|
محجوب شريف .. رد الجميل ... صحبة راكب الخيرية... نفاج أمل في الزمن الضنك
|
بإنسانيته اللامحدودة وإحساسه بالآخرين وحبه الكبير للفقراء والمعدمين رد شاعر الشعب جميل الحب والوفاء بحب ووفاء للناس التنضح سكر ، وبعقليته التي لا تعرف سوي الإنحياز لملح الأرض قام بتأسيس منظمة رد الجميل والتي شعارها تحريك الساكن والمهل ،، الساكن من خير وأمل في نفوس الناس والمهمل من قيم التعاضد والتكاتف ،،، اول مشاريع منظمة رد الجميل ،، المجمع الكائن في الثورة الحارة الـ 14 قبالة مرزوق والتي سيتم أفتتاح عيادته الخيرية في قليل الأيام القادمات ومن بعدها المشاريع الأخري (صالة مشاهدة ، كمبيوتر ، مقهي إنترنت .... الخ) العيادة تم تجهزيها من المساهمات التي إنهالت من داخل وخارج السودان,, وهنالك عدد كبير من الأطباء العموميين والإخصائيين أعلنوا مساهمتهم في هذا العمل النبيل ...
صحبة راكب الخيرية من إبتكارات الزول الجميل محجوب شريف وتقوم الفكرة علي استقطاب الدعم من الناس بره السودان وذلك بمساهمتهم بأشياء بسيطة تشكل هاجس لإناس بسطاء مثل (بخاخ أزمة ،، جهاز قياس نسبة السكر في الدم ..... الخ ) دون أن يشكل ذلك عبء علي الشخص المساهم أو الشخص الذي يحضرها معه للسودان ، وتم تخصيص عربة ستكون مرابطة في المطار لاستقبال المساهمات ،، وللعربة شكل مميز ومغطية بالكامل بشعار واسم مشروع (صحبة راكب الخيرية ) لتسهيل عملية التسليم ،، وستكون العربة أمام صالة الوصول علي مدار اليوم ،،، وهنالك عدد كبير من الشباب تطوع للمناوبة في عربة صحبة راكب الخيرية
فلنضع أيدينا علي يد استاذنا محجوب شريف لرد جميل هذا الشعب
|
|
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
Quote: لنضع أيدينا علي يد استاذنا محجوب شريف لرد جميل هذا الشعب لنضع أيدينا علي يد استاذنا محجوب شريف لرد جميل هذا الشعب لنضع أيدينا علي يد استاذنا محجوب شريف لرد جميل هذا الشعب لنضع أيدينا علي يد استاذنا محجوب شريف لرد جميل هذا الشعب |
شكرا زهير،، شكرا كتير لافتراعك هذا الخيط الجميل ردا لجميل صاحب رد الجميل.... وليظل هذا الخيط عاليا....
فوووووووووووووووووووووووووووووووووووووووووووووق
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
انتو الصور دي أخدتوها متين؟؟؟؟؟؟؟؟؟ فعلا مواكبة خالص..
أنا من الأطباء الشغالين بالمركز(مؤقتا)،ماأنجز ضخم وكبير، وماتبقى أكبر.
ممكن أكتب الحاجات الناقصة في العيادات،كشف يعني، والبقدر يجيب.
1-ميزان scale،العدد 2. 2-ستائر كشف،2. 3-سرائر للكشف،2. 4-طرابيز للطبيب+كراسي 2+2(الموجود الان طرابيز قديمة وغير مستوية السطح ،وبدون أدراج كمان). وبالمناسبة كراسي انتظار المرضى بتاعة الحديد شرطت لي بنطلونين(ماداير يدالهم ، لكن غيروا الكراسي بواحدات ظريفة).
دي بالنسبة للأثاثات.
الmedical items وال non medical items حأفصل لستة بيها وانشرها.
المركز واعد وفيهو شباب زي الورد:-
علي المبارك-المدير العام للمركزز
أحمد شريف- المشرف على تجهيزات المركز. منهل-مسجلة دخول المرضى.
سارة_المعمل.
مهند-كهربجي. ديل الأنا عرفتهم بس في الفترة الفاتت.
لكن العمل وراهو ناس كتار، مثلا الصيدلية (قيد الإنشاء) وراها مجموعة كبيرة هم الجابو المكيف والترابيز والدولاب والرفوف.
المعمل في قرووب نشيط وظريف برضو شغال زي النحلة.
ال logistic برضو مجموعة من العمال الجاضمين الشغل جد.
تعالوا المركز بالصباح وشوفوا الشغل الصاح.
لسة الافتتاح ما تم ، لكن العيان البجي بيتعالج وياخد دواه(حاتكلم عن السياسة العلاجية للمركز لاحقا) أكتر عيادة شغالة النسا والولادة:د.محمد الإمام ود. سوسن.
الجراحة،د.من الله. تشوفوا مع العيان تقول مجتمع بيه،جدية بالطريقة الصاح.
وابتداءا من السبت القادم حينضم للقرووب د. عبد المنعم الطيب، اخصائي الباطنية، بالمناسبة الراجل ده معلم بتاع مناظير جهاز هضمي. وهسة قاعدين نرتب لغرفة مناظير في المركز(المرحلة التانية من المشروع).
برضو دزرضا في عيادة الطبيب العمومي وأنا معاه.
قبال ما أجيب اللستة في حاجة شي لو اتعمل نكون جبنا التور من قرونو: مولد كهربائي.
لو عندكم زول ما في المنبر، أو زول عايز أي تفاصيل إضافية عن مجمع العيادات وحوجاتو الإيميل بتاعي ياهو
[email protected]
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
التحية للانسان المناضل محجوب شريف الذى قلما يجود الزمان بمثلة لهذا الوطن الجريح محجوب لن يهدا لة بال مالم يشفى كل جراح فقراء الوطن ولن يرى النوم حتى يشفى جرح الوطن الكبير
التحية لهذا الهرم الشامخ ونوصيكم على صحتة فهو اغلى ما نمتلك فى وطننا المسلوب والتحية لكل من ساهم وشارك فى هذا الصرح الانسانى الكبير
___________
تحية خاصة لبلدياتى للاخ وراق وزملائة لقد انجزتم وكفبتم واوفيتم
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
Quote:
Quote: زهير نبه الباشمهندس بكرى برسالة لأنه قد يكون ما انتبه للبوست ليرفعه عاليا لمدة اسبوع مثلا فهذا من البوستات التي يجب أن تجد اهتماما أكثر .
أضم صوتى للزميل عاطف مكاوى بأن يظل هذا البوست مرفوعا وعليا يا هندسه (أقلو) اسبوع..... |
الزملاء الأعزاء عاطف مكاوي آدم موسي
التحايا العاطرة
كنت أود أن تتم بعض الإجراءات الداخلية في رد الجميل من فتح الحساب وترتيب التلفونات وغيرها من الأمور الإدارية ثم نطلب من الأخ بكري تثبيت البوست ،، حتي نستفيد الفائدة القصوي من رفع البوست ،، وإلي ذلك الحين فلتعاون كلنا في (قله) للأعلي كلما تواري عن الأنظار
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
د. طراوة
أستاذ محجوب زول الناس مجمعه عليه بشكل غريب ،، من كل ألوان الطيف السياسي والاجتماعي ، وده نتيجة لحبه للناس ،،، عشان كده بيبادلوه الحب ،،
مشينا لبتاع شركة كمبيوترات عايزين نسأل عن اسعار اجهزة الكمبيوتر مواصفاتها واسعارها ،، لمن عرف إنه الكمبيوترات دي لرد الجميل واستاذ محجوب شريف قال اتكلموا عن تسعة كمبيوترات والعاشر ده هدية مني لرد الجميل ، وفي الطريق للمنزل ، كان هنالك 5 كمبيوترات أدفع تمنها ....
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
Quote: لسة الافتتاح ما تم ، لكن العيان البجي بيتعالج وياخد دواه (حاتكلم عن السياسة العلاجية للمركز لاحقا) أكتر عيادة شغالة النسا والولادة:د.محمد الإمام ود. سوسن. |
الأخ زهير تحياتي مرة أخرى معليش خارج الموضوع دكتور بكرى أورد اسم د. محمد الامام ضمن التيم المتعاون أرجو أن تعطيه عنوان بريدى الألكتروني وتطلب منه أن يرسل الي ايميله ورقم تليفونه مع خالص شكرى...... وايميلي طبعا بالبوست اياه
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
الفاض عن الحاجة المنسي في الدولاب والجوا تلاجة والفي الزقاق مركون فردا وأزواجا الكرسى في الحمام .. البمبر المكسور .. او باقي دارجة وال.. بالهوام مسكون والارضه وازعاجها ما كان غداً حيكون للصابر الممكون.. يسدوا كم فرقة و يسدوا كم حاجة الناس إذن بالناس.. ماتقيفوا فراجا خوفي المدن تنداس.. لو دونما احساس اتعلت ابراجا كم من ولد.. لا ام.. لا بيت.. ولا حاجة ياحليلو ما بيحلم .. مدرستو قد فتحت.. قداموا ادراجا ولا بحس بالعيد.. لو مرّ أو ما جا يتوسد الطرقات والحمى سهراجه هوج الرياح في الليل .. ساكيهو كرباجا الجمرة تحت العين .. مابكرة نتفاجا الغبن ذو حدين والفتنة مزواجه الواحَد يبقي اتنين والستة افواجا طقس التسامح زين القمرة وضاحة والشمس وهّاجة فلتفتح الاديان بيناتنا نفاجا نتدفا بالحسنى وبالسلم نتناجى كل العشم ياريت.. ما يبقي زول محتاج.. ماتبقي محتاجة.
شعر استاذ محجوب شريف
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
زهيـــر والجميـع رد الجميل واجب في اعناقنا زهـير ياريت تكتبوا لينا الأشـــياء المحتاجين ليها واســعارها والمواصفات المطلوبة , علشــان الواحـد احيانا بيكون عاوز يجيب حاجة مكتملة مش نص نص أو يقـدر يجيبها ممن حوله مثلا :- ميزان ..... كيلو للكبار بمبلغ ........ ميزان ..... كيلو للطفـال بمبلغ ........ سـتارة الكشـف ثابتـة بمبلغ ....... سـتارة الكشـف متحـركة بمبلغ عــدد ...... ميزان ضغط زئبقي بمبلغ ....... عـدد ...... ........... بــــ ........... بـــ الخ ولأن تجميع المبالغ قـد تكون أفيد للأشـياء الكبيرة ( مثل غرفة المناظير , عيادة الأسـنان الأشــعة .................) عارف يازهير اتـوقع أن يكون المشـروع دا مشــروع طبي ضخـم جدا لفقــراء الســودان وذلك لأن محجوب محبـوب لكل الناس ( بس هـو يأشــر ) وكمان تتوسـع الفكرة و يكون للمشـروع فـرع في كل ألأحياء الفقيرة . الطريق طويل ولكنه بدأ ولن يتوقف بأذن الله ولســان الحال نحن مع من نحب لأنه يحب فقـرائنا الشــكر لابن الشـعب وحبيبه أن طرح فكرة اتاحت لنا أن نوفي بها جزء من حق أهلنا علينا بالمناسـبة عندكم كولر موية للمرضى والعاملين وكيف تغطى منصرفات التشـغيل ( كهرباء , مويـة, ايجار المبنى وصيانتة اجور العاملين من غير الكادر الطبي ...............الخ , ) اقترح عمل قائـمة لتبرع شـهري او ســـنوي دائـم لتغطية المصروفات التشـغيلية ( طبعا القائمين على المشـروع عندهـم التصور الكامل لكن قلنا نسـهم بفكرة تطرح في البوســت ليتم تسجيل الأسـماء لمن خارج السـودان. وبالله لو الفكرة لقت ترحيب ضع اسمي من ضمن الأسـماء إضافة للمسـاهمة العينية ( سـوف تصلكم حال معرفة الأســعار ) ونحــن معكم الأخ القال رد الجميل فرع الرياض ليه ما يكون فـرع المملكة
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
زهير تحايا وود الاستاذ محجوب شريف نموذج للمعلم السوداني الاصيل ما ينجزه محجوب شريف تعجز مؤسسات ومنظمات واحزاب عن اانجازه شكرا محجوب شريف شكرا لنفاجك شكرا لمشاريعك المفرحه ( انا ما عارف اذا كان بكري عامل مكتبه لمحجوب شريف ولا ما عامل ) اقترح عمل مكتبه عن مشاريع النفاج ورد الجميل وكل الافكار الجميله للاستاذ محجوب .... تحياتي لصديقي علي مبارك مدير المركز ... في ابريل القادم ساكون في الخرطوم ومن اول زيارتي هذا المركز الجميل لكم الود .... معتصم
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
العزيز احيمر
الغرض من هذا البوست هو الإعلان عن مولد مشروع رد الجميل في هذه المرحلة ،،، سأقوم في الايام القادمة بنشر كل ما يحتاجه المركز وما يمكن شراؤه من السودان وما يحتاجه المشروع من خارج السودان ،، وذلك بعد الأتصال بالأستاذ علي مبارك ،، وأتمني أن يتداخل د. بكري بشير فقد ذكر في البوست بعض مما يحتاجونه ويا ريت يحضر مرة ثانية ويقوم بسرد الأشياء التي تنقصهم بالصورة التي ذكرت ،، وأقتراحاتك تلك سأنقلها كما هي لإدارة المركز لدراستها وإبداء الرأي فيها ،،، توقعوا مزيد من الأخبار في مقبل الأيام لك وللجميع مودتي زهير الزناتي
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
حشرات الروح برد الجميل
تقام في الثامنة من مساء اليوم الجمعة بدار منظمة رد الجميل بالثورة الحارة 14 شمال الطلمبة ندوة حول (مجموعة حشرات الروح) للدكتور مصطفي مدثر ، يتحدث فيها الأساتذة ، محمد المهدي بشري ، هاشم ميرغني ، مجذوب عيدروس مصطفي الصاوي ، ويهدي الدكتور مصطفي مجموعته القصصية لصالح مشروعات رد الجميل الخيرية كما فعل من قبل الشاعر عفيف اسماعيل الذي اهدي المنظمة مجموعة من كتبه لذات الغرض .
نقلا عن جريدة السوداني عدد الجمعة 21/ مارس 2008م
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
أقيمت حلقة النقاش ليلة أمس
وتحدث فيها الأساتذة محمد المهدي بشري محمد عبد المكرم وابراهيم اسحق ومصطفي الصاوي وعدد آخر من المهتمين وسوف نورد ملخض لها بالإضافة لبعض الصور ،،، كما تحدث الأستاذ محجوب شريف في نهاية الحلقة شاكرا الحضور ومقدماً تعريف مختصر عن منظمة رد الجميل وما قامت به في الفترة السابقة قبل تسجيلها رسمياً وما أنجزته بعد ذلك .
وقد قام د. محمد المهدي بشري بأهداء مجموعة من كتابه الشمعة والظلام لصالح أعمال منظمة رد الجميل علماً بأن الأستاذ سيد احمد بلال قد قام بأهداء مجموعة أيضاً من ديوانه لصالح رد الجميل
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
عقد اليوم لقاء تنويري بمركز عيادات رد الجميل بين
أسرة المركز وبعض الإخصائيين الذين تطوعوا بالعمل في المركز
وهما د. عثمان إخصائي أمراض القلب والقسطرة بمستشفي احمد قاسم
و د. عبد المنعم الطيب عبده اخصائي الباطنية وأمراض الجهاز الهضمي
ومن القلائل المتخصصين في المناظير ،، وقد وعدوا بتقديم كل مساعدة ممكنة
للمركز وتبرعوا بالحضور مرة كل أسبوعين لمعاينة الحالات في عيادات رد الجميل
بواقع 15 مريض في كل زيارة مجاناً
سوف نورد التفاصيل والصور لاحقاً
| |
|
|
|
|
|
|
Re: محجوب شريف .. رد الجميل ... صحبة راكب الخيرية... نفاج أمل في الزمن الضنك (Re: zuhair zenaty)
|
الرائع زهير يا لروعة الفكرة وسموها هكذا العمل والفعل موضوع ملموس ومحسوس ولاول مرة اعرف عنه فجزيت خيرا فوالله ستكون لك باذن الله حسنة لكل من عرف عن طريقك بهذا الموضوع وستكون لك حسنة لكل قطعة عينية او مالية ترسل لهذا المكان وستكون لك حسنة باذن الله تعالى لمجرد ان نوى من نوى ان يفعل خيرا فهنيئا لك . فالتقاعس ولعن الظلام والتوقف في مسير السالكين؛ ليس إلا رجسا من عمل الشيطان.. وخبالا من وساوس النفس الأمارة بالسوء.. وفعلة شنيعة لصيقة بسلوك الكافر الخبيث.. أما المسلم فهو الكلمة الطيبة التي أصلها ثابت وفرعها في السماء، وهو حامل المسك الفواح أريجا وعطرا، والماء العذب الزلال، والوعاء الذي كلما أُخذ منه امتلأ خيرا وازداد نفعا، واللواء الذي لا يموت حامله شهيدا إلا ويتولى رفعه وتثبيته جندي باسل، وهو النصر الذي لا بد منه وهو النهار بعد الليل.. والصبح بعد العتمة.. والنور بعد الظلام، والخير بعد الشر، والقدر اللطيف بعد القدر العسير. على قدر أهل العزم تأتي العزائم وتأتي على قدر العظام العظائم اللهم اجعلنا خلفاءك الأمناء في الأرض واكتب لنا النصر والتمكين وأمتنا شهداء على الحق المبين
| |
|
|
|
|
|
|
|