النصرى ....تضرب فى النان سااااى و عامل فيها عامل رجيم....يا زول بالهنا خلاص بقيت تفكر فى المعاش???عجزت شكلك كده انا موهوسة بموضوع المعاش ده. و امس لاحظت ان الكاش بتاعنا ماشي نقصان ...السبب...الزكاة. انا و زوجى العزيز بنطلع زكاة على اى قروش حال عليها الحول حتى المعاش اللى لسه ما مسكناه بيدنا و لا ح نمسكه قبل ما نتم 60 سنة. هسي عاوزه اشوف حل للموضوع ده. خاصة ان بعد كم شنة كده ح ندين عشان ندفع الزكاة. الموضوع معقد جدا لكن عاوز فتوة من شيخ مستنير عارف النظام فلا امريكا و فاهم فى الشريعة
ال Maple ده اجمل حاجه من كندا....(بعد jim carrey ) ....
المطعمات الصناعية دى فعلا مخيفة. وبالمناسبة فى دراسة (سمعت بيها قريب) قالوا ان الجسم بيبدا يهضم من الفم. و لما الفم يزوق طعم السكر (من السكر الصناعى ده) بيفتكر انه ده سكر حقيقى والجسم يبدا يخزن على طول. اشرب سكر طبيعى بس قلله شوية شوية و صدقنى بعد فترة ح تشرب من غير سكر او بسكر قليل جدا و ما ح تكون حلسي بالفرق. عليك الله يا النصرى اسمع كلامى فى الموضوع ده....و ابدا قلل السكر. بعد شوية الجات اللى فيها سكر ح تبقى ليك حلوة شديد و ما حتقدر تاكلها شكلك مجامل شديد النصرى....ما شاء الله عليك
ابتهال?????ازيك??? مشتاقين يا اخى
Quote: كلنا ماحقنا ..بس مشى سريع... احنا في غربه وورانا عيال يابت امى كان انكسرنا البشيلنا منو؟؟؟
ضحكتينى و الله
اعملى اى شيء...بس ابعدى من بواقى الاولاد دى. دى اخطر حاجه على صحة الامهات. يا زولة دى اخطر من الحمل ذاتو. انا لو جعانة ما باكل باقى زول. صحانتهم الصغيرة دى بتشيل الهوايل.
ما تتعقدى منى ساي يا ابتهال. انا محترمة روحى الايام دى لظروف صحية.
حمد فتح الرحمن...الحمد لله على السلامة. و مبروك يا اخى و صولك لنصف الهدف. بخصوص السكر...ذى ما قلت للنصرى...حاول اشرب العصير بسكر خفيف. او حاول اوعد روحك انك ح تشرب كباية واحده بس فى اليوم. بالمناسبة السكر ما فيه سعرات حرلرية كتيرة. معلقة السكر الصغيرة فيها 15 سعر حرارى بس. المشكلة انه سكر جااااهز للهضم. من الفم لخلايا ال fat على طول. ما اظن بيقعد فى المعدة دقيقتين.
احسن حاجه تعملها لما تاكل شيء فيه سكر انك تاكل معاه حاجه فيها برتين عالى عشان تاخر امتصاص السكر بواسطة الجسم. اكل ليك بيضة مفقوعة مع كباية العصير
ازيكم يا شباب/شابات... غايته حالتي شلش!!!! is that a word? المهم... كتفي ويدي منتهيين... وانا بديت اظن انه ده شد عضلي او تمزق... اتشوبرت قبل كم يوم وعملته عمليه بطّاله... نقلت سراير الاولاد لغرفتهم (ايوه كانوا الاتنين بنوموا معانا)... وركّبته واحده من الجهات بتاعت سرير لولو براي... وما ادراكم ما سرير لولو... عبارة عن خشب مبطّن زي المرتبه كده... اها، واحده من الجهات كنت شايلاها عشان تكون جنبي لما تصحى بالليل... لما وديتها غرفتها ركبته... بدل ما اتنيل على عيني وانتظر نادر... وهو زاتو بحتاج حد يمسك ليه... انا قمته عملت فيها سوبر ورفعته بي يدي الشمال وربطته المسامير بي يدي اليمين... وعينكم ما تشوف إلا النور... لي تلاته ايام ما نايمه زي الناس من الألم... وطبعا رياضة مافي.. وحالة صعبة...
شكلي ماشه الدكتور الليلة... ما بقدر استمر على الحالة دي كتير!
12-07-2011, 11:31 AM
غباشي غباشي
تاريخ التسجيل: 01-19-2007
مجموع المشاركات: 1729
اعلان حالة الطواري ... لقيت نفسي زايد 500 جرام ... قدر و لطف , كنت خايفها تكون اكتر من كدة .... البسكويت عملها فيني ... رجعت للبرنامج الضاغط تاني بس ما عندي زمن للجيم .... و الجيم حيقفل بعد عشرة ايام عشان حيرحلوا لمقر جديد افتتاحه حيكون يوم 22/1/2012 مزنوق في تاسك حتاخد مني 4 اايام كدة ... ربنا يعين ... حارجع ليكم قريب
اسبوع كامل ضاع ....واجازتى باقى ليها 6 اسابيع ..... بالرغم من انو الاسبوع كان حافل جدا .... عزومات وبرامج يومية مع ضيف كالقرى بالاضافة الى اوفرتايم رهيب الا اننى اشعر بالضيق من ضياع 7 ايام غاليات احتاج لكل دقيقةو فيهم...
يوم الجمعة ما اتريضت لكن لحسن الحظ كان عندى بيت من تلات غرف محتاج لغسيل موكيت ظبطته فى كم ساعة وعرقت تمام واعتبرت العرق ده بدل الرياضة...
يوم الاتنين بدا ب 2 ساعة عمل اضافى بسبب ان القطار صدم احدى السيدات وتسبب فى موتها فى الحال ...طلعت دعوة فى الراديو لكل السواقين الراغبين فى اوفارتايم نسبة لتعطل القطار فى الضاحية الشرقية ... اترددت لمدة ثانية ونص (بين جرى 2 ميل ومتر فى الجيب) ورفعت الراديو و انضممت لجموع الشرفانين (غايتو الشيك الجاى بجيب حق تزكرة العمرة)
امس الثلاثاء اتريضت على سريع ..حوالى 20 دقيقة بسبب انى نسيت الرداء او بنطلون الرياضة...
اليوم الاربعاء ..رجعت للروتين ..30 دقيقة من الجرى بسرعة 6.2 ميل فى الساعة تتخلها دقائق من المشى .. قابلت يونس شلبى حكيت له عن الاسبوع الضاع وعن اجازتى القربت ..قال لى انو حياخد بنته 16 سنة الى جزيرة الدومينكان فى الكاريبى وحيقضو اسبوعين هناك تكاليف الرحلة(تزكرة طيارة لنفرين...وفندق..اكل وشراب 2 الف دولار ,, قلت ليهو دى ابورخا ..قال لى لانو ايام الكريسماس مافى ناس بتسافر,,,, سالنى اذا كنت بعرق اقل من الاول.. اجبت نعم .. ضحك وقال لى زمان فى البداية كنت بتعرق الموية الفى الجسم دلوقت بتعرق الدهوم الفى الجسم....
محمد الاثيوبى كان موجود فى الصالة وقد تحدثنا عن خطورة تربية الاولاد فى كندا واثر المخدرات قلت لهم ان الحرمان سبب اساسى فى انحراف ابناء المهاجرين الجدد.. لم يتفقو معى .. كانت جلسة طيبة ......
اها انتهيت من التقرير نجى للتعليقات
12-07-2011, 08:15 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
مين اللى اداكم عين الاسبوع ده.??? غباشي وزنه زاد.البركة فى البرزنتيشن الناجح
مريوم كتفاها واجعها. البركة فى رحول الاولاد لاوضهم و استقرارهم. و فى الكب كيك دى والله
النصرى قضاها كلها شغل و مجاملات و عض. البركة فى قروش العمرة. ربنا يكتب ليك فيها الخير و يقبلها
Quote: ضحك وقال لى زمان فى البداية كنت بتعرق الموية الفى الجسم دلوقت بتعرق الدهوم الفى الجسم....
الجملة دى اثبتت لى ان يونس شلبى قاعد كنب (على قول ناس اليوم الحار) و ما ناقش حاجه. يا فرده ما فى شىء بيطلع دهون من الجسم غير انها تتحرق و تتحول لطاقة. او ممكن تعمل عملية بتاعة شطف دهون. ما فى زول بيعرق دهون..... قلة العرق دليل على ان لياقتك اتصلحت حبه او نقص وزنك و بالتالى جسمعك بقى يحتاج طاقة اقل لتحريك كتلته.
Quote: قلت لهم ان الحرمان سبب اساسى فى انحراف ابناء المهاجرين الجدد..
بتفق معاك فى ده. الناس لو شغلت اولادها برياضة او اى نشاط مفيد ممكن تبعدهم عن اولاد الحرام ليه كده يا مريم????....حرام عليك مشاعرنا. و ايوه... معلقة السكر اللى فى الشاى دى هى اللى ح تخرب النظام. بالهنا. لكن انا ح انتقم منكم و انزل صورة من قطعة الكنافة (بوصة X بوصة) الللى ح اكلها اليوم
12-07-2011, 09:14 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: سمارت.... أخجلي... والله كنافتك دي الفيها يكون قدر الكوره الصغيرونة بتاعت الشوكولاته الواقعة في الطربيزة حقتي دي...
الله يا مريم مفروض اخجل...الكنافة دى محشية بحشوة فيها cream cheese و heavy whipping cream.....مبااالغة. عندنا ضيف الايام دى فى البيت ...لما ارجع من الشغل بلاقيه اكل نص صينية لوحده. غايتو انا بحترم روحى و باكل قطعة صغيرة واحدة فى اليوم و بعدها بطلع اتمشي على طول.
تعرفى يامريم انا كنت احلم بانى اكون motivation speaker ومرات فعلا بحس اننى عندى الامكانيات المطلوبة بس لازم الظروف تكون ملائمة وال audience يكونو بصفات معينة(حسن الاستماع والرغبة فى التغيير) المقدمة دى عشان نعرف بالظبط الغرض من البوست,,, التحفيز motivation وحث الناس على تحقيق المستحيل,,,,, انت يا مريم العمود الفقرى للبوست وحريصة ترفعيهو كل يوم رغم كل المشغوليات انا شخصيا really appreciate that نحن محتاجين ان نحفز بعض ... اصابتك بالشد العضلى(او التمزق لاقدر الله) لابد انها تزيد اصرارك على اكمال المسيرة ورسالة للناس المتابعة البوست انو مافى شئ بجى بالساهل وبدون تضحيات الطريق الماشين فيهو نحن طريق صعب وشاق ومليان بالعقبات.. اهو نحن بدينا بعدد كبير ....وينهم الناس ديل دلوقت؟ فى صالة الرياضة كل يوم انا بشوف وجوه جديدة وكلهم بختفو بعد اليوم الاول وما برجعو تانى ... ومرات بهاظرهم بقول ليهم one timer
الناس دى كلها دايرة تتريض و تكتسب لياقة وتنزل وزنها .... قليلين جدا البواصلو لفترة طويلة وبقاومو الظروف والاصابة ....
لازم نواصل ونحفز بعض و نشجع الاخرين للانضمام,,, واحدة من حسنات البوست الرئيسية هى ازالة الخجل والاحراج فى مناقشة المواضيع دى ... بس انا كان نفسى اقرا feedback من قراء البوست والناس المتابعين من الخارج.... لاول مرة يكون عندى بوست تصل صفحاته لاربعة ولا تصلنى رسالة واحدة فى الايميل....
عليكم الله يا قراء البوست مراسلتى على الايميل وكتابة خواطركم حول البوست وساقوم بنشرها حسب توجيهاتكم .......
12-08-2011, 07:04 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
والله يا النصري كلامك جاني في الصميم، انا زوله لايوقه جداً وما بتقبل الفشل بسهولة.. لكن برضه مُصرّه علي الموضوع ده وغايظني أني ما قادرة اقوم اتريض... رغم أني عندي نزلة والشد العضلي مطلع روحي.. يدي وكتفي ونص ظهري.. وراقده رسمي .. لكن شايله هم الرياضة ... حأمشي الدكتور بعد شوية كده.. ومن لاياقتي أني ما بمشي الدكتور الا لما اتزنق جد جد! غايته تنفع motivational speaker رفعته معنوياتي والله رغم أني زهجانه..لي اسبوع ما نايمه زي الناس، ونادر الله يعينه.. غايته بس الشلاقه!! لكن ان شاء الله اول ما أبقى كويسه حاعوض الايام الوقفتها دي.. ان شاء الله بس ما ازيد وزن فيها..
شكرًا والله يا النصري.. ما قصرته..
12-08-2011, 07:23 AM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
Quote: ت يا مريم العمود الفقرى للبوست وحريصة ترفعيهو كل يوم رغم كل المشغوليات انا شخصيا really appreciate that نحن محتاجين ان نحفز بعض ...
