|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
فكرة تاسيس النادي: الجو العام للنادي عدد 8 ازيار (تيبار) زي مابقولو اهلي ناس العوض . تخيلو معاي الازيار البارده مع حر السودان البولول داك وتخيلو معاي طيبه صاحب الدكان (العم عبده)صاحب اقدم دكان بشارع الاذاعه السودانيه .وحنفتح مساحه خاصه للعم عبده وكيف كان بتعامل مع الوسط الفني (الحيشان التلاته )زي ما بسموها الرواد لهم التحيه. النادي كان عباره عن احتفال شعبي ملي بالطاقه الابداعيه مليئ بالحيويه والضحكه. كنت افكر دائما في لونيه هذه الضحكه الممزوجه بالالم والحسرة علي وجودنا خارج اربعه حيطان تمكننا من انتاج افكار جيده تري النور.وبرغم هذا كله نجد مثل الفنان السيد عبدالله صوصل قادر علي انتاج افكاره العبثيه المليئه بشخصيات معقده تشبه شخصيات الكاتب صمويل بيكت وبالمناسبه صوصل من مؤسسي النادي هو والشاب الممثل الخلاق محمد تروس(اخو علي تروس)لمن لا يعرف. كان الجميع ياتي بصورة يوميه منذ الصباح الباكر ونلتقي عند البنابر الحجريه التي كنا نراها اجمل من كراسي المكاتب الوسيره وزي ما قال صوصل في افتتاحنا للنادي الرسمي (اننا لا نعترف بالكراسي الوسيرة وربطات العنق الفخمه)هذه الحجارة قادره علي تحملنا وتحمل ماسينا العظيمه. بدينا تكوين النادي حبه حبه وابتدينا المشروع بتلاته حجارة كبيرة اخترنا اصغرها للمفوض السامي لنادي الزهاجه..والكبار لمكاتب التنفيذ(ديمقراطيه). ونواصل..... عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
عنى شخصيا ما زهجانه لكن اجمل ندوة عملتها فى حياتى كانت فى نادى الزهاجة تعرف جينا ليك الساعة تسعة للندوة انتهت الساعة اتنين لكن النادى زاتو ما شالوه (للصالح العام ) ودكان عم عبده بقى محله (عساكر ساكنين ) والشجرة تحتها فى دبابة ستات الشاى مافى ولا واحدة والمحلة (خلا ) وصوصل بقى زهجان مربع مليار لكنه بضحك وبكتب وبعمل (تمسيليات ) اجمل ما يكون
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: سلمى الشيخ سلامة)
|
النادي إتحول إسمو لي شجرة الزهاجة شجرة حنينة لامه الخلق بي حنية عجيبة بعدين بقى ليها إمتداد لي جوة حوش البول بتاع عربات الإذاعة وإتقسموا الناس كيمان ناس جمال حسن سعيد لي جوة عندهم ست شاي 0 دهاباية ) وكده ناس صوصل مرابطين في صخورهم الجرية لحدي ما سلمو العهده لي حراس الشجرة الجدد وصاحو صيحتهم الشهيرة ياحراس الشجرة افتحوا الأبواب للخارج اليك يا مدينة ألأحلام وماعارفين ناس الشجرة الجدد اللعنة الساكنة الشجرة قالوك الزهجة الضربتهمدخلت في عضامهم لمن سموها شجرة الجنود الزهاجة يعني هسي عملوا شنو ما كان اخلوها بياسمه وفي حتته ياول يا عليش المسرحية على وشك النهاية والماسنجر ما في رسل على عنواني الجديد [email protected] مودتي
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: محمد سنى دفع الله)
|
السني الشجرة اسم تالت للمكان ولكن الصديق صوصل طبعاكان مهتم جدا بقصه الورق والاعلانات وكان بختار الوان لكل مناسبه وكل اعلان الاجتماع المستعجل ورق احمر الاجتماع للعرض ورق بنفسجي والاجتماع لي مشكله بالنادي ورق اصفر ويالسني طمني الشجرة اسم له معني كبير والزهاجه برضو ليه معني كبير الامتداد الحصل للشجرة ما داخل الاذاعه وبس حتي طلبة كليه التقانه ومدرسة المليك بقو يكملو اجتماعتهم بالشجره وفي ناس ما اعضاء بالشجره لكن تسمع الواحد في التلفون خلاس نتلاقي في الشجره الساعه 4 لو مالقيتني خت لي ورقه مع ست الشاي (جواهر) يا سلام علي جواهر ودي دايرة بوست براهو من الجمال والتقنيه المتوفرة في طريقه التعامل مع الزباين خاصه ناس الشجرة الاصليين ويالسني الكيمان دي فعل مقصود من الحيكومه تفرق الناس خاصه الفنانين وحتي اذكر كمان مدير التلفزيون في اجتماع معاهو قال (انتو مافاضين من الشجرة) لنو كان بجي ماري الساعه تلاته بالعربيه الكامري المضلله وبشوف زي ود المهدي متفن في الشجرة ومعاهو محمد نعيم بستغرب انو فنانين كبار قاعدين في الصقيع ليه؟ وماسال نفسو انو نفس الفنانين ديل ماعندهم دار يحتويهم ليه؟ السني يا اخوي احسن نفتح نادينا دا هنا ونحكي للتاريخ عليش مكتب الاعلانات والتوثيق المفوضيه اساميه لنادي الزهاجه2007
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Siham Elmugammar)
|
نادي الزهاجه ..مني خوجلي...عضويه فخريه....
يالفرحي ..فهذا نادي موعود بالكثير من العضويه وتفريغ شحنات الزهج..
سأرجع لكم مساءا..فهناك بوستات كالفساتين والقمصان..لها توقيتات عند الأرتداء او الكتابه.. هذا البوست تصلح الكتابه فيه بالنسبه لي مساءا.. وحتي ذلك الوقت.. لكم التحايا والشكر أهل دار الزهاجه وومثلهم الزهجان عليش علي منحي العضويه الفخريه..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Muna Khugali)
|
سلمي بت سلامه الفكرة ما الزهج في حد نفسو لكن في حاجه اسمها الروتين الممل يعني حتي الكتابه هنا مرات بتبقي ممله اما النادي سابقا فالعساكر كانو يعشقون النادي ولكن لا يستطيعون التعبير بفكرة انو العسكري(ماعندو احساس جمالي)لازم يكون ناشف ومعارض فكرة الحب فكانو دايما يا يظهرو في الشجرة (بالسفنجات الخدراء النضييييفه ديك) وهم اكثر ما صاريين وشهم لينا باعتبار بجي يومكم وكان معي محمد حنفي وقت هذا المشهد وقلت: انت يا كابو العساكر دي بي سفنجاتهم دي شكلهم مطوليييييين هنا. سلمي تعالي نحتحت الصفق ونحول النادي دي فكره لجميع الناس نحتوي كل زهجان ونديهو نصايح طبيه ونفسيه(طبيبك الخاص) اما الحلتهم صعبه وماقادرين يعرفو كيف التصرف ممكن نملاهم نكت لما يقعو في الواطه...اصلو الضحك اليومين دي عمله نادرة تحياتي وماوريتيني تفاصيل الندوة قبلنا عضويتك بلا شك عليش مكتب الاعلانات(المفوضيه الساميه لنادي الزهاجه)
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: نادي خطير وستات الشاي هبطرش والاكل متوفر وبقينا نتلاقي هناك ولو في اي زول بفتش لي زول بعلق ليهو مذكرة في البورت اي في حيطه الدكان ولو في مخرج بفتش لي ممثل بجيهو في نادي الزهاجه وبتفق معاهو علي العمل الفني وعييييييييك الحكايه جرت بقي الصحفيين زاتهم بجو يقعدو معانا للحوارات وغيرو .
|
.
عليش يا أخوي إنتو كنتوا فى الجنة ولا شنو ؟
Quote: القرفان افتحو لي اضانو |
.
وبعدين يا عليش يا أخوى ، القرفان ده أفتحوا ليه نفسو باللوال ، وقبل أضانوا عشان يعرف يسمعكم كويس .
سلمى الودودة ، حب وشوق والله .
Quote: والشجرة تحتها فى دبابة |
.
لا وإنتى الصادقة ، البلد كلوا تحت الدبابة .
السنى ، سلامات وشوية حب .
Quote: ياول يا عليش المسرحية على وشك النهاية |
.
نقدر نعتبر ده نبوءة سياسية يا السنى ، اصلوا الناس البرّه دى عندها "بركات" ، يعنى جمع بركة ، مش بركات جمع برك ، من برك الجمل ، عموماً برضك حتكون اقوى من فكى لتلج داك ، فكرنه ؟؟؟
سهام المجمر ، حب خصوصى كده . .
حجر شنو يا سهام والبلد كلوا "لساتك" ياخى؟؟ (إتنين فى واحد) ، منها تقعدى ، ومنها تحرقى لو ما نفعت ، قالت حجارة قال .
معليش يا عليش (ده ينفع بداية قصيدة) ، معليش أصلو أنا محوص اكلت كباب بوستك ، فياخى أعذرنى ، أعذرنى دايماً وإبتسم
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Siham Elmugammar)
|
الاخت ولا العضو الجديد سهام المجمر لك الف تحيه اونت هنا في دارك وناديك السامي ومرحب بيك معانا في المفوضيه الساميه لنادي الزهاجه الحجار دي من هسه بتاعتك بس هناك معاينه قبل كل شي عشان نحدد نوعيه الزهجه وعلي ضمنها تقعدي في اي حجر ما مشكله المدير العام حا يحدد معاك مواعيد للنقاش(طبعا النقاش والمعاينات بتم اما الجمهور علانيه ماعندنا مكتب بتقفل وسكرتيرات وكلام من النوع ده عليش مكتب الاعلانات والتوثيق المفوضيه الساميه لنادي الزهاجه 2007
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: سلمى الشيخ سلامة)
|
عنى شخصيا ما زهجانه لكن اجمل ندوة عملتها فى حياتى كانت فى نادى الزهاجة تعرف جينا ليك الساعة تسعة للندوة انتهت الساعة اتنين لكن النادى زاتو ما شالوه (للصالح العام ) ودكان عم عبده بقى محله (عساكر ساكنين ) والشجرة تحتها فى دبابة ستات الشاى مافى ولا واحدة والمحلة (خلا ) وصوصل بقى زهجان مربع مليار لكنه بضحك وبكتب وبعمل (تمسيليات ) اجمل ما يكون
مش هم شالوه يا سلمي.زربنا يشيلهم؟
خلاص نحنا نعمل حقنا ده وان كان فالحين اليجوا يشيلوه شالهم الله تاني..
..............
.............. الأولاد ديل كلهم حايمين دايرين ينضفوا احية منو؟ والعنده قروش ذاتو يدفعها ليهم منو؟
ولد يا بكري..تعال هنا! بكري جه جاري وشايل شنطته الخشبيه فيها ورنيش من الفحم ..سواه براه الله يسألني..الدور الفات بهدلوا لي جزمتي..ورنيش من الفحم المدقوه ومعجون بزيت! يسوا شنو مساكين!!
آآي..جيتك..انضف ليك شبطك؟ شبط شنو! انت اتغديت ولا لأ؟ بكري سريع جدا رد..
لالا لسه.. سمح هاك دي قروش ..امشي سوق معاك علي وامشوا اتغدوا وبعد ماتتغدوا تعال لي طوالي..تلقاني في الحوش هنا قاعد..سمعت الكلام ده كويس؟؟ هوا...
بكري نزل صندوقه سريع جنب ازهار ونادي علي... ومرقوا الأتنين جاريين وهم بيضحكوا..
ياحليلهم..كانوا جعانين!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: فكرنا انا والصديقه مني خوجلي تاسيس نادي الزهاجه هنا في المنبر ومن هنا اعلان واضح وصريح لكل من يري في نفسه احساس بالزهج او الاحباط فعليه التقديم فورا لعضويه النادي والفرص غير محدودة... عندنا شعار للنادي وهناك مواصلات بعد العرض الذي لم يعرض حتي الان سارع في الانضمام عليش |
ودستورنا ساهل وحلو..زي شروط العضويه.. نهدف الي لم زهجة المتعوس علي زهجة خيب الرجا..علشان نضحك كلنا علي نفسنا ونفك كربتنا.. الشروط.. عايز تتطلع من الزهج.. عايز تخلي الدنيا حلوه وليك وللحواليك عايز تشرب شاي وقهوه وتقعد في بنبر ولا علي الأرض تاكل لقيمات.. مابتحب الشكل حتي وانت زهجان.. ان تشارك في هذا النادي بنكته..بزهجه..بحكايه..أو حتي بالحضور والتوقيع.. أن تحب لغيرك ماتحبه لنفسك.. .... .....
أرجو الأضافه..
نرجو فعلا ان تلتحقوا بالنادي..لأنه الزهج عمره مابيغادركم للأبد..يعني يغادركم كيف؟ ويغادركم يمشي وين؟ هو في مكان أحسن منكم منا علشان الزهج يفوت منه لمكان تاني؟؟
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: فكرة تاسيس النادي: الجو العام للنادي عدد 8 ازيار (تيبار) زي مابقولو اهلي ناس العوض . تخيلو معاي الازيار البارده مع حر السودان البولول داك وتخيلو معاي طيبه صاحب الدكان (العم عبده)صاحب اقدم دكان بشارع الاذاعه السودانيه .وحنفتح مساحه خاصه للعم عبده وكيف كان بتعامل مع الوسط الفني (الحيشان التلاته )زي ما بسموها الرواد لهم التحيه. النادي كان عباره عن احتفال شعبي ملي بالطاقه الابداعيه مليئ بالحيويه والضحكه. كنت افكر دائما في لونيه هذه الضحكه الممزوجه بالالم والحسرة علي وجودنا خارج اربعه حيطان تمكننا من انتاج افكار جيده تري النور.وبرغم هذا كله نجد مثل الفنان السيد عبدالله صوصل قادر علي انتاج افكاره العبثيه المليئه بشخصيات معقده تشبه شخصيات الكاتب صمويل بيكت وبالمناسبه صوصل من مؤسسي النادي هو والشاب الممثل الخلاق محمد تروس(اخو علي تروس)لمن لا يعرف. كان الجميع ياتي بصورة يوميه منذ الصباح الباكر ونلتقي عند البنابر الحجريه التي كنا نراها اجمل من كراسي المكاتب الوسيره وزي ما قال صوصل في افتتاحنا للنادي الرسمي (اننا لا نعترف بالكراسي الوسيرة وربطات العنق الفخمه)هذه الحجارة قادره علي تحملنا وتحمل ماسينا العظيمه. بدينا تكوين النادي حبه حبه وابتدينا المشروع بتلاته حجارة كبيرة اخترنا اصغرها للمفوض السامي لنادي الزهاجه..والكبار لمكاتب التنفيذ(ديمقراطيه). ونواصل..... عليش |
عندناكشك مهكع..تعرف مهكع يعني شنو؟
يعني قديم و جوانبه الخشبيه مترمه...يخيل لي الأرضه أكلت منه! نخته كده في ركن حوش واسع..والحوش بالجنبه اليمين منه فيه شجره كبيره ضلها يشيل كل الناس.. ويقول عايز زياده..وفي ركن غير بعيد..تراصت اربعه ازيار كبيره..علي جانب كل زير حبل طويل تدلي "كوز"..وتقسمت الأزيار بين اللون البني المعهود.. واللون الأسود الغامق..يشرب الزهجانين من هذه الأزيار بروح مختلفه..روح شابهت مزاجاتهم الزهجانه والقرفانه وايضا الخاليه من أي أحساس له طعم..
الكشك زي دكان البيع.. وممكن نخلي واحد اسمه عم وديع ولا ربيع يبيع فيه الحاجات العايزنها.... بدل زولنا ده..طبعا اساسا هي حاجات رخيصه..فول حاجات..بسكويت وحلاوه..ما اساسا الناس البتجي هناك أغلبها مفلس..ما ده كمان واحد من أسباب الزهج..موش؟؟
طيب الشجره تقعد تحتها أزهار وأمها..يعملوا الشاي والقهوه..وجنبهم فاطمه وسعاد..برضه ستات شاي.. البنابر كتيره عندهم..مالزهجانين الخرمانين للشاي والقهوه كتار..والشاي والقهوه براهم موضوع فك زهجه..لكن كمان عواطف قاعده ترمي في لقيمات تمد الطبق لأحمد وسلمي وتقول لعليش وهي مبتسمه .. دقيقه جايبه ليك لقيماتك..نظام اشتري مني أنا بس يعني! أول ما السني سمعها قالت كده جه طاير.. وانا مالي يا عواطف ناسياني ما من قبيل منتظر لقيماتي..ولا عشان لسه مادفعت ليك باقي قروشك؟؟ عواطف ضحكت وعاينت لأزهار بخباثه وقالت وهي تواصل تجفيف صينية الشاي..
انت ماقلت عايز الشاي واللقيمات من أهلك ديلك..واشارت لأزهار بعيونها..قالتها في لهجة لوم خفيف.. ماكان امام السني الا أن يجلس علي الأرض بجانبها..محاولة تأكيد بأنه يشتري منها هي فقط..علي الرغم أنه اشتري قهوته بالأمس القريبه من أزهار الجميله..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: لكل من يري في نفسه احساس بالزهج او الاحباط فعليه التقديم فورا لعضويه النادي والفرص غير محدودة |
...
الاخ عليش ...
والله ناديك دة وقع لي في جرح ...
بس خايفة عليهو من كمية الزهج الجواي ..يمكن تكون اكبر من طاقته الاستيعابية...
عندي طلب : عليكم الله اعملوا في النادي اوضة بجدران عازلة للصوت ... عشان الواحد لمن يغلبوا يمشي هناك ويصرخ لمن صوتوا يروح ...
عسى ولعل الصراخ يخفف عن الروح اذى كبت الحزن وتزايد الاحباط ويمتص شوية من صدماتنا في البشر البتخلينا نكره الدنيا وما فيها ..
اعاهدكم اني حاكون عضوة مخلصة وفعالة ومداومة على الحضور ..
تحياتي ..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: sanaa gaffer)
|
سناء جعفر ياخي الف مرحب بيك وانت تواجهين الزهج بشجاعه ونحن هنا في هذا النادي لدينا الكثير من البرامج للترفيه وتجاوز الحالات العرضيه البتجي للزول متلبه فجأة يبدو انك فعاله ومتخيله شكل البرامج لانو من هسه وعرفت تصور النادي الحقيقي مثل ما قلت غرفه للصراخ الحاااااااار(الجعير) ونحن كما قالت مني خوجلي(فستان الكتابه)انوفي كل حاله يمكننا ان نخلق حاله اخري موازيه للزهج وكل ما نجي نكتب بكون عندنا المزاج المختلف حسب مانريد منعطف... ........ الحاله دي من متين معاك عشان نحدد ليك العضويه لانو لو بقت حالت اكبر زي ماقلت ممكن نمنحك عضويه في اي بي او ممكن تبقي المدير العام في الشرق الاوسط للمفوضيه الساميه لحقوق الزهجانين(,^^) عليش المكتب الاعلامي للمفوضيه الساميه لنادي الزهاجه برجع ليك تاني للانترفيو الاول يا سناء
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
العـــــــــــــــــم عبده هذا الرجل الطيب الذي منحنا احساس رب المنزل,كان عادة ما يفتح دكانه الساعه 5 صباحا واول ما يبدا اليوم يعطي نظرة للازيار ان كانت مليئه ام لا والناقص بتمو. كان الدكان عبارة عن عن سوق فيهو كلو مالذ وطاب وفيهو كل شي حتي الهدوم والجزم والات موسيقيه برضو كان التعامل راقيا جدا معه تشيل وتكتب في الكراس او لا تكتب المهم لما تصرف تجي وفعلا كان الناس نهايه الشهر يترصو صفوف لسداد ما عليهم. التلفون.... كان التلفون بتاع عم عبده هو تلفون المفوضيه الساميه لنادي الزهاجه وبين الحين والحين تسمع صوت عم عبده(يا صوصل التلفون) يا ابرهيم كومك التلفون....يا محمود كابو..(وحتي المرحوم مجدي النور)تسمع ان له مكالمه....ومحمود عباللطيف كابو كان من اوائل الناس البشرفو الحضور وبصورة يوميه..والشاعر العم حدق وهو من الشعراء المميزين الكبار تجده متوفر بالحضور.. فالتلفون كان مفتوح يستقبل كل مكالمات النادي قبل انتشار الموبايل.. ونواصل... عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
(عليش) ... والله أنا شدة ما زهجان قلت بس أتلصص على المنبر ... ياخ انا موضوعاتي بقت زي (طشامة) ما قبل 1983 (صديقة للخور) ... لكن (هبشتني) الفكرة زي ما بقولوا (المسقفاتية) ...أها أزيدك في الفهم بيتاً ... (نادي الزهاجة) بدايتوا (الرِنق) ... بين (صوصل) و المخرج الصادق (عبدالعظيم محمد الطيب) وهو لمن لا يعرفونه شقيق (مريم محمدالطيب)...إبن خالة (آل شيخ الدين) ... خال كل من (سالي خطاب حسن أحمد) وشقيقتها (عزة ــ أظن؟؟ــ خطاب حسن أحمد) ... ويقام المأتم بالثورات .... ... ... ... أها (الرينق ) بدأ بالمعهد العالي للموسيقى والمسرح ... (المرحلة السرية) ثُم تطور لشجرة الزهاجة والتي تطور لنادي الزهاجة والذي صار (نادي الجياشة الطردوا ناس نادي الزهاجة)... ... ... (عليش) : أنا مادير عضوية لكن بجي وكت أكون زهجان (معارض وكدا) ... أها شنوا ليك؟؟!!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Ahmed musa)
|
احمـــــــــــــــــــد موسي عديل كده اول اتفضل اشرب ليك شاي بي نعناااع حااااااار يبل الاشواق وين يا راجل يا جميل حقيقه سقط سهو عبد العظيم محمد الطيب والاخ عبد المجيد حسن بهولندا وكل من شمت محمد نور وبهنس والاغنيه الجايه مهداة للجده بطه بالسعوديه والاخت مريم بالصحافه شرق ومحمد ابكر بالقضارف وست النفر الباقر بطيبه الحسناب ريف تمبول المهم يا ابو احميد النادي فاتح اليوم كلو وكان جيت متاخر شديد بعد الونسه مع ناس طارق وربيع وتحياتي ليهم ممكن تلقي المفتاح بتاع الباب تحت الكانون(المنقد)لمن لا يعرف المصطلح تعال تعال وفتح مساحات غصبا عن الدياشه القفلو لينا الفرحه وختو دباباتم محلها تخريمه... حااتكلم عن (باكمبا)الاكله المفضله لاعضاء النادي (و ام جنقر برضو) وبهديها لك الاعضاء مجـــــــــــــــــانا تخصم من الميزانيه العامه يا حافظ العشا عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: حافظ العشا)
|
ياسلام يا حافظ العشا مرحب بيك في المفوضيه الساميه لنادي الزهاجه يشرفنا انك تكون عضو وطموح للادارة اختر اي منصب يعجبك وانا بدوري بقوم بي رفعو للاستاذه مني خوجلي واكيد حاتلقي نفسك من الادارة والمكتب التنفيذي(طبعا ماعندنا ليك عربيه وسكرتيرة وكلام من النوع ده لكن اول شي مقدم ليك مرتب مقدم حب واحترام وتلاجه ماركه لتبريد الاعصاب ولو كمان عايز الغرفه الحمراء ممكن تشرف عليها المهم لينا حوار معاك قريب بس مني تفض لينا شويه عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
ازيك يا حافظ..
ده مزع حركة تغيير من الزهج زالقرف.. مرات كده مش بتكون داير تغير جلدك ذاته؟؟ طبعا ما بتقدر..تقزم تغير صورتك..أضعف الأيمان..
دكتور عادل أو سيجيمان مافاضي لينا.. بيرد علي الجماعه في الجرايد هناك..قبيل قريت كده في بوست الأخ بهاء عيسي..
.....
.....
انت الزهج معاك كيف؟؟ الحاصل شنو؟ الكلام ما يتحول مكان تاني يا جماعه من شروط الزهج نفكها هنا
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
وهناك يقال: ن شر.........الزهج ما يضحك هناك حلات يمكن ان نتطرق لها بامثله حيه تعكس مدي زهج الناس بيقود الي افعال غير منطقيه وغير منضبطه لكن لكل منا رد فعل خاص يمكنه من التنفييييث عن زهجته (وله حريه في التعبير ..وان يفكها فينا نحن) ونحن فاتحين النادي ده ليه؟ ما للحالات دي عليش
[object width="425" height="355">]
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: عمرو كمال ابراهيم)
|
ابراهيم شكرا للمرور والاحساس بالفلس اول خطوات الزهج يعني عاجلا او اجلا بجيك الزهج فاحسن من هسه تحجز حجرك قبل ما كمان النادي يدخل عليهو الهكر ويبقي نادي مخيف (الهكروك علي) عليش انت معانا يازول بدون شك وعضو بس املا البيانات ورسل لينا صورتين و100 جنيه رسوم دخول وماف مشكله الاجتماع في الضل ماتنسي وابقي مارق
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: عمرو كمال ابراهيم)
|
عمرو كيفنك ؟؟ انت وين مشيت وشلت معاك حكاوي القاهرة بايامها ولياليها ؟؟
هسة انا باقي ونسة الشوارع دي اتمها وين ؟؟
انت لسة راسك ما وجعك من السقف المستعار بتاع عصام عبد الحفيظ دة ؟؟
انا وجعني ليك ..
اها شفت زهج اكتر من كدة .. واحد شايل سقفه .. التاني تعبان ليه ؟؟ دي فكة زهج ساكت .. والله السقف حلو وملولو
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Muna Khugali)
|
اول شي يا مني خوجلي انت مفروض تكوني عارفه المواد التكوينيه لنادي الزهاجه تانيا: ام جنقر دي اكله محببه جدا كانت لاعضاء النادي بالشجرة القوميه للنادي الزهاجي الاصلي وهي تعتبر اكله من الغرب بتتكون من القمح والدقيق والسكر ولعلي اعتقد بان بها نشادر لخاصيه لونها الابيض الناصع ويسطو فوق السطح هذا القمح البني اللون وهي بطعم السكر الحلو وكنا دايما ما نفتتح بيها اليوم الصباحي لما فيها من طاقه ولدسامتها فالاكله يا مني خوجلي جديرة بالتذوق وجديره ببعث الروح المعنويه لاعضاء الجسم. عرفتيها؟؟؟ ام جنقر دي زي ام درمان كيف؟ امدرمان لما تطلع منها تفكر متين ماتوصل متين تجي راجع ليها تحن ليها وتهاتي بيها فكان انا والاصدقاء بالنادي نلتقي عند ام الجنقر وكان اذا كنت عايز الاقي زول بدري شديد بقول ليهو نتلاقي الساعه ام جنقر (يعني 8 شوكه)وناس كانو بقولو نتلاقي الساعه 8 ام جنقر يعني شوكه برضو. اما الاكله التانيه فهي (باكمبا)ودي كمان ادسم من ديك بمراحل باعتبارها تحتوي علي السمن البلدي الطازة والعجب لما يخلطا بالطحنيه ام فزدق ديك وحبه جوز هند في الوش وتقول كده تجيب ليك تلاته معالق يشيشيشيشيشش(هسه في داعي ...الرياله ما سالت يامني .) كنا والله نتقاسم حتي التحليه مثل باكمبا بالصحن الكبير وبقت وجبه اكتر من انها تحليه لانو كانت بالصحن الطلس الكبير او اكبر كورة المونيوم عند جواهر ست الشاي لغايه ما سميناها بدلا من اسمها الحقيقي(جواهر)سميناها باكمبا وبحكي ليك لما اجي راجع كيف في خلال 6 شهور البت جواهر سمنت وحركتها بقت تقيلــــــــــــلا كيف؟؟ في داعي هسه تذكرونا الكلام البجيب لينا الزهج تاني؟ ولا الواحد لازم يتذكر طوالي انو في نادي الزهاجه بتاعكم ده وخاتي البنبر اليوم كلو مرابط عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: معتصم ود الجمام)
|
عارف يا معتصم وعليش دى حالة من حالات الاذاعة زمان شيخنا صلاح الفاضل ، كان يسميني ابو الدقيق لحماقتي ، وسرعة انفعالي ، وهذا ما وددت التخلص منه طوال حياتي ، وكثيرا ، حتي ان شقيقي الكبير كان يقول لي دائما ـ سلمي اختي ، الدنيا دي فيها الوان كتيرة غير الاسود والابيض ، في الوان تانية لكني لا اراها ، غالبا ، لحظة انفعالي ، علي اية حال ، استدعاني صلاح الفاضل ذات صباح ، المكتب كان مكتظا بالحضور ، ضمنهم كان فراج الطيب ، والذي كان تقدم بشكوي ضدي لصلاح الفاضل ، مفادها انني اغفلت امر مسا بقة ما كان المجلس القومي للثقافة والفنون بصددها ، حين احسست بالسخرية في طريقة الكلام الصادرة عن صلاح الفاضل امام الحاضرين ، غضبت وخرجت لا الوي علي شئ سوي المغادرة الكلية للاذاعة ، دخلت الي المكتب هناك وقفت امام دولاب الاشرطة مفرغة كل المحتويات من اشرطة كانت تخص البرامج التي كنت اقوم باخراجها ، منها ما خص الاستاذ علم الدين حامد وبرنامجيه (صالة العرض ، وحروف ) لابراهيم البزعي ( كاريكاتير ) لصلاح الفاضل نفسه المسلسل اليومي الذي كنت اؤدي بطولته ، برنامجي صباح الخير ومساء الخير ، المفكرة ، وغيرها من البرامج التي تصل الي خمسة عشر برنامجا ، وكنت اذ ذاك اهم بالخروج ، فاذا بخطاب والعميري في مواجهتي ، وهما يلوحان لي : ـ بت الشيخ شوفي تمرقي حنمرق معاك ، دي مسئولية كبيرة ، وانتي في اول السكة ، صلاح الفاضل حنخليهو يعتذر ليك ، اها ، تاني شنو ؟ اخذني العميري الي (ركن ) من اركان المكتب ، حدثني عن ضغوط العمل ، ورمضان ، ـ ياخي زول زيك بشتغل ليهو كم برنامج من الصباح لحدي بالليل ، انتي مجنونة ؟ ولا شنو ؟ بقيتي اشهر مننا ، بعرفك يا بت الشيخ سلامه ، يا بلال عليا ، آي ياخي اضحكي كده ، ( هيع ) عليك الله في احلي من الضحك دا؟ (ايا) هسي اخونا حيقوم يلقط الشرايط (والدبابير ) كلها ، و... اتجه بي الي مكتب صلاح الفاضل وضحكنا مما اسماه صلاح ابو الدقيق وكان يعنيني ، قال لي صلاح لحظتها : ـ تعرف يا ابو الدقيق ، العمل الاذاعي عمل جماعي ، ولا ما كده يا عميري؟ وانه الجماعة ما زي الزول براه ، صحي الزول وسط الجماعة ما بكون ظاهر ، لكين انت يا ابو الدقيق ، زول بحب شغلو ، يلا امشي شوفي شغلك .
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: حافظ العشا)
|
Quote: اخ عليش انا عايز عضوية ومش عضوية وبس وكمان دور اداري في النادي ممكن |
توصيتنا لقبول العضويه.. تعمل لينا كل يوم لمده 3 يوم.. صحن بوش كبير..وتدفع انت قروشه..اصله نحنا مفلسييييين! وبعدين ما يكون فيه زيت سمسم علشان اقدر آكل معاهم..
سمح حافط أخوي؟؟
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
مع إنو أنا ما كنت عضو أساسي بالنادي .. وما كنت بحتك بشلة الفنانيين .. وده شئ حأندم عليه عمري كلو ..
لكن رضو أيامي القضيتها في النادي بحكم دراستي بكلية علوم التقانة لن أنساها ..
أم جنقر .. من (سعدية) أو (سعاد) لا أذكر إسمها .. والقهوة الفرنسية ..
صوت الجابري من مسجل عم عبده ..
(تعال يا رشا .. يا راحة الحشا .. تعال بالعشا يا قمر العشا)
ما عارف عم عبده ليه جنو كان يشغل الأغنية دي ...
وعمري ما حأنسا البرلمة الإتبرلمتهاأول أيامي في الكلية .. كان في نادي الزهاجة ..
علقت ورقة كتبت فيها .. أبيات من شعر حميد (باقي الدين يا الزين خلصتو .. قدر الفاضل مصروف راشد والتومات) .. ونط لي واحد سنير عمل لي فيها بتاع أمن .. وممنوع كتابة الأشعار في الحيط .. وكلام كتير .. سل روحي بيه..
وأنبل موقف مريت بيه برضو ليه علاقة بنادي الزهاجة ..
والموقف ده .. بعد ما خلصت الكلية .. وخليت نادي الزهاجة .. بكم سنة .. ونسيت الناس الكان بقعدو في النادي كلو كلو .. وأثناء ما أنا راكب لي حافلة ماشي من بحري لأم درمان .. وقاعد آخر صف .. وجيت أدفع للكمساري .. قال لي في واحدة دفعت ليك قدام .. قدرت ماعاينت لي قدام .. والناس القاعدين في الكراسي قدام .. ما القى زول بعرفو .. ولمن جيت نازل أشوف ليك واحدة .. جات تسلم علي .. وبعد سلام وحق الله بق الله .. إكتشفت إنها كانت بتبيع شاي في نادي الزهاجة.. ومذكرانا لغاية حسع .. ونحن أولاد اللذين نسينا العشرة ..
فيا ريت يا أخ عليش تكتب لينا أكتر عن النادي ..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: سليمان عبد الغني)
|
ياخ ممكن الزهج ده!! الساعه بعد 2 الظهر والسخانه تقتل..وأسه المفروض أمشي أم درمان..العربيه سخنت ورادياترها ضرب وخليتها في السجانه عند الميكانيكي..عندي مواعيد الساعه اتنين ونص في نادي الزهاجه..والزول الفقري المواعدني ده ماجه.. واسه ذاته انا انتظره لمتين؟ عارفه زايغ من قروشي العنده..أعمل شنو انا بدون عربيه؟ التصليح كرهنا حياتنا ذاته... وجعان انا لا فطور لا شاي..
قلنا ليكم بالنهار ذاته ما بنحب الجيه بي جاي! حر..وعرق هدوم تقول الزول لآبسها ليه 10 أيام مش قبل ساعات بس!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Muna Khugali)
|
مني خوجلي نحن متفقين علي انو مركزك بالنادي حساس ولازم يتم اخطار المكتب باي مواعيد خارجيه عشان نجهز ليك وش الزهج تشيلي معاك. اما موضوع العربيه والسخانه امشي علي الازيار واشربي ليك عدد تلاته كيزان باررررددده والحقيها بي بيزيانوس باررررد موضوع الراديتر ده اكتبي لينا حجمو شنو ونحن نقوم بالواجب لانو في ناس كمان عاملين علي خدمه الزهاجه وتوفير اللازم ليهم . الزول المواعداهو ده اذا موضوع خسوسي يبقي نرسل معاك موظف ازهج مننا عشان يرفع راس النادي اما اذا موضوع بخص النادي فكلنا ماشين معاك برجع ليك عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
والله غايتو زهجانين زهج ,, اها هسا الواحد لو داير عضويه يعمل شنو ؟ غايتو زهج ,,
انا نادي الزهاجه الاصلي داك ماشفتو ,, مع انو قالو كان من تصميم عبدالعظيم محمد الطيب ,, ود خالة ناس شيخ الدين ,, وانا بت ناس شيخ الدين ,, لكن النادي الاصلي ما شفتو ,, وده المزهجني زاتو ,,
اها هسا الاوضه الطلبتا استاذه سناء دي , العازله للصوت , لزوم التنفيس عن النفس وكده , الاوضه دي موجوده ؟ عشان تاني نكتر الجيه , والله غايتو لو قبلتوني انا حاكون ازهج زول , لمن ازهجكم زاتو , ولمن تزهجو مني وتخلو لي نادي الزهج زاتو , غايتو زهج ,,
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: د.نبراس)
|
Quote: ولمن تزهجو مني وتخلو لي نادي الزهج زاتو , غايتو زهج ,, |
يا شباب هوي ورونا.. في جندرة زهج ولا لأ؟
علشان نعرف نعبر بزهجنا بمزاج.. يعني الغرفه نحنا صممناهامانعه للصوت..زي استوديوهات التسجيل..والزول البدخل فيها بيلقي الوان وحاجات عجيبه كده تخليه يصرخ ..ويصرخ لامن شيطانه يمرق منه! اسه سؤالي عن الجندره ده علشان نشوف وسائل العلاج دي..عامله حساب لفصل النساء من الرجال ولا لأ؟ يعني ما ممكن كمان الواحده تكون في الغرفه ويكون معاها واحد..الناس يعني ناقصه زياده تهم وبلاوي؟ يبقي اذن لازم يكون في فصل لمكان فك الزهج عن طريق الصراخ..
يا خوانا عايزيين كمان نعمل حاجه تانيه.. شوفتوا الكيزان المعلقه في الأزيار دي.. عندي احساس هي ذاتها زايده زهجنا..نعمل ليها شنو؟
منتظراكم..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Muna Khugali)
|
سليمان عبد الغني انا سعيد القي زول ليهو تاريخ بالنادي وسعيد جدا كمان لما لقيتك هنا وانت بتحكي لينا عن تجربتك في النادي اولا انا بمنحك العضويه بدون الرجوع للساده الاعضاء مع الاعتذار للاعضاء وانا حا احكي ليك كل الاشياء الجميله البتعكس ليك صورة نادي الزهاجه المخفيه والناس ما عارفاها كدي اول عازمك ام جنقر بالكورة الكبيرة من جواهر لو متذكرها وبجيك راجع قبل ما تبرد عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: د.نبراس)
|
نبراس اولا تم قبولك بالنادي والغرفه من ما سناء جعفر طلبتها ودينا التصميم لاخوانا الصينيين عشان اليومين دي قالو انتشرو بالبلد وهسه الخشب الصيني جاي في المينا يعني تلاته يوم والغرفه جاهزه بس انت جهزي صوتك للجاعورة تعالي باكر بدري وجيبي معاك حكاويك وسبب الزهج ومن متين معاك؟ عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
سلامات يا عليش ... زهج الزهج دي بتشمل كل الالوان الحالكة بما فيها تدرجات الرمادي وبعدين الاوضة بتاعتي اتاخرتوا ليه في البنا ؟؟؟ يعني منتظرني اطرشق ولا شنو ؟؟ لاحظ بتاعتي دي ... حقوق الملكية وكدة يعني .. عشان انا اول زول اقترح وجودها .. وبعدين انا من المؤيدين لفكرة انو تكون مفصولة عن غرفة الرجال .. لازم تكون خاصة بالحريم بس ... باقي ساعة الزهجة الشديدة الزول بيقول كلام لو سمعوا الجنس الآخر بتبقى مشكلة ويلا يا د. نبراس .. منتظرة رفقتك في اوضة الصراخ ...
| |
|
|
|
|
|
|
Re: نادي الزهاجه ..مني خوجلي...والجندره (Re: sanaa gaffer)
|
Quote: مني خوجلي اتفاقنا ماف كيزان كبـــــــــــــــابي بس وفصل النساء من الرجال في غرفه الصوت دي معناته فصل الدين عن الدوله ولا شيتا تاني؟؟؟ عليش |
Quote: سلامات يا عليش ...
زهج الزهج دي بتشمل كل الالوان الحالكة بما فيها تدرجات الرمادي وبعدين الاوضة بتاعتي اتاخرتوا ليه في البنا ؟؟؟ يعني منتظرني اطرشق ولا شنو ؟؟ لاحظ بتاعتي دي ... حقوق الملكية وكدة يعني .. عشان انا اول زول اقترح وجودها .. وبعدين انا من المؤيدين لفكرة انو تكون مفصولة عن غرفة الرجال .. لازم تكون خاصة بالحريم بس ... باقي ساعة الزهجة الشديدة الزول بيقول كلام لو سمعوا الجنس الآخر بتبقى مشكلة ويلا يا د. نبراس .. منتظرة رفقتك في اوضة الصراخ ... |
طيب يا شباب سريع كده قبال حالة الزهج ما تسري فيني وتلخبط علي يومي البراهو ملخبط ده... احسن حل نجيب طبيب نفسي..يقسم حالات الزهج علي حسب مستوياتها واسبابها.. ليه؟؟
علشان كلام سناء وعليش ده عن غرفه الصريخ..تكون واحده ولا منفصلات.. انا أعتقد..ومعاها وقفه معووجه وحكه في شعر منكوش.. انه احتمال كبير لو واحده فينا من النساء عايزه تصرخ وتخبط متل اكنها مجنونه..يكون سبب الحاله الهي فيها دي راجل! اها مش ممكن المتل اكنها مجنونه دي..تقوم تنتقم من الرجال المعاها في الغرفه؟؟؟
خليكم حساسين يا جماعه في القضيه دي..اذا ماحليتو الموضوع ده بغرفتين من نفسكم نجيب اسه طبيب يقنعكم....
والفصل ذاته ليه فوائد أخري..عندكم فكره عنها؟؟؟
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: علشان كلام سناء وعليش ده عن غرفه الصريخ..تكون واحده ولا منفصلات.. انا أعتقد..ومعاها وقفه معووجه وحكه في شعر منكوش.. انه احتمال كبير لو واحده فينا من النساء عايزه تصرخ وتخبط متل اكنها مجنونه..يكون سبب الحاله الهي فيها دي راجل! اها مش ممكن المتل اكنها مجنونه دي..تقوم تنتقم من الرجال المعاها في الغرفه؟؟؟
خليكم حساسين يا جماعه في القضيه دي..اذا ماحليتو الموضوع ده بغرفتين من نفسكم نجيب اسه طبيب يقنعكم....
والفصل ذاته ليه فوائد أخري..عندكم فكره عنها؟؟؟ |
يا منى كيفنك ؟؟ غايتو واحد في الاتنين يا نفصل ... يا نجيب معانا اكياس بلاستيك سودا ... وسواطير ... ووبعد داك كل زول يشوف الطريقة المثلى لفش الزهج ... حالة متاخرة شديد ... غايتو القنعان من رويحتو يدخل معانا ... هسة يا منى انا باكتب في كلامي دة وقاعدة معووجة وشعري منكوش .. وشايلة مبرد اضافر سنين
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: sanaa gaffer)
|
بشـــــــــــــــــــــــــري يا سناء جعفر ومني خوجلي اثناء البحث عن الغرفه وامكانية تصميمه وجدت علي الانترنت غرفه في المزاد العلني: لكن مستعمله شويه(مامشكله) بنضفها ونعمرها ولا شنو؟ المهم يا جماعه الغرفه دي برغم انها مستعمله الا انها بتخدم الغرض المطلوب: اولا: المتزوجــــــــــــــــــــــات (وده قسم براهو)والمتزوجات كميه من الانواع ممكن نشرح جزء جزء المتزوجات وزهجانات(وماف داعي نسال عن السبب جعييير بس من دون دموع) المامتزوجات.(وديل نديهم الجزء الكبير من الغرفه بشرط يكون في احواض اسمنت زي بتاعت الغسيل والاسباب معروف.....!!!) الموظفيييين(ديل غرفتهم براها وكلهم ما محتاجين مناديل ورقولا محتاجين عزومه للغرفه)يدخلو ساكت بس لازم نسجل الاسم والعنوان قبل الدخول لانو الظروف ما معروفه. الطلبه: وديل بنشرح حالتهم براها المغتربيين غرفه رقم 0 ودي مخصوصه لي ناس سناء جعفر باعتبار الاقدميه ولا بعاتبار الحاله المتاخرة ماعارف المهم الغرفه ده ليكم يا دفعه اسمعو بجيكم راجع لاني هسه زاتو زهجت لامن غلط مع تحياتي زهيش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: المتزوجــــــــــــــــــــــات (وده قسم براهو)والمتزوجات كميه من الانواع ممكن نشرح جزء جزء المتزوجات وزهجانات(وماف داعي نسال عن السبب جعييير بس من دون دموع) المامتزوجات.(وديل نديهم الجزء الكبير من الغرفه بشرط يكون في احواض اسمنت زي بتاعت الغسيل والاسباب معروف.....!!!) |
بالله كدي خلينا بلا متزوجات بلا ما متزوجات معاك.. ما تزهجنا كده.. اسه اشوت ليك البوست ده لغاية مايتعور؟!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
غايتو زهج ,, وكت ما يدونا عضوية نادي الزهج , يزهجونا ,, يشبكونا ليك , دايرين غرفة الصينيين , ولا غرفة الكيزان , ولا غرفة الطبيب النفسي , غايتو زهج ,, انا غايتو متفقه مع استاذه سناء , من حيث السواطير والاكياس السود ,, عشان كده ما من انصار الفصل , ولا السواطير دي نعمل بيها شنو كان فصلنا ؟ وبقترح انو اي زول يجيب ادوات التعزيب البتناسبو وبتكمل احتياجاتو , يعني الساطور مسموح , (الشاكوش) مسموح !! ناس الزرديات والمفكات ينفعو , ونطالب بوجود الطبيب النفسي ,, وكامل المسؤليه القانونيه يتحملا عليش , بما انو هو صاحب البوست اولا , وبما انو رجل ثانيا ,, ولا رايكم شنو يا نساء نادي الزهج ؟؟ غايتو زهج ,,
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: د.نبراس)
|
هوووووي يا نبراس ماتزهجي لي في راسي من هسه الحاله واحده بدون فرز كان راجل ولا بت الكل زهجااااااااااان ومسخن ومفلس ومهترش وناس عاملين فيها زهجانين وهم ولا زهجانين ولا حاجه وناس عامله فيها الزهج ده ما بعرفو معناتو وهم بي جوة عيزين مش غرفه عايزين صالون وغرفتين خلف خلاف ومطبخ بي فرن بدون غاز والشي التاني: انت عارفه انو الزهج بتكاثر طرديا كلما كترت عدد لفات التوب حولين جسم المرأة؟ المهم مازالت الحاله:::حاله بلد بي حالو لكن صمت...صمت عبيط يحي فضل الله العوض كان بقول لينا دايما: (لماذا هذا الصمت الرهيب ونحن اشد حوجة للصراخ) فحقو ما نتكابر علي الزهج ونغش نفسنا بيني وبينك المابزهج شنو ؟؟؟؟ اذا كان المنفث الوحيد سودانيزنا دا وبعد ده ما دايرين يريحونا فيهو (ورانا ورانا الناس ديل) اربطو الاحزمه عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: عمرو كمال ابراهيم)
|
Quote: سناء .. وينك كده؟؟ ناس منى ديل شكلهم مروقين،، قلنا اقبلو ناس مفلسين عملو رايحين!!!
حقو نبلغ ناس الضرائب |
القال ليك منو؟ فكرتكم الغلط دي هي ذاتها المكرهانا! هو ذاته الزول كان عنده قروش ومروق..ناس افواه وارانب الفي السودان ديل بيخلوه في حاله؟؟ عليك الله يا عمرو ياخ ما تكرهنا حياتنا.. نحنا ناس كروت تمرق القروش من الحيط..وتقعد تبكي مع كل فاتوره!
امشي كده ولا كده عامل اسمك السمح ده!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
غايتو زهج ,, عليش ,, انا جيت الليله جاهزه للاوضه دي وقلت يا انا يا الزهج ده ,, لقيت الاوضه متكيه ,, قالوا استازه منى شاتتا ,, والحاله استازه سناء بي جوه ,, يعني الاوضه متكيه ,, واستازه سناء بي جوه بتضبح ليها في (شخص ما) !! غايتو زهج ,, وتقول لي صمت ؟؟ دي حاله بينفع فيها صمت ؟؟ دي حالة سواطير ساااااااااي !! خلاص انا بجي تاني لما استازه سناء تخلص على الباشمهندس الاتضبح ده ,, وياريت لو الجلسه الجايه تكون ظار !! غايتو زهج ,,
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: د.نبراس)
|
واقول ليكم كلام؟
انا بيت زار زاتو ماني دايراه..وغرفه يا سناء دي ماني دايراها.. بس بجي المنبر ده اخش اي بوست مودر..وماشاء الله ..حلاتي عليهن يا خياني..كتارالمودرات.. كان دايره اقطع لي لحم زول وهو حي..بلقي.. وان دايره اشنفكم يا شماليين..بلقي.. وان كاندايره اسمع نبذ فيني ..برضه بلقي.. وكان دايره افنجط وارمي بلاويني زيهم فوق الغير..بمشي وأفنجط معاهم.. وهي اصلها الفنجطه دي ألات زول؟ ماياهو بس تكون قاعد جوه الحوش الكبير ده وتسوي الدايره..
والنادي دي ترفيه زهجانييييييييم..وبس
هاك يا ولد خيط لي شيطي المقطوع ده!
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Muna Khugali)
|
د/نبراس الاوضه دي شكلها بالاسبقيه الدخل اول يمرق الله تاني وبيني وبنك انا زاتي مالاقي لي طريقه في الاوضه دي دايرين نكوووووورك يا ناس دايرن نجعرررررر يا ناس افتحو البيبان دي زهج زهج زهج وكمان زهج والغريبه ماف زول حاسي بالموضوع الناس ديل شبعانين ولا شنو؟فرحانين ولا شنو؟ الكورااااك ال......امشوا كده ولا كده دي نظام مكابرة سااكت الخبر البفلوس بكرة ببلاش اومال ايه يا قدع تعرفو شده ما قفلة معاي بقيت بتابع نشرة الطقس بي شقف زي الحلقه الاخيرة وكده بقيت اشيل الشبط البني الواحد اديهو اورنيش اسود وكمان لما اتذكر انو انا في الملايات المتحده دي عييييييييييك كان ما جيتك راجع افقدوني زهيش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
ناس النادي هووي ...سلام ... منى ... نبراس ... عليش .. عمرو ...
كنت حايمة بافرق في زهجي على الشوارع والبيوت ...
في النواصي .. وفي البحر ...
تعرفوا اجمل علاج للزهج شنو ؟؟ وحدة .. وبحر ...
القال الزهج عاوز رفقة زول مستجد وما بيعرف اصول الاحساس دة ولا كيف يتعامل معاهو ...
لمن ازهج جد ... بامشي الخليج ... باختار ابعد مكان عن الناس ... باقعد براي ...باضحك ... بابكي ... باصرخ ... وممكن اتدردق في الرملة كمان ... باغسل وشي بموية الملح .. باتعمد اخلي جرعة منو تدخل خشمي .. لذعتو ومرارته بتريحني .. نوع من تعذيب الذات .. باجمع قواقع كتيرة .. اشكال والوان ... باشيلها وادخل جوة البحر ... وارميها هناك ... باقيف جوة الموية لمن جلدي يتكرفس والملح يقرصني .... لحظتها باعرف انو آن اوان الرحيل ... كدة جربوا وصفتي ... وحدة وبحر وطعم ملح ...
منى ... لو دقيتي ظار كلميني ... باجيب بالطو الحكيم وفستان لولية الاحمر .. وجلد نمر الكندو ... عصاية الخواجة وسيف احمد البشير ...
نبراس ... بقيتي على شنو ... الصراخ ولا الاكياس والسواطير ؟؟؟
عمرو .. جاياك يا ابشرا ...
عليش ... الزهجة وصلت وين ؟؟...
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: sanaa gaffer)
|
مني..... فتشت الدليل عشان اشوف اسم دكتور نفساوي لكن الحظ ما كعب خلاس.... لقيت دكتور اطفال بس الفاضي....قلت ما مشكله نكلمو يجي النادي ونبقي شفع...نلعب بالتراب ..ونلبس الشراب ... امكن لو رجعنا شفع ننسي الزهج... ولو رجعنا شفع يمكن نتوة في عالم جديد لافيهو صرة وش ولا زول ينبزك ويفلقك بي سمو الاسود داك... يمكن لو بقينا شفع نغسل الاحزان ونحلم ثم نكبر بالنظر... ونعيد الكون طفلا.. في انامله صور... ولا رايكم شنو؟نبقي شفع ولا نكبر بي الزهج ده؟ عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: sanaa gaffer)
|
سناء.... حقو نمشي البحر.... حقو ننزل خطوة خطوة جـــــــــــــــــــــوانا... امكن نسمع صدي...وامكن نسمع....نا.... حقو... حقو نشرب جرعه منو ....امكن الحل ابتعادنا عنو... حقو نوصل الشوق للقمر...والسحابات الليهو غنو... حقو....
انت عارفه من الزهج الواحد بقي يكتب شعر عديل كده بعدين يا سناء لافي زول عبرك في مشيتك براك البحر دي ولا يحزنون؟؟ ماف زول شالتو الهاشميه قدمك للبحر ...ورجع فاضي الكلام ولا مستجد البحر اب ريحه تدق في القلب... الخليج وما الخليج ويابحر مين نطاك غير المركب الفاتت وجات وفي ديلو سبع اللفات نحن كان لقينا الوحده يا سناء نلقي البحر وييييييييييييين؟ امكن الكباري الطايرة والبيت الابيض ديل زاتهم سبب الزهج..بين قوسين ..سياسه..كويس؟ تعالو نحوم عليش
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
اها مهداوى ده مالو ,,,,,,,,,,,,, مافى رد ولا شنو
قا
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
Quote: نحن كان لقينا الوحده يا سناء نلقي البحر وييييييييييييين؟ امكن الكباري الطايرة والبيت الابيض ديل زاتهم سبب الزهج..بين قوسين ..سياسه..كويس؟ تعالو نحوم |
تعرف يا عليش اجمل حاجة عندنا هنا الشواطئ المفتوحة ( الطبيعية ) ...
مويتها تجيك دافرة تباري بعض .. وترجع بخفر كانها بتناديك ...
ودة شئ مفتقد فيالبحيرات الصناعية الملوا بيها الدنيا ...
تخريمة زهج ساكت :
عليش انت مريخابي ؟؟..
| |
|
|
|
|
|
|
Re: نادي الزهاجه ..مني خوجلي...عضويه فخريه.... (Re: Mohamed Ahmaed Olyesh)
|
ياسناء اول حاجه انا مريخابي نزلت معاش زمــــــــــــــانك.... لانو كنت بتعصب في الكورة لما بعض لساني لكن هسه كورة امبارح كانت بين منو ومنو ماعارف
تخريمه علاقتو شنو؟ بالمناسبه:انا بحب اللون الازرق من زمان وكمان للمعلوميه انا لعبت في الهلال زمان عملو حاجه اسمها مدرسه براعم الهلال وانا كنت ضمن البراعم وكان مدربنا اسمو ميرسلاف لو انت عارفه التاريخ وفوزي المرضي ولما اتخرجنا عملو لينا لعبه بينا وبين الفريق الكبير وقتها وكان كابتن الهلال طارق احمد ادم ولما اتخرجت ابوى منعني امشي عشان هو مريخابي....هسه كمان لاقيت جمال الثعلب هنا في فرجينيا ولما قلت ليهو كده زعل شديد لانو حس بالكبر وكده..... عرفت سر اللون.... عليش
| |
|
|
|
|
|
|
|