|
|
 Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ (Re: محمد عثمان الحاج)
|
المحاضرة الخامسة
كيف يسحرونك
حامد آدم
بسم الله إن الحمد لله نحمده ونستعينه ونستغفره ونعوذ بالله من شرور أنفسنا وسيئات أعمالنا، من يهد الله فهو المهتد ومن يضلل فلا هادي له، وأشهد ألا لا إله إلا الله وحده لا شريك له، وأشهد أن محمدا عبده ورسوله، يا أيها الذين آمنوا يا أيها الذين آمنوا اتقوا الله حق تقاته ولا تموتن إلا وأنتم مسلمون، يا أيها الناس اتقوا ربكم الذي خلقكم من نفس واحدة وخلق منها زوجها وبث منهما رجالا كثيرا ونساء، واتقوا الله الذي تساءلون به والأرحام إن الله كان عليكم رقيبا، ياأيها الذين آمنوا اتقوا الله وقولوا قولا سديدا، يصلح لكم اعمالكم ويغفر لكم ذنوبكم ومن يطع الله ورسوله فقد فاز فوزا عظيما.
وبعد
فإن أصدق الحديث كتاب الله وخير الهدي هدي محمد صلى الله عليه وسلم، وشر الأمور محدثاتهاوكل محدثة بدعة وكل بدعة ضلالة وكل ضلالة في النار أعاذني الله وإياكم من النار.
وبعد السلام عليكم ورحمة الله وبركاته.
موضوع محاضرتنا اليوم انشاء الله كيف يسحرونك، لكن الجمعة القابلة انشاء الله أهم المحاضرات دي، وهي كيف بنعلم الغيب، كيف كنا بنعلم الغيب، ودي مهمة جدا عشان الناس تجي تتابعها الأسبوع الجاي انشاء الله،أما اليوم كيف يسحرونك أو كيف كنا بنسحر الانسان، زمان يوم كنا شغالين الشغل ده بنسحرك كيف، بجينا عدوك أيا كان هو، والعدو أحيانا بعيد منك وأحيانا من داخل البيت، وأكتر الأعداء من داخل البيت، يوم يجينا عدوك أيا كان هو من داخل البيت أو من خارج البيت، بنطلب منه أشياء معينة، أيوه مالك داير منو شنو والله أنا ياخي جيتك للغرض الفلاني، المصيبة الجاء من أجلها، فأول شي بنسألو أو بنطلبو منو بنقول ليهو الزول ده اسمو منو، بنطلب اسمك، الزول ده اسمو فلان الفلاني، لا ما دايرين فلان الفلاني، اسم أمو منو، اسم الأم، دي علامة من علامات الساحر، أي زول مشيت ليهو سألك من اسمك واسم أمك ده ساحر، اسم أمو منو، وليه الاسم بتاع الأم؟ كلنا معروفين فلان بن فلان في البطاقات وفي الجنسيات وفي غيرها، إلا مع الشيخ، اسمك واسم أمك، ليه اسم الأم؟ لأن السحر إذا ذكروا لي اسمك واسمك ده ما هو حقيقي لأنو اسمك الأصلي مع اسم الزول المنتمي ليهو، اذا كان ما بقوا حقيقيين، الزول ده ما أبوك حقا، السحر ما بكون فيك مكرب، ليه لأنو في شي أنا بنعملو يجب أنو الكلام كلو يكون صحيح، أول ما سألت من اسمك بنسأل من اسم أمك لأنو دايما الحتة الفيها الرخو دي ما بندورها، دايرين الحتة المتينة، وجانب الأم بالنسبة ليك أقوى من جانب الأب، بالنسبة لينا نحنا، لكن لو أبوك ده هو حقيقي وذكرو اسمو وهو حقيقي السحر بكون فيك مكرب، تمام التمام زي ما أنحنا دايرنو، لكن الحتة دي عشان أنحنا متخوفين نفشل ومتخوفين أنو فكي فلان ولا الشيخ فلان ولا القطب ولا أبونا فلان دعوتو ما مستجابة والله سوى لي الشي الفلاني ما بقى لي صاح ولابتاع ولا سيبك ياخي، عشان الحتة دي أنحنا حنضع ليها حساب، لازم نسألك من اسم أمك ليه؟ لأنو حأجمع حروفك عندك كم حرف في اسمك طبعا عارفها انت، يوم تقول لي اسمي فلان بنعرف حروفك كذا، أيوه طيب اسم الأم لأنو جانب الأب حش، ليه لأنو دائما جانب ابن الحرام بجي من جانب الأب، ما من جانب الأم، أمك الولدتك لا شك فيها على الإطلاق، لكن أبوك الله أعلم، أمك مع صباها ده يمكن لقطتك من أي فحل ماشي في الشارع وما أكثر الفحول الآن في الشوارع ماشين، فعشان الحتة دي أنحنا حنعمل حسابناعشان ننجح في شغلنا ده، لحتة الفيها الرخو دي لا، دايرين الحتة المتينة، اللهي شنو الأم، بنجمع حروفك وحروف أمك بنجمعهم كلهم، وبنشوف الحروف المتكررة في الاسمين، الألف الباء التاء الحروف الأبجدية كلها، هل في حرف من الحروف دي كلها متكررة فيك انت وأمك، أيوه نعم، لا مافي، لو مافي انت جيتني بي ياتو يوم، اليوم الجمعة بنشوف كلمة الجمعة، بنشوف كلمة الجمعة من كم حرف هل الجمعة دي في ا حرف منها متكرر فيك انت وأمك؟ لأ. بنجيب الشهر. ما بطلع من ديل إلا بألقى حروف متكررة فيك انت واسم أمك طوالي، اسمك اسم اليوم اسم الشهر لابد من ألقى واحد من الكلام ده بل لابد نرجع للساعة ذاتها، يبقى هي الظهر الظهر، العصر العصر، المعرب المغرب، أيوه، العشاء العشاء، بنلقى حرف واحد هنا موجود فيك انت وفي أمك، بنشوف الحروف دي الحرف الموجود ده، انت شنو، عندنا الحروف مقسمنها على أربعة: حروف مائية وحروف هوائية وحروف نارية وحروف ترابية مش الترابي ترابية بنشوف الحرف الاتكرر فيك انت وفي اسم أمك أو فيك انت وفي اليوم أو الشهر، أو الساعة ياتو حرف من الحروف دي، بقى أنا بعد ما عرفت حرفك ده شنو، مثلا انت ناري، فلان الفلانية دي ناري أو فلان الفلانية دي ما فيش ليها طريقة، اليوم إلى آخره.
خلاصة المسألة بنقسمها بنشوف هي شنو، لقيت ناري بعد ده بطلب طلباتي، وقبل ما أطلب طلباتي في شفرة بنعملها وحكيتها قبل كدي، بقدم للراجل اللي كان أو الجن زعيم الجنون اللي كانوا شغالين معاي اللي هو سهسوبي بناديهو فبعد ما ناديتو جا بشوف الزول ده، بقول ليهو ياخي الزول ده ـ والكلام ده انت ما جايب ليهو خبرـ ولا بتشوفوـ الزول ده داير كذا وكذا وكذا داير أسحر ليهو زول كذا وكذا وكذا، أو بس يعني داير أطب ليهو زول كذا وكذا أو داير يعمل ليهو الشي الفلاني، أعمل شنو؟ سهسوبي بستدعي واحد آخر عشان يقوم بالمهم دي، بقول ليهو طلباتك، طلباتك أيوه، طيب ياخي أنحنا دايرين تيس رقبتو كذا، وصلبو كذا وشكلو كذا، أيوه وما يقل من العمر الكذا، أو دايرين لينا ديك أحمر أو أخضر أو كذا أو كذا، دايرين لينا ديك خصي، دايرين لينا بتاع، أيوه، بنقول ليك ياخي أنحنا دايرين دم، دم، دم يعني شنو؟ يعني كرامة ده البتفهموانت كرامة دايرين لينا دم، لآنو المسألة دي ما بتتحقق إلا نضبح دم، انت حتوافق، بتظبطو لي بظبطوا ليك، بس تجيب لي الضبيحة، تمشي تفتش التيس اللون الفلاني الديك الفلاني الخروف الفلاني تجيبو لينا، بعد ده دايرين فكة دايرين البياض، واذا كان اتحقق الأمر ده حقنا كده، ومن حقنا ذاتو تدفع لينا جزء منو، دي كلها طلبات بنقولها ليك، بعد ده انت حتمشي تجيب لينا أشياء معينة، ده اذا كان انت ناري، في النهاية انت ناري أنا بعمل أشياء فيها طلاسم بعد التقربات دي وبعد الشغلانية دي وتحرق في طواسي أو أواني النحاس يجيبو اناء من نحاس يضعوهو في النار بنعمل وريقات فيها الطلاسم اللي كان شوفتكم ليها هنا دي، وبنكتب اسمك واسم أمك انت المضرور، المطلوب ضرك ده، اسمك واسم أمك وبعد ده بالليل أنا بقوم بالمهمة دي، بقوم بشيل بتاع النحاس ده بختو في الجمر وبجيب الوريقات دي بقلي فيها، على حسب الطلب، فانت بتنقلي زي ما أنا بقلي في البتاعات دي، تنقلي، طيب انت مائي بنعمل شنو؟ بنعمل نفس الطريقة وبنفس الشروط قد تختلف من ديك لتيس لبتاع لي بتاع لكن نفس الأسلوب، في النهاية بنعمل وريقات نكتب فيها أسماء ونكتب فيها اسمك واسم أمك، ولابد تربط في حجر وتوضع في أماكن الماء الراكده، حتة فيها بير متروكة، سانية ولا البحر ده ذاتو بشرط أنو يكون مربوط في حجر عشان الحجر ده يشيل السحر ده ينزل بيهو تحت الموية وما يطلع بره خالص لأنو لو طلع بره عرضة للناس يقوموا يفتحوهو ولا يلقوهو ده شنو، فإذا كان فتحوهو طلعوا منو الحاجات دي السحر بنفك منك، أنحنا بنختو في محله عشان السحر ما ينفك، في جوه الموية تحت، طيب لقيناك هوائي بنعمل شنو؟ بعدين بتاعة المائي دي دي الطريقة السحروا بيها النبي محمد صلى الله عليه وسلم، هو مائي عشان كدي عملو ليهو السحر ودخلوهو في البير جوه تحت وعصرو بي حجر، والقصة مشهورة عندكم، طيب انت هوائي بنعمل شنو؟ بنجيب اسمك ونكتب أشياء معينة وبنطلب خيوط من آثارك ثم بنعقد وبننفث، ومن شر النفاثات في شنو في العقد، بنعقد وبننفث وبنقول كلام معين وبنعقد سبعة عقدة عشرة عقدة عشرين تلاتين أربعين على حسب الفكة المدفوعة، خلاصة المسألة ده يختو وين؟ بنقول ليك تقبض ليك حمامة ولا ود أبرق ولا أي شي طاير، تمشي تسعى تجيب لينا البتاعة دي، حتمشي تجيب لينا حمامة ولا حمامتين ولا تلاتة بي شكل معين جزء منها بنضبحو وجزء منها ما بنضبحو بنقوم نربط العقد دي في الطاير ده في حتة معينة صغيرة وبنفكو عشان يطير بعدين انت بتطير زي ماهو طار، ده انت هوائي، طيب انت ترابي بنقوم نعمل نفس الطريقة وتدفن هذه الخزعبلات في المقابر المهجورة، مقابر مهجورة، طبعا القصة الزمان قبل سنة ولا سنتين صاحبها أنا، قصة المرأة الدخلت السحر في خشم الجارة الميتة وشالوهو الرجال دفنوهو في المقابر، وهذه المرأة حجت البيت مرتين ولم تر الكعبة وطافت بها، قصة مشهورة جدا وكان المسؤول منها الأول اللي هو الدكتور عبد الحي يوسف، المسألة دي زمان كان في ناس عارفنها، طيب ديل الأربعة طيب أنا عشان أعمل ده شنو وليه الضبيحة دي؟ أول حاجة الصبيحة دي بطلبها مني الجن القايم بالشغلانية، طبعا انتو ما بتعرفوها بقول ليك كرامة صدقة، أيوه تصدق أعمل ليك كرامة، هي ماها كرامة وان كانت هي كرامة لكن كرامة ما لله، لغير الله أي الذبح لعالم الجن والشياطين، لأنو المواصفات بطلبها الجن، وانت على حسب وهمك وعلى حسب جهلك بدينك بتقول أنو الزول ده طلب كرامة لله ودي صدقة بتتقسم لأ. هي ما بتتقسم. وصحي بتتقسم لكن تتقسم بين منو ومنو؟ بين الضعفاء والمساكين؟ لأ، بين الشيخ اللهو أنا وبين الجن وانت ما عارف الشغلانية دي، أنا يوم أجي أضبح عندي شروط، يوم اجي أضبح لابد أن أعضي معدن وأصم شفتي أول حاجة أعضي حديدة، وأصم الشفتين دي، والحديدة تكون بي جوة وأصم الشفتين ديل، وأجي أذبح، ليه؟ عشان في كلام أنا ما أقولو، ولكن انت ما جايب خبر، عشان ما أقول بسم الله الله أكبر، وده حرام، ولا تأكلوا مما لم يذكر اسم الله عليه، دي واحدة، وبعد ما أنا ضبحت بنفس الطريقة دي، وأي انسان شيل ليك أي حاجة عضيها بسنونك ثم صم شفتيك، ولا تستطيع أن تقول بسم الله الله أكبر على الإطلاق، جرب الشغلة دي، ومش تعضي ليك شي، والله لو كجرت سنونك كده بس وعضيت خشمك لا تستطيع أن تقول بسم الله الله أكبر، ما بتستطيع جربها شوفها ما بتستطيع، يبقى أنا بضبحها بغير اسم الله، حرامة، الحرام التاني فيها وانت ما جايب ليهو خبر بلقي الدم، الدم أنا بشيلو، بشيلو بكبو في المحبر، الدوالية المحاية البتشربوها دي، بنكبو فيها بنخلطه بيها، ده دم نجس حتى لو قلت باسم الله الله أكبر هي حلال والدم المسفوح ده نجس، يعني أنا بشيل الدم ده، بأي حال من الأحوال نجس الدم ده، بنكتب بيهو آيات من القرآن، أول آية تقريبا بنكتبها بيهو بسم الله الرحمن الرحمن الرحيم، وبعد ده تلقى الصلاة على النبي صلى الله عليه وسلم، وبعد ده تلقى الكتابابت الموجودة التانية، أي آية أي سورة بنكتبها قد أكتبها بزيادة حروف أوبنقصان الحروف عمدا، مش جهل، لأ، عارف أنا بسوي في شنو، وبكتبها أحيانها بي حروف مقطعة، ويمكن الحروف أعكسها أسوي الأول آخر والآخر أول والفي الوسط في النهاية لخبطة، حتى اسم الله ما بنكتبو الله، لازم الاسم ده نلخبطو الهاء نسوي في النص، ولا سوينا في البداية ولا سوينا في الحرف التاني وحولنا الحرف التاني، المهم ما بتلقاها صحيحة، وأحيان بتلقى بعض الكلمات صحيحة لكن في لخبطة تانية وياها دي الحجبات موجودة عندنا تعلوا أي حجاب تختاروهو أفتحوه شوفوا الكلام ده صاح ولا ما صاح، والبخرات وغيرها، طيب بعد ما أنا عملت ده كلو،بذبح شلت الدم كتبت بيهو الآيات، بي طريقتي الأنا نعرفها أو بالتوجيهات التي أوجه بها، بعد ده الثر البطلبوا منك عشان تنضر أهم أثر عندنا شعر المحسن، شعر محسنك ده أهم شي، وكتير من المربوطين مربوطين من شعر محسنهم، ده أهم أثر منك، طيب واحد، نمرة اتنين لشعر المحسن شعر الاباط، نمرة تلاتة شعر الراس أو الدقن، أربعة الأظافر، أضافرك ديل، خمسة، ده كلو مافي أي شعر من جسدك، ده كلو مافي دايرين من الأشياء المحتكة بيك، وأهم شئ محتك بيك انت أنحنا بنستفيد منو النكسي الصغير الداخلي، الداخلي ده، ده أهم شي عندنا، طيب غيرو : الفنلة، غيرها : العرقي. غيرها الجلابية البنطلون الكرافتة، البدلة بتاع ده كلو مطلوب، ده كلو ما لقينا ليهو طريقة بنقول ليهو ياخي تابع لينا الزول ده محل ما ماشي تابعو، في متيم في فرحة في كره في شغل في بتاع، مش عدووك؟ أيوه، تابعو شوفو من بعيد لو جا في صلاة ولا في غيرو طلع نعالو دي فجغ الواطة كدي، تعال براحة كأنك داير تطلع نعالك، ولا شوكة طعنتك دايرتسوي، ولا داير تصلح نعالك ولا داير في حاجة تلقطها تجدعها، خم لينا تراب براحة كده دخلو في جيبك جيبو لينا منو، حيتابعك برضو ده أسلوب، في النهاية دي كلها ما لقيناك ليك ليها طريقة بنعمل نظام أخير، برضو انت ماك نجيان مننا بس ربنا ما يسلطنا عليك، خبرة زي ده قليلة بكل صراحة، خبرة بالطريقة دي قليلة، والحمد لله بقت قليلة، والله في ناس بنعرفهم لو بعرفوا الخبرة دي يلخبطوا الواطة لخبطة ما عادية، أعوذ بالله من ناس زي ديل، فدي في النهاية بنعمل شنو؟ فشلنا من كل شي محتك بيك، بنقول ليهو ياخي تجينا في يوم معين بنعرفو في الأسبوع، عندنا يوم معين، ده يوم بتاع السحر معروف من قديم الزمان، وحتى بتاعة التراب موجودة في القرآن أقرا القرآن ده بتلقاهو: فقبضت قبضة من اثر شنو؟ من أثر الرسول وذلك سولت لي نفسي، موجود في القرآ الكلام ده ، زمان الشغلة دي قديمة ما جديدة.
طيب خلاصة المسألة بنعمل شنو؟ في يوم من الايام بتاعة الأسبوع هذا اليوم لا يعود إلا في الشهر الجديد، الأسبوه معروف السبت الأحد الاتنين التلاتا الأربعا أو الجمعة السبت الأحدالاتنين الثلاثاءالاربعا الخميس أيوه عندنا يوم عارفنو ده يوم معروف لدينا، ما دايرين نقولو ياتو يوم عشان الناس ما تفتش تلقاهو، فعلى كل عندنا يوم معين تجيني بالليل، أول ما الشمس غابت والدنيا ذاتها آخر شهر مضلمة أيوه ضلام، واليوم ده ما بعود إلا في الشهر الجديد، يبقى بتجيني بالليل بنعمل محاية في نحاس وحتة ظلما وأنا في موضع أظلم، وبنكبو في شي أظلم وتشيلو في ظلام تدخلو جوه شي ما يرائي ضو ولا قمر ولا أي شي أي ضو بفشل إلا ظلام، أي ضو بفشل بنقول ليك لفو أصلو ما تفتحو إلا في الموقع، بعد ما لقيت الزول ده دخل بيتو بالليل الساعة عشرة الساعة حاداشر الساعة اتناشر اتأمدت تربص ليهو من بعيد لغاية ما شفتو دخل بيتو بعد ده تعال بعد ده تعال في خشم الباب فكو طوالي ودفق الموية دي في خشم الباب، المعروف لديكم يا ناس الخرطو بالكشحة، يقول ليك ده والله عمل ليك كشحة، ولا ده فجغ ليهو كشحة، دي الكشحة بعملوها بنظام معين بنعرفو نحنا، طيب بعد ده بنسلط عليك عالم الجن والشاطين، بنبدأ من أضعف أنواع الجن، شياطين مثلا بجوك، لقوك انت شوية عندك شوية صلاح عندك شوية تحصينات عندك بتاع، بقولو لا لا، الزول ده ما قادرين ليهو ما شايفنو، في بعض من الناس أنحنا بنرسل ليهو الجماعة ديل بقول لي والله فتشتو في السماء والأرض ما لقيتو، كيف؟ بقول ليك والله بنسمعو بتكلم لكن ما بنشوفو، يوم يجي يقرب منو ما يشوفو، بعيد منو عشان ما يقدر يأذي بشوفو ياهو داك الزول المقصود أذاهو، يجي قريب ليهو مابشوفو، ده بيجينا راجع بقول لينا والله الزول ده ما قاعدين نشوفوا، من بعيد بنشيفو ولمن نجي قريب بنسمع صوتو واذا كان سكت ما عارفنو اتحرك ولا قاعد، ما بنقدر نصيبو، بنرسل نوع آخر اسمهم المردة: زينا السماء الدنيا بزينة الكواكب. وحفظا من كل شيطان مارد. مردة، بقوموا جاينك المردة ديل، ديل أقوى من ديلك شوية/ ديل الحتات الديك ما بشوفو فيها ديل بشوفوا فيها، بمشوا قريب باقي ليهم عشرة أمتار خمسة أمتار بقول ليك والله شعرنا بي سخانة ما عادية، الزول ده أظن متحصن ولا الزول ده بيقرأ آيات من القرآن: ده شيفوا فضل التحصين، انت يوم تجي تخش الادبخانة قلت بسم الله اللهم إني أعوذ بك من الخبث والخبائث، انت قايل الشياطين الموجودين في الأدبخانة بيشوفوك؟ ما بشوفوك. بيعموا منك. تجشي خاشي بشوفو الحركة جايي خاشي لكن يفتشوك فوق وتحت في الأدبخانة دي ما يشوفوك وانت قاعد في الأدبخانة. شوفوا فضل الذكر ده، والله ما بشوفوك. وأنحنا دي ما عرفناها من السنة، عرفناها من تعاملنا مع عالم الجن والشياطين قبل ما نعرفها في السنة، شوفوا الفضل بتاع الذكر ده، يعني يوم تعملو حتتفادى مشاكل كتيرة جدا جدا، طيب بجونا راجعين، حتى ناس المردة ديل بجونا راجعين، بعد ده بنختار العفاريت، عفريت ده طبعا أقوى ومنهم واحدين مسلمين ويهود ونصارى واللادينيين كلهم منهم في، فديل أقوى من ديلك، بقول ليك والله يا الشيخ أنحنا لمن مشينا للزول ده حصل بنشوف ملايكة، وده السؤال اللي كان سألتو لواحد منهم قلت ليهو طيب انتو ذاتكم ما ملائكة؟ لأنو فهمونا أنو ديل ملايكة البخدمونا ديل، ذكرت الكلام ده قبل كدي، قال لي لأ، ديل الملايكة العظام، شوف الحيل، هو ما ملك بيقول ليك أنا ملك عشان يوهمك عشان ما تعرف انو هو جن، وداير يضللك بقول ليك ديل ملايكة عظام الملايكة العظام ديل انحنا بنحترمهم وما بتخشوا في مناطقهم وبعدين هم قاعدين مع الزول ده، خليهم يفوتو بعد داك بنمشي، يفوتوا متين ما بفوتو، بفوتوا بتين؟ عندما انك انت ما تتحصن، وديل الملائكةالملايكة الاسمهم الحفظة للإنسان البتحصن وبذكر الأذكار في أوقاتها المسنونة، ما ذكر أداك ليهو شيخ حامد، لا، الذكر الأداك ليهو محمد صلىالله علية وسلم، أيوه، ديل اسمهم الحفظة، بقول ليك في ملايكة معاهو قاعدين معاهو،خلي الملايكة ديل يمشوا أنحنا بنقدر نصلوا، يمشوا لغاية ما يلقوا ليهو غرة، نسى أوصهين، النسيان ربنا بحميهو لكن لو خلاها من أجل شي معين، انت شغال ليك في شغلة معينة أديت الشغلة دي أهمية أكتر من الذكر، في الحالة دي هو بقدريؤذيك لكن لو نسيتو، حتى الصلاة لو نسيتها ربنارافعها منك ما ربنا يحاسبك بيها إلا اذاكان اتذكرتها، أي صلاة انت نسيتها في عمرك نسيان وما اتذكرتها ربنا بكتبها ليك طوالي، لكن اذا كان خليتها عنوة ولا للمشغولية محاسب بيها لكن متى ما تذكرها صليها، طيب بارك الله فيك.
يبقى ديل ذاتهم بجونا راجعين، بعد ده بنحاول نرسل شياطين آخرين لأنو انت ذاتك أثناء التحصين وأثناء الوضو ده ذاتو هم بجو بشاغلوك، في شيطان زمان ما كان عارفين اسمو ولا عارفين اسمو بي... نسيتو أنا هسع، لكن اسمو.......الولهان، الولهان ده شيطان بشغل الانسان في الصلاة، تجي توضأ، أول حاجة تجي ماشي الأدبخانة تنسى الذكر، تخش الأدبخانة وتطلع وما جايب خبر، تجي داير توضا داير تقول بسم الله ولا قلت بسم الله الرحمن الرحيم، ولا قلت بسم الله الرحمن الرحيم انا انزلناه في ليلة القدر، جبت حاجات مصطلح من عندك، ده انت ما اتوضيت، قلت بسم الله الرحمن الرحيم ده انت ما اتوضيت لأنو ده ما السنة، السنة بتقول بسم الله فقط، شيل وتوقيف ما على كيفك ولا تستحسن في الدين شي، توقيف، الرسول قال بسم الله ما تبقى فالح من الرسول ولا تبقى أعلم منو ولا أحسن منو ولا لأ، قول بسم الله في حد النبي، تكون انت على مأمن من كل شر، لكن تستحن كل شي الشيطان طوالي بتدخل، تقول بسم الله الرحمن الرحيم، واحد بقول إنا أنزلناه في ليلة القدر، واحدين ما عارف شممتو ريحة الجنة، اللهم اغسل يدي من شنو ما عارف، اللهم لا تسمع.... لخبطة ما أنزل الله بها من سلطان، ولا في الدين من شي، ده ذاتو من شغل الشياطين اللي كان أنحنا بنرسلهم،شفت كيف، بجي عشان شاغلك ما تقول أي كلام مسنون، ولا تزيد من عندك ولا تنسى، خلاص برضو بلقى ليك فرصة، ده لقى فيك فرصة،. ده ذاتو جا لقى انك انت تمام التمام، بنرسل ليك واحد برضو ما كنا عارفين اسمو زمان شنو، لكن الآن بعد السنة عرفنا انو اسمه خنزب، خنزب ده انت متوضي ومتحصن وداخل في الجامع ده وا بخليك، كدي لاحظ الناس البصلوا ديل، أول ما يقوموا دايرين يصلوا تلقى الواحد تثائب، اذا كان واحد منهم تثائب، والتثاؤب ده بالمناسبة من الشيطان، طيب، اذا كان واحد تثائب تلقى اتنين تلاتة بتثائبوا، ده تدخل خنزب طوالي في اللحظة دي، مجموعة منهم دايرين يشاغلوا الناس ديل، ودي من الوسائل البدخل فيها الشيطان في جسد الانسان، ودايما الشيطان ما يقصد انسان ولا يدخل فيهو إلا بشهيق وامتصاص بتاع أوكسجين أكتر من اللازم، الشيطان بخش في الانسان عند الخوف، الانسان الخايف ده بيعمل شنو؟ هههههه طوالي الشيطان بخش، الشيطان بخش في الانسان عند الغضب، شوف الغضبان ده بتنشق شنو، تلقى أوداجو قايمة ويزفر كتير، شهيق وزفي بتاع هوا، لاحظوا شوفوا، امتصاص للأكسجين بأكتر من الللازم، وذلك الشيطن يتدخل يدخل في الانسان بواسطة التثاؤب، ديل من التلاتة وسائل الشيطان بيدخل فيها في جسد الانسان برضو التثاؤب برضو الملاحظ برضو امتصاص بتاع أكسجين أكتر من الحاجة الطبيعية، فديل بجوا برضوا بشاغلوك وبجوا برضو حيلقوا فيك فرصة، أخيرا يوم فشلنا من ديل كلهم رسلناهم جونا راجعين، بعد ده بنتكلم مع صاحبك ويزيد لينا الشغلانية، لأنو المسألة استفحلت،
ولابد من نلحق حدك، وانت ذاتك، بعدين في شي ما نتغالط فيهو لأنو أي زول عندو فهم في الكلام ده، مافي شي بلحقك من غير اذن الله، وما هم بضارين به من أحد إلا بإذن الله، أنحنا بنتكلم ليك بعد اذن الله، اذا ربنا ما كاتب ليك الشي ده أساسا ما بسلط انسان عندو خبرة زي دي عليك أصلا، ربنا يعمينا ولا يجيب عدوك لينا، لأنو أساسا ما كاتبها ليك، لكن لو ربنا كاتبها ليك بسلط فيك واحد عندو خبرة بنفس الطريقة دي، ده ربنا في الأزل كاتبها ليك عشان تلحقك تلحقك، آي، ربنا كاتبها لمحمد صلى الله عليه وسلم أن يسحر، سحر محمد صلى الله عليه وسلم، مافيش فيكم يمثل شعرة في صدر النبي صلى الله عليه وسلم، مع جلالة قدره وتحصينه وذكره لله، توبته وخشيته لله سبحانه وتعالى، يوم ربنا في الأزل كاتبها ليهو جاتو ولكن جاتو خفيفة، كان بي تلاتة دراهم المفروض يقتل بها محمد صلى الله عليه وسلم، تلاتة دراهم بس من القروش كان مفروض يقتل محمد صلى الله عليه وسلم لكن قدر الله وما شاء الله فعل، جاتو خفيفة جدا وقصة مشهورة عندكم، خلاصةالمسألة بيزيد لي القروش وبطلب منك شي آخر وبطلب منك في النهاية بسلط فيك شيطان أصلك ما عندكم منو مفر، متحصن، رجل صالح طالح، ما عندك منو مفر، اللي هو القرين، قرينك من الجن، قرينك ده ما عندك منو مفر، قرينك قبل شوية الشيخ ذكرو، البقرصك وبتصرخ ياهو ده. ده قرينك، وأي واحد فينا عندو قرين من الملائكة وقربن من الشيطان إلى أن يموت، ده ما فيش ليك منو مفر، بنقدر نصل للراجل ده اللي هو قرينك وده تمنو غالي، تمنو غالي بندفعو أنحنا لعالم الجن والشياطين، زمان كان بنقول تمن غالي بندفعو للملايكة، لكن الآن بنقول ليك تمن غالي بندفعوا لعالم الجن والشياطين بعد ده بدونا الشفرة بتاعة الزعيم المسؤول من ده، شيطانك ده، داك هو اللي بفرض علينا الفروضات دي، سووا لي كده وسووا لي كده وسووا لي كده (يكررها) بنسوي ليهو أي شي، على حسب انت ما دفعت لين أنحنا بنسوي، انت دفعت لينا قروشك لكن أنحنا التمن البندفعو اللي هو الشرك بالله ده أهم شي الناس تفهموا، ما بنلحق حدك إلا نشرك بالله سبحانه وتعالى، بعد ده بنتصل بيهو بورينا كيف نتعامل مع الراجل قرينك ده، بورينا الكلام اللي نتعامل معاهو وهو ذاتو بوجهو، بعد ده بنلحق حدك.
طيب الأشياء الذكرتها دي انتو قايلنها ما بتجينا؟ شعر المحسن ده انتو قايلنو ما بجينا؟ أيوه منك انت بجينا. وأنحنا يوم كان زمان شغالين الشغلة دي وكنا في خارج السودان، والله جابوا لينا شعر محسن بتاع رئيس، رئيس للبلد الكنا فيها، رئيس، والعدو من داخل البيت، ما تفتكر العدو البيعمل الشغلة دي أحيانا من بعيد، جايز، صحي، ده من الأعداء بكونوا من الآخرين، لكن في احيانا عدو من داخل البيت ومن أقرب الناس إليك، الزوجة، الزوجة أحيانا بتكون عدو والله ذاتو قال لينا في الكتاب القرآن ده لو قريتو بتلقى في آية بتوضح أنو بعض أزواجنا وأولادنا في بعض منهم عدو لنا، صح الكلام ده ولا ما صاح؟ يبقى دي عداوتها بتكون كيف؟ أحيانا هي على حسب بساطتها وعلى حسب جهلها وغيرة زايدة مفرطة بتخليها تبقى عدوك، لأنها دايرة مصلحة في راسها هي بس، وخاصة أنحنا في عالم عجيب جدا، علم ذاتو بيزرعو في الناس المشاكل، زي المسلسالات بتاعة الأزواج البتزوجو في السر، وببثوها للناس، الناس بتفتكر انو ده لهو، والله المسألة دي خطيرة خطارة، المسؤولين البلد دي ما فيها مسؤولين، مفروض مسلسلات بتاعة الحاجات الزي يمنعوها تماما ما يدخلوها البلد لأنو دي بتدرس النسوان كيف الرجال بتتزوج بالسر وانتي ما خابره ما عارفة، مسلسل والله تلقى مرتك منفعلة معاهو انفعال عجيب، والله بالمناسبة النسوان ديل ضعاف بطريقة ما عادية، ما تتخيلها بني آدم كده كامل عقلها زي عقلك، عقلها صغير جدا جدا جدا، واذا كان داير تتأكد من كلامي ده صحي أمشي السوق، اشتري ليك شوكولاته واشتري ليك حلاوة وبتاع لأطفالك عندك تلاتة أربعة خمسة، كل واحد بيع ليهو شوكولاته واحدة واحدة واحدة أو اتنين اتنين اتنين، وتعال خليها هي ذاته قاعدة معاهم قسم للأولاد وما تديها، تقول ليك انت أنا أسمع هريت في الجامع ما بتديني مالك؟ شوف ضعفها! حاجة جبتها لأطفالك لازم تديها، وده دايره ترتاح منك وتسويك... شوف امشي اشتري حاجة لأطفالك واشتري ليها نفس الشي الاشتريتو لأطفالك قول ليها اتفضلي، بتمسكو منك طوالي بكل صراحة، وزي ما بتعمل لي شافعك كدي كدي في خدو تعال للمرة سوي ليهاكدي كدي في خدها تضحك وتتكيف، سبحان الله، شوف الضعفة دي، ضعاف ولا ما ضعاف، كدي جربها شوفها، والله تضحك ليك ضحكة من آخر قلبها، ضعاف جدا، المسلسلات دي بتأثر فيها تأثير ما عادي، والله ما عادي، والله تجي.. أنا مرة جيت لقيت الولية بتبكي، مالك ياولية؟ قالت والله الليلة مشيت شاهدت لي مشهد عجيب خلاص، المسكينة ضروها خلاص، أنا ذاتي خفت المسكينة شنو؟ أنتي ما مشيتي لي ناس فلان؟ قالت آيي، مالهم الحصل عليهم شنو؟ الضروها دي منو؟ من بناتهم؟ قالت لي لا. شنو قالت لي شاهدت المسلسل. وانتي هسع بتبكي من مسلسل في بيت جيران قالت والله اتأثرت تأثير ما عادي، والله دموعها سايلات. لا إله إلا الله، في قصة، قد تكون صحي ولا قد تكون خرافية، حتى لو صحي ولا خرافية هي أساسا ما صحيحة، لأن الصحيح ما مكن المسألة دي تجي بي نفس الطريقة والناس بتصوروا بالكاميرا، انت بتشوف ليك زول واقع في هاوية، الشرطة وين والحكومة وين والحكومة وين وبتاع، زول ماشي لغاية ما تشوف الزول قتلوهو، وده من التصوير، ما مكن، هي أساسا قصة قد تكون جزء منها صحيح وجزء ما صحيح، حتى لو صحيح فات عليها الأوان، تلقاها بتبكي، تبكي زي ما بتنفعلوا انتو في الكورة، تغضب ومش عارف تصرب التاني وبتاع، هن برضو نفس الطريقة فضعاف.
يبقى هي على حسب ضعفها والمسلسلات الزي دي خربت البيوت، وأي امرأة ـ بعدين نحن عندنا فروع ـ يوم شغالين الشغل ده عندنا فروع، وفروعنا دي حنحكيها ليكم: الوداعية دي فرع لينا، أنا بعرف الودع، وبعرف قراءة الكف، وبعرف قراءة الفنجان، وبعرف الرمل، وبعرف فتح الكتاب، وبعرف السبحة، ديل كلهم بعرفهم وبعرف التنجيم، وبعرف الحسابات بتاعة الأرقام الرقم كذا وكذا أطرح منو تسعات والشغلة دي، كلها بعرفها، كلها مصايب بعرفها، بجونا النساوين البسومن الريحة وغيرها، ماشات تعالي ياولية ما عندنا بيننا وبينهن حاجز، ما فكي مولانا شيخ بجونا طوالي، بخلو بيها، انتي شغالة شنو، والله أنا شغالة ريحة ودلكة و حاجات، بتسومي في البيوت؟ آيي. تعالي نديكي خير آخر زيادة خيرين. آهة شنو؟ تعالي بعلمكي الودع بعلمكي الرمل بعلمكي كذا، شفتي الودع ده كشكشي كده وكبي الودعات دي لو قعدت كدي معناهو الكلام ده كذا وكذا، قعدن كدي: الكلام ده كذا وكذا، قعدن كدي ... بدرسها واحد زايد واحد تساوي اتنين.، بدرسها ليهو تمام، شفتي ده خير مع خيرك الشايلاهو ده، أمشي سومي لو لقيتي ناس، ناسا مكان، ختي ليهم الودع، دي بتجي شايلة الدلكة و شايلة الريحة وبتاع، بقى أنا وانت والآخر الصباح قمنا من البيت ماشين الشغل، خلينا النساوين قاعدات ربات البيوت خليناهن قاعدات في البيت، بعد شوية هنا جاتهاجارتها فلانة وصديقتها فلانة وجيرانها الزمان ديلك خلاصة المسألة قالن ليها أرحكي نشرب الجبنة مع فلانة، أو نشرب الشاهي الليلة مع فلانة، شالت دي بن وديك شالت سكر وديك مش عارف ومشن للبيت المنشود، فبعد ما مشن هناك لمن تلاتة أربعة خمسة، صياحهن وضحكهن وكضبهن يجيبن المودر، واك واك واك، مش عارف فلانة طلقوها وفلانة عريسها جاها وفلانة مش عارف خطبوها و... و.. جوطة، دي بتاعة الحجات دي جاية ماشة سمعت الحركة جوة، الباب ما بتدقو، طوالي بتخش خاشة، مرة وديل نسوان مافيش مانع، تجي تخش بيتك طوالي، جات لقتهن بشربن القهوة ياخوانا أنا عندي الدلكة وعندي كذا، آيي جيبي لينا الدلكة دلكتك دي سمحة، دي شمتها وديك مش عارف بتاع، بعد شوية أدوها فنجان، اذا كان قارئة الفنجان، أول ما أدوها الفنجان شربتو وكفتو، شافت الفنجان قرتو،انتي بتعرفي الفنجان؟ أيوه نعم، ولا بتاعة الودع، بعد ما طلعت ليهن الريحة قمت كشكشتو وقالت الليلة ده سوقي والله سمح الليلة ده بنلقى لي نسوان ببيعن مني، انتي بتعرفي الودع؟ أيوه بعرف الودع، طيب ما تختي لي، طيب جيبي أصبعك ختي في الوا طة ختت أصبعها في الوا طة، كشكشتها كشكشتها كبت ليها الودع في الأرض قالت ليها ـ لي مرتك ـ قالتليها الترابة في خشمك. في شنو يا مرة؟ والله شفتي الودعاية دي قالت راجلك ده متزوج في السر، سجم خشمي، متزوج في السر؟ كدي أقيفي دبلي لي، تاني دبلتو ليها أكدت ليها أنو الراجل ده عندو واحدة في السر، ولا صديقتو ولا متزوجها في السر، وهي متابعة المسلسلات اللي كانت بتبكي فيها، أي امرأة خاصة في زمننا ده يقولو ليها زوجك متزوج في السر أو داير يتزوج فيكي، درجة التصديق فيها مع المسلسلات والمشاهد البتشوفها، بيصل تسعين في المية، تصديق، ودي الفيها خير، عندك دي أم رييسا فايت دي مية في المية، ودي بتصف ليه مواصفات، أحيان تقول ليها زوج ده والله خاتي عينو في واحدة. كيف؟ الشيطان ما بتدخل طوالي، ده ما تكهن وده ما فرع من فروع السحر، الشيطان ما بدخل طوالي الشيطان ما بردف ودعات معينة بنفسر ليها أنو الودعات دي اذا كان الراجل ده خاتي عينو في واحدة بتتردد في البيت، بنفهمها كده ياخي الودعة دي قالت والله في مره بتتردد عليكم في البيت بت شكلها كده كده كده، الشيطان يتدخل طوالي، شكله كدي كدي كدي ، ترسم ليها شخصية فعلا أنو الشخصية د ي بتجي تتدخل في البيت، بت الجيران سابقا، بت العم بت الخال بت كذا بت كذا، بتجي تتردد في البيت، أيوه تاني كشكشتو كبتو ليها الشيطان تدخل طوالي رسمت ليها الشكل ذاتو، طويلة قصيرة ماكنة.. ضعيفة حمراء سوداء شعيراتها بتاع الوصف انطبق بنفس الصورة اللي كانت بتجي بتتردد عندكم في البيت، بت عمك بت خالك بت كذا بت كذا، وبعد ده أكدت ليها أنها شنو الراجل ده عينو طايرة، خاتي بالو في المرة دي عشان كدي المرة دي عندهم سر بيناتهم بتجي تتردد في البيت ده، ده لا حول ولا قوة، يغلي مرتك غليان، بعد ده شفت المره دي في النخرة دي، أول حاجة تجي تلقى قدومها ضراعين، شفت كيف، صاراهو ليك ومن هناك جاي، وانت تعبان تجي تلقاها هي تعبانة أكتر منك، انت ذاتك تحتار المرة دي المزهجة شنو، لا، المزهجة في، ما نحن رسلنا ليها واحدة من فروعنا، جات وورتها الكلام ده كلو وانت ما جايب خبر، ودي قبل ما أنك انت تجي وتلقى قدومها مترين بتأكد ليها شي واحد: ياخي انتي دايرة أحل ليكي القضية دي؟ أيوه نعم، أنا عندي شيخا كارب، والله شيخ بيعلم الغيب، بجيب المودرة، شيخ بيسوي كده، شيخ بسوي كده، شيخ موجود في البلد الفلانية، ما بوريك اسمو لكن كان دايراهو أنا بوديكي ليهو، وشيفي الشيخ يوكد ليكي كلامي ولا لا. هنا دي تلميذتي وأنا وجهتها: تلقى ناسا مكان لاقت مرتك دهبها كتير طوالي قالت ليها الكلام ده، ، لقت هيئتها لقت البيت هيئتو تمام قالت ليها الكلام ده، وأكدت ليها مية المية أنو الكلام ده صحيح، بقى بتواعدن، اليوم الفلاني أنا بجيكي وبوديكي للشيخ ده، ما سمعتو بالشيخ الفلاني؟ سمعنا بيهو، بوديكي بنشوف الشيخ ده بيقول ليك شنو، ديل ناس واصلين، ديل ناس الله، والله ديل الأوليا الصاحين الذين لا خوف عليهم ولا هم يحزنون، ديل بعرفوا الفي بطنك في شنو، والله يريحك من الشغلانية دي، يأكد ليكي كان أكد ليكي بعد ده تحلي رقبتك، ما أكد ليكي خليني أنا أكون كضابة، بعد ما مكنتها تمام ووعدتها، وعدت مرتك فبعد ما وعدتها وطلعت منها وانت ماجايب خبر لقيت بس زعلانة وما عارف المزعلها، لكن وروها الحل ما حتصل معاك حدها، يعني بتلقاها زعلانة وبعد شوية كده تبقى ليك كويسة، لكن هي مليانة فل، لكن مسكت راس الخيط بتاع الحل دايره تتأكد أنو الكلام ده صاح ولا ما صاح، بعد ما ديك جات وأخبرتها ومرقت جاتني طوالي، آها الشيخ، شنو، الليلة سوقك كويس، والله سوقي كويس، الليلة لقيت واحدين عجيبين كلو كلو، بيتهم زي المراية، وكذا وكذا حكت لي الحالة بتاعة البيت، حالة مرتك وحالتك انت، كلها حكتها، ودهبهم لي هنا، آها انشاء الله بس ختيتي ليها الودع؟ أيوه. أكدتي ليها شنو؟ قالت أكدت ليها واحد زايد واحد يساوي اتنين، أكدتي ليها الكلام ده؟ أيوه، ليه؟ بتخت لي الودعاية دي كدي لأ دي قالت كدي، انتي قلت ليها كدي؟ يا زول خير ما فيش عوجة، بتجيبيها لينا؟ أيوه بجيبها ليك، طيب حقك محفوظ، حقي محفوظ يا الشيخ؟ أيوه. طيب اليوم الفلاني أنحنا جايينك، جو ومرتك كمان، زمان كان الكلام ده مافي، لكن الكلام ده مافي لكن الكلام ده لقيناهو في الخرطوم هنا، كمان النسوان عملن ليهن شغله جديده قالوا في حنة اسمها حنة الشيخ مرتك اتحننت تمام واتسوت دي انت قايلها ليك انت، لينا نحنا.
المهم اتحننت حنة الشيخ واليوم الموعود انت طلعت بي هنا ومرتك جاتها المجرمة ديك طلعتها من البي وساقتها لغاية ما جابتها لينا، دي المرأة أول ما جات، الشيخ جبت ليك المرة، بي طريقة كده ذكية شوية، تعالي امشي للشيخ، وهي طلعت طوالي وخلتني أنا براي معاها جوه الحجرة والباب مقفول. بتفتكر بنذكر في الله؟ عندنا ذكر جماعي؟ ما عندنا شغلة عجيبة. وأنا لاقي خبرها، بعد ده أنا برضو جيت عملت عمايلي البعرفة كويس وقلت ليها اسمعي، أنا رقدت في الخيرة وعرفت أنو زوجك ده، على حسب كلام البت، الدجالة بتاعتي، أنو زوجك ده متزوج في السر، ومتزوج في حتة أنحنا عارفنها، في شرق في غرب بتاع عارفنها، المهم هي كلها مسألة بتاعة تمويه عشان هي ماتمشي تبحث عن حتة معينة، في خلاصة المسألة أنحنا بنجرها بي طريقة ملتوية عشان ناخد منها قروش ونعمل ليها أشياء بتاعة طب نطب ليها زوجها ده ونخلصها من الشي اللي هي وقعت فيهو، أنا باختصار شديد بنصل معاها لي حل بعد ما أكدت ليها الكلام ده كلو صحي ووصفت ليها المرة ووصفت ليها أنك متزوج، ووصفت شكل راجلها ذاتو وصفتو ليها، عموما بقول ليها انتي اسمك فلانة الفلانية، متزوجة سنة كذا وكذا، وأبوكي فلاني الفلاني الفلاني، وانتي في الاسبوع بجيكي وجع راس كذا، وانتي مع الدورة بتجيكي آلام مغص، وانتي كذا... لا اله الا الل محمدا رسول الله والله بعلم الغيب! يضع سره في أضعف خلقه، والله ده ولي صالح آمنت به تب، بقول ليهاكلام كلو حقيقي، لأنو عارف، ويوم نجي في موضوع علم الغيب بنوريكم الكلام ده بيتم كيف، بنوريها أشياء كلها حقيقية مية المية، واسمها ذاتو أنا وريتو، اسمك كده واتزوجتي كده قريبك ولا بتاع أكدت ليها الشغلنة دي.
خلاصة المسألة بتدور أنو أطبك، أنت مش متزوج في السر، أيوه نعم، أيوه، أقرب شي، ودي كويسة بتقول ليك أربطو من المرة دي ما يبقى فيها فحل، وانتي كيف؟ قالت أنا يبقى فوقي فحل، لكن في واحدة بتقول لي أنا ذاتي ماني دايراهو،مادام عمري ده كلو قضيتو معاهو، والله المثل البقول الآمن الرجال كب الهوا في الغربال، الكلام ده صحيح، الراجل ده عمري كلو قضيتو معاهو، عليك الله الرجال ديل ماهم خاينين؟ في النهاية يمشي يفكر يتزوج في السر وأنا ما عندي خبر؟ لا إله إلا الله محمدا رسول الله، والله أصبري لي، والله شفتي يفتشو ما يلقاه، أيوه دايره يفتشو ما يلقاه؟ أيوه نعم. والله شفتي ما يبقى فيها فحل كلو كلو، أربطو ليكي وينتهي الموضوع وخلاص، انتي قنعتي منو؟ والله أنا ذاتي قنعانة منو ماني دايراه، ولدت منو وعجزت ولا عمري ذاتو، يازول ماني دايراه أربطو ما يبقى فحل كلو كلو يفتش فلان ده ما يلقاهو، طيب شوفي، اسمو منو؟ اسمو فلان الفلاني، لآ جيبي لينا اسم أمو، أمك، أمك، أها زوجتك بتعرف اسم أمك؟ بتعرفها. لو ما انت بتعرف اسمها، أمو فلانة أمو آمنة خديجة بتاع، أيوه، اسمو هو فلان، بعد ده عملت الشغلة وعرفتك انت ترابي ولا غيرو، قلت ليها اذا كان دايره أكرب ليكي الراجل ده تمام ما يفرط وألبسك ليهو زي خاتمي ده شوفي تجيبي لينا منو شعر العانة، شعر المحسن بتعرفي؟ أجي يا الشيخ ده نجيبو كيف؟ لا بتجيبي. أنتي المسألة بتهمك؟ آيي. أنتي الراجل ده بتحسن هو براهو ولا بتحسني انتي؟ والله الراجل ده بمشي براهو بتحسن. طيب ياخي الموضوع داك فيهو لا اتحسن؟ الموضوع مش قايم صغار كدي؟ أيوه نعم. تعالي في اليوم الانتي مستعده منو، أعملي الآتي، مرتك والله قلنا ليها جيبي لينا شعر العانة وعنده هوى في الكلام ده وعندها وهم زي ده، بتجيبو لينا ولا ما بتجيبو؟ والله بتجيبو، أول حاجة والله مع الملابطة عندك تمسكها منك تمعطها تششاك! تشيلها تجيبها لينا شفت، تجزها منك وانت ما جايب خبر مع الملابطة عندك دي، كتير منهم، بتاع الرئيس ده والله في المسألة بتاعة العملية ذاتها! وكان طوال، جزتو منو شالتو جابتو لينا، ده شنو قالت بتصرخ ولا حيلة ذكاء وانت ما جايب خبر، ولا انت كمان من النوع المدلع داك، البتجي تنرخي وامشي جيب الموس، وانت بس شعر اباطك ده ياخي والله عفن خلاص ما ترقد جنبي، ياخي عليك الله خلينا نمشي نجيب الموس، آيي انت خلاص انرخيت واسترخيت لأنك بجو بحسنو رفعت اباطك وهي قاعدة تكورك ليك في البتاع هي انت قايلة دايرة تحسنو ليك ، لأ، عشان يجيبو لينا أنحنا، أعمل حسابك، يبقى، ولا انت ذاتك من النوع التاني جيت سخنو ليك موية ساخنة ودافية غسلو ليك، المرة دي الحاصل عليها شنو سبحان الله، أنا جيت تعبان جات غسلت البتاع ده، هي عندها هدف معين.
خلاصة المسألة شافت الأضافر كده قالت ياخ اسمع أضافرك ده بقن خشن خلاص خلينا نجيب الموس، عندكم ضفارة؟ آيي في ضفارة، جات كرض كرض قرضتهم ليك، شالت لمتهم انت قايلها ماشه تدفقهم؟ لأ، شالتهم جابتهم لينا، المسألة دي ساهلة عندنا تماما بتجينا، ده كلو خليهو، النكسي الداخلي، نكسيك الداخلي البتغسلو منو؟ قاعد تغسلو انت؟ ياخينا؟ تغسلو انت؟ (يضحك) هدومك دي ما بتغسلهم المرة، نكسيك الداخلي ده بتغسلو هي، لو هي خافت من الشرور التانيات دي عشان ما تتعرف نكسيك الداخلي بتجيبو ولا ما بتجيبو؟ والله انت قايل غسلوه وختوه في الحمام، ولا شروه بي هناك، وين... شالوه جابوه لي شيخ حامد والله شالوه دخلوهو كلو في كيس جابوهو وتم معانا أسبوع ولا أسبوعين، بعد داك طلعنا الخيوط منو ولا طلعنا الحاجات الدايرنها عشان نعمل ليك سحر بي نفس الأسلوب القلناهو ليك دي الطريقة بتاعة أي انسان مسحور سحروهو أيا كان هو السحر ده نوعو شنو، شل؟ شلل يعني. قدو بيهو عينك، مرضوك جنيت ما عرفت سببك شنو.. أي سحر لازم يدخل فيهو الأشياء دي، لازم يعملو واحدة من ديل، لو ما عملو واحدة من ديل أصلو ما بتنسحر على الإطلاق ما بتنسحر دي خبرة، أسال مجرب ولا تسأل طبيب، بعد ما نعمل الأشياء دي بتم سحرك وبتنفذ الأمر المطلوب، شلل؟ تنشل تماما، مش يودوك انجلترا، لو ودوك رب العالم الآن أمـريكة الوهم الفي الناس، لو يودوك أمـ ر يكة يدخلوك مصانعهم، والله ما يلقو ليك مرض واحد، آلاتهم دي كلها ما تثبت عندك مرض واحد فحوصات سليم سليم سليم، وتجي انت بالعين المجردة مريض تعبان هلكان، شفت كيف، الشيطان عندو الخبرة وعندو المقدرة الآلة ما تثبت فيك أي مرض، يحل بين الآلة وبين المرض، الفحص ده يطلع أنك الدم كويس، البصاق كويس، العظام كويس، اللحم كويس الأنسجة كويسة أي شي شرايين بتاع بتاع بتاع، يقول ليك والله انت سليم، ياخي أنا عيان، ياخي أنا الدكتور أنا ذاتي مقتنع أنك انت عيان لكن الفحوصات ما أثبتت لي شي، أقدر أديك دوا غلط؟ نصيحة بقول ليك والله انت سليم، مغص، مغص في شنو؟ منظار بتاع يدخلو فيك المصارين بتاعتهم دي جوه مصارينك، يطلعوك نضيف وانت عيان، ده شنو؟ ياهو دي الأسباب بتاعتو، والشيطان المقدرة بتاعتو، والجنون من المقدرة بتاعتهم أعلم من الإنس في الحاجات الزي دي، ما يثبتوا ليك أي مرض تجي تموت بي مرضك لأنو مرض بتاع سحر، بتاع حسد وبتاع مشاكل، بتاع فقراء زي ما بقولو، وديل الفقراء البقولو أنهم ناس الله، البسووا الشغل ده، ديل ناس الله، فقراء، أي فقير معناهو زول الله، ناس الله، ديل مولانا فلان، وفكي فلان والشيخ فلان، وأبونا فلان والخليفة فلان، ديل البسووا الشغلة دي، ماهو الترزي فلان، ولا السواق فلان ولا العسكري فلان، ولا التاجر الفلاني، يبقى ديل هم فعلا صحصح أنهم ديل ناس الله ولا ديل أعداء الله؟ ديل أعداء الله. والله الذي لا إله إلا هو ديل أعداء الله، والناس موهومين في ديل ذاتهم، ديل ناس الله، إنا لله وإنا إليه لراجعون. وده قليل مما نعرفه في السحر أشياء أخرى اللسان ذاتو بتعفف ما بقولها، يعني شغلة خبيثة بطريقة ما عادية، وكمان بالدين، المشكلة الواجعة الواحد بالدين. كل السحر يتدخل فيهو الدين، يجيبو دين يكتبوهو هنا ويسووه هنا عشان يوهموا الآخرين أنو بالدين ده ممكن تعمل أي شي وكمان في مصطلحات القرآن يهدم الجبال ويكسر الجبال وبتاع وبتاع وبتاع، ويفعلو الأفعال الخبيثة دي باسم الدين، والدين برئ منها كل البراءة، والله إنه ما الدين، والله عالم الشياطين والجنون بتعاونو مع شياطين الإنس وبفعلوا هذه الأفعال والدين منها برئ تمام تمام تمام، والله انه السحر والله انه تعامل مع عالم الجنون والشواطين ولبيس الدين بعمل الحاجة دي، الزول المربوط ده اتزوج بي سنة الله ورسوله، الله حلل الزواج، حلل الزواج، تتزوج بي سنة الله ورسوله مسألة سليمة جدا وحلل ليك أربعة يجي المرأة دي هي واحدة عشان بتتزوج واحدة تانية تمشي تربطك وتربطك بي شنو تربطك بي واحد شيخ، واحد فكي، فقراء، ديل ناس دين؟ ده ما زواج صح، طيب ليه، الدين بفعل ده؟ الدين ما بفعل ده، الدين ذاتو المكتوب فيهو ده تعال اكتب بمداد طاهرة وأكتب الأيات كاملة نضيفة وخليه يربط الإنسان ده، ما بربطو ولا بياخد خبرو، عادي يكون فعل في زوجتو الجديدة دي، لكن الدين تقوم تلخبطو بي أشياء ما انزل الله بها من سلطان تنسب للدين، ويحصل الربط ويحصل كل البلاوي بتاعة الناس، فإنشاء الله نقيف عند هذا الحد ما نطيل للناس، وانشاء الله المحاضرة الجاية مهمة جدا عشان نخش في عالم غريب جدا جدا بفعلو أفعال خارقة للعادة والناس في ألغاز لازم تعرف الحل بتاعها، عشان ما تقعوا في الوهم بتاع الناس وما أكثرهم الآن، أنحنا عندنا في الحاج يوسف أو بالضبط في أم دوم نساء كان كنا زمان رجال لكن الآن هن النساء النساء هناك في عندنا نسا هناك في ام دوم أنا ما ساكن أم دوم لكن كان عملت محاضرة في أم دوم بتاعة نساء، والله ذكروا انو في امرأة في اسمو شنو، قال دي بتتكلم مع الله! عديل كده بكل صراحة، عديل كده، دي نبيه؟ شنو؟ مش عارف، قالت هي بتتكلم مع الله، بتجي انت خاشي ليها بتسلم عليك وبتوريك اسمك وبتوريك الغرض الجايي ليهو ومتكوعة وبتشرب في شنو؟ في الشيشة! متكوعة وبتشرب في الشيشة وقالو بتتكلم مع الله! ومقتنعين الناس، الرجال، الواحد يملص نعلينو هناك ويجي حايب ويدنقر تحت ويجي عشان يحكي ليها، أول ما تجي وتدنقر وتنذل، ياريت لي راجل لي مرة كمان! بعد ده تجي وتوريك اسمك وتقضي ليك حاجتك وتوريك محل الضيعتو وين وتوصفو ليك وتمشي تلقاه ميه الميه ده الشي الوهم الناس وضلل الناس تماما الآن موجودة، فالمسألة دي خطيرة اللي هو ما يسمى عند الناس بعلم الغيب أنحنا انشاء الله الأسبوع الجاي لو في العمر بقية نجي نعرف كيف المعلومة الصحيحة مش الكضب المعلومة الصحيحة البتكلم بيها هذا الشيطان من أين له هذه المعلومة الصحيحة؟ من أين له هذه المعلومة الصحيحة اللي اتكلم بيها وهي حقيقية جابه من وين؟ عرفها كيف؟ ماهي الشغلة البشتغلها عشان يعلمها؟ الأسبوع الجاي انشاء الله، نسأل الله للجميع الهداية بإذن الله تعالى، اللهم علمنا ما ينفعنا، وانفعنا بما علمتنا، وارزقنا علما ينفعنا، وعملا يرفعنا، واستر عوراتنا آمن روعاتنا فرج كروبنا اغفر ذنوبنا ، تول أمرنا، احسن خلاصنا، فك أسرنا ارحم ضعفنا، عجز الطبيب فداونا، ظهر الفساد فنجنا، قلت حيلتنا فتولنا، اللهم اجعل جمعنا هذا مرحوما واجعل تفرقنا من بعده معصوما، ولا تدع بيننا شقيا ولا محروما، أوردنا حوض نبينا، اشملنا بشفاعة حبيبنا، اسقنا من حوضه شربة لا نظمأ بعدها أبدا، آمين آمين آمين، والسلام عليكم ورحمة الله.
|
|
 
|
|
|
|
|
| العنوان |
الكاتب |
Date |
| هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:33 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Salah Abdulla | 02-10-08, 06:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:20 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | ismeil abbas | 02-10-08, 08:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Abdel Aati | 02-10-08, 09:44 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Yasir Elsharif | 02-10-08, 10:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:37 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Hatim Salih | 02-10-08, 11:02 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:53 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-11-08, 01:07 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-11-08, 08:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:01 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:03 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-13-08, 09:50 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-14-08, 06:50 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | amir jabir | 02-14-08, 09:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-18-08, 08:57 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:14 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | سيف النصر محي الدين محمد أحمد | 02-18-08, 06:55 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | AMNA MUKHTAR | 02-18-08, 07:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 03:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | خرماج | 02-19-08, 02:29 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:03 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 03:57 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | abubakr | 02-22-08, 04:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:11 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | صباح حسين طه | 02-22-08, 08:42 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:21 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:23 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 06:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:35 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 08:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 04:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 05:31 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 00:55 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 01:00 AM |
|
| |
فيس بوك
تويتر
انستقرام
يوتيوب
بنتيريست