كوريـــا .... أشهــر أحيـــاء الديـــم ..

Quote: كنا التلاتة مسؤلين من ميز الكلية الشهر داك .. واحد من بورسودان و التاني من رفاعة .. و انا تالتهم .. لمينا من سنسرة الميز مع تجار الخدار و اللحمة قروش كويسة .. فترة الكونفيانمنت كانت عبارة عن عذاب ما ليهو اول و لا آخر .. و العسكرية شينة و لئيمة .. دايرة شوية فرفشة و إنجمامة . المهم .. قلت ليهم الخميس برنامجو على أخوكم .. إنتو ناس ضهاري ساكت .. الريسين محلوقة صلعة و شباب مفتلين و عاجبانا نفسنا و.. كمان بمبات . يوم الخميس المغربية طلعنا من الكلية قاشرين .. و بوووو على بيت ( ح .خ ) .. لقينا الـ .. قلنا ليهو : الشغل مقفول .. بعد زي ساعة سمعنا الكواريك و القيامة الرابطة بي بره .. البت ( ك ) ولعت النار في راكوبة ( ح .خ ) .. النار زادت .. و من الراكوبة إبتدت تمسك في البرنده الجنبها .. السكلي ضرب .. و الحكاية جاطت .. حاولنا ننقف البلاعات و نكابس المزيرة و الماسورة و نطفي النار .. مافي فايدة .. الكلام ده و نحنا بي جوه البيت .. و أصوات الناس بي بره زايدة .. أتاري الحلة كلها مرقت , نسوان على رجال على شفع .. فتحنا الباب قلنا نخم من الرملة البره و نطفي النار .. ألاقي ناس حلتنا بي صمة خشمهم واقفين يتفرجو .. لا حاولوا يساعدوا و لا يتصلوا بالمطافي ( زعلة كده من البيت ده و نظام لقوا ليهم برنامج ) . فتحة الباب ألقى ليك صاحبك ( س ) وشششش .. كشّف لي مسااااااافة .. و فقعا ضحكة مع كم كلمة من كلامو الكعب .. إنتبهت إنو حلتنا كلها كانت بتتفرج على النار القايمة .. فضيحة .. قبل ما تاني يفتحوا خشومهم ( س ) و ( فيصل . ج ) و ( ح ) و ( حاج . ك ) كنت ناديت أصحابي : مخارجة يا وهم إنتو قبل المطافي و البُمبه . ليلة مهببة إنتهت بينا ناطين حيطة ناس ( أ . ن ) بي هناك بعد النار هدأت و الفي الراس إتلحس .. كملنا سهرتنا لا إيدا لا كراعا مع صاحبي .. إندفسنا فول .. و ونسة بايخة . لا لمينا في بلح الشام ولا عنب اليمن .