ياسجيمان كلامك كلو رمزية معطرة بريحة الكركار يالماركيزي

Quote: يا جماعة خليكم شاهدين..... انا حسي جبتا سيرة شطة واللا سيرة منقة؟ عشان مافي زول يجي بعدين يقول لي انت كدي وكدي.....

Quote: فليبينية...... سماحتها .... فيها هي بس...ما منها اتنين...... لما اركب الطيارة...اول حاجة بعاين للمضيفات سمحات ولاّ.. لا.....عشان لو كانن ما سمحات اشتكي ناس الخطوط.... واقول غشونا وشالو قروشنا ساكت.....ركبت.... وقعدوني في الكرسي الفوق الدرب.... زمان كنت بدور اقعد جنب الشباك.....عشان اتفرج في الطيارة وهي قايمة كتح..لكن حسي اتبسطت عشان اعاين للمضيفة وهي ماشة وهي جاية.....قالو اربطو الجزام... ابيت اربط الحزام كلو كلو... قلت في سري علا تجي المضيفة دي تربطو لي...بقيت كل ما ا شوفا جاية علي.....امسك الحزام الولحو.....واعمل نفسي غلبني اربطو...لكن جاني ضكر مابعرفو جاي ناطي من وين؟ عامل اضنيهو الكُبار ديل....وربط الحزام..... لكن انا من عامني شفت... تاني فكيتو....وقعدت الولح فيهو....... برضو جات ماشة.... وانا قعدت...اصاوّر في الحزام....المرة دي دنقرت فوقي وربطتو........والله اتكيفت كيف..... متل التكنها ادتني شبال..........وفكرت تاني افكو.. عشان تجي تربطو تاني.... مش انا دافع حق التظكرة؟....لكن جات المرة دي شايلة شربات..... وادتني كباية شربات.... اتاريهن المضيفات ديل.... ما عندهن فرق من ستات الشاي..... والله جات شايلة شاي وجبنة طوالي اتظكرت الثورة وستات الشاي في اخر محطة........وقعدت تسعل فيني:- tea? coffe? ....... قلت لها اديني كوفي..... اريتني بالكف اليطرشني ويلحقني الكُتار.......انا قايل الجبنة بيدوها اربعة فناجين .... ادتني فنجان واحد.......وقلت عشان انا اوريها اني زول فنجري وارباب وما شارف...احلف طلاق تاني ما اشرب ولا فنجان....... والله مافي زول غايظني... قدر السواق اللليل الطيارة دا.... متفلهم جنس فلهمة....نضمو كلو بالانكليزي..... التنتشن..و.... الكنتشن...والبنتتشن.....هو قايل نفسو شنو؟....سواااااق زيو وزي خير الله سواق لوري ناس الامين ود امحمد ود جبارة.......ودااك علي باليمين اضكر منو...اللوري محل ما يقيف يغدي الناس علي حسابو.......

(عدل بواسطة عبد العظيم احمد on 01-05-2008, 09:50 PM)

Quote: في شمبات والدنيا ليل قاعدة جنبي ان شاء الله اتقلب ضبانة... واطير فررررر.. ارك في جضمياتا... ارك براااحة عشان ما اجرحا......ارك واقزقز وانقز... من نونة لي نونة..... اليقولو الضبانة جنت... بت المجنونة.....سكرانة ترتح وتقول النونة اليمين يا ناري قيدي بين ضلوعي النونة الشمال نااااااااانا.. يا نانا عويناتك مسخن علي المعاينة لي عوينات بنيات الخرتوم.. مخيرة غايتو الله بيحاسبك يا الجهجهتيني.. علا انا من عامني طيب عفيت ليكي جهجهيني وهجوليني وكسريني زي ماكي دايرة..... وسنيناتك وقت تضحكي يكسرني ويعقلني ويغلبني اقوم....ويا حلاة المقيل في ضل رميشاتك...... انشاء الله افطس الحق الرقدو.....افطس فوق جفنك الشمال ويدفنوني فيهو و يكتبو علي الشاهد.... المرحوم المات فطيسة سجيمان.....المتوفي ساعة العشاء يوم حفلة عرس اخو نجود..... الغرز نشابو شايلة قليبي وين ماشة بو يا سمحة

Quote: سميرة.....دا الاسم العرفتها بيهو....اسمها الأول ما بعرفو......مربوعة....طواالي تقبل علي اليمين وتبصق.....كنت احترمها جدا.... لانها ما تغش في العرقي......لا حجار بطارية...ولا نيم..ولا بنج حصين.....تديك ليهو عرقي صااااااافي......شعارها.. الأمانة والإتقان.......ومن غشنا ليس منا.......ساكنة في بيت فيهو حوش....... في خشم الباب في كلب ديمة راقد .....يوم واحد ما سمعتو هو هو....وفي نص الحوش في اوضيّن.... زعلانات وحردانات من بعض...وكل واحدة مقبلة علي جيهة....في ركن الحوش الغربي في ادبحانة...ما فيها عرش....راكوبة قدام التكُل....كمية من البنابر مجدعة في الحوش...وتلاتة عناقريب... أي عنقريب فيهن الكرّاب حقو ناقص وجزء من حبالو مقطعّة..ولازمن تكون فيهو كراع مشقوقة من فوق...ومجبرا بي سلك........الحلة كل بيت فيهوكهرباء..علا بيت ناس سميرة.....وقت نجي نشتري العرقي.. عندها فانوس... تشيلو وتدخل جوا التكل....ونحن نتقطع وراها..... بالرغم من ثقتنا المفرطة في امانتها لكن برضو ..قلبنا قاعد ياكلنا.....ونخاف تغشنا في العرقي..........عندها تلاتة شُفع...اعمارهم بين تسعة سنوات وخمسة......ديمة عرايا.......دائما لما اجي... القاهم نايمين فوق عنقريب.... الاتنين الصغار بي راس..والكبير بالراس التاني......الشافع الوسطاني حاقر بي حقارة شديدة.... اول ما ادخل واقيف وانا منتظر امو تديني الكوتة... يصحا من نومو...ويجي يقيف جنب كرعي ...... ويقعد يبول........موقت ساعتو البايلوجية علي مواعيد جيتي......اشتكيت لي امو منو....وانو الولد ما شاف شغلة غيري....... قالت لي وهي زعلاااااانة....... يعني يبول في العنقريب؟....... مرة جيت.. اشيل الكوتة..... لقيت البيت فاضي من الزباين...عرفت انو في عوجة حاصلة..... وسميرة راقدة ومتغتية بي بطانية..... سعلتها من الكوتة.... قالت لي الليلة مافي... انا عيانة..... عندي ملاريا........ سبيت للملاريا وللبعوضة ولي حقن الكوانين......" ينعل ميتين الملاريا...... الملاريا دي ما لقتك علا انتي يا سميرة؟...... الحلة دي مليانة نسوان..... نسوان ما منتجات ..وما منهن أي فايدة..... ليه ما تجيهن هن؟...تجيكي انتي ليه؟..."............ سميرة مرا طيبة.... علا عيبا الوحيد.. تحب الغُلاط زي عيونا....ومافي شي في الدنيا دي عاجباها.....مرة كنت معاها وسمعت محمد الامين يغني في غنية يا معاين من الشباك....... قلت ليها ..الله دا محمد اللمين بيغني يا معاين من الشباك....... شفتي الغنية دي سمحة كيفين؟....... قالت .... لا لا ...لا سمحة ولا حاجة.....في زول في الدنيا دي بيغني لي زول في حراسة؟......ا ي ي ي..حراسة...... هو منو بيعاين من الشباك علا زول في حراسة........قلت اغير الموضوع......كانت لابسة فستان اصفر...وعليهو نقوش لزهرة السوسن......قلت ليها تعرفي يا سميرة الزهور الفي فستانك ديل..دي زهرة السوسن....... ...قالت لي..."هوءئه...لا...لا سوسن ولا حاجة....... سميرة"......... سميرة دي ياها زاتا القبل كدا قلت لكم ناس اللجان قالو يرحلوها من الحلة......لانو بيتا ملاصق مدرسة الاولاد......انا سمعت الخبر وجيتا..وكنت زعلان جدا....وقلت ليها" شفتي الناس الحاقدين ديل بالله؟......قالو يرحلوكي من الحلة...... خايفين على الاولاد الفي المدرسة الجنبك دي......."..قالت لي" هم ظااااااااطم...ما يرحلّو مدرستهم".....صراحة زاد اعجابي بيها.... وبي وعيها بحقوقها الدستورية...في السكن والإقامة....وحرية الرأي والتعبير...............

Quote: لايووووق اجاركم الله.... ان اتشبكت في شي.... تاني ما بتتحلا مني بي هينة....علا زول حظي شوم وكعب..... والبتشبك فيها... قاعدة تتحدف عليها نصايب الدنيا كلها.... يا تموت... او يجيها تصاقط شعر..فجعة كدي... وتصبح من صباحات الله تلقى راسا صلعة.... وحواجبينا صلعة.... وقدر ما فيها شعيرة تقع....او .... يرفدوها من شغلا..... او من قرايتا...... او من المنبر هنا....غايتو لو في اي زول زعلان من واحدة وداير يلحقها امات طه... يحدسني.... ويحرشني عليها واًعجب بيها....واتلّحلا... واباريها.....لومكم بي بعد اسبوع انجضا تب....زمان اتلحّتا سميرة بنت جيرانا... وحبيتا...... في اسبوع.... ابوها كسر كراعو.. وامها دافقت....وهي سافرت بورصودان .. بالباظ.... وانا كتبت فيها قصيدة.... يوم السفر..... قلت فيها:- باظ بورصودان... اب كراسي وهيطة شلت حبيب قلبي وخليت دموعي جارية... طيطة ..... باظ بورصودان يا اللحمر يا ود الكلب ان شاء الله تعتر لك حفرة وتتقلب في شان شلت حبيب القلب شنو؟ مالك؟ مستعجل ..و جاري كدي؟ انت اصلك باظ ..ولاّ .. كلب؟ ......... ... الغريبة الباظ اتقلب..... ومافي زول جاتو عوجة غير سميرة... اضانا اليمين اتقطعت...اتقطعت من قعرا....وكانت مسيكينة قاعدة تلبس نضارات.... بقت في كيفن تلبس النضارة والاضان مقطوعة....؟؟؟.....لكن بعدين في دكتور شااااطر قال ليها.... تجيبي مشبك غسيل حق الهدوم..... تشبكيهو في شعرك قصاد الاضان.... وتجيبي ايد النضارة وتشبكيها في طرف المشبك....لكن اووووعك تتفلهمي وتقومي ترقصي في حفلة رقيص رقبة.... دحين حسي... والله تب.... اعجبت بانتاية هنا....والله يستر عليها.... 26-10-2005, 05:37 م فيصل نوبي . تاريخ التسجيل: 16-09-2005 مجموع المشاركات: 8894 Re: يا

Quote: عندها فلجة؟؟؟ تعرف يا عبد العظيم انا ضعيف قدام المرا العندها فلجة في سنونا زميلتن لي في الشغل الله يطراها بالخير كان عندها فلجة وانا عاجباني فلجتا دي بالحيل من الدغش اجر كرسي واقعد اتفرج فيها وهي تنضم لمن يطلقونا نمشي البيوت.... قامت سنها ضربتا ضلفة باب الحديد اللليلون.. واتكسرت واحدة سنون ركايز الفلجة.... الحقيقة انا غدبت جنس غدب في الدنيا دي....اها ركبو ليها سن جديدة وربطوها مع اختها بسلك.... بقت البنية وقت تضحك واللا تنضم الله يسعلني سنونا بقن زي الفيوز....فكرت اجيب كماشة وافطع السلك ..علا نعلت ابليس

زيارة طبيب الاسنان
وانا عارفك انت زول مابتقرف

Quote: ماركيزي يعني شنو؟؟

Quote: الخواجات ديل حليلكم منهم.....ديل قهرتهم بي الله....امريكا حاقرة بالناس حقرة السواد والرماد...وفرنسا مسيكينة قدر ما ودو ليها زول ميت تقعد تصوط فيهو اسبوعين وتلبد وما تنضم وبعدين حتين تجي تقول الزول دا مات موت الله ساكت......شدة ما ارتحت ونزل مني هم وقت عرفت انو توت عنخ امون ما مات مكتول وقتي كلو هامي حكاية توت ديو قاعد اشحد في الله يا توت يلقو فيك عقاب موراريا.......وخايف الامريكان باكر دي يقولو للمصرين علا تجيبو الناس الكتلو توت عنخ امون ويقومو المصرين يشبكوها فينا ونحن نقعد نحوص ونلوص ما نعرف نسوي شنو؟....علا فرنسا اريت ربي يضربا ياها بيضا ويعدلا عليها محل ما تقبل..الدولة الطيبة العديّلة... الما حقّارة.....بارك الله فيها التشتا لي امريكا وطلعت توت مات موت الله....والزاد فرحي انو التفجيرات الننوية كانت في سيدان في نيفادا....لكن الخواجة القال النضم دا خلي بالكم زول بتاع سواطة ولخابيت..وداير يسوطنا مع امريكا...ويقعد هو يقرقر ويضحك...يعني كان غالبو يقول نيفادا....؟...مالو مسوينا في شك وظن..والزول السواط اصلو ربنا ما بيفتحا في وشيهو...... اليعرف النضم دا..... انا اصلي وقت سمعت الخبر حضرت لستة بي ناسي الماتو بالسرطان..وزدتهم من الناس الماتو بلا سرطان..وحتى حمارة جدي عبد الله الماتت بي سرطان الضنب سجلتها........وكنت ناوي امريكا دي اخليها تشرب ما تروى......وقدر ما جاني مرض سجلتو..وناوي نية كعبة خلاس...ناوي اتشبك في امريكا دي وانا زول شبكة.... تاني الحلة بله زات نفسو ما يحلني منها... لكن ربنا شافا...وكنت اشارطهم ....بوش يستغيل وكوندا تستغيل....ومايكل جاكسون تاني ما يفتح خشمو يغني ويرجِع لونو الاساسي......ويرسلو لي عشرة فنايل تي شيرت مكتوب عليها اي لوف يو..ويدوني فيزا وبعدين كرت اخدر...ويعرسو لي الممثلة الاسمها كيلي بروك .... حتى ان قالت ما دايراني وحردت وجرت علي الخلا برضو ما يخلوها يلحقوها ويجيبوها ويعرسوها لي.. وانا ما بيخليها حتى ان انتحرت وماتت اليدوني ليها....حتين اتنازل من الشكوى......وامريكا دي ما تشوفنا كدي.. خلي بالكم... نحن ناس طيبين علا كان قمنا خترين خلاس........

Quote: الغريبة في ناس ما بيفهمو النضم" الرمزية"...ويجو يتفلهمو ويتفقلصو

(عدل بواسطة عبد العظيم احمد on 01-15-2008, 06:06 PM)

Quote: الزول العواليق دا البيضحكو شنو؟؟؟ خاطرة خطرت بي قنيقيني وانا شايف العميان شايل المكسر وجاين طايرين.... "العاهرة 2008"محاولة لرواية اركانها وقائع حقيقة...لا تمس اي من الاعضاء الكرام وليست موجهة ضد احد" وحات الشيخ الجعلي"... كتبتها قبل اكتر من تلاتة شهور....ولكن حالت الظروف دون نشرها... ناس لبهو ما يحملوها فوق طاقتها لانو بكري ما ح يخليها تقطع الكبري.... عواطلية السياسة... وخرمجية الثقافة... اقيفو بعيد... وانصاف الفهمنجية... وانصاف البهائم البيتابعو الرعاويةوالمساكين الربنا اداهم بلادة زايدة فوق البشر وفكاهم في النت عشان يمتحن بيهم صبر المؤمنين من خلقو على الابتلاء...واللهم اني لا اسألك رد القضاء ولكني اسألك اللطف فيه... لحسي ما دخلت في المقدمة

Quote: انشاءالله بركة سيدي الحسن وبركة ستي مريم كلمة"أبله" دي ما تطلع كلمة تحرش في اللغات الحية والميتة