|
|
 شغبٌ غير مصقول...غناءٌ أشتر
|
دعوة لبيع الضمير في ميدان أبو جنزير
يا قلبي اتشقلب وأبقى ملاوِع
نطط وفنجط في الراكوبة
ووسط السهلة
وضل الحيطة
وأقلب هوبة
وأبقى حريف مشهور بالخفة
وأوعى تقول:
يا ربي التوبة
وما تتأخر في شقلبتك
يصحى ضميرك
ويرجع عقلك
تضحك فيك الناس
وتشوتك
وتبقى متنقز زي الكورة
أبقى قُمرتي
وغامِر بالإحساس والكلمة
وأدي النفس الزايطة وجايطة
وحالا ملخبط
وفيها مدفن كمين مقلب
غربة
وكربة
وعمر اتبدد
حبة أملاً يشرد يرجع
يمسح ظلم الوجع الأكبر
ويكتل قرف السكة الفائتة
وأوعى تجامل
وتبقى مقنطر في خط ستة
وأفهم للتكتيك العالي
وشوت ضفاري
وما تقوم جاري
بتجري وتجري
وتبقى مهستر
وتبقى مدستر
وفاقد الذاكرة
وناسي المرسى
ونومك زي كابوس متضاري
بين الذاكرة ونبض الفكرة
ويا حليل بكرة!!
وحاجة عجيبة تعرف الشوف
بيدخل خوف
وتمرُق منك أحرف عاهة عقيمة
وحاسب أوعى تجيلك عاهة
عاهة تجهجه غفلة نومك
وتنعِش إرث القيم الفيك مِندسة
ومن ما قمت تغتي عليها
تحاسب نفسك
وترعى حقوق الجار الجنبك
وتبني فصول العُشرة البينكم
وتحفظ رأس مال بنوت الحلة
و....
و....
و....
وتحفظ كل القيم الما بتنهز وما بتنعد
وفيها محنة
وحسن مظنة
وشكل الطيبة
ومعنى الإلفة
بنوت الروضة
الكانن يغرفن من ماعون الطيبة الأسمر
وما فاهمات للدنيا حقيقة
براءة وطيبة
وضحكة بتكتل هم الدنيا
لبسن لبس الثانوي العالي
وقالن يواعدن وما يندسن
وأوعى الجكس يكون إتدلع
وقام يتعزز
وبقى يتأخر
وأرفع كفة
وأرفع كُلفة
وعادي زبادي
وموعد
وتاني
وصارن فتة
- ووين يا درفة
ودنكل سفة
وتف السفة
وما تِتأسف للمنحرفة
وحالا يمحِن
وعمِر كأسك
وشعلل رأسك
وزيد في مقاسك
وعيش في محفة
وما زي كنت
وكُنا وكُنت
وكان الحِس الفينا يقطِر مبدأ
وينفح منقة
ويسكر مُدة بعرقي الطيبة الفينا امتد
متوِج إلفه
ووين الليلة الكان بيناتنا
ووين الطيبة الكانت فينا
ووين العزة الكانت تقدح
تضوي مدائن الغُربة الشينة
{برغم جمالا
وذوق عُمرانا
وكترة مالا
ونِعمة فالا
ورغم الناس الحلوة الفيها
ويوت بتجيها}
وفيها الزول مشهور بإسمو
ووشِو الأغبش
صِدق وطيبة
وكان زي هالة
وكان زي معلم
وكان زي معجم
وكان اسطورة
يوم الليلة البلد اتباعت
دق الجرس الما بِتأخر
جاتا دقون ما بتعرِف ربك
قالوا:
نصيغ إسلامكم
وقالوا:
نعيد العهد الأول
وقالوا:
نوفر ليكم كل مرادكم
وقالوا وقالوا
وباعوا كلام للبلد النامت
وفِترت من ثوراتا القامت
وما بتتسيد
وتجي منصورة
إتغشوا الشفع
وقاموا يكوركو وراهم:
دم الشهداء كمِسك الجنة
ودم الشهداء بيكون اتبل عنبر وحنة
وعنبر وحنة
وحنة وجنة
وجن وجن
وقام إتعسكر
ماتوا شبابا
وماتوا شيابا
وماتوا درفن
وماتت بينا الروح الطيبة
وظلت عازة الصارت عنزة
وبقرة حلوب فياضة مذلة
تنادي:
هلم
ويلا ويلا
ويلا تعالوا
وما تتِأخر يا فارِسنا
وأبقى النار التضوي تدافِع عن أعراضنا
وعن إسلامنا
وعن تاريخنا
وعن البلد الليها بِندي دِمانا
نموت في شانا وما نِتأسف
وتجري دموعنا وتحفِر مجرى
وتردم فجوة
حتى العازة الكُنا عليها نتاكِي
نقول في شانا نموت من ذلة
وما نِهتم
صارت كذبة كبيرة
مظلة إفك ومذلة
تسرق تنهب
تزهِق روحك
شان الفلة
ومافي موانع
ومافي محنة
كل المُمكِن أو ما مُمكِن يصبح مُمكِن
(شان ناس الحِلة
يشوفوا عليها العِز والجاه
وكم أطيان
وصف عربات)
وناساً تدخل
ناساً تمرق
دقون وخمور
دجل وكجور
بخور وعطور
وهلس وملص
وقلة أدباً ما بتنقص
وأوعى تحاول داخِل رأسك
ترسم صورة
- دار الحزب ودار اللجنة
ولجنة ولجنة وكمين لجنة
ما نكون في اللجنة ونختا الصف
(يا ربي بنلحق صف اللجنة!!)
الصف الصف
الفيهو الأبلة
وأستاذ الحِلة
وكمين شافع
وأشعث أغبش
فوق أكتافو وفوق وأردافو بتظهر رقعة
(ما مِن دروشة
بس من فاقة)
وأيدو تجر عود طورية
وعرقوا مخرط فصد خدو
ودفق سرف فوق الأرض الزانية
الدون ما تفرز تدي وتمنح لي وش الله
وبرضوا كمان ما زولنا الأغبش أشتر
خدر وفرهد أرض البلد البكر الباقية
(زي ما ظن)
ويوم ما بيحصد
مات بالحسرة
جابت ولداً ما اتعرفبو
لونو غريب
وشكلو مريب
وما معروف جابتو من وين
إتقصى الحلة
ناساً قالت:
يمكن زار حلتنا العسكر
والناس في غفلة
وبابا متاكى
ونوما مظلة
وناساً قالت:
شفناها تنادي
تقول للغاشي تقول للماشي
تعال وإصطف في صف الصفق الأخضر
وصِبحت زانية
وبرضك بين الناس تتبختر وما تهتم
(يا ربي بنلحق
صف الصفق الأخضر!!)
دقون الدولة الما بتميز بين الصالح وبين الطالح
تنصب فينا الولد البسرق من الجامع
شبشب عمك حاج عبد الله
يبيع نِعلاتو عشان يتعشى
ويشرب سِنة
ويبقى محصل وصف العازة الأول
(ناس الحلة
يشوفو عليه العز والجاه
وكم أطيان
وصف عربات)
وأضيف من عِندك أي مقاطع
يمكن توصف حال الجزمة الرمة
وإن كان دُرنا نتاوق لي دِقن الدولة
ورأس الصولة
وسبب الوجع الفينا مصوقر وما بينقل
وقلنا:
ندرس وندرُس شيم الضلل بت البلد الزينة
ونصب فينا الولد السابق
السقط حجر البلد الفيها الغُلب إتاكى وحل
بنلقى مناقب ما بتتوصف
أصلاً من ما تب وشب وطل
ما بشبه شفع دارنا وداركم
(يوم ما كان بنقابل شُفع)
المن عينيهم تكرف ريحة الطيبة
وتلمس هيبة أجدادنا
ووِش السمحة حديقة دارنا
تب ما فيهو نداوة الشفع
شابي مشالِق
يخطِف وينهب
يجري ويرجع
يقلع ويلبع
ويضحك من ساديتو على ضعف الشفع من أندادو
وغفلة جارو
ودقسة أُمو
تب ما فيهو نداوة الشفع
ووكتين شب وفارق مسرح بلدو
(التحمد الله
وتشكر فضلو)
ومن عينيه الشر يتناقز
وقال يتسيد بالزندية وكُتر الحيلة
غرق خير البلد الضائع بين إيديهو وأيد العسكر
وآل عبد الله
وبعض الصفوة
وبعض الساسة
وأهل مذلة
وكشر عن أنيابو وطل
وقال بي دجلو كمان:
بسم الله
و.............
..............
..............
يا قلبي اتشقلب وأبقى ملاوع وما تتأخر في شقلبتك
.......................................
......................................
.......................................
6/2003م
|
|
 
|
|
|
|
|
| العنوان |
الكاتب |
Date |
| شغبٌ غير مصقول...غناءٌ أشتر | بله محمد الفاضل | 12-21-07, 06:07 PM |
| Re: شغبٌ غير مصقول...غناءٌ أشتر | بله محمد الفاضل | 12-21-07, 06:11 PM |
| Re: شغبٌ غير مصقول...غناءٌ أشتر | بله محمد الفاضل | 12-21-07, 06:13 PM |
| Re: شغبٌ غير مصقول...غناءٌ أشتر | بله محمد الفاضل | 12-21-07, 08:20 PM |
| Re: شغبٌ غير مصقول...غناءٌ أشتر | حسين محي الدين | 12-22-07, 08:11 AM |
| Re: شغبٌ غير مصقول...غناءٌ أشتر | هاشم أحمد خلف الله | 12-22-07, 08:58 AM |
| Re: شغبٌ غير مصقول...غناءٌ أشتر | بله محمد الفاضل | 01-05-08, 09:05 PM |
| Re: شغبٌ غير مصقول...غناءٌ أشتر | بله محمد الفاضل | 01-05-08, 09:02 PM |
| Re: شغبٌ غير مصقول...غناءٌ أشتر | بله محمد الفاضل | 01-05-08, 09:12 PM |
| غلطِكْ صاح | بله محمد الفاضل | 01-12-08, 09:01 PM |
| همهمات الوتر الحاس | بله محمد الفاضل | 01-13-08, 01:07 PM |
|
| |
بله محمد الفاضل
فيس بوك
تويتر
انستقرام
يوتيوب
بنتيريست