انت ساكن وين في السودان؟؟؟ خش ووصف لينا بيتكم

Quote: حكاية عجيبة يا دينق ياخ !!! يعني نحنا بس إتكتب لينا في منبر المحن ده يا نتكلم في السياسة و الهامش و قلقامش و الهوية و الجلابة و الحركة و المؤتمر و أوباما و هيلاري و الشعر و الوجد و الحب و اللواعج و الهم و المرض و الحروب و سيدي جا و سيدي فات و الجبهجية و الأرزقية و اليسار و اليمين و الخنصر و البنصر و العاك عيك !! يا كمان نتبلم نقعد و نراعي للمغسات جوانا و برانا و ما نقول بِغشم ؟؟ ونسة الله الواحدة دي مالا .. عيبا لي ؟؟ كاتمين نفسنا مالكم ؟ العضوة آمنة مرقت الناس من كتمة النفس المقنقنة في عناوين البورد ده من تالاهو لي تالاهو .. لا في زول جاي شايل فرارو معاهو يتكسر و للا يكسر ... و لا كمان زولاً غلط عليها و إتضايقت هي . المداخلات بتسوق بعض واحدة للتانية في ونسة حميمة و جميلة و بسيطة و سودانية لغاية هنا .. كتر خيرها آمنة مرقت الناس من تويرة النفس المستديمة و الجكة الساكننا بيها محل قبلنا . و آمنة دي غابت يومين بعيدة عن البوست بتاعا ده لغاية وصل الصفحة التانية بعدين ظهرت .. في غيابا كانت الناس بتجي و تتونس في لمة و لا أحلى .. بوستاتا التانية ما عندي خبرها .. لكنها ما وصلت لعدد المداخلات الفي البوست ده .. لو المسألة بكا و تكسر كان إتسوت في البوستات التانية معاها .. عملتوها السمحة و الجندر و الخيار و الفقوس و النضال و المؤامرة و سوركتي و شرك و اتهامات مبطنة .. و خليتو الناس تتضاير و تكش , و كيف و لماذا .. ما تمسخو طعم إنسانيتنا الله يخليكم , و تحملوا الحاجات فوق ماهي حاملة .. الغمز شين و محاصرة نوايا الناس جربناهو في البلد الخرابة دي من أيام عمك نميري ليوم الليلة دي و طفحناهو ياخ .. يا دينق .. أدخل هناك و إنبسط و أضحك و إتونس .. و فكها صرة وشك دي شوية .. إنت الحا تكون كسبان . ..... مصطفى سري .. حتى انت يا بروتس !! ( الإبتسام و الترويح و الحميمية حقت الناس بقت : تهمة ) .. أبشر بالخير . و تحيا التقدمية الإنكشارية