|
الكتابة في البورد وحكاية (بت بدس)... كيف تثبت بوستك في الصفحة الأولى؟
|
الكتابة في البورد تذكرني بحكاية (بت بدس)... أنا من المعجبين غاية الاعجاب بالمقطوعات الموسيقية البدوية التي تعزف بالزمارة أو اللود كما سمعتها من بعض أهل بوادينا. والزمارة لمن لا يعرف هي آلة موسيقية عبارة عن ماسورة بها ثلاثة فتحات واحدة في مؤخرتها والفتحتين الأخريين في نهايتها وتفصل بينهما مسافة ثلاثة أو أربعة أصابع مضمومة تقريبا . ويجيد الرعاة في البوادي العزف عليها... وكل قطعة موسيقية لها قصة تحكى .. كنت في إحدى المرات استمع لأحدهم وهو يعزف ، وبعد الانتهاء من مقطوعة معينة قال لي: ( دي بت بدس) فسألته عن حكاية بت بدس فقال: بت بدس دي يا ولدي واحدة من بنات العرب .. كانت يتيمة الأم وما عندها خالات ولا عمات... ومن عادة سكان البوادي في مناسابات الأعراس أن تزغرد النساء كبيرات السن من الخالات والعمات لبناتهن عندما يرقصن في الدارة... ويبدو أن بت بدس نزلت في الدارة لترقص ولم تجد من يزغرد لها من الحاضرات... لكنها واصلت الرقص... وكانت ترقص وتزغرد بنفسها... وهكذا تعزف المقطوعة الموسيقية.. أتدرون لماذا سقت هذه الحكاية؟؟؟ الماعندو شلة في البورد ، إلا يكون زي (بت بديس)، يرفع بوستاتو براه ، يعني يرقص ويزغرد.
طلب : بالله ياشباب لو واحد عندو مقطوعات زمبارة ينزلا لينا عشان نسمعها ياريت ... وأخص الأخت الأديبة سمية الحسن طلحة لإنو أهل بادية البطانة هم الأبرع في هذا المضمار. مامان
|
|
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: maman)
|
وانا كمان اساند بت بدس.. الشلليه في.. لكن برضه بت بدس ان ما بقت متواجده في البوكان ده مع الناس..الناس بس تفوت منها.. يعني لازم تشارك الناس في كتاباتهم..وهي ذاتها تكتب.. تجاملهم في افراحهم وأحزانهم..المجامله في الأحساس ضروريه..وكمان مبادلتهم النقاش مهمه جدا غير كده وحاة اسم الله ان عزفت شنو داك..زول بيسمعها مافي..وان كان سمعوها..لا بقولولا غناك سمح ولا غناك شين!
ما أصلو قالوا ده نادي اجتماعي ثقافي وبه بعض ادعاءات سياسيه..
بركه اللقيناك طيب..وكل سنه وانت طيب
| |
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: maman)
|
عبد الرحمن سلامات
زمن يا صديقي في هذه الغربة الكؤود
طبعا بت بـدس دي ما حكاية شلـة وبـس
بت بدس دي حبوبتنا لــزم , ومافي كــلام معاها معاها
زمبارة الراعي (حرفتنا الأولى أيام الطفولة والغنم)
اللحن الوحيد الذي أجـدته فيهـا
(بنات الريــل ..... جـفـلـن ....)
(فــوق المقيـل .....جـفـلـن ....)
تعرف يا مامان,
كأنها دعــوة قديمـة مستجابـة ....
من يومنا دااااااك وهـن جافلات ... بوشـهـن...
والصيـد ناجــع
ليك التحيات
أحمـد الشايقي
| |
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: maman)
|
الأستاذ مامان ..
حكاية بت بدس .. دى موجودة فى أى مكان فى زمنا الأغبر هذا .. مش بس فى منبرنا هذا ..
يعنى لازم تتعلم فن .. ترفع وتشوت براك .. وياما فى الأمثال قالوا .. يابخت النجيب خالو .. والما عندو ضهر .. وناس قريعتى راحت .. حقهم راح .. الخ .. الخ ..
يعنى كده .. لو ما بقينا زى حكاية بت دبس .. حنبقى زى حكاية بت دبرس ..
وفى النهاية يا أستاذ مامان .. نتمنى أن نشعر بالغير .. ليتنا نعطى الموضوع الجيد حقه من الاهتمام ونساعد صاحبه بوضعه فى الصفحة الأولى .. لكن المشكلة أيضا تتمركز فى العددية الهائلة من الكتاب ..
والى الأمام يااستاذ مامان .. ياقود مان .. يا انسان ..
ونتمنى أن تتكرر مداخلاتك الجميلة هذه ..
ولك دوما كل حب وتقدير ..
أخوك العجوز .. أرنست
| |
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: Al-Shaygi)
|
يا مامان أنت عايز تجمع قروش وكمان مشاركات يا أخي إبني بطل الطمع دا أخبار فور إيفر شنو.. والله مقصرين معاها
يا جماعة الخير هذا المامان رغم أنه خريج جامعة الخرطوم في عزها ومجدها إلا إنه تربالي وود بلد... وزي ما قال كمال عباس الزول دا لو مسك الربابة وبدأ العزف والله الإنس والوحوش يطربوا من روعة النغم.. إضافة إلى أنه باحث ومثقف حقيقي.
بس يا ماما علشان نتضامن مع بت بدس دي لازم تحكي لينا عن جدنا ود مبلول شاعر الحسانية المجهول.. والشال سيده وخلى حرم..
| |
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: maman)
|
Quote: يا مامان أنت عايز تجمع قروش وكمان مشاركات يا أخي إبني بطل الطمع دا أخبار فور إيفر شنو.. والله مقصرين معاها
يا جماعة الخير هذا المامان رغم أنه خريج جامعة الخرطوم في عزها ومجدها إلا إنه تربالي وود بلد... وزي ما قال كمال عباس الزول دا لو مسك الربابة وبدأ العزف والله الإنس والوحوش يطربوا من روعة النغم.. إضافة إلى أنه باحث ومثقف حقيقي.
بس يا ماما علشان نتضامن مع بت بدس دي لازم تحكي لينا عن جدنا ود مبلول شاعر الحسانية المجهول.. والشال سيده وخلى حرم.. |
حبيبنا ود وراق الحساني الصاح
كان ما أخاف الكضب باقي لي بت بدس دي منكم ومامان عنده الخبر اليقين. لكن فوريفر دي ما ظنيتك بتقدر عليها ،،، دي دايره زولاَ زي كدي وصاحبي مامان. تقولي طمبور مامان ،،،، لأنك ما سمعت زمبارة مامان ودي عاد كان سمعتها تحن متل الناقه المودره جناها.... الشايقي
| |
|
|
|
|
|
|
Re: الكتابة في البورد وحكاية (بت بدس)... كيف تثبت بوستك في الصفحة الأولى؟ (Re: maman)
|
ألأخ/مامان
بت بدس..ندعمها نقويها..ولكن لابد من المجاملات أحيانآ...
تخيل بعض ألأعضاء بنظروا للكاتب.والبعض ألآخر لعنوان البوست......
هناك عنواين جذابة وفارغة............وده أسلوب التشويق تحصل القراْء أكثر من المتداخلين..
وهناك كتاب جدد دخلوا بقوة لهم كتابات جميلة وجيدة وذات فائدة.ولكنه عناوينهم تأخذ الطابع التقليدى..
ليس التسابق فى كيفية تثبيت البوست فى الصفحة ألأولى بل ...فى الطرح ذو الجدوى...
موضوعك جميل وشبيه لموضوع البشير دفع الله .....كتاب ماركة مسجلة وكتاب ناس قريعتى راحت....
إسماعيل محمد احمد عباس....
| |
|
|
|
|
|
|
|