والله صدقت مريومه هي البتشجعنا علي المواصله والدليل بعد ما استنفذ الولد كل الحيل البتحميهو يمشي المدرسه من ...الليله اجازه ...بطني واجعاني ...رجلي واجعاني ..بردان ...عندي كحه...دا طبعا كل يوم الصباح بعد ماينته بفتح عيونوا يلاقينى الابتسامه العريضه ما بتفارق وشي ...!!!!!!!! اها لحدى ماخلصنا مواعيد البص جات .....شلت البت من السرير وختيتا هى الاسترولا وجرينا على البص والحمد لله حصلناهو وانا راجعه لقيت ليك الجو ظريف ودافئ قلت حسب توقيت السعوديه الدنيا مسا ومريم طالعه تتمشى.... اقوم انا اتمشى هسه واجرى اكتب الكلام دا للوزرس ديل قبلها اليوم دافئ وجميل والمشى مع رزاز المطر وانا اغنى ليك مع بتى RAIN RAIN GO AWAY COME AGAIN ANOTHER DAY ...MAMA WANT TO PALY
,وبعد شويه ولع لى النحرقو.....ورقيص عروس الكابي ديسا وعجبت عريسا المهم انبساط وتجلى وروح معنويه مرتفعه وبسمات لناس الشارع انا وبتى زى المضيفات ....ولقيت لى مره مكسيكسه ولدا مع ولدى فى الفصل بنتلاقى محطه البص ...ونسه سريعه...قالت دايره توصف لى بيتا (انا جديده فى الحله ) رفعت السعر وعملت فيها رياضيه وماعندى زمن وجاريه (حركات الامريكان الصباح ) وواصلت المشى والغنا يا السيده علويه يابت المرغنيه***لغود حبيبا ليا حوليه بالختميه ياحليلهم المرغنيه ما فكو الجماغه عكس الهوا بونس فى بتى وهى تقول لى منو ؟؟؟؟ اقول ليها الميرغنيه تقول لى منو ؟؟؟؟ اقول ليها الختميه ماباعو القضيه (عموما لو فى اتحاديين هنا مايزعلو هى مافهمت حاجة لانو عمرها سنتين) ونحن نتحدث فى هموم الوطن السما انقدت فينا وقمت جاريه راجعىن وين ؟؟؟البيت قام شنو ليكم...دخلت اليد فى الجيب اليمين ..............المفتاح مافى دخلت اليد فى الجيب الشمال..............المفتاح مافى
فاصل ونواصل
12-08-2011, 02:50 PM
غباشي غباشي
تاريخ التسجيل: 01-19-2007
مجموع المشاركات: 1729
و الله مشغوول و مزنووق شديد الليلة شغال بس منازلهم .... الخميس الجاي معزوم عرس السوبرفايزر بتاعي و حاكون من الشهود على عقد قرانو لقيت البوست بتاع قريبي علي الخير فاندحت و رشيتم بالاناشيد بتاعت الروضة ... اناشيد الروضة ... الغريبة الروضة دي مع انو اتخرجنا منها قبل تلات اربعة سنين كدة لكن لسة زي كأننا بنقرا فيها
مرحب بي ابتهال و النصري ...
سمارت تصدقي و تأمني انا في حاجات كدة نسيت حتى طعمها , زي الاتي: الحلويات الفول القراصة الكيك البيبسي و ما شابه السكر الابيض و ما شابه البطاطس بس مشكلتي كلها في البسكويت اقل حاجة بزيد طوالي و في حاجة تانية الميلك شيك
مريم طمنينا الحصل شنو معاك ...بس اوعة تكون دكوة في الركب و الله زكرتيني الحلقة بتاعت الهيلاهوب ديك حاخت ليك اللينك (ساعدونا في الفيديو يا خبراء) و ان شاء الله ترجعي قريب للملاعب
امير و حمد .... وينكم يا جماعة
12-08-2011, 05:46 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: وبعد شويه ولع لى النحرقو.....ورقيص عروس الكابي ديسا وعجبت عريسا المهم انبساط وتجلى وروح معنويه مرتفعه وبسمات لناس الشارع انا وبتى زى المضيفات ....ولقيت لى مره مكسيكسه ولدا مع ولدى فى الفصل بنتلاقى محطه البص ...ونسه سريعه...قالت دايره توصف لى بيتا (انا جديده فى الحله ) رفعت السعر وعملت فيها رياضيه وماعندى زمن وجاريه (حركات الامريكان الصباح ) وواصلت المشى والغنا
ههههههههههههههههه والله يا ابتهال قبل يومين، قلت ياخ ابتهال دي زولة عسل شديد، غريبة ما نكون اتعارفنا قبل البةست ده... اها حصل شنو.. ان شاء الله ما تكونوا اخدتوا حمام في الشارع!!
Quote: مريم طمنينا الحصل شنو معاك ...بس اوعة تكون دكوة في الركب
غباشي، ساعدنا بالترجمة ياخ.. دكوة شنو ورُكب شنو!
بحضره وارجع ليكم
انا طبعا مشيت اخدته حقنه، خلتني انوم زي الترتيب.. الدكتور قال لي يومين وحتبقي تمام... يعني السبت باذن الله برجع للرياضة (ياااااااااااااي..) طلع عندي شد في أربطة الكتف.. شعلقوا لي يدّي... وادوني كمية من المخدرات ... الحمدلله، كانت حالة أخير منها الفلس!
Quote: الجملة دى اثبتت لى ان يونس شلبى قاعد كنب (على قول ناس اليوم الحار) و ما ناقش حاجه.
يا اسمارت امبارح واجهت يونس شلبى بكلامك ده و كبرته شوية عشان اهيجه قلت ليته صاحبى قال انت ما ناقش حاجة وانك كضاب.. قال لى صاحبك ده دكتور ...قلت ليهو لا .. قال لى يعنى هو مثلى كده بجتهد... قلت ليهو ايوة ... قال لى بالمنطق كدة انت مش ملاحظ ان تواجه صعوبة الان فى فقدان الوزن قلت ليهو ايوة ... العشرة ارطال الاولى كانت ساهلة ... قال لى انت ملاحظ انك بتعرق فى راسك اكتر قلت ليهو ايوة .... قال لى اضغط على بطنك باصعبك ..مش ملاحظ انها hard and not mushy زى ما كانت فى البداية
قلت ليهو فعلا ....
قال لى دلوقت صعب تفقد وزن لانك تتخلص من الدهون وهى اصعب من الموية ....
قال انت انت كمثرى ولي تفاحة وده نوع تخفبف الوزن عنده اسهل ....
المهم اقنعنى عديل ....
وقتى ضايق بجيك راجع
12-09-2011, 01:42 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
النصري أنا من رأي مريم اننا نطلع الخلا او نروح القسم. طيب، انت او يونس شلبي، واحد فيكم راسوا لافي. جهز روحك لبري اساااااااسي. الحالة اللي انت فيها دي من صعوبة نزول الوزن بعد فترة من الرياضة و نقصان الوزن اسمها weight-loss plateau كلام يونس شلبي عن انك كنت بتنقص ماء ما غلط. لكن ما صح تماماً. انت لما نقصت أكلك و بقيت تتريض جسمك بقي يأخذ الطاقة المحتاجها من حاجه اسمها: glycogen, a type of carbohydrate found in the muscles and liver. المشكلة ان النشويات اللي في الكبد و العضلات دي فيها موية كتيرة. قصاد كل جرام منها، الجسم بيفقد 4 جرام موية ( ما ضروري عرق) و بعد شوية المتابلزم بتاعتك بتبدا تبقي بطئية. لأنك ما بتنقص فات بس، بتنقص معاها lean tissue الاطباء بيقولوا ليك في اللحظة دي مفروض تفكر، هل انت كده تمام ام عاوز تنقص زيادة؟ اذا عاوز تنقص زيادة مفروض تبدأ بزيادة الرياضة، أبدا بحوالي 15 دقيقة زيادة. او غير نوع الرياضة. او نقص أكلك. انت شخصيا يا النصري أظن الحاصل ليك الان ( من عدم نقصان ) سببه المطعم الهندي و ليس المتابلزم. دي النقطة الأولي. النقطة التانية عن نقصان الفات. نقصان الفات ما بيطلع عرق ( ذي ما قال يونس شلبي). لما تتريض وتأكل اقل جسمك بيحتاج طاقة اكتر من الداخلة من الأكل. عشان يلقي طاقة جسمك بيدا يحرق الفات او اسمها العلمي: (triglycerides). و ده هو اللي بيخلي خلايا الفات في الجسم تنقص و الشحم ( بالسوداني) ينزل. لكن الشحم ما بيطلع عرق
12-09-2011, 03:17 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
قلنا ما بيطلع عرق. طيب ، ليحصل شنو؟ البيحصل يا سيدي ان:: الفات بيتحول ل glycerol and fatty acids و ديل بتمتصاهم الكبد و الكلية و العضلات و من خلال عمليات كيمائية معقدة بيتحولوا لطاقة بيستفيد منها الجسم التفاعل الكيميائي ده بتنتج منه طاقة بتدفي جسمك. و مخلفات التفاعل الكيميائي دي waste بتكون عبارة عن موية و carbon dioxide و ديل بيطلعوا من الجسم عن طريق العرق و البول و الشهيق و الزفير عادي.
الخلاصة في كل الأحوال انت بتعرق موية و ليس فات.
12-09-2011, 03:26 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: قال انت انت كمثرى ولي تفاحة وده نوع تخفبف الوزن عنده اسهل ....
أنا مش قلت ليك ان يونس شلبي قاعد كنب؟؟؟ عموما ( اغلب) الرجال جسمهم تفاحة. بيزيد و زنهم و بيتوزع في الجزء العلوي من الجسم . و اغلب النساء جسمهم كمثري، عشان كده بيتراكم الفات عندهم في الجزء الأسفل من الجسم. و عشان كده الرجال اكتر عرضة لأمراض القلب.
كفاية بري؟؟؟
12-09-2011, 10:19 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
ما تشيلى هم...ان شاء الله كلو يكون تمام . بعدين اسبوع واحد ما مشكلة. المهم انك عارفه الحصل فى الاسبوع ده ....و جاهزة للاسبوع القادم ان شاء الله. ___________________________ كيف المخدرات????ان شاء الله لسه مبسوطة و high تعرفى انا مرة ادونى مرفين لمدة اسبوع....كان حاجه كده خرافية. اول ما تجى مواعيد الحبة بابدا (اتكرش) ذى مدمنين المخدرات. بعد الحبة بحس بسعادة و راحة كده ما حصلت.
والله يا اسمارت انا كتبت المداخلة الفاتت بسرعة البرق لضيق الوقت....
كلامك برضو معقول ومنطقى وفيهو مهنية عالية.... يونس صاحبى واضح عليهو زول بسيط بستمد كل معلوماته من برامج التلفزيون وطبيبه الخاص .... هو متابع جيد لبرامج biggest loser
للاسف ايامى معاهو بقت معدودة جدا فهو حيسافر لجزيرة الدومينيكان بصحبة ابنته وعند عودته سنبدا ال signup الجديد .. هو حيشتغل الصباح بدرى ودوام واحد حيمشى لصالة رياضة (جيم) مختلف... شغله يبدا الرابعة صباحا وينتهى 12 ضهرا ,, انا حابدا 11 صباحا ودوامين (11 الى 1 ظهرا وبعدين 3 الى 8 مساء) ساحاول اقنعه اضع صورته هنا فى البوست .... يونس ليهو 21 سنة فى الترانزيت ...وعمره 49 سنه هو مخطط يتقاعد بعد 7 سنين على عمر 57 سنة.. حينها حيستحق التقاعد full package بالنسبة لى انا محتاج اشتغل 15 سنة حتى احقق ال 85 factor 20 سنة شغل + 65 العمر = 85
اذا اتقاعد قبل تحقيق ال 85 معناتها خصومة من المعاش تصل ل 3% من كل سنة ناقصة.. يعنى لو ناقص لى 15 حافقد 15% من قيمة المعاش ....
قلت لى زكاة يا اسمارت .... بس البقعد القروش للحول شنو؟ دى بتتصرف قبلما تنزل فى الحساب زاتو.. قريب 85 قراند وتعريفة ما قادر اوفرها.... بلد صعبة خلاص ......
200 جرام.. حُمّي خفيفة خالص... لكن قررت احترم نفسي في موضوع الاكل لحدي ما تتحل مشكلة الرياضة.... فطرته بي نص ساندوتش فلافل مع كمية من المخللات (ملحها خفيف) ونص راس بتاع خس وكباية شاي من غير سكّر... الساندوتش برضه فيه ملعقة بتاعت حمّص.. الحمّص ميزته بملا البطن مليه صاح.. الزول اليوم كله بكون شبعان.. وبس شغال يشرب في الموية...
12-10-2011, 01:45 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: كيف المخدرات????ان شاء الله لسه مبسوطة و high تعرفى انا مرة ادونى مرفين لمدة اسبوع....كان حاجه كده خرافية. اول ما تجى مواعيد الحبة بابدا (اتكرش) ذى مدمنين المخدرات. بعد الحبة بحس بسعادة و راحة كده ما حصلت.
والله سطلة سمحه خلاص... اول ما تفك الالم يرجع... لما تكون في اقعد اخطط اقول بكره ارجع لرياضتي، لما يرجع الالم اقول بررررري الموضوع ده لسه!! امس اتشالقته شلاقه بسيطه كده وطبّقته بطانيتين... وعينك ما تشوف إلا النور! غايته انا كعبه مع المرض جداً، وما بقتنع اني عيانه.. وبكون مستعجله ابقى كويسه... عندي عادة كده، لما يكون عندي انفلونزا... وحمى بقوم بصبر عليها يومين كده.. لو ما بقيت كويسه، بقوم استحمى واقشر بي أحلى لبس عندي واسرح شعري واتظبط تمام، واقول ليهم خلاص انا بقيت كويسه... كم ساعه كده والحمى تولع نار وانتكس وابقى اكعب مما كنت!...
12-10-2011, 02:44 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
عندي بعض التحفّظات على الفيديو واعتقد اننا ممكن نناقشها، وهي خاصة بي كم مرة مفروض نوزن... الفيديو بقول يومياً... او على الاقل تلاته مرات في الاسبوع وناخد المتوسط بتاعهم... في ناس بقولوا ليك مره في الاسبوع... في ناس بقولوا ليك مره في الشهر، وفي ناس بقولوا ليك مافي داعي وهو في النهاية رقم بتأثر بي حاجات كتيرة منها كمية الموية في الجسم، الملابس اللابسينها.. وحاجات كتيرة... وبفتكروا انه في حاجات تانية ممكن توري الوزن احسن من الميزان (حأتكلم عنها بعد شوية)...
غايته انا بالنسبة لي الميزان مشكلة... لانه مهما كانت النتيجة بتاعته إلا انه بعمل فيني رد فعل سلبي... يعني لما ألقي روحي ناقصة وزن بتكيف خالص وبنبسط وبتشجع اكتر وبعمل الرياضة تمام وبي همّه... لكن في نفس الوقت ممكن أسمح لي نفسي ببعض التجاوزات في موضوع الاكل... ودي حاجه خطيرة... يعني ممكن ألخبط بي فهم انه اسوأ حاجه ممكن تحصل اني ارجّع النقصته.. وغالبا بعد ما امرق نفسي من الشي الأكلته ده، بحس بي ندم وبزهج من روحي... الحالة التانية هي اني القى روحي زايدة... في الحالة دي بزهج خاصة لو كنت محافظة خلال الاسبوع وبعمل رياضتي وكل شي... وده بحبطني وبخليني اقول انا حارمه روحي على شنو! قد ما اوقّف الرياضة (لاني بستمتع بيها) لكن اجوط الدنيا في الاكل لاني بقول لي نفسي مافي فايده.. في الغالب احسن حاجه ممكن تحصل لي اني اكون واقفه في مكاني... !
بالنسبة لطرق الوزن... لقيت الطرق دي... وممكن أضيف عليها كمان طريقة القياسات .. الوسط الأذرع الكرعين ... إلخ.. مروان أخوي من 120 كيلو، بقى وزنه كم وسبعين كيلو... وبقى fit جداً ما شاء الله عليه... كان بشوف الميزان لكن ممكن مره كل كم شهر.. الموضوع اخد منّه سنة ونص إلتزام... ببساطة اتخذ القرار وطبّقه... وإلى الآن منتظم في رياضته وبطبخ لنفسه أكل صحّي دايماً.. نرجع لطرق الوزن أو ملاحظة نقصان الوزن
Quote:
Clothing: You know how it feels to put on a skirt or dress youve been unable to wear for a year? Nothing is better than being able to comfortably fit into that article of clothing that you considered giving away because you never thought youd be able to wear it again!
Attitude: When you begin to eat better and exercise more regularly, you will find yourself feeling more positive about the changes youre making. Having a positive attitude plays a large role in keeping you motivated and moving forward. Feeling positive allows you to make more decisions that are positive!
Taking Up Less Space: Before I lost 50 pounds, I always felt like I took up an unusual amount of space wherever I went. Whether it was a party, a meeting or work, I always felt that I took up more space than anyone else there. Once the body and the weight start changing, suddenly the space you take up seems much smaller. Getting into your car, getting on the train, going to the movies or flying. Any of those venues can give us a feeling of taking up a lot of space. Once your nutrition is healthy and your daily activity increases, those spaces will magically seem to have more room!
Active Participation: I dont know about you, but before I lost my weight, going anywhere with friends or family was dictated by the amount of exertion involved. The thought of long walks, or heaven forbid, climbing something, was an immediate, No thanks. Once I started practicing a healthier lifestyle and my body began to respond, I wasnt as reluctant to try new things and go places.
Friendly Comments: The best part of changing your lifestyle to healthy eating and daily activity are the comments youll begin receiving from others. Being told, You look great! goes a long way in reminding us that our efforts are well worth it.
شاهدت الفيديو يا مريم ..فعلا مفيد جدا... حاغير طريقتى مع الميزان .. بدلا عن مرة فى الاسبوع او العشرة يوم حاوزن نفسى يوميا... مشلكتى مع الوزن اليومى انى زول بتاع نتائج وبفضل اسعى لهدفى مباشرة واشوف نتيجة المجهود المبزول لتحقيق الهدف... بالاضافة انى ميزانى ت*افه وداير اشترى واحد جديد بس كل يوم اقول بكرة ....
45 يوم اتبقت للاجازة وبديت افقد الامل فى تغيير كبير يعنى بالكتير ممكن افقد 10 رطل وانزل ل 260 بدلا عن 200 رطل المرجوءة
غايتو البركة فى اللياقة العالية التى استمتع بها الان والالتزام المعقول بالرياضة 5 يوم فى الاسبوع
12-11-2011, 01:18 PM
Mohammed Elhaj Mohammed Elhaj
تاريخ التسجيل: 12-12-2004
مجموع المشاركات: 1670
يعني اليومين ديل موضوع الوزن والرياضة عاملين لي قلق شديد ولميت في البوست دا ... صدفة غريبة انا يا سمارت وزني 102.2 كيلو وطولي 186 سم (ترجموها لي ارطال وأقدام) الTarget بتاعي وزن 90 كيلو وبعدين نشوف نواصل لي 85 ولا نقيف قبلنا، عموماً الواحد بياكل اكل صحي بس المشكلة الرياضة ... يادوب مرة في الاسبوع والمشكلة الاساسية الزمن الزمن الزمن .....
يا دكتورة نجاة محسوبك اخصائي غدد متخصص شديد في الغدة الدرقية :D طبيعي بعد ما شلتي الغدة وزنك يزيد لأنك خلاص باي باي ثايروكسين طبيعي الفكرة الاساسية انك تكوني بتاخدي جرعة صحيحة من الثايروكسين والمهم جداً برضو انك تعملي جك للثيروكسين profile T3, T4 & TSH كل 4 لي 6 شهور عشان تعدلي الجرعة البتاخديها اذا طولتي ما جيكتي امشي لي دكتورك وأعملي الفحوصات وشوفي لو انتي قاعدة تاخدي جرعة كافية من الثايروكسين...
شكراً يا شباب وشابات البوست جميل وحأعسكر فيهو
12-11-2011, 02:32 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: شاهدت الفيديو يا مريم ..فعلا مفيد جدا... حاغير طريقتى مع الميزان .. بدلا عن مرة فى الاسبوع او العشرة يوم حاوزن نفسى يوميا... مشلكتى مع الوزن اليومى انى زول بتاع نتائج وبفضل اسعى لهدفى مباشرة واشوف نتيجة المجهود المبزول لتحقيق الهدف... بالاضافة انى ميزانى ت*افه وداير اشترى واحد جديد بس كل يوم اقول بكرة ....
أنا زيك كده يا النصري... عايزه نتائج... عشان كده حأقوم أعمل عكسك... حأدي نادر الميزان يدّسه منّي لمدة شهر... وحأعتمد على الملابس بتاعتي... الأرقام دي مرات بتكون ضاربه والله... وبتقوم تخليك تزهج وتتضايق وتدبرس... بعد شهر ممكن أشوف الوزن واتفاجأ.. :D.. بس الله يحلني من كتفي ده.. والله حالف ستين يمين ما يبرا !!! واعاين للtreadmill عشرة عشرة... مغيوووووظة عشان ما قادره أستخدمه... هدا نادر شاري فيه البشكير بتاعه لوووووووووول... لكن بجيب ليك الصورة الطلبتها أكيد...
Quote: 45 يوم اتبقت للاجازة وبديت افقد الامل فى تغيير كبير يعنى بالكتير ممكن افقد 10 رطل وانزل ل 260 بدلا عن 200 رطل المرجوءة
انت يا النصري ما تبالغ في الاهداف عشان ما تقوم تحرد القصة... غايته يونس شلبي في موضوع الوزن ده كلامه صح.. يعني انت فعلا في البداية بتنزل سرييييع، بعداك النقصان ببقى أقل... اهم شي الاستمرارية... مروان أخوي (ياخ انا فخورة بيه والله عشان كده بجيب سيرته كتير)... نجح في انه يصل الوزن العايزه في سنة ونص... ونقص ليه تقريبا كده 40 كيلو... لو ما هو صبر على الموضوع ده، ولازال محافظ، كان ما نجح ولا استمر في النجاح... انت اقبل الحاجه دي باعتبراها تغيير دائم...
غايته انا كتفي دي معاها ليوم الأربع، بقت كويسه بقت كويسه، ما بقت كويسه بتريض يعني بتريض!
اهلا وسهلا بمحمد الحاج فى عالم الخاسرين.. نتمنى ليك اقامة طيبة وخسرانا مبينا...
اهم شئ عندنا الالتزام....(فى ناس كتار ظهرو هنا واختفو مرة واحدة)
اكيد بتواجهنا لحظات بتاعت احباط و ياس و شعور بالفشل لكن بمواصلة الكتابة هنا الواحد بدخل فى حتة بتاعت التزام معنوى بساعده على مقاومة الاحباط.....
Quote: انا يا سمارت وزني 102.2 كيلو وطولي 186 سم (ترجموها لي ارطال وأقدام) الTarget بتاعي وزن 90 كيلو وبعدين نشوف نواصل لي 85 ولا نقيف قبلنا، عموماً الواحد بياكل اكل صحي بس المشكلة الرياضة ... يادوب مرة في الاسبوع والمشكلة الاساسية الزمن الزمن الزمن .....
غايتو لو داير تنزل 12 كيلو (26 رطل) عليك بالاجتهاد الشديد والتضحية بحاجات كتيرة اهمها توفير الزمن ....
انا شخصيا ال 24 ساعة فى اليوم ما بتكفينى بين شغل وبيت (ماعندى اجتماعيات نهائئ لا ازور احد ولا يزورنى احد بسبب ضيق الوقت) بس مشكلتى بحتاج ل 8 ل 9 ساعات نوم ....ولو نقصت ساعات النوم بكون اليوم كله مدروخ..
لازم توفر زمن ...لازم ..لازم ...لازم... انا شخصيا يوميا بتريض 30 دقيقة فى اليوم 5 مرات فى الاسبوع وهى ما كفاية ونتائجها بطيئة جدا الجماعة فى الجيمنازيوم قالو لى اتريض 2 ساعة فى اليوم وحتلاحظ الفرق بسرعة بس المشكلة الساعتين ديل يلقوهم وين!!
