والله الليلة حسيت احساس لزيز بشكل... عندي ضيوف على العشا.. قمت بتجهّز والغرفة مضلمة، لولو نايمه وما عايزاه تصحى، مزاجي زي آخر الشهر الليلة!
طلعت في الضلام اسكيرت عشان البسه ولا عارفه لونه شنو زاتو ولا شايفاه.. لبسته.. بعد ما طلعت اكتشفته انه ده اسكيرت انا اشتريته سنة 2007، وبعداك بقى ما بتلبس لي.. طلع قدري بالضبط، ويمكن حتى اوسع مما كان لما اشتريته... والله فرحته بشكل...
ياااي me...
نجاة، منتظرين الاخبار الحلوه
غباشي... الف مبروك الكيلو... غايته انا كان ما نقصته كيلو ياني الحأقر عليك زي النصري...
العوض، ما فهمته كيف انك تاكل 1584 ومن غير رياضة ويكون الصافي 687؟
يلا النمشي لشغلي وطبيخي...
02-10-2012, 04:13 AM
Nagat Sid Ahmed Elshiekh Nagat Sid Ahmed Elshiekh
تاريخ التسجيل: 03-04-2011
مجموع المشاركات: 3222
سلامات يا ناس الرشاقة.... أخونا النصرى كلامك بقى انجليزى مالو ؟؟؟ الجماعة المشيت ليهم ما عندهم كيبورد عربى ....ماتعمل ذى اختك بكتب بالماوس .. انجوى الفكيشن بتاعتك مع مراعاة الكالريز.
مبروك ياغباشى وصولك للهدف وعقبلنا.... العوض واصل فى السرد المفيد متابعين والله مريم الله يفرحك وعقبال تلبسى كل الملابس الضاقت منك هههههه.... القلب شكلك كدا بتشجعى فى اللعبة الحلوة من بعيد يعنى ما عندك اى زيادة فى وزنك بختك والله..... وين ناس ابتهال ،،، امير،،،محمد،،،الحكم،،،وكل من سقط اسمه سهوا...
سلام يا النصري كويس إنك مبسوط في الإجازة لكن ياخي لازم تصور إن شاء الله تستلف كاميرا. ما مشكلة مرة مرة تفك اللعب لكن ما تبقيها عادة. ماندرين دا مشيته مرة زمان في تورنتو لهسع متمني أمشيه مرة تانية. أكلهم رهيب. سلام يا مريم والله مبروك... فعلا دي حاجة بتخلي الواحد يكون سعيد جدا. بالنسبة لسؤالك أنا متأكد إنك عارفة الإجابة لكن بس حأذكرك بيها. طبعا الجسم حتى في حالة الراحة و عدم الحركة بحرق السعرات الحرارية باستمرار للقيام بوظائفه الحياتية العادية البتحتاج لطاقة زي التنفس و تجديد الخلايا و تدوير الدم داخل الجسم و الهضم و غيرها. كمية الطاقة المحترقة دي بتعتمد على عوامل كتيرة منها النوع (ذكر أو أنثى) و الوزن و نمط الحياة و العمر. في حالتي أنا متوسط احتياجي اليومي من السعرات الحرارية (دا لو أصلا ما اتريضت و بس مارست نمط حياتي العادي) هو حوالي 2275 كالوريز. يعني عشان أحافظ على وزني الحالي المفروض آكل الكمية دي. طيب لمن أكون متبع نظام غذائي معين قولي مثلا أكلت 1500 كالوريز دا معناه إنه جسمي عشان يقوم بوظائفه دي حيضطر يحرق 775 كالوريز من مخزونه. يعني حيكون صافي فقدان في اليوم داك 775 كالوريز اللهي الفرق بين احتياج جسمي من الطاقة و الطاقة الاحتواها أكلي في اليوم داك.. و دا بورينا إنه لفقدان الوزن بجدية النظام الغذائي أهم من الرياضة. دا ما تقليل من أهمية الرياضة لكن لو أنا باكل كل كمية الكالوريز البحتاجها جسمي عشان أحرق ال687 كالوريز الفوق دي كنت حأحتاج أمشي أكتر من ستة كيلو. و أحسن حاجة الواحد يعملها هي إنه يجمع بين النظام الغذائي و الرياضة.
02-08-2012, 06:29 PM
Elawad Elawad
تاريخ التسجيل: 01-20-2003
مجموع المشاركات: 7226
موضوع مفيد جدا عن سؤال مريم حول الكالوريز و كيف الجسم بحرقها و أحسن الوسائل لمساعدة الجسم على حرقها: http://www.mayoclinic.com/health/####bolism/WT00006 بالمناسبة دا موقع مايو كلينك و فيه مواضيع تانية مفيدة جدا عن موضوع إنقاص الوزن دا و مواضيع أخرى.
02-08-2012, 08:24 PM
Elawad Elawad
تاريخ التسجيل: 01-20-2003
مجموع المشاركات: 7226
شفت يا النصري زي ما قلت ليك فوق حأستلم البوست؟ عايزين يا جماعة الناس يساعدونا بأفكار وجبات تكون شهية و بتملا الواحد تخليه يشعر نفسه شبعان و في نفس الوقت تكون سعراتها الحرارية قليلة. أنا حأبدا ليكم بحاجة كل الناس عارفنها اللهي السلطة الخضرا. الكباية و نص من السلطة الخضرا فيها حوالي أربعة و أربعين كالوري و هي طبعا ما وجبة لكن لما تاكلها مع أي وجبة بتملا ليها حتة في المعدة ممكن تتملي بمتين تلتمية كالوري. بعدين الواحد ممكن يتجنب الإضافات البضيفوها للسلطة لأنه في واحدات من الدرسينقز دي الملعقة بتاعتها فيها سبعين و تمنين كالوري. نص ليمونة و شوية شطة و ملح بخلوها حاجة عجيبة. برضه سلطة الروب بديل ممتاز و صحي و شهي و بتملا الواحد بالذات لو أضفتوا ليها جزر مبشور. يعني الواحد لو عمل زي نص كباية جزر و نص كباية خيار مبشورات و تلاتة أرباع كباية زبادي و شوية ملح و اختياري توم و شطة الحكاية دي كلها فيها أقل شوية من مية و خمسين كالوري (باعتبار الزبادي 2%). مع دي كمية بسيطة من الأكل ممكن تكفي الواحد لوجبة كاملة.
02-09-2012, 03:11 AM
القلب النابض القلب النابض
تاريخ التسجيل: 06-22-2002
مجموع المشاركات: 8418
الليله عملته القياسات .. طبعا قلنا انه من وسائل متابعة الوزن انه الزول كل شهر يعمل قياسات لمناطق الجسم باستخدام متر.. لقيت نفسي ناقصة خمسة سانتي yaaay me..
يا قلب.. والله اتبسط من نفسي بشكل... القائمة بتاعت الاكل كانت كالآتي سلمون بالفرن كوكوس من غير اي شي عاملاه بي موية وملح بس فول مظبط سلطة اسود (اسود مقطع دواير وعليه زبادي وليمون وملح وتوم) دجاج بروستد (نجضته في البداية بي البخار، بعداك حمرته بي دقيق ونشا عشان ما يشرب زيت) بطاطس محمره (غطيتها بي حبة دقيق وبابريكا برضه عشان ما تشرب زيت) صوص التوم (بياض بيضه وليمون وتوم وملح وفلفل وخل وزيت) شطة خضراء بي ليمون وحبببة دكوة الحلو: أم علي وكيكة روعة بتاعت تمر جابتها لينا صاحبتنا
اها، انا صحني كان فيه من ده كله ما عدا الدجاج، لكن بكميات قليله... وما اكلت خبز خااالص والكوكوس كان تقريبا تلاته ملاعق.. وما اكلته حلو، رغم انه كان لزييييييييز... الليله الصباح عملته شاي الصباح ومعاه نص شريحة من كيكة التمر...
الوزن يوم السبت
02-09-2012, 06:04 PM
Elawad Elawad
تاريخ التسجيل: 01-20-2003
مجموع المشاركات: 7226
الأخت القلب النابض شكرا على التشجيع و في انتظار انتقالك إلى مقاعد اللاعبين. الأخت مريم مبروك النقصان و في انتظار نتائج يوم السبت المبشرة إن شاء الله. وين الحكم يا جماعة؟
02-09-2012, 06:17 PM
Elawad Elawad
تاريخ التسجيل: 01-20-2003
مجموع المشاركات: 7226
تقرير يوم الأمس الأربعاء 8/2: عدد الكالوريز الاتناولتها 1550 كالوري. رياضة حوالي ساعة حرقت 700 كالوري. الصافي فقدان 1325 كالوري. المرة الجاية حأوزن يوم 1/3 إن شاء الله.
02-09-2012, 06:52 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
العوض، شكرا لأنك شرحته لي موضوع الارقام .. انا فعلا شكيت انه انت بتحسب النشاط اليومي كجزء من الكالوري consumption بتاعك... انا الليلة لاحظته حاجه لزيزه... لولو بتّي الصغيرة (ستة شهور) بتوفر لي عدد من التمارين الحلوه اثناء اليوم.. مثلا لما اكون عايزه اغيّر ليها البامبرز، بكون شايلاها في يدّي.. والبامبرز بتاعها مختوت في رف تحت من الدولاب، بقوم بنزل وانا شايلاها ظهري بكون مستقيم وبشيل البامبرز وبقيف تاني... بنزل لحدي ما اكون تقريبا قاعده.. الحركة دي انا بعملها اكتر من مره خلال اليوم.. وهي بسموها squat.. حلوه وبتقوي عضلات الكرعين، وانا بقيت بعملها بسهوله وبدون ما اتعب...
الحركة التانية اني بشيل فوق وارفعها وانا بضحّك فيها... بي يديني الاتنين وبرفعها فوق راسي وبنزلها.. وبكون حريصة انه عضلات يدي تشتغل بتركيز في الحركة، هي بتكون بتضحك وانا بكون بضحك معاها.. وفي نفس الوقت بكون بمرّن في عضلات يدي(لقيت نفسي نقصته 3.5 سم في الحته دي)..طبعا رفعت لولو فوق بتحتاج للعضلة، التنزل ممكن الزول يعتمد على الجاذبية، لكن انا بنزلها بالاعتماد على عضلات يدّي..
