|
|
 Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ (Re: محمد عثمان الحاج)
|
المحاضرة الرابعة
ما هي حقيقة الحجبات
الحمد لله نحمده و نستعينه ونستغفره ونعوذ بالله من شرور أنفسنا ومن سيئات أعمالنا من يهد الله فهو المهتد ومن يضلل فلا هادي له، وأشهد ألا إله إلا الله وحده لا شريك له وأشهد أن محمدا عبده ورسوله، يا أيها الذين آمنوا اتقوا الله حق تقاته ولا تموتن إلا وأنتم مسلمون، يا أيهاالناس اتقوا ربكم الذي خلقكم من نفس واحدة وخلق منها زوجها وبث منهما رجالا كثيرا ونساء، واتقوا الله الذي تساءلون به والأرحام إن الله كان عليكم رقيبا، يا أيها الذين أمنوا اتقو الله وقولوا قولا سديدا، يصلح لكم أعمالم ويغفر لكم ذنوبكم ومن يطع الله ورسوله فقد فاز فوزا عظيما، وبعد فإن أصدق (القول) هوالقرآن وخير الهدي خير محمد صلى الله عليه وسلم وشر الأمور محدثاتها وكل محدثة بدعة وكل بدعة ضلالة وكل بدعة ضلالة وكل ضلالة في النار، أعاذني الله وإياكم من النار ومن غضب الجبار وبعد... السلام عليكم ورحمة الله، مواصلة للحلقة الفائتة انشاء الله وموضوع اليوم هو ما هي حقيقة الحجبات التي تحجب حقا لأن الحجبات كثير منهاغش ما فيها الشئ الذي وعدوك به، يعني الشئ الوعدوك بيهو قال ليك الحجاب ده بيسوي كده غش، وكذب ودجل، أنحنا نتكلم عن الحجاب الصحيح، الحجاب الصحيح الحجبك ده، أو قالوا ليك الحجاب ده بيعمل ليك الشي الفلاني وعملو، بنتكلم عن ديل، وذكرنا المرة الفائتة أنو واحد من اخوانا العساكر واسمه النور محمد، ووعدنا أنو يجينا هنا وما جاء، وبعد ما رجعنا جاني في البيت وقال لي أنا ما عرفت الجامع، وصفت ليهو الجامع الجمعة دي برضو، وهو مشكلتو رفض ما يديني الحجاب، رفض، لأنو حجابو حتى لو فيهو شرك ولا ما فيهو شرك ما داير يخليهو على الإطلاق، مهما أغريتو من القروش برضو رفض، قال لي لا، حجابي ده ما حتفتحو عشان تبوظو لي لأنو الحجاب ده أنا ماخدو زمان بي خمسين ألف، ماهيتي كلها سبعة وأربعين وأدينت عليهو، وكان رقيب، وأدينت عليهو تلاتة آلاف أخدت الحجاب ده، والحجاب ده حجبني العمر ده كلو، وأبطلناهو بإذن الله تعالى، وكررنا البطلان بالقرآن، وقلنا ليهو الشئ ده شرك، والأن يوم قرئ القرآن بطل الحجاب، فأرجوك بعد ده بقيت انت على بينة من أمرك وهذا الحجاب شرك، وكلما كان عندك ما دام ده اعتقادك انت مشرك، فابتعد عن الشرك، قال لي ياخي حجبني، قلت ليهو نعم حجبك، حجبوك الشياطين، وأكدنا ليهو أنو الحجبوهو شياطين، وبرضو ما داير يخليهولأنو شيطانو أكبر منو.
خلاضة المسألة قلت ليهو انت مادام ما داير تدينا ليهو شيلو معاك، ما دام أبيت ورفضت شيلو معاك، بس تجينا عشان نثبت للناس أنو الحجاب الشي بحجب فيهو ده شياطين، وما هو الدين الموجود فيهو. قال لي ما عندي مانع لكن إذا كان أبطلتو زي ما الآن ظهر، ما تشرط الحجاب ده وتفتحو لأنو أنا دايرو، ياخي ده شرك، قال لي برضو، سبحان الله، إن الله يهدي من يشاء، يعني انسان تبين ليهو الشرك واضح لا شك فيهو وبرضو يصر، وأنحنا ما علينا إلا أن نهدي الناس هداية البيان، أما هداية التوفيق فمن عند الله، كونو ربنا يوريك الحق حق ويرزقك اتباعو دي مشكلة عظيمة، فقلت ليكم وعدني بجيبو هنا، وهو الجمعة الفاتت كان أظنو في المسجد البي هنا ده، في مسجد بي هنا كده في الظلط فيهو عربات كتيرة كده، قال لي أنا قايل ده المسجد، وقال جيت خشيت في مسجد اسمو شنو؟ مسجد السيد السنهوري، قلت ليهو لأ المسجد ده بعدو تمشي طوالي على الجنوب وتمشي شوية وبعدين تسأل عن مسجد شيخ محمد، قال لي أنا في المسجد ده، سيد سنهوري، أنا قايلو في سيد سنهوري، وما أظنو جاء، ده كلامو لي، لكن الله أعلم. فهسع وعدني أنو يجي هنا وبرضو هسع ما شايفو، فإذا موجود شيخ لانور محمد أرجوك أن تجينا ياخي، وعشان المسألة تكون للناس يشوفوها زي ما المرة الفاتت عملنا التجربة تجربة البيان بالعمل، دايرين نعمل تجربة البيان بالعمل بموضوع بطلان الحجبات، يبطل الحجاب بإذن الله تعالى، فإذا كان الراجل ده موجود خلي يجينا انشاء الله، جبنا معانا اللحمة عشان نعمل التجربة، ياهي دي اللحمة، عشان نعمل التجربة في الحجاب ده واذا كان في زول منكم عندو حجاب بحجب الليجيبو لينا. خلو ده كلو خليناهو تب، اذا كان جا الليجيبو، اذا كان ما جا ما بنقدر نجبرو عليهو، لأنو في الحالة دي كلمناهو بس، أنكرنا المنكر بلساننا أما اليد يد السلطان، ما بنقدر نرفع ليهو عصى الطاعة ونقلع منو، ده ما شغلنا، اذا كان جا الراجل ده خليهو يجيب لينا الحجاب ده هنا انشاء الله عشان نعمل التجربة وإذا كان ما جاء في غيرو من المستمعين عندو حجاب بحجب الليجيبو لينا هنا.
موضوع الحجبات الحقيقة وكثير من الإخوان الغيورين على الدين بيتكلم في المساجد وبنكر وجود الحجبات، وده خطأ، انت يا أخي مع عقيدتك النضيفة ورجل موحد وعقيدتك في الله عظيمة، ماتنكر وجود الحجبات، ده ما شغلك، شغلك أن تثبت للناس أن الحجاب شرك بالله، وكفر بالله وتميمة، دي كلها واردة في الحجاب، لكن اذا كان أنكرت للناس أنو لا يوجد حجاب بتجي يوم من الأيام وحتكون نكسة للدعوة ونكسة للحق، زي ما حصل مرة وكنت في مدينة ياوندي عاصمة الكمرون، فعملت محاضرة في المسجد الكبير وتكلمت عن الحجبات، وما الحجبات، والبلد ديك مليئة بالدجل والشعوذة والسحر، اللي هو الكاميرون، أفريقيا الوسطى والكاميرون، وتشاد وغيرها فمليئة بالأسحار دي، وأي انسان ما عندو حجاب بيعتبروهو امرأة، يوم يلمس ذراعك ويشوف صلبك ما عندك أي شي بيقول ليك انت زيك وزي المرأة، لأنو انت كراجل مفرضو يكون عندك حجبات تحجبك من السلاح، لأنهم كلهم مشاكل، ما بخافو الله، يعني ما عندو وازع ديني يمنعو من أن يؤذي الآخرين، يعني حتى في بعض الناس انت قاعد زي ده غفلان يجي يطعنك بي سكينو، ما بتورع، طعنك بي سكينو معناها اذا عندك حجاب بحجبك، اذا ما عندك حجاب طعنك بي سكينو المشكلة استفحلت، يعني ما عندهم وازع ديني يمنعهم من الكلام ده، فكنت أتكلم عن الحجبات في المسجد، وما كل من يسمعك بفهمك صاح، ده واحد موجود مع المستمعين يوم اتكلمت عن الحجبات وقلت الحجبات كفر وشرك بالله والدين الفيها ده ما بحجب، الزول ده يعني زعل زعلة ما عادية، وده من النوع العندو الحجاب، حجاب صاح زي حجاب العسكري ده، النور محمد، ده حجابو صح، ما مغشوش، فده زعل جدا وغار يعني غيرة للدين، وليهو الحق لآنو جاهل بالأمور دي، قال كيف أنا أقول الدين الفيها ده ما بحجب؟ فالراجل ده غضب غضب ما عادي وكان في آخر المسجد، فقام من هناك ثائر وجا من هناك ويبكبر ماشي علي، وبقول خربتو بلدكم وجيتو تخربو بلدنا، ياناس شيلو لينا الفاتحة ورفع يدينو كان، قال شيلو لينا الفاتحة وماشي زعلان،ينطط في الناس وماشي علي، يا ناس شيلو لينا الفاتحة، الفاتحة، الله يرفع البلاء، وينزل الرحمة، واحد قال ليهو البلاء شنو يا شيخ؟ قال ليهو البلاء الوهابية غزوا البلد، فقال لي انت يا وهابي يا كلب انتو أنكرت الدين، أنكرتوا الرسل، أنكرتو الأولياء، والآن قعدتو تنكرو في القرآن؟ والله الليلة دمك في الأرض ما يلقوا، والله الليلة دمك في الأرض ما يلقو، ومطلع سكينو، سكين هي ذاتها ضراع، وبيطعن في رقبتو، تقول الدين ما بحجب، وبطعن في رقبتو وماشي علي، مشهد مثير ومخيف، الاتنين، مثير اثارة ما عادية، والناس يوم شافتو بطعن في رقبتو وعندو حجاب رافعو في ضراعو بهز كده، وبطعن في نفسو الناس كبرت وهللت، وشافت أنو ده الحق وده الدين وده زول منكر للدين يجب أن يسفك دمو، والليلة كلنا حنسفك دمو طبعا بيكبروا وبهللو وشايفين المشهد، والراجل ده ماشي، واحد من العاقلين مسكو قال ليهو أقيف أقيف أقيف، ياخي تقتل ليك زول، وهم قتل الزول ده هناك ولا أي شي، كونو يقتلك ده ما قضية، فكونو يقتلك وفي دين ده معناهو قتلك ذاتو حيدخل الناس الجنة، القتلك ده بيعتبر أنو هو قتل كافر لآنو الإنسان البنكر الدين أو ينكر القرآن كافر، ده في مفهوم الناس، وده صحيح اذا كان أنكرت الدين صاح انت كافر لاشك في ذلك، فده فهمو أنو البحجبو ده دين، وأنا قلت ما دين، فما فاهم الجانب الآخر بتاع القصة، خلاصة المسألة قلت ليهو كويس تعال، جا وقف قدامي وكان برجف من الزعل والناس بتهلل وبتكبر أنو في زول أنكر الدين الدين أو أنكر القرآن وفي زول أثبت ليهو أنو الحجاب بيحجب ودايرين الزول ده مصيرو شنو.
كل الناس متفرجة على أنو مصيري أنا شنو، قلت ليهو طيب أنا المحاضرة دي لغيتها، دايرك انت ده تكون موضوع المحاضرة، في شنو؟ قلت ليهو انت حجابك ده حجب صاح؟ قال لي انت ماشايفو، قلت ليهو أنا عشان أاكد ليك أنو البحجب فيهو ما هو دين ما قرآن البحجبك ده ما قرآن، لازم تسمع لي كلامي ونقتنع، وإذا كان أنا ما قدرت وخذلني رب العالمين انت ياخي بي سكينك وأنا غريب في البلد دي والانسان اذا كان مواطن قتلو عندكم لا يعني أي شي خلي انسان غريب جاي من بلد تانية ده والله ما أظن يسمع بيهو غير ناس المسجد ولا غيرو، فأنت أنا بثبت ليك أنو البحجب ده ما هو دين، قال لي دين، قلت ليهو ماهو دين، قال لي دين، قلت ليهو طيب أنا داير الحجاب ده بحجب من شنو غير السكين؟ قال لي بحجب من البندقية وبحجب من السهم اللي هو النشاب، هم بقولو ليهو النشاب، والحربة والسكين والبندقية والعصا يعني العصا ذاتها لو رفعتها تضرب الانسان ده يعني يدك ولا وقفت ولا استشليت يمسك شلل طوال يدك بتقع ما بتقدر ترفع العصا ما بتقدر تمسكها، لو داير تضرب الراجل ده، طيب، لو داير تضربو بنية ما حتقدر تضربو وحتى كاراتيه ولا غيرو ما حتقدر تضربو، لأنو حجاب كامل شامل من كل أنواع الاعتداء، قلت ليهو طيب تعال جيب الحجاب ده، قال لي داير تسوي بيهو شنو قلت ليهو داير نثبت ليك أنو الحجاب ده البحجب فيهو ماهو دين. قال لي حتعمل ليهو شنو قلت ليهو أول حاجة حنقرأ دين لتبطيل الحجاب ده، قال لي ببطل؟ قلت ليهو حيبطل. كيف تقرأ دين يبطل؟ قلت نعم حأبقرأ دين انشاء الله ويبطل الحجاب ده،قال لي ما ممكن قلت ليهو ممكن ونص، أنا حأقنعك بالكلام ده، قال لي انت كونو تقنعني خلو، ده دين كلام الله انت ده الوهابي تبطل كلام الله، قلت ليهو أنا مكتوب في وجهي وهابي؟ قال لي من خليقتك دي وهابي، مادام تتكلم في الشغلة دي قلت ليهو نت الوراك وهابي منو أنا لا قلت ليك أني وهابي ولا مكتوب في وجهي وهابي، كيف يعني؟ قال لي أسمع انت خلي كلامك وجوطتك البتسوي فيها دي انت كيف تبطل كلام الله، قلت ليهو أنا ما ببطل كلام الله أنا ببطل الدجل والشعوذه الموجودة في حجابك ده قال لي دي ما دجل وشعوذة ده دين، قلت ليهو ماهو دين، وعشان أنا أثبت ليك أنو ماهو دين مطلوب الآتي: قال لي شنو؟ قلت ليهو ياخي تتطلع الحجاب ده تختوا لينا بره هنا ده، الناس ديل كلهم يشوفو وحنعمل طريقة شرعية يبطل فيها الحجاب ده، طريقة شرعية؟ قلت ليهو طريقة شرعية، قال لي مامكن قلت ليهو حأقنعك بيها، قال لي ما بتقنعني بيها قلت ليهو ما نجادل كتير انت قلت عندك حجاب بحجب وأنا قلت أنو البحجب فيهو ده مادين، داير أثبت ليك أنو ما دين، قال لي كويس وحد كلمو قال ليهو ياخي طلعو، طلعو ختاهو، قلت ليهو ياخي دايرين حاجة تانية نجرب فيها. حاجة تانية شنو؟ قلت ليهو دايرين أي شي تاني نجرب فيهو. يعني نجيب ليك شنو؟ قلت ليهو جيب لي أي حاجة تانية. قال لي أجيب ليك تيس؟ قلت ليهو لأ. ديك؟ قلت ليهو لأ. أمشي جيب لينا لحمة من السوق. زي اللحمة دي. قال انت بتقبض في الرغو. الكلمة الفظة قال لي انت بتقبض في الرغو. وده كلام بيقولوهو الناس البرة، بتقبض في الرغو يعني شنو؟ رغوة الصابون دي لو خجيتها وطارت في الهواء لو جيت بتقبض في شنو؟ معناهو زول ما عندي حجة. قال لي أنا جربتو ليك في نفسي قلت ليهو ياخي انا لو جربتو في نفسك لو بطل ممكن أنا أجربو في نفسك؟ ما ممكن لأنو حيطعنك السكين. قال لي انت بتتكلم من وين انت شنو السكين هسع ما ما طعنتني؟ قلت ليهو حتطعنك. انت جيب لي ياخي وخليني أنا أفشل، اذا كان ربنا خذلني ده شي تاني، لكن انشاء الله ربنا ما يخذلني، مشو رسلو جابو لينا قائمة من السوق الرجل الورانية دي جابوها لينا أنحنا في السوق ذاتو، مشو جابوها، شلنا الحجاب ختيناهو في القايمة دي وجربنا فيهو كل شي : عصا : أي انسان مهما يكون قوي يجي من هناك منشد وغضبان عشان يجي يضرب اللحمة دي يرفع يدو كده تاني يدو ما بتنزل لو ما رجع ورا يدو دي تاني ما بتنزل الا يرجع ورا، تبتعد من الحجاب يدك بتنزل ما بتضرب، دردم يدق كده عشان تدقو تاني ما بتنفك عشان تمط يدك تاني ما بتنمط وما بتزل، في شي ماسكك. في نوع من الناس بجي عشان يعمل اي شي تلقاه هو ذاتو انشل كلو. الانسان ذاتو بنشل كلو، شوفو المصيبة دي.
خلاصة المسألة جربناهو وجربنا فيهو السلاح، هناك العسكري بقولو ليهو الزاندرمة، نادو عسكري من برهن وهناك البلد ديك ما بتحتاج لوكيل نيابة ولا أمشي ناس الشرطة يطلعوا ليك تصديق ما عندهم، العسكري هو العسكري بشتغل أي شغل نادوا عسكري من بره اسمو الزاندرمة قال ليهو تعال ما بعرف اللغة العربية فقال ليهو تعال اضرب لينا اللحمة دي عشان يثبت لي أنو الحجاب بحجب حتى من السلاح، فعلا عندو الام بي فايف الصغير ده وجهو على اللحمة عشان يضربها ما يضرب تسمع كج كج كج الحديد براهو صوت لكن مافيش أي طلقة بتقوم، يرفع الام بي فايف فوق أي طلقة تجي طالعة يوجهو تحت لا. ختينا الام بي فايف ختينا اللحمة كده (فوقه) لأنو بضرب فوق ختينا عشان نأكد للناس برضو ما بضرب، تزح منو اللحمة الطلقة بتقوم، يعني شي حجب تماما، قلت ليهو طيب الحجاب حجب، وفي حاجة أنا ممكن أجرب فيها تجربتي أنا، قلت ليهو التجربة دي تجربة شرعية، وين امام المسجد؟ قال لي أيوه نعم، قلت ليهو ياخي أدينا تلاتة مصاحف فجاب تلاتة مصاحف، بعد ما جابها كده أنا شفتها شكلها غريب شوية، فتحتها لقيتها رواية ورش، في رواية اسمها رواية ورش، ما زي مصاحفنا دي رواية ورش، البلد ديك كلها بتقرأ بي رواية ورش، لقيت المصاحف كلها رواية ورش، فقلت ليهو انتو بتقرو بالرواية دي؟ عندك فيها شك؟ قلت ليهم لأ ما عندي فيها شك، رواية صحيحة وراوية كويسة وأنا ما عندي فيها شك، ناديت من المجموعة تلاتة أشخاص، ياخينا تعل انت اسمك منو؟ قال لي اسمي القوني آدم، قلت ليهو بتعرف تقرأ القرآن؟ قال لي أنا حافظ القرآن ده من البقرة للناس، مش بعرف اقراهو! وفعلا كلمة قوني (معناها) انسان حافظ صم، بيعرف ليك مؤمنون ومرمنين في القرآن كم، وبوريك محلها كذا وكذا وكذا، يعني ناس للقرآن ده حافظنو بطريقة عجيبة جدا جدا، ما يتغالط في القرآن كلو كلو، لو قريت أي آية يقول ليك الآية دي موجودة في الحتة الفلانية موجودة في السورة الفلانية يكررها ليك كلهابتمشي تلقاها كلها صاح، قوني، فقال لي أنا اسمي القوني آدم، وانت ياخينا تعل قرب، انت برضو قوني؟ قال لي أنا ما قوني، وانت؟ قال لي أنا برضو ما قوني، تعلو دياركم تعملو لي الآتي، وين المؤذن، قال لي نعم، قلت ليهو تعال، فجوا التلاتة أشخاص أديناهم تلاتة مصاحف، قلت للقوني آدم ياخ أقرا لينا من سورة البقرة من أول سورة البقرة وأدخل فيها، وانت أقرا لينا من أول سورة الصافات ويدخل فيها، وانت يا شيخنا اقرا لينا من أول سورة الدخان ويدخل فيها، وانت يا مؤذن أذن لينا، فقط، ده الكلام القلناهو، ياناس الكلام ده شرعي ولا غير شرعي؟ كلكم القاعدين بتسمعو، شرعي ولا غير شرعي؟ ما في زول فتح خشمو، كل الناس قاعدين يشوفو في الشغلة دي، ومقتنعين انو الكلام ده ما فيهو لف لكن غضبانين، وزعلانين دايرين كيف انو أنا ربنا يخذلني وأنو أفشل ويسووا فوقي الدايرنو، وغيرة للدين ما عادية، وليهم الحق، يعني غيرة للدين ما عادية لكن بجهل، قدر ما تكلمت مع واحد ما فيش واحد فيهم رد لي بالكلام ده صاح ولا غلط فيها واحد قدام هناك ياناس ما في زول يا خوانا بقدر بقول لي الكلام ده صاح ولا غلط، الكلام ده صح؟ واحد هناك قال لي (يصدر صوتا بفمه علامة الموفقة) بس! الكلام ده صح (يكرر نفس الصوت) يعني بدل يقول صح ما داير ذاتو يقول لي صح، (يكرر الصوت)، ما في شي غير شرعي، ده دين، وبعدين الناس ديل ما بعرف فيهم ي زول التلاتة ديل والرابع المؤذن ما بعرفو، وقلت ليهو يا شيخ آدم انت بتعرفني؟ قال لي الله ما عرفني بيك ذاتو، وليهو حق زعلان، وانت يا شيخنا بتعرفني؟ قال لي كدي (يهز راسه نفيا) ما بعرفك. قلت ليهم أشهدوا لأنو ما تقولو الناس ديل متفقين معاي، ديل ناس منكم وأنا غريب في البلد دي، يبقى أنحنا حنبدا الآتي: يا شيوخ تبدو وتعوذوا وتخشوا في القرآن لغاية ما أنا أقول ليكم أقيفوا بعد ده تقيفوا وانت يا مؤذن أذن، لو كمل الأذان دبل الأذان وتلتو وربعو لغاية ما نقول ليك أقيف، والعسكري واقف، وقمت قلت لواحد آخر قوم قبيل السكين البطعنوا بيها التوت والنوع ديلاك من الناس ما بلبسو السكين في ضراعهم زي السكين دي تلبسها في ضراعك لا بلبسوا السكين تحت هنا، وطويلة جدا أطول من سكاكينا دي، فقام واحد عندو سكينة حادة جدا لو عملتها في الكف كده بتشيلها ليك، زي الحلاقة سنين جدا فقلنا ليهو تعال قوم انت ياخونا بعد ما الناس ديل يقروا وأديتك اشارة معناهو قطع لينا اللحم ده، وقلت ليهم أنا ما بصم خشمي وما بتكلم أقرا، بفتح خشمي كده عشان تشوفوه فاتح لأنو الانسان إذا كان صم خشمو ممكن يتكلم في داخلو لكن لو كان فاتحو ما يقدر يتكلم أي كلام، عشان ما تقولو أنا بنعمل شي معين وعشان كده بطل الحجاب ده، الناس ديل حيبطلو الحجاب ده بإذن الله تعالى مع قراءة القرآن، اللهو القرآن ده جيبطل الشي الفيهو الدجل والشعوذة والشواطين الموكلين بالحجاب، خلاصة المسألة تعوذوا من الشيطان الرجيم وخشوا في القرآن، والله الذي لا إله إلا هو أول قطعة هو ذاتو لمن خاف القايمة دي قطعناها تلاتة قطع، وقطعة صغيرة أربعة، لكن القطع الكبار تلاتة قطعة، كل قطعة براها، الناس ذاتها استغربت، الكلام ده قبيل الشايفنو حجب والآن ما حجب ليه؟ فيا دوب الناس بدت تستغرب والحاجة الفي راسها اتغيرت، قلت للعسكري أضرب، ما بيعرف داك رطن ليهو قال ليهو قال ليك أضرب العسكري ذاتو ما كان مصدق لأنو قبيلك المشهد أنو الذخيرة دي قبيلك الام بي فايف ده ما بضرب والأن حيضرب، فعلا ضرب الطلقة الأولى قامت والتانية أربعة طلقة في اللحمة وأي زول قبيلك جرب الشغلانية دي قلنا ليهو قبيلك تعال أضرب برفع يدو بدق في اللحمة ذاتها، الناس استغربت في زول هناك جوه الناس كبر، واحد بس، ما عارفو كبر لي شنو، كبر تأييد لي أنا، كبر لي شي في راسو مش عارف، خلاصة المسألة قلت ليهم الحجاب بطل ولا ما بطل؟ قبيلك الحجاب بحجب، لو الحجاب ده فعلا صاح ودين مفروض يزداد قوة الآن ده دين دي البقرة، في زول عندو شك في البقرة؟ في زول عندو شك في الصافات؟ في زول عندو شك في الدخان؟ مافي زول عندو شك، يبقوا ديل ناسكم وبيقروا الآيات وده آذان، رايكم في الكلام ده شنو؟ كلام مشروع؟ كلام مشروع لاشك فيهو لكن ما في زول بتفاهم، خلاصة المسألة قلت للناس ديل أقيفوا اسكتوا، بعد شوية أكتر من خمسة ستة دقايق قلت ليهم الآن الحجاب برجع بحجب، كيف؟ واحد قال لي كيف؟ برجع بحجب، لأنو قبل شوية يوم القرآن ده قرئ بطريقتوا الصحيحة الحجاب ده كان فيهو شواطين، الشواطين ديل هم الموكلين بحماية هؤلاء الناس، أو بدائرة معينة، يعني الشيطان موكل في قطر معين، مترين في مترين أو تلاتة في تلاتة، أو خمسة في خمسة، عشان كده تلقى الناس البكتبوا الحجبات البعرفوا الحجبات صاح يقول ليك ضامن عشرة، ضامن خمسة ضامن تلاتة ضامن اتنين ضامن عشرين، بضمن عشرين نفر ده معناهو بكون عندو زي خمسة متر في خمسة مترفي شكلدل دائري، اي انسان في داخل هذه الدائرة بحجبو، أما ضامن واحد بحجبك انت بس يعني ده بيكون قطره نص متر في نص متر بس، وبكون فيهو شواطين بسيطين، أما ديلك بكون فيهو شواطين وعفاريت كبار جدا وخاشين في الحتة دي أي شي جايي من هناك بحموه وبصدوه عنك وما بخلو شي يؤثر فيك، جنون.
فقلت ليهم الآن الحجاب بحجب، ليه؟ واحد قال ليه؟ قلت ليهو لأنو فيهو شواطين وعندما قرئت البقرة كل شيطان لا يستطيع أن يتحمل هذه السورة، والصافات حارقة والدخان كذلك من السور الطاردة للشياطين وحارقة للشيطان، والأذان لايستطيع أي شيطان واقف مدى هذا الصوت الشياطين يهربوا ولهم ضراط يبتعدوا من المكان ده، هسع يوم نحنا سكتنا والقرآن سكت هم بجوا من بعيد بشيفوا هل الحجاب ده قاعد بصورتو دي، هم موكلين يكونوا قاعدين معاهو وعندما تفرتقوا وتطلع الحجات الفيهو في حاجات بتكشحها، بعد ده رفعت عنهم التكلفة وبرجعوا للروحاني وبوروه أنو حاصل كذا وكذا وكذا، أيوه بعد ما عملنا المسألة دي قلت ليهم الآن الحجاب بحجب وفعلا جربناهو لقينا أنو السكين القطعت دي ذاتها تاني ما بتقطع أول ما تختها زي ده وتقوم تقطع كدي بتسمعها تسوي زييط زيط زي اللستك شفت لستك الكتربيلار الكبير ده وعندك حديده كالة ماها سكين وداير تقطعو ممكن ولا ما ممكن، لستك وبتاع عربية كبيرة قال ليك قطعو بتقطعو ولا ما بتقطعو؟ نفس اللحمة بقت زي اللستك أصلو ما بتنقطع و لا السلاح بضرب فيها، نفس السكين القبيل قطعتو لي تلاتة ديك الكبيرة وقطعة صغيرة نفس السكين جربناها تاني بقت ما بتقطع كل ما نختها في اللحمة تعملها كده زيط زيط زيط ما بتقطع، السلاح كذلك جربناهو برضو رفض يضرب، قلت ليهم طيب عندي شرط، وقبل نحنا نخش في ده أنا كان عندي شروط، قلت ليهم إذا كان قدرت بطلت هذا الحجاب أنحنا، أنا ببطلو بإذن الله وإذا كان بطل حنفتحو حنلقاهو أنو الشي الفيهو جوه ماهو دين صاح، اما مكتوب بالزيادة واما مكتوب بالنقصان واما عندو أشياء طلاسم، الأشياء البنلقاها في الحجاب دي ما بنلقاها في القرآن ولا بنلقاها في السنة، خالص ما بنلقاها، قال لي أصلو الكلام ده ما صاح كلو دين، قلت ليهم ما كلو دين فيهو دين بتلقى البسملة وبتلقى لاصلاة على النبي وبتلقى آيات من القرآن موجودة في الحجاب لكن الآيت دي ولا لقيتها بالزيادة ولا النقصان، وحتى لو لقيتها سليمة بتلقى فيها طلاسم زيادة على الأيايت الطلاسم ما بتلقاها لا في القرآن ولا في السنة، التانية بتلقى خلاف ذلك أدعية، وبتكتب الحجبات بي نجاسات، مافيش حجاب بحجب صاح مكتوب بي مدتد طاهر على الإطلاق، أي حجاب حقق الأمر بتاعو حقا هذا الحجاب الدين المكتوب فيهو ما مكتوب بمداد طاهرة، مكتوب بي مداد كلها نجسة وأضافو عليها نجاسات وتقرب الشيخ الذي يكتب بالشرك لي ابليس وترضية للشياطين عشان كديكلفو سفها عشان يجو يتوكلوا يشتغل مع الراجل ده بتاع الحجاب ده، فقلت ليهم الحجاب ده عندي شرط بعد ما يبطل حنفتحو ونثبت ليكم ا=أنو الشي الفيهو ده ما هو دين صحيح، زيادات وانتو حتقتنعوا بي كلامي ده، غصبا عنكم لأنو أديكم شي شرعي، وإذا كان لقيتو سليم الدايرنو سوهو، قالو لي طيب اذا كان لقيناهو صحيح ودين صافي مافيهو أي شي أنحنا الحجاب بتاعي ده اشتريتو بي ألف سيفا القروش بتاعتهم اسمها السيفا، بألف سيفا يعني ما يعادل مليون ونص سوداني، لو لقينا أنو الدين الفيهو ده صحيح مكتوب سليم وما فيهو طلاسم وما فيهو أي شي بسم الله الرحمن الرحيم معناها بسم الله الرحمن الرحيم، الآية التانية هي سليمة ونضيف ما فيهو أي شي أنا بديك اتنين ألف سيفا يعني تلاتة مليون سوداني، الآن ياها دي القروس جاهزة لو لقينا الكلام ده صاح، ولو ما لقيناهو صح شرطي معاك الحجاب ده حنحرقوا ونشيلو معاي، قال لي مش كده ديل حجبات تانية حنديك ليها لو الكلام ده بقى صاح، قلت ليهو طيب، بل كمان الناس قعدوا كلهم الموجودين قالو لي شوف يازول هوي انت لو كلامك ده بقى صاح كلامنا ده كلو يكون كضب وكلامك انت ده يبقى صاح أنحنا حجباتنا دي حنديك ليها، تحرقها تشيلها توديها معاك السودان أنت حر، قالوها بطريقة بتاعة زعل جدا وبطريقة تحدي، لأنو هم واثقين من الكلام البسووا فيهو، لو عارفين أنو المسألة بتجيهم ما كان قالوها، فقلت ليهم كلنا على عهدنا فعملنا التجربه تانية رجعت الناس ديل وجبت ناس تانين، بس المؤذن خليناهو هو، اخترت تاني تلاتة أشخاص وجينا أديناهم المصاحف، أدوهم المصاحف، بتعرفوا تقروا دايرنكم انتو برضو تقروا لينا، بتعرفوني؟ قالو لي ما بنعرفك، قلت ليهم وأنا كذلك ما بنعرفكم، يبقى عشان ما تقولو أنا متفق مع ديل ديل ناسكم، وأنا زول غريب، خلاصة المسألة الناس ديل جووبدو يقروا نفس السور الأولى وجبنا اللحمة ذاتها والحجاب فيها وقطعناها قطع صغار وضربناها أربعة طلقة كل الطلقات دي قامت فيها، وأي زول عندو شك جا جرب مظبوط والحجاب بطل تماما فالناس استغربت، وأدت الدنيا العجب وقالت سبحان الله أنحنا ما كنا نعرف أنو المسألة دي فعلا بهذه الطريقة، قلت ليهم الآن قبل ما الناس ديل يسكتوا أنحنا حنقطع الحجاب ده ونطلعو وفعلا قطعنا الحجاب وطلعناهو ياهو ده الحجاب، حجبات اتنين، واحد فتشناهو مالقيناهو وده زميلو التاني، ياهو ده الحجاب (يعرضه على الجمهور) ده الحجاب موضوع الحديث اللي كان بشتغل كل الشغل مع زميلو التاني الهسع كنا بنفتش فيهو انشاء الله كان لقيتو أوريكم ليهو، ده الحجاب البخدم الغرض ده كلو مع الواحد التاني أكبر منو شوية، ماعارف يمكن نسينا في البيت ولا نسيناهو في حتة معينة، ده الحجاب، ده بحجب حجاب صح مع زميلو التاني، قمنا فرتقنا الحجاب وقعدنا شفناهو، أول حاجة قلت ليهم ده شنو المربع ده، قلت ليهم سالتكم بالله المربع ده لو فتحنا القرآن الموجود قدامنا من البقرة للناس بتلقى مربع زي ده؟ في؟ قالوا لي ما في، قلت ليهم ولا في سنة النبي محمد صلى الله عليه وسلم، ولا في السنة موجود، يعني الكتب بتاعة السنة كلها مافيش كلام زي ده ولا في المذاهب الأربعة، طيب الكلام ده جا من وين؟ جا بتعاون من شياطين الإنس والجن الذين يوحون لبعضهم البعض زخرف القول أنو ده من الدين، ده في شياطين من الانس بتعونو مع شياطين الجن ليعلموا الناس السحر بالمسألة دي وينسبوها للدين وهي ما من الدين في شي،آيي واتبعو ما تتلوا الشياطين على ملك سليمان وما كفر سليمان ولكن الشياطين كفروا يعلمون الناس السحر، شياطين الانس والجن بتعاونوا مع بعضهم وبعلموا الناس النوعية دي من الشغل، وده بيعتبروهو دين وده ما دين، ده شرك، وكفر والحاد، طيب بعد ما فتحناهو، فتحنا داك وفتحنا ده أشرت للحتات دي وقلت ليهم ده شنو ده دين؟ كان دين وروني وين؟ عندنا مصدين : في الكتاب؟ ياهو ده موجود، في السنة؟ جيبوا لي السنة. قالوا الشي ده مافي. قلنا ليهم طيب واحد. صدقت في كلامي. اتنين: قلت ليهم طيب خلين نقرا الحجاب ده فيهو شنو، قبيلك قلنا الحجبات دي ولا كتبت بالزيادة ولا كتبت بالنقصان وأنحنا الآن دايرين نعرف الموجود في الحجاب ده شنو، الموجود هنا في الحجاب ده فوق بسم الله الرحمن الرحيم، دي سليمة، والصلاة على النبي صلى الله عليه وسلم، كويس، نشوف نخش جوه في شنو، واعتبر أنو الكلام ده (يشير للمربع في الحجاب) كلو دين، الكلام البتشوفو ده اعتبرو دين، وأنحنا كان أهم لينا شي الحجاب التاني ده ما عارفنو مشى وين، خلاصة المسألة اعتبر ده كلو دين، في كلام أنا داير الناس تسمعو، بعد ما شفت الكلام السمح ده واعتبرتو انو قرآن، في كلام هنا يا الله يا الله ياالله، والمرة الفاتت اتكلمنا عن الاسم المفرد، تاني بتلقى شنو يا محمد يا محمد يامحمد وده شرك بالله، ده شرك، التالة بتلقى آيات مكتوبة، الآيات الكانت مكتوبة انا أعطيناك الكو واحد. اني رايت أحد عشر كو اتنين زينا السماء الدنيا بزينة الكو. الله يكويكم في نص روسينكم انشاء الله. أاذن النبي بهذه القراءة؟ أليس هذا هو التزوير؟ أليس هذا هو الشرك والكفر؟ (يعيد قراءة الآيات الناقصة) أيكتب القرآن هكذا؟ أليس هذا بالتزوير؟ ده ما دجل؟ ده ما كفر؟ ده ماشرك؟ قرناها ليهم بنفس الطريقة. قلت ليهو يا مولانا آدم، القوني آدم، إنا أعطيناك شنو؟ قال لي إنا أعطيناك الكوثر. طيب. إني رأيت أحد عشر شنو؟ قال لي إني رأيت أحد عشر كوكبا، زينا السماء الدنيا بشنو؟ قال زينا السماء الدنيا بزينة الكواكب، قلت ليهو أجمع لي الحروف المحذوفة في التلاته آيات لقيناها تمانية حرف محذوف، تمنية حروف أكلها الشيخ بلعها تب، كتبوا بهذه الطريقة قلت ليهم أليس هذا بالتزوير ، إنا لله وإنا إليه لراجعون، هكذا يكتب القرآن في الحجبات، وهكذا يكتب القرآن في المحايات، وهكذا يكتب القرآن في البخرات، البخرات الزي دي، دي الجابوها لي هسع منكم من الجامع هنا، أما بخراتي أنا ياهي دي دي كلها بخرات (يرفع كيس ملئ) بتلقى القرآن ده مكتوب بالتزوير ده في الآيات دي، وكل آية بتلقاها في الحتة دي بتلقاها كلها مزورة، زي الورقة التانية زي دي: زي الورقة التانية زي دي مكتوب فيها شنو؟ فسيككفككهم الله مكتوبة بهذه الطريقة وهي الكلمة في سورة البقرة فسيكفيكهم الله وهو السميع العليم، في زيادة بتاعة أربعة كاف زيادة، وبحجب، تكتبوا بهذه الطريقة بحجب. تكتبوا بي طريقة شرعية ما يحجب، أليس هذا بالتزوير؟ ده ما تزوير؟ أأذن النبي صلى الله عليه وسلم أن يكتب القرآن بهذه الطريقة؟ أم لهم شركاء شرعوا لهم من الدين ما لم يأذن به الله ولولا كلمة الفصل لقضي بينهم وإن الظالمين لهم عذاب أليم.
وإن كادوا ليفتنونك. النبي صلى الله عليه وسلم لا يستطيع أن يزيد في القرآن ولا ينقصوا، وربنا خاطب النبي صلى الله عليه وسلم في آيات كتيرة وقال للنبي : ثم جعلناك على شريعة من الأمر فاتبعها و لاتتبع أهواء الذين لا يعلمون، وقال للنبي محمد صلى الله عليه وسلم: وإن كادوا ليفتنونك عن الذي أوحينا إليك لتفتري علينا غيره وإذن لاتخذوك خليلا، ولولا أن ثبتناك لقد كدت تركن إليهم شيئا قليلا، لإذن لأذقناك ضعف الحياة وضعف الممات ثم لا تجد لك علينا نصيرا، وقال الله سبحانه وتعالى للنبي محمد صلى الله عليه وسلم: وإذا تتلى عليهم آياتنا بينات قال الذين لا يرجون لقاءنا أئت بقرآن غير هذا أو بدله قل ما يكون لي أن أبدله من تلقاء نفسي إن أتبع إلا ما يوحى إلي أني أخاف إن عصيت ربي عذاب يوم عظيم، قل لو شاء الله ما تلوته عليكم ولا أدراكم به فقد لبثت فيكم عمرا من قبله أفلا تعقلون، فمن أظلم ممن افترى على الله كذبا أو كذب بآياته إنه لايفلح الكافرون.
أليس هذا التزوير، ده ما تزوير ؟ ده تزوير. ده دجل ده كفر والله أنه كفر. ووالله أنه الإلحاد: إن الذين يلحدون في آياتنا لا يخفون علينا، أفمن يلقى في النار خير أم من يأتي آمنا يوم القيامة اعملوا ما شئتم إنه بما تعملون بصير.
وربنا قال :وإن منهم لفريقا يلوون ألسنتهم بالكتاب لتحسبوه من الكتاب وما هو من الكتاب ويقولون هو من عند الله وماهو من عند الله ويقولون على الله الكذب وهم يعلمون.
ويقول الله: قد كان فريق منهم يسمعون كلام الله ثم يحرفونه من بعد ما عقلوه وهم يعلمون.
ويقول الله سبحانه وتعالى فويل للذين يكتبون الكتاب بأيديهم ثم يقولون هذا من الله ليشتروت به ثمنا قليلا فويل لهم مما كتبت أيديهم وويل لهم مما يكسبون.
وربنا ضرب لينامثل في سورة البقرة عن بني اسر ائيل رسل ليهم رسول والرسول جا قال ليهم يا بني اسر ائيل الله بقول قولوا حطة نغفر لكم خطاياكم وسنزيد المحسنين قالو شوف يارسول هوي امش قول لي الله بتاعك ده أنحنا ما بنقول حطة، بتقولوا شنو يا ملاعين؟ قالوابنقول حنطة وفي بعض التفاسير قالوا بنقولوا حبة، يا ناس قولوا حطة نغفر لكم خطاياكم وسنزيد المحسنين قالوا ما بنقولو حطة بتقولوا شنو بنقولوا حنطة، في الآية تمانية وخمسين من سورة البقرة، الآية تسعة وخمسين قالت شنو؟ فبدل الذين ظلموا قولا شنو غير الذي قيل لهم فأنزنا على الذين ظلموا رجزا من السماء بما كانوا يفسقون، هذا هو القرآن يكتب بهذه الطريقة ويحجب يبقى نحنا عشان نؤكد للناس أن ما نقوله صاح الراجل ده نحنسوا ما زلنا دفعنا ليهو التمن الكتير وحندفع اذا رضى ونجيب الحجاب ده هنا نجربوا بإذن الله تعالى يحجب تشوفوه بي عينكم، نقرأ القرآن أو تقرؤون القرآن يبطل بإذن الله تعالى كويس، بعد داك انشاء الله حنفتحوا وتشوفوا نقرأ أنا للآن ما عارف الجواهو شنو، لكن حنقراهو، ده خلو، لو في انسان عندو حجاب بيحجب غير الراجل ده جيبوا لينا هنا، انشاء الله ما نفتحوا انشاء الله بس نقرأ فيهو القرآن، أو تقرؤون فيه القرآن وببطل بإذن الله تعالى عشان تتأكد أنو بإذن الله تعالى أنو الشئ البحجبك ماهو دين، شياطين موكلين بعمل معين بقوم بيها الفكي، بقوم بيها الشيخ بقوم بيها الزول الكاتب الحجاب ده، لعالم الجن والشياطين الروحانيون، بقدموا ليهو مجموعة من الشياطين بكونوا مواظبين، يعني الانسان العندو التصريف، في حجاب بقولوا ليهو حجاب التصريف، الحجبات دي كتيرة، في حجاب اسمو التصريف التصريف يعني شنو؟ بتصرف عنك أي ذخيرة ده بيكون في مجموعة من الشواطين مع الحجاب وواحد منهم بيمشي للراجل الداير يضرب ذاتو أنا ماسك البندقية هنا وشايف الحرامي هناك عشان أنشن وأضربو ياهو داك هو مختفي هناك، وعشان أنا أضربو وياهو العدو وأنا أضربو هنا، واحد من الشياطين بكون قاعد وراي هنا بمسك مؤخرة البندقية دي انت ما شايفو، هسع عندنا شياطين معانا في المسجد ده هنا انتو ما شايفنهم، طيب دهو واحد منهم بيجي يمسك مؤخرة البندقية أنا بنشن للإنسان هناك عشان أضربو، ده مهمتو من هنا أول ما أنا أتحمق وعشان أعمل (كلمة غير واضحة) أو الغماز، ده هنا مهمتو يعملها كدي شفت كدي، تو تو تو، بحركها كدي بتضرب ومع الحماقة بفتكر انت أنو مع الجبدان بتاع البندقية البتعمل كدي دي الارتداد ده بتفتكر أنو ده من البندقية، لا ده من الشيطان الوراك قاعد هنا ده، ده شغلتو بس يلوش ليك البندقية كدي تو تو تو ، انت بتضرب والمسألة دي كده بقول ليك الزول ده عندو تصريف، ياهو زول قريب جنبك، والطلقة ما بتصيبو ليه لأنو في شيطان هنا ماسك المؤخرة عشان يلوش النيشان وواحدين آخرين قاعدين معاهو هو وبعدين هم بشيفوا الطلقة وهم أسرع في نوع من الشياطين أسرع من الطلقة، ده هو بشوف الطلقة أول ما شاف طلقة جاية أي طلقة عليهو بس يضرب زي البحتت أي طلقة جات يطقها يلوشه بي جاي يلوشه بي جاي، ويقول ليك عندو تصريف، الطلقة ما بتصيبو، ونوع آخر من الحجبات برضو فيها شي آخر مجموعة من الشياطين أول ما الطلقة دي تجي من هناك يمسكوها بس ينزلوها تحت، تلقاها ضربتو كلها حتت الطلق دي، يعني مجموعة بتاعة ذخيرة تجي تلقاها مصبوبة تحتو وهدمو ده تلقاهو ما اتقدد وكل الذخيرة دي قاعدة، بقول ليك والله كبينا فيهو ذخيرة ، كدي امشي مناطق الالتماس بتاعة النهب المسلح، امشي الجنوب، شوف الكلام ده صاح ولا ما صاح، بتلقى أنو بقول ليك أنو في حرامية والله العظيم العساكر وصلوهم والله الحرامي ده إلا مسكوا مسك، ذخيرتو انتهت وما انضرب، وكل الذخيرة دي كبيناها فيهو ما ضربناهو، أخيرا عملنا ليهو خطة، وهو يوم تعمل ليهو خطة إلا كان ذخيرتو كملت، لكن كن ما كملت ما بتقدر تعمل ليهو خطة لأنو أول ما اتلفت بلقاك بضربك، وانت ذخيرتك بتكبها فيهو ما بتعمل ليهو شي، في النهاية بجوا بيمكسوا مسك يوم ذخيرتو تكمل، يمسكو بعد داك يقوموا يجردو يسلمو يلقوا عندو حجبات يقول ليك ديل الحجبات دي، سبحان الله الناس تفتش للحجبات دي، أنا لقيت فلسط ينيين وين في ياوندي ماشين بي عربتيهم لاندكروزر ماشين يفتشوا في الحجبات، هي يا ناس، قال انحنا دايرين هنا في حجبات نلبسها وماشين لإسـ رائـ يل دي ندمرها، يا ناس انتو جاينن من هناك للحجبات دي؟ آيي. وفتشوا أنا ما عارف لقوا ولا ما لقو، أنا هديتهم قلت ليهم أرجعوا، والكلام ده ما صاح لأنو الحجاب ده فيهو شرك، انت لو داير تموت تموت عادي لكن بالشرك والكلام الفارغ ده ما ممكن، ما اقتنعوا بي كلامي قالوا أنحنا عندنا قضية ماشين ليها ما لينا شغلة بي كلامك البتقول فيهو ده، خلاصة المسألة مشو لقوا ولا ما لقوا أنا ما عارف، خلاصة المسألة كل الحجبات حتى البخرات دي، دي بخرة جابوها لينا هنا كدي نفتحها نشوف فيها شنو، وما عارفها ذاتها من أجل شنو، دي بخرات تلاتة اربعة واحد اتنين تلاتة أربعة خمسة، بسووها ظريفة كدي وبعد ده تلقى كلام فيها هنا وبتلقى أشياء، آها، ده صمغ لبان، وده شفت آها دي: لابد تلقى فيها خزعبلات ودجل قول ده بسم الله الرحمن الرحيم قول سورة البقرة الحجات دي شنو؟ الناس القريبن شايفنها. دي نجمة داوود وده هود وده آدم وده كذا وده كذا خواتيم ياهو نفس الكلام البنقولوا بتلقاهو في أي حجاب، دي بخرة أدوني ليها في المسجد هنا كل الحجات دي بتلقاها، دي واحدة، طيب نفتح منها تانية، آها دي كسبرة، ياها دي كسبرة شايفنها، دي كسبرة، شيف المستهبل ده، كسبرة، كاتب هنا (يضحك) وكاتب حتى السحر ياهو كاتبو، والسلطان، يعني أول حاجة كاتب سبعمية سبعة وتمانين سواخط مش عارف السحر وشنو مش عارف وكتابة ما بتتقري وهنا كاتبين فسيكفيكهم الله وهو السميع العليم ولا حول ولا قوة إلا بالله العلي العظيم حسبي الله ونعم الوكيل، ومن شر الحسد وشنو مش عارف ياهو نسف الكلام، فسيكفيكهم الله ياها ذاته مكتوبة هنا، في دي، ده غش، دجل شعوذة إن كان لابد فاعلا ليه ما يخلي بسم الله الرحمن الرحيم، البسملة ما كاتبها فيها الصلاة على لانبي ما كاتبها فيها يها دي قاعدة دي بخرة، ودي ما عارف أداها ليهو لشنو، كان من أجل الصداع ياخي شوف، شفت الكسبرة دي عندك صداع، ما يغشك زي ده ويبيعها ليك بقروش، كسبرة لو شحدتها من الدكان بيدوك ليها، امشي للدكان لو ما عندك قروش قول ليهو ياخي أديني أربعو ولا خمسة قطعات بتاعة كسبرة بديك ليها، بديك الكسبرة دي، وقول ليهو أديني خمسة ستة حبات بتاعة الحبة السوداء، الكمون الأسود خليه يديك، يديك اتنين و لا تلاتة مسمار بتاع شنو قرنفل، وتشيل حبة بسيطة من لبان اللبان البتبخرو بيهو النسوان ده، الربعة ديل أجمعهم وختهم في ورقة زي دي في أي حاجة مش عندك صداع تخت فيها نار وتشمها الصداع بخليك، ما داير ليهو أنك تخسر ليك تلاتة ألاف ولا أربعة آلاف ولا كلام فارغ، وهو بعمل الحركة دي وبخت ديل عشان انت تعتقد أنو ده من الدين، يعني لو مشيت عملت البتاعات ديل براهم ما بعمل ليك شي لا بعمل ليك شي، لكن دي حيل ونوع من الأساليب عشان ياكلو مال الناس بالباطل وما ممكن يوريك ليها بقول ليك دي سر المهنة،والله بقول شنو: إن الدين يكتمون ما أنزلنا من البنات والهدى من بعد ما بيناه للناس في الكتاب أولئك يلعنهم الله ويلعنهم اللاعنون إلا الذين تابوا وأصلحوا وبينوا فأولئك أتوب عليهم وأنا التواب الرحيم، شي بنفع الناس ما تكتموا هو ليه انت بجيك لو قبلك كتموا ما كان جاك، طيب شي الناس بيستفيدوا منه لمصلحة الانسان ما تكتمو قولوا للناس عشان ربنا ذاتو يزيدك علم، فهم هنا بقول ليك لا سر الشغلة أو سر المهنة بقول ليك ده سر المهنة ده نوع من البخل ونوع من الدجل بقول ليك سر المهنة عشان كدي واحد منهم قال وعلم الحقيقة من أباح بسره للغير أهدر ماله من بعد الدم، لم يستطع موسى الكليم لخضره صبرا عليه فكيف بالمتعلم، يعني كلامات ما توريها للناس، ده معنى الكلام ده.
خلاصة المسألة الحجبات دي، في نوع منها كضب ودجل، واي مرض ده أحيانا بيدو هسع دي في كتير من الحجبات هنا كضب، دي كلها شفت المجموعة دي واحدة منها بتحقق الكلام القالوه ما في، ولكن أحيانا بتلقى شيخ ويكتب ليك حجاب زي ده ويديك ليهو بنفعك، زي حل السحر بالسحر سحر حلوه بي سحر نفعك لكن انت خسرت الدنيا والآخرة وخسرت رب العالمين وأغضبت رب العالمين ورضيت الشيطان، في بعض الحجبات من أغرب الأنواع بتاعة الحجبات الموجودة عندي هنا حجاب هنا غريب جدا جدا حجاب وبعدين شوف أي مرض من الشواطين متدخلين فيهو الشواطين لو مشيت للناس ديل وأدوك ورقهم ده قد يخليك المرض يعني بتشفى منه، امرأة عندها ولد دلاهة عمره تلتاشر سنه، ريالتو سايلة لا بياكل إلا ياكلوه، ما بنوم ولا برقد إلا يرقدوه، وكان صحي بخره وبيسوي في محلو داك، تلتاشر سنة مشت للشيخ، الشيخ، اسمو شيخ محمد، الشيخ السلام عليكم مرحب السلام أها أنا جيت عندي مشكلة، مشكلتك شنو يامرة؟ قالت والله جيتك وشفت الولد ده عمرو تلتاشر سنة، تلتاشر سنة الولد ده دلاهة عذبني في رقبتي دي، لا بياكل لا برقد لا.. لا.. لا.. ، ياخي جيتك تسال لي الله أو جيتك تداويه لي، قال ليها كويس، أولا تمشي تجيبي الآتي: تمشي تجيبي زيت سمسم، تمشي تفتشي زيت سمسم وتجيبي، وتجيبي بصلتين وتمشي تجيبي ديك أحمر ورقبتو زرقاء وأشابيرو مقطعات وخصي، ديك خصي، انتو شفتو ليكم ديك خصي؟ خصي قال. المرة فتشت بي جاي بي جاي لقت ديك بالمواصفات لكن خصي ما خصي ما بتعرفو، شالتو جابتو للشيخ، آها جبتي قال آيي، وبعد ده دفعها قروش، قال ليها طيب امشي اليوم الفلاني تعالي، مشت، اليوم الموعود جات وجابت الولد معاها فلقت وريقة صغيرة مكتوبة قال ليها شفتي الورقة دي أدرعيها للولد في رقبتو خلاص الولد ده ببقى كويس، مشت شالت الولد ومشت بيتها ودرعت الورقة في رقبتو والولد الليلة وبكرة وبعد بكرة بقى كويس تماما رجع بتكلم وبياكل براهو وبشرب براهو وبرقد براهو وبنوم براهو وكمان ودوهو المدرسة دخلوهو الابتدائي، هو عمرو تلتاشر سنة لكن عشان الناس عارفين حالتو استثنوهو ودخلو، دخلوهو المدرسة قعد يقرا، بعد شهر شهرين تلاتة خمسة ستة شهور الولد استمر كويس جدا والحمد لله، خلاصة المسألة مشى يستحم براهو وقعد في الطشت يستحم وقامت الورقة دي اتقطعت، دخلت المويه بعد ما اتبلت جا لأمه يا ولد الورقة وينها؟ هبشها لقاها مافي قال ليها والله ما عارف، قالت ليهو الورقة انت مشيت استحميت قال مشيت استحميت في المحل الفلاني، مشت فتشت الطشت لقت الورقة جوه الطشت انبلت تماما اتمزقت قامت الوية فرتقت الورقة، أول ما فرتقتها مع الخيوط والبلاستيك فرتقتها لقتها شنو؟ لقتها بي جاي جزء من مقالة في جريدة الأيام سابقة، جريدة الأيام، وبي جاي صورة الرئيس جعفر محمد نميري، ده بي جاي، شافتها كدي هوي، ده ما الرئيس السابق للسودن جعفر محمد نميري أيوه، ودي جريدة لقوا هنا مكتوب عليها جريدة الأيام، شالت الورقة المسكينة ومشت لي فكي محمد، يا فكي محمد كيف حالك مرحبا يامولانا كيف حالك قالت ليهو أنا جيتك راجعة تاني، في شنو ياولية مش أديتك الورقة العلقتيها للود أوع يكون أهملتوا فيها وطارت، قالت ليهو لا ما طارت، أها الحصل شنو، قالت والله الحصل الورقة دي الولد مشى استحم في الطشت وانقطعت في الموية وانبلت واتمزقت، أنا مشيت فرتقتها عشان أشرها تنشف واطبقها وألفها لفة تانية كويسة وأربطها ليهو في رقبتو لقيت الورقة دي ياها دي شافها كده وقال ليها فيها شنو دي؟ قالت ليهو يا مولانا دي مش جريدة الأيام قال ليها نعم، والبي جاي دي مش صورة بتاعة جعفر محمد نميري قال ليها آي، قال ليها فيها شنو يامرة، قال ليها ده انتي ما بتعرفي قال ليها ده ما الرئيس جعفر محمد نميري، قال ليها انتي ولدك بقى كويس ولا ما بقى كويس قالت بقى كويس، قال ليها ده الرئيس ده إذا كان نشف ريق الشعب السوداني كلو لولدك ده ما بنشف ليك ريقو؟ دي حجة الشيخ! وشوف خبرة الشيطان وتضليلو للإنسان، صورة بتاعة اجعفر نميري بتعالج ليها مريض؟ لكن ده أساسا مرض من الجن والشياطين، عشان يشوفك ضليت وحتضل الآخرين طوالي يعينك في ذلك عشان انت تعتقد وتفسد مرة واحدة، ده اعتقاد أعمى مرة واحدة، المسكينة شالتها طبقتها ومشت سوتها تاني علقتها ليهو في رقبتو، تخيل الكلام ده، ومسألة لأنو متسلط فيها الشيطان.
الورقة الماسكة دي ده ورقة حجاب وسيدها أخدها بعجلة جذعة، وحلف وأقسم قال أنا من رابط الورقة دي في ضراعي سبعتاشر سنة بفتش للشر ما بلقاهو، سبعتاشر سنة، لابس الورقة دي سبعتاشر سنة قال لابس الورق دي بفتش للشر ما بلقاهو، قال أحيانا بمشي لي سيد الدكان عشان يؤكد أنو حجابو ده في ضراعو لغاية ما يهزو تمام ويمشي لي سيد الدكان يقول ليهو أديني كذا وأديني كذا بعد ما أدهو ملا كيسو تمام بقوم ماشي بقوم سيد الدكان يقول ليهو تعال ما دفعت لي، لا دفعت ليك، دفعت لي ما دفعت لي قال لي طوالي بقوم بزنقه معاهو، عشان اتشاكل معاهو، قال سيد الدكان يقعد يشوف لي ولو في ناس بقول ليهو يا زول أقيف كدي قول بسم الله، كدي راجع نفسك احتمال أداك الراجل، ياخي أديتك حسابك مش كان كدي أيوه أديتك، ياخي ما أديتك أديتك ما أديتني، أها أنا بتشدد وهو بنرخي، أي زول موجود معانا بقول ليهو يازول هوي الجاتك في مالك سامحتك، ياخي خلي الراجل ده، الراجل جه والله انفعالو ده عندو سكري والله تقوم تعمل معاهو مشكلة يموت في يدك دكانك ده ما يخلصو، قال دي عملتها ولامرة ولا مرتين ولا تلاتة، لأني داير أفتش الشر ده، وقال لي الزول ده قال لي لابس الحجاب ده شر ما يجيك كلو كلو، قال دي من الأعمال الأنا عملتها لكن ياخي كلامك ده أقنعني وقلت يمكن حجابي ده ذاتو فيهو الشركيات دي وما دام شي فيهو شركيات أنا ما دايرو، كدي هلك أفتحو شيفو، والكلام ده في المسجد كان، مسكناهو فتحناهو لقينا فيهو شنو؟ شوف الحجاب البمنع عن الشر: تخيل الكلام ده مكتوب هنا فيهو شنو؟ الدكتور عبد الله السلام عليكم ورحمةالله وبعد، بمناسبة زواج بتي لود أخوي يوم الاتنين الجاي أرجو الحضور السلام عليكم ورحمة الله عمك الشيخ يوسف ابراهيم، ياهو ده، الناس القريبن شايفين الكلام ده ولا لا، الحتة المشطوبة دي، الكلام ده مش صاح؟ ده حجاب. اتخيل الكلام ده. اتخيل الشي الناس بسووا فيهو، والله الناس ديل الله ما بخافوه، حجاب فتحناهو لقينا فيهو شنو، والله الدي لا إله إلا هو، بعرة بتاعة حمار، ورقة نضيفة زي دي قطعناها مربعة، لقينا فيها جوة بعرة بتاعة حمار، بعرة بتاعة حمار بتحجب؟ لا إله إلا الله. حجاب فتحناهو في الخوجلاب لقينا فيهو والله كيس بتاع تمباك، اتخيل الكلام ده، والله الدي لا إله إلا هو، حجاب آخر فتحناهو مربع لقينا فيهو حجر منحوت نضيف، حجاب آخر فتحناهو لقينا فيهو شنو علبة بتاعة ماجي، وفيها حتى الرز بتاع الماجي البعملوه ملاح ده، لاإله إلا الله والله الحجبات دي فيها جنس كلام، كله دجل وكضب وديل ياتهم البكتبو الحجبات ديل؟ الترزية؟ السواقين؟ منو هم البكتبوا الحجبات ديل؟ ما هو مولانا فلان وشيخ فلان والخليفة فلان وأبونا فلان، عندنا حجبات هنا جات من أبواتكم ياها دي، الحجاب الهنا ده جا من زول بقول ليهو أبونا، الحجاب الكبير ده، وأداهو لواحد قطري جاهو زيارة، من قطر هناك جا للراجل ده زيارة ومشى ليهو وأداهو الحجاب ده، فشال الحجاب ده وكان في جلد أحمر نضيف، جديد وبي تحت قديم جدا، خلاصة المسألة القطري ده أخوانا أقنعوهو وجابوهو لي، وهو دكتور وبعد نقاش طويل اقتنع وقلت ليهو الشي ده ماهو صاح، ولا بحجبك، الآن لو بتقول بحجبك تعال نجربو فيك، قال لي لأ، قلت ليهو طيب نجربو في منو؟ قال لي جربو في نفسك قلت ليهو أنا أجربو في نفسي ما ممكن، نجيبو أي حاجة تانية، جربناهو لقيناهو ما بشتغل أي شغل، دجل افتراء كذب، ويغشوا الناس الحجبات دي كلها غش، زمان كان لما يغشو البنات الواحدة تجي يامولانا والله أنا جوني الخطبا والله في خطيب جاني درتو و والله أبوي أبا، خطيب آخر ناس أمي أبوهو، خطيب آخر جابوهو هم أنا أبيتو، وواحدين من الشارع بنسمع انهم دايرين يجونا وبستعدوا وما بجونا، ياخي والله دايرين لينا ورقة كده ولا حجاب عشان نتزوج، انتي دايرة تتزوجي؟ أيوه نعم. أمشي جيبي لي كذا كذا كذا بنشرط ليها أشياء معينة وضبيحة معينة وبعد ده بنجي نكتب ليها شنو: وأذن في الحج يأتوك شنو يأتوك رجالا وعلى كل ضامر الى آخر الأية وبنكتب ليها الكلام ده وبنقول ليها أربطيها في رقبتك و لا موصيها أشربيها وبتمشي المسكينة بكرة بعد بكرة بجوها الخطباء، تقول والله الزول ده والله آيتو كاربة والله الظيم يكتب ليكي حجاب والله، أبونا ده لما يجي ماشي في منطقة البنات بلمن كوم بقول ليك بس تشوفي بي عينك كان شفتي بي عينك عملتي كده باكر بتزوجوك ده شنو ده، دجل وخرافات وكلام ما أنزل الله به من سلطان، باسم الدين والدين منها برئ، الحجاب الشايفنو ده مكتوب شنو، شايفنو ملولو، ده مكتوب شنو، مكتوب بعد الكلام الكتير ده مكتوب هنا بسم الله الرحمن الرحيم والصلاة على النبي صلى الله عليه وسلم الخ.. بعد ده مكتوب شنو يا الله يا الله يا لله وتكلمنا في الموضوع ده، تحت هنا مكتوب يا محمد يا محمد يا محمد وده شرك زي ما قلنا، بعد ده كلو مكتوب تاني شنو؟ مشك شكشكشكشكشكشك ده شنو ده؟ ياهو ده. شايفين الكلام ده؟ صاح ولا لا؟ ده: مشكش شكشكشك (يكررها ويعرضه على الجمهور) ده دين. قال ده دين. ما عرفنا ده من اسماء الله الحسنى، من اسماء الملائكة، من أسماء شنو، دي أسماء بتاعة جنون وشواطين وقالو ده دين، والله الذي لا إله هو الدين ده برئ من الخزعبلات دي والدجل ده وده كلو كلام فارغ وما تنغشو، وأي حجاب شرك بالله، أي حجاب شرك بالله، أي حجاب فيهو خاتم فيهو بتاع كلو شرك، شرك بالله، وخاصة الحجبات البتفعل الأفعال البقولوها ليك، أما المغشوشة دي كلها دجل وكلام فارغ ساكت وموضوع عن الحجبات ده كتير وما عاوز أطيل للناس أكتر من كده اللهم علمنا ما ينفعنا، وأنعنا بما علمتنا وأرزقنا علما ينفعنا، وعملا يرفعنا اختم بالصالحات أعمالنا، استر عوراتنا فرج كروبنا اغفر ذنوبنا تول أمرنا احسن خلاصنا فك أسرنا أرحم ضعفنا عجز الطبيب فداونا ظهر الفساد فنجنا قلت حيلتنا فتولنا.
اللهم اجعل جمعنا هذا مرحوما، واجعل تفرقنا من بعده معصوما، ولاتتدع فينا ولا بيننا شقيا ولا محروما، اللهم أوردنا حوض نبينا اشملنا بشفاعة حبيبنا واسقنا من حوضه شربة لا نظمأ بعدها أبدا والسلام عليكم ورحمة الله وبركاته.
|
|
 
|
|
|
|
|
| العنوان |
الكاتب |
Date |
| هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:33 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Salah Abdulla | 02-10-08, 06:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:20 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | ismeil abbas | 02-10-08, 08:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Abdel Aati | 02-10-08, 09:44 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Yasir Elsharif | 02-10-08, 10:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:37 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Hatim Salih | 02-10-08, 11:02 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:53 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-11-08, 01:07 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-11-08, 08:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:01 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:03 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-13-08, 09:50 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-14-08, 06:50 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | amir jabir | 02-14-08, 09:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-18-08, 08:57 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:14 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | سيف النصر محي الدين محمد أحمد | 02-18-08, 06:55 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | AMNA MUKHTAR | 02-18-08, 07:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 03:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | خرماج | 02-19-08, 02:29 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:03 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 03:57 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | abubakr | 02-22-08, 04:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:11 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | صباح حسين طه | 02-22-08, 08:42 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:21 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:23 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 06:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:35 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 08:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 04:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 05:31 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 00:55 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 01:00 AM |
|
| |
فيس بوك
تويتر
انستقرام
يوتيوب
بنتيريست