غايتو خليك فى الصورة شجعنا ونشجعك
12-11-2011, 10:07 PM
Mohammed Elhaj Mohammed Elhaj
تاريخ التسجيل: 12-12-2004
مجموع المشاركات: 1670
سوري يا جماعة على الدخلة بالعرض في بوستيكم الجميل دا انا قريت الصفحة الأولي ومريت بالتانية وجيت ناطي في الرابعة بعد مشيت فيها حسيت بالرأسمالية الطفيلية عديل كدا، عموماً يا النصري مريم وصحبتا سمارت لما يلمو في أي بوست بيخلوهو جميل واكتشفتا انو قاعد اتابع بوستاتك انت زاتك، حركة التداعي البتعملوها وبرامجكم اليومية برضو جميلة، البوست ليهو زي اربعة شهور وفيهو معلومات حلوة والناس بتشجع في بعضا فياريت تسمحوا لي (امدد اقامتي في هذا البوست لووووووول)، الأيام الفاتت قمنا على موضوع الوزن حقيقة يا مريم الموضوع وراهو نوال لأنها حاسة انها اوفر ويت شديد بعد الحادثة :D زي ما بتقول، أنا لقيتا فرصة عشان انزل الـ 12 كيلو المعذبني ديل، عملتا بي ايعاز منها الرجيم ال######## بتاع يوم خيار ويوم زبادي ويوم تفاح ويوم فراخ مشوي أو مسلوق بنهايتهم كرهت الأصناف المذكورة أعلاه كلها وما نزلتا غير نص كيلو :(، الأكل زي ما قلتا في المداخلة الطفيلية الأولى ما بطال بشرب معلقة سكر واحدة اذا الكباية صغيرة ول جردل ما بزيدا، حالياً بقيتا نص كمان بس مرات الاوفيس بوي بيتبرع ويعملا لي معلقة في القهوة، المشكلة انو الرياضة مافي ليها سكة مع الشغل والقراية ام دك يعني بعد الواحد يرجع 9 البيت يعمل شنو؟
شكراً يا شباب اول مرة من فترة الواحد يكتب في البورد بمزااج
12-11-2011, 10:23 PM
Mohammed Elhaj Mohammed Elhaj
تاريخ التسجيل: 12-12-2004
مجموع المشاركات: 1670
شكراً يا نصري على الترحيب وآمييييين على حكاية الخسران دي، وبالنسبة للالتزام فيا سيدي دي بسيطة كل يوم نفتح البوست عشان نشجع ونتشجع بعدين ال12 كيلو بتاعتي دي كترتها لي بالارطال بتاعتكم دي يا امريكان بس كمان ميزتا انو بدل تكون نزلتا 500 غرام بتقول رطل عديل كدا وال26 بتبقى 25 اهو البوزيتيف سايد وكدا ... قلت لي مافي اجتماعيات طيب وزولك بتاع المطعم الهندي دا كيف هههههههههه ، بالمناسبة انا برضو كدا في موضوع النوم برغم انو بنوم ما بين 5 لي 6 ساعات في اليوم لكن لما تنقص اكتر بكون ما قادر اركز تاني يوم ، حكاية لازم توفر زمن دي غايتو نباصرا ... نقول في الويك اند ساعتين + ساعتين وفي اليومين الأوائل من الاسبوع ساعة + ساعة كدا كيف معاك؟ اعتباراً من بكرة دا (تهور شديد غايتوباقي الأيام صعب لأنو من الصباح برجع 9 مسا مفروض شوية وكت لي ليلى وأمها وساعة كدا قراية، سلامات فور ناو يا النصري ونشوف كدي ساعة بكرة دي نعمل فيها ايه...
12-12-2011, 04:02 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
مرحب يا محمد... واهلا بيك مع الloosers... احلى مافي البوست ده انه الزول بكون في كرسي الاعتراف... والله وانا بجوط في الاكل بتذكر اني مفروض اجي اكتب هنا، بقوم احترم نفسي.. على صعيد آخر بخاف جدا انه البوست ده يقيف... عشان كده بمشي افتشه كل ما يرجع ورا...
قول لنوال، العجب لما الزول يعمل حادث مرّتين ههههههههه.. بس نصيحتي، والله الcrash dieting مشكلة ابعدوا منو.. وامسكوا في الرياضة والportion control... وmore protein less carbs....
يلا ورينا الهمّة... انا عندي إصابة ملاعب.. اول ما ابقى تمام بواصل رياضة..
حأبدأ أتكلم عن المفاهيم الغلط في الثقافة السودانية في موضوع الوزن... أول حاجة
النصرى...كلنا ح نفقد يونس شلبى...نتمنى ليه اجازة سعيدة. عن المعاش...ما تشيل هم. السنين بتجرى سريع. بكره تلاقي روحك جاهز من كلو للمعاش (خرف و قروش....ان شاء الله) حاجه تانية يا النصرى...ما تفقد الامل. واصل فى برنامجك...حتى فى الاجازة. لما تعمل عضلات كويسه ...حتى لو ما بتتريض جسمك بيحرق سعرات حرارية اكتر.
اهلا....اهلا...اهلا محمد الحاج كلام مريم صح. ما تعملوا رجيم ما بتقدروا تعملوه style of liffe و كلنا هنا عاوزين نعيش بصورة صحية و ناكل اكل صحى و نتريض بالنتظام حتى بعد ما نصل ل(وزن الاحلام) بتاع كل واحد فينا. موضوع الزمن فعلا مشكلة كبيرة. لكن ممكن تبدا ب 20 دقيقة فى اليوم. لانك ما عنك زمن حاول اجرى. الجرى بيخليك تخلص سريع سريع. لو عاوز تحول من كيلو لرطل اضرب فى 2.2
كيف يا مريم كتفك الان? ان شاء الله احسن. ما تستعجلى...كلو ملحوق. لو عاوزه ممكن تمشي بسرعة بطئية فى التردمل. Don't over do it براحة براحة. و لو حسيتى بكتفك وجعك اقيفي على طول.
12-12-2011, 08:26 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
لا حولا .... يا اخوانا والله انا قبل شوية فطرت فطرة تعتبر نوع من انواع التعذيب... حرشنى يونس شلبى مشيت اشتريت خضارات مجمدة اسمها California style واشتريت معاهو صندوق بتاع بيض منزوع منه الحمرة (اعتقد زمان كنا بنسميها المح ..بكسر الميم) اسمه فى البقالة egg whites
عملتو بالمايكرويف ما نفع عملتو بالطوة ما نفع,, الخضارات نفسها طعمها علف علف .. غايتو لقيت روحى شبعان فى النهاية...
اليوم كان اخر يوم مع يونس شلبى فى النهاية اتقالدنا وتمنيت له اجازة طيبة وتبادلنا ارقام التلفونات ... الحاجة الكويسة انو وافق ناخد صورة نحن الاتنين بنتريض .. حانزل الصورة لمن القى الوصلة بتاعت البلاك بيرى السجمان ........
يامريم عندى ليك دواء رهيب اكتشفته قبل 15 سنة... سهير سافرت السودان وانا قاعد براى فى البيت .. اليوم كله قاعد فى الكنبة بحضر فى التلفزيون وبنوم فيها اها جانى شد عضلى فى الكتف والضهر من نوع ابوكديس مشيت اشتريت الحبوب دى رهيب لكن اتاكدى انو ما عندو تاثير على البيبى
12-12-2011, 09:05 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
الخضار ده مكسب يا النصرى. و انا باكله طوالى. لكن بعملو stir fry . بجيب الطوة بخت فيها ملعقة صغيرة زيت و لما تسخن بخت فيها الخضار. بخت فيه (حبة ملح و فلفل) او soy sauce (قليل الملح). ممكن تاكله كده بس. او ممكن فى طوة تانية تقطع صدور جداد رفيعة او لحمة رفيعة برضو او شرم (خت البهارات اللى بتحبها فى اللحمة مع ملقة صغيرة زيت). لما اللحمة تنضج (ما شديد). اضيفها للخضار و قلبهم فى الطوة لحدى ما الاتنين يستوا. ممكن اكلها ساى بالملعقة او بشوية ارز. فتش الصوص ده فى السوبر ماركت. بدل البورك اعمل جداد. و اكله بخبة رز
الstir fry من الحاجات الكنت معلّقة فيها فترة طويلة... النديكم وصفتي بتاعي صدور الدجاج... او زي ما بنسميها في البيت، الدجاج الصيني... تجيبو تلاته ألوان من الفلفل الرومي (أخضر واصفر واحمر).. ما ضروري الالوان، لكن لما تتعمل بالألوان بتطلع أحلى بكتير نقطعها شرايح صغيرة، ناس الطبيخ بسمّوها جوليان.. صدور دجاج مخلية العضم والجلد برضه نقطعه صغيرة... مهم جداً انها تتقطع صغيرة لانها بتستوي أسرع ولانه الصدور لو قعدت في النار كتير بتنشف وتبقى تفل.... بصلة متوسطة فصين توم ملح وفلفل وكزبرة وشوية جنزبيل بودره ملعقتين صويا صوص... ملعقة كبيرة زيت سمسم.. ونص ملعقة صغيرة عسل... نكب الزيت ونقلب فيه البصل والتوم ... بعداك نكتب الفلفل.. ما كله، نخلي زي ربع الكمية كده... ونقلب لحدي ما تستوي كده .. بعداك نضيف الصدور... نفضل نقلب لحدي ما تستوي الصدور ونكب البهارات وباقي الفلفل والصويا صوص.. الهدف من تقسيم الفلفل انه يكون كرنشي شويه، احا بنحبه كده، ما ضروري انه يكون كده طبعا... ملعقة العسل تتكب في آخخخخخخخخخر شي... بتتقّل الصوص بتاع الدجاج وبتخليه متماسك مع بعضه.. وما تخافوا ما بظهر أي طعم بتاع حلاوه.... تتقدم مع رز أو مع خبز....
بكره عندي "زنقة" مع المشرف بتاعي لاني كنت فاتحه ليه الفترة الفاتت.. بعد انتهي منّه بجيكم عشان نتكلم عن الmyth number two في الفهم السوداني لنقص الوزن... الرز بسمّن أكتر من العيش...!
ما بتسألوا على أخوكم!! أنا (مهري شغل!!) الحمد لله خلاص على نهاية الأسبوع ده الأمور حترجع لي طبيعتها والواحد ممكن يتنظم تاني.
الناس النقصوا مبروك ليهم وابتهال كديسة المطعم الله يهديها.
أخبار الرياضة تقريبا ما في جيم بس الفترة الفاتت بسرق ساعة كل يوم ثلاثاء وجمعة بمشي ألعب كورة (دافوري) مع الشباب الساعة 8 بالليل .. أحلى حاجة إنو كلهم فاقد تربوي (عواجيز)... الحمد لله تقريبا محافظ على الأكل بس آخر ثلاثة أيام بديت آكل خبز يعني خبزاية في اليوم كدة ..
سمارت اتذكرتك في الويك إند كانو جايننا ضيوف سودانيين المدام قالت لي أمر أجيب حلويات أول ما شفت البسبوسة قعدت أضحك وأبشرك اتحججت بالضيوف اشتريت منها كيلو عديييييييييييل وكل يوم باكل لي منها بوصة × بوصة!
أنا برجع ليكم تاني عشان أعلق على البوستات في حاجات كتيرة الشمار كاتلني فيها.
اهلا امير مشكلتك بطول الغيبة لغاية ما ننساك وتجى راجع... غايتو كل مرة ارفع البوست على سريع عشان نعرفك حى....
يا اسمارت السلطة دى حسب كلام يونس شلبى مفروض تتاكل بدون زيت.. غايتو حاحاول بعد شوية اقليها بالموية واضيف ليها بهارات وشوية جبنة بيضاء عل وعسى .......
اغرب حاجة حصلت الصباح... لاول مرة اوزن نفسى يومين وراء بعض وما كنت متوقع اى تغيير لكن فوجئت بالميزان قرب يصل 265 رطل مع انو يوم امس حصلت فيهو تجاوزات.. بعد اكلت السلطة(العلف) شعرت بالشبع مؤقتا لكن بعد مدة رجعت جعان اكتر من الاول فتحت التلاجة وعملت لى 2 سندوتش بتاع مارتدلا كما ظاهر فى الصورة
لمن رجعت من الشغل الساعة 5:30 مساء لقيت سهير جابت لوز almond
اكلت منو وتميتها سيريـال وقرضت على كده لمن صحيت الصباح واخدت دش كارب اتفوجئت لمن الميزان نزل اكتر من رطل فى 24 ساعة .... فى حاجة ليها تاثير..حاحاول اعيد التجربة اليوم واشوف البحصل شنو ياربى يكون ده اللوز almond ؟ ولا المارتدلا؟
اليوم برضو نسيت شنطة ملابس الرياضة وبالتالى لم استطع الجرى عشان كده مشيت صالة الرياضة و اشتغلت باحدى المكنات بهدوم الشغلة المكنة تظهر فى الصورة ادناه
بديت ب 10 كيلو ووصلت الى 250 كيلو
12-13-2011, 06:47 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
امير....وينك يا رجل? اهم حاجه انك ما تحرم روحك. اكل اى شيء نفسك فيه...بس ما تنفعل. البسبوسة بوصة × بوصة....افتكر مناسبة.
مريوم الاستير فراى فعلا ظريف...و ممكن تنوعى منه ذى ما عاوزة فى الخضار و فى اللحم.
النصرى....كلام يونس شلبى صح...اكيد افضل من غير زيت (سعرات حرارية اقل). لكن ذي ما انت شفت...بعد شوية جعت شديد. لو ختيت فيهل زيت زيتون كان ح يكون احسن. عارفه ليه? 1-ان زيت الزيتون صحى (مفيد للجسم). 2-لانه فيه فات ...بيتهضم فى وقت اكتر. بالتالى معدتك بتحون حاسه انها مليانة فترة اطول. 3- غير ان طعم الخضار بيقبى لذيذ جدا و ما بتحس بالتعاسه. ده كله ما بيستاهل تخت معلقة صغيرة زيت زيتون ??
ال الالموند برضو مفيد جدا. بس ما تاخد راحتك فيه. 10 قطع كفاية جدا. ما قلت لى بتاكل اى نوع من السريال??? فى انواع فيها اطنان من السكر. اعمل حسابك. ما تنقطع من الرياضة يا النصرى...و ذى ما قلت ليك لو حافظت على الاكل ممكن تستمر تنزل وزنك حتى برياضة اقل. لان جسمك بنى عضلات و للعضلات بتحتاج طاقة اكتر
12-13-2011, 07:29 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
الكلام بتاع انه الرز بسمّن اكتر من الخبز ده ما دقيق وما غلط تماماً، يعني حسب نوع الرز المستخدم، الرز العندنا في السودان بنستخدمه هو الرز المصري، كله نشا .. والنشا ده لاعب خطير في موضوع الكالوريز.. عشان كده الواحد لو وجد بديل زي الرز البسمتي الاقل في النشا او حتي الاحسن لو لقي الرز الاسمر الغني بالالياف بكون في وضع افضل (حارجع لموضوع الاسمر ده)، المفاجأة انه الخبز والرز المصري متقاربين في عدد الكالوريز ألفي كل كمية متساوية منهم، يعني 45 غرام من الرز المصري فيها 160 كالوري و45 غرام من الخبز فيها 138 كالوري... ببقى الفرق في الحجم، والسؤال الذي يطرح نفسه، هل 45غرام من الخبز كافية عشان الواحد يقول كده تمام؟ احنا شعب بحب العيش جداً، وبالنسبة ليه اهم شي، علي قول سمارت، بناكله مع المحشي! بالنسبة للاسمر، برضه مهم نعرف انه من ناحية كالوريز، الخبز الأسمر او الرز الأسمر مافي فرق كبير بينهم وبين الابيض الا في كمية الألياف، يعني نفس عدد الكالوريز بس وجود الألياف مفيد جداً في انه يخلي الواحد يشبع اسرع ده غير انها مفيده في الهضم .. قصة أخيرة كنت بشوفها في السودان، وهي موضوع لب العيش.. مافي فرق بين لبة العيش وقشرتها.. الا في اللون، في بعض انواع العيش بكون فيه ردّه (ألياف) في القشر، لكن الكنت بشوفهم بياكلوا القشرة والخبزه بتكون عادية جداً وبرضه بياكوا القشر ويخلوا اللب..
المره الجايه نتكلم عن الفول السوداني المظلوم.. والمكسرات عموماً
يا مريم حليل الرز وحليل الرغيف والله كانت لها ايام... انا كنت اسوأ سودانى فى اكل الرغيف .. بمشى البقالة وبشترى العيش الابيض وباكله فى كل الوجبات وبكميات كبيرة دلوقت بستغرب ليه مع كل الاستهتار داك وزنى ما كان بزيد شديد مع انى كنت ما بتريض خالص ولا بعرق ولا بمشى ... غايتو ربنا كان حافظنا ساى ...
بالنسبة للرز ..اصلا انا ما بحبه وما مفتون بيهو زى سهير.... ممكن سنين ما اكله وما اتزكره زاتو.....
بالنسبة للموية الباردة انا متاكد بتعمل كرش وبتكبر سعة المعدة ما عندى دليل لكن كلما اشرب موية كتيرة اشعر بمعدتى اتمددت وكبرت... انا سمعت انا الناس الضعاف معدتهم صغيرة ولمن ياكلو المعدة بتتملى بسرعة اما الناس البتشرب موية بارده كتيرة فديل معدتهم ممكن تستقبل كميات طعام اكبر والله اعلم
ويا اخوانا وبما انو يوم الليلة ما قدرت اخد نومة الضهر بسبب مواعيد مع المحامى لتسوية قضية امين ولدى فى حادث الحركة الخفيف الذى تعرض له فى يونيو الماضى ... قلنا نبراكم شوية..
اكتشفت اليوم اكتشاف رهيب جدا خلانى احمد الله اكتر واكتر واكتر....
تزكرو لمن داير ابدا الرياضة مرة اتعذرت بانى بطنى قلبت .. مشكلة قلبة البطن دى كانت ملاوزة لى شديد ولفترة طويلة ..فجاة اشعر اننى لازم امشى الحمام وبسرعة (احيانا الانذار لا يزيد عن 5 الى عشرة دقائق) كنت لا اعرف السبب ..راقبت اكلى وماعرفت السبب وراء الظاهرة دى (طبعا الوكت داك ما كان عندى قشة مرة ..اى شئ بقع فى عينى بقشو ...دهن ..زيت ...سمن....سكر..طحنية زبدة...قشطة you name it)
اها الحالة بقت مشكلة ..مع انى زول صحى بصورة عامة وما عندى مشاكل هضم وكده الا ان مشوار الحمام ده بقى هاجس مرات كتيرة بكون شايل معاى بيبتوبسمل بس عشان اشترى زمن يوصلنى اقرب حمام ... مرات كتيرة بكون سايق البص وهو مليان لاخره والحالة تجينى....
المهم بعد بديت البرنامج بتاع الرياضة والدايت الظاهرة دى اختفت تماما اظن اخر مرة جاتنى لمن اتعذرت بيها فى البوست منتصف بداية سبتمبر(3 شهور كاملات) وهى حاجة اصلا ما حصلت قبل كده .....
الحمدلله الذى هدانا وما كنا لنهتدى...
غايتو كل يوم الزول يكتشف حاجة جديدة
12-14-2011, 11:13 AM
Mohammed Elhaj Mohammed Elhaj
تاريخ التسجيل: 12-12-2004
مجموع المشاركات: 1670
سلامات يا شباب يا مريم رسلت ليك سلامات مع نادر وصلتك؟ :) ايوة نحن مقتنعين بي كدا، بس حركة الرجيم القلتها ديك كانت مؤقتة كلها 4 أيام ونرجع للوضع الطبيعي، شكراً يا سمارت على الترحيب والنصائح، دخلنا من الأحد في زون الرجعة المتأخرة عليه مافي رياضة لحدي يوم الجمعة، عموماً العزاء انو مافي لخبطة في الأكل، أنا لي سنة وشوية في السودان .. عموماً الكنترول على موضوع الأكل في البيت ممكن لكن في المكتب لما الواحد ما ياخد معاهو أكل من البيت بتكون مشكلة كبيرة لأنو اذا سندوتشات معناها العيش العيش هسة من قبيل محتار اكل شنو ... طبعاً يا مريم احبطيني بي انو الرغيف البراون مافي فرق بينو وبين الأبيض لأنو لي مدة مدور فيهو طبعاً برضو حسيت فعلاً بي فرق في مسألة الهضم دي فعلاً بيفرق من الرغيف الأبيض.. مشكلة السودان برضو انو لما تطلب سندوتشات مافي خيار في نوع العيش أبيض بس ، أمس نحجت في مقاومة الطحنية لووووووووول
محمد ازيك.. والسلامات وصلت تب... :)... قلت لي أحبطتك... احنا طبعا في البيت بناكل بس الاسمر... حمودي بياكل الابيض رغم انه الاسمر قيمته الغذائية أكبر... وبنجيب مكرونه سمرا.. اظرف شي لما عمتو جاتنا ادتنا ليك شكله انا ونادر، قالت لينا انتو عايزين تضعفوا، محمود ده زنبه شنو.. قدر ما حاولنا نقنعها انه (السُمن) واحد وبي الاسمر الزول بسمن لكن التابو بتاع انه ده حق ريجيم كان اقوى... والله انا بحسّه أطعم كمان من الابيض... بعدين الابيض بذوب كده، الزول بياكل منّه كميّات كبيرة بدون ما يحس...
Quote: أمس نحجت في مقاومة الطحنية لووووووووول
ياخ دي من ابرز انجازات الثورة لحدي الآن... لكن ما تقاومها تماماً.. يعني اسمح لي روحك بقطعة صغيرونه زي ناس بوصه x بوصه ديل.... لكن ما كل يوم كمان... يعني أمرق نفسك منّها...
يا النصري ياخ ما تجيب لي كلام الاحساس ده.. اديني دليل انه المويه البارده بتعمل كرش... انا اديك تجربة، اخوي مروان، قديتكم بيه موش ، اها مروان ده كان زيي كده ما بحب المويه البارده، أصلا احنا امّنا معودانا على كده عشان كانت بتخاف علينا من اللوز... المهم، مروان مما بدا برنامجه بتاع التإنسان رخيص بقى يخت ليه قزازه في التلاجه بتاعت مويه... وبخليها نوع تقرّب تبقى تلج كده.. ويلا يشربها... مروان كان عنده كرّوشه... حسي ما شاء الله six packs ما تديك الدرب.... حأستأذنه وانزل صورته هنا لو وافق... الصورة بتاعت الbefore والafter... وحأخليه يورينا كمان عمل شنو عشان ينجح...
يا النصري... برضه عندي تعليق على قصة الوزن... طبعا الرقم بتاع الميزان لا يمكن يكون واحد يومي.. ودي هي المصيبة.. يعني النقصان القلته ده ممكن يكون اختلاف في كمية السوائل في الجسم او الغازات او اي شي تاني... والمشكلة انه مجال الاختلاف ده كبير.. ممكن يصل لحدي 2 كيلو (اسألني انا، مره أخدته لي خلعه زي دي..!)... الشي القالته لي سمارت انه لا يمكن تنقص كتير كده في وقت قليل ومما ممكن تزيد كتير كده في وقت قليل... عشان كده انا قررته القرار بتاع الوزن مره في الشهر... عشان الرقم قاعد يحبطني والله... ومرات يرفع لي معنوياتي.. يعني لاعب بي كوره! انا طبعا لسه ما طبّقته القانون بتاع الوزن مره في الشهر، حأطبقه بعد ما ارجع لرياضتي... حسي انا اول الاسبوع موش كتبته اني زدته 200 جرام، بعدها بي يومين لقيت روحي زايده كيلو ونص!!! الليلة لقيت روحي ناقصة كيلو!!! عشان كده احسن حاجه الزول يعملها هي انه يتابع لبسه ويوزن مره مره..
بالمناسبة الفيديو الختيته بتاع الزوله النقصت 282 رطل دي عجبني فيه انها كانت بتخت أهداف قريبة.. الفيديو بقول إنها كانت بتخت لي روحها 5 رطل كهدف تصل ليه، بعد تصل ليه تاني بتخت 5 رطل... ياخ زوله رهيبه.. دي نقصت ليها وزن زول عديل كده!
سمارت، قلتي لي حتشتاقي ليونس شلبي ، غايته تلقاك فرحانه فرح... كان خارب ليك خراب شديد...
أمير ازيك... عليك الله شنو سمينين... قلنا losers خليك ايجابي...
ياخوانا غباشي وين!؟
The debate over الأكل بالليل ... زي ما سمارت قالت القصة بتاعت نقصان الوزن دي ببساطة معادلة بتاعت عدد الكالوزي الداخله، وعدد الكالوريز المستهلكة، لو في فايض بتخزن على شكل دهون.. القصة كلها بتبقى في انه الزول يمنع روحه كيف من انه يدخّل كالوريز زياده على جسمه، ويزيد النشاط بتاعه بحيث يحرق زياده الكمية الداخله، وبالتالي ينقص وزن من الدهون المخزّنه عنده اساساً... ما مهم جداً متين الكالوريز دي اتأكلت.. يعني اكلتها في الفطور ولا الغدا ولا العشا، المهم المجموع الكلي كم... طبعا ده منطق الناس البقولوا الاكل بالليل ما بسمّن... لكن للأسف في أبحاث طلعت زي دي http://www.nytimes.com/2011/05/17/health/17really.html?_r=1 بتقول انه في علاقة بين الاتنين، رغم انه العلاقة ما واضحة للباحثين... معظم الابحاث الاتعملت كلها إحصائية ومبنيه على عيّنه وتجارب، ومافي تفسيرات فسيولوجية محدده... لكن الكلام ده عجبني...
Dr. Turek notes that humans evolved from a situation where they ate and foraged between sunrise and sunset. “After sunset, there were no refrigerators, no food just hanging around,” he said. “You didn’t eat. But today, people eat most of their calories after sunset.”
في النهاية، احسن شي الزول ممكن يعمله انه من بدري يوقّف اكل .. او يقلل اكل... ويعمل بالمثل البقول Eat breakfast like a king, lunch like a prince, and dinner like a pauper..
If you are familiar with the phrase "Eat breakfast like a king and dinner like a pauper" then you are familiar with the idea of tapering your calories.
What this means is that you should eat your larger meals earlier in the day, i.e. eat your first meal like a king. This gives your body a chance to burn those calories that you just ate.
Eating most of your carbohydrates, such as cereals, breads and fruit, earlier in the day is recommended as the body does not need them to be eaten at night: you've already got a full days storage of carbs in your body.
Dinner should be your smallest meal and should be mostly protein with some complex carbs, such as vegetables.
There is popular advice that says "don't eat anything after six". This is basically the same idea about tapering calories but it should not be taken as gospel.
While you may eat after six in the evening and still lose weight, watch what you eat and don't eat too much of it or you will taking in calories that your body doesn't need and will just store.
الموضوع الاول الميزان:- يا مريم انا صباح اليوم اتخلعت خلعة..بعد الدش ..وزنت روحى لقيت الميزان قرب يصل ال 260 رطل المتوقعة فى اسابيع ,,, ما صدقت روحى ,,, نزلت من الميزان وطلعته فيهو تانى ,,نفس القراءة ,, عدت الكرة ,,, نفس القراءة ,,,, قلت لروحى معقول فى 24 ساعة يحصل التغيير ,,,, بعد تفكير عميق وصلت للاحتمالات دى
الاحتمال : كلام مريم فى المداخلة السابقة كله سليم وانو الجسم بتغير نتيجة لتحولات داخلية
الاحتمال الثانى : الميزان خستك ( وده ما وارد شديد لانه الميزان ده معاى من فترة طويلة)
الاحتمال التالث وده البتمناه انو التغيير الحصل فى الاكل هو السبب وراء النقصان المفاجئ فى الوزن ,,لمن راجعت طعامى فى 72 ساعة الاخيرة اكتشفت انو اللاعب الجديد فى قائمة الطعام هو اللوز او الفسدق (ما متاكد اسمه بالعربى) لكن اسمه بالانجليزى هو Almond ..احتمال جسمى كان فيهو حاجات مخزنة ليها فترة طويلة وال Almond ده جاء فكاها غايتو جيت البيت قبل شوية وطوالى مشيت عليهو واكلت ربع علبة صغيرة وبعد شوية نقوم على الفول المظبط بالجبنة والليمون والطماطم بالمعلقة ...
الموضوع التانى: التويوتا
انتهيت من الدوام الاول ومشيت على العربية الكامرى وانا بتكلم مع زبون فى التلفون لاكتشف ان لوحة العربية انسرقت(نحن فى البرتا عندنا لوحة واحدة للعربية فى الخلف) اتصلت بالبوليس وعملو لى تقرير ... وقالو لى امشى اعمل لوحات جديدة ب 22 دولار وممكن تتصل بجهة اسمها مساعدة ضحايا الجرائم وحيدفعو ليك ال 22 دولار.. مشيت مكتب الحركة وعملة لوحة جديدة .. ده اول حادث لى فى كندا (20 سنة)
12-14-2011, 08:41 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: يا مريم انا صباح اليوم اتخلعت خلعة..بعد الدش ..وزنت روحى لقيت الميزان قرب يصل ال 260 رطل المتوقعة فى اسابيع ,,, ما صدقت روحى ,,, نزلت من الميزان وطلعته فيهو تانى ,,نفس القراءة ,, عدت الكرة ,,, نفس القراءة ,,,, قلت لروحى معقول فى 24 ساعة يحصل التغيير ,,,, بعد تفكير عميق وصلت للاحتمالات دى
الاحتمال : كلام مريم فى المداخلة السابقة كله سليم وانو الجسم بتغير نتيجة لتحولات داخلية
الاحتمال الثانى : الميزان خستك ( وده ما وارد شديد لانه الميزان ده معاى من فترة طويلة)
الاحتمال التالث وده البتمناه انو التغيير الحصل فى الاكل هو السبب وراء النقصان المفاجئ فى الوزن ,,لمن راجعت طعامى فى 72 ساعة الاخيرة اكتشفت انو اللاعب الجديد فى قائمة الطعام هو اللوز او الفسدق (ما متاكد اسمه بالعربى) لكن اسمه بالانجليزى هو Almond ..احتمال جسمى كان فيهو حاجات مخزنة ليها فترة طويلة وال Almond ده جاء فكاها غايتو جيت البيت قبل شوية وطوالى مشيت عليهو واكلت ربع علبة صغيرة وبعد شوية نقوم على الفول المظبط بالجبنة والليمون والطماطم بالمعلقة ...
طبعا كلامي صح!!! بعدين الAlmond ده سمارت قالت ليك 10 حبات بس... ربع علبة دي حتتعبك... اعمل حسابك.. ... لكن ده ما بنفي انه من حقك تفرح بي الارطال الoff... برافوووو
وكفّارة السيارة ... والله قبيل خطر لك اسألك عن كندا، ومشيت ليها كيف وتقييمك لتجربتك فيها شنو؟
سلام يا مريم خلاص كندا بقت لينا وطن وما ماشينا اى حته ..زى ماقال واحد صاحبنا من هنا والى مقابر المسلمين .... انا طبعا اكتر سودانى بجاهر انو ما راجع السودان تانى(عشان اعيش) زيارة ممكن لكن عودة نهائية او طوعية ما معانا خالص ...
البلد عندها حسناتها و عيوبها ,,,, حسناتها انو الزول ممكن يعيش كويس ..معزز مكرم..حر فى حركته وسكونه وممكن يطور نفسه لو اراد ... المعيشة جيدة.. الخدمات ممتازة والامن معقول جدا ,, العيوب .....الفلس الشديد ...قدر ما تشتغل ..القروش تروح ضرائب ورسوم.. قبل كدة عملت بوست باسم يوم الحرية من الضرائب وهو يوم 21 يونيو من كل عام وده اليوم الذى يتحرر فيه المواطن الكندى العادى من التزاماته الضريبية,, يعنى ال6 شهور الاولى كل الدخل يمشى للضرائب والرسوم ,, ال6 شهور الاخيرة الدخل كله للمواطن ,,,,, البيوت غالية جدا ..متوسط البيت فى كالقرى حوالى 350 الف دولار مع ملاحظة ان البيت كله من الخشب وكندا اكبر منتج للاخشاب فى العالم ... نفس البيت فى كثير من المدن الامريكية لا يتعدى ال 70 او 80 الف دولار ...
12-15-2011, 07:28 AM
Mohammed Elhaj Mohammed Elhaj
تاريخ التسجيل: 12-12-2004
مجموع المشاركات: 1670
مش بالله يا النصري :) يعني لما تلخبطا مع الزبادي بتبقى حاجة ما تخلص بعدين يا مريم هسة انا زاتي متخيل انو الكالوريز في البراون أقل من الأبيض غايتو الا نشوف يونس شلبي صاحب النصري يفتينا لووووووووووووول بعدين انا بتفق معاك تماماً في حكاية ما تحرم روحك منها تماماً دي ههههههههه كيف؟ لما كنت بحاول ابطل تخين كنت في البداية خالص لما خلاص يعني الخرمة تشعلل في الراس بقوم من آخر علبة بطلع سيجارة وباخد لي نفسين حاجة كدا زي التنفيس عشان تتجنبي الانفجار، ونجحت وأهو لينا سنين منو اعتقد نفس الفكرة ممكن تنجح هنا برضو اللوز Almond (كزهر اللوز أو أبعد) يا النصري أنا قريت في مكان انو لما تحس بي جوعة كدا تقوم تاخد ليك كم حبة لوز كدا بتحسسك بالشبع وعاملين بالموضوع دا دايت جادة، بيقولي برضو نفس الحكاية دي ممكنة بالفول السوداني برضو 5 - 7 حبات بتحسسك بالشبع وخلاص
عندي ليكم صفحة جميلة ساعدتني جداً زمان الصور بتثبت في الذاكرة وحتلقوا روحكم ما عايزنين تضيعوا 200 كالوري في حتة شوكولاتة أو مفن What Does 200 Calories Look Like?
12-15-2011, 11:27 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
سلام للجميع و بالاخص اخونا محمد الحاج عدنا مؤقتاً ... فقدت كيلو و نص و كدة يكون الصافي1 كيلو و المجموع 6 كيلو ... باقي 2 كيلو للتارقيت ... الزنقة بيجاي زايدة قبل اجازة الكريسماس , و الناس كلها بتجهز لاجازة تمام الا انا حاكون شغال بصراحة ما داير احوم تاني قريب و بيني و بينكم كريسماس البلد دي ما داخل لي في راسي, شفتو ليكم كريسماس في عز الصيف حاقعد اواصل التاسك الاخير و اكمل الـ Monograph الليلة طبعاً كان عرس السوبرفايزر بتاعي , انا كنت وكيل العروسة بالتوفيق يا مريم و لما ترجعي عايزك توريني (من مروان اخوك) كيف الوصول للـ six-pack abs و التمارين الفعالة Hi to Smart , Ammir, Ebtihal, Elnasry and Younis Shalabi
كما واضح يا اخوانا انا بكتب المداخلة دى قبل مواعيدى العادية بساعة لكن فى حاجة واقفة لى فى حلقى داير اقولها قبلما اطلع من البيت بعد شوية....
اليوم حسب اتفاقى مع الزبون (الكنت بتكلم معاهو بالتلفونى اثناء اكتشاف سرقة لوحة العربية) مفروض امشى بعد الدوام الاولى اشتغل ليهو بيت فى الجانب الشرقى الجنوبى المدينة... دلوقت انا جيت البيت وفطيت الرياضة اليومية عشان اغير هدومى والبس لبس 5 لكن فى حاجة حصلت فى البص شطبت راسى عديل .....
عندى فردة بعملها كل يوم من احدى الاحياء الراقية والغنية حيث معدل دخل الاسرة يصل ال150 الى 200 الف دولار.. زبائنى ديل معظمهم موظفين كبار فى شركات النفط والغاز... كل يوم بجيهم فى نفس المواعيد بالدقيقة والثانية وباخدهم الدوان داون.. صباح الخير ...صباح الخير نتبادل التحايا كل صباح ..كل واحد يقعد فى كرسيهو المفضل... اها اليوم .. وقفت فى محطة بركب منها 3 موظفين.. احدهم ..ركب ..وقال لى صباح الخير..رديت عليهو بالمثل ومعاها ابتسامة(لانى زول نايس) قال لى لى ميرى كريسماس ..قلت ليهو ميرى كريسماس لك انت ايضا .. مد لى 10 دولار مبتسما وقال هذه للقهوة... اتخلعت ..قبلت البقشيس وشكرته مبتسما.. هذه اول مرة تحدث لى طوال 5 سنين الفاتو... نحن نعتبر موظفين حكومة والمفهوم السائد انو مافى بقشيش لموظفى الحكومة (ما ممنوع لكن نادر يحدث) بالاضافة الى الجمهور فاهم انو دخولنا عالية ولا نحتاج للبقشيش ....
قبل كده فى سيدة عجوز ادتنى حلاوة وقبل شهور زبونة دائمة جابت لى كيس صغير فيهو فواكه.. لكن كاش ...اول مرة ..واظنها الاخيرة..
اقوم البس الحق الكدة السريعة...
بالسلامة يا مريم ..وفى انتظارك ... اسمارت مسجلة غيابك من كم يوم ..... ميرى كريسماس غباشى
12-15-2011, 08:33 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
مريوم....ربنا يديك العافية. كيف كتفك? ان شاء الله تمام موضوع ان فى رز فيه نشا اكتر ده اصلى ما فكرت فيه قبل كده. شكرا على المعلومات المفيده. موضوع الاكل بالليل بيسمن ده انا متاكده منه و عن تجربة. خاصة لما اكون مساهرة لقراية او تلفزيون...بقضيها كلها عض...و خاصة الايسكريم. حاجه جاهزة فى التلاجه و ما عاوزه اى مجهود...تغرف بس. يونس شلبى ح يوحشنا وحش كبير جدا يا اخى. مريوم ما ممكن تفتحى لينا اسبوع كامل عديل كده.طلى علينا مره مره
النصري...سبحان الله. عندنا نفس السيريال بس اسمه هنا: fiber one و بالعكس يا اخى...طعمه حلو شديد. لدرجة انى شاكه انه ممكن يكون صحى وصيتى انك مرة مرة كده تجرب الشوفان. جرب نص كباية شوفان مع كباية لبن وحبة ملح (حبة شديد) و جربها . لو ما عجبتك خت معاه حبة زبيب. ما تشترى الظروف السمحة الملونة. دى فيها سكر كتير. اشترى العلبة الكبيرة. ما فيه طبا فايبر ذى فايبر ون. عشان كده ممكن تنوع يوم فايبر ون و اليوم التانى شوفان.
Quote: دلوقت بستغرب ليه مع كل الاستهتار داك وزنى ما كان بزيد شديد مع انى كنت ما بتريض خالص ولا بعرق ولا بمشى ...
ده عامل السن يا شيخنا. عندى سؤال عن موضوع قلبة البطن. Is it diarrhea or vomiting??1 على العموم الرياضة و اكل الالياف بيظبطوا البطن و الجهاز الهضمى...و تقليل الدهون برضوا بيساعد كتير.
Quote: امبارح مشيت البقالة العملاقة... لافى ساعة ما لقيت حاجة اشتريها... لحمة لا رغيف لا مشتقات البان لا
لحمة لا ...ليه???? ضرورى تاكل لحمة حمراء...ح تجيك انيميا بطريقتك دى يا النصرى. متذكر الصورة اللى ختها مريم قبل فترة(حاولت القاها و ما قدرت).لكن الصورة فيها نسبة البروتين للنشويات للخضار فى كل وجبة. ضرورى تاكل لحمة على الاقل مرتين فى الاسبوع. اشترى لحمة مفرومة من غير شحم. و اطبخ بيها فاصوليا خضراء او بامية و اكلها بالعلقة من غير رز او عيش. منتجات الا######## فيها حجات كتيرة fat free ...اى شيء فى منه fat free النصرى ما تحرم روحك و تعمل رجيم ما ح تقدر تواصل فيه حياتك كلها. اهم شيء نقصان الوزن يكون (ما سريع جدا) و معقول. احضرينا يا مريم.
بالمناسبة كمان...ممكن توزن روحك كل يوم. لكن حاول اوزن روحك فى نفس المواعيد. بعد اجتهاد فى الموضوع ده... لقيت انه احسن حاجه انى اوزن روحى الصباح بدررررى. قبل ما اكل او اشرب اى شيء. كفارة لوحة العربية
عن قانون الهدايا لموظفين الحكومة.....اغلب الناس البشتغل معاهم فى الحكومة ممنوع يقبلوا هدية اكتر من (اظن) 20 دولار. حتى لو عزومة غدا. اكتر من كده مفروض يكلم مديره على طول. يا زول شيل طوالى. كان عندى مدير (مديرى المباشر) مغندل. احنا 3 شغالين تحته. فى كل كرسماس بيدى كل واحد فينا هدية 100 دولار (من جيبه الخاص). لما حولونى لمدير تانى زعلت شديد جدا
محمد الحاج...الف...الف...مقاومة الطحنية. زوجى جاب علبة طحنية بداية الاسبوع الفات. قعد اكلها كلها فى اسبوع كامل. فى نهاية الاسبوع لقى روحه زاد رطلين. موضوع "ما تحرم روحك" ده مريم روحها طلعت و هى بتحاول تقنع الناس بيه. لكن كمان ما تاخدوا راحتكم شديد شكرا على الوصلة
غباشي....كيف كان العرس??? انا بحب اعراس الخواجات ديل شديد خلاص. وديت هدية شنو??? بالتوفيق ان شاء الله
ابتهاااااال و ينك????? رحول و رحلتى. الحاصل? و ما تميتى لينا القصة يا اخى....دخلتوا البيت كيف انت و الاولاد????
امير...وينك? تقول بتشتروا فى T-Mobile
12-15-2011, 09:51 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
يختي انا اقتنعته... إلا يونس شلبي يجي يقول الكلام ده حتى يصل... حنفضل انا وانت نطط زي دونالد دك .. وبرضه ما حينفع,,,
Quote: بالمناسبة كمان...ممكن توزن روحك كل يوم. لكن حاول اوزن روحك فى نفس المواعيد. بعد اجتهاد فى الموضوع ده... لقيت انه احسن حاجه انى اوزن روحى الصباح بدررررى. قبل ما اكل او اشرب اى شيء.
يومي يا سمارت!؟ بتوزني يومي.. انت عارفه ما بين الليله وامس واول امس انا الميزان اداني فرق كيلو (بالناقص) .. يعني الليلة انا ناقصه (بحسب الميزان) اتنين كيلو عن اول امس!! الحاجه دي قاعده تحصل ليك؟ والله انا الحاجه دي بتلخبطني بشكل...
Quote: مريوم ما ممكن تفتحى لينا اسبوع كامل عديل كده.طلى علينا مره مره
انا قصتي كالتالي، امس لاقيت المشرف.. اداني جزئية اشتغل فيها لازم نخلصها عشان مباشرة بعد الاعياد تطلع في paper.. الجزيئة دي happens to be my PhD theoretical foundation...اها بعد داك، حأبداً الكتابة من شهر يناير.. ومتوقع تستمر لحدي شهر عشرة حسب الplan بتاعتي... اها محتاجه الاسبوع ده اركّز فيه وبعداك الامور حتكون اسهل ...
شكراً يا غباشي على السلام ومبروك على الكيلو وسلامات للشباب والشابات وشكراً على المؤازرة في موضوع الطحنية مع انو اشتغلتا بي نصيحة مريم وأكلت منها امبارح طحنية بالزبادي، اتمشيت الليلة مشوار كويس ووزنت لقيت الوزن عمل 101.8 معنوياتي ارتفعت شوية، حأعمل بي نصيحة مريم بتاعة breaking down الهدف فحأخت الهدف الأول 5 كيلو يعني 11 رطل يا أمريكان (الكنديين ليه ما بيحبو يقولوا ليهم امريكان يا النصري :D) شكراً يا شباب البوست فعلاً عامل سبورت كويس
12-18-2011, 08:54 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
الدعم النفسى البقدمو البوست يا محمد الحاج لا يقدر بثمن انا اول مرة فى حياتى التزم ببرنامج صحى ورياضى مثلما التزم الان.. الاحساس بانك لست وحدك you are not alone احساس جميل خاصة وان مراقبة الوزن والاكل حاجة صعبة جدا جدا جدا ... امبارح كنت بتكلم من زبونة وعزمتنى صندوق شكولاتة ..اعتذرت بادب متعللا بانى فى ريجيم ...قال لى ان زوجها كان 300 رطل فى فبراير الان هو 210 رطل (90 رطل فى 10 شهور) اضافت انه يعمل Chef (طبعا الكلمة دى لو ترجمتها المعنى حيختل لكن نحاول) Chef يعنى طباخ وده طبعا حسب ثقافتنا السودانية شغلانه فى اسفل السلم الوظيفى.. مع انها هنا تعتبر من الوظائف الجيدة ودخلها عال جدا .... المهم سالت الزبونة كيف استطاع زوجها التخلص من 90 رطل فى 10 شهور قالت لى انه يتريض يوميا 30 دقيقة انه لا ياكل رغيف او سكر وانه يشرب موية كتيرة جدا جدا .... الشى الغريب انها اضافت انه يقول ان steak بحجم قبضة اليد لا يضر .....
انا لى فى الريجيم شهرين وفقدت حوالى 20 رطل يعنى لو واصلت 6 شهور تانية ممكن اصل للوزن المثالى لى وهو 200 رطل
________
يا اسمارت انا سادى ليكم الوردية الايام دى (بس كمان ما تطولو شديد)
Fully agree يا النصري وشكراً جزيلاً على البوست وعلى انك سجلتا عشان تنقلو للربع البعديهو ومبروك على مقاومة الشكولاتة، أنا كنت زمان مدمن شكولاتة بس الله تاب علينا منها، غايت صاحبك الطباخ نقص بني آدم كااامل ربنا يوعدنا، في واحد صاحبنا يالنصري فكرتو قريبة من صاحك الطباخ، كان بيجري نص ساعة يوميا، قال لي مرة لما لاقيتو بعد مدة وفوجئتا بي شكلوا بعد نقص (قال لي مشي اشترى دولاب هدوم كامل لأنو هدومو بقت كلها ما فت) لما يتطافس وياكل حاجة ما مفروض ياكلا بيعاقب نفسو بي نص ساعة اضافية جري بقى لما يمد يدو على ممنوعات بيسحبا زي الماديها على نار خايف من العقاب لوووووووووول عارف لسة عندي مشكلة مع الموية حأحاول أحلها وأشرب 4، 5 لتر كدا ربك يكون في العون يلا كيب ذا قود ورك
أنا اليومين ديل قاعد أرجع الكيلوهات النقصتها عشان خايف لو وصلت الوزن المثالي أقيف وبالتالي أشتاق ليكم وأنا ما عايز أفارق البوست ده لحدي ديسمبر 2012!!!! عشان كدة: 1. في اليوم على الأقل باكل لي سندوتش ميكس طحنية مع جبنة مع قزازة كولا (الإحساس مبالغة) بذكرني أيام الرمتلة لمن الواحد كان بمشي جمب البوكسي الببيع الموز يقول ليه أديني كيلو ويقعد ياكل في الكيلو ده لمن يجيه طه القرشي! 2. النوم في اليوم أقل من أربعة ساعات
3. رياضة بقت يوم الجمعة من الساعة 8 لي تسعة ونص بالليل كرة قدم (دافوري)
يا جماعة أنا برجع عادي بإذن الله يوم 26/12 ... بمناسبة التاريخ لحدي هسع أنا ما استلمت هدايا عيد الميلاد!!
Quote: انا يا اسمارت زى جيرى ساينفيلد اخر مرة استفرغت كان فى 1973 نسيتو زاتو بعملو كيف ...
تعرف انا ذاتى ممكن اعد ليك كم مره استفرغت فى حياتى و متين. مع انى بصباب بدوار البحر كتير جدا
Quote: الشى الغريب انها اضافت انه يقول ان steak بحجم قبضة اليد لا يضر .....
الكلام ه قلناه قبل شوية....لكن مين بيسمع????. اللحم مهم جدا الشوفان ده ظريق جدا. لكن احسن منه كمان العلبة الكبيرة اللى بيكون فيها شوفان بس....و انت و قدرة تخملك ...ممكن تعملوا بموية او لبن
امير....خاف الله...ده شنو ده????على قول ام الاولاد : الجرى و البشتنه لزومهم شنو???? اعدل عن هذا يا رجل. الطحنية دى مشاكلها ما فى زيادة الوزن بس....فيها كلسترول يمرض بلد. اعمل حسابك يا فردة
محمد الحاج....
Quote: قال لي مرة لما لاقيتو بعد مدة وفوجئتا بي شكلوا بعد نقص (قال لي مشي اشترى دولاب هدوم كامل لأنو هدومو بقت كلها ما فت) لما يتطافس وياكل حاجة ما مفروض ياكلا بيعاقب نفسو بي نص ساعة اضافية جري بقى لما يمد يدو على ممنوعات بيسحبا زي الماديها على نار خايف من العقاب لوووووووووول
تعرف دى فكرة عظيمة خالص خالص و كلام الطحنية ليك برضوا. انا ح اطمم بطنك من الطحنية و انزل ليك صورة لعبلة طحنية مكتوب فيها كمية السعرات الحرارية و الدهون فى قطعة صغيرة. بس خلينى امشي البيت و اصور لعلبة. للضمان كده دى القيمة الغذائية لجرام واحد من الطحنية Serving Size: 1 oz (28.3g),U Calories: 150, Fat: 8g, Carbs: 16g, Protein: 3g
Quote: يومي يا سمارت!؟ بتوزني يومي.. انت عارفه ما بين الليله وامس واول امس انا الميزان اداني فرق كيلو (بالناقص) .. يعني الليلة انا ناقصه (بحسب الميزان) اتنين كيلو عن اول امس!! الحاجه دي قاعده تحصل ليك؟ والله انا الحاجه دي بتلخبطني بشكل...
يا ريت لو بتحصل لى. انا فى احسن حالات نقضان الوزن ...بنقص تلت رطل فى اليوم. لكن ذي ما قلت ليك بوزن روحى الصباح بدرى اول ما اقوم من النوم
الليلة وووب الليلة ووووووب (زى ما كان بقول ميرغنى وعمر شمشوم يوم مباراة هلال مريخ)
اليوم كانت مواعيدى مع تارا مدربة اللياقة فى الشغل.. اتصلت عليها امس معتذرا عن حضور اللقاء بسبب ان عربية سهير تم كسرها بواسطة لص محاولا سرقتها الا انه لم يكمل جريمته وترك العربية (فان) مكسورة الدركسون..احشاءها متدللة زى المصارين..شركة التامين ادتنا عربية يوكون ايجار لحين تصليح الفان ... المهم ... انتهيت من الدوام الاول ومارق اتسحب ..اشوف ليك تارا واقفة منتظرانى.. مشيت عليها وعرفت انها لم تجد رسالتى ..
اها البلبل بعوم ... قالت لى عندك دقائق ..اجبت نعم ....let us go for it
قالت لى اهم شى تقيس نفسك باستمرار... المقياس اهم من الميزان (اها يا اسمارت المعلومة دى ما قلتيها لى من قبل)
قالت لى الميزان ما مهم شديد.. اهم شئ تقيس الخصر والكتفين والضهر.... قلت ليها عمرى ما قستهم لكن ملاحظ الهدوم بقت واسعة..... قامت قاستنى وقالت لى لمن نتقابل المرة الجاية نشوف الفرق...
قلت ليها داير اتخلص من الكرش ....
ادتنى تمرينين ....قالت لى اعملها 3 مرات فى الاسبوع وخلال 3 شهور الكرش حتخف (او تختفى)
التمرين الاول كما يظهر فى الصورة الرجل فى البداية ممكن تكون مستوية على الارض وبعد فترة ممكن تنى الركبة عشرين مرة وفى كل مرة الانتظار 3 ثوان بعد مباشرة تمرين الضهر (اى تمرين للبطن لازم يعقبه تمرين للضهر)
تمرين الضهر اسمه سوبرمان برضو عشرين مرة وكل مرة الانتظار 3 ثوان عند الرفع ...
الحمدلله استطت عمل ال 20 مرة للضهر لكن فشلت فى العشرين مرة بتاعت البطن (عملت 12 بطلوع الروح)
سلام يا ناسنا امبارح وزنت ...... انجاز جديد .... تم التخلص من
عندي خبرين بايتات ... الخبر الاول الجيم بتاعنا في الجامعة خلاص قفل بعد ان ابليت فيه بلاءاً حسناً (خصوصاً في الاسبوع الاخير) و ما حيفتح تاني الا يوم 23 يناير و انا كنت محتار اعمل شنو في فترة الشهر دي لانو بدون جيم زي ما عارفين الحكاية بتبقى جوع ساكت (بعدين الواحد بقى داير يعمل Six-pack abs ) المراكز الجمبنا كلها غالية و زحمة ...
الخبر التاني : ربكم رب الخير بيقطع من هنا و يوصل من هنا ... اول امبارح الصباح ماشي الجامعة قمت لفييت (اللفة دي برجليني يا جماعة العبد لله عضو اصيل في جمعية ملاك 11خ ) على سنتر المدينة في نفس الشارع اللفيت بيهو بس لقيت ليك جيم جديد فتح رخيص و 24/7 و قرييييييييييييب من البيت كدة موضوع الجيم اتحلا :)
حاحاول اجيب ليكم صور
الناس هنا نزلوا اجازة الكريسماس ... الجو بااااااااااااااارد مع انو المفروض يكون في دفء الشغل كابس بجيكم راجع بس الزحمة تخف
يا اسمارت انا زول لاييييوق زى الويكة لمن اقتنع بالحاجة... انا مصمم تصميم شديد جدا اعمال تمارين البطن والضهر تلاته مرات فى الاسبوع وان شاء الله اكتب تقرير بعد كل جلسة..... طبعا بعد غياب مريم الواحد لازم يغطى ليها ورديتها هنا وبالتالى حضورى حيكون يومى رغما عن اى مشغوليات او كدات (تشديد الدال)
,,,,,,,,
عملت ال30 دقيقة رياضة وبمزاج ...مشى دقيقة واحدة وجرى بسرعة 6.2 ميل لمدة دقيقتين... قررت توثيق برنامج الرياضة بالفيديو ابتداءا من اليوم لكن نسيت الكاميرا فى البيت بكرة ان شاء محمد الاثيوبى حيصورنى بتريض مع بعض الشرح والصعوبات التى تواجهنى..
للاسف البلاك بيرى خزلنى فى صور يونس شلبى ....لم تطلع اى صور (يبدو ان الغطسة الاخدها التلفون فى التوليت عملت داميج فى الكاميرا)
12-21-2011, 08:43 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
النصري...بقيت كل ما اشوف بلاك بري اتذكرك. بالمناسبة خلطتك بتاعة الشوفان و السريال دى فعلا طعمها ح يكون خرافى.....لكن....... عاوزاك تعبر بتكب كم من كل واحد فيهم. جيب ليك measuring cups ذى ديل
او ذى دى
و استعملهم. احسب كمية للسعرات الحرارية المكتوبة فى الصناديق و ما تنسي السعرات فى اللبن (اعبره برضو). فى لنهاية عاوزاك تشوف فطورك الرهيب ده فيه كم سعر حرارى.
ما عاوزه ازهجك....لكن مهم تكون عارف كمية السعرات الحرارية فى كل وجبة. مهم تضيف لفطورك قطعة لحمة (سجك سودانى) او بيضتين. البورتين مهم لبناء العضلات و بيخليك تحس بالشبع لفترة طويلة.
يومين كدا نسيت الباسوورد اهو لغاية ما لقيت وكت اتذكرا سؤال أنتو العلف بتابع سمرات دا بتطورات بيهو? كنت يفتش لي في تمارين بطن ووقعت لي في جرح تمارين مدرستك دي يا النصري شكرًا يااخ الرياضة تعب أنة مع الزحام الشغل والقراية وإخوان الرجع البلد بعد عشرة سنوات غربة وشوق والامتحانات بس الاكل كنترولد كويس أنتو هل المعلومة بتابعة انو القريب عصير القريب قصدي بيساعد علي حرق الدهون دي صاح صاح الكلام دا يا حكمنا حامل لي إز متش تمارين بطن وصهر يا النصري إز بوسي بل قبل ما انوم سلام فور نااو
ازيكم يا losers... مشتاقين وكده... والله الواحد فقدكم بالجد... لكن كنت خاته في بالي لما اجي اكتب البوست ده اني اكتب اخبار حلوه، عشان كده التزمته بي برنامج الاكل بصورة كويسه، خاصة مع عدم برنامج الرياضة.. الحمدلله... مسكته يدّي كويس.. وسبته اللخبطه... وبقيت باكل بصورة متوازنه ... ما حارمه نفسي من حاجه، لكن في نفس الوقت ما جايطه الدنيا... امس وزنته لقيت روحي ناقصه كيلو... يعني 2.25 رطل... وفعلا حاسه بيه في ملابسي.... الحاجه اللزيزه التانية انه دبلتي بتاعت الزواج (التانية) بقت واسعه علي... وقصة الدبله دي انه لما اتزوجت كان عندي دبله لزيزه وعا########ي شديد... قمت سمنته عليها وبقت ضيقه... قام بعلي جاب لي دبله تانية اوسع... حسي بقت واسعه علي.. ولي فترة لابساها في اصبعي الاوسط عشان كبير، امس لقيتها واسعه عليه زاتو.. برضه عندي فستان جميل قاعده احب ألبسه مع التياب.. امس اتلبس لي براحه وبدون "شكل" ... دي الحاجات البتكيف ليها، بالاضافة لتعليقات الناس طبعا...
القراية أم دق، تمام الحمدلله... اتفقنا انا والمشرف على الحاجات المطلوبة، وشغاله عليها، عايز لما يرجع من الكريسماس يلقاني خلصته.. والمسألة بقت تشطيبات.. لكن الكم يوم الفاتو ديل كانوا صعبين خلاص! والله راسي كان جايط بشكل.. الليل والنهار الشغل زانّي لي، كان شغل تفكير اكتر من شغل انجاز.... الحمدلله انتهى على خير...
مروان اخوي بسلم عليكم، وطبعا بعتذر عن الصور، ليه طبعا، لانه اخوي الخجول... لكن اداني افكار هي اصلا موجوده واتقالت، لكن حأكتبها تاني عشان التذكير وكده.... -المويه البارده -تلاته وجبات رئيسية الزول ما يشبع، ووجبتين صغار في نصهم -الرياضة ستة ايام في الاسبوع، لازم الزول يدي نفسه يوم اجازه -كل شهر ونص كده، الزول يغير شكل الرياضة عشان ما يزهج وعشان الجسم بتعود على الرياضة... لازم نجدد ليه -ما كان بوزن نفسه، لكن كان بصوّر نفسه مره كل اسبوعين .. ويحتفظ بالصور... وكان بحفز نفسه بيها.. ما شغال بالارقام خالص
بالنسبة للsix pack يا غباشي... هم شبّاكين بس على حسب كلامه ... لكن مروان بتبع برنامج بتاع رياضة جميل جداً، انا كنت عايزه اكتب عنّه... فيه مستويين بتاعين رياضة... الأول مستوى أخف وكنت بعمله فتره، وفعلا برنامج رهيب جداً... اسمه power 90... مدته ستة مرات في الاسبوع، المره الواحده مدتها اقل من نص ساعه... يوم cardio هم مسمينه sweat ومعاه تمارين بطن، ويوم تمارين قوّه هم مسمينه sculpt... اهم مافي البرنامج ده الفيديو بتاعه، الراجل ما بخليك تقيف ولا لحظة... وبالجد نتايجه رهيبه... انا استمريت فيه شهر، في اخره بقيت اقدر اعمل 15 push up.... الكلام ده قبل لولو تجي طبعا! حسي للأسف ما حأقدر اعمل قريب إلا لما يدي تبقى تمام ميه الميه عشان ما اطنبج القصّة.. لكن انا اصلا ما مستعجلة.. حاليا المشي بالنسبة لي كويس خالص... الفيديو ده بشرح عن المرحلة الأولى power90...
والyoutube مليان بي فيديوهات عن ناس بتكلموا انهم نقصوا وزن كيف باستخدام البرنامج ده.... بجيكم بعدين بديكم الtorrent بتاع الفيديو لو عايزين تنزلوه عندكم .... المرحلة التانية اسمها power90X... دي البعملها مروان...
والله يا النصري انا قايله روحي براي ما فهمته محمد ده!... اصحى شويه يا حماي... وحمدلله على سلامة ناصر بركه الشفتوه بالسلامه... ملمومين دايما في الفرح يا رب...
بالنسبة لسؤالك.. القريب فروت.. ممكن اجاوب انا... ميزة الفاكهه دي انها فيها كالوريز قليله جداً، وطبعا فيها فايبر.. وبكلمات بسيطة، مافيها سكّر كتير... ده بخليها بتدي إحساس بالشبع.. وبالتالي الزول بياكل اكل قليل... لكن الفاكهة نفسها مافيها حاجه سوبر... يعني البرتقاله بتعمل نفس الاثر... بس الفرق انه البرتقاله الكالوريز فيها اكتر... الفقرة دي بتديك تفاصيل اكتر عن الموضوع ده... وهي من الموقع بتاع WebMD... والمقالة موجودة في اللنك التحت ...
Quote: While grapefruit is a very nutritious low-calorie fruit (66-84 calories per serving), loaded with vitamin C and fiber, it is not a mysterious fat burner. The low glycemic index, high fiber, and low calorie nature of the fruit may reduce insulin levels and help dieters feel full and eat fewer calories. Beyond that, no magic appears to be at work with the Grapefruit Diet. Experts say one small study is not enough to pin magical powers on this fruit.
مريوم جات...مريوم جات...مريوم جات...مريوم جات... تعرفى اكتر حاجه بتزهجنى نوع الكلام بتاع: القريب فروت بيحرق الدهون...و كده. شكرا يا مريم على التنوير و المعلومات المفيده.
و قبلها طبعا مبروك ميروك على الكيلو....الف مبروك.لما الدبلة القديمة -العاجباك- تبقى قدرك تماما ....ختي الدبلة الجديدية الكبيرة فى سلسل و البسيها دلاية عشان تتذكرى الايام الخوالى.
سلامات Dr. Ahmed Amin ليه عاوز تزيد وزنك????? لو حاساس ان صحتك ما كويسه من الضعفة...ممكن طبعا تحاول تويد وزنك...لكن احسن تتكلم مع طبيبك فى الاول.انا ما عارفه انت دكتور طبيب ام دكتور فى مجال اخر. لكن لو دكتور طبيب اكيد عارف ان الضعفة ما مشكلة الا تكون ضعفة و معها مشاكل تانية. لكن لو عاوز تسمن بس عشان تدى الهدوم منظر احسن حاجه تعملها انك تمشي الجم. ايوه ...تمشي الجم. تتريض عشان تعمل عضلات و لكن لازم برضوا تاكل اكل غنى بالبروتين و النشويات. دى الحاجه اللى بيعملوها الرياضيين المحترفين. بياكلو اكل تمام ...لكن بيتريضوا رياضة تمام برضوا Think about it
لاحولا ,,,,, انا قلت اسمارت دى جنت!! بتتكلم مع منو ؟ رجعت للصفحة الرابعة وجدت اخر مداخلتين لم امر عليهم الا الان ... اعتذارى الشديد لدكتور احمد امين ..بالرغم من انى عامل روحى تفتيحة فى كيفية التعامل مع البورد الا اننى حقيقة دقست ولم انتبه لمداخلتك بالاضافة لمداخلة اسمارت
السبب كله من مداخلة محمد الحاج التى افتتحت الصفحة الخامسة وخلتنى جيت جارى طيران عشان ابارك .......
يا دكتور الف مرحب بيك فى عالم الخسرانين ..اتمنى من كل قلبى ان تواصل المشاركة معانا ولا تنقطع فتبادل الاراء والخبرات مهم جدا ....
قلت لى داير تكسب وزن؟ سلفنى روحك لمدة اسبوع ..براحة ممكن اخت ليك 20 رطل وبمزاج .... رغيف و بطاطس ولحوم محمرة بالزيت وعصائر وسمنة وطحنية.. والله استمتع استمتاع ......
لكن زى ما قلت الاهم هو صحة الجسم ودى بتشمل الجميع ..سمان وضعاف .. عجائز وشباب ..نساء ورجال .....
الف حمدلله على السلامة يا مريم بمناسبة الدبلة ...اليوم لقيت دبلة الخطوبة ