|
دورة حياة المغترب السوداني
|
الاغتراب والمغتربون عالم تاني .. المغترب يشيل شنطتو ويشرّق قاصد ديار الزيت يمشي هناك عشان ياخد لو سنتين تلاتة ويعرس ويشتري بيت وعربية ويجي راجع يقعد عند اهلو لكن يلقى نفسو اتورط في الغربة والزمن يجري بهنا وبهناك . مغتربين الخليج ولقوانين دول القّطرة والعقال يلقى نفسو لا هو خليجي ولا هو سوداني يلقى نفسو حاجة كدا ما معروفة شنو هناك لاهو مواطن عشان يقعد ويتوهّط سمح وهنا يلقى نفسو مواطن مع وقف التنفيذ ضايع و بين الاتنين يضيع هو. مغتربين السعودية حاجة تانية حاجة تجنن الما يجن خليط من الشعور بالدونية وشعور بالفوقية في وقت واحد شعور بالدونية للبلاقيهو من الغربة وبالفوقية لانو كان لما يرجع هنا بيتعامل كانو حاجة تانية وزول فريد في نوعو يحيط به الناس من كل جانب واول ما يفلس ويعلّم الله يبدو يسالوهو انت راجع متين؟ عشان يمشي يخم ويجي تاني هذا المخلوق المغترب في حياته يمر باربع مراحل رئيسية هي المرحلة القردية .. ثم المرحلة الحمارية .. ثم المرحلة القُرادية .. هذا المراحل لها التأثير في تكوينو الوجداني و سلوكه.
المرحلة القردية :
تبدأ هذه المرحلة اول ما يبدا المغترب في اجراءات السفر يبدا يحس انه اصبح جزءا من فصيلة المغتربين ويتصرف على هذا الاساس واول ما يقول بسم الله ويخت كراعو في قفص اغترابو يبدا يحاكي من سبقوهو في الاغتراب يبدا يفكر يشتري عربية ثم ستالايت في اوضتو براهو ثم المتزوج يفكر يجيب مرتو بهناك ويقعد يجهز في البيت من العفش زي الجماعة القبالو بالضبط من غرف نوم وعرف جلوس وسراير وموكيت وملايات امريكية وايطالية ولو في ملايات امم متحدة يشتريها زي الكبار والقدرو من المغتربين ..ثم يبدأ في التوالد .. التوالد هناك يتم في موسم معلوم ومعروف حسب خبرتي يتم اغلبه في فترة الشتاء اما فترة الصيف فهي للاجازات والعُمرة لمن لم يستطيع للاجازة سبيلا حكمة ربنا قعدت في منطقة حضرت فيها موسم توالد في اسبوع واحد كان هناك خمسة ولادات ضكور.. والخمسة أي واحد فيهم ابوهو سماهو محمد ودا كان نتيجة تأثير المرحلة القردية.. وقد حباني الله بان اتعرف على احد المغتربين في السعودية عندو تلاتة من الابناء يحملون اسم محمد ، محمد سادة ثم محمد المامون ثم محمد الامين ،واقترحت عليه مساعدة مني في حل ازمة الاسامي ان يسمي الولد الجايي محمد وردي ولو انزنق والحكاية جرت وورت معاهو يسمي البعدو محمد فرفور العجيبة انو اسمو هو براهو محمد عثمان المرحلة القردية مرحلة قصيرة الامد والغربة والشغل وجهاز المغتربين وضرايبو والكفيل ما بيخلو أي مغترب يستمتع بهذه المرحلة ، لهذا نجد ان المخلوق المغترب يدخل في المرحلة الحمارية سريع جدا.
المرحلة الحمارية
تتميز هذه المرحلة بالسكون والهدوء و الطاعة العمياء وهي اطول مرحلة من مراحل تطور المغترب ويكون المغترب فيها حمار شغل ،البيت الشغل وبالعكس ويكون عارف من تشرق الشمش هو الليلة حيسوي شنو ،وقد استفاد بعض الكفلاء من هذه المرحلة ومميزاتها الحمارية.. بان يطلبوا من المخلوق المغترب ان يشتغل أي حاجة في أي وقت ويقوم هذا المخلوق بالعمل بهمة عالية ونفس راضية ورضى عنها ، كما ان بعض الذكيات من نسوان المغتربين استفادت من هذه المرحلة والطاعة بان كانت تطلب من بعلها كل ما تتمناهو وهو ما بيقول لا ،يتمنى المغترب السعودي في هذه المرحلة بان ينادوهو بابي فلان ابو محمد ،ابو عادل، ابو فاطنة،ابو نفيسة، ابو كديسة . كما وانه تبدو عليه ملامح تقالة الدم بدءا من الدقن المشغنفة وانتهاء بالنكت البايخة التي لو استمعت لواحدة منها تقوم عليهو تعضيهو في نص قنقونو ولما تمشي البيت تقفل عليك اوضة وتقعد تبكي لمن الله يغفر ليك تبكي عشان بياخة النكتة وعشان ربنا ابتلاك ببلوة وهي عظيمة الا على الخاشعين ، ايضا قد حباني الله باحد النكتنجية من مغتربي المرحلة الحمارية يحكي النكتة ويضحك فيها هو لحدي ما دموعو تجري حتى لو حكاها عشرين مرة في الدقيقة ،وكنت لما اشوفو جايي علي اسال الله سبحانه وتعالى ان يلزمني الصبر الجميل والسلوان وان يجعل استماعي الى نكته في ميزان حسناتي ، ويتميز مغترب المرحلة الحمارية بدقة وسرعة تحويل قيمة الريال الى العملة السودانية مرورا بالدولار تتم هذه العمليات بسرعة جدا في راسو ويديك نتيجة تحويل أي مبلغ بكل دقة وامانة حتى الكسور ما يخليها ،ايضا مغترب المرحلة الحمارية يكون شغوف جدا ومعجب جدا بكفيلو يقعد وسط الناس ولو بيتكلمو في الكورة ينط هو ويقول يا زول ها والله الكفيل كفيلي انا وبس ،ثم يحكي عن احترامو ليهو وكيف بيتعامل معاهو مع انك تكون واثقا تمام الثقة انو نضمو دا كلو اماني واضغاث احلام. ثم تبدأ بوادر انتهاء المرحلة الحمارية تلوح في الافق وتظهر بوادر المرحلة القرادية ،بان يبدأ المغترب يفكر في البديل في حالة الاستغناء عنه والبديل داخل بلد الاغتراب، وتظهر عليه القرادية جلية عندما يستغنى عنه فعلا .
المرحلة القُرادية
وهي مرحلة قد تطول وتقصر حسب عمر المغترب المصّر ان يكون قُرادة للنهاية ،وهي تتميز بان يقوم المغترب بالتشبث بالشغل والبقاء اطول فترة في بلد الاغتراب ، يرفدوهو من شغل يتشعبط في شغل تاني ،يسفروهو يكون شال معاهو فيزا ويرجع تاني ،يكشوهو يرجع عُمرة او حج ويكسر ركبة هناك.. لاحظت ان هذه المرحلة ليست حكرا على السوداني ،ايضا هناك القراد المصري والقراد الهندي والقراد الباكستاني ، ما يميز القراد السوداني انه يتكاثر ويتوالد في العائل وهو ياخد فترة طويله متشعبط في الهدف عكس القراد المصري الذي يكون فترة تطفله قصيرة لكنها مجزية .
المرحلة الكلبية الاستثنائية او (مرحلة كلب الحر)
وهي استثنائية لانها تتم خارج بلد الاغتراب وداخل السودان ،المخلوق المغترب يقرر ان يرجع الي السودان مصدقا نضم الحكومة في التلفزيون بان المغتربين يرجعو والبلد محتاجة لخبراتهم وان السودان احسن بلد ممكن الواحد يستثمر اموالو فيهو، ثم تبدأ رحلة الجري لو عندو بيت قاعد يبني فيهو يقعد يتجارا عليهو وقتو كلو ورا لواري الطوب والاسمنت ، ثم يبدا الجري في السهلة عشان يعرف البلد والناس بتسوي في شنو؟و يشتغل شنو؟ يجري كما يجري كلب الحر يجري عشان يشوف مدارس وجامعات لي وليداتو ، ثم يستمرئ الجري قد يكون اشد عدوا من كلب الحر زاتو ثم .. ثم بعد فترة يمشي الحج للمرة الاخيرة ثم يعمل عمليه بروستاتا ، ثم يتوفاهو الله الى رحمته .
آخر الحكاية
اغمريني في كل المساحات والزوايا
اصبغي بالفرح البنفسج انوية الخلايا
كوني انتظاما
كوني انشطارا
كوني انقساما
كوني فيها
تحتويكي وتحتويها
واعبري حد النهاية.
اليكم جميعا مغتربي السودان في كل اصقاع الارض و اشتاتها جل احترامي و تقديري ، و أعادكم الله سالمين غانمين الي وطن يسعنا جميعا بحب و سلام وامان .
|
|
|
|
|
|
|
|
Re: دورة حياة المغترب السوداني (Re: heba Elmahi)
|
يلا يا بورداب السعودية و الدوحة و كل دول الخليج كل واحد يورينا هو في ياتو مرحلة بالضبط من المراحل المذكورة أعلاه ولو في واحد عندو اضافة للمراحل دي كمان يورينا . تحياتي و ودي مقدما للجميع و منتظرة اسمع منكم ، بورداب امريكا ما معانا في المراحل دي لاني جايهم بي وصف تاااااني ، حقهم براهو شوف عيني هي مرحلة واحدة و بعد كدة يلاقي الحميد المجيد .
| |
|
|
|
|
|
|
Re: دورة حياة المغترب السوداني (Re: heba Elmahi)
|
هبوية هبت علينا بهبوب طلق وجميل
ولا يسعني في هـذا المقام الا وان احيي عزيزي تمبس
في منفاه الا ختياري ويحدوني كثير شوق لنبض من حروفه
المنيرة في هـذا الخيط المتالق والمتأنق والذي سيذدان
رونقا بقيم مشاراكتكم التي هي وليدة رحم التجربة والتجربة
الطويلة.يابني سعود.
هبوية شدي حيلك .....راجيـك جنس نضمي.
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: مغتربين السعودية حاجة تانية حاجة تجنن الما يجن خليط من الشعور بالدونية وشعور بالفوقية في وقت واحد شعور بالدونية للبلاقيهو من الغربة وبالفوقية لانو كان لما يرجع هنا بيتعامل كانو حاجة تانية وزول فريد في نوعو يحيط به الناس من كل جانب واول ما يفلس ويعلّم الله يبدو يسالوهو انت راجع متين؟ |
اخيتى
لك التحية
دوما التعميم مخل وغير موضوعى وليتك بعضت هؤلاء الناس عوضا عن وضعهم فى سلتك المهترئة هذه ...
لسنا كذلك اخيتى فارحمينا وكفانا عذابات الغربة واهمال الحكومات ويكفينا شقى الايام ....
| |
|
|
|
|
|
|
Re: دورة حياة المغترب السوداني (Re: heba Elmahi)
|
الاخت هية .. السلام عليكن .. معاك فرحات من السعودية .. الكلام الفوق دا كلوا صاح .. صاح يعني .... صاح الصاح .. وربنا يخليكي .. ممكن خيارات .. لا ممكن اسأل سؤال واحد بس : : : في متابعة بعللك خلال كل هذه المراحل الحميرية والقرادية والسمكية كنتي عمرة ولا مقيمة ؟
| |
|
|
|
|
|
|
Re: دورة حياة المغترب السوداني (Re: wedaah mohamed)
|
هبة الماحي....ده شنو ده؟ جبتي الكلام ده من وين؟
شكراً ليك على الأقل الواحد عرف إنو يا دوب داخل على المرحلة الحمارية.....
بس بيني وبينك أخير من بي مليون مرة من غربة ناس وداعة
عمك قرشــو... طول بالك يا عمدة .... دي عالمةماجستير في إدارة الكوارث
| |
|
|
|
|
|
|
Re: دورة حياة المغترب السوداني (Re: إدريس البدري)
|
Quote: حباني الله بان اتعرف على احد المغتربين في السعودية عندو تلاتة من الابناء يحملون اسم محمد ، محمد سادة ثم محمد المامون ثم محمد الامين ،واقترحت عليه مساعدة مني في حل ازمة الاسامي ان يسمي الولد الجايي محمد وردي |
الاخت هبة لك مني التحية حسب علمي ان نظام الاحوال المدنية في السعودية لا يوافق علي الاسماءالرديفة يعني محمد وبس ممكن (يعني سادة ) ولكن محمد الخاتم او هكذا غير مسموح به. ولك الشكر
| |
|
|
|
|
|
|
Re: دورة حياة المغترب السوداني (Re: ibrahim alnimma)
|
سلامات يا هبة
Quote: خليط من الشعور بالدونية وشعور بالفوقية في وقت واحد شعور بالدونية للبلاقيهو من الغربة وبالفوقية لانو كان لما يرجع هنا بيتعامل كانو حاجة تانية وزول فريد في نوعو |
على أي أساس وما هو المقياس الذي بنيتي كلامك دة عليهو يا هبه ؟
| |
|
|
|
|
|
|
Re: دورة حياة المغترب السوداني (Re: بكري اسماعيل)
|
الاخت هبة اخشى ما اخشاه ان تكون نظرياتك هذه عبارة عن اسقاط (احباطات) تجربة شخصية تم تعميمها واسقاطها علي الجميع خاصة وكلنا يعلم ان (ظلم ذوى القربة اشد وانكأ ) فان كان من (تقيمين) معه في ارض الاغتراب (من زويك ) قد مر بمراحلك الحيوانية هذه فليس هذا دليلا كافيا علي ان الامر مشاع في دائرة اكبر من دائرة ادراكك الاسري .
بيد ان خط الكتابة وحجمها ولونها اعجبني واراحني حين القراءة
| |
|
|
|
|
|
|
Re: دورة حياة المغترب السوداني (Re: اساسي)
|
الأستاذة / هبه الماحي ...
تحياتي وتقديري،،
بكل أمانة لقد قرأت هذا الموضوع بكافة تفاصيله في أحد قصاصات الصحف السودانية قبل أكثر من عام منشوراً باسم د. سجيمان، صحيفة الصحافة إن لم تخني الذاكرة، فهل تم نقله أو أن في الأمر شيئاً آخر استعصى علي فهمه؟ أرجو التوضيح منك أو من د. سجيمان وذلك تحرياً للأمانة العلمية.
أرى أن المغترب السوداني واحد من أكبر ضحايا المجتمع السوداني، يعاني الكثير الكثير من أجل توفير حياة أفضل لمن يعول كان الله في عونه.
مع خالص شكري وتقديري للجميع.
| |
|
|
|
|
|
|
Re: دورة حياة المغترب السوداني (Re: إدريس محمد إبراهيم)
|
Quote: مغتربين السعودية حاجة تانية حاجة تجنن الما يجن خليط من الشعور بالدونية وشعور بالفوقية في وقت واحد شعور بالدونية للبلاقيهو من الغربة وبالفوقية لانو كان لما يرجع هنا بيتعامل كانو حاجة تانية وزول فريد في نوعو يحيط به الناس من كل جانب واول ما يفلس ويعلّم الله يبدو يسالوهو انت راجع متين؟ عشان يمشي يخم ويجي تاني هذا المخلوق المغترب في حياته يمر باربع مراحل رئيسية هي المرحلة القردية .. ثم المرحلة الحمارية .. ثم المرحلة القُرادية .. هذا المراحل لها التأثير في تكوينو الوجداني و سلوكه. |
والله فعلاً السودانيين شعب عجيب الزول يقول ليكم يا قرود ويا حمير ويا قراد وتقولوا يا سلام!
ده كلام عجيب غير مقبول جملةً وتفصيلاً. حتى ولو كان من باب التسلية.
الإنسان كرمه الله فكيف نصف جملة المغتربين بهكذا صفات مذمومة تبدأ بالشعور بالدونية مروراً بالتعالي ثم نتجرأ ونشبهه بالقرود والحمير والقراد.
يجب أن نتحدث عن المغترب بما يستحق هذا إذا لم نقدر ما قدمه ويقدمه من تضحيات.
| |
|
|
|
|
|
|
Re: دورة حياة المغترب السوداني (Re: إدريس محمد إبراهيم)
|
نسيتي يا سيدتي المرحلة الإنسانية وهي أهم مرحلة من مراحل هذا المغترب المغلوب على أمره نسيتي مرحلة الرجال الشرفاء الذين لايصدأوون ولايصدأوون ولايصدأوون كم من بيوت كثيرة مغلقة قد فتحها هؤلاء الحمير الذين تتحدثين عنهم وكم من مرضى كثيرون قد اتوا بهم الى هنا أو سافروا معهم الى أماكن أخرى وعالجوهم وكم من آلاف من الحجاج والمعتمرين من الآباء والأمهات والأخوان والأخوات والأصدقاء قد أتوا بهم لآداء مناسك الحج والعمرة وكم من آلاف وملائيين من شيلات الزواج ذهبت من هؤلاء القوم لتضم رأسين في الحلال وكم من مساجد أقيمت من حر مالهم وكم من أندية ومدارس قد شيدت صدقيني بعضنا يرسل حتى { الطباشير } والبعض الآخر يترك أعز ماعنده ليحمل من بين جنبات شنطته كراسات واقلام ليوزعها للمستحقين وكم من تضحيات كثيرة بذلها هؤلاء الكلاب من أجل أن يقف وطنهم على قدميه وكم من دموع كثيرة مسحها هؤلاء البسطاء وكم من أرامل وأيتام شعروا بان آباءهم لم يموتوا حينما وقف معهم هذا القراد وكم من سمعة طيبة تسمو الى الأعالي تركها بعض المغتربين الأوائل فصار اسم السودان نقياً وابيضاً وصافيا وكم من مغترب ضحى بنفسه وأمواله وأبنائه من أجل أن ينقذ أسرة أخرى أسرة حاصرها الفقر المدقع والدمار نعم 00 ربما تدخلين الى غرفتك وتبكين من نكاتهم البايخة لكنك لاتدرين كيف يبكون ويتألمون حينما يحاصر الوطن بالمرض والفياضانات والخلافات ويبكون حينما يسمعون بان احدهم قد مرض أو مات ويبكون حينما ياكلون ويشعرون ان الآخرون قد تركوا وجبة بسبب الغلاء والعدم ربما يضحك البعض عليهم لتصرف ما او نكتة قديمة أو أننا نجري يميناً وشمالاً بدون هدف لكن كل ذلك ليس غباءاً يا سيدتي وإنما كثيرون منهم يحملون قلوباً كقلوب الملائكة تربينا على الثقة وحملناها معنا وزرعناها في ارض الله الواسعة لهذا يتعامل الكثيرون منهم بثقة عالية مع كل شيء وإن كانوا أخيراً قد بدأوا يفقدون الثقة في الكثير من الأمور وهذه ليست مشكلتهم انما مشكلة افرازات دخيلة وجديدة على المجتمع كنت مرة اقود سيارتي بمدني وقابلني احدهم وكان يمشي كداري والعرق يتصبب يمين وشمال فقال لي : عليك الله بالله دي عربية تجي بيها السودان ؟؟ قلت ليهو : مش احسن ما امشي مكلوج زيك كده فضحك زملاؤه عليه 00 وقالوا ليهو تستاهل !! اها واحدة من النكات البتخلي الزول يبكي جوة الغرفة بالمناسبة مثال بسيط نحن بنينا المدارس بقريتنا وشيدنا المركز الصحي وارسلنا كل أجهزة المعمل لدينا الآن أكثر من 20 نوع من الفحص واصبحت القرية { تزغرد } في المغرب حينما يعلن المعمل عن حالة حمل اشترينا محول الكهرباء وارسلنا السلك من ايطاليا وكذلك العدادات واشترينا الأعمدة ولو كان التيار يتم بيعه هنا لأرسلناه هو الآخر اليست هذه مرحلة يصفق لها الملائكة والعشرة المبشرون ؟؟؟
قال قراد قال !!!! 00966507063205
| |
|
|
|
|
|
|
Re: دورة حياة المغترب السوداني (Re: إدريس البدري)
|
حبيبنا ادريس البدرى
لك التحية
Quote: عمك قرشــو... طول بالك يا عمدة .... دي عالمةماجستير في إدارة الكوارث |
ياخوى اطول بالى كيفن مع جنس الكلام ده ؟؟؟؟
Quote: كما وانه تبدو عليه ملامح تقالة الدم بدءا من الدقن المشغنفة وانتهاء بالنكت البايخة التي لو استمعت لواحدة منها تقوم عليهو تعضيهو في نص قنقونو |
فى ذمتك ده كلام يصدر من واحدة ست ؟؟؟؟؟
| |
|
|
|
|
|
|
Re: دورة حياة المغترب السوداني (Re: heba Elmahi)
|
كلو كوم وناس موضوع جميل وهادف و بتاع ديل كوم تاني با خوانا كان مستعجلين و ما عندكم وقت تقرو الموضوع و الإسم عجبكم ما في داعي تعلقوا تعليقات زي دي ختوا نقطة ولا اب بتكفيكم شر الحرج - و تكفينا شر المرض - و تمو الحنك مسنجر او ما تيسر
قال موضوع جميل وهادف قال
| |
|
|
|
|
|
|
Re: دورة حياة المغترب السوداني (Re: الطاهر عثمان)
|
الأخ / أبو حراز
لك منى التحية والتقدرير والاحترام كلامك دا وكفاية ما محتاج لشرح
نسيتي يا سيدتي المرحلة الإنسانية وهي أهم مرحلة من مراحل هذا المغترب المغلوب على أمره نسيتي مرحلة الرجال الشرفاء الذين لايصدأوون ولايصدأوون ولايصدأوون كم من بيوت كثيرة مغلقة قد فتحها هؤلاء الحمير الذين تتحدثين عنهم وكم من مرضى كثيرون قد اتوا بهم الى هنا أو سافروا معهم الى أماكن أخرى وعالجوهم وكم من آلاف من الحجاج والمعتمرين من الآباء والأمهات والأخوان والأخوات والأصدقاء قد أتوا بهم لآداء مناسك الحج والعمرة وكم من آلاف وملائيين من شيلات الزواج ذهبت من هؤلاء القوم لتضم رأسين في الحلال وكم من مساجد أقيمت من حر مالهم وكم من أندية ومدارس قد شيدت صدقيني بعضنا يرسل حتى { الطباشير } والبعض الآخر يترك أعز ماعنده ليحمل من بين جنبات شنطته كراسات واقلام ليوزعها للمستحقين وكم من تضحيات كثيرة بذلها هؤلاء الكلاب من أجل أن يقف وطنهم على قدميه وكم من دموع كثيرة مسحها هؤلاء البسطاء وكم من أرامل وأيتام شعروا بان آباءهم لم يموتوا حينما وقف معهم هذا القراد وكم من سمعة طيبة تسمو الى الأعالي تركها بعض المغتربين الأوائل فصار اسم السودان نقياً وابيضاً وصافيا وكم من مغترب ضحى بنفسه وأمواله وأبنائه من أجل أن ينقذ أسرة أخرى أسرة حاصرها الفقر المدقع والدمار نعم 00 ربما تدخلين الى غرفتك وتبكين من نكاتهم البايخة لكنك لاتدرين كيف يبكون ويتألمون حينما يحاصر الوطن بالمرض والفياضانات والخلافات ويبكون حينما يسمعون بان احدهم قد مرض أو مات ويبكون حينما ياكلون ويشعرون ان الآخرون قد تركوا وجبة بسبب الغلاء والعدم ربما يضحك البعض عليهم لتصرف ما او نكتة قديمة أو أننا نجري يميناً وشمالاً بدون هدف لكن كل ذلك ليس غباءاً يا سيدتي وإنما كثيرون منهم يحملون قلوباً كقلوب الملائكة تربينا على الثقة وحملناها معنا وزرعناها في ارض الله الواسعة لهذا يتعامل الكثيرون منهم بثقة عالية مع كل شيء وإن كانوا أخيراً قد بدأوا يفقدون الثقة في الكثير من الأمور وهذه ليست مشكلتهم انما مشكلة افرازات دخيلة وجديدة على المجتمع
أبو كريم
| |
|
|
|
|
|
|
Re: دورة حياة المغترب السوداني (Re: الطاهر عثمان)
|
الأخت هـــبة
السلام ...
قوام كدا نسيتوأنو المغترب هو :-
الصلح البيت الكبير وحفر السايفون !
الحجج والدو ووالدتو وجابهم عمرة !
الصرف علي تعليم أخوانو وأخواتو الصغار لحدي ما فتحوا !
وهو نفسو المغترب الزوج لي أخواتو وساعد أخوانو بما يستطيع وما لم يستطيع!
وفي دا كلو بحاول يخلي ليهو حاجة يقدر يبني بيها ضرا يلمو هو ووليداتو ومن كانت معه في الغربة تلوك الصبر العظيم !
بعد دا كلو ما لقيتو غير : الكلاب والقرود والحمير ...!!
(والبغال لتركبوها دي ما لقيتو ليها شبه ولا شنو؟؟؟) أعتقد البغال دي لو كان حا يعرف أنو حايشبهوه بالحيوانات آنفة الذكر دي كان تفادى يعمل العملو كلوا ليكون بغل ركوب!!!)
رغم المحالة بخفة دم المقال الا أنه أساء إساءة بالغة لكل من عمل ما ذكرته من جمائل ولو واحدة منها فقط ليبقى عظيماً بين أهله وعشيرته !!!
هشام (مغترب)
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: دورة حياة المغترب السوداني |
يرقه
شرنقه
حشره كامله
لانو المكان النشأنا واتربينا فيهو بقى بوجود العصابه دي عباره عن مستنقع
ومازلنا مشردين , وغير مرغوب في وجودنا حتى في مصر المؤمنه دي
| |
|
|
|
|
|
|
Re: دورة حياة المغترب السوداني (Re: heba Elmahi)
|
ــــــــــــــ ياعمك ...
الموضوع والله انا شايفو في الاجمال العام جميل وكما هادف ..
بس ماكنت متوقع من الاخت هبه الماحي انها طالما كان منقول
ان تشير إلي المصدر..
وبحكم انها حديثه في المنبر وقليله المشاركات
فلتاخذ فرصتها تعذر ويواصل في الموضوع
او بكري يحذف والموضوع بيكون انتهي علي قدر كدا
اما المقال فمن كان كاتبه اعتبره ثري وجميل
للنقاش ..
شكرا ليك يا ود البشر
وتحياتي
| |
|
|
|
|
|
|
Re: دورة حياة المغترب السوداني (Re: heba Elmahi)
|
الاخت هبة
السلام عليكم
Quote: يلا يا بورداب السعودية و الدوحة و كل دول الخليج كل واحد يورينا هو في ياتو مرحلة بالضبط من المراحل المذكورة أعلاه ولو في واحد عندو اضافة للمراحل دي كمان يورينا . تحياتي و ودي مقدما للجميع و منتظرة اسمع منكم ، بورداب امريكا ما معانا في المراحل دي لاني جايهم بي وصف تاااااني ، حقهم براهو شوف عيني هي مرحلة واحدة و بعد كدة يلاقي الحميد المجيد .
|
وين ناس اوربا يا هبة لان وضعهم يختلف عن امريكا ؟؟
بتصدقى يا هبة بعد المراحل التى ذكرتيها هنالك جانب مهم واهم وهو الجانب الاجتماعى الذى يتميز به مغتربين الخليج وتكاتفهم وامتداد ايديهم لبعض ولاهلهم فى السودان وهم على اتصال بأقاربهم انا بعرف ناس هنا فى اوربا لم يتصلوا على اهلهم من عشرات السنيين يكفيهم دعوات اهلهم لهم بالخير
ساعود
| |
|
|
|
|
|
|
Re: دورة حياة المغترب السوداني (Re: انتصار محمد صالخ بشير)
|
السلام و كل الود لكل المتداخلين و سعيدة جدا بهذا العدد من القراء و المتداخلين و أعتذر للجميع عن تأخري في الرد عليكم جميعا ، و أعتذر ايضا عما سببته من ضيق لكل الاخوة و الاخوات المغتربين ، و كون ان هذا الموضوع قد مس وتر حساس لديكم جميعا فهذا ما انشد و اصبو اليه حتي نفتح باب للحوار و النقاش دون الحساسية المفرطة الظاهرة في تناولكم للموضوع ، و كما لا يفوتكم فاني عندما شبهت المغترب السوداني في مراحله المختلفة بهذة التشبيهات لم يكن القصد منها الاساءة ابدا لانكم اكيد تعلمون بانه لا يخلو اي بيت سوداني من وجود احد أعمدته في أي من دول الخليج أو السعودية تحديدا ، يعني هناك العم و الخال و الوالد و الاخ ، و لا يمكن ان اقصد أي اساءة طبعا لاي منهم ، كل الحكاية يا اخواني انه الحاصل دا حاصل اذا كنتم حاسين بيهو أو ما حاسين هو في النهاية حاصل ، و كونه حاصل لا يتنافي مع وجود ظواهر تانية انسانية كما قال احد المتداخلين و هو شئ واضح للعيان و خصوصا في المناطق الريفية ، أثر المغتربين علي المنطقة بيكون ظاهر اكتر من المدن الكبيرة خصوصا الخرطوم حيث ان المغترب أثره بيكون ظاهر في حدود أسرته فقط ! أكرر أعتذاري لكل من شعر بالاساءة من هذا المقال و كما اوضحت ليس كان هذا هو الهدف .
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: أكرر أعتذاري لكل من شعر بالاساءة من هذا المقال و كما اوضحت ليس كان هذا هو الهدف . |
ما قريت المداخلات ولا شتو ؟؟؟؟؟؟؟؟؟؟؟؟؟؟ عشان حساسية الجماعة ما تزيد ,,,,
راجع المداخلات برواقه ...
| |
|
|
|
|
|
|
Re: دورة حياة المغترب السوداني (Re: اساسي)
|
تشهير عديييييل كدة !! والله حرام عليك يا جماعة أتقوا الله في الناس .و تقصوا الحقائق قبل ان تتهموا خلق الله ! و خليني متابعة معاك لغاية النهاية يا اساسي لانك اخترت طريق التشهير و اصدار الحكم النهائي قبل ان تسمع ردي علي كل المداخلاات أعلاه . و العندو حق عندي يجئ يثبته و انا ما عندي مانع لاقامة محاكمة اسفيرية علي ان يكون القضاة مجموعة من ذوي الثقة نتفق عليهم ، و انت و أخوانا ادريس و أخونا حمد فتح الرحمن ممثلي الاتهام ! و لياخذ العدل مجراه .
| |
|
|
|
|
|
|
Re: دورة حياة المغترب السوداني (Re: heba Elmahi)
|
هبه الماحى ,, كيفنك ,,
عندنا زميل عزيز هنا أسمه دكتور عادل وملقب بسجيمان وبختصروها بسى جى . وهو مهتم بالقراد والقرود والكلاب وكمان بيكتب بنفس الخط واللون .
من هنا جاءت التساؤلات ,, توارد خواطر غريب !!!
تحياتى ,,
| |
|
|
|
|
|
|
Re: دورة حياة المغترب السوداني (Re: كمال سالم)
|
تحياتي اخونا كمال سالم ، المسألة ليست توارد خواطر ولا شئ ، بالنسبة للموضوع كما اسلفت تم نشره اكتر من مرة تحت اسم مستعار لا يعطيني الحق بالمطالبة بأي حقوق نشر أو ملكية ، أما بالنسبة للخط و اللون فمنذ أول يوم و انا اخترت هذا المقاس من الخط و هذا اللون ليميز مداخلاتي و كتابتي و اعتقد اخونا سيجمان يكتب باللون الاحمر ، ما علينا خلينا نشوف أراء الناس ديل للنهاية و نشوف بعد ما طلعوني حرامية و جاهلة و و و .... تاني حيقولوا شنو !متابعة معاكم
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: بالنسبة للموضوع كما اسلفت تم نشره اكتر من مرة تحت اسم مستعار لا يعطيني الحق بالمطالبة بأي حقوق نشر أو ملكية |
أختي (هبة الماحي) ...لِِأن يكون منشور بأكثر من موقع بإسم مستعار ... مع تقديري فهذا لا يمنحك الحق في تجاهل الإشارة للمكان الذي قُمت أنت بالنقل منه تحديداً ... خاصة وأنك وأن ذكرت أنه (نُشِر أكثر من مرة) ... مع الإشارة لهذا الإسم ... ... ...والآن السؤال : من أين نقلته ؟؟؟ وماهو الإسم المستعار الذي نُشرالموضوع بأكثر بإسمه ؟؟؟ حتى نتجاوز المرحلة الأولى مرجلة أنه منقول ... ... ... (ولاشنو) ؟؟؟
| |
|
|
|
|
|
|
Re: دورة حياة المغترب السوداني (Re: Ahmed musa)
|
تحياتي اخونا احمد موسي ، اعتقد أنه اصبح مفهوما للجميع من مداخلاتي و ردودي أعلاه أن هذا المقال غير منقول من جهة ما !! و كما اسلفت عاليا انا جااااااهزة لمحاكمة اسفيرية لتوضيح الحقائق و ارجاع الحقوق لاصحابها .
| |
|
|
|
|
|
|
Re: دورة حياة المغترب السوداني (Re: heba Elmahi)
|
طيب يا هبة الماحي خليني من موضوع نقل المقال خليني في عضمه ما ورد في فيه سوا ء كاتباه او ناقلاه في النهاية رأيك او متفقه معاه على الأقل في رأيي إطلاق احكام ونعوت بتعميم زي دا خطأ كبير مجتمعات المغتربين تختلف من دولة للتانية بل من مدينة لمدينة حتى داخل نفس الدولة - ودي انا لي فيها تجربة شخصية خليك من ظروفهم المختلفة و تعليمهم و خلفياتهم الإجتماعية و الثقافية عشان تجي ببساطة تجمعيهم و تصنفيهم بربطة المعلم بالطريقة السخيفة دي اها انا مثلا لي اربعة سنين مغترب كفيلي جهة إعتبارية ما حصل في مجتمع حكيت بيها وكل دفعتي و زملائي و تسعين في المية من اقربائي و معارفي كذلك و قيسي على كدا , هل يصح التعميم ناهيك عن سخف التشبيهات اما موضوع كتابة أو نقل المقال فدا موضوع تاني
و يا عمدة الآراء تختلف ما قلنا حاجة و الأذواق متباينة فبالله عليك وريني وين مواطن الجمال في المقال اعلاه- خليني من كونه هادف -
| |
|
|
|
|
|
|
Re: دورة حياة المغترب السوداني (Re: محمد البشرى الخضر)
|
تحياتي يا ود البشري ، و علي قولك خلينا في عضم الموضوع الي حين ظهور مستجدات أخري ، تراني قد عممت علي المغتربين في التصنيفات المذكورة أعلاه لانني قد تعلمت في دراستي للماجستير ( المستهزء به أعلاه ) أن أي ظاهرة تتجاوز نسبة 70% من المجموع الكلي للشريحة المدروسة قابلة للتعميم ! و انت كفرد و 90% من مغتربي السودان في مدينتك كما اوضحت ، اذا كنتم خارج التصنيفات الواردة أعلاه فقد تكونوا واقعين في الجزء بتاع 30% من مغتربي السودان و هذة شريحة كبيرة العدد نسبة الي الاعداد المغتربين السودانين الكثيرة أصلا و خصوصا الي دول الخليج .
| |
|
|
|
|
|
|
Re: دورة حياة المغترب السوداني (Re: heba Elmahi)
|
جميل يا هبة كونك ذكرتي الحتة ديQuote: أي ظاهرة تتجاوز نسبة 70% من المجموع الكلي للشريحة المدروسة قابلة للتعميم ! |
ابقى ليك حبشي الليلة واقول ليك ادينا مراجعك الإستندتي عليها في إحصاء السبعين في المية دي خليها المراجع هل اتبعتي منهج علمي في البحث للوصول للنتايج اعلاه هل اخدتي عينات عشوائية و عملتي دراسة حالة - او الحاجات البتتعمل في البحوث البتاخد سنين قبل ما تطلع نتايج زي دي للامانة دا ما تخصصي ولا بفهم في الإحصا غير إنو كنا بنحنك بيها بنات الأحفاد في الإكستنشن لكن عارف إنو ما من الساهل اقول 70% من المغتربين بتونسوا بكفيلهم وعايزين يسموا اولادهم محمد و غيرها
| |
|
|
|
|
|
|
Re: دورة حياة المغترب السوداني (Re: محمد البشرى الخضر)
|
أخوي محمد البشري ( الحبشي ) لكن دا ما بحث علمي أو دراسة حالة لي بحث علمي أو رسالة علمية ، دا مجرد مقال كل المقصود منه أثراء ساحة النقاش بما يفيد عباد الله ، و اختلاف الاراء واحدة من المحاور المهمة جدا في اثراء النقاش ، و النسب المئوية المذكورة أعلاه ليست نسب محسوبة حساب عددي و لكن بالتعامل و التداول مع نسبة كبيرة جدا من المغتربين السودانين الرجعوا البلد و اللسة ما زالوا في دول الاغتراب .
| |
|
|
|
|
|
|
Re: دورة حياة المغترب السوداني (Re: heba Elmahi)
|
من حظك يا هبة الحبشي الأصلي ماخد موقف الأيام دي وإلا كان عرفتي حاجة جد نرجع للموضوع ذكرتي اميالمجرد مقال دا يا هبة مليان سخرية و تشنيع على حال عدد كبير من البشر و كيف تثري النقاش و المستهدفين المفترضين بالنقاش دا إنتي مسحتي بيهم الأرض و قردتيهم و حمرتيهم و قرادتيهم و كلبتيهم ثم شنو هي القضية اللتي تستحق النقاش المثارة هنا للأمانة غير سخرية و تظارف ما لقيت شي وقد يكون الشعور السلبي الإنتابني نحو المقال منعني من إدراك القضية المقصودة يا ريت تنوريني بيها عسى ولعل مع إعادتي لقراءة المقال على ضوء إفادتك أدرك كنه المقصود وكدا واخيرا أراك تاني رجعتي لمربع واحد هنا Quote: و لكن بالتعامل و التداول مع نسبة كبيرة جدا من المغتربين السودانين الرجعوا البلد و اللسة ما زالوا في دول الاغتراب . |
كم النسبة الكبيرة الإتداولتي معاها يا بت الماحي كونو في محيطك في نماذج معينة ما معناها تعممي على كل - أو اغلب - المغتربين كلامك دا ذكرني قصة وين للصهريج وكدا
| |
|
|
|
|
|
|
Re: دورة حياة المغترب السوداني (Re: محمد البشرى الخضر)
|
ـــــــــ
Quote: و يا عمدة الآراء تختلف ما قلنا حاجة و الأذواق متباينة فبالله عليك وريني وين مواطن الجمال في المقال اعلاه- خليني من كونه هادف -
|
ود البشري كيف ياحبيب ..
نحن قوم ككل السودان نفتخر بسودانيتنا في اي مكان
وطأت اقدامنا .. قد يكون البسطاء منا يتعامل مع الغربه
المفروضة علينا قصرا ..بكل عفويه جاء بها من موطنه الاصل
انا مقيم في المدينه المنوره ..وقبل سبعه سنين قابلت اخ
سوداني في النقل الجماعي ..جاء من المنطقه الشماليه ولم يكن
في بمدينه بل (بديره)بدوية قح ..كانت يده ملفوفه (بجص) حكي لي
قصتها وقد شكيت في روايته ..(مامهم) يبدو لون بشرته داكن تماما
فذكر لي قصه اول يوم وصوله الي تلك الديار البدوية وصوره لي نفسه
كما هي يقول كنت الف عمامتي بترتيب ووصلت الي (الكفيل) وقابلني
وسالني هل تعرف سودانين هنا فقال له نعم اعرف ذهبا الاثنين معاوجلسا
قليلا وبعد العصر قال الكفيل سوف تذهب معي الي (المجلس) وهذا ياتي اليه
من اهل القبيله وتحادثون في سوالفهم اليوميه ..فواحد منهم قال هذا
عامل مين او (ابوطربوش) كان يقصد عمامته
فقال لي السوداني جلست كعادتنا مهذبين ومحترمين واتحدث في وقت اللزوم
ودون ذلك افضل الصمت ولربما احتاج كم من اليوم حتي ادرك بعض الكلمات
واهضم فهم اللهجة والكلام السريع ...
ولكن قال لي ما اثاره ثورة غضب داخلي لي من نظرة صبيا منهم جاء وبداء
يمس لون بشرتي ويحركها في ثوبه ..(كأنه بذلك لوني بهيه)..
فما كان من بقية القوم العقلاء إن ضحكوا علي صبيهم ..وقد ذكروا
له بعض الكلمات قال لي فهمتها بعد فتره .. وعرفت معناها..
وسيدي ود البشري هذا الاخ جلس معنا فتره حتي طابت يده ..واصبحت
بيننا خوه لوجه الله .. والان موجود ورقم جواله موجودا معي ..
ـــ
ولديه قصة اخري لسوداني محامي كان يعمل في تلك المناطق
حتي انه من الالم والاوجاع .. جاءت له (نفسيات) ..
واصبح يشكل المحاكم ..علي قطيع من الماعز والابل ..
(قصه طويله).. وكذلك تكثر القصص ومن اصحابها وماسيها
تؤلم .. وبعض الرواة موجودون ..
بالنبسة لي انا لم اري شيء يذكر وبحكم اهل المدينه..طيبين
عموما وكذلك وجدنا من يدلنا في كيفية التعامل مع الاخر في فهم
نفسياتهم كاهل بلد وما المطلوب منا .. والحمد لله والفضل ..
| |
|
|
|
|
|
|
Re: دورة حياة المغترب السوداني (Re: Ahmed musa)
|
سلام اخت هبة والجميع افتكر الموضوع عاوز اثراء من النواحي الاقتصادية والسياسية والنفسيةعشان نعرف الحالات الاربعة المذكورة وخلونامن حكاية الكتب في الموضوع ده اول منو!!! زي قصة البيضةوالجدادة!!! ازيد على كلام هبة بأنه في الخليج في ناس بتجي خبراء من دول ( من العالم الاول او الثاني ) وماعندها المراحل دي كلها معناها زي ما قلت مربوطة بي نوع الحيكومة والوضع ال.....الخ. فيه حاجة تانية زمان الانسان السوداني كان عنده تلاتةمراحل بيمر بيهاقبل ما(يتاخد اجله) يلدوه ويتزوج ويجيب اولاد ويروح يموت (وفي النص كده يكون سمى ولده الكبير باسم ابوه وهو زاته يكون شايل اسم جده ) ومن هناجااختراع السبحة المهم المراحل كانت بتمر سريع لانه الاقتصاد كان شوية بيهو حيل . يعني المرحلة القردية مستمرة من السودان ( حضارة ماقبل الاغتراب ). برضو بكرر انه الجهات المتخصصة تثري الموضوع ده. تحياتي ثانية .
. .
| |
|
|
|
|
|
|
Re: دورة حياة المغترب السوداني (Re: Mohamed Idris)
|
تسلم أخونا محمد أدريس ، انا عاوزة الناس تتناقش بنفس روح النقاش دي ، و كل زول يدينا رأيه و انا قلت من الاول أي واحد عنده اضافة للتصنيفات أعلاه يذكرها لينا و كل واحد من المغتربين ابناء بلدي يحكي لينا تجربته في الاغتراب ، و عاوزين نعرف الاثار النفسية و الاقتصادية لكل المراحل أعلاه أو أي مرحلة اضافية .
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: يعني بعد دا منقول لا حولا اها يا ناس موضوع جميل وهادف طلعت ما كاتباه الدامة تعدلوا ولا كيف؟ |
شكلو الحراااااااااااااااامى دا محمد البشرى الخضر
أو سجيمان بتاع الحمير دا شخصية ما حقيقية,,,
أو هبة الماحى دى ولد
ياخ ما تقوموا تشوفو ليكم شغلة أحسن... مغتربين وهم
| |
|
|
|
|
|
|
Re: دورة حياة المغترب السوداني (Re: heba Elmahi)
|
يا ( بنت ادم ) الموضوع نازل في صحيفة ورقية بي اسم ( سي جي ) و نازل في عدد من المنتديات - الفيها من ذكر انه منقول عن سي جي و فيها من انزلها باسمه - بدون الاشارة لي اسمك انتي ، و انتي مصرة انك انتي من ابتدع الموضوع من اساسه - مع انو الموضوع ما عندو موضوع - و بتتحدي في اثبات عكس ذلك .
نهايتو يا ( هبة الماحي ) الموضوع كحقوق ملكية ، !! في جميع المنتديات المقوقلة و المكتوبة ما نازل بي اسمك انتي . و في الجرايد برضو ما نازل بي اسمك انتي . و برضو ما اعتقد انه مسجل في دار نشر او مكتبة بي باسمك انتي ( هبة الماحي ) الموضوع نازل بي اسم ( سي جي ) و هو الاختصار المعروف لـ ( سجيمان ) المعروف بـ ( د. عادل )
يبقي المفروض انك انك انتي من يطالب بنسبة الموضوع اليه او يجي ( سي جي ) سجيمان و ينفي انو هو كاتب الموضوع و ينسب ليكي الموضوع
في الساعة ديك يبقي ليكي الحق علينا
تطالبينا بي تعويض رد شرف و نردو ليكي
| |
|
|
|
|
|
|
Re: دورة حياة المغترب السوداني (Re: heba Elmahi)
|
المغترب عن المنبر ودقاسم من ما رجع السودان وهو يتجاري، ولا لاقي وقت ولا نفس للبورد. طبعا وإنتي عارفه ودقاسم وموقعه في المنبر. بيكون هو واحد من العينات الإنتي (أحصيتها) ودرستيها عشان تخرجي بهذا التعميم الفكه.
المهم رد الله غربته عن المنبر. ورد الله غربتنا جميعا (يكون آحسن بعد ذهاب الديكتاتورية الحالية، نلحق لينا ديمقراطية أخيرة قبل المعاش)
| |
|
|
|
|
|
|
Re: دورة حياة المغترب السوداني (Re: Nasr)
|
تسلم اخونا نصر علي المداخلة و التعليق ، و رد الله غربتنا جميعا و ربنا يديك الصحة و العافية و تعيش عمر مديد في سودان يسعنا جميعا بكل حب وسلام يسع حتي خلافاتنا و لا نضطر للتشتت عند كل اختلاف رأي . و ياريت صاحبك ود قاسم يجينا و نسمع رأيه لانه صاحب تجربة حقيقية و وصل الي اخر المراحل المذكورة أعلاه لانه حسب ما فهمت خلاص رجع السودان بشكل نهائي ، ربنا يديه العافية و يعيش مستقر و مبسوط في بلدنا الحبيب
| |
|
|
|
|
|
|
Re: دورة حياة المغترب السوداني (Re: heba Elmahi)
|
الأخت هبه الماحي
تحياتي
الموضوع جميل ويعكس واقع المغترب السوداني في الوقت الحاضر وبالأخص مغتربي السعودية والخليج، حيث اختلفت مفاهيم الاغتراب بالنسبة للسودانيين عن ما مضى من أيام وذلك بتغير الأوضاع الاقتصادية للسودان، وأيضاً تغير نظرة الدول المضيفة تجاه الوافدين بصورة عامة تبعاً لتغير اقتصادياتها وحاجتها لتوطين الوظائف ومحاربة شبح البطالة، كل ذلك يدفع بالمغترب الحالم بالبيت والعربية والعودة بعد سنتين تلاته بالتورط في الغربة والأنزلاق في شرك المراحل الأربعة.
ويمكن أن نتناول هذه المراحل بنظرة أخرى كالتالي: 1- مرحلةالأحلام (القردية): يكون المغترب قدضاقت به السبل وبدأ يبحث عن مخرج سريع ليحقق احلامه ويزيد عليها شويه، ومع بدايات اغترابه يسعى لتحقيق احلامه البسيطة، يلاقي شغل كويس ويعمل رخصة ويشتري عربية، ولو متزوج يجيب الاولاد- وفي سعيه الميمون هذا يواجه باحباطات كثيرة تتعلق بصعوبة العمل وقوانين التأشيرة وتجهيزات البيت.
2- مرحلة الاستسلام (الحمارية): وفيها يسعى المغترب لتصريف شؤونه حيث يكون قد اصبح مثقلاً بالمسؤوليات في بلد اغترابه وفي السودان بحكم اعتماد الاهل عليه، هنا لا يحس المغترب بالزمن ولا بمرور السنوات ويستسلم بكامل ارادته للعمل ويمنحه كل وقته وتفكيره لأن العمل يوفر له الأمان في الوفاء بالتزاماته.
3- مرحلة البحر أمامكم والعدو خلفكم (القرادية): في هذه المرحلة يكون المغترب قد أفنى سنين عمره الزواهر وفي نفسه حسرة أنه لم يدخر من المال ما يحقق حلمه بالعودة أو لم يكتمل مشروع البيت وتكاليف دراسةالأولاد، فيبدأ بالتشبث مكرهاً بالأغتراب، حيث لا تتوفر خيارات عمل جيدة تدعوه للرجوع والبداية من الصفر أو ما دونه، فالحال دوماً من سيء إلى أسوأ، وفي هذه المرحلة يقوم بإرجاع الأولاد للسودان وياكل نارو براهو.
4-مرحلة (مجبر أخاك لا بطل) (كلب الحر) يرجع المغترب أخيراًَ للسودان وبالتأكيد ليس بسبب نضمي الحكومة، ولكن بسبب السكري والضغط وبقية القائمة من أمراض الأغتراب، يعود وهو مختلف تماماً - ويحاول جاهداً الاندماج مره أخرى في مجتمعه، والتعود على الحياة في السودان بكل تفاصيلها، يسعى للحصول على مصدر رزق - والقليل من يوفق في ذلك - والغالبية يقومون بمشاريع لا يكتب لها النجاح - لا أدري ما هو سر ذلك.
رد الله غربة جميع السودانيين ومتعهم بوطن جميل يسع الجميع...
| |
|
|
|
|
|
|
Re: دورة حياة المغترب السوداني (Re: مصطفى كدفور)
|
تحياتي يا ود ناس كدفور و الف شكر علي المرور و التعليق ، و ياريت لو كل المتداخلين اسمعونا رأيهم في صميم الموضوع كما اسهبت حتي يستفيد الجميع من تجربة كل زول مغترب ، و ياما كانت تجارب الناس عبارة عن دروس و عبر يستفيد منها الاجيال اللاحقة ، و الحقيقة الحاصلة الان أنه المغترب السوداني في دول الخليج في الالفية التالتة ما زي المغترب السوداني في الثمانينات أو التسعينات !! الناس استفادت من حكاوي المغتربين و تجاربهم و بقوا الشباب عارفين حقوقهم و ليس من الساهل أن يتنازلوا عنها و الكفيل زاااتو فهم انه السوداني دا ما زول ساهل و ما بقدر يستغله زي ما عاوز . عموما ياريت نسمع تجارب الباقين .
| |
|
|
|
|
|
|
Re: دورة حياة المغترب السوداني (Re: heba Elmahi)
|
ــــــــ ود البشري ..
الجمال فيه انه يضرب في وتر كثير من السودانين المغتربين
المهمشين .. من قبل الدوله في حين ان مايسمي جهازهم كان سندا
للدوله الانقاذالفاشتيه بقرة حلوبه في كل زنقاتها قبل البترول والي الان تستغله في الضرائب وغيرها ..
تلك الفئة لم تسجل لهم الدوله كاميراتها في مناطق البدو وغيرها
اللهم إلا برنامجا تلفزيونيا يدغدغون فيهم عواطفهم وحنانهم وإن
كان فيه ماده مسجله فهي تكون لجهات محدده..
ولم يكن الخطاء وليد الصدفه فقد كان الاغتراب اجباري واضطراري
ولم يكن فيه تنسيق جيد من حيث الحقوق ونوعية العمل والتاهيل وغيرها
وايضا بعض البسطاء يتعاملون معاهم في العمل من جانب العواطف
... ياسيدي العزيز الان في اسر سودانيه كانوا يعملون في وظائهم
وقد تمت احالتهم الي التقاعد او المعاش او السعوده كمثال ..ما
ماقادرين يرجعوا السودان ..وكل خيارات صعبة وفي السودان (كوزنه)
وهنا (سعوده) والعمر تقدم بكثير من هؤلا ..
فعندما ياتي مقال في صميم الفئية المغتربه ربما ينظر اليهم من اجل
الانتباه الي اوضاعهم من قبل الدوله وبالرغم إنه فيه كلام جارحه وغير
جمليه في حقوقنا عموما كادمين ..
وشكرا لكما
| |
|
|
|
|
|
|
Re: دورة حياة المغترب السوداني (Re: Elhadi)
|
كفيت ووفيت أخي أبو حراز ..
Quote: نسيتي يا سيدتي المرحلة الإنسانية وهي أهم مرحلة من مراحل هذا المغترب المغلوب على أمره نسيتي مرحلة الرجال الشرفاء الذين لايصدأوون ولايصدأوون ولايصدأوون كم من بيوت كثيرة مغلقة قد فتحها هؤلاء الحمير الذين تتحدثين عنهم وكم من مرضى كثيرون قد اتوا بهم الى هنا أو سافروا معهم الى أماكن أخرى وعالجوهم وكم من آلاف من الحجاج والمعتمرين من الآباء والأمهات والأخوان والأخوات والأصدقاء قد أتوا بهم لآداء مناسك الحج والعمرة وكم من آلاف وملائيين من شيلات الزواج ذهبت من هؤلاء القوم لتضم رأسين في الحلال وكم من مساجد أقيمت من حر مالهم وكم من أندية ومدارس قد شيدت صدقيني بعضنا يرسل حتى { الطباشير } والبعض الآخر يترك أعز ماعنده ليحمل من بين جنبات شنطته كراسات واقلام ليوزعها للمستحقين وكم من تضحيات كثيرة بذلها هؤلاء الكلاب من أجل أن يقف وطنهم على قدميه وكم من دموع كثيرة مسحها هؤلاء البسطاء وكم من أرامل وأيتام شعروا بان آباءهم لم يموتوا حينما وقف معهم هذا القراد وكم من سمعة طيبة تسمو الى الأعالي تركها بعض المغتربين الأوائل فصار اسم السودان نقياً وابيضاً وصافيا وكم من مغترب ضحى بنفسه وأمواله وأبنائه من أجل أن ينقذ أسرة أخرى أسرة حاصرها الفقر المدقع والدمار نعم 00 ربما تدخلين الى غرفتك وتبكين من نكاتهم البايخة لكنك لاتدرين كيف يبكون ويتألمون حينما يحاصر الوطن بالمرض والفياضانات والخلافات ويبكون حينما يسمعون بان احدهم قد مرض أو مات ويبكون حينما ياكلون ويشعرون ان الآخرون قد تركوا وجبة بسبب الغلاء والعدم ربما يضحك البعض عليهم لتصرف ما او نكتة قديمة أو أننا نجري يميناً وشمالاً بدون هدف لكن كل ذلك ليس غباءاً يا سيدتي وإنما كثيرون منهم يحملون قلوباً كقلوب الملائكة تربينا على الثقة وحملناها معنا وزرعناها في ارض الله الواسعة لهذا يتعامل الكثيرون منهم بثقة عالية مع كل شيء وإن كانوا أخيراً قد بدأوا يفقدون الثقة في الكثير من الأمور وهذه ليست مشكلتهم انما مشكلة افرازات دخيلة وجديدة على المجتمع |
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: لذا يا اخوتي يمكنكم سؤال الاخرين من اين أتوا بهذا المقال و سوف تتفأجون بالاجابة !!
|
هذا يقودنا لاحتمالات عدة منها :
(1) أن اخونا الدكتور البيطرى عادى قد استنوق واصبح يكتب باسم هبة الماحى ماجستير الأزمات (2) ان هبة الماحى هى زوجة اخونا الدكتور عادل سجيمان ومن حقها انتزاع اى مقال ونسبته الى نفسها من زوجها .. (3) ان هبة الماحى عينها بيضاء وقوية بكلامها اعلاه ...
هل هنالك احتمالات اخرى ....
لا يوجد اى احتمال بأن المقال يخص هبة الماحى على الاطلاق وليس واردا ...
| |
|
|
|
|
|
|
Re: دورة حياة المغترب السوداني (Re: قرشـــو)
|
Quote: و كما لا يفوتكم فاني عندما شبهت المغترب السوداني في مراحله المختلفة بهذة التشبيهات لم يكن القصد منها الاساءة ابدا لانكم اكيد تعلمون بانه لا يخلو اي بيت سوداني من وجود احد أعمدته في أي من دول الخليج أو السعودية تحديدا ، يعني هناك العم و الخال و الوالد و الاخ ، و لا يمكن ان اقصد أي اساءة طبعا لاي منهم ، كل الحكاية يا اخواني انه الحاصل دا حاصل اذا كنتم حاسين بيهو أو ما حاسين هو في النهاية حاصل ، و كونه حاصل لا يتنافي مع وجود ظواهر تانية انسانية كما قال احد المتداخلين و هو شئ واضح للعيان و خصوصا في المناطق الريفية ، أثر المغتربين علي المنطقة بيكون ظاهر اكتر من المدن الكبيرة خصوصا الخرطوم حيث ان المغترب أثره بيكون ظاهر في حدود أسرته فقط ! أكرر أعتذاري لكل من شعر بالاساءة من هذا المقال و كما اوضحت ليس كان هذا هو الهدف . |
كما لا يفوتك انو الموضوع اصلا ما حقك عشان تفتحي نفسك وتبرري لصاحبو كمان هو قاصد شنو وما قاصد شنو؟؟؟
الله رحمك ساااي الما حضر فيلمك دا الليس الابيض
| |
|
|
|
|
|
|
Re: دورة حياة المغترب السوداني (Re: heba Elmahi)
|
يا شباب خلوا بالكم واسع شوية وإتقبلوا شوية سخرية، والحكاية دي ما زي النكتة أي زول بيرويها وما عندها سيد..
ومع أنو أنا برة السودان لكن ما حاسب نفسي مغترب، ومافي حاجة زعلتني في السودان غير حاجة إسمها جهاز المغتربين، وديل بالذات إذا تغير الوضع ما حنخليهم (الكلام دا أنا جادي فيهو). تتخيل يوقفوا منك البعثة ويفصلوك فصل تعسفي للصالح العام، وما يكون عارفنك عايش كيف، ولا كم مرة بتَ القوي، وبعد داك لمن تجي السودان يقولوا ليك تدفع ....لشنو؟؟؟؟ يقولوا ليك للصالح العام.... وشوف عينك المدراء البعدك في الدفعة، ينزلوا من العربات الفارهة سمان وأمان مافي مغترب واحد بيحصلهم. أما المغتربين--البقرة الحلوب--ولا حتي زير موية ما في عشان يبلوا ريقهم، يتدافروا زي شفع المدرسة في كشك الفول، ويحنسوا في الموظفين عشان يدفعوا قروشهم، وقدرت ما شافت عيني ما شفت لي إضطهاد للبشر أكثر من البيحصل للمغتربين في جهاز المغتربين، وفي الجوازات والفيزا، يحاحوا فيك زي الحشرة وزي كأنك قرادة بالجد بالجد
وبسببهم هم حناخد فترة في المرحلة القرادية، يكمن تطول شوية.....لكن كل أول وليهو آخر
وما ضاع حق وراءه مطالب
| |
|
|
|
|
|
|
Re: دورة حياة المغترب السوداني (Re: heba Elmahi)
|
Quote: اليكم جميعا مغتربي السودان في كل اصقاع الارض و اشتاتها جل احترامي و تقديري ، و أعادكم الله سالمين غانمين الي وطن يسعنا جميعا بحب و سلام وامان |
النصيحة ليك يا الله....دا غايتو ما حقي
| |
|
|
|
|
|
|
Re: دورة حياة المغترب السوداني (Re: سجيمان)
|
سي جي مان
Quote: التور دا البرج حقي |
والله انا لو منك اتنازل ليها من كل حاجة...حتي التور ..وضهر التور ذاتو كمان...
هو كلو بوست واحد ياسجيمان كتير علي هبة ...و لا مابتستاهل ؟؟؟
انت ماقصرت مع اي زول...حتي ندي القلعة ماخليتها...بقت عليها يعني؟؟؟
| |
|
|
|
|
|
|
|