|
|
 السيجارة .... سفة التمباك ... الخمر .... من مقللات أمد الحياة على الأرض.
|
ندخل توووووووووووووووووش على الموضوع .وباللغة الدارجية
أولا يا جماعة ... ربنا دا خلق البنى آدم دا تام وفى أحسن صورة ..... ومجرد ما يفتح يقوم يعولق روحو. يعنى الواحد يكون موزون ..... شوية كدا يقوم يطبظ عينه بأصبعه ويفقّد راسو التوازن .... وبعد داك تبدا رحلة البحث عن التوازن وبصورة دورية ومتكررة طوال اليوم ..... هسى فى داعى لدا كلو..... يا بت جيبى الحقة (الحاء مضمومة ) يا ولد جيب صندوق السجاير ... يا بوى الولعة مافى .... طيب ما تجيب البوتجاز ...... سبحان الله ...... أسمع يا خينا تقدر تورينا رايك فى الزواج المبكر .... زى الساعة كم كدا يعنى ... لا حول ولا قوة إلا بالله .... شفتو الحالة دى .....
(يا أيها الإنسان ما غرك بربك الكريم (6) الذي خلقك فسواك فعدلك (7) في أي صورة ما شاء ركبك)
الآيات الكريمات من سورة الإنفطار
ولنا عودة
|
|
 
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: كمال سالم)
|
Quote: تحايا بعدد السجاير الذى دخنته ( 35 سنه )
|
حبيبنا كمال سالم .... لك تحياتى الحارة ..... وبكل صدق أنا عايز منك حاجة واحدة وتكون صادق معاى .... بس عاوز فى الـ 35 سنة دى ورينى متوسط تدخينك فى اليوم ... بتدخن كم سيجارة ... وبعدين عاوز أعرف سعر السجارة فى المتوسط عشان نطبق فيك نظرية الإقتصادالتجميعى ِAggregate Economicy عشان نوريك الحاصل شنو فى الخمس والتلاتين سنة دى . مهم جدا عشان نرد عليك..... بالحاصل.
.
.
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: الرشيد البصيلى)
|
الرشيد ,, كيفنك ,, شايف الموضوع بقى جد ,, وعايز تعملنى حاله جديره بالدراسه ,,
وحقيقه أنا حاله ميئوس منها لانو نظريتى ( الدخان قبل الطعام )
متوسط عدد ما أدخنه فى اليوم طوال هذه الفتره هو 15 سيجاره فى
اليوم , طبعا ( دى الحاله الوحيده المافيها عطلات ) .
سعر السيجاره طبعا بيختلف مع أختلاف الازمنه والامكنه والعمله ,
لكن خلينا نقول المتوسط لسعر السيجاره خلال الفتره دى قد يكون
7 سنت .
طبعا السعر ده بيشمل أبو نخله والبرنجى والبنسون وأخيرا المارلبورو ,
أنشاء الله الصدفه الخلتنى أدخل هنا الليله , تكون معجزه وسبب للاقلاع عن التدخين نهائيا ,
وربما سخرك الله بهذا البوست لى شخصيا ,,
ود بعدد انفاس السجائر الذى دخنته ( 35 سنه )
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: كمال سالم)
|
حساب طول السيجارة بالكيلومترات لمدة 35 سنة :
35 سنة = 420 شهر = 12600 يوم = 189000 سيجارة (6 سنتمتر طول السيجارة ) = 1134000 سنتمتر = 11.34 كيلو متر طولى يعنى سيجارة طولها المسافة ما بين الخرطوم جبل أولياء . تخيّل كل ما تشرب ليك مية متر يكون راسك داخ وتجى الناس تشيلك بالكرسى ويودوك على المية متر التانية .... لما تمرق من حدود الخرطوم الناس حتجى تخليك ويقولو ليك والله الحر دى إلا تمشى فيها براك ، أها مع الشمس الضارباك ديك وانت ماسك السيجارة زى بزة لبن ود الملاجئ .... الماضاق حنان أم .. لا حول ولا قوة إلا بالله.
طول السيجارة بصورة تجميعية = 11.34 كلم .
حساب ثمن السيجارة التى طولها 11.34 كم مقدرة بالدولار الأمريكى :
189000×7= 1323000 سنت = 13230 دولار أمريكى .
ثمن السيجارة بصورة تجميعية = 13230$ فقط ثلاثة عشرة ألف ومأئتين وثلاثين دولارا أمريكيا.
دا طبعا تمن عربية محترمة أو قطعة أرض فى الصالحة غرب أم درمان. وأنا عارف المغسة تكتلك لو الدولارات دى هسى ختوها قدامك كدا وخضوووووووور كدا ومعاك أم العيال البتعضعض فى سنونا على جنس البزار دا.
حساب الزمن المستهلك والمخصص لإستهلاك السيجارة لمدة 35 سنة مقدرا بالشهور:
نفترض ان السيجارة فى أكثر أحوالها تستغرق 4 دقائق.
189000×4= 525 يوم اى 17.5 شهر إى سنة كاملة وخمسة شهور وخمسة عشرة يوما.
الزمن المستغرق لتدخين السيجارة = 17.5 شهرا
تخيّل معى سنة وخمسة شهور ونصف الشهر أولادك شايلنك من ضل لضل وانتى ماسك فى السجارة لا غدا ولا عشاء يعنى اى زول يشوف دخان طالع يجى يلقى تحتو طوالى اخونا كمال سالم ..... سنة كاملة .... يعنى ولدك ولدهو وسمو ليهو وبقى ينضم وعمل ليهو رجلين وانتا الفترة دى كلها بتدخن بس وبتعاين ليهو .... ما فى اى شغلة تانية ليك غير السيجارة أم 11.34 كيلومتر دى. شفت كيف؟؟؟
حساب كمية النيوكتين التى أصبحت مكونا أساسيا فى تركيبة الدم مقدرا بالنسب المئوية:
نفترض ان الدم مقدرا بالسيسة = 600 وحدة. وإنه يتجدد بنسبة 95% كل سنة عدا النسبة المتروكة للنيوكتين تتزايد بمعدل 1% كل سنة . وعليه تبقى نسبة النيوكتين (النسبة الأولية ) + ( الزيادة السنوية لمدة 35 سنة ). تبقى 40% من دمك نيوكتين يعنى 600×40/100 = يعنى 240 سيسة من دمك ملوثة بالنيوكتين تماما. يعنى ينقلو منك دم لزول تانى ، يكون دمك شايلنو فى الحقنة ودخانو طالع زى عُصار إبليس ( التورنيدو) ، والناس كلها تكورك محمد معانا ما تغشانا.
ولانك أنتا يا كمال سالم زول ود ناس إستبعدنا بعض الإحتمالات الأخرى.
الإحتمالات الأخرى / الجبنة / الشاى / بقية المخدرات + الخمور.
النتيجة : لو ما خليت التدخين ..... ستموت واقفا بعد ثلاث سنوات .... وهذه نبوءة أعمل حسابك شوية . يعنى إحتمال كبير تصدق وتجى طق فى ميعادها .... عشان كدا بدل تيتم بأولادك أحسن تخلى الشغلانية دى .... وأنا كلامى دا بصدق قطع شك لو ما لقيت طريقة خليتو فى شهرين .... لأنو بعد الشهرين الجايات سيبدأ التدهور الفعلى ... والباب بتاع البيت يبقى ليك طشاش وتقوم تخش فى مراية الدولاب حتا تعرف إنو دا ما الباب.
يبقى الندم على القروش ، الزمن ، الصحة وتبدأ سكة نضيفة من التدخين لبيئة أفضل لقاطنى داركم الإعزاء.
....
... ونواصل
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: عبدالله كع)
|
يا ناس قولو بسم الله .... مالكم يا عبد الله كع عايزين تجننونى معاكم ..... يا زول قول بسم الله طيب لما انت بتدخن ليك فى اليوم 30 سيكارة انتا كدة ما بقيت فرن عديييييييييييييييييل .يعنى فرقك شنو من كماين الجريف .... أخير هى بحرقوا فيها الطوب ولكن انت .......
طيب يا عبد الله كع انا حسبت حساباتك ولقيتك تساوى = 2× كمال سالم . يعنى سيجارتك طولا الخرطوم الجيلى يعنى 23 كم طولى. والثمن مقيما بالدولار = 26460 دولار (لاندكروزر على الزيرو)
مع ثبات متغير المدة الزمنية حتى فترة حسابناهذه يعنى 35 سنة
كعب السجاير = 189000 سيجارة ×2 = 378000 كعب سيجارة يعنى ما يعادل قلابين سعة 16 قدم.
انت طبعا لو ما فرملت وعاينت للصندوق الجنبك دا بحنق وأديتو سلة المهملات لحدى ما المرة زغردت والوليدات قالو الليلة أبونا جنا..... حتمشى الحفرة سريع ....عشان كدا اى فرملة من اى سيجارة يعنى كرعيك بقو يثبتو من الإنزلاقة على الحفرة .... لكن انا عندى ليك مقترح ....
1- اولا قوم إتصل على كمال سالم وشيل رقم تلفونو .
2- إن شاء الله يكون واحد فيكم هلالابى والتانى مريخابى .
3- لو بقيتو الأثنين مريخاب انا برئ منكم .
4- بعد داك نعمل مبارة فى المقدرة على الصمود امام زولتكم السيجارة ... يعنى لما الواحد فيكم تغمز ليهو ما يرجف ويشد حيلو ويبقى راجل وينعل الشيطان.
الدورى دا حيستمر لمدة 3 شهور .
مراعاة للعدل والنزاهة . يكون التخلى تدريجيا بالنسب . بمعنى ان كمال سالم لو دخن فى اليوم 5 يدخن عبد الله كع 10 تنزل النسبة بعد مرور شهرين وخمس وعشرين يوم الى سيجارة واحدة فى اليوم ... وبعد 3 شهور نوقف تماما .....طبعا يا كمال سالم بتكون خشيت فى الطشاش كتير لكن بعد داك بكون فى ريكفرى سريع .....
بس ورونا متين يبدا الدورى .... الحريم عليهن بتوفير العصاير الطازجة لأنو الرجال بكونو ممكونين بلحيل ......والأخلاق قدام النخرة طوالى ودايرة زول يلكزا و أووف تطير .... وعلى النسوان كمان تحمل اى تصرف لا إرادى .... يعنى الواحدة لو جاها شبشب طاير ولا جزمة ... تكبر وتهلل وتحمد الله على الفيها النصيب الجاتا .ولازم يستخدمن الدبلوماسية العائلية فى تقديم الطلبات ....لأنو الشتارة هنا ما عندها محل ...... وأها يا رجالة بقينا على الكلام دا ؟؟ أرسو عليكم على بر .... وما تكونوا انانيين لان أرواحكم وصحتكم ليست لكم وحدكم ..... معاكم اتفال أقصد اطفال ودايرين مستقبل ....
تحياتى الحارة .... بدون دخان.
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: الرشيد البصيلى)
|
الرشيد , تحيه طيبه ,,
طوال فترة التدخين الطويله دى بقرأ وأسمع التحذيرات الناعمه عن مضار التدخين
لكن أول مره أسمع لى تحذير بالخشونه والنشاف ده .
وحقيقه مـن أمبارح وبعد ماقريت كلامك ده , طريقـة تفكيرى بدت تختلف , ودخلتنى
خوفه , معقول أنا شـربت لى سيجاره طولها 11 كيلو متر , وتمنها 13 ألف دولار ,
وسنه ونص وانا بشفط وأنفخ , وكمان باقى لى فى البسيطه دى 3 سنوات فقط , وخلال
شهرين حيبدأ العد التنازلى .
يازول والله لخبطتنى لخبطه شديده , وحميتنى النوم أمبارح, بالهلـوسه المسـكتنى
الليل كلوا .
الكيان مقلوب الان , والعقل والضمير والنفس الاماره وعلبة المارلبورو فى صراع
كبير وخطير وفتنه أشعلتها أنت , وأنا فى الانتظار لمعرفة من النتصر .
الرشيد
أسأل الله معى أن تكون الصحه والسلامه هى الغالبه , وأن يمدنى الله بالعزيمه
القويه للاقلاع عن التدخين .
1134000 من الود والمحبه ,,
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: عبدالله كع)
|
والله عندى ليكم جائزة لو بقيتو على الموضوع ...... وأنا جادى فى الكلام دا .... طبعا فى موبايلات أخر صيحة .... والموبايل لا يمثل اى حاجة ..... بس القيمة المعنوية البتأتى من أنو جاء نتيجة أجتهاد فى محاربة التدخين ...... وكلام رجال بجيب للفائز موبايل ببطارية solar system او Dupple P.source وكلو زى بعض يعنى الدبل سورس دا البطارية بتأخد 8 يوم .... اها رايكم شنو ...... وعهد بينى وبينكم وورونى شطارتكم ..... والكاس أو أقصد الموبايل بيكون بعد تلاتة أشهر بعد ما أطلع على النتيجة ونشوف الراجل منو ونأخد تقرير مفصل عن المتابعات والنتيجة النهائية ونعمل أحتفال وتسليم وتسلم ونعلن الإنتصار على على التدخين .... أما الثانى فى البطولة فله ساعة يد محترمة .... عارفين يعنى شنو محترمة يعنى ما بتدخن .....يا ستاااااااااااااااار كمان جابتلها شتيمة .... كان كدى خلينا التدخين ..... وكدى النشوف 
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: كمال سالم)
|
| Quote: الرشيد ولدي كان كدي عاد امك دومه من المعمرين |
أمسك قوى فى كلام عمتك دومة,
دا كلام مابتجدع بالساهل..
فيهو فلسفة وفهم عميق...
فالوفيات التى تحدثها السجائر والخمور والتنمباك
لايمكن مقارنتها بالوفيات الناتجة عن الحروب
وعن إنبعاث الغازات القاتله من المصانع والعربات
والطائرات ,
هذا غير النفايات التى تقتل الملايين وهى تجرى فى مياه
شربهم وفيما يأكلون..
عش حياتك طبيعيآ دون هاجس وهمى يضاف لرصيد هواجسك المتزايدة,
فالتبغ تنتجه شركات عابرة للقارات,
يهما الربح ,
كما أن الغرب كمجموعة شركات ضخمة لايهما سوى الربح,..
فالتلوث البيئ الذى يموت بسببه الملايين هو من جراء هذا الإستهلاك
الجشع لموارد الطاقه..
فيضانات وأعاصير وأمراض جديدة...
من مقللات امد الحياة على الأرض
هى تلك الرأسمالية الجشعة العمياء..
| |
|
|
|
|
|
|
|
|
|
Re: السيجارة .... سفة التمباك ... الخمر .... من مقللات أمد الحياة على الأرض. (Re: الجيلى أحمد)
|
Quote: أمسك قوى فى كلام عمتك دومة,
دا كلام مابتجدع بالساهل..
فيهو فلسفة وفهم عميق...
|
والله يا الجيلى يا خوى كلام دوما القالتو دا كبير وناهيك عن أنو هى معمرة لانها بعيدة من الخرابات دى لكن فى ذات الحال الزولا رياضية يعنى تسعطاشر دى أكيد حتكون زعلتا ..... وأنا خفت أقول تسعة ... تقوم تعتبرنى انا بنبز فيها ودخلتها لنطاق الأطفال.... وتجيك بعد داك الشباشب طايرة ... عشان كدا الوسطية..... أكان جانا قشر بصل فى على راسنا بنحملو .... وحتى جردل البلاستيك ممكن ...ودا كلوا أخير منو تسعطاشر سنة دى .... على الأقل مرتبطة فنيا بأخونا محمد عثمان
تحياتى ومودتى لك أخى الجيلى
| |
|
|
|
|
|
|
| |
الرشيد البصيلى
doma
كمال سالم
عبدالله كع
الجيلى أحمد
فيس بوك
تويتر
انستقرام
يوتيوب
بنتيريست