* * * الفنان المعروف جمال النحاس فى أغنية (جارو أهلك ) وهى من أغانى الكروان والتى تصلح قطعة أدبية جميلة لمقرر النحو و البلاغة لما فيها من إستعارات و تشبيه و طباق و جناس وغيرها .
* * الراحل المقيم بادى قد كان أنصاريا ملتزما مما أجبر الإمام السيد الصادق المهدى وأسرته على حضور حفل التأبين بل بعضهم كان ضمن اللجنة التى إجتمعت لعدة مرات لعمل البرنامج و تنفيذهـ وأدناهـ كلمة الإمام السيد الصادق فى شأن الراحل سلطان الطرب :
* * * الرائع جدا الفنان عصام الجبلابى والذى تغنى بأغنية (الخنساء) و أعقبها بـــ (بتريد اللطام) وقد كان تغريدهـ متميزا كيف لا وهو من المنطقة الأولى لفن الغناء الشعبى وأغانى الحماسة بالسودان حيث أتى الى الخرطوم (محمد ودالفكى) قادما من كبوشية فى بدايات القرن الماضى وكان بالخرطوم أغانى الطمبارة فقط فأحدث طفرة فنية فيها .
* * أحلى و أمتع فقرات حفل التأبين وأبطالها الرائع شيخ و موثق فن الحقيبة فى السودان الاستاذ عوض بابكر و الاستاذ حسب الرسول الطيب كمال الدين إبن المنطقة والإذاعى المعروف و صحبة الراحلين الفنان العظيم سرور و الراحل البروف بادى .
الفنانة الفلته / ساميه التوم وأداء جميل لإغنية ( مابخاف من شئ) وهى للشاعر محمد عبدالله الامى و من ألحان الحاج محمد أحمد سرور و أداء بعشوم الغناء الراحل بادى فى ليلة تأبينه بقاعة الشارقة بالخرطوم .
مابخاف من شئ
مابخاف من شئ ما بخاف من شئ برضي خابر......المقدر لا بد يكون ******** إن اتانى الهم جيشه دافر....يلقى يا خلاي صبري وافر يلقى عزمي التام ليه خافر....يلقى قلبي شجاع ما جبون ********* بالعدا معروف ما ببادر .......ما بخون الجار مانى غادر ما بقول للناس مثلى نادر......بل بقول للخالق..... شئون ******** ما عصيت مولاي مانى فاجر.......لا... ولا بالعالم بتاجر نفسي يا أحباب ليها زاجر........لم أكون كل يوم لي لون ******** الثبات معروف لي معاصر ......لو بقيت في داخل معاصر و الإله غير شك لي ناصر........رغم انف الواشي الخؤن ********* قول لشاهد الزور فيما ثائر.......هدى روعك قبل الخسائر يا ما قبلك عميت بصائر........من لساني ...وقولي الهتون ******* قول لأهل الجور والمساخر .....مافى أول ما ليه آخر مابدوم العز والمفاخر.......وما بدوم الظل والحصون ******* عن لسان الحق مانى نافر....وما جحدت الخير مانى كافر ما ضمرت السوء مانى حافر......للصديق هاويات السجون
.
09-19-2007, 03:20 PM
Mohamed Abdelgaleel
Mohamed Abdelgaleel
تاريخ التسجيل: 07-05-2005
مجموع المشاركات: 10415
في ليلة التأبين تحدث العارفون بدقائق الفن الشعبي السوداني .. ذكروا رموزه غاصوا في إبداعاتهم، تحدثوا عن بادي الذي يمثل إمتدادارصينا لجيل المؤسسين لهذا الفن الشعبي السوداني الخالد .. رحم الله بادي محمد الطيب .
ود مدنى ----------- ما له أعياه النضال بدني روحي ليه مشتهيه ود مدني ليت حظي سمح وأسعدني طوفه فد يوم بي ربوع مدني كنت أزوره أبويا ود مدني واشكي ليه الحضري والمدني آه علي حشاشتي ودجني وحنيني ولوعتي وشجنى دار أبويا ومتعتي وعجني يا سعادتي وثروتي ومجني حين سألنا حاوي الوصب من خمايل قرية القصب قالوا جات سيرتك علي النصب ونحن بين الروضة والقصب صنفا بعدها قالن إن تصب تربط الأحلام مع الخصب كان حبيبنا وحاشا ما نصبي ومن زمان فارقنا وهو صبي تاني ما سمعنا انقطع خبره يا حليلم طشوا ما إتخبروا واحدة فيهن قالت إنجبروا فقر ابونا وخدمة النبرو الكنانة أكرمت نزلي وأغدقت من خيره كل زلي إن حييت أو مت في الازل ده مقدر طبعه في الأزل غايته بختم نفثتي الخطرت بي تحية من حشاي شطرت للتدور والطايره والما طارت وسلاما ما الغصون خطرت
من قليبو الجافي ولى قليبي الحان.....النسيم يتردد عامل استمحان *********** الغصون تتناول منه خمر الحان ......والطيور تتناشد رايق الألحان والفروع تتمايل ميلة الفرحان........والزهور بتصفق ويرقص الريحان *********** يا نسيم ما بالك تتنى قامة البان ...........انت رايق تلعب والعشوق تعبان اكتشف ما دائي وما الدواء الصعبان.......هل دا جرحا بالغ أم دا سم ثعبان ************** قال لي لازم جرحك مدة الأزمان.............لا روايحى تطبك لا ولا لقمان البداوى جروحك إن شفتو يا سقمان.........في عصير الند البنضحو الرمان ************** يا الغرامك حلّ ورحل السكان..............من مدائن جوفي تملك الأركان ما ألذ النار السارجه بى لو كان..........يبقى قلبي وقلبك في الغرام شركان ************ قلبي لا يسلاك ولا يطيق نكران .............بين شاهد جفني البى الدموع وكران درعك البتقمز بالوضيب عكران............والضمير الميل صاحي أم سكران ************** صاحي سياف لحظك والطريف نعسان......ليك رشرش قاطع جندل الفرسان انت بدرا ساطع في قوام إنسان.................ليك حسن الدنيا ولى شعر حسان ************ الدوش افكارى وربّ لي جنان...........خمرة تمزج لينه وتسقى در أسنان رق يسطل سمعي لهيجك الرنان.........انت ناس في دنيا ولا حور في جنان ************ انت حسنك كامل والعشوق كملان..........طش عقلو الهامل فارق الزملان في المنام يتقدل طيفك العطلان..................والحجارة اتنت لو قليبك لان
Quote: أيضا سيستمر التوثيق فى الايام القليلة القادمة وقد حضرنا الشىء الكثير فقط أنتظرونا
نحن منتظرون وقد ذهب فارس الغناء ولا ندري (كيف يكون الشوط حين يغادرنا الجواد) رحم الله بادى الذي تبتل في حرم الإبداع عقودا، ذهب عناوسيبقى فينا فنا ملتزماً نهديه لأجيالنـــا القادمة.
والله توثيق جيد لهذا الفنان الخالد .. متابع معاك من الاول وفى انتظارك لتنزل الاغنية التى كتبت فى عبدالله ودجادالله (كسارقلم ماكمايل ) والتى تغنى بها بادى ..
بالله يامنعم بأى طريقة شوف لى الاغنية دى وللفارس والد الفرسان ودجادالله الف رحمه ونور
والله توثيق جيد لهذا الفنان الخالد .. متابع معاك من الاول وفى انتظارك لتنزل الاغنية التى كتبت فى عبدالله ودجادالله (كسارقلم ماكمايل ) والتى تغنى بها بادى ..
بالله يامنعم بأى طريقة شوف لى الاغنية دى وللفارس والد الفرسان ودجادالله الف رحمه ونور
الزول السمح محمد عبدالرحمن أتمنى لك دوام الأحوال السعيدة وتحياتى لكل الأهل بدرة النيل الأزرق (أربجى) . وطبعا أستاذنا الكبير يونس أحمد يونس أخدتوهـ مننا فهنيئآ لكم به لينعم بالسكن وأسرته مع أحفاد وأقارب أستاذ الاجيال العلم/عبدالرحمن على طه .
وبمناسبة أربجى و النيل و الخضرة و الوجه الحسن أهديك رائعة محمد بشير عتيق و الأداء الخرافى من المبدع المسكون بادى (قوم نرتشف خمر الهوى ) .
ويستمر التوثيق مرة أخرى بعد أن شارفنا على إعادة كل الأغانى للبوست بعدتغيير بكرى للسرفر قبل فترة كما هو معلوم لديكم مما أدى لتعطيل كل ما رفعناهـ سابقا .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة