|
|
 الرداحات
|
و ( الرَدَحِى ) لمن لا يعرفونه هو طريقة من الطرق (الكثيرة) التى تستخدمها (النسوان) فى حروبهن و نزاعاتهن .. وهى طريقة تعتمد أساساً على إستخدام فنون اللغة من سجع و طباق و مقابلة لإعطاء الكلمات معنىً أكثر قوة ...... و هذه الكلمات بدورها منتقاة بعناية من قِبل (الرادحة) لتؤكد علو مكانتها أو لِتحط من قدر رادحة أخرى ...وهو ما يجعله ضرباً من ضروب الفنون تشتهر به الرادحات و يتميزن به عن باقى (النسوان) ال( بجم) اللآتى لا يستطعن الدفاع عن أنفسهن ... و للحقيقة.. فخلال تجوالى فى العديد من البلدان -عربها و عجمها- لم أجد شعباً له هذه الممارسة أو حتى مثلها من حيث ال ( flow ) أو ال ( freestyle ) .. ما عدا فى مصر فهى موجودة لكنها ليست بنفس الجودة ...
و أذكر فيما أذكر قديماً أنه كانت تسكن فى حىّ قريب من حيّنا رادحة من فطاحل الرادحات .. و فوق كونها كذلك فقد كانت كثيرة الجثة سميكة الجلد وافرة اللحم كثيفة العظم واسعة الحلقوم كبيرة البلعوم لها جنازير صوتية بدلاً من الحبال الصوتية .. كانت هذه المرأة (فتوة) النساء فى ذلك الحى فكثيراً ما يلجأن لها لتأخذ بثأرهن .. بيد أنها كثيراً ما تنفجر إذا شاغلتها إحداهن بكبر حجمها ف(تغُز) إحدى يديها فى وسطها والأخرى ملوحةً بالمفراكة فتردح مفتخرةً :
ما تقيفى فى الزلط و تتكلمى غلط
.. نحن نححححححححححححححمد الله الغدا ضأن.. و التحلية برتكان...
...العشا حمام و التحلية شمّام .....و مليانيييييييييييين يا إنتى ...
....لا كوع يقد الوسادة لا ساق يضبح الجدادة ...نحن تربية بيت و فرش موكيت....
....هيييييههههيييييييييى....
.... حليلكم إنتو يا ناس الإشلاق يا الما سمعتو بى السيريلاك ....
....نببببببببرة و نستبرة و ما نسكن جبرة...
...بششششششتنة و الناس متمحنة ...
..أوع من كدا و الدنيا شتا ...
.هيييييييييييييييييييييييى ...
لا كرعيننا رقاق و لا مولودين فى زقاق ..
أولاد عوااااااااايل و عندنا فايل ....
ولدونا فى الإمتداد و حبّينا فى البلاط ..
.نححححححححححححمدو..... البنريدو بنولع ليو اللمبة.. و الما بنريدو بنحرش ليو الكلبة !!
.. عشان كدا أعملى لاين و أقيفى بهايند.... و أفهميها... أعملى شخيط و اقيفى بعيد ..
سجم و كمان عدم فهم ؟!!
...هييييييييييييييييى و تااانى هييييييييييييى و تانى و تانى هيييييييييييييييييى....
ما تكبى الريحة و تعملى تفتيحة و تخلينا نقيف ليك فى طرف المعلقة و نوريك الصعلقة .....
كان جبل طلعناو و كان عسل لحسناو ..
.هووووووووووووى.... تنبزينى أنا يا كرور يا وسخ الخور !!
.. يا تربيزة الجزارة يا اللامّة الوسخ و الزفارة !!
بطااااااااطس و مستوى غااااااتس ....
هييييييييييييييييييى
أخير ليييييك فتحى عينك قدر الريال و خلّى أضانك قدر العقال ...
ما تخلينى أدق الصفايح و أطلع الفضايح
... يا مرة يا مجنونة يا شبه حجر الطاحونة ...يا ليمونة و عاملة فرعونة !!!
غادى غادى الجزام بعادى .
.. يا الككوية يا أم جضوماً موية
...الشمس ضربتك و الرجال أبتك !!!!!
|
|
 
|
|
|
|
|
|
|
|
Re: الرداحات (Re: ايهاب نميري)
|
سلامات أيهاب
الردحى ده من أخطر أسلحه المرأه و العجب كان قابلت بيهو واحد من الشباب العاملين تفاتيح تمسح بيهو الواطه و ما يقدر يفتح خشمو من الدهشه و الأعجاب فى بعض الأحيان
غايتو أنا كان لقيت لى واحده بنفس مهارات الزوله الوصفتها فوق دى طوالى أتنازل ليها عن الباسوير بتاعتى و أخليها تجى تورينا الردحى العلى أصولو
تحياتى
محمد على
| |
|
|
|
|
|
|
|
|
|
Re: الرداحات (Re: ايهاب نميري)
|
Quote: ما تقيفى فى الزلط و تتكلمى غلط
.. نحن نححححححححححححححمد الله الغدا ضأن.. و التحلية برتكان...
...العشا حمام و التحلية شمّام .....و مليانيييييييييييين يا إنتى ...
....لا كوع يقد الوسادة لا ساق يضبح الجدادة ...نحن تربية بيت و فرش موكيت....
....هيييييههههيييييييييى....
.... حليلكم إنتو يا ناس الإشلاق يا الما سمعتو بى السيريلاك ....
....نببببببببرة و نستبرة و ما نسكن جبرة...
...بششششششتنة و الناس متمحنة ...
..أوع من كدا و الدنيا شتا ...
.هيييييييييييييييييييييييى ...
لا كرعيننا رقاق و لا مولودين فى زقاق ..
أولاد عوااااااااايل و عندنا فايل ....
ولدونا فى الإمتداد و حبّينا فى البلاط ..
.نححححححححححححمدو..... البنريدو بنولع ليو اللمبة.. و الما بنريدو بنحرش ليو الكلبة !!
.. عشان كدا أعملى لاين و أقيفى بهايند.... و أفهميها... أعملى شخيط و اقيفى بعيد ..
سجم و كمان عدم فهم ؟!!
...هييييييييييييييييى و تااانى هييييييييييييى و تانى و تانى هيييييييييييييييييى....
ما تكبى الريحة و تعملى تفتيحة و تخلينا نقيف ليك فى طرف المعلقة و نوريك الصعلقة .....
كان جبل طلعناو و كان عسل لحسناو ..
.هووووووووووووى.... تنبزينى أنا يا كرور يا وسخ الخور !!
.. يا تربيزة الجزارة يا اللامّة الوسخ و الزفارة !!
بطااااااااطس و مستوى غااااااتس ....
هييييييييييييييييييى
أخير ليييييك فتحى عينك قدر الريال و خلّى أضانك قدر العقال ...
ما تخلينى أدق الصفايح و أطلع الفضايح
... يا مرة يا مجنونة يا شبه حجر الطاحونة ...يا ليمونة و عاملة فرعونة !!!
غادى غادى الجزام بعادى .
.. يا الككوية يا أم جضوماً موية
...الشمس ضربتك و الرجال أبتك !!!!!
|
هاهاها ..والله يا إيهاب بالغت عديل كدة ..حقو الواحد يطبعة ويعمل ليها تسويق
لغاويات المشاكل ..
- قطاطي ومستوى واطي
- بنضورة وكشفنا دورة
- من فوق بتشبهنا ومن تحت بتبلعنا
وشكرا ..
بشير
| |
|
|
|
|
|
|
|
|
|
Re: الرداحات (Re: ايهاب نميري)
|
محمد البشير ,, تحياتى ,,
يأخى ليه تعبان وعايز تشوف ليك واحده من بره ,, كان فتشت بتلقى ليك واحده فى البورد ,,
ايهاب نميرى :
شكرا على تذكيرنا بتلك المفردات التى طولنا من سماعها بسبب البعد عن السودان ,
لكن طبعا نوع النموذج ده موجود فى كل مدينه وقريه وحى ,,
تحياتى ,,
كمال سالم
| |
|
|
|
|
|
|
|
|
|
Re: الرداحات (Re: kamal ali)
|
Quote:
محمد البشير ,, تحياتى ,,
يأخى ليه تعبان وعايز تشوف ليك واحده من بره ,, كان فتشت بتلقى ليك واحده فى البورد ,,
|
الأخ:كمال سالم .. لك أجمل التحايا..
يازول مالك جهجهتني ..قطعت إسم محمد ..من محمدعلي صحاحب المداخلة الفوق لي وجيت ختيتو قدام إسمي ..ولزقتة لإسمي ألف ولام ..وبقيتو أبوي ..هههههههههه ..
أنا برضو قاصد رداحات البورد ..بعد البوست يمشي الخور ..التسويق بكون عن طريق المسنجر الداخلي ..
مع خالص ودي
بشير جبريل علي
| |
|
|
|
|
|
|
|
|
|
Re: الرداحات (Re: ايهاب نميري)
|
الاخ احمد عبدالله ,, تحياتى ,,
يأخى افتكر انو ده ما أسلوب جميل منك , انزالك لصورة الاخت تراجى فى هذا
البوست وبهذه الطريقه, انت بهذه الطريقه تسعى لشخصنه المواضيع وسب وتجريح الاخرين , الشى الذى
دائما ماندعو للابتعاد عنه ,, ارجوك سحب المداخلات اعلاه ,, وأرجو ان نترفع عن الاساءه
المتعمده لبعضنا البعض فى هذا البورد .
| |
|
|
|
|
|
|
|
|
|
Re: الرداحات (Re: kamal ali)
|
كمال سالم
كده كويس !!!
بلاش نفاق معاك ...
Quote: كمال سالم
سبحان الله
انت خليك من احمد عبد الله ما انت الكتبت الكلام ده اولا؟؟؟؟
ولاحظ توقيت مداخلتك؟؟؟
Quote:
محمد البشير ,, تحياتى ,,
يأخى ليه تعبان وعايز تشوف ليك واحده من بره ,, كان فتشت بتلقى ليك واحده فى البورد ,,
صاحب البوست يتحدث عن شيئا آخر وانتم المتدخلون من فعل الشخصنه
ولا انت بقيت تلميذ جيد لبعضهن هنا يتقتلوا القتيل ويمشوا في جنازته.
تخيل مرات افضل الجلابه الصعاليك زي احمد عبد الله ده من
الجلابه العاملين مؤدبين وبيطعنوا بما يعتقدون انه ادب. |
| |
|
|
|
|
|
|
|
|
|
Re: الرداحات (Re: ايهاب نميري)
|
كمال سالم
سبحان الله
انت خليك من احمد عبد الله ما انت الكتبت الكلام ده اولا؟؟؟؟
ولاحظ توقيت مداخلتك؟؟؟
Quote:
محمد البشير ,, تحياتى ,,
يأخى ليه تعبان وعايز تشوف ليك واحده من بره ,, كان فتشت بتلقى ليك واحده فى البورد ,,
|
صاحب البوست يتحدث عن شيئا آخر وانتم المتدخلون من فعل الشخصنه
ولا انت بقيت تلميذ جيد لبعضهن هنا يتقتلوا القتيل ويمشوا في جنازته.
تخيل مرات افضل الجلابه الصعاليك زي احمد عبد الله ده من
الجلابه العاملين مؤدبين وبيطعنوا بما يعتقدون انه ادب.
| |
|
|
|
|
|
|
|
|
|
Re: الرداحات (Re: Tragie Mustafa)
|
Quote: انت لا شيئ سوى صبير للعالمه سارة منصور
انت صبي السفارة المتسكع في اروقتها
وبطل عباطتك الكثيرة دي وضرب التلفونات
لبنات ونساء البورد للقطيعه و الشمشرة.
وكل من دوامك.
|
ردحـــي بالطريقة ( المظبوط ) ..
والله يا حبوبة ما فاضل ليك ألا تطيري فوق وتصفقي لينا بـ( رجلينك ) ..
..
..
يا هوبا ..
انت الخميس والجمعة كنت مقيل وين ..؟!!!
| |
|
|
|
|
|
|
|
|
|
Re: الرداحات (Re: ايهاب نميري)
|
احمد عبد الله وتراجى , مساكم الله بالخير ,,
انا فى مداخلتى لم اشر لاحد بالاسم اوبالصوره وكلامى كان دعابه لا أكثر ,,
لكنى ابدا لم اقم فى يوم من الايام بالاساءه لاحد اوتجريحه مهما كان خلافى معه ,,
ومازلت اصر ياأحمد عبد الله بأن مافعلته عيب عليك ,, وهذا ليس دفاعا عن تراجى , فهى
اقدر على ان ترد عليك بنفسها ,, واراها ردحت فيك وماقصرت ,, لكن انت اللجبتو لنفسك .
لاأنتظر منك رد ,, فقط لاتكابر والرجوع للحق فضيله ,, اتمنى ان تكون من الافاضل .
مع شكرى ,,,
| |
|
|
|
|
|
|
|
|
|
Re: الرداحات (Re: kamal ali)
|
شكرا يا كامل سالم
وقد استغل البعض مدخلتك كما يحلو لهم.
يا حميدة انتبهت لدي معناها شنو؟؟؟
يعني اثناء الدوام
الا من منزله لا يتجرأ ان يكلم امرأة عالم جبانات بشكل؟؟؟؟
| |
|
|
|
|
|
|
|
|
|
Re: الرداحات (Re: ايهاب نميري)
|
سلامات أيهاب
لفتت نظري لهذا البوست ضحكات المدام الصاخبة
وحزنها فى نفس الوقت لانحراف البوست نتيجة للخلاف الذى دب بين أم حازم والشباب
يلا تعالوا نشوف مع بعض شغل الردحى بتاع زمان كان كيف ، فى كتاب الانداية.. للاستاذ الطيب محمد الطيب صدر عن دار عزة في طبعته الثانية وهو كتاب يعنى بالفولكلور السوداني ويتخذ من الانداية مدخلا لهذه الدراسة
قدم للكتاب الدكتور عون الشريف قاسم بقوله «الانداية.. كما قدم لها الطيب محمد الطيب في كتابه من الامور التي لا يصح الحديث عنها في عرف المجتمع السوداني الا في مقام الذم وهي من اجل ذلك لا تجاور سكناهم، بل تقصى الى اطراف القرى والمدن، وقد تضرب في الخلاء. ويطلق عليها في معظم الاحيان اسم «الجو» ولا يرتادها الا طبقة خاصة لا تجد القبول عند غيرها من الناس. ولكنك بمجرد ان تتصفح الكتاب وتسبر غوره تجد لدهشتك ان المخبر غير المظهر. وسرعان ما يكتشف القاريء ان الانداية التي يتحدث عنها الكتاب ما هي الا مظهر خاص من مظاهر الحياة السودانية وهي ككل المؤسسات الاجتماعية لها نظامها الخاص وتقاليدها وقيمها التي يلتزم بها من يرتادونها ويذمون من يخرج عليها وبالبحث الميداني المتعمق الذي استغرق ست سنوات طاف فيها المؤلف على معظم انحاء السودان فخرج بحصيلة من المعرفة ينقلها لك هذا الكتاب الرائع
يلا تعالوا نشوف مع بعض شغل الردحى بتاع زمان كان كيف عشان تشوف الردحي الصحي صحي
الأسطر التالية منقولة من كتاب "الإنداية" للأديب وعالم الاجتماع والثقافة السودانية الراحل "الطيب محمد الطيب". وهي تتضمن تصويرا لشجار بين اثنين من "الرجال" العاملين لدى شيخات الأنادي. وشجارهم تكملة لشجار بين الشيختين أصلا.
"وعند احتدام المعركة، ينبري أصحاب المعين الذي لا ينضب. وهنا لا يملك الجميع غير الصمت والإصغاء .. "الكِرِبِّشين" يعمل مع بت كوراك و"شاي الجَّمُر" يعمل مع بت أب عوة.
الكربشين: هيــــــــي هيـــــــي!! ويعقبها بضحكة فاجرة يسمعها كل رواد الأنادي. ويطوح برأسه للخلف، ويزوَرّ حاجباه، وتبيَضّ عيناه،
شطار يا بت امّي. عاد من يوم الليلة بت كوراك "فنَّشت" وأنا قبيل الجعيص والرخيص.
ومن الطرف الآخر انبرى "شاي الجمر" نيابة عن بت اب عوة. وهو عُرفيا "وأدبيا" ملزم بالرد على الكربشين والمسألة مسألة "كرامة"!!
شاي الجمر: عاد انا ما شايل نضُر تاني بت اب عوة ما تفتح خشمها مع الحنيش والدردبيش آآي يا بتي!
الكربشين: مع منو يا شاي الجمر؟
شاي الجمر: مع الطلطميس والدردبيس!! مع قرع ود العباس العشرة بي قرش ومية هوادة. أجي! أجي!
الكربشين: أجي يا الديك صدر عريان؟ يعلم الله أنا كايس لليوم المتل دا!
شاي الجمر: عندك يا صايع يا مايع يا تَرَنْ تَرَنْ العند القيف حَرَنْ! شطار يا ولدي!
الكربشين: يا عربي الصقيعة ويا رعاوي القيعة .. الكراع بي شقها والـ... تنضم مع منو!!؟
شاي الجمر: مالو العربي يا يُمة، لقاط خُردة ولا عَقاب جَرْدة!!؟
الكربشين: آآي يعلم الله أخير من عرب الاشو "القطيفة" الما بفرز الريال من التعريفة!
شاي الجمر: نحمد الله الجمع ناس منيش وعلَّمُن الحديث.. يا عَقاب الشِّحادة والحِدادة!
الكربشين: يعلم الله! أسمع أكلمك كان ما عارف الحِدادة.. أخير من ناس القُرادة البياكلوا الجرادة ويعافوا الجدادة!
شاي الجمر: دا لي منو يا المهجوم ويا الملام الخرتوم؟!!
الكربشين: آآي يا ولدي .. الخرتوم يعيش الخرتوم!! مالو؟ علَّمكُن الكلام يا ناس عرْ وجرْ، يا ناس عوك ومعوك، يا ناس الحَويَّة والحناية، يا ناس القُطران والدُلقان!!
شاي الجمر: قادر هو الما عجزان!! يا ناس نَبَيِّض والشيح والكشيح، يا ناس العفنة والمِندفنة!!
الكربشين: عِندك! يا مكشوف الحال ويا شبه الرجال!!
شاي الجمر: يا يُمة يترجلن كرعيك!! شبه الرجال أنا؟ مالي فيني عرقا طاير؟ فيني عصبة مشحوطة؟ ما محل ومكل!
الكربشين: جَرْ يا هناي يا عقاب هاساي وبنات كُدُنداي!
شاي الجمر: يا يُمة.. جَرّارك مُسدد نخريه، يا الرزالة يا فضلة العِتالة، يا ناس المغطى وملان شطة!!
الكربشين يحاول الرد ولكن الانفعال يصرعه فيقع مغشيا عليه: أح أح أح الظار!!
ويتجمهر حوله الرواد وهو ملقى على الأرض وشاي الجمر "يردح" وتصيح "تام زينو": هــــــــاي دا التُّربي! يعلم الله بطنو بقت زي القربة! وفعلا تنتفخ بطن الكربشين وتُدفن الهزيمة في وسط حفلة الزار التي تقام له في الغداة. وحفل الزار هو المتنفس الوحيد للمهزومين في هذا الصراع
| |
|
|
|
|
|
|
|
|
|
Re: الرداحات (Re: ايهاب نميري)
|
يا جماعه سلامي الشديد ليكم وشكرا ليكم لى وجودكم في الرداحات
لكن ناس فوق فاتوا الردحات با هناك
هاكم زياده من الردحي
.. نحن نححححححححححححححمد الله الغدا ضأن.. و التحلية برتكان...
...العشا حمام و التحلية شمّام .....و مليانيييييييييييين يا إنتى ...
....لا كوع يقد الوسادة لا ساق يضبح الجدادة ...نحن تربية بيت و فرش موكيت....
.... حليلكم إنتو يا ناس الإشلاق يا الما سمعتو بى السيريلاك ....
....نببببببببرة و نستبرة و ما نسكن جبرة...
...بششششششتنة و الناس متمحنة ...
..أوع من كدا و الدنيا شتا ...
| |
|
|
|
|
|
|
| |
ايهاب نميري
Mohamed Elbashir
بشير جبريل علي
kamal ali
محمد فرح
Ahmed Abdallah
Tragie Mustafa
humida
SILVER MOON
انعام حيمورة
Moawia Mohammed
فيس بوك
تويتر
انستقرام
يوتيوب
بنتيريست