المواهب وهم لن يبخلوا على ابنائهم المبدعين لكى يخرجوا لنا قادة تاريخيين ...
يا ازهرى قلت:
Quote: غايتو الزول في السودان دا دمه ملخبط لخبطة غريبة (نوبة على شايقية على بديرية)
ياخى انت نسيت تاريخك... الشوايقة والجعليين والبديرية وغيرهم نوبيون مستعربون.. ومعظم اهل العاصمة المثلثة اصولهم من المحس ودنقلا.. لو ما مصدقنى امشى اعمل فحص DNA لاى واحد من القبائل التى تدعى انها عربية وستكتشف انها نوبية مية المية...
نورالدين منان
05-03-2008, 07:38 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
بالنسبة للفيديو ماعندي عنو معلومات زيادة أنا لقيته في يوتيوب .
Quote: ياخى انت نسيت تاريخك... الشوايقة والجعليين والبديرية وغيرهم نوبيون مستعربون.. ومعظم اهل العاصمة المثلثة اصولهم من المحس ودنقلا.. لو ما مصدقنى امشى اعمل فحص DNA لاى واحد من القبائل التى تدعى انها عربية وستكتشف انها نوبية مية المية...
أكرم وأنعم باهلنا النوبة الذين يجري دمهم في عروقي.
والإنتماء إليهم فخر وشرف وحسب ونسب . أهل حضارة من أعظم حضارات الدنيا .
لكن يامنان شجرة النسب الطويلة وعريضة الورثناها عن أجدانا نوديها وين ؟
والله شجرة واصلة للعباس وبي مصادرها ومحققة من نسابين أشراف
لكن بس نقول عرب ممزوجة بي دم الزنوج الحارة ديل أهلي . وعرباً نحن حملناها ونوبة مجد ترهاقا وإيمان العروبة .
تحياتي وتقديري لمرورك الكريم .
05-03-2008, 08:44 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
أخوك الازهري ليس شيخاً ولا يدعي المشيخة ولا يمتلك العلم الذي يؤهله لذلك .
تداخلت معك في المسنجر بخصوص بوست لك وكان من باب النصيحة بأن ندع الخلق للخالق وأن نحسن الظن بالناس وأن نتجنب الخوض في خصوصياتهم وهي نصيحة يمكن أن يقدمها أي زول عادي (الدين النصيحة) .
الطفل الصومالي تلاوته جميلة ربنا يحفظه بالقرآن الكريم . وشكراً على إيراد المقطع .
وربي ده أكتر بوست وكليب أشغلوا منذ إنضمامي لي سودانيز أون لاين .. بالضبط من الصباح وانا بعيد في تكرار المقطع ده فقط توقفت لي بريك الغداء.. ياخ ده حاجة تحفة بي صورة مبااااااااااااااااااااااااااااااااالغة .. أجمل ما شاهدت في العشرة السنين الأخيرة دي .. بالضبط وزي ما قالت ميادة بس الفرق بيني وبين ميادة إنها قالت عندها رغبة تقفل باب الأوضة وترقص بينما انا قفلت باب المكتب فعلاً ورقصت معاهو مع العلم إني ما حلفاوي ولا نوبي وإن كنت قد دخلت ابواب النوبة بطرق أخرى أجمل حاجة في الشافع ده إحساسو العاااااالي وفي لحظة كده بتحس بيهو غرق في اللحن وهو يهوزز راسو وما داري بي اللي حولو .. ده كلو كوم واللحظة اللي بيتغير فيها الإيقاع (الكسرة) كوم تاني ..الشافع ده نقل نفسو نقلة ما طبيعية مع الايقاع والله لا تقول لي الرقاصة دينا ولا مدرسة تعليم الرقص الشرقي زاتو .. ده كلللللللللللو كوم والعرّاقي أبو (خطوة) ده كوم تاني تخريمة : من المقطع يبدو إن الشافع ده مشهور في الحي بي الرقيص والظاهر إنو الناس متعودة تشغل ليهو اللحن ده وهو يرقص ليهم إما للمتعة أو عشان يشيل الفيها النصيب لكن الظاهر أهلو مانعنو والدليل جريتو لمن شاف ليهو زول من ناس بيتهم .. يا ربي يكون ده عمو ؟
Quote: يعني مثلا اقل شئ نلاحظ ان معظم الاطفال البنشئوا اهلهم بيطلعوهم بيتكلموا عربي يعني شوية شوية حنجد اللغة النوبية اندثرت وأصبح الجيل الجديد كله صار بيتكلم عربي ...
ليه يا ميادة مستعجلين تخلوا الناس تتكلم عربي طيب الكلام ده قالوه قبل 100 سنة....ما ياهو ده الناس شغالين عداد اللغات Three Face زي الترتيب طيب علي الاقل النوبيين قدروا يكتبوا لغتهم وصار عدد كبير من يسطيع كتباتها...ليه ما نحلم باليوم داك بدل نقول العربي واقع لابد منه وبعدين اذا خمسة من النوبيين اتلاقوا في حتة بعملوا جمعية كيف لغتنا بتندثر
تحياتي ازهري وكل المتداخلين
05-04-2008, 06:13 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
تبارك الله .. ربنا يخفظه .. شفت زي الجرية الجراها الود ده هي نموذج ما يعنيه الإبداع في بلادنا منذ نعومة الأظافر ..ومن الأهل كمان .. يقولوا ليك عيب يا ولد ولا يا بت ...! أعمل كده وما تعمل كده .. ما تقعد جنب الناس الكبار .. دي قلة ادب ...!! هلم جراً ..
أتركوهم بلا أدب ....!! ( ده كان عنوان لبوست من الصديق علي سند بموقع البركل ...)
05-05-2008, 07:15 AM
فيصل محمد خليل
فيصل محمد خليل
تاريخ التسجيل: 12-15-2005
مجموع المشاركات: 26041
هذه الاغنية سكوداوية اللحن والايقاع اما الرقصة فهي محسية لان راقصي الاغاني النوبية اغلبهم من المحس واذا شاهدت الحفلات النوبية التي تقام في الخرطوم والمهجر وبالذات في الرياض تجد ان المحس هم احسن الراقصين. ويبدو ان هذا الطفل محسي مشبع من الرقصات التي تتم في قريته..
الرقص الحلفاوي ليس على نمط الجابودي ولا يستعمل الحلفاويون الصفقة بالايدي وانما يرقصون بتشابك الايدي في صفوف متوازية.
05-05-2008, 06:55 PM
ALazhary2
ALazhary2
تاريخ التسجيل: 09-06-2003
مجموع المشاركات: 4966
الزول الخت الفلم حق ولدنا الرقاص دا في يوتيوب رد علي وقال إنهم مهندسين كهرباء وكانوا بيقوموا بأعمال صيانة دورية لأعمدة الكهرباء في حلفا الجديدة فاتلموا الشفع حول العربية وكانت هذه الرقصة الرائعة على أنغام مسجل بوكسي ناس الكهرباء
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة