|
|
 Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ (Re: محمد عثمان الحاج)
|
المحاضرة الثالثة
المحاضرة الليلة تكملة للفاتت ولكن للظرف الحاصل عشان الناس يتبين ليهم حقايق كتيرة من الخزعبلات والدجل بتاع الحجبات والكلام الفارغ ده، انشاء الله يكون في موضوعنا الليلة موضوع تجربتين : التجربة الأولى بتاعة الحجاب ده بتاع أخونا النور محمد انشاء الله، والتجربة التانية بتاعة الطريقة الكسنزانية، ودي حنجربها أنا في نفسي بتاعة الطريقة الكسنزانية الطريقة الجات البلد دي جديدة عندهم أوليا صالحين بتحدوا الناس وبيعملوا بعض الأمور بتاعة اللف والدوران، وبيعتبروا أنو هذه الحركا من كرامات أولياء الله الصالحين، بيعتبروها أنها كرامة ليهم هم وما حتكون لغيرهم، وهي مسألة بتاعة خدعة فإنشاء الله لخدعة دي حنبينها للناس الآن بإذن الله تعالى، على كل إلى أن يجي انشاء الله الراجل النور محمد، النور محمد، طيب نواصل انشاء الله، طبعا وقفنا المرة الفائتة في الكرامات مش كدي؟ وحكينا (أحد الجمهور يقاطعه: في الأباريق) وقفنا في كرامة الابريق، الابريق الذي كنت أرسله، وقفنا في الحتة دي الكرامة التانية اللي هي الإبريق، الكرامة الأولى قلنا بقينا من أصحاب الخطوة خطوة هنا وخطوة في البلد الفلانية، الناس ديل بتنكمش ليهم الأرض او بتنجمع ليهم الأرض، عشان كدي بتسمع كتير من الدجل والناس بتعتبرو كرامة من كرامات أوليا الله الصالحين، اللاخوف عليهم ولاهم يحزنون، بيقول ليك الزول ده من أصحاب الخطوة وبيستدلوا بحديث ـ حديث النبي صلى لله عليه وسلم اللي هو في من عادى لي وليا إلى آخر الحديث، كلكم حافظنو، يعني "ويده التي يبطش بها ورجله التي يمشي بها" يعني الرجل دي بقت رجل رب العالمين، شوف الفهم الخاطئ ده، بيقول ليك الآن الشيخ هنا وبعد شوية يمكن يضرب ليك من مدني، يقول ليك أنا وصلت مدني، بعد جقيقة بس في مدني، وبعد دقيقة تانية يكون في بورسودان، والدقيقة التالتة يكون في كسلا وهكذا، يقول ليك ديل بقوا أصحاب الخطوة، عشان كدي الخطوة دي بيخدعوا بيها الناس وبيقول ليك الشيخ ده بيصلي في مكة، يعني الضهر أو العصر يأذن هنا ما بيصلي مع الجماعة ديل، بخيل، بنعتبروا أنحنا بخيل، مادام أنت شيخنا وأنحنا تابعين ليك ياخي وماشي تصلي في مكة باخل لينا بي مكة مالك؟ ما تسوقنا معاك؟ سوقنا معاك نصلي معاك سويا هناك؟ ليه انت ماشي براك؟ النعمة دي تخليها معاك انت ما تبقى انسان أجواد وانسان كريم وانسان بتخدم الناس شيلنا معاك أنحنا مش تابعين ليك شيلنا معاك نصلوا في مكة، وبعدين زي ما ذكرنا قلنا أنو الحتة دي فايتة لي ناس كتيرة أولا الآذان أذن الآن العصر ولا .. دايما بيكون العصر أو الجمعة، عشان كدي الناس ديل كلهم المستهبلين ديل ما بتلقى الواحد فيهم بيكون إمام قومه أبدا، ولابصلي جمعة، ما بصلي بالناس الجمعة، ولا بطلع في لمنبر ده يقول للناس قال الله وقال الرسول. مهمتو كرسيهو ده بيقعد فيهو والناس تحبحب (تقبل) في يدينو والشيخ الشيخ، والأذان يأذن بعد الناس تتكلم وتحكي مشاكلها يأذن الآذان من قبيل كان قاعد معانا، أول ما أذن الآذان ده الوقت الفرض عليهو ألا يصليه، طوالي يدعي هذا الشيخ يقول أنا ماشي بصلي في مكة، ياخي مكة دي أذانها زمنها مع زمنا واحد؟ ما واحد. أنحنا أذنا الآن ومكة أذنت قبيل الفرق بيننا وبين مكة على الأقل تكون ساعة ساعة إلا أو أحيانا ساعة وشوية، يعني قبل ساعة وشوية ناس مكة صلوا الآن انت يامفتري بتقول ماشي تصلي في مكة؟
بعدين شوف ما حيمشي مكة على الإطلاق. شيطانو ده ممكن يشيلو يوديهو أي بلد تانية لكن مكة لا. لأنو الشياطين ديل نوع من الشياطين الكفار الما بدخلو مكة زي ما في الانس الآن ناس كفار ما بخلوهم يوصلو مكة، ولا بدخلو مكة، مكة هناك محروسة من عالم الجن للجن، الجن الآخر المسلم ما بخلي الشيخ يوصلوا مكة، أبدا يودوهوا أي منطقة تانية، وهو بيمشي؟ هو ما بيمشي كضاب ساكت، ما بيمشي، لكن إذا كان قال لي الشيخ ده أنا الآن ماشي بورسودان بعد ساعة دق لي في بورسودان بقول ليهو صح بتمشي بوروسودان، لأنو بورسودان ما من المناطق الطاهرة أو زي مكة يعني حتى لو طاهرة ما زي مكة، فده دجل. المرامة التانية اللي هي الإبريق، الكرامة الأولى اللي الخطوة، بقيت من أصحاب الخطوة، كرامتي أنا التالية في نفس اليوم الطلعت فيهو وبرسل فيهو الابريق ده، في الصباح كان الكلام ده كلو في الصباح، جا وقت الضهر، دي الكرامة التالية انتبه، دي الكرامةالتالتة، الكرامة الرابعة، الكرامة التالتة الحتة الكنا قاعدين فيها سهلة، يبقى الحراية لما ترتفع الناس محتاجة تمشي للضل وهناك ما عندنا الكونديشنات لا، كوندشينا ياهو الأشجار الضخمة، شجر الحراز والشجر الكبار ده الحتة النقيل فيها، من الحتة الأنا كنت فيها عشان أتحرك أمشي الحتة التانية مسافة يعني تكون كيلو يعني، أو أقل، في وادي يفصل بيناتنا، بين المنطقة الأنا كنت فيها والمنطقة بتاعةالمقيل، لأنو الناس بتجي كتار والحلة ما بتشيلهم، الرواكيب ما بتشيلهم لازم يشوفو حتة ظليلة عشان الناس تمشي ليها، بنقوم أنا من هنا عشان أمشي المحل بتاع المقيل الفيهو الضبايح والفيهو الأكل وفيهو الشاي وفيهو وفيهو، يوم أقوم ماشي من هنا في ناس تابعين لي، الحيران يعني، الناس التابعين لي وأنا شيخهم، وهناك كان في نوع من القبائل العربية بيقول ليهم الشناقيط، ناس كبار جدا وناس جميلين وناس شعيرين، يعني تلقىالانسان فيهم اذا كان ربى دقنو ما حلقها يوم يجي يقرا في المصحف لغاية ما يحول شعرو كده، ديل ناس كانوا تابعين لي وأنا شيخهم، أنا شيخهم لأنو بياخدو المدد مني أنا وبياخدوا النفحات مني أنا أنا شيخهم، لأني قطب من الأقطاب وديل أوتاد، ديل أوتاد ونجباء ونقباء ومربيين، والقطب أعلى درجة ، وأعلى درجة من القطب الغوث، الغوث ده أعلى درجة في الطريقة، يبقى أنحنا ماشين لي درجة الغوثية.
يوم أقوم أنا ماشي من هنا عشان أمشي حتة المقيل، بين الحتة الأنا فيها وحتة المقيل في آبار، آبار كتيرة جدا، بنشرب منها الماء، يعني ما عندنا المواسير دي، لا، عندنا الآبار، بتمشي البير وبتنزل دلو أو رمباية، دي الوسائل بتاعة غرف الموية من داخل البير، والبير العمق بتاعة حداشر متر، أقل بير حداشر متر، في الخمستاشر اذا كان حتتها عالية وفي الاتناشر وفي التلتاشر، والقطر بتاعها أحيانا بتلقى بير اكتر من مترين، مترين في مترين مدورة كدي كبيرة، عشان مجموعة من الناس بيجو بيحفرو البير دي وبيوضبوها تمام عشان يجو ينشلوا منها الموية، بعد ما حفروها الموية بترتفع في داخل البير تلاتة وأربعة امتار، أربعة متر دي موية صافية، عشان كل الناس والبهايم وبتاع تجي تنشل من البير دي تشرب موية، ما بتنقطع لغاية ما ربنا سبحانه وتعالى يجيب الخريف والناس تشرب من خارج الآبار. فالابار دي في الوسط، يوم أنا أقوم ماشي من هنا عشان أمشي هناك الشناقيط ديل مجموعة يعني أكتر من خمستاشر عشرين بكونوا ماشين معاي، زي السيد رئيس الجمهورية والمواتر المن حولوا بجاي وبجاي يمشوا محلة معينة، ديل عبارة عن ناس بجاي وبجاي حماية للقطب حماية وخدمة للقطب عشان يرضى عنهم واذا كان رضي القطب في الطريقة فيرضى الله عنهم ودي الحتة اللهم دايرنها لآنو ده زول وصل وهم ديل ما وصل بيحبو أنو ياخدوا لمدد من الإنسان الواصل، الإنسان الكامل باعتبار أنو أنا كامل وهم مقصرين، يعني أنا مية المية أو خمسة وتسعين في المية وهم سبعين في المية تلاتين في المية عشرين في المية، عشان يكمل ده لابد من يتقرب لي أنا عشان أنا أوصلو، ولو زكيت واحد معناها خلاص، أزكيهو أنا، مش التزكية تجي من عند الله لا، بزكيهو أنا، لو حبيت واحد فيهم، وخدمني خدمة طويلة زي ما خدمت الراجل داك، بزكيهو أنا بعملو الحاجة الداير اعملو، فهم دي سلسلة في الطريقة بتاعتنا لكنا سالكنها. طيب يوم أجي ماشي الجماعة ديل بيكونوا شايلين نوع من القصب بتاع الدخنـ العيش الاسمو الدخن ده البذرة بتاعتو يوم تبذر بتعمل قصبة، القصب ده هناك بيكون طوال أحيانا القصبة مترين الطول بتاعها وأحيانا أقل، وأحيانا أطول، ديل متوقعين انو طول البير على الاقل مترين متر ونص وكده، بيشيلوا قصبة من القصب الطوال كل واحد تلقاهو شايل ليهو تلاتة أربعة خمسة وماشين، ديل ماشين بي جاي وديل ماشين بي جاي وواحدين ماشين بي وراي وأنا ماشي في النص، يوم أجي ماشي عشان أصل هناك لو في بير هنا قدامي هنا ما بلف منها، يعني أجي بي جاي للبير دي لا، عشان أثبت ليك انو أنا ولي صالح وعندي كرامة ما بلف من البير دي، بسوي ليها شنو؟ الجماعة ديل يوم يشوفوني أنا جاي قصاد البير دي عليه أن يجيب القصبة دي، والقصبة دي زي الحصيرة، انتو ناس الخرطوم بتعرفوا الحصير، يعني القوة بتاعتها زي الحصيرة أو أقوى من الحصيرة بي بسيط، فديل بجوا بختوا القصبة دي حفرة البير كده وبيختوا القصبة كده القصبة من اول البير بتقطع بي غادي حتى لو بي سنة أو بي أصبع زي ده تقطع بي غادي، أنا بعمل شنو؟ بجي ماشي في القصبة دي وأحيانا بتشوف الرجل بتاعتي ما في القصبة في النص، في طرف القصبة البي جاي، الرجل التانية قد تكون هنا، التانية تكون والتانية تكون هنا، بتشوفني أنا ماشي في القصبة دي وبقطع البير ده بي غادي والبير التانية والتالتة، انشاء الله عشرة أبيار في طريقي كلها ما على هؤلاء إلا أن يضعوا القصب، وواحدة بس مو كتيرة، يعني ما تلاتة أربعة عشان يقاومن لا واحدة بس، وده للبركة ولاقصبة دي بتكون مبروكة الناس المحل الفلاني ودوا ليهم قصبة، القصبة دي مبروكة لآنو الشيخ مشى فيها على البير دي معناها قصبة مبروكة وحيتبركوا بيها ويموصوها يشربوا مويتها، ويعملوا بيها كل شي، شوفوا الشغلة دي! البير دي قطعتها والبير التانية والتالة والرابعة والخامسة ولغاية ما اقطع بي غادي مرات بيرين تلاتة ومرات أكتر من خمسة آبار، بقطعها بي نفس الطريقة دي، وأي قصبة قطعت بيها دي خلاص مقدسة بيشلوها يودوها لحلة من الحلال، أو لمنطقة من المناطق عشان يتركوا بيها، يجيبوا قصبة تانية جديدة عشان البركة تعم الناس، تعمكم كلكم انتو ديل، أي ناس يقولو فلان جبت لينا قصبة أيو خلاص انتو ديل، والفلانيين ودوا ليهم قصبة، وفلان، خمسة ستة قصبات ودوها لي خمسة ستة منطقة من المناطق عشان تحصل ليهم البركة، دي الكرامة التالتة، كرامات الولي الصالح، من كراماتي أنا شخصيا، كرامات شيخك ديك خليها، دي كراماتي أنا المتحدث، عشان ما تتوهم دي كرامتي أنا، دي يعني أضلت ناس ما عندهم عدد، أي زول يجي يشوف المشهد ده بيؤمن ايمان تام أن هذا الرجل رجل صالح، أصلوا ما مكن، والقصبة دي لو ختيتها بين أصبعين زي ده، تلاتة أصبع وضغطتها لومانع بتكسرها خلي يمشي فيها انسان كيف يمشي فيها انسان، أيوه بيقول ليك الزول ده خلاص الزول ده بقى انسان كامل، معناهو الجمادات والحاجات دي كلها خدمة لهذا الولي الصالح القطب، شوفوا الفتنة دي.
الفتنة الرابعة بعد ما وصلنا هناك، وجلست في العنقريب، عناقريب هناك الزمن داك ما في سراير، عنقريب صغير بختوهو لي في وسط المفارش دي، بروش سجادات، حاجات فراوي، تلقاها كلها أبعد من الجامع ده، بختو لي العنقريب الصغير في محل معين ده محل جلوسي، بقية الناس بيقعدوا في الواطة وفي الفرشات، بالتدرج فالناس المتقدمين خالص في الكريقة بكونوا قدام، ثم ثم ثم إلى الآخر، الحفظة وبتاع ديل بيكونوا بعيدين، حفظة القرآن ديل بيكونوا بعيدين شوية فالناس القريبين الناس الفي الطريقة مثلا النجباء النقباء المربيين، الأوتاد، بعد داك حتى يكون ناس الحفظة بعدهم الناس الكشامشا ساكت، فدا الأسلوب، طيب الكرامة الرابعة في الحتة دي شنو؟ بعد ما نجي طبعا أنحنا بقارة مغرمين بالشاي، بتعرفونا أنحنا بقارة مغرمين بالشاي، وناس الشرق يعني بيحبوا الجبنة مش كدي؟ وأنحنا بنحبوا الشاي، وانتو ناس الخرطوم؟ الله يهدينا ويهديكم، الله يهدينا ويهديكم،أنحنا بنتكيف للشاي ده وهو حلال، حلو وحلال، شفت دي مصطلحات، يقول ليك حلو وحلال، بنتكيف للشاي، ناس الشرق كتر خيرهم، بتكيفوا للجبنة برضو حلوة وحلالة، أما أنتو ناس الخرطوم الله يهدينا ويهديكم! بتتكيفوا لي شنوا أنتو؟ ايسكريم؟ ايسكريم بتاع شنو! شفتو آهة: (يمد شفته) ده كيفكم: سجايرو سعوط الله يهدينا ويهديكم!
خلاصة المسألة أنحنا عندنا طقوس وعادات في موضوع الشاي، بقارة بنحبوا الشاي شديد، بيقول ليك، حتى في مثل بيضربوه، بيقول ليك بتلقى بقاري تاركصلاة لكن بقاري تارك شاي ما بتلقاهو! والكلام ده يشبه الصحي، أنا شخصيا بقاري لكن مالقيت زميل لي ولا واحد من قبيلتنا دي، وهي ما قبيلة بالمناسبة، الناس الموهومين في الخرطوم بيقول ليك البقارة ديل قبيلة، البقارة ما قبيلة، البقارة قبائل رعاة البقر، عشان كده أنحنا هناك في بلدنا بنسميهم البقارة، حتى انت شقيقك ماراعي للبقر مثلا راعي للابل بنقول ليهو ده أبالة، أو راعي للجمال بنقول ليهو ديل جمالة، ناس الجمال، غنامة، ناس الغنم، بقارة ناس البقر لأنو منطقتنا اشتهرت برعي البقر عشان كده الناس البرعو البقر بيسموهم البقارة لكن قبايل شتى، شماليين وجنوبيين وغيرهم وغيرهم، عاشوا في البلد ديك وسعوا لبقر بنقول ليهم البقارة، طيب بنحبوا الشاي عندنا ليهو نظام وبتسمعوا بالبرامكة والتشكير بتاع الشاي والمسائل دي، خلاصة المسألة داير أوصلكم لي حتة، كرامة بنعملها في الشاي، مثلا الهواء الآن بيجي من الجنوب كدي وبيمشي على الشمال، من عاداتنا انو الشاي لايمكن يصنعوهو النساء أبدا لآنو بنعتبر انو المرة دي في الحتة دي ماها ناجحة، لازم يعبوا لينا الرجال، لو جيتك ضيف وأنا بقاري سوا وانت بقاري صاح أصلك ما بتعبي الشاي في جوه البيت وتجيبو لي بالبراد لا، لازم تجي تولع النار دي هناوأنا أشم ريحة الشاي دي، الكفتيرة وبتاع شغلة زي دي، الهوا جاي من جاي بعبوا الشاي من جاي عشان الريحة بتاعة السكر والشاي بتكون عابرة من هنا وبنشم الريحة دي نتكيف ليها، المهمة بتاعة الناس ديل شنو الناس الشناقيط البخدموني ديل بجيبوا اذا كان الناس كتار زيكم كده الآن ولا أكتر بيكون عندنا نوع من الحلل الألومنيوم البتجي من مصر كبيرة جدا بيختوها في النار، وبيملوها موية وبتغلي، بعد الغليان في ناس مهمتهم يغرفوا الموية دي ويكبوا فيها الشاي وفي صواني بتاعة نحاس صفراء لو شفتوها دي بتكون فيها كبايات ستين كباية تلاتين كباية أربعين كباية على حسب سعة الصينية بتتمر الكبايات دي بالمناديل ومهمتهم أنو يملو الكبايات دي شاي وبس، دي الصينية قاعدة وملوها شاي بقى دايرين التوزيع، التوزيع شفرة، الشيخ: بتلفت لفتتي دي بنشوف الشاي معناهو الشاي جاهز، ده ذاتو معناهو شنو؟ دايرين كرامتك، انت ما شيخ ولي صالح، دي بي طريقة ملتوية، وهو اتفاق معاهم يعني عبو الشاي وأدوني اشارة، الشيخ: التفت لقيت الصينية يعني مليانة شاي بقول ليها كدي (يشير برأسه) الصينية دي براها تتحرك وتجي من هناك طايرة وتجي لأول زول في خطها بتقيف قدامك، هي طايرة بس وصينية ومليانة شاي وقفت قدامك، انت ما عليك الا أن ترفع الكباية الداير تختارها، بتشيل كبايتك بتنزلها اتحركت للتاني، التالت الرابع الخامس كملت الصف بي جاي وخشت الصف في النص الى أن تنتهي الكبايات دي، بعد انتهت الكبايات الصينية بتقوم فوق فوق رؤوس الناس الجالسين وبتجي تقعد جنبي بي هنا، فاضية، منتظرة شنو الناس ديل يشفطو الشاي ده شفطا فإنشاء الله هي بترجع تاني. بعد ما الناس شربت الشاي عاداتنا أي زول داير يدبل يخلي الكباية قاعدة عديلة، وزول ما داير يدبل يكفيها، فإذا الكبايات فضت بنشوف الكبايات فضت بنقول ليها كدي (يشير برأسه) واللبيب بالاشارة يفهم، الكلام ده صحي؟ الصينية من أولي الألباب؟ ولا الشي ده شنو؟ كرامات الولي الصالح طبعا. أديت الإشارة الصينية قامت اتحركت، خشت لآول كباية جات جنبك، في ناس عارفين الشغلة وخاصة الناس القاعدين قدامي عارفين الشغلة واحد فيهم برفع الكباية مافي، لا، كبايتك براها مكفية ولا فاتحة مكفية بتقوم براها تسمعها تعمل كدي (يطرق المنضدة) بتقوم براها من الأرض وبتقعد في الصينية، طج طج طج، ومتحركة الصينية، أي كباية فاضية جات جنبها الصينية بتقوم براها من الأرض وبتقوم بتقعد في الصينية دي وبتحلق لغاية ما تتملي الكبايات الفاضية، المكفيةمكفية والما مكفية الفاتحات بتمشي تتملي تاني وتاني بتجي تمر بنفس الخط، أي زول كان كبايتو فاتحة متذكر أنو أنا كبايتي كانت فاتحة داير المزيد من الشاي تاني هو يرفع الصينية التالتة والرابعة وهكذا بعد الناس كلهم شربوا الشاي، ده كلو في اليوم الأول، شفت دي كرامتين في اليوم الأول.
الكرامة التالتة برضوا في اليوم الأول أقصد الرابعة، في اليوم الأول. الكرامة الخامسة اللي هي شنو، بعد بقينا الناس أكلت وشبعت وشربت الشاي وكل شي جا وقت الظهر للصلاة طبعا من البديهي أنا أصلي بيهم، لاشك ما في زول تاني بيصلي بيهم، وما في زول أعى مني عشان يصلي بيهم، بنقوم طوالي عشان نصلي بالناس الناس بتفرش الفروة على جهة القبلة، طبعا ما فيش بوصلة ولا في اتجاه معين بس دي جيهة الشرق والناس تفرش فروتها على اتجاه وتصلي أول ما يفرشو الفروة دي على جيهة القبلة،أنا طوالي بلوشها على الجنوب شوية، بلفها، هسع دي المحراب بتكون كده لا كده عديل تشوف القبلة جاي شرق والبتاعة دي عديلة كدي جنوب أصلو شي ما يصدق، فواحد من الناس بيعترض أو داير يوجهني بيقول لي مثلا دي ما القبلة حتى لو هي موجهة على القبلة أنا بقوم بعدلها واحد من الناس القاعدين بيقول يا الشيخ القبلة ما كده القبلة بي جاي شوية بي جاي، بقول ليهو لا القبلة بي جيا، لا بي جاي، بقول ليهو انت شن عرفك بالقبلة؟ آه؟ طبعا هو حيسكت. بنقوم عشان أاكد ليكم انتم انو دي القبلة وأنا على حق والشي الفي راسكم ده وهم برفع يديني ديل كده شفت ديل الاتنين ديل (يرفع اصبعيه) برفعهن كدي وبضرب في الهواء بتسمع اليدين ديل بيعملن كدي (يطرق المنضدة) المضروب ده شنو؟ باب الكعبة. ده باب الكعبة. بضرب في الهواء بضرب في الهواء بتسمع باب الكعبة بيسوي قَو قو، باب دغري مش تربيزة زي دي لا باب، بتاع حديد وبتاع دهب كمان بنقول ليكم ده باب الكعبة بتاع الدهب اسمعو صوتو، قو قو قو، أيوه، الناس كلها بتسجد ساكت سبحانك اللهم يضع سره في أضعف خلقه، صحي والله ولي من أولياء الله الصالحين اللاخوف عليهم ولا هم يحزنون، تسمع الناس بالهمس بيسووا زي ده سبحانك الله أكبر والبكبي ببكي بكي عديل بيقول ليك والله بي أذاني دي سمعت باب الكعبة ما زرتها لكن سمعتها بي أذاني دقاها الشيخ حامد في اليوم الفلاني في صلاة الظهر دق باب الكعبة الله يوصلنا ليك يارب العالمين. شفت دعوات ناس تبكي الله يوصلنا ليكي الله يوصلنا ليكي. تسمع الصوت وما بتشوف المضروب. بتسمعوا بي أذانك دي وما بتشوف المضروب وباب فعلا لانو الدقة ما دقة تربيزة ولا بتاعة حيطة ولا بتاعة خشب باب بتاع حديد اللي هو باب الكعبة من الدهب الخالص. شفتو كيف، اليد دي وأنا أبعد من الكعبة اكثر من سبعةألف كيلو الحتة دي بالضبط لآنو من هنا لي بورسودان أكتر من ألف وتلتمية وشوية ومن بورسودان لي مكة أكتر من اربعمية ولا تلتمية ما عارف كيلو، أقصد لي جدة ومن جدة لي مكة تقريبا كم وسبعين كيلو ومن هنا من الخرطوم دي بس عشان تمشي نيالا ألف وتلتمية وتمنتاشر كيلو ومن نيالا عشان تمشي الجنينة ألف وتسعة كيلو ومن الجنينة عشان تخش في تشاد لغاية أردمتا اتنين ألف وشوية، ومن أردمتا لي منطقة أخرى اسمها عرديية ألف وشوية ومن عرديبة للمنطقة الأنا كنت فيها كم وأربعين كيلو لو جمعتهم تلقاهم أكتر من سبعة ألف كيلو تبعد عن الكعبة سبعة ألف كيلو وتجي يدي دي من هناك شفتو من محل القاعد فيهو داك يدي دي بتجي طايرة بي هناوبتجي ماشة بالخرطوم هنا، انتو شفتوها ولا ما شتفتوها؟ ما شفتوها؟ انتو ما أولياء صالحين! ما شفتوها كلو كلو؟ كدي اتذكروا يمكن شفتوها؟ بتجي طايرة من هنا وبتمشي تصل مكة تعبر ده كلو البحر الأحمر وغيرو وتمشي تعبر هناك وبعد ده كلو الباب انتو قايلنو بي جاي؟ باب الكعبة ما بي جاي بي غادي، بالجهة الشرقية ما بالجهة الغربية، اليد دي بتعبر البيت بي غادي وبتنلوي وتضرب باب الكعبة. بتصدقوا ولا ما بتصدقو؟ ليه؟ انتو منكرين للأولياء الصالحين ولا شنو؟ شوفو الكلام ده! شوفوا الفتنة دي! ودي يوميا مش يوم واحد عشان نعتبرها كرامة لا، يوميا أنا بعامل الكلام ده، أي صلاة لوما اتأكدت انو القبلة وينما بصلي وكلها جنوب شوية جنوب، جنوب الكعبة والله عديل، كل ما أجي الصلاة بدقها كدي بدق الباب، بعد ده بصلي عليها وهي عكس القبلة تماما مش يقول ليك أن بمشي الصلاة ما بمشي اذا كان أنا بصلي على غير اتجاه القبلة وواضحة يعني ما دايره ليها أي تفسير ولا دايرة ليها جهد، هي ياخي القبلة كدي أناأوجهها كدي وتكون القبلة؟ ما ممكن. دي كرامة من الكرامات في نفس اليوم.
الكرامة الأخيرة، مش الأخيرة من كراماتي لا، عشان نختم بيها موضوع الكرامات وما موضوع الكرامات دي، امرأة اسمها حاجة بتول. حاجة بتول دي عجوز. مشت يوم الخميس مشت الخلاء البعيد، مشت جابت ليها نوع من الأعشاب التوجد في البلد ديك بكثرة اسمه القضيم، تعرفوهو كلكم ما مزروع ربنا زراعو براهو، مشت الخلا لقطت القضيم وجابتو، ومن النوع البيصنع الطبق بتاع السعف بتعرفوا؟ الطباقة، صنعت ليها مجموعة بتاعة طباقة ومشت جابت القضيم في ماعون آخر بنقول ليهو الصوصل مصنوع برضو من السعف، على حسب وضع البلد وعلى حسب بساطة الناس فعشان ماشه يوم الجمعة لي سوق تبيع الأشياء دي وتاخد ليهاأغراض سكر شاي الحاجات المحتاجين لها فشالت الحاجات دي يوم الجمعة ومشت السوق باعت ما باعت والباقي فضل وقامت ماشة ترجع، وبينها وبين المنطقة بتاعتها السكناها والسوق مسافة بعيدة في الوسط طبعا الدنيا هناك غابات ما صحراء زي دي، غابات كتيرة جدا وأشجار كثيفة بي طريقة ما عادية يعني الانسان اذا كان بقى في طرف الجامع ده والتاني في طرف الجامع ده ما بتشوفوا، ما بتشوف الزول ده من كترة الأشجار، وكلها طرق ملتوية ما طريق دغري عشان تشوف الانسان لا، الشجر ذاتو ما بخليك تمشي في طريق مستقيم، خلاصة المسألة في مرفعين ذئب، بياكل أي شي ضعيف في الطريق يعني بالليل ما بالنهار، الذئب ده اذا كان لقى طفل صغير ماشي في الشارع براهو بياكلو، لقى حمار ولا ماعز ولا اي شئ ماشي براهو بالليل بياكلو، ومعروف حتى لو كان لقى الانسان معروف عندو فراسة بيستعملها، أو حيل بيعملها، كبير ولا صغير بيعمل ليك حيلة معينة، لقاك جبان بيعتدي عليك، لقاك شجاع ما بيعتدي عليك، فقامت العجوز حاجة بتول مشت باعت حاجاتها والعشية قامت بقية الحاجات أخدت ليها أغراض وجان شالت حاجاتها في راسها وجات ماشة في الطريق مع ناس حلتها والناس كانو راكبين في حمير وهي ما عندها حمار فكانت ماشه معاهم بكرعينها الناس اندمجت مع الونسة والسوق وما السوق فاتوا خلوها هي ماشة بي كرعينها ماشة والمغرب جا والحتة دي كريهة فيها الذئب أو الذئاب فجات ماشة والناس سبقوها والناس الورا ما معروفين بي وين ماشة في الطريق فإذا هي في حتة معينة مع المغرب لقت المرفعين. بقى بينها وبين الجماعة الفاتو ديلك. المرفعين طوالي ظهر ليها وداير ياكلها. والمرفعين اذا كان داير يجس نبضك أول نا يشوفك براك عشان يعتدي عليك بيقعد ليك في نص الشارع الانت ماشي فيهو بيقيف في نص الشارع ده، وبفتح خشموا بوريك سنونو دي، ومش كده بس بيضرب ليك سنونو بيعمل ليك صوت شك شك شك، ككك كككك ارهاب، امريكة لو تعرف الارهاب اهم المرهبين هم ديل! لأنو دي بتجس نبضك انت: هل انت مستعد للقتال معاي؟ أنا داير آكلك رأيك شنو؟ فأنت بتشوف، لو داير توريهو فراستك بتوريهو، أنحنا عشان ناس خلا طوالي بتجي جاري عليهو، أول ما تقوم جاري عليهو لو عندك عكاز تقوم تضربو هو بنتظرك؟ لا ما بنتظرك، بقوم طوالي هارب، اذا هرب تاني ما بتلقاهو بكون بعيد، براقبك وبيمشي بفوت بخليك معناهو خلاص جس نبض واتأكد أنك انت مستعد ليهو، لكن اول ما شافك انت خلاص قاعد تتراجف وهو قاعد في الطريق وانت حولت في الطريق التاني ياكا الاتاكلت. اتاكلت تب. شفت كيف. عندو صوت بيعملو للنداء، أي مرفعين في الخلا عندو صوت بنعرفو نحنا بيعمل صوت للنداء بعد شوية تلقى تلاتين مرفعين معاك كل واحد بجيك هاجم وكلهم بيعملوا دوار كدي، وكلهم بيجو هاجمين عليك تضرب منو وتخلي منو ما بتعرفو، في الحالة دي نحنا عندنا أسلوب، لأنك انت ما ممكن تقاتل ليك تلاتين مرفعين، أول ما شفت المرفعين ده عمل الطريقة دي ونادى الجماعة ديلك، انت ما عليك الا أن تشوف ليك شجرة كبيرة، وتطلع فوق خلاص، لكن شجرة قصيرة ولا شجرة صغيرة بيحفرها طوالي بيرميها بيك أنت وتنداس طوالي، فدي خبرة أنحنا بنعملها.
خلاصة المسألة لقت المرفعين فكانت عندها نوع من التياب زمان الناس العجايز زينا كده بعرفوا، لكن الشباب ديل ما أظن بعرفوا، في نوع من التياب بنقول ليهو توب الزراق، نوع من الدمورية بيصبغوهو بي لون أزرق، بيكون اسمو توب الزراق، شايلة واحد وقامت نزلت، المرفعين عمل ليها سنونو كدي قامت نزلت البتاع ده، وتربطت من الحتة دي ولي الحتة دي عشان تتلفلف بالتيبان الاتنين بتاعة الزراق عشان شنو حتى لو نهشها ينهشها في أياديها في رجولها يمكن ربنا يجيب فرج مع الصراخ والبكي والبتاع ده يمكن تجيها نجدة، بس حاولت تستر من تحت الركبة ولغاية الرقبة دي، لفلفت التياب دي تمام، وتوكلت، علي منو لكين، بعد شوية حتعرف، مش على الله! فهي أول ما نزلت البتاعات دي وكانت بتتراجف المرفعين بي خبرتو عرف خلاص أنها دي ضحية، وبدل ما أنادي الجماعة ديلاك يجو يشاركوني في الوليمة دي لأ بعتدي عليها أن براي، وباكلها والجماعة ديلك يجو يلقوا الفرت ولا بتاع أي شئ ياكلو الآخر، لأنو هو جس نبض، لقاك جبان ما بنادي الجماعة، لقاك فارس احتمال ينادي الجماعة، في الحالة دي انت بتطلع قبل ما يجوك الجماعة ديلك، خلاصة المسألة اتربطت ودنقرت عشان تشيل الصوصل وكان كبير فيهو بقية القضيم وبقية الطبقة فأول ما دنقرت عشان تشيلو المرفعين طوالي جاء هاجم عليها، هي هنا طوالي قالت شنو؟ بدل ما تقول يا حي ياقيوم برحمتك أستغيث، أو يا الله أو أي دعاء، لأسماء الله الحسنى، في نفس اللحظة الشيطان أو قرينها أو الشيطان اللي كان معاها أو قرينها، وسوس ليها أنو تدعو القطب حامد، قالت شنو: يا الشيخ حامد تلحقني وتفزعني، قالت قبل ما المرفعين يحصلها شافت شيخ حامد جاي من السماء ونزل في ضهر المرفعين ده ومسك المرفعين من ضهرو، في شعر كده في المرفعين في ضهرو مسك الشعر ده، وبصورة الشيخ حامد ذاتو القاعد قدامكم وقال ليها أنا الشيخ حامد وده موت وأنقذتك منو مش المرفعين ده والله تاني في الأرض ما ينزل، ومسكت المرفعين ده وطرت بيهو في السماء وقالت بتشوف وكان في سحب قالت لي بشوفك لغاية ما دخلت في جوه السحاب، واندرقت خلاص تاني ما بعرف المرفعين وانت مشيتوا وين. هي في الحتة دي شكرت الشيخ حامد وحمدتو، بعد ده نذرت قالت أنا يوم الأحد انشاء الله أشتري لي تيس وأوديهو لي شيخ حامد ده، ده نذر ، نذر لي منو؟ مالله، للشيخ حامد، فعلا يوم الأحد مشت اشترت تيس وشالتو مع ولد ولدها صغير كدي عمرو تقريبا سبعة تمنية سنوات، وشالت التيس ده يوم الأحد وجاتني في المنطقة الأنا فيها، بعد ما اشترت التيس من السوق وأول ما جات، بعيدة هناك جاني الراجل البيشتغل معاي، اللي هو نوع من العفاريت واسمه سهسوبي، الراجل ده الشغال معاي ده اسمه سهسوبي، جاني سهسوبي ده طبعا روحاني، اللي هو زعيم لميتين ستة وتمنين جن، ده رئيسهم، من عفريت لي مارد لي شيطان، وديل كلهم كانوا شغالين تحت ادارتي، وديل كلهم أنا كنت باعتقد أنهم ملايكة، لأنو قالو لينا الروحاني ملك، الله بخلقو للأولياء الصالحين عشان يخدمهم، وفهمونا الكلام ده، شوفوا سبحان الله وربنا سبحانه وتعالى يقول ويوم يحشرهم جميعا ثم يقول للملائكة أهؤلاء ا اياكم كانو يعبدون. ديل كانوا بيعبدوكم يا ملايكة؟ قالوا سبحانك أنت ولينا من دونهم بل كانوا يعبدون الجن و أكثرهم بهم مؤمنون. فعلا كنا بنعبد الجن مش ملايكة. لأنو الأذكار الكنا نعملها ما بنعرف أنها دي ذاته شركية، لأنو بيقول ليك أدعوا الله وأدعو سر من الأسرار ما بيقول ليك، الأشياء الشايفنها دي ما سر من الأسرار، بيقول ليك ده سر الآية اأنت قريتها، سر الاسم بتاع الله الانت قريتو، بدل تقول يا الله بحق سهسوبي، سهسوبي ده شنو؟ ده سر يالله! سرو. طبعا في ظاهر وباطن، ده الباطن بتاعو. أيوه. ياسين وسرها. الواقعة وسرها. كذا وسرها، الأسرار دي تعال أقراها، زي الكتيب الهسع الصغير ده، ده كتيب مطبوع طباعة وعندو هنا أسرار كتيرة جدا، بيقول ليك دعاء الفوز العظيم، ياسين وخطبتها، الواقعة وخطبتها، حرز جلب الأرزاق، كذا كذا كذا، في كلام هنا دايرك تسمعو مطبوع طباعة، ده خطبة الواقعة، خطبة بتاعتها أو سر الواقعة، أو العلم اللدني لمعرفة حقيقة الواقعة، عندها ظاهر وعندها باطن، ده علم الباطن لسورة الواقعة، بعد ما تقرأ الواقعة عدد معين بكيفية معينة بتجيب الدعاء ده، تلقاه دعاء لله ودعاء حتسمعو انت، طيب الكلام الكتير ده ما دايرو عشان نختصر شوية، بعد قال بسم لله الرحمن الرحيم اللهم اني اسالك ياالله يا الله يا الله، طبعا ذكرنا الكلام ده قبل كده ولا ما ذكرناهو؟ يا الله يا الله، الناس بتعتبر كلمة يا الله يا الله ده ذكر، ده ماهو ذكر. ما في ذكر لا في السنة ولا في الكتاب، ذكر اسمو ياالله، مافي. في ذكر آخر يالطيف يا لطيف يالطيف يالطيف، مائة وتسع وعشرين، مافي ذكر اسمو يالطيف مية تسعة وعشرين. خالص، لا في كتاب ولا في سنة، كلكم علماء وعارفين الدين ده تمام، دايرين الدليل، في ذكر بيقول يا لطيف يالطيف يالطيف مسنود من النبي محمد صلى الله عليه وسلم بي كلام زي ده؟ ما في. يا رزاق يا رزاق يا رزاق. ما هو ذكر. ده ما هو ذكر. وعشان يقرب ليك المعنى وتعرف الكلام ده حقيقة، نفترض جدلا ـ يخاطب أحد الجمهور : اسمك يا الشيخ منو؟ عبد المنعم ـ لو أنا قاعد في المحلة دي وقلت يا عبد المنعم حتقول لي شنو؟ نعم؟ حتقول شنو؟ يا عبد المنعم، يا عبد المنعم ، يا عبد المنعم (يكررها) مليون مرة فهمت شنو؟ فاهم حاجة؟ ده شنو يعني؟ ده لعب. مفروض يا حرف ندا وعبد المنعم منادى. مفروض يجبو في جملة مفيدة. يا عبد المعن: قول لي نعم. قوم أمشي جيب لي موية. ياعبد المنعم سوي لي الشي الفلاني. يا عبد المنعم سوي لي الشي الفلاني. أنحنا قلنا يالطيف ماهو ذكر. الله قال ولله الأسماء الحسنى فادعوه بها فكيف تقول ما ذكر. ما ذكر. الذكر الصاح تجيب يالله في جملة مفيدة: يالله اعمل لي الشئ الفلاني. يارزاق ارزقني، يارحمن أرحمني، يا حي يا قيوم برحمتك استغيث، يا شافي اشفني، يا كافي اكفني، جيب الكلام ده اسماء الله الحسنى جيبها في جملة مفيدة، والملائكة واقفين عشان يؤمنوا. ربنا أول ما تقول يا الله ربنا قال ليك لبيك عبدي. داير شنو؟ نعم يعني. انت ما قلت شي. ياالله. لبيك عبدي. نعم. يارحمن. نعم. يارزاق. نعم. يا كذا نعم نعم نعم نعم. ربنا عارف لكن دايرك تقول. وإلا لماذا تصلي. ما الصلاة دي لازم تعملها. الدعاء لازم يكون في جملة مفيدة. يبقى انت ده كلام موجود هنا: يا فتاح يافتاح يا فتاح يا فتاح كتير. يافتاح شنو يعني؟ يا فتاح افتح لي أبواب رحمتك يافتاح أي كلام جيب جملة مفيدة. لكن برضوا ما تدعو بالعكس: يا رزاق اقهر لي أو يا قهار أرزقني. ما بتجي. تعمل الاسم وتجيبوا في جملة مفيدة بي نفس الصفات أو الأسماء. ده كاتب شنو يا فتاح يارزاق يا وهاب يا معطي يا مغني يا كريم ياذا الطول يا باسط يا ودود قول سمح دي كلها أسماء من أسماء الله الحسنى. تعال شوف هنا. إنا فتحنا لك فتحا مبينا ليغفر لك الله ما تقدم من ذنبك وما تأخر ويتم نعمته عليك ويهديك صراطا مستقيما، وينصرك الله نصرا عزيزا، نصر من الله وفتح قريب، وبشر المؤمنين، اللهم اني اسالك يا الله يالله يالله يا واحد يا أحد يا فرد يا صمد يا غني يا مغني، بحق سهسوبي سهسوبي سهسوبي، مهمهوبي مهمهوبي ذز الطول الحفي، بصعصع صعصع ذا النور والبهاء، ديل ياتهم ديل من اسماء الله الحسنى؟ دي من اسماء الله الحسنى؟ بمهمهوب مهمهوب ذي العزة الشامخ الذي له العظمة والكبرياء، بطهطهوبي طهطهوبي (يكررها) ده كلام شنو ده؟ اليس هذا بالدجل؟ دي من اسماء الله الحسنى؟ دي اسماء من اسماء الرسول؟ دي اسماء من اسماء الملائكة؟ وهل يجوز دعاء الرسول؟ وهل يجوز دعاء الملائكة؟ أو أي شئ؟ ديل شنوهم ديل؟ بتفهموا من الحاجات دي شنو؟ سهسوبي مهمهموبي طهطهوبي؟ الناس القاعدين جنبيالكلام دهي صحي؟ شوف الكلام ده (يعرض الكتاب عليهم أحدهم يقول صح) صاح؟ الكلام صاح؟ طيب شوف الكلام القلتو بي جاي ده: شوف هنا: مهمهوبي مهمهوبي صاح؟ بمهمهوبي مهمهوبي صاح؟ الناس القريب شايفين الكلام ده كلو صاح. ياهو ده مكتوب مهمهوبي مكتوبة طهطهوبي وصعصع وبعبع الحجات دي وكتيرة اليوم اليجي نفتح فيهو الأكياس دي بتشوفوا العجب العجاب والله. والله تشوفوا العجب العجاب. الحجات الشايفنها دي كل شي ليهو معني خاص حنوضح المسائل دي تماما وانشاء الله، وأنا ما عارف الزول ده ما جاء مالو. أخونا النور محمد أرجوك تعالنا ياخي.
خلاصة المسألة أن هذا الدعاء وهذه الأشياء بنعملها أنحنا باسم الدين وده كلو منسوب للدين. ومنسوب ده للأولياء الصالحين وبيعملوا كرامات، وكرامات كلام فارغ أصلو الكلام ده ما من الدين في شئ، أنحنا عشان نختصر ونتكلم عن الكرامات وذكرنا كرامة معينة أنحنا حنمثلها وذكرنا الراجل ده احتمال ما عرف الوصف احتمال قدر الله وما شاء الله فعل، وبيعمل الحركة دي ذاتها هو رئيسها في السودان قدام الناس انو هو ولي صالح وعندو الطريقة الصالحة، والطريقة الحقيقية، وهو ولي صالح وبثبت ليك أنو هو ولي صالح، ولو انت جيت دخلت في الطريقة دي حتبقى ولي صالح زيو، اذن انت بتسعى لأنو تكون ولي صالح ودي فتنة الناس بالأولياء الصالحين. ده بياكل اللمبة دي بيمكسها يقرشها ليك زي البسكويت، ببلعها شوف عينك، كرامتو التانية بيجيبوا سكين زي بطعنوهو، في دماغو هنا ولغاية ما السكين تشوفها طلعت بي هنا،
/// يتبع بقية المحاضرة الثالثة///
|
|
 
|
|
|
|
|
| العنوان |
الكاتب |
Date |
| هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:33 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 04:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Salah Abdulla | 02-10-08, 06:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:20 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | ismeil abbas | 02-10-08, 08:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Abdel Aati | 02-10-08, 09:44 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:32 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Yasir Elsharif | 02-10-08, 10:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:37 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Hatim Salih | 02-10-08, 11:02 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-10-08, 11:53 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-11-08, 01:07 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-11-08, 08:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:01 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-12-08, 04:03 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-13-08, 09:50 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-14-08, 06:50 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | amir jabir | 02-14-08, 09:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | Mohamed E. Seliaman | 02-18-08, 08:57 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-18-08, 05:14 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | سيف النصر محي الدين محمد أحمد | 02-18-08, 06:55 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | AMNA MUKHTAR | 02-18-08, 07:34 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 03:06 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | خرماج | 02-19-08, 02:29 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:03 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-19-08, 11:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 03:57 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | abubakr | 02-22-08, 04:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:11 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-22-08, 08:13 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | صباح حسين طه | 02-22-08, 08:42 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:21 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-23-08, 05:23 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 06:49 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:16 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 07:35 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-27-08, 08:04 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 04:43 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-28-08, 05:31 PM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 00:55 AM |
| Re: هل استولى عبدة الشيطان (السفلي) على الطريقة التيجانية وطرق صوفية أخرى في السودان؟ | محمد عثمان الحاج | 02-29-08, 01:00 AM |
|
| |
فيس بوك
تويتر
انستقرام
يوتيوب
بنتيريست