|
|
 Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ (Re: محمد عثمان الحاج)
|
تابع بقية المحاضرة الثامنة والأخيرة:
انشاء الله نقيف لهذا الحد لأنو دقو لي في الطريق أنو عندي ضيوف جايني من برة ووصلوا البيت فبس ما حبيت أنو أفوت المحاضرة انشاء الله، فإذا كان في سؤال سؤالين نجاوب عليهم ونجي نواصل الحلقات التانية.اتفضل. سؤال وجيه قال في عين بتاعة جن؟ في عين بتاعة جن. وأكتر عين يصاب بها الإنسان في الحمام مش الأدبخانة الحمام البتستحم فيهو ده. يعني من الغلط بمكان أنك تخش في الحمام ده وتنسى الذكر. ثانيا حتى لو ذكرت ما تخش الحمام ده وتتعرى أمك ولدتك وتستحم، طبعا ما أظن فيكم زول ما بتعرى كلكم ببتعروا صح؟ آي كلكم بتتعروا، ما جايبين خبر ساكت، الحتى دي خطيرة جدا جدا، لأنو انت لو قلت بسم الله اللهم إني أعوذ بك من الخبث و الخبائث بتطرد الجن أو الجن ما بشوفوك انت في داخل الادبخانة، يوم تجي تقول الكلام ده، في جن في الادبخانة دي، الجن ده ما بشوفك على الإطلاق بعمى عنك نهائي، ماشبوفك عشان يضرك ولا بتاع، لكن لو غفلت ما جبت الذكر ده في جنون بشوفوك، ويمكن يشوفوك في بضاعتك دي وتروح فيها شمار في مرقة زي ما قالوا فأعمل حسابك! يبقى تعمل شنو؟ تعمل ليك نكسي صغير، بتاع الملابس البترولية دي لأنو ما بمسك الموية كتير، تعمل ليك نكسي نكسيين تلاتة، صغار، عندما تجي تخش الحمام وتنزل لسروال الكبير تلبس النكس الصغير ده، تلبسو وأقلع ملابسك دي، استحم واغسل نفسك تماما، واغسل حتى السروال ده ذاتو الصغير ده معاك،خليهو صغير عشان ما يحتفظ بالموية كتير، اغسلو ودخل يدك بي جوه أغسل أي حاجة نت داير تغسلها، بعد ده انتهيت من الغسل ده أو حمام عادي، ألبس ملابسك الخارجية وأملص التحت ده، أملصو تمام وشرو خلي ينشف، شرو ختو هنا بره أي محل، ده خلي خاص للحمام، عشان ما تتعرى، أعمل حسابك ما تتعرى في داخل بيت الأدب، بيت الأدب ده أخطر محل يصاب به الناس بالجنون.
انت عندك طرف سؤال تاني؟ طيب علاج الرقية انشاء الله آيات كتيرة من الحلقة الجاية انشاء الله نجيبة مكتوبة مطبوعة، عشان الناس تقدر تنقل منها انشاء الله. الرقية الشرعية نجيبها مكتوبة عشان الناس تنقل منها بإذن الله تعالى. آيي، حافظنها لكن لو درنا نقولها كلها كتيرة جدا تاخد مننا زمن،نجيبها مطبوعة انشاء الله ونلصقها بس في البوابة هنا،أي زول يجي ينقل منها انشاء الله، بارك الله فيك، آيي، والجن بصيبك بالعين، الجن بصيب بالعين بالمناسبة، بصيبك بالعين، وكتير من عاهات الرجال وعقم النساء من عين الجن. والسرطان ده، السرطان الخطير ده، عين. السرطان عين. الأورام الخبيثة دي كلها ناتجة عن العين! لأنو في حديث للرسول صلى الله عليه وسلم:" أكثر من يموت من امتي بعد قضاء الله وقدره بالعين"، ده حديث للنبي صلى الله عليه وسلم، وانتو بتعرفو النبي ما بكضب: " والنجم اذا هوى ما ضل صاحبكم وما غوى. وما ينطق عن الهوى. إن هو ..." إذن المقابر دي إذا كان جيت لقيت فيها مية شخص، اتأكد سبعين تمانين شخص ماتوا بالعين ولا واحد يعرف أنو فلان ده كتلتو العين على الإطلاق. هسع عارفين ليكم زول كده أصبتو عين كتلتو؟ ما عارفنو. لكن ده حديث النبي صلى الله عليه وسلم:" أكثر من يموت من أمتي بعد قضاء الله وقدره بالعين. (يساله أحد الجمهور) لا لا الرقية واحدة يعني ترقي من عين بشر ولاترقي من عين جن واحدة الرقية واحدة اللي هي آيات واحدة، آيات موجودة في القرآن، بارك الله فيك.
طيب. طيب. سوالو قال ما الفرق بين الجن المسلم والجن الكافر والشيطان؟ طيب الفرق بيناتهم أفهم تمام يا أخ، الشيطان ما فيهو مسلم إلا واحد، الشياطين كلهم ما بسلموا إلا شيطان واحد فقط، أعرف، لكن الجن، اللي هوالصنف الثالث من الجن، ديل ممكن منهم يكونو مسلمين ويهود ونصارى وغير دينيين، وشواطين، اعلم أن كل شيطان جن وليس كل جني شيطان والجن بنقسموا إلى تلاتة أقسام: شيطان وده عندو مهمة معينة: تضليل الناس عن الحق، ومن الصنف ده ذاتو من كان سليط وبارع في المشاكل ونشط في الفساد والخراب والمشاكل بين الناس والشحناء، اسمه مارد المارد ده صنف من الشياطين، زي ما ذكره الله سبحانه وتعالى:" .. زينا السماء الدنيا بزينة الكواكب. وحفظا من كل شيطان مارد" ده مارد. ديل ما بسلموا والقبلو الشيطان ده ما بسلموا. لكن الصنف التاني من الجنون ممكن يكون مسلم. الله هو العفريت. من كان بارعا ماهرا قويا عظيما قادرا اسمه العفريت، زي ما في سورة النمل: " قال عفريت من الجن" لسليمان "أنا آتيك به" الله يبارك فيك، ديل اسمهم العفاريت، ديل المسلمون. طرف السؤال التاني هلي يجوز نتعامل مع الجن المسلم عشان يعمل لي أشياء معينة؟ لا يجوز. لا يجوز على الإطلاق التعاون مع أي جن، أيا كان صنفه لابد من تدفع التمن غالي. مافيش تعاون حبا في سواد عيونك على الإطلاق، الشيطان أو الجنون ما بخدموك ساكت، لوجه الله تعالى أصلو ما بخدموك ولو كان الخدمة بيناتهم بين الانس والجن جايزة كان أولى بيها الصحابة وكان أولى بيها النبي محمد صلى الله عليه وسلم: "وإذ صرفنا إليك نفرا من الجن يستمعون القرآن"، ليه ما استخدمهم امشوا اعملوا لي كده اعملو لي كده، لأنكم انتو جنون امشو جيبوا لي خبر قريش امشوا جيبوا لي الناس ديل بتآمروا في شنو، امشوا ياخي أنحنا يوم نتكاتل معاهم اكتلوهم، ما حصل صحابي ولا رسول ولا غيرو اتعامل مع عالم الجن سلفنا الصالح ده كلو ما فيش انسان اتعامل مع عالم الجن، خالص لو كان الشي ده شرعي وصح كان هم اتعاملو بيهو.اذن ممنوع وما يجيك واحد سليط لسان فكي فلان ولا مولانا فلان ولا الشيخ فلان ولا أبونا فلان ولا الخليفة فلان يقول ليك أنا بتعاون مع الجنون المسلمين، أو بتعامل مع روحانيون أو بتعامل مع مسميات بسموها هم، ده الدجل ودي حيلة، وكذب وافتراء، أصلو مافيش تعاون بين الشيطان والانس لوجه الله تعالى. الانسان البدعي انو بتعامل مع شيطان مسلم ده دفع التمن هو، دفع التمن هو، لأنو الشيطان لا يستطيع أي انسان أن يملكه عشان يخدمك ساكت، وهو ما بخدمك ساكت، وبعدين الشيطان ده ما فوضى زي الانس، الشواطين والجنون زعامات، كل ناس تابعين لي ملة، وما بخدمو على كيفهم إلا بتوجيه من العفريت من الروحاني الروحاني ده زعيم، زعيمو يوجهو بخدمك سواء كان عفريت ولا شيطان ولا مارد. عندو زعيم بوجهو، هو على كيفو؟ ما على كيفو، إذن ما بخدمك إلا انت الزعيم ده تدفع ليهو التمن، بعد ده بوجه واحد من المسلمين ولا غير مسلم بقول ليهو اخدمو اخدمو، مسلم يعني ما زي البني آدمين يعني انتو قايلين اسلامو شنو يعني كم واحد يقول ليك أنا مسلم وينطق أشهد ألا لا إله إلا الله وأن محمدا رسول الله وبعد شوية بنقضها هم برضو بنفس الطريقة، وطرق كمان، وهابية وأنصار سنة وغيرو وغيرو كلو موجود عندهم، نفس الانسان وبفكر نفس الانسان، يعني ما يغشك يقول ليك انا بتعامل مع جن مسلم ما بضر لي زول وبستخدمو في الاعمال الخيرية الأعمال الخيرية عشان يجيب ليك قروش؟ هو عندو مصنع؟ ما بجيب ليك قروش بمشي بسرق حرامي سرقة. يجيب ليك قروش يعمل ليك سحر التخييل، جاب ليك قروش اديني عشرة الاف بذيك مية الف! البسوي الشغلة دي شنو؟ واحدين شياطين مسلمين. البنزل القروش ديل ياتهم؟ شياطين وجنون مسلمين. تتعامل مع واحد يقول ليك أنا بتعامل وبقلب ليك القروش ديل كلهم حرامية والإسلام ده وينو؟ الاسلام قال ليك انك تبقى حرامي؟ ما يغشك، ده كلو كلام معسول كان نغش بيهو الناس. غشونا بيهو وغشينا بيهو آلاف الناس، أنا بتعامل مع الجنون المسلمين، أنا بتعامل مع الروحانيون وكذا، ده كلام فارغ، مافيش تعاون بين الانس والجن بطريقة سليمة لأن الجن لا يملكه الانس أبدا، زول واحد اللي هو ملكهم ملكة مطلقة، غيرو لا، وحتى النبي صلى الله عليه وسلم كان في الصلاة مسك واحد. يوم مسك واحد وتذكر دعوة سيدنا سليمان ففكاه الناس خافو قالو يارسول الله شفناك هبشت كده بتسوي في شنو انت؟ قال ليهم والله جاني الشيطان بشهب من نار وقبضته من رقبته قال خنقتو حتى لسانو ده شعرت بالبرودة بتاعة لسانو، ولولا تذكرت دعوة أخي لربطته هنا لغاية الصباح عشان شنو الشفع يلعبوا بيهو انتو عارفين الكلام ده، بس بنذكركم، اذن ما يغشك وواحد يقول ليك أنا بتعامل مع الجنون المسلمين ما بضر لي زول لا ، ولا في واحد يقول ليك أنا بملك. أنا كنت بتعاون مع ميتين ستة وتمانين جن، من عفريت لي شيطان لي مارد. زمان بقول ليك بملكهم ويمكن عفوا كده تجي الكلمة أقول ليك أنا كنت مالك كدي، لكن مش مملكة يعني ملك أنا آمرهم من غير مقابل، مملكتي لهم بالتعاون فقط، أقدم ليهم أولا كفر وشرك بالله سبحانه وتعالى ثم يخدموني، يعني ما يغشك واحد يقول ليك أنا بتعاون مع جن مسلم، وتقتنع وتقوم تتعاون معاه، ده أعرفو أنه كافر وأعرفو أنه مشرك وأعرفه أنو قدم لابلبيس وجنود ابليس عفاريت وروحانيين وغيرهم الخدمة الصحيحة البحبوها هم وكل ما انسان بقى يتعامل مع الجماعة ديل اتاكد أنه بعيد عن الله سبحانه وتعالى، وقريب من الشيطان فما فيش تعاون، وما يغشك يقول ليك بتعاون مع جن مسلم، هل يجوز التعاون مع الدن المسلم مثلا يعطيك أموال؟ نفس الكلام القلناه، يعطيك أموال بجيبها من وين؟ بسرقها حرامي.
بارك الله فيك. (يرد على أحد الجمهور) ده الشيخ البرعي قال كده؟ أنا ما عارف الكلام ده؟ الشيخ البرعي ذاتو قال ليك كده، الزول الكاتب السؤال ده؟ (أحد الجمهور يسأل ولكنه لايذكر شيخ البرعي) طيب بارك الله فيك. ده افتراء ودجل وكضب. الشيخ ده كضاب. عشان كده أنا بنحذر الناس، قال هناك شيخ يدعي أنه يتعامل مع جن مسلم ويعالج به الناس ويتعامل معه لمصلحة المسلمين، ما نفس الكلام القالو الأخ ده، يقول ليك الجن الخيري، ياهو جن خيري جن مسلم بتاع، المسميات بسموها الناس، ده مافيش كلام بالشكل ده، خالص مافيش كلام بالشكل ده، بعدين الرقية دي، أنا غايتو من رايي الشخصي ده مش شرع ولا سنة لكن من رايي الشخصي، العارفو في عالم الجن والشياطين والعرفتو في الرقية وفتن الرقية اي انسان لا يرقي إلا يتجاوز عمرو الخمس وأربعين فما فوق، أعمل حسابك، دون الخمسة وأربعين أعمل حسابك، أعمل حسابك من عالم الجن والشياطين دي نصيحة من خلال تجاربي أنا مع عالم الجن والشياطين. أولا الرقية دي فتن. الرقية دي في حد ذاتها فتن. أكبر فتنة للانسان تضللو الرقيةالشرعية. لآنو بمروا بيك النسوان، ومشكلة النسوان دي إلا من رحم الله، إلا كان ما عندك نخوة بتاعة رجولة، أنحنا المسألة دي ما جربناها، كنا في الشياطين جربناها والآن في الحق جربناها ولقيناها أكبر فتنة للناس الرقية الشرعية وخاصة الناس البقولوا أنهم سنيين وناس موحدين أنا أنصح أنو أي شاب ما يرقي إلا لأسرتو، إلا يتجاوز عمرو الخمسة وأربعين، ثم حتى الخمسة وأربعين ما يرقي إلا وهو متزوج. ومايرقي إلا في بيتو ذاتو بتاع الزواج، ومرتو موجودة، عشان كده شوية بتأمن شر الفتنة بتاعة الرقية والله الرقية دي فيها فتن لا يعلمها إلا الله سبحانه وتعالى، أحيانا تقوم ترقي لي مرة وتشوف مناظر ما بتصلح معاك، والشيطان للانسان بالمرصاد، يعني خلال التجارب ده والله امرأة قدام ناسها يحل فيها الشيطان تقوم تقابضك، قدام ناسها خلي انت، ما كتير من اخوانا الآن كانو سبحان الله كانوا عجيبين مرة واحدة الآن مية وتمنين درجة انتهوا خلاص، كانوا سنيين كانوا الواحد فيهم اذا كان لقى خطوط زي ده من شدة تشددو يقول ليك الخط ده كان في زمن النبي مافي أنا ما بصلي في الخط ده ارجعوا ورا ولا زحو من الخط ده، ده كان أسلوب قبل ما يعمل الرقية وقبل ما يرقي الآن يركب ومعاهو مرة وما زوجتو والغنا في عربيتو يغني ويرقص ويلبس السبحة في رقبتو وطاقيتو خضرا ده الزول القبيل دي نهاية الكلام ده شاب والله الذي لا إله إلا هو فسد فساد ما بعدو، ظاهر أما الباطن ده الله به عليم، لكن ده الظاهر، حتى لو بيرقي زي ده جا وقت صلاة بفوت الصلاة لغاية ما ينتهي من الرقية حتى بعد داك يصلي، دي من فتنها، وده كان متشدد بطريقة ما عادية، الآن موجود عندنا هناك في بحري، وكتير من الإخوان الفتحوا باب الرقية دي والله إلا من رحم الله، باب الرقية دي بالمناسبة شر لأنو بجيب ليك عالم النساء وأكتر ناس متأثرين بمرض الجنون والشياطين النساء، وهم حيترددوا عليك، تجيك واحدة تسوق واحدة لا قريبتها لا بتاع فالمسألة دي دايرة ناس كبار شوية عاقلين ومتزوجين و.. و إلى آخره.
كويس دقيقة. وزي ما تكلمنا قبل شوية، أنو ما يغشك أي انسان، قلت ليك ده غش، اسألني أنا من الشغل ده، قال اسأل مجرب ولا تسأل طبيب، مافيش تعامل مع الشياطين والجن في أي مصلحة وبعدين باب الرقية فاتح موضوع تاني، أنا كنت برقي لامرأة بت ومعاها زوجها فرقيت ليها واستحضر الجن ده مثال للزول ده، استحضر الجن بتكلم معاي، وبعدين شوف، أنا ما بحب أنو أتكلم مع الشيطان، لآنو بعرفو بيعمل فتن، من زمان كنا شغالين معاهو عارفين فتنو، الآن عارفنو أكتر، اذا كان اتكلم معاي بقول ليهو اخرج ياعدو الله بإذن الله لا إله إلا الله محمد رسول الله ما بكترها معاهو، لو كترتها بكون هو برتاح لأنو كلامك ما بياذيه بتأذيهو الرقية، ويفتح ليك باب بتاع كلام عشان يقول ليك الشغلة دي هناك وكذا وكذا وكذا، وانت بتخلي القراية وبعده انت زي الانسان الخانقو خنقتو تمام قطعت روحو دي وبعد شوية فكيتو ما بياخد نفس بعد ده ممكن يقاومك، انت يوم تقرى ليهو ده خانقو لكن يوم خليت القراية فكيتو، بعد ده يقعد يراوغ معاك عشان يرتاح، بعد ما يرتاح عشان تاني يقدر يقاوم معاك يعمل خبايثودي، والشيطان ما بصدقك على الإطلاق وأي شيطان خش بواسطة سحر عملوه بواسطة سحر يعني طبوك وعملو ليك سحر ما بتكلم بالانسان الحقيقي العمل السحر ده على الإطلاق إذا كان الساحر حي، أنا السحر، جيتني انت عشان أعمل لي زيد ولا عبيد سحر، عملت ليهو سحر وسحرتو، ومشى انضر الزول ده، ومشو ودوهو لي فلان بقرا ليهو القرآن، بستحضر الجن، استحضر الجن، هل بقول السحر ده عملو فلان مشى لي شيخ حامد عمل ليهو السحر الكذا كذا الجن بتكلم بالكلام ده؟ ما بتكلم، ليه؟ بخاف. بخاف من منو؟ بخاف مني أنا لأنو لو نضم هناك قال في زول فلاني مشى لي شيخ حامد عمل الكلام ده الخبر بجيني اذا كان الخبر جاني طوالي بستخدم الشفرة بتاعة زعيمو، تعال انت ياخي تجيب لي زول يفتني مع الناس؟ ليه حصل شنو؟ زولك ده مشى قروا ليهو القرآن حصل كذا كذا يبقى داك طوالي برسل من خلفو بقطع رقبتو طوالي، أنا وديتك عشان تعمل فتنة ولا داير تخدم الشيخ ده.
عشان كده الجن برواغك وما بتكلم الكلام الصحيح، بيعلم الكلام ده من وين، بيتكلم مع قرينك، بيعرف من قرينك عندك فتنة مع زيد من الناس،بستغل الحتة دي، ينضم ويقول الساحر فلان و سوى كده وسوى كده ، وانت فعلا مع فلان ده عندك معاهو مشكلة، يبقى انت هنا حتجزم تماما انو الزول ده ما دام عندي معاهو مشكلة عمل الشغلانية دي، ده الجن بيرواغك هنا، المرة دي أنا قريت ليها القرآن واستحضر الجن ونضم وقلت ليهو اخرج بإذن الله لا إله إلا الله محمدا رسول الله ماداير معاك كلام، قال لي اصبر لي اصبر لي داير اخرج قلت ليهو طيب اخرج، اخرج وإلا بواصل قرايتي، قال ياخي قبل ما أخرج أنا داير اسلم، قلت ليهو تسلم؟ قال لي آيي، قلت ليهو انطق بالشهادة، قال لي كررها لي عشان ننطقها قلت ليهو قول أشهد ألا إله إلا الله وأن محمدا رسول الله، قال أشهد ألا إله إلا الله وأن محمدا رسول الله، نصحتو قلت ليهو الإسرم سمح والمسلم من سلم المسلمون من يده ولسانه والمسلم على المسلم حرام دمه وماله وعرضه، الآن انت أصبحت مسلم ودي مسلمة، يبقى حرام عليك بكل الجهات، تطلع منها، قال طيب أنا بطلع منها وإكراما ليك ودخلتني الإسلام وده كلام سمح وبتاع، شوف مراوغتو، وقال لي ياخي مادام أنا دخلت الإسلام وتبت لله سبحانه وتعالى أنا داير اتعاون معاك، داير تتعاوةن معاي؟ قال لي آيي، قلت ليهو طيب تتعامل معاي في شنو؟ قال لي شفت الدرج بتاعك ده، عندي درج كده الانسان بكون قاعد خلفو كده فيه درج، قال لي شفت الدرج بتاعك ده أي مريض يجيك دخل يدك في الدرج ده، بعد ما تقرأ ليهو دخل يدك في الدرج ده، بتلقى ورقة مطبوعة بتوريك اسم المريض ومرضو ده من شنو وفي تاريخ متين والآيات البتشفيهو والأشجار البتعينك في ذلك، قلت ليهو انت متأكد من الكلام ده؟ قال لي متأكد. ليه؟ قال لي عندنا أطباء أحسن من أطباءكم لأنو في بعض الأمراض في أشجار فيها خاصية بتسرع في العلاج، قلت ليهو أنا عارف الكلام ده، قال طيب أنا داير اتعاون معاك قلت ليهو مقابل شنو؟ قال لي لوجه الله تعالى، مـتأكد لوجهه تعالى؟ قال لي لوجهه تعالى، ما داير مني أي خدمة؟ قال لي ما داير منك أي خدمة، لا قريب لا بعيد؟ قال لي ما داير منك أي خدمة لاقريب لا بعيد، كل انسان يجيك هنا اقرأ ليهو أنا انشاء الله بحضر وبجيب دكتور ويشخص الحالة وتلقى ورقة مطبوعة في الدرج ده. قلت ليهو طيب عشان نعرف المسألة دي لوجه الله تعالى أنا الان ما قدمت ليك أي خدمة، قال لي انت ا لآن قدمت لي خدمة، خدمتي القدمتها ليك شنو؟ قال لي دخلتني الإسلام، قلت ليو كويس طيب الآن أنا داير أعرف المرة دي مريضة بشنو؟ قال لي دخل ايدك في الدرج فتحت الدرج دخلت يدي لقيت ورقة مطبوعة قريتها، لقيت اسم البت البنقرا ليها دي ذاتها، ومتين اتزوجوا، وراجلها ده اسمو فلان، وساكنين في الحتة الفلانية ومريضة من الزمن الفلاني وحاصل حاصل حاصل، من الآيات سورة البقرة الآية رقم مية تلاتة وسبعين وميتين خمسة وخمسين وميتين ستة وتمانين وخمسة وتمانين وىل عمران كده كده كده، الايات كده ذكرها لي كلها مطبوعة جاهزة بالكمبيوتر، طلعتها قريتها، سألت زوجها ده قلت ليهو انت اسمك فلان؟ قال لي آيي. وهي اسمها فلانة؟ قال لي آيي، ما أنا ما قاعد نسأل عن الأسماء، وصاح المرض كذا وكذا، قال لي الكلام ده كلو صاح، سكنين في الحتة الفلانية قال صح، قلت ليهو طيب، شفت الآيات ديك حفظتها كويس والورقة مطبوعة وعرفت الشياء البتعالجها من الأعشاب، طبقت الورقة دي وختيتها في جيبي وقلت ليهو ياخي داير من الحقيقة؟ قال لي آيي، قلت ليهو أنا ماداير اتعاون معاك لا في خير لا في شر، هم شي انت تطل من المرة دي، وخليني أنا ومرضاي أعالجهم ربنا يشفيهم أو مايشفيهم مادير منك أي خدمة، لأنو بنعرفوا هو نصب لي شرك بعيد جدا وذكاء منو دي حيلة وخطة بخططهاا من هنا عشان أنا أقع في المستقبل في الشرك بتاعو، ودي قد تفوت على كتيرين من الناس يعني قد يكون انسان ما عندو خبرة قديمة مع الشياطين ويقول ليهو لوجه الله تعالى ويستدرجو بي طريقة ملتوية ذكية، وفي أنو في مثل يقول ليك من كان أكبر منك يوم واحد أعلم منك سنة فما بالك الشيطان ده أكبر منك بتلتمية اربعمية خمسمية ألف سنة، بكون خبرتو زي خبرتك؟ لا. ده استدراج، أخيرا يوم قلت ليهو أنا مادايرأتعاون معاك وبس أطلع من المرة دي قال لي انت يا الكلب، بنفس الصورة، شفت قبيل بتعامل معاي كيف وبعد ده قال لي انت يا الكلب.. انت يا الكلب, أيوه.. طيب انت ليه قبل شويه قلت أنا بتاع، فيا دوب اتأكدت أنو فعلا نصب شرك معين وفشلت خطتو عشان كدي شتمني، وإلا ما مافي لزوم للشتيمة والكلام الفارغ لو هو كان صادق، فدي مدخل من مداخل الشياطين البغشوا الناس حتى البرقوا، قد يقول أنا مسلم وأسلمت على يديك، وخرجت عشانك، و.. و.و كلام سمح كتير جدا، وأناحأتعاون معاك، وبعد شوية يستدرجك يدخلك في متاهات ما أنزل الله بها من سلطان، فنسأل الله العفو والعافية.
اللهم علمنا ما ينفعنا، وانفعنا بما علمتنا نعم؟ (يسأله أحد الجمهور) سبحان الله ده كلام غريب شوية انت مافرقت، أنا قلت الرقية، والأخضر ده شنو؟ الخضراء دي شنو؟ آيي نعم أيوه ده الكلام ده أنا قلتو شنو ما قلت ليك ده كدين وسنة لا، قلت ليك من رأيي أنا الشخصي، من رأيي أنا الشخصي وتجاربي سابقا مع عالم الجن والشواطين والآن بعد الهداية تعاملي مع عالم الجن والشواطين وخدعتهم للناس، وعرفتي ليهم وفتنتهم وخاصة للشباب، بننصح من خبرتي، (يستمر أحد الجمهور في طرح الأسئلة) بارك الله فيك فأنا من تجربتي بقترح أنو الإنسان دون السن دي خلي يرقي لأسرتو في البيت لكن كونوا يعمل ليهو محل عشان يرقي الجاي والماشي والطالع والنازل المسألة دي فيها خطورة، خطورتها في الآتي الكلام الذكرتو قبل شوية، فتن ما أنزل الله بها من سلطان، وخاصة الإنسان يكون شاب، الجن يعني قادر يعني يفتنو، لكن الانسان يكون كبير زينا كده وبعد عمرنا ولي غادي يعني المسائل دي ذاتها هو شبع منها وشوية كده بكون عاقل شوية، ومرتو جنبو وأولادو جنبو ما بكون زي الشاب، وخاصة الشاب اذا كان بقى شاب وعازب، فالمسألة دي فيها خطورة. لا لا أنا ما بنفي أنو ما يجيهو ضرر لكن بنقول انو السن دي يعني سن في الحاجات الزي دي أعقل من الشباب يعني هسع يوم يجيبو شاب عمرو سبعتاشر تمنتاشر سنة معاي أنا عمري خمسة وخمسين سنة بكونوا سوا؟ فيها فتن أيوه فيه فتن، كدي أنا بنتفاهم معاك لأنو هنا في اسئلة كتيرة (سؤال من الجمهور) قال عالم الجن بعد خليتهم وشغال ضدهم هل مستعدين أت يؤذوني؟ مستعدين للآن وباكر وبعد باكر إلى أن أموت، عداء ما عادي لكن ماني خايف منهم أبدا بل هم بخافوا مني، انشاء الله، أنا ما بخاف من عالم الجن والشواطين، بارك الله فيك.
ياخوانا الاسئلة دي ما حقو ... هل الجن أو الجان يضرب صاحبه اذا كذب عليه في شئ يريده؟ لا ما كل جن بضرب جن الزعماء هم البضربوا، آيي بضربوا، ما هو تابع ليهو، هو زعيمو لو رسلو لي حتة معينة عشان يشتغل فيها ورفض ولا لف ودار مش بضربو بكتلو، يكتلو نهائي عشان كده الجن حريص وأطوع لزعمائهم من الإنس لأنو الجن إذا كان عاقب بعاقب بالموت ما بعاقب بالسجن ولا بتاع ولا كدي، عشان كده بخافوا جدا وطاعتهم عمياء لزعمائهم. بارك الله فيك.
اللهم علمنا ما ينفعنا، وانفعنا بما علمتنا، وارزقنا علما ينفعنا، وعملا يرفعنا استر عوراتنا آمن روعاتنا اللهم اجعل جمعنا هذا مرحوما واجعل تفرقنا من بعده معصوما، ولا تدع فينا و لا بيننا شقيا ولا محروما، أوردنا حوض نبينا ، اسقنا من حوضه شربة لا نظمأ بعدها أبدا، والسلام عليكم ورحمة الله وبركاته.
|
|
 
|
|
|
|
|
| العنوان |
الكاتب |
Date |
| هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:33 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Salah Abdulla | 02-10-08, 06:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:20 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | ismeil abbas | 02-10-08, 08:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Abdel Aati | 02-10-08, 09:44 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Yasir Elsharif | 02-10-08, 10:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:37 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Hatim Salih | 02-10-08, 11:02 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:53 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-11-08, 01:07 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-11-08, 08:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:01 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:03 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-13-08, 09:50 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-14-08, 06:50 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | amir jabir | 02-14-08, 09:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-18-08, 08:57 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:14 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | سيف النصر محي الدين محمد أحمد | 02-18-08, 06:55 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | AMNA MUKHTAR | 02-18-08, 07:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 03:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | خرماج | 02-19-08, 02:29 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:03 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 03:57 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | abubakr | 02-22-08, 04:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:11 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | صباح حسين طه | 02-22-08, 08:42 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:21 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:23 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 06:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:35 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 08:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 04:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 05:31 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 00:55 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 01:00 AM |
|
| |
فيس بوك
تويتر
انستقرام
يوتيوب
بنتيريست