02-09-2012, 08:44 PM
القلب النابض القلب النابض
تاريخ التسجيل: 06-22-2002
مجموع المشاركات: 8418
Quote: دجاج بروستد (نجضته في البداية بي البخار، بعداك حمرته بي دقيق ونشا عشان ما يشرب زيت) بطاطس محمره (غطيتها بي حبة دقيق وبابريكا برضه عشان ما تشرب زيت)
البروستد جكن شكلو مغري.. يمي
اها نجي للسر شفتي البطاطس عشان ما يكون عندك مشكلة زيت قطعي البطاطسة المتوسطة على اثنين( الكبيرة شديد ممكن تكون على اربعة) اديها غلية على النار لمدة عشرة دقايق ( ما بيكون نضج) بعد تطلعي رشيه بي محلح وفلفل ( بابريكة لو بيتحبيها ) وترشيها بي زيت زيتون وعلى الفرن لمدة ٢٠-٣٠ دقيقية بيطلع رهيب شديد وماف زين ولا تحمير.. دي الجماعة ديل بياكلوها مع اللحم المعمول بالفرن ... ومعاها خضار معمول بالبخار خاصة البروكلي و الفلورز والفاصوليا خضراء جربي الحكاية دي وهي وجبة كاملة.. جربي واديني خبر
بالهناء
أموووت في ام على
ومبروك النقصان وصفقة شديدة...يا مريم ...
متابعة لصيقة للعوض والله بقيت لما اجي اطبخ حاجة طوالي بلقا روحي بفكر دي يكون فيها كم كالوري...دا معناها كلامك دا بيؤثر في الناس البيقروا حتى ولو ما في حالة رجيم
02-11-2012, 06:20 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
يا جماعة انا عجبتني فكرة العوض دي بتاعت الوزن مرّه في الشهر.. حأحاول اطبّقها... وبدل ما اوزن الليلة حأوزن بعد شهر (وش عاااااااارف روحي ما حيقدر!)... لكن حأجرب.... انا حاسه اني نقصصصصصته.. وشكلي كده وصلت للهدف، بس حركت انه الزول يحوّش الأرقام ويجي يتفاجأ برقم كبير عجبتني...
قرار إدارة رقم 1... ابتداءاً من الأسبوع ده، حأبدأ يوجا... عضلاتي اتحسّنت شوية... بالمناسبة، د.الطيب النعيم (استشاري عظام) قال لي المشاكل في عضلاتي دي من نقص فيتامين دال... لاني ما قاعده اطلع كتير في الشمس واصلا الفترة الفاتت ما كان في شمس كويسه.. والغريبة قال لي ما اوقّف رياضة... وقال لي استمر فيها لانها بتساعد.. ناوية ابدأ يوم التلاتاء ان شاء الله...
go losers !
02-11-2012, 10:27 PM
Elawad Elawad
تاريخ التسجيل: 01-20-2003
مجموع المشاركات: 7226
سلامات يا جماعة معليش أمبارح انشغلت... قدرت خشيت قريت التعليقات لكن ما قدرت أرد (شايف يا النصري استلام البوست كيف؟). دي أحسن حاجة يا مريم تعمليها في ظروفك دي إنك تستفيدي من الحاجات الأصلا بتعمليها و تحوليها لجزء من روتين الرياضة اليومي بتاعك. ربنا يعينك مع القراية و الأولاد دا مجهود ما ساهل دعواتنا ليك بالتوفيق. فكرة توزني كل شهر دي اتخيل لي ظريفة و بتخلي الواحد يشعر بالإنجاز أكتر. أحسن حاجة تشيلي الميزان تختيه في راس دولاب ولا حاجة لأنه الواحد مرات بتجيه رغبة شديدة يعرف الحاصل شنو. كويس إنك حتواصلي الرياضة تاني. سبحان الله زي ما بقولوا الدنيا ضيقة. د. الطيب النعيم دا كان جارنا زمان في كوبر و زوجته صاحبة الوالدة شديد. سلمي عليه و قولي لي ولد المرحوم د. علي الشيخ العوض بسلم عليك. سلام للقلب النابض فعلا بتبدا الحكاية تبقى للزول عادة و اتخيلي عادة كويسة إنه الواحد يتابع أكله فيه شنو. شكرا للتشجيع المستمر.
02-12-2012, 02:47 AM
Elawad Elawad
تاريخ التسجيل: 01-20-2003
مجموع المشاركات: 7226
تقرير أمس و أول أمس: يوم الخميس 9/2: عدد الكالوريز الاتناولتها 1362 كالوري. رياضة حوالي خمسة و خمسين دقيقةحرقت 610 كالوري. الصافي فقدان 1431 كالوري. يوم الجمعة 10/2: عدد الكالوريز الاتناولتها 1484 كالوري. رياضة حوالي خمسة و أربعين دقيقة حرقت 510 كالوري. الصافي فقدان 1225 كالوري.
02-14-2012, 10:37 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
سلام يا مريم و الجميع نبدأ بالترحم على أخينا مجدي اللهم اغفر له و ارحمه و عافه و اعف عنه و وسع مدخله و أكرم نزله و لقنه حجته. وفاته المفاجئة أثرت في كثيرا و زاد أثرها بما كتبه من يعرفونه عنه. ربنا يرحمه إن شاء الله.
02-14-2012, 06:00 PM
Elawad Elawad
تاريخ التسجيل: 01-20-2003
مجموع المشاركات: 7226
بالنسبة للناس فعلا غاتسين غتسة عجيبة. النصري مشى لبد في أونتاريو و عملها لينا مطاعم و في المطاعم أوبن بوفيه و في الأوبن بوفيه ماندرين. ماندرين دا اتخيلي مشية واحدة الواحد براحة ممكن يطلع بألفين تلاتة ألف كالوري. أما الحكم فمختفية اختفاءة كدا غريبة. غايته مع الإجازة الخمسة شهور دي و الاختفاءة يبدو أن الدنيا موعودة بسمارتي أو سمارتاية جديدة والله أعلم. نسأل الله أن يكون غيابها عافية و أن يوفقها و ييسر عليها أمورها أيا كان سبب الغياب. غباشي أصله يختفي و يجينا بالكيلوهات بتاعته تنطط. في انتظار تقرير نجاة و بشرياتها إن شاء الله. أها و إنت عملت شنو مع الرياضة يا مريم؟
02-14-2012, 06:25 PM
Elawad Elawad
تاريخ التسجيل: 01-20-2003
مجموع المشاركات: 7226
نجي للتقرير بتاعي عن الأيام الفاتت. الحمد لله عموما الأمور ماشة كويس و إن كان بديت أشعر بالزهج من الرياضة النوع الواحد المكررة دي. شاعر إني محتاج لبديل لكن بإذن الله حأواصل لغاية ما أفكر في حاجة. المشكلة في الشتا دا عندنا مافي طريقة جري أو مشي برة البيت (و إن كان في ناس بعملوها لكن أنا غايته ما أظني أقدر جري في درجة حرارة تحت الصفر). مفكر في السباحة لكن حكاية الزمن حتكون مشكلة. التقرير: يوم السبت 11/2: عدد الكالوريز الاتناولتها 1352 كالوري. رياضة حوالي 60 دقيقةحرقت 720 كالوري. الصافي فقدان 1583 كالوري. يوم الأحد 12/2: عدد الكالوريز الاتناولتها 1205 كالوري. رياضة حوالي 55 دقيقة حرقت 640 كالوري. الصافي فقدان 1618 كالوري. يوم الاتنين 13/2: عدد الكالوريز الاتناولتها 1355 كالوري. رياضة حوالي 65 دقيقة حرقت 750 كالوري. الصافي فقدان 1543 كالوري.
Quote: في انتظار تقرير نجاة و بشرياتها إن شاء الله.
شكرا العوض للاهتمام قبل ما نجى لموضوع التقرير بتاعى عندى حاجة حارقانى شديييييد....... الحاجة دى صورة النصرى التى بدون اى تعليق !!!!!!!!! يعنى يا النصرى عملته ذى الزول البحجز فى الصف بطوبة... عاوز تاكلنا حنك ههههه...... وين الاجازة وتفاصيلك...بتاكل شنو؟؟؟؟ دا كلو داسيهو عشان عارف المخرمجة حاصلة....... لو ما عندك وكت تكتب لينا نواصل تحت الصورة نظام تصبيرة وكدا... آها يا العوض موضوع السبت ما جاب حقو المتوقع... 02رطل بس ما تفرحوا وتنسوا البوينت.... موعدنا السبت القادمة أن شاء الله... تحاتنا للجميع...
02-15-2012, 05:32 PM
Elawad Elawad
تاريخ التسجيل: 01-20-2003
مجموع المشاركات: 7226
سلام يا نجاة كويس برضه في نقص. ما تحبطي أصلا لأنه الجسم عنده طرق غريبة جدا في التعامل مع محاولات إنقاص الوزن. يعني لدرجة إنه الواحد مرات ممكن يضطر يخدع جسمه عشان ما يكون فاهم الحاصل شنو بأكل وجبة كبيرة أثناء أيام الدايت. واصلي عادي و إن شاء الله المرة الجاية حتلقي وزنك نزل حق المرتين. زي ما قلتي النصري داير يدقسنا بالصور لكن قولي ليه حركاتك دي أعملها لزول ما عنده حديدة.
يا نجاة الاجازة لسه مستمرة.. مفروض كان ارجع قبل يومين لكن اتاخرت شوية الظريف امبارح كنت بفتش لفندق انزل فيهو لمدة يوم مشيت موقع booking.com لقيت لوكاندة ٢ نجمة فى اهم شوارع مدينة شلالات نياجارا السياحية .. ما تتصدقى اللوكاندة دى بكم!!!
١٤ دولار بس ... غرفة كبيرة ..وسريرين دبل ..تلاجة ..وتلفزيون وريموت وفطور الصباح ...... ١٤ دولار بس ..... ابو الرخا .....
ان شاء ارجع اليوم لكالقرى ---------------
دى صورة تانية تصبيرة
------------
مبروك الصفحة السابعة اقترح نسميها صفحة القلب النابض
02-15-2012, 05:44 PM
Elawad Elawad
تاريخ التسجيل: 01-20-2003
مجموع المشاركات: 7226
كنت 224 رطل ولما لاقيتك فى نياجرا والماندرين بوفيه وما ادراك فى خلال تلاتة يوم بقى 227 رطل هسة رجعنا روشستر وبدينا معاكم ريجيم قاسى نووووو كارب نووووو شوقر مفروض انزل 200 رطل ما ارح ماتيللا ماتركبو
بس كلللللل شى ولا تختّونى مع النصرى ده فى مجموعه واحدة
02-15-2012, 05:52 PM
Elawad Elawad
تاريخ التسجيل: 01-20-2003
مجموع المشاركات: 7226
تقرير أمس الثلاثاء 14/2: عدد الكالوريز الاتناولتها 1686 كالوري. رياضة حوالي 55 دقيقة حرقت 650 كالوري. الصافي فقدان 1147 كالوري. طبعا أمبارح الكالوريز الأكلتها عالية شوية لأني لاحظت الأيام الفاتت كانت أقل من 1500 بكتير و خفت الحكاية دي يكون عندها رد فعل سلبي على نقصان الوزن و بيني و بينكم وصلت البيت جيعان و كنت داير لي سبب أبهل الموضوع شوية و لقيت لي سبب.
02-15-2012, 07:14 PM
Ali Sirelkhatim Ali Sirelkhatim
تاريخ التسجيل: 06-17-2008
مجموع المشاركات: 4000
اول حاجه القلب النابض مرحب بيك معانا ولى قديم ومعليش ماانتبهت لسلامك على يادوبى رجعتا ورا وانتبهت لقصه اوعك تنغازى ليها بضحك لمن دموعى جرت غايتو النسوان السودانيات ديل عندهم درامات فى بيوت المناسبات
Quote: فحسي أوعكم تنغازو لي غباشي دا
والله انا منغازه منو عشان هو كاواى لكن والله بتمنى ليهو الفوز فى المسابقه حقت مدينتهم ...لكن هنا عندنا عاوزاها للنصرى لانو هو زى مابقول دايما biggest looser لانو السبب فى الفقدناهو كلنا مرييييييييييييييييييييومه
Quote: بمناسبة موضوع الtime management... انا حاسه بيك والله.. لانه انا لما اكون شغاله اموري بتكون مرتبه جداً، لما اكون عاطله (زي حاليا)، بتعب (في البداية).. لكن بعداك بخلق system.. وببقى تمام... صديقي الصدوق (الtimer) بتاعي... الاختراع الصغير ده مفيد جداً... وبستخدمه مع محمود كمان... بظبطه على انه يرن بعد ساعة.. خلال الساعة دي بكون عندي target معين اعمله... يعني لو ما عملته ما بعمل اي شي تاني..
والله يامريم اتاريك خبره وانا ماجايبه خبر ...كل ما احدد اهدفى واظبط الساعه ..القى ليك الزمن ماشى وعندى حاجات كتيره ماعملتها اقوم ليك جاريه بسرعه واولادى طعا فى ضنبى وجاريين بوراى ..فى شنو ياماما اقول ليهم بوريكم بعد شويه ...يسالوا ابوهم يقول لي انتى مالك بتتجارى اليوم كلو صحى لمن حكيت ليهو القصه قال لى ان شاء الله دايما بس ماتقعى تتكسرى ههههههه وانا لسه راجيه صور السلمون
النصرى تسلم على المعلومات القيمه والله انا صحى طاشه شبكه ...بالنسبه لموضوع الكسره والله صدقت بس انا بعمل الزغنى براى فى البيت وبحالول اخفف الزيت بقدر الامكان ...استمتع بى اجازتك الايام الحلوه مابتتعوض والرجيم ملحوق غباشى الى الامام وياجبل مايهزك ريح انت اللوووزر الفى مدينتكم ربنا يوفقك والبت الاولى بتاعتكم لما تلاقيها قول ليها شكلك شاحب ووشك فقد نضارته مع الدايت (بضمن ليك انت الاول) العوض مرحب بيك والله ...ربنا يوفقك دى قصه صعبه شديد .....كمان (ربنا يرحم د مجدى رحمه واسعه ويتقبلوا قبول حسن ...فقد عظيم والله) سمارت وين انتى شكلك مستمتعه بالاجازه يانجاه اوعك من الاحباط انتى ماشه كويس والله وربنا يوفقك محمد الحاج سلامات بالنسبه لموضوع الوزن ثانى كل اسبوع واخر وزن كان ناقص 6 كيلو يعنى نزلت نص كيلو فى 20يوم وانا مبسوطه بيها لانو الرياضه بقت يومين بس فى الاسبوع بس مركزه على تنظيم الاكل ...بعدين بديت لى برنامج بتاع صيام الاثنين والخميس منها اجر ومنها عافيه
02-15-2012, 09:41 PM
Elawad Elawad
تاريخ التسجيل: 01-20-2003
مجموع المشاركات: 7226
سلامات يا ابتهال طبعا أنا محتل البوست في غياب النصري و تقريبا إجراءات تسجيله باسمي اكتملت عشان كدا متولي موضوع الترحيب. مبروك النقصان و بالمناسبة النقصان المتدرج أحسن من السريع لكن أنا من النوع البحب يشوف نتايج ملموسة عشان كدا فضلت إني أحاول أنقص لي نقصان ظاهر في البداية و بعداك أواصل. والله فكرة الصيام دي ممتازة بالله ما تنسينا من دعواتك في وقت الفطور. عندي فكرة يا جماعة كل واحد فينا بعد ما يصل لهدف معين نجمع الوزن النقصناه كلنا و نتفق على مبلغ معين لكل كيلو و نجمع المبلغ دا نعمل بيه مشروع خيري في السودان. إن شاء الله حتى لو حاجة بسيطة زي مبرد موية في مدرسة أو حقن إنسولين للأطفال أو حاجات محتاجينها أطفال المايقوما و ممكن نوكل ناس من أهل الخير في البورد زي إنعام حيمورة ولا نعيم أو شيخ العوض هم اليتولوا الموضوع دا و أنا متأكد من تعاونهم.
02-15-2012, 10:18 PM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
سبحان الذى لاينسانا ولاينساكم سبحان الله لوقلت ليك انا موت مجدى دا هذانى قدر شنو ماحتصدق ولما بقرا فى تبرعاتو لى ناس الخلاوى ...فكرت قدر شنو الدنيا ما بتستاهل كلامك دا انا معاك شديد وموافقه وربنا يقدرنا لكن حتتعب انت وغباشى هههههه على العموم المشاريع كتيره وربنا يقدرنا والشعب السودانى كلو ظروفوا بقت صعبه ومحتاج يد المساعده
02-15-2012, 10:40 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
لقيت روحي وصلت الهدف ونقصت بعده 0.7 غرام ... النتيجة هي كيلو 300 جرام خلال عشرة أيام... وحددت الهدف الجديد خلاص... وهو خمسة كيلو خلال شهرين ان شاء الله....
الليلة حاسه بي دوخه شديد... قررت اليوم ده اكل عادي، قلت يمكن من الاكل، لكن اكلت وما حصل شي... لاني اصلا ما حارمه نفسي للدرجة دي... غايته لحدي بعد بكره كان ما استعدلته بمشي الدكتور
النصري، ايامك والله
نجاة، واصلي عليك الله...
غباشي، والله مكسله افتش موقع الكيلوز البتتراقص، خت لي 1.3 بالله
Quote: عندي فكرة يا جماعة كل واحد فينا بعد ما يصل لهدف معين نجمع الوزن النقصناه كلنا و نتفق على مبلغ معين لكل كيلو و نجمع المبلغ دا نعمل بيه مشروع خيري في السودان. إن شاء الله حتى لو حاجة بسيطة زي مبرد موية في مدرسة أو حقن إنسولين للأطفال أو حاجات محتاجينها أطفال المايقوما و ممكن نوكل ناس من أهل الخير في البورد زي إنعام حيمورة ولا نعيم أو شيخ العوض هم اليتولوا الموضوع دا و أنا متأكد من تعاونهم.
العوض، الله يبارك فيك على الفكرة الجميلة دي... انا معاكم قلباً وقالباً... بس دايرين آلية للتنفيذ...
تحياتي للجميع
02-15-2012, 11:05 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
اذيكم يا لوزرس. و الله كتبت رد طويل عريض ليكم كلكم، لكن البتاع ده كراش و طار الكلام مشغولة شغلة شديده، لكن لسه خاته بالي معاكم و بقرا اى شيء بس ما بلقي وقت اكتب.
العوض، الفكرة عظيمة. و أكيد موافقين. القلب النابض و علي، الف مرحب بيكم. يا جماعة في ناس انضموا مؤخراً و ما معقول نحاسبهم مع ناس غباشي و مريم اللي بينقصوا بالهبل ديل. ( ما شاء الله) عشان كده ح اعمل مقياس جديد للفوز. كل زول فيكم يحسب هو معنا ليه كم اسبوع. و ح نقسم العدد الكلي الارطال المفقودة و نقسمه علي عدد الأسابيع و ده ح يكون متوسط نزول كل واحد فيكم. الفائز هو المتسابق بأكبر متوسط. رأيكم شنو؟؟؟؟
02-16-2012, 03:37 AM
غباشي غباشي
تاريخ التسجيل: 01-19-2007
مجموع المشاركات: 1729
السلام عليكم يا شباب أنا مشغول .... مشغول .... مشغول .... مشغول , الحكاية بيجاي بقت صعبة و المشرف بتاعي كره البلد دي و احتمال في أي لحظة يتخارج عشان كدة انا عايز اقطع شوكط كبير قبل ما يقوم يسافر و يحيرني النصري و الله ما شاء الله مع التجدع و انجوووووي للاخر , و التحية لباقي الشباب السبت الفات كان عندنا تمرين خاص في مركز AM I FIT و الله درشونا لما عرفنا حاجة , المشكلة انا كنت الولد الوحيد و معاي تلاتة نساوين من ضمنهم منافستي ساعة من الدرش و الجري و النطيط و ده كلوا و انا لابس تلات سترات وزن كل واحدة 10 كيلوو غايتو عرق السنين انسكب الاسبوع الفات و تاني عندنا تمرين يوم السبت الجاي ده يللا حان الان موعد الاخبار فقدت 1.3 كيلو و ده في اطار اني قررت اواصل في موضوع التحدي بتاع حلتنا مبروك يا مريم و من محاسن الصدف نحنا الاتنين فاقدين نفس المقدار فـ let's cheer up together
العوض كلامك بتاع غشة الجسم بوجبة كبيرة صاح مية المية و انا دايما بلجأ للحيلة دي لما الميتابليزم بتاعي يتغاتت , بمشي بديها ميلك شيك أو بسكويت و بواصل عادي, فيا نجاة واصلي شكراً يا ابتهال على التشجيع و مرحب بعلي سر الختم و سلام لحكمنا الهمام بالمناسبة الصفحة السادسة ما كانت بتفتح معاي و كانت دايماً بتعلق لي اللابتوب يلا يا جماعة ... القراية ام دق
02-16-2012, 07:00 PM
Elawad Elawad
تاريخ التسجيل: 01-20-2003
مجموع المشاركات: 7226
سلام يا جماعة... عارف يا مريم الواحد مرات بتجيه رغبة شديدة يعرف الحاصل شنو. ما شاء الله إنجاز ممتاز.. مبروك. مرحب مرحب بحكمنا الهمام و منورة البوست. بالنسبة لفكرتك أنا معاك فيها بس مع تعديل بسيط و هو إنه نحسب بالنسبة من الوزن. يعني ما عدل إنه الناس الفاميلي سايز زيي و زي النصري الواحد ينقص ليه س باوند و نحسبها زي ال س باوند بتاعة ناس وزن الريشة زي غباشي و مريم كدا هم حيتظلموا. مبروك يا غباشي الألف و تلتمية جرام و عقبال ما نحتفل معاك بالفوز في المسابقة. وصية ابتهال دي ما تهملها أمشي للمتنافسة دي و قول ليها مالك إن شاء الله ما عيانة و شكلك بقى ما زي الأول و الظاهر الدايت دا أثر عليك بتفوز عليها إن شاء الله. كويس إنه فكرة المشروع نالت إعجاب و نبدا نفكر فيها كلنا إن شاء الله.
02-16-2012, 07:22 PM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
وصلت امبارح حوالى الساعة 7 مساء.. الرحلة كانت ناجحة جدا جدا...جيت راجع بمعنويات عالية وشهية للشغل... نزلت الشغل وقربت اقلد (hug) زبائنى الزمان ...اشيل واضحك فى وجوههم ... من ناحية الريجيم...... على الاقل زدت 5 رطل لكن برضائئ التام... مافى اجازة دون استمتاع بالاكل .... اخر وجبة كانت امس فى ضواحى تورنتو ..صحن ضخم بتاع كباب بالارز..... بعدها مباشرة بدا الريجيم القاسى جدا .... حتى فى الطيارة رفضت ان اكل او اشرب اى شئ ما عدا الموية ...... عندى تصميم خرافى فى نقصان ال5 رطل ديل وبسرعة .....
ساعتبر يوم امس الاربعاء 15 فبراير البداية الحقيقية للمرحلة الحالية ساوزن نفسى بكرة الصباح واكتب الوزن الجديد هنا .....
الصديق يوسف امين فى سانت كاثرينز وعدنى بوصفة بتاعت خضروات قال انها ستنقص الوزن 10 ارطال فى 10 ايام .... الوصفة عبارة عن شوربة خضارات يشربها الزول طول اليوم ... ساجرب هذه الوصفة فورا وسانقص العشرة ارطال فى عشرة ايام هذا وعد وتحدى والتزام بينى و بينكم ....
_________ سانزل صور الرحلة شوية شوية نبدا من الاخر ..صورة الفندق اب 14 دولار فى اليوم
المطعم ده مسئول مسئولية مباشرة عن زيادة 4 ارطال من مجموع الخمسة ارطال المكتسبة فى الرحلة
مشيت ليهو 4 اربع مرات,, مرتين بصحبة على سرالختم,, دى صورتنا طالعين من المطعم وما قادرين نتفس من الاكل.. عندهم صحن صغير للتحلية..انا ما استخدمته...استعملت الصحن الكبير بتاع الاكل عشان اردم التحلية خاصة الرز باللبن ......
بعد الاكل,, على وزن نفسه لقاها كتيرة جدا .. قلت ليهو ووووب عليك ..بقيت معاى فى مجموعة واحدة,, ويحك !!
حكيت ليهو قصتنا ونحن شباب فى الثانوى ... وليد نانا عمل تقسيم لشباب الحى من حيث الوسامة المجوعة الاولى فلان وفلان وفلان المجموعة الثانية فلان وعلان لمن جاء للمجموعة الخامسة ختا فيها ابوداوؤد و عبود... ابوداؤود زعل زعل شديد جدا وقال لوليد ختنى فى اى مجموعة بس ما مع عبود ده.... حسى على سرالختم معاى فى مجموعة واحد وفرقنا بضع ارطال ....
02-16-2012, 11:07 PM
Ali Sirelkhatim Ali Sirelkhatim
تاريخ التسجيل: 06-17-2008
مجموع المشاركات: 4000
سلام يا لوزرس... حمد لله على رجوعك بالسلامة النصرى ..... والبركة فى استمتاعك بالاجازة والجاتك فى 5 رطل سامحتك... لكن الهوتيل أبو 14 دولار دا يحير.... أالف مبروك الاعزاء مريم وغباشى كيب ذا قوود ورك.... الاخ العوض والله كلامك مفيد بس انت قاعد تخسر كم فى الاسبوع مع الرياضة دى؟؟؟ انا بمشى اربعة مرات فى الاسبوع وكل مرة بحرق 450 كالريز فى اليوم ومتابعة نظام محدد برضو بنقص 2 رطل فى الاسبوع ومرات يعنى ما كل اسبوع .... الحكم لسه فى الاجازة تحياتنا .... الاخت ابتهال اخبارك والله مافى اى دبرسة مرات بتكون فى زيادات فى الوزن كمان... مرحب بالاخ على سر الختم .. وبرضو تحياتنا للمسجلين غياب طويل ولكل من سقط اسمو سهوا...
02-17-2012, 02:29 AM
Elawad Elawad
تاريخ التسجيل: 01-20-2003
مجموع المشاركات: 7226
أها يا ابتهال أهو النصري جا شكله عايز يستلم بوستي. في انتظار باقي الصور يا النصري. لو الحكاية بقت خمسة أرطال بس ما مشكلة مقدور عليها إن شاء الله المهم تكون استمتعت بالإجازة. بعدين ما تدقس الناس تقول ليهم أبيت آكل في الطيارة يا جماعة ناس إيركندا ديل ناس تعبانين الوجبات في السفريات الداخلية عندهم بالقروش (أحيانا بتكون أكتر من تلاتة ساعات و مرات فيها كونيكشن يعني ممكن تكون عشرة ساعات) و الوجبات البقروش دي سندوتشات و مرات تطلب ما تلقاها. غاية وصفة شوربة الخضار دي ما بناباها لكن حكاية تنقصك عشرة أرطال في عشرة يوم دي أشك فيها. عشان تنقص رطل يوميا معناها لازم تحرق تلاتة آلاف و خمسمية كالوري في اليوم من مخزونك.
02-17-2012, 02:49 AM
Elawad Elawad
تاريخ التسجيل: 01-20-2003
مجموع المشاركات: 7226
سلام يا نجاة أنا طبعا بديت لي يادوب لي زي ستة اسابيع بس و مصر ما أوزن إلا بداية كل شهر. في شهر يناير (سبعة و عشرين يوم منه خاشين في البرنامج) نقصت حوالي حداشر رطل و مأمل بنهاية شر اتنين إن شاء الله أكون نقصت لي عشرة أرطال تانية. ممتاز جدا كونك تنقصي رطلين في الأسبوع و زي ما قلتي مرات الحكاية ما بتضرب لكن رطلين في الأسبوع متوسط ممتاز.
02-17-2012, 02:53 AM
Elawad Elawad
تاريخ التسجيل: 01-20-2003
مجموع المشاركات: 7226
انجاز حقيقى ..رجعت للرياضة بعد غياب طويل.. البداية كانت صعبة شوية وشعرت بجسمى ما قادر يشيلنى... غايتو فى النهاية خلصت النصف ساعة وحرقت فيهم اكتر من 400 كالاريز والمسافة الكلية كانت اكثر من 2 ميل بقليل....
الانجاز التانى ..لاول مرة فى حياتى اشرب شاى من غير سكر او sweetner كنت خايف شديد من التجربة .. لكن الحمدلله شربت الترمسة كلها وباستمتاع شديد.. للاسف الشديد وزنت نفسى فى الشغل ..لقيت نفسى 261.5 رطل بزيادة 3 ارطال و نصف من اخر مرة وزنت نفسى فى نفس المكان ....
الصورة دى هدية لاسمارت .. فى العمارة دى كان مسقط راسى كندا
وده جامع سانت كاثرينز وهو المسجد الوحيد فى المدينة التى يبلغ سكانها 130 الف نسمة منهم حوالى 500 سودانى ....
يا النصري الهوتيل دا مغري للسياحة والبقاء على الاقل اسبوع ,,, وخيص وكمان جميل ابتهال .. دعواتك .. شكلك ماشة كويس صفقة شديدو لت الحسين وغباشي على الانجاز الاخير العوض ماشاء الله عليك مرتب وصبور ,, اكيد نتوقع انجاز عند القياس شكرا يا النصري لاهداء الصفحة دي لي ( بصفتي المشجعين) هلا هلا اسمارت ومحمد الحاج ... ماشاء الله نجاة كيب قونق مرحب المتسابق الجديد على تاج السر هيا الى العمل
تحياتي ليكم كلكم ..
02-17-2012, 04:30 PM
Elawad Elawad
تاريخ التسجيل: 01-20-2003
مجموع المشاركات: 7226
سلام يا النصري... مبروك الرجوع للرياضة و إن شاء الله الزيادة دي في أسبع أسبوعين تتخلص منها. بالله كتر من الصور و خلينا نعيش معاك أجواء الإجازة و الذكريات. والله أنا محاول أضغط و كل مرة بطمن نفسي إنها كلها فترة مؤقتة لازم أستفيد منها و بذكر نفسي إني لو اتشجعت و بديت من أول أيام البوست كان هسع وصلت للوزن المناسب. شكرا يا القب النابض على التشجيع و بالجد البوست دا مساعد الواحد على الاستمرار. بالمناسبة الموقع الأنا بستعمله دا بنصح أي زول ممكن يوفر ليه عشرة دقايق في اليوم يسجل فيه لأنه ممكن يخليك تتابع أكلك بدقة: http://caloriecount.about.com
02-17-2012, 04:39 PM
Elawad Elawad
تاريخ التسجيل: 01-20-2003
مجموع المشاركات: 7226
تقرير أمس الخميس 16/2: عدد الكالوريز الاتناولتها 1479 كالوري. الصافي فقدان 792 كالوري. مافي رياضة... والله ما عندي أي عذر بس كسل ساكت لكن ما في مشكلة إتخيل لو مرة مرة الواحد أخد راحة.
ده شنو يا ياسر ده؟ بقيت زى الزول الشكروه ...رقد...
يا زول مافى عذر... حتى لو يوم واحد... لانه العذر ممكن يتطور ليومين تلاتة ..اسبوع ..شهر.. انا مثلا.. اتعذرت بيومين بسبب البرد الشديد.... لقيت الحكاية لزيزة... اتعزرت تانى بالاجازة... وشوية شوية ..الشغلانة جرت لغاية ما تعدت الشهر..... اليوم الفطيتو امبارح لازم تعوضو اليوم (كنوع من العقاب) حتى لا تسول لك نفسك تكرار التجربة....
__________ امبارح بعد الرجوع للرياضة بعد غيبة طويلة ..جيت البيت وقعدت فى الكمبيوتر.. لمن جيت اقوم من الكرسى..لقيت روحى مجبص عديل.. والله العظيم صليت فى الكرسى... دى حالة دى..
----------------------
دى صور الحى الكنت نازل فيهو فى مدينة ساكن كاثرينز.. المنزل يبعد عن بحيرة اونتاريو حوالى 200 متر.... لكن للاسف اليوم داك كان فى عاصفة ثلجية (الوحيدة فى فترة اقامتى هناك لم تستمر العاصفة سوى ساعات قليلة)
دى صورة للطريق بين سانت كاثرينز ومدينة شلالات نياجارا (حوالى 15 دقيقة بالعربية) بين شلالات نياجارا الكندية وشلالات نياجارا الاميريكية كبرى قصير يعبر نهر نياجارا..
صباح الخير لوزرس.... اليوم الجمعة عندنا يوم عمل ناقص يعنى طلعنا بدرى من الشغل.. مشيت الجم حرقته 450 كالريز .... عندى مشكلة الضواقة مع العيال يعنى حتة بيتزا.... خمشة بابكورن..قطعتين جبس...وهكذا دواليك..عاوزه حد يدينى خبطة فى يدى البشيل بيها الخمشات دى ..... والله المشكلة دى قلتها للناس المتابعين معاى ونصحونى تو استوب ...
02-17-2012, 09:16 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
الليلة قررت انفض الغبار واقوم على اليوجا... حسيت اني محتاجه أستعيد ليافتي خاصة اني طولته منها شديد.. وفعلا اتلبّسته واتظبطته وشغلت الفيديو بتاعي المفضّل بتاع واحده رهيبه جدا اسمها Sara Ivanhoe... الزوله دي رائعة لانها فيديوهات متدرّجة... بديت بي الفيديو بتاع المبتدئين.. ختيت لولو في الكرسي ومعاها كمية من اللعب... وبديت اتريض... بس انفتحت ليك فيني لولو.. كواريك وبكي وصريخ لما طارت لي الرياضة في راسي، وقفتها وقمته!
قبيل كنا معزومين غدا، وكان لزيز جداً.. لكن انا قدرته مسكته نفسي كويس خالص، الحمدلله... أول شي شربته كباية موية قبل الاكل مباشرة... وبعداك أخدت في صحني شوية ضلع وكممممممية من الخضار، طماطم وخيار وجزر وجرجير وخس... وملعقة رجلة وملعقاين سلطة اسود وأخدته لقمة بتاعت كسرة بي ملاح سلج....
بكره حأوزن.. والله يستر.. لاني اتحدث إليكم الان وفي يدي كباية بتاعت مديدة حلبه محلوله في حليب...
على سيرة اليوجا... حأقوم أعرض ليكم كل يوم واحده من الposes البعملها.. في الفيديو بتاع المبتدئين، Sara عندها 12 pose، بيتعملوا سوا.. الزول البادي يادوب قد يحسهم صعبين، لكن بعد فترة من الممارسة بقدر يعملهم بسهولة وبكون مستعد للمرحلة البعدها... أول حاجه حنتكلم عنها هي الCat pose... قبل ما أوريكم ليها، ضروري جداً في اليوجا اننا نهتم بالتنفّس... يعني واحنا بعمل في الحركات بتاعتنا لازم نخلي في تناغم ما بين الحركة والتنفّس.. وده البميّز اليوجا عن غيرها من الرياضات... التركيز في انه كل حركة بتشغّل ياتو من العضلات في الجسم ووالاهتمام بتوصيل الاوكسجين للعضلات دي عشان تقدر تعمل الحركة بأفضل صورة... اليوجا ما لزول مستعجل او زول بتاع تنافس... يعني حاول كل يوم تتحدى نفسك شويه، لكن ما تضغط على روحك (النصري اليوجا ما بتنفع معاك نهائي!)...
نبدا بي الCat pose....
لو عايزين تمارسوا يوجا، اتأكدوا انكم ما ماكلين قريب.... ولابسين لبس مريح ما ضيّق... وما واسع... الهدوء اهم شي... وخليكم حفيانين....
الحركات البختها دي لي ناس باديين يادووووب، لكن اليوجا من الرياضات المفيدة جداً... وانا كنت بمارسها بصورة مستمره... وكان أثرها بظهر سريع فيني.. لانها بتقوي العضلات وبتشدها...
Quote: لاني اتحدث إليكم الان وفي يدي كباية بتاعت مديدة حلبه محلوله في حليب
y غايتو المديدة دى بكون فيها زى 800 كالرويز... انا حرقت 400 كالرويز امبارح..حسى جسمى كلو بنتح......
اليوغا دى ما تنفع معاى خالص يامريم.. دايرة زول باله طويل سلبة...
------------------ العمارة دى كنا بنسميها عمارة المجانين لانو احد سكانها هجم على احد السودانيين بسكين ولم يكن بينهم اى عرفة سابقة... الحمدلله لم يصب باذى ....
النصري... تقول شنو! يعني المديدة كانت مغرية.. انا قللت الكارثه بي إني زدتها حليب خالي الدسم واكلتها من غير سكر... يازول الواحد لازم يمرق نفسه من الحاجات .. عشان ناس البيت ما يخنقوا بيها ههههههههههه
ابتهال... لو عندك رغبة شديدة في اليوجا، بنصحك بالزولة دي... Sara Ivanhoe ... عندها فيديو اسمها Yoga for Dummies... وبتكون من اثناشر pose اساسية في اليوجا بتختك في الدرب... وبتشرح ليك كل واحد يتعمل كيف ومفيد لشنو واحسن طريقة تعمله.. وبتوريك طرق اسهل لعمله لو انت ما ناقش شي... انا اتعلمته معاها.. وبعداك جبته الفيديو البعده حقها...
الposes القاعده اختهم هنا ديل بالترتيب بتاع الفيديو بتاعها...
الpose التانية الليلة اسمها الmountain pose... الحركة دي شكلها ساهله، لكن محتاجه تركيز في كل عضلة عشان نسوّيها... الحركة دي مهمة لأنها اساس لحركات تانية كتيرة زي ما حتلاحظوا في الحلقات القادمة....
mountain pose الزولة دي شرحها ما زي حق سارة.. لكن انا بحاول اوضّح الكلام شوية... الوقفة دي ما وقفة عادية.. الواحد محتاج يتأكد انه كرعين مفتوحين بنفس عرض الأكتاف... بعداك نشد عضلات الكرعين كلها من اولها لحدي آخرها.... الجزء السفلي من البطن نشدّه لي فوق... نحاول بقدر الإمكان نكون straight... واحنا بنتنفّس....
العوض، معليش نسيت أعلّق ليك على ناس د.الطيب النعيم، وكوثر واولادهم... طبعا هم اخوانا جمهوريين... وسندنا في الغربة دي... ما بمر اسبوع ما بنشوفهم.. ياجونا يا مشينا ليهم... وانا بعتبره ابوي في البلد دي، رغم انه ما كبير كده.... حأكلمه والله عنّك... وسبحان الله، الدنيا ضيقة...
02-20-2012, 05:50 AM
Nagat Sid Ahmed Elshiekh Nagat Sid Ahmed Elshiekh
تاريخ التسجيل: 03-04-2011
مجموع المشاركات: 3222
والله يا اخوانا وردّي مسّخ علينا الحاجات كلها، ان شاء الله البركة فيكم وأحسن الله عزاءنا فيه... وربنا يرحمه بقدر ما قدّم في حياته العامرة من مشاعر جميلة ولحن مميز وكلمات احترمت عقولنا قبل قلوبنا... ألا رحم الله وردي وحشره في زمرة الصدّيقين والشهداء...
البرنامج مستمر، مافي جوطة حاصله، ومعاها رياضة بي الصباح، مستمره في اليوجا زي ما أنا، ما خليتها... وبعمل بينها تناوب مع الpilates، وممكن بعد أخلص الكلام عن اليوجا poses، ابدأ اوريكم الpilates دي عامله كيف، هي طبعا ما حاجه بتنقص الوزن، لكن بتشد العضلات كلها، وبالذات الجزء الاوسط من الجسم، أو زي ما بسموه، الcore muscles، بالتالي بتخلي الزول شكله كويس.. بالذات الزول البحاول ينقّص وزنه.. والpilates من الرياضات العملتها أوبرا عشان تطلع من سمنتها الشهيرة... وتبقى كده
نواصل في ال daily dozen بتاعت اليوجا، الpose التالت هو االtree pose، وهي واحده من الحركات الخاصة بالتوازن في اليوجا، وهي حركة قد تبدو صعبة، لكن بقليل من الممارسة بتبقى ساهلة
انا طبعا نزلت الشغل، ومحاضراتي كلها بالعصر، عشان كده يومي كله بكون مزحوم، الصباح بكون ماسكه البيت، بي العصر بطلع المسا بكون هلكاااانه، عشان كده ممكن اختفي يوم يومين... محاضراتي ما يومية، الاحد والاتنين والتلاتاء والخميس، باقي الايام بكون ، الخميس دوامه صباحي، عشان كده ما مزعج.. بس مراقبة أكلي وبعمل في الرياضة ومنتظمة فيها...
02-21-2012, 08:26 PM
Elawad Elawad
تاريخ التسجيل: 01-20-2003
مجموع المشاركات: 7226
سلامات رحم الله الأستاذ وردي و رحم جميع موتانا... الأيامات دي أخبار الوفيات تتزاحم في المنبر نسأل الله طول العمر مع حسن العمل للجميع. كويس يا مريم إنك مواصلة... ما فكرت في اليوجا كخيار لكن أعتقد ممكن تكون مناسبة بعد ما الواحد يتخلص من الوزن الزايد و تبقى واحدة من الأساليب للمحافظة. وعدت بالعودة أمس لكن لم أتمكن هنا تقريري عن الأيام السابقة:
تقرير الجمعة 17/2: عدد الكالوريز الاتناولتها 1390 كالوري. رياضة حوالي 90 دقيقة حرقت 1070 كالوري. الصافي فقدان 1808 كالوري.
تقرير السبت 18/2: عدد الكالوريز الاتناولتها 1465 كالوري. رياضة حوالي 50 دقيقة حرقت 600 كالوري. الصافي فقدان 1326 كالوري.
تقرير الأحد 19/2: عدد الكالوريز الاتناولتها 1926 كالوري. رياضة حوالي 40 دقيقة حرقت 500 كالوري. الصافي فقدان 781 كالوري.
تقرير أمس الاتنين 20/2: عدد الكالوريز الاتناولتها 1369 كالوري. رياضة حوالي 85 دقيقة حرقت 1000 كالوري. الصافي فقدان 1767 كالوري.
طبعا يا النصري عاقبت نفسي بإني زدت الجرعة. لكن أنا محاول بقدر الإمكان إنه إذا في يوم حصل فيه لخبطة في الأكل ولا فطيت الرياضة ما أخلي الحكاية دي تأثر علي. الحمد لله من ما بديت التجاوز الكبير في الأكل كان في عشرة يوم بس و المتوسط بتاعي خلال الفترة كلها حوالي 1525 كالوري في اليوم. و فطيت الرياضة ستة مرات بس.
Quote: عدد الكالوريز الاتناولتها 1390 كالوري. رياضة حوالي 90 دقيقة حرقت 1070 كالوري. الصافي فقدان 1808 كالوري.
التلات سطور ديل يا ياسر الناس ما حتقدر تقدرهم الا اذا عاشو بنفسهم التجربة... بالنسبة للكثيرين هى فقط ارقام ... الحقيقة انها ارقام صعب تحقيقها وتحتاج لارادة حديدية و تصميم (وهضربة احيانا)
طوال فترة وجودى فى البوست ده لم احقق الارقام 90 دقيقة رياضة..بالكتير 45 دقيقة ... اما الكاليريز فالحد الاقصى الوصلته كان فى حدود 600 كالاريز
بالجد كدة انا impressed بالاداء بتاعك واظنك حتحقق هدفك من اول شهر ....
بالنسبة لى 3 يوم اجازة من الشغل بسبب عطلة يوم الاسرة ..لم اخرج من البيت الا مرتين ..المرة الاولى لاشترى سمك زينة لولدى( عذاب الله اكبر فى السمك ده.. اكله ونضافته..الاكسجين ..مااعرفش ايه... زهجنى وكرهنى البيت زاتو)
المرقة التانية كانت للمشاركة فى احتفال المولد النبوى الشريف تحت رعاية عدد من افراد الجالية ..كان يوم جميل وهى اول مشاركة لى فى عمل اجتماعى عام منذ شهور طويلة ..... حى قيوم حى قيوم حى قيوم حى قيوم
النوبة والطار والذكر ..للاسف ما اقدر انزل صور .....
02-21-2012, 10:14 PM
Elawad Elawad
تاريخ التسجيل: 01-20-2003
مجموع المشاركات: 7226
Quote: .المرة الاولى لاشترى سمك زينة لولدى( عذاب الله اكبر فى السمك ده.. اكله ونضافته..الاكسجين ..مااعرفش ايه... زهجنى وكرهنى البيت زاتو)
سلام يا النصري وقعت في المقلب دا؟ قبل زي تلاتة سنين علي و فاطمة أصروا قالوا دايرين سمك زينة مشينا اشترينا لينا حوض صغير و سمكتين و طبعا أصحابك بس يومين تلاتة و نسوا الموضوع و بقيت أنا في أكل السمك و غسل الحوض و غير الموية قلت ليهم والله بالطريقة دي بقى عندي أربعة أطفال مش اتنين. بعد فترة بسيطة ماتت واحدة و التانية عمرت أظن أكتر من سنة و نص يوم الصباح لقيتها ميتة حمدت الله و رميتها و لميت الحوض و ما كلمتهم ذاته... صدق ولا انتبهوا لغيابها. عفيناك من صور المولد في انتظار باقي صور و ذكريات الإجازة. شكرا للتشجيع يا النصري و طبعا إذا في شكر فهو لك على ابتدار البوست و توفير الجو المشجع دا. موضوع إنقاص الوزن دا محتاج مجموعة دعم (Support group) و البوست دا نجح في توفيرها بصورة ممتازة. بالجد مرات أثناء الرياضة الواحد يقرب يقيف و يقوم يتذكركم و يشعر إنه زي البخذلكم و يتشجع يواصل.
02-22-2012, 00:00 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
ازيكم يا شباب؟؟؟؟ كيفكم؟ مريوم، شكرًا على المعلومات المفيدة. اليوقا فعلا مفيدة جداً. يا ريت لو كان عندى صبر عشان استفيد منها. العوض، ما شاء الله و عيني بارده. انا بغراااانه عديل كده.
سلام يا عالم والبركة فينا وفيكم في استاذنا وردي وربنا يتقبلوا وينزلو منزل الصديقين والشهداء يارب ..
ماشاء الله يا العوض ماش كويس ..
نسيت اعلق ليك على صور نياجرا فولز الجميلة با النصري ... وانا غير محظوطة لم اتمكن من زيارنها المرتين الجيت فيها كندا كل مرة البرنامج يبوظ بي حجة ... الله في المرة الجاية ان شاء الله ..
مع تحيات فريق التشجيع.. لكل الفريق ..
02-22-2012, 03:09 AM
Nagat Sid Ahmed Elshiekh Nagat Sid Ahmed Elshiekh
تاريخ التسجيل: 03-04-2011
مجموع المشاركات: 3222
Quote: المرقة التانية كانت للمشاركة فى احتفال المولد النبوى الشريف تحت رعاية عدد من افراد الجالية ..كان يوم جميل وهى اول مشاركة لى فى عمل اجتماعى عام منذ شهور طويلة .....
اهم شي أكلته حلاوة المولد ولا لا؟؟؟؟؟ العوض والله تبغر عدييل كدا ..... مشيت الجم الليلة لمدة ساعة وحرقته 550 كالريز ... دا بعد تلاتة يوم اوف..
انتهيت من الشغل الساعة 8 مساء (قبل حوالى ساعة و45 دقيقة) وجرى على الجيم ...غيرت ملابسى بسرعة وطلعت فى المكنة الساعة بقت 8:15 بديت اجرى ...اتزكرت الميز بتاع السمك ....المحل بقفل الساعة 9 مساء المسافة بين الشغل ومحل بيع معدات السمك حوالى 10 الى 15 دقائق.. اضطريت اختصر زمن الرياضة الى 20 دقيقة حرقت فيهم حوالى 300 كالريز وجريت فيهو حوالى ميل ونص .....
الحمدلله حصلت المحل قبلما يقفل بدقائق ... اشتريت اكل السمك ... اول ما دخلت البيت مشيت على حوض السمك ...كبيت ليهم شوية اكل فى الحوض.. الظاهر السمكتين كانو مهوات من الجوع ....اتخاتفو الاكل فى ثوان...
اها السمك اكل .. انا اكل شنو؟
-----------------
شلالات نياجرا جميلة جدا يا قلب نابض فى الصيف.. فى الشتاء هى شبه مهجورة ...عشان كده الفنادق فاضية ورخيصة.... فى راى الخاص ..الزيارة فى الشتاء لا تقل عن الصيف فالشلالات هى الشلالات
02-22-2012, 09:04 PM
Elawad Elawad
تاريخ التسجيل: 01-20-2003
مجموع المشاركات: 7226
سلام للجميع مرحب بيك يا سمارت و ربنا إن شاء الله يسهل ليك أمورك كلها و يديك الصحة و العافية و راحة البال. سلام يا قلب و المرة الجاية لمن تجي كندا إن شاء الله لازماك زيارة نياجرا و كمان البراري بالذات ساسكاتشوان (أرض السماوات الحية). ما شاء الله يا نجاة واصلي و الخمسمية و خمسين كالوريز دي براها من غير دايت أكتر من سبعين جرام يعني لو بالدايت أكلتي أقل من احتياجك بنفس الكمية براحة ممكن تنقصي ليك رطلين في الأسبوع. مبروك على مواصلة الرياضة يا النصري. قبل ما تسافر بتذكر قلت اتفقت مع يونس شلبي على شرا التريدميل بتاعته... عملت شنو؟ بالمناسبة بتذكر مرة قلت يونس شلبي قال ليك إنه النقصان في البداية ساهل لأنك بتنقص موية و الناس هنا غالطوك و قالوا ليك الكلام دا ما صاح. تصدق لقيت في تفسير علمي لكلامه بس هو قاله بطريقة مبسطة. بحاول في مداخلة تانية أرجع ليه بالتفصيل إن شاء الله. السمك دا في النهاية حيبقى في راسك براك... أسأل مجرب.
02-22-2012, 09:21 PM
Elawad Elawad
تاريخ التسجيل: 01-20-2003
مجموع المشاركات: 7226
تقرير الأمس الثلاثاء 21/2: عدد الكالوريز الاتناولتها 1649 كالوري. رياضة حوالي ساعة حرقت 700 كالوري. الصافي فقدان 1226 كالوري. الأكل الزيادة سببه إنه الجماعة في الشغل قالوا طالعين قهوة طلعت معاهم و أنا ما بشرب قهوة. زمان كنت لما أطلع بشرب لبن بالشوكلاتة (زي الأطفال) هسع بقيت بشرب شاي قلت أغير و اشتريت شوربة و ضربتها. لمن جيت دخلتها في اللوق بتاعي لقيت فيها أكتر من تلتمية كالوري قمت أبيت آكل الغدا و اكتفيت بشوية فواكه مقطعة. بالمسا جونا ناس و زوجتي عاملة لقيمات أكلت منها تلاتة قطع و الحكاية خربت.... بيني و بينكم خرخرت في حساب الكالوريز ختيت اللقيمات بتسعين كالوري لكن أظنها تكون أكتر من كدا.
غايتو بختك يا ياسر الشهر ده قصير..يعنى ممكن تشوف نتيجة العذاب ده فى اسبوع من الان ....
السمك بقى موضوع ... قبل يومين فى واحد من الشفع كب علبة اكل السمك كلها فى الحوض ..اها السمك بدا ياكل لمن قرب ينفقع... وبقى يحننى لمن يطلع للسطح ويمد بوزه لفوق زى الداير يتنفس .. جريت غيرت موية الحوض واشتريت علبة اكل جديدة.. دلوقت ينطط برشاقة ومعنوياته عالية جدا ...
------ صور الزيارة قناة ويلاند المصنوعة والتى تربط بين بحيرة اونتاريو وبحيرة ايرى (البحيرات العظمى) كما واضح من صورة قووقل ادناه ان نهر نياجرا يربط بين البحيرتين ولكن لسوء حظ السفن النهر يمر عبر اعظم الشلالات فى العالم ... لذلك تم بناء قناة ويلاند .... المشكلة عند بناء القناة ان بحيرة ايرى مرتفعة جدا وبحيرة اونتاريو منخفضة (حوالى 100 متر الفرق فى الارتفاع) لذلك تم بناء القناة على deck تدخل السفينة ثم يغلق ليملا بالماء فى حالة الاتجاه الى البحيرة العليا (ايرى) او تسحب منه المياه (فى حالة الشروع للبحيرة السفلى اونتاريو) مشاهدة هذه العملية ممتعة لدرجة كبيرة جدا .... هنا صورة قووقل
Quote: ما شاء الله يا نجاة واصلي و الخمسمية و خمسين كالوريز دي براها من غير دايت أكتر من سبعين جرام يعني لو بالدايت أكلتي أقل من احتياجك بنفس الكمية براحة ممكن تنقصي ليك رطلين في الأسبوع.
سلام لوزرس واحد واحد...... العوض كلامك صحيح دا لو بطلنا الخرمحة.... ياخ اللقيمات دى بموت فيها... أكلتها قبل يومين ...4 قطع عديييل كدا
02-23-2012, 04:20 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
امبارح اتريضت لليوم التانى على التوالى (لاول مرة منذ اسابيع عديدة)
نص ساعة كاملة حرقت فيهم 444 كالوريز وجريت حوالى 2.2 ميل.... ما كان فى معاناة شديدة زى اليوم الاول .....
موضوع الشاى اتحسم تماما .. اصبحت رسميا و بتوفيق من رب العالمين من شاربى الشاى بدون سكر.. اظن ده اكبر انجاز حققتو من بداية البوست .. كنت فى البداية بزازى ...مرة بال sweetnere ومرة سكر خفيف اليوم اعلنها على الملا و بكل فخر شاى بدون سكر هو خيارنا الاول .....
--------- صور الزيارة
شركة جنرال موتورز لصناعة السيارات كان لها فى منطقة سانت كاثرينز مصانع تهز وتلز,, يقال ان عدد العاملين يصل الى 15 الف عامل
دلوقت الصور تحكى
02-24-2012, 05:06 AM
Elawad Elawad
تاريخ التسجيل: 01-20-2003
مجموع المشاركات: 7226
لليوم الثالت على التوالى اتريضت امس الخميس لمدة 30 دقيقة حرقت 460 كالوريز وجريت حوالى 2 ميل وربع .......
لمن مشيت الشغل نص النهار لقيت الهيلمانة والادارة والناس ملمومة عرفت انها بداية الاحتفال بمرور 100 عام على تاسيس الهيئة... اها ..الطرابز مليانة كيك وقهوة... لمدة ثانية وربع فكرت اعمل نايم وتجنب الكيك الا ان الشيطان (ودناوة النفس) عملا معا على تغيير الخطة .... خطفت لى صحن سريع فيهو قطعة كيك مشابهة للصورة دى بالرغم من اننى لست من عشاق الكيك الا اننى استمتعت بالكيكة دى ايما استمتاع لعلها لذة عمل الجرائم....
اكلت الكيك وسقت باصى ومشيت ...فى الداونتاون لقيت مديرى المباشر منتظرنى... الليلة وووووب ...الليلة وووووووب ... الظاهر عملت لى مصيبة وحادفع التمن (غالبا مخالفة سرعة او اشارة مرور) الزول كان مبتسم .... قلت فى سرى سلامة... ادانى جواب شكر وتقدير وامتنان من الادارة على ادائئ فى 2011 وقلة ايام غيابى...
انبسطت شديد وقلت حقو الزول يرجع القراش ياكل ليهو كيكة تانية
02-24-2012, 09:37 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: عدد الكالوريز الاتناولتها 1491 كالوري. رياضة حوالي 65 دقيقة حرقت 800 كالوري. الصافي فقدان 1477 كالوري.
سلام لوزرز،، العوض أخوي والله طريقة معرفة عدد الكالوريز دى ما ظبطت معاي خالص..... يعنى الليلة اكلته فول بالطماطم والجبنة وزيت زيتون من غير عيش دى تعمل كم كالوريز؟؟؟؟؟ بالله اشرح لى كيف ؟؟؟ تسلم الشهر لسه ما كمل يا العوض ؟؟؟ والله الشمار كتلنا عشان نشوف خسرته كم رطل ونقوم نتبع نظامك دا.... مريومة والنصر بالله مصدقين الملح دا ينقص كل الارطال دى وتاكل اى شي .... كان كدا ح أشترى لى علبة وأرشها فى صحن لقيمات وانقص رطلين ههههه.... النصري الكيكة شكلها مغري وانا لو فى مكانك كان شلته اتنين بيضة وبنية ههههههه.
02-25-2012, 05:37 AM
Elawad Elawad
تاريخ التسجيل: 01-20-2003
مجموع المشاركات: 7226
سلام يا نجاة لحساب الكالوريز أنا قاعد أعتمد على الموقع دا: http://caloriecount.about.com محتاجة تسجلي فيه و بعد داك ممكن تعملي بحث لنوع الأكل المقصود. معظم الحاجات العادية و التجارية بتلقيها فيه بسهولة في حاجات محتاجة شوية اجتهاد. الكويس فيه إنك بتبدي تكتبي الكلمة و هو بتمها ليك و بعدين في النتايج بديك حاجات مختلفة تختاري منها يعني مثلا تكتبي (Chicken breast) هو بديك خيار إنها مثلا روستد ولا محمرة و كدا. طيب إذا جينا للوجبة القلتيها الفيها فول و جبنة و طماطم و زيت نفرض انه الوجبة مكونة من نص علبة فول ماركة زياد و طماطماية متوسطة و جبنة ما يعادل تلاتة قطع جبنة الواحدة بحجم بوصة مكعبة و ملعقة زيت زيتون. الصور دي بتوري الخطوات: دي نتايج البحث عن الفول (Fava Bean):
هنا اخترنا ماركة زياد (دي في كندا ما عندنا) و اخترنا الكمية نص كباية و بوريك إنه نص الكباية فيها120 كالوري:
بعد داك جينا للطماطم و دي نتايج البحث:
اخترنا طماطم نية و حجم متوسط:
بعداك نعمل بحث على الجبنة و نعتبرها فيتا:
و نختار النوع و الكمية:
بعدها نبحث عن زيت الزيتون:
و نحدد النوع والكمية:
يعني الوجبة كلها فيها زي 310 كالوري. طبعا في كل مرة الواحد بضغط على (Add to Log) بعد يختار الوجبة و تكرري الكلام دا لكل وجبة في النهاية بديك مجموع اليوم و ممكن لو ضغطي على (Analysis) بديك تحليل لليوم و الشي الناقص شنو في مكونات غذائك. دا نموذج للوق بتاعي لليلة... لاحظي إنه من حظي حتى المصقعة لقيتها في قاعدة البيانات حقتهم:
معليش المداخلة طالت لكن في مداخلة جاية حأشرح طرق تانية لمعرفة محتويات الأكل البناكله من ناحية سعرات حرارية إن شاء الله.
الحمدلله والشكر لله اتمرنت لليوم الرابع على التوالى لمدة نصف ساعة حرقت 425 كالوريز وجريت 2.15 ميل ... وبكدة نقرض على الاسبوع وناخد يومين اجازة ..ان شاء الله نرجع للرياضة يوم الاثنين...
يا نجاة الملح ده بقفل النفس وبخلى الزول ياكل اقل.. انا مثلا ممكن اقوم ببزا كاملة براى (medium) .....
لو رشيت فيها الملح ده احتمال اكتفى بتلات قطع بدلا ستة....
انا ما جربته ..اهتمامى بيهو جاى من حتة ال business بس.....
02-25-2012, 05:54 AM
Elawad Elawad
تاريخ التسجيل: 01-20-2003
مجموع المشاركات: 7226
ما شاء الله يا النصري نحييك على العودة للروتين بتاعك بسرعة. ما كلمتنا ياخي يونس شلبي أخباره شنو؟ عندي سؤال برة الموضوع فوق كتبت شنو و ظهر بدلها (إنسان رخيص). لاحظت كم مرة في مداخلات بتظهر العبارة دي... الظاهر بكري عنده كود شغال غلط.
02-25-2012, 05:58 AM
Elawad Elawad
تاريخ التسجيل: 01-20-2003
مجموع المشاركات: 7226
يا جماعة عندي مشكلة داير رأيكم فيها. في الفترة الأولى كانت كمية الأكل الباكلها و فيها حوالي 1500 كالوريز دي كفاية بالنسبة لي. هسع لي كم يوم كدا بعد العشا بكون جيعان و بنوم جيعان ما عارف الحاصل شنو. أول افتكرتها حاجة كدا و تمشي لكن مستمرة ليها كم يوم.
02-25-2012, 06:11 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
ازيكم يا لوزرس؟؟؟ مبروك يا النصري العوده للروتين بعد الاجازة....
العوض...شكله جمسك قرر انه الموضوع ده صعب عليه...و عاوز يخدعك عشان تاكل اكتر. دى قالوا انزيمات (او هرمونات) بتتفرز من الدماغ عشان تخليك تحس بالجوع. حاول فى العشاء اكل بروتين اكتر. و لو بتاكل عيش اكله عيش اسمر. و السبب ان البروتين و الكاروهايترتات المعقدة بتقعد فى المعدة اكتر و بتديك شعور بالشبع مدة اطول. او ممكن لما تحس بالجوع تاكل ليك صحن جزر او خيار.
سلام يا جماعة. شكرا يا سمارت و النصري على النصايح و المعلومات. غايته جسمي لو داير يغشني أنا مثلت ليه إني اتغشيت و يوم السبت أكلت أكتر من ألفين كالوريز. اليومين الفاتوا كانو حافلات بالأحداث. أول حاجة زي ما قلت يوم السبت مشينا مطعم بوفيه و تناسيت موضوع الدايت لكن بحذر و عملت خطة كويسة جدا أول مليت صحن كامل سلطة و الصحن التاني نوعت فيه لكن ركزت على البروتينات. عموما في صباح السبت كنت شاعر بإني ما عادي زي راسي لافي شوية... يعني ما حاجة جادة لكن إحساس ما طبيعي قمت مشيت فحصت الضغط لقيته منخفض شديد يعني زي كم و تسعين على كم و خمسين و أصلا كنت داير لي سبب فقررت ما أتريض في اليوم داك بنية إني أكبر جرعة الرياضة في اليوم البعده. الدكتورة بتاعتي مؤجزة فشاورت لي دكاترة سودانيين قالوا لي ممكن توقف حبوب الضغط و تراقبه لأنه ممكن يكون حصل كنترول ليه بالرياضة و تخفيف الوزن. يوم الأحد اتعشينا مع جماعة أصحابنا و برضه ضربت تمام لأنه كان في كسرة غايته خرخرت شوية في دخيل معلومات الأكل في اللوق :) لأنه ما قدرت أقدر بالضبط كمية الكسرة الأكلتها عشان كدا النتيجة ما كانت كعبة شديد لكن الحاجة الكويسة القدرت أعملها إني إتريضت مرتين و حرقت حوالي ألف و سبعمية كالوريز (ما شاء الله ما أسحر روحي). حأمشي بعد شوية أقيس الضغط بعد توقف يومين من الحبوب و أشوف الحاصل شنو و أرجع ليكم بتقارير الأيام الفاتت. بالمناسبة يا النصري العاصفة دي ضربتنا برضه و السبت و الأحد كلهم الجليد نازل و هوا و كتاحة شديدة إن شاء الله تكون آخر عاصفة في الشتا دا.
02-27-2012, 07:59 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
اللوزرز ازيكم والله ايام الشغل دي انا بكون تعبانه وطافية عشان كده ما بقدر اكتب زي ما عايزه... وبكون بتجارى اليوم كله...
بكره اخر يوم شغل، الحمدلله برنامج شغلي اتغير.. بقت عندي محاضرات احد واتنين وتلاتاء... يوم السبت عندي محاضرة، لكن بعملها من البيت..
حسي بكتب بي ربع عين.. بجيكم بالمهلة...
لكن الامور ماشه تمام .. في ثبات في الوزن، الحاجه دي غايظاني بشكل.. لكن انا بعد ده لازم ابدا رياضة فيها cardio.. عشان اقدر اواصل نقصان.... ما عندي اي فكرة حأدخل الحاجة دي في برنامجي كيف، غايته ممكن يوم الاربعاء والسبت... خليها تكون يومين في الاسبوع كبداية، بعداك نشوف الببقى...
02-27-2012, 08:18 PM
Elawad Elawad
تاريخ التسجيل: 01-20-2003
مجموع المشاركات: 7226
سلام يا مريم و شكرا على السؤال... الحمد لله قست الضغط قبل شوية و لسع طبيعي. لو ربنا سهل و قدرت واصلت من غير حبوب دا حيكون إنجاز كبير. لله الحمد أولا و أخيرا ثم كل الشكر لكم جميعا و للنصري على هذا البوست و توفير الدعم. في انتظار فيلمك الهندي يا النصري. إن شاء الله تكون قابلت يونس شلبي. و مبروك الرطل و نص... رطل و نص في خمسة أيام دي حاجة ما ساهلة والله.
02-28-2012, 10:17 PM
Elawad Elawad
تاريخ التسجيل: 01-20-2003
مجموع المشاركات: 7226
تقرير يوم الجمعة 24/2: عدد الكالوريز الاتناولتها 1594 كالوري. رياضة حوالي 80 دقيقة حرقت 1000 كالوري. الصافي فقدان 1550 كالوري.
تقرير يوم السبت 25/2: عدد الكالوريز الاتناولتها 2059 كالوري. مافي رياضة. الصافي فقدان 212 كالوري فقط.
تقرير يوم الأحد 26/2: عدد الكالوريز الاتناولتها 1654 كالوري. اتريضت مرتين: الصباح حوالي 75 دقيقة حرقت 900 كالوري. المسا حوالي 68 دقيقة حرقت 800 كالوري. الصافي فقدان 2091 كالوري.
تقرير يوم الاتنين 27/2: عدد الكالوريز الاتناولتها 1531 كالوري. رياضة حوالي 65 دقيقة حرقت 800 كالوري. الصافي فقدان 1437 كالوري.
الوزن يوم الخميس الصباح إن شاء الله.
02-29-2012, 09:24 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
بكره الوزن،،،،،، بكره الوزن. بختك يا العوض و ما شاء الله. كيف الضغط؟ ان شاء الله تمام. تعرف ان لما يكون ضغطى مرتفع بيكون كم وثمانيين على كم و ستين. و الغريبة ما عندى انخفاض ضغط. ان بس طبيعتى كده. النصري، مسقط راسك ظريف و الله. انا مسقط راسي في بلاد الفرنجة دى فى راس جبل. الله رحمنى بعد سنتين و رحلنا
و الله يا ناس كندا نفسي من زمان امشي فانكوفر، قالوا الاكل خرااااافي.
مريوم، كيف الرياضة مع الشغل؟ ربنا يعينك.
غباشي و نجاة و ابتهال و امير و محمد الحاج و على، شنو ؟؟؟
02-29-2012, 09:58 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
والله بختك يا العوض... متشوقه اعرف الوزن مشى كيف...
سمارت.. اسكتي ساي يختي... انا لابده كده .. خجلانه منكم.. والله طبعا بعد ما انتظمته في اليوجا والبلاتيز... قممممته كده ضربته يدّي اليمين ضربه قاضية بي الباب... في الكوع... وحاتكم اليوجا وقفت والبلاتيز وقفت... وشغاله بالحبوب بس... اها لا في رياضة لا يحزنون.. غايته الحاجه الكويسه انه الليلة جاتني كيكة رهييييييييييييبه بتاعت جزر بالمكسرات (ايوه والله حاجه كويسه انتظروا)... اها قمت بعد ما نفسي هفّت واخدته قطعه كبيييييييييرة... قمت قلت يا بت أوعك.. وقسمته منها ربع الشريحة... واكلته... غايته محاوله احافظ في الاكل... لكن رياضة ماكو... عاد اعمل شنو .. والله حاسه بي عواره شديده، كل يومين إصابة ملاعب! الله كريم بس....
الجو بتاعنا اتصلّح.. وبكره ناويه اشوف treadmill ... حأحاول كم محاولة لو نجحت حأنتظم فيها مشي كل ما اقدر، لمدة نص ساعة... لو ما اتصلّحت ما بعرف حأعمل شنو :(...
يوم التلاتاء (اول امس) مشيت على الجيم لقيت دنزل واشنطن..لو ما متزكرنو .. انا حكيت عنو فى الصفحة السادسة او الخامسة.. الزول ده من سيراليون وهو فى التاسعة والخمسون من عمره...مشكلته بتكلم الانجليزية وكانه يتحدث لغته المحلية عشان كده من الصعب فهم كل ما يقوله..كمثال حكى لى انه حصل على الحزام الاسود وعمل التدريس فى الجيش ..اها انا فهمت الجيش دى Army على انها Miami المدينة الامريكية لان النطق واحد للكلمتين .... اها لمن دخلت الجيم ..بدينا نتونس ...قمت سالته عن وزنه ...قال لى 220 رطل..قلت ليهو الظاهر عليها كلها عضلات مش جلافيط زينا ...ضحك . سالته اذا عامل ريجيم ..اجاب بالنفى لكنه يراقب اكله ويبلع فيتامينات بصورة يومية... اها للشلاقة بتاعتى سالته ببراءة فيتامينيات شنو.. الزول صوته عريض جدا وعالى خالص ...بدا يقول لى معقول ما بتاخد فيتامينات ...مرة تانية وبهالة شديدة قلت ليهو انا ما ببلع اى حبوب وكيماويات ...الزول طلع من طوره وكورك نادى جماعة شغالين فى الغرفة المجاورة وعملونى ضحكة ... انا شعرت بانى مكانتى الادبية اتهزت ..قلت ليهم انا بحصل على كل الفيتامينات من الاكل.. دنزل قال لى تضمن كيف ما يكون فى gap هنا او هناك .... المهم بعد المهزلة ديك جريت على الصيدلية واشتريت 100 حبة فيتامينات multi vitamin والدعاية على الصندوق تقول from A to zinc بمعنى ان كل الفيتامينات موجودة بدا من فيتامين A الى الزنك .... نواصل
02-29-2012, 11:18 PM
غباشي غباشي
تاريخ التسجيل: 01-19-2007
مجموع المشاركات: 1729
Quote: غباشي و نجاة و ابتهال و امير و محمد الحاج و على، شنو ؟؟؟
Salam losers and thanks Smart Sorry to write in English, I only have an English keyboard at the moment. I am still a live, however, a bit struggling with study. My diet and training programs are going well. I haven't weight in last week, nevertheless, I am good and noticeably losing weight to carry on the city challenge. Furthermore,I am fully busy with my current study task, almost working 13 hours daily to overcome this struggle as well as building up my dissertation. So please make supplication for me and I will be back soon to report you my progress. Congrats Elnasry for the 1.5 lb, keep up the good work Elawad, thanks a lot for the amazing website, I have registered on it, and it helps me to monitor my daily intakes and maintain my program stability during busy times. I like the analysis report because it reveals many facts about my current nutrition and comes up with invaluable advices that make me more enthusiastic to go for it. Awaiting for your weight in result . Mariam, long time wallahi, hope all is going well with you Greetings to the rest of the losers, Nagat, Ebtihal, Amir, Wd Elhaj ..... and others , please show up and let's know your updates
catch you later guys
02-29-2012, 11:46 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
كر علي يا مريم. دي عين منو؟؟ شنو الحكاية ؟ اعملي حسابك يا فردة. علي العموم كفارة، و ابدي بس براحة براحة. ربنا يعينك.
النصري، الجماعة برمجوا بيك؟ ما تتخلع ساي. في مدرسين في الموضوع ده. مدرسة بتقول ناخد فايتمبنات عشان نغتي القاب في الغذاء بتاعتنا و مدرسة بتقول ناكل كويس و اكل منوع. انا شخصيا كنت بأخد بانتظام خاصة في فترات الحمل و الرجيم. الغريبة قبل كم يوم في التلفزيون في ضيف في برنامج كده قال ما في داعي الفايتمينات. بحاول افتش ليك اللقاء غباشي، ربنا يوفقك يا ولدنا. شد حيلك و ربنا معاك. ايام الكتابة في البحوث دي أصعب ايام. لما توزن ورينا الحاصل.
02-29-2012, 11:58 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات يا جماعة والله يا سمارت خلاص الشهر جا و وقت الوزن جا. مشيت قبل شوية فحصت و الحمد لله الضغط ماشي تمام. غريبة حكاية ضغطك يكون منخفض كدا و طبيعي... سبحان الله مهما الناس عملوا دراسات و بحوث لكن الجسم البشري دا في النهاية حاجة كدا ما عندها قوانين. فانكوفر فعلا تستحق الزيارة أنا لغاية هسع ما زرتها لكن النية في إن شاء الله لو ربنا سهل السنة الجاية. السنة دي ما أظن في طريقة في نية قوية لزيارة السودان بإذن الله. كفارة يا مريم و أجر و عافية إن شاء الله. إن شاء الله التريدميل تتصلح مفيدة جدا في البيت والله. يا النصري قلت لي الجماعة عملوك موضوع! موضوع الفايتامينات دا فعلا محيرني. طبعا أحسن حاجة الواحد ياخدها من مصادر طبيعية لكن هسع أنا تحليل الأكل بتاعي في الكالوري كاونت وضح لي جدا إنه أنا عندي نقص في تناول الكالسيوم و البوتاسيوم و الفايبر و محتار أحل المشكلة دي كيف هل أتوكل و أبدا أستعمل فايتامين للكالسيوم و البوتاسيوم ولا أحاول أشوف حل تاني. ربنا يعينك إن شاء الله يا غباشي و يوفقك في الدراسة و في المسابقة كمان. بالله شفت الويبسايت دا مفيد كيف؟ فعلا موضوع التحليل دا ممتاز خصوصا إنه ممكن يحلل ليك اليوم و الأسبوع و الشهر. مرات الواحد ممكن يكون عنده نقص أو زيادة في حاجة معينة لفترة يوم يومين لكن لما تلقى تحليل الشهر بتعرف انك مفروض تاخد خطوات. العفو يا نجاة و لو ربنا سهل لما أفضى حأكتب ليك مواقع تانية ممكن تحسبي الكالوريز حتى للوجبات البتعمليها في البيت بإنك تدخلي مكونات الوجبة و الكميات الاستعملتيها بعد داك تقدري أكلتي كم من الطبخة و تحسبي الكالوريز الاتناولتيها.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مريم بنت الحسين
Nagat Sid Ahmed Elshiekh
Elawad
القلب النابض
Ali Sirelkhatim
smart_ana2001
غباشي
فيس بوك
تويتر
انستقرام
يوتيوب
بنتيريست