|
أحاديث الأستاذ محمود بعد الخروج من معتقلات نميري في ديسمبر 1984 (Re: Yasir Elsharif)
|
هامش [7]
كان الأستاذ محمود معتقلا بمنزل من منازل جهاز الأمن.. وهناك عشرات الجمهوريين كانوا في سجن كوبر، وبعضهم في سجن الأبيض.. أما الجمهوريات الأربع اللائي اعتقلن في مايو عام 83 فقد تم الإفراج عنهن من سجن النساء في أمدرمان في فبراير 1984... أولا:
حديث الأستاذ يوم 19 ديسمبر 1984 بعد خروج الجمهوريين من المعتقلات..
قال الاستاذ في ختام جلسة يوم الخروج - الأربعاء 19/12/1984م
Quote: سمعنا مؤكد كلام طيب جداً من رؤساء المعسكرات الثلاثة عن التجربة ، وعن رأيهم في إتجاه عام لمقبل الحركة - حركة الجمهوريين. الحاجة اللي الإنسان قوى الثقة بالله فيها أن الجمهوريين ما يلقوا إلا ما يقويهم ويزيدهم ويجهزهم لي الله بالمرة ، زي ما حصل الإعتقال الناس مشوا ليه مسرورين وفرحانين ، وعاشوه مسرورين وفرحانين ، وخرجوا منو مسرورين وفرحانين .. لكن المؤكد أنو نحن مقبلين على حركة عايزه تشمير أكثر ، بنقصرها بقدر ما نشمر .. نحن خرجنا في وقت برضو الشعب واقع عليهو شئ كثير جداً من الإضطهاد ومن الظلم ، من الجوع بصورة محزنة .. بعدين السلطة في أضعف أوقاتها ، حاجة مربوكة .. السلطة مربوكة ما عارفة تعمل شنو .. الهوس الديني لضعف السلطة إفتكر أنو هو قريب من السلطة ، والهوس الديني من المؤكد إنو بستهدف الجمهوريين ، ما عندو أعداء غير الجمهوريين ، حتى ولا السلطة .. ولذلك أنا بفتكرالأيام المقبلة راح تكون أيام عراك ، لكن العراك ما بضركم بأي حاجة ، راح يقويكم ويزيد قاماتكم بس أنو المشوار طويل - المشوار ، مش بحساب الزمن ، بحساب القامة الروحية .. القامة الروحية المطلوبة كبيرة جداً ، إذا كان نحنا أيقنا بأنو الفكرة الجمهورية هي الدين ، وأنو الدين عايد بغرابة ، وغرابة شديدة ، وأنو عايد ليكون في قامة هي قامة كوكبية زي ما المجتمع البشري مجتمع كوكبي وكلو محتاج للدين ، لابد أنو الناس البرفعوا المشاعل دي يكونوا قامات عالية جداً .. كل العوامل بتتضافر لترفع القامت دي ، لكن بقدر ما نجوِّد - بقدر ما نغير أنفسنا - نحن بنقصر المشوار دا .. واحد من مشائخة الأحمدية - الشيخ البشير في الحقنة - أدى واحد من تلاميذه إسم ، عشان يكررو في سبحته ، قال ليه: أعمل كم يا مولانا ؟ قال ليه: إن كنت من أهل التوحيد أعملو مرة واحدة.. الناس بيعملوا عدد السبعين عشان يكون في واحد صاح .. هسع الجمهوريين أمامهم المشوار دا ، إما الحكاية تبقي سبعين ألف أو بتبقى واحدة ، حسب التجويد .. فإذا كان كل واحد عرف مسئوليتو ، وعرف خطورة القامة المطلوبة منو والمقام المطلوب أن يملاه وعكف على نفسو ، أفتكر المشوار قصير ، لكن لا بد من أن يكون في تغيير جوه .. المعركة الجمهورية هي كلها معركة روحية .. إنتو بتنتصروا إنتصار روحي .. زي ما بنقول أنو معركة الجمهوريين في سجادة التلت .. دي كان بتقال دائماً .. بطبيعة الحال الناس كلما يمشوا لي قدام زي البجمعوا قوة وسرعتهم بتبقى أكثر ، لأنو في أنوار استجمعت .. يجيكم وقت أنو الأنوار الإستجمعت دي فجأة تشتعل زي حكاية "ثم أنشأناه خلقاً آخر" .. بعد الستة أطوار ، ثم أنشأناه خلقاً آخر. فإنتو هسع - الناس الخرجوا من المعتقل الناس المعتقلين في البيوت وفي المكاتب وفي كل جهة - كل جمهوري هو في الحقيقة في المعتقل ، كل جمهوري غريب عن المجتمع دا ، والغربة بطبيعة الحال بتخلي الإنسان ينظر لي داخلو أكثر مما ينظر لي خارجو .. وبشعر بأنو هو مقصود بالعداوة و أنو ما عندو في مواجهة العداوة غير الإلتصاق بي لله .. المسألة البتحوجكم لي الله هي مسألة لخيركم ما في أي كلام وأنا أفتكر أنو في الأيام القادمة راح تشعروا بالحاجة لي الله أكثر مما شعرتوا بيها في أي وقت مضى و أنا مستبشر بالمسألة دي تماماً .. نحن في منعطف جديد أفتكر الناس يأخدوه بالجد اللازم و العمل اللازم .. ما بتلقوا أنو العمل دا نار ، بتلقوه نور أخضر بارد ولذيذ وممتع والناس أحسن يعكفوا فعلاً بالصدق في مواجهة أمرهم وخيركم قريب ، أصلو ما في أدنى شك ، وما يجري ليكم إلا ما يزيدكم قوة وقرب والتصاق بي الله. بتكون عندنا زي ما قلنا جلسة ننظمها هسه ، بتكون مقفولة ، لتخطط لينا خطواتنا المقبلة تكون كيف .. نحن عادة قاعدين نعمل حكاية لجان تنبثق من عدد كبير ، وهي بتكون صغيرة ، لتحضر الدراسة وتنشرها وتطرحها على اللجنة الكبيرة ، ليخرجوا الناس بي حاجة تلقى على الاجتماع الزي دا ، وتاخد صورتها النهائية .. مناقشتنا للموضوع التنظيمي افتكر ممكن تكون مطولة.. |
حديث الأستاذ في جلسة أخرى وهو الحديث المشهور لدى الجمهوريين بحديث "الغربة".. وهو حديث تم قبل إصدار منشور "هذا.. أو الطوفان".. يمكن الإستماع بالضغط على الوصلة [حوالي 10 دقائق من الحديث].. http://mugrun.com/share/alghorba.mp3 وهذا هو الحديث بالكتابة:
Quote: ( طيب ... أدينا فرص زيادة ، على اقتراح عوض ، وتحديد بشارة ، لناس مدنى وناس الابيض ، ومعتقل كوبر ، وسجن النساء أم درمان ... وكان أمبارح يكون التعبير يجرى بأنو المعتقلين خارج المعتقلات والمعتقلين داخل المعتقلات ، عبد اللطيف كررها النهار ده ... ما أصبح الآن عندنا معتقلين داخل المعتقلات ، لكننا كلنا معتقلين خارج المعتقلات .. أسوار معتقلنا الجديد هى الغربة... ، الغربة البيعيشوا فيها الجمهوريين، هى كل مرة بتزول فى مستوى من مستويات زوالها ، ويوم خروجنا من المعتقل الحقيقى هو يوم سقوط الغربة . وبجى سقوط الغربة برفع واقع الناس للفكرة ، أو انزال الفكرة لواقع الناس ، وبانزال الفكرة لواقع الناس بتحصل الثورة الفكرية ..، الجمهوريين ما ببقوا غرباء فى الوكت ده ، ببقوا هم الأصل ، والناس بيٌهطعوا ويجوا ليدخلوا فى حظيرتهم. رفع الواقع للفكرة ، أو انزال الفكرة للواقع بيقتضى انو الناس يعيشوا الفكرة حتى تصبح ماشة .. على قدمين بين الناس ،وده ما نسميهو الدعوة بلسان الحال ... ، الدعوة بلسان الحال أبلغ من الدعوة بلسان المقال ، وما يعملوا الانسان أبلغ وأهم من ما يقولوا الانسان ، فرفع الواقع للفكرة يعنى انو الناس يبينوا ليهم واقعهم ، لأنوا الناس بيكونوا فى غفلة الواحد يكون فى مشاكل كتيرة جدا لكن لغفلته ، لجهلو ، لعدم وعيو ما شاعر بواقعوا ، ودى عبارة رفع الواقع للفكرة ، وبطبيعة الحال انزال الفكرة للواقع دى بتكون واضحة فى معنى انو الفكرة تكون واضحة وجلية للناس... ، انزال الفكرة للواقع ورفع الواقع للفكرة هو البتزول بيهو غربة الجمهوريين ، وده كلو بيعنى أنو الناس عملهم يكون أهم من قولهم ... الناس يبقوا .. ، زى ما بترد العبارة، مصاحف فى الدم واللحم ماشة ... , أخلاقهم هى أخلاق القرآن ، وده بيجى بالتعلق الشديد ، والاحترام الشديد ، والحب الشديد للقرآن وللنبى. فغربتكم قد تطول .. ، أو قد تقصر.. على مدى ما تبذلوه من صدق فى العمل ، الداخلى عشان ما تكونوا بلسان حالكم دعاة ، والخارجى لتكونوا معلمين .. وده مصيركم وقدركم ..، لكن الغربة دى لمن تنتهى الناس مقاماتهم بتكون اتحددت ، الفرص للعمل البتغير المقامات دى فى فترة الغربة .. ، ولذلك فترة الغربة دى الناس لازم يشوفوها فرصة ، زى ما شافوا الاخوان اعتقالهم فرصة... لمن دخلوا خلف الاسوار كانوا فرحانين .. دخلواالمعتقلات فرحانين ، وهم عارفين انهم جايين على قَدَر ليخلوا لى الله ، وكانت الكتابات البتجى والاقوال البيقولوها كلها كانت فى الاتجاه ده ، وما حزنوا ، ، ما ضاقوا ، ما قلقوا ، وهم داخل الأسوار لأنهم شاعرين بالمعية مع الله ، دى الجلوة .. لمن نقول الخلوة والجلوة معناها ان تنقل حالة الانحصار البتلقاها فى الخلوة لتكون فى الجلوة ، انت وسط الناس وانت منحصر ، انت من أعلاك مع الله من أسفلك مع الناس ، كأنك انت عندك وشين : وش مما يلى الله ، ووش مما يلى الناس .. ، عبادة ومعاملة ، الاتنين بيقومن مع بعض ، وما بتكون واحدى ناجحة بدون الاخرى ... هسه الناس من الجلسة دى ينقلوا أسوارهم من الحيطان الى كانوا خلفها الى أن تكون الأسوار هى الغربة ، ونحن كلنا فى المعتقل ده .. ، الأخوان الوجدوا فرصة أسوار الطوب والحجر بقدر يكون عندهم تصور أكتر لموضوعهم ، الأخوان الما دخلوا فى الطوب والحجر كان واضح برضوا انجازهم وتخيلهم لأخوانهم الهناك .. ، اذا كانت المسألة دى احتاجت لدعم زيادة ، بكون عمل الناس المارسوا ممارسة حسية فى أن كانوا خلف الأسوار ، بكون زيادة شوية فى أن ينقلوا لأخوانهم مشاهدهم الكانوا فيها فى الداخل ... ، لكن منذ اللحظة دى الجمهوريين خرجوا من المعتقلات التقليدية الوراء الحيطان ليكونوا فى المعتقل الكبيير ، اللى هو أنهم غرباء ، وأنها غربتهم دى بترد ، ويوم ترد غربتهم يكون نصرهم المبين ، وأنوا الغربة بترد فى داخل الانسان زاتو ، بأن يكون ما يقولو يعملو ... أن يكون نظرو للداخل نظر دقيق ومحاسبتو لنفسو محاسبة دقيقة ... أن يعايش نفسو .. يعرف نفسو ويلتزمها ويفكر فى نقايصها ، ويتوجه بيها لى الله ليصلحها ليهو ... ، الانسان لمن يعرف نقايص نفسو بيكون بسأل الله بلسان الحال ، والله لمن يٌسأل بلسان الحال يستجيب حتى للكافر ، (( أمّن يجيب المضطرّ اذا دعاه ويكشف السوء )) ، المضطر ده مش المؤمن .. المسلم ، أى مضطر ، (( قل ما يعبٌأ بكم ربى لولا دعاؤكم فقد كذبتم فسوف يكون لزاما )) ، شوف جاب ليهم التكذيب ، لكنو بيعبأ بيهم ، لولا دعاهم بلسان الحال ربنا ما بيعبأ بيهم .. ، الدعوة بلسان المقال ما يعبأ بيها ربنا الا اذا كانت مصحوبة بأنوار القلوب ، بعدين أنوار القلوب تمشى لى قدام فى الدعاء لغاية ما تبقى لسان حال ، يعنى مضطر ، (( أمّن يجيب المضطر اذا دعاه ويكشف السوء )) تجى مع (( قل ما يعبٌأ بكم ربى لولا دعاؤكم فقد كذبتم فسوف يكون لزاما )) ... فالانسان البنظر لى داخلو ويعرف عيوب نفسو .. دى الحاجة المهمة جدا ... ، يعنى .. الفكر نحن بنقول ، الفكر مش هو فى السماوات والأرض ، الفكر فى السماوات الداخلية والأرض الداخلية ، الفكر فى عيوب النفس .. ده هو البجى بيهو الخير .. ، لأنو بكون دعوة بلسان الحال ... أنا أفتكر أنو الجمهوريين يستشعروا الصورة دى أنهم هم فى معتقل ، والمعتقل ده أسواره الغربة ، وأنو يحاولوا أن يرفعوا الغربة .. ، بأن يكونوا مقنعين للناس الحولهم بلسان حالهم ولسان مقالهم . بنختتم جلستنا ، ليسيروا الناس فى البند التانى البواجه جلستنا .) |
|
|
|
|
|
|
|
العنوان |
الكاتب |
Date |
هوامش على دفتر ذكرى الأستاذ محمود.. وثائق، صور، أحاديث مسجلة، وفيديو | Yasir Elsharif | 01-16-07, 07:01 PM |
Re: هوامش على دفتر ذكرى الأستاذ محمود.. وثائق، صور، أحاديث مسجلة، وفيديو | Yasir Elsharif | 01-16-07, 07:23 PM |
هامش رقم 1 من كتاب "الهوس الديني يثير الفتنة ليصل إلى السلطة" | Yasir Elsharif | 01-16-07, 07:29 PM |
هامش رقم 2 انتقاد الجمهوريين لخطوات التكامل بين مصر والسودان | Yasir Elsharif | 01-16-07, 07:32 PM |
هامش 3 الجمهوريون وصفوا بنك فيصل الإسلامي بأنه من صنائع الهوس الديني | Yasir Elsharif | 01-16-07, 07:36 PM |
هامش رقم 4.. لقاء مجلة الوادي بالصوت وبالكتابة | Yasir Elsharif | 01-16-07, 07:41 PM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 02:47 AM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 02:50 AM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 02:52 AM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 02:55 AM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 02:57 AM |
Re: هامش رقم 4.. لقاء مجلة الوادي بالصوت وبالكتابة | Moawia Mohammed | 01-18-07, 03:00 AM |
هامش رقم 5.. الجهوريون يخرجون كتابا إسمه الإرهاب يهدد حرية الفكر مارس 83 | Yasir Elsharif | 01-16-07, 07:49 PM |
الأستاذ يحدد موقف الجمهوريين من النظام في فبراير 1984 | Yasir Elsharif | 01-16-07, 07:52 PM |
أحاديث الأستاذ محمود بعد الخروج من معتقلات نميري في ديسمبر 1984 | Yasir Elsharif | 01-16-07, 09:40 PM |
Re: أحاديث الأستاذ محمود بعد الخروج من معتقلات نميري في ديسمبر 1984 | Moawia Mohammed | 01-18-07, 03:07 AM |
منشور "هذا.. أو الطوفان".. | Yasir Elsharif | 01-16-07, 09:53 PM |
صور توثيقية لمسيرات الجمهوريين السلمية في مقاومة محاكم قوانين سبتمبر | Yasir Elsharif | 01-16-07, 10:01 PM |
Re: صور توثيقية لمسيرات الجمهوريين السلمية في مقاومة محاكم قوانين سبتمبر | Haydar Badawi Sadig | 01-16-07, 10:07 PM |
لقاء مجلة الجامعة بالأستاذ محمود يوم الجمعة 4 يناير 1985 | Yasir Elsharif | 01-16-07, 10:46 PM |
حديث الأستاذ محمود عن الفداء في آخر جلسة له مع الجمهوريين | Yasir Elsharif | 01-16-07, 10:58 PM |
فيديو كلمة الأستاذ محمود أمام محكمة المهلاوي | Yasir Elsharif | 01-16-07, 11:22 PM |
Re: فيديو كلمة الأستاذ محمود أمام محكمة المهلاوي | Moawia Mohammed | 01-18-07, 03:12 AM |
المقاومة السلمية والعصيان المدني.. سلوك الجمهوريين عندما اعترضهم البوليس.. | Yasir Elsharif | 01-16-07, 11:32 PM |
وثائق خطيرة تدين النميري والمتآمرين!!!! | Yasir Elsharif | 01-17-07, 12:17 PM |
Re: وثائق خطيرة تدين النميري والمتآمرين!!!! | Haydar Badawi Sadig | 01-17-07, 01:13 PM |
Re: وثائق خطيرة تدين النميري والمتآمرين!!!! | Haydar Badawi Sadig | 01-17-07, 02:29 PM |
Re: وثائق خطيرة تدين النميري والمتآمرين!!!! | Yasir Elsharif | 01-17-07, 02:56 PM |
Re: وثائق خطيرة تدين النميري والمتآمرين!!!! | kh_abboud | 01-17-07, 06:35 PM |
Re: وثائق خطيرة تدين النميري والمتآمرين!!!! | Haydar Badawi Sadig | 01-17-07, 06:40 PM |
Re: وثائق خطيرة تدين النميري والمتآمرين!!!! | Haydar Badawi Sadig | 01-19-07, 03:20 AM |
عودة إلى ما قبل اعتقال الأستاذ.. إلى فبراير 1983.. حديث مسجل!! سرد لتاريخ الحركة.. | Yasir Elsharif | 01-22-07, 08:09 PM |
Re: عودة إلى ما قبل اعتقال الأستاذ.. إلى فبراير 1983.. حديث مسجل!! سرد لتاريخ الحركة.. | Yasir Elsharif | 01-22-07, 08:42 PM |
Re: هوامش على دفتر ذكرى الأستاذ محمود.. وثائق، صور، أحاديث مسجلة، وفيديو | Yasir Elsharif | 01-29-07, 05:32 PM |
Re: هوامش على دفتر ذكرى الأستاذ محمود.. وثائق، صور، أحاديث مسجلة، وفيديو | Yasir Elsharif | 02-13-07, 11:03 AM |
Re: هوامش على دفتر ذكرى الأستاذ محمود.. وثائق، صور، أحاديث مسجلة، وفيديو | نيازي عبدالله مرحوم احمد | 02-13-07, 11:25 AM |
|
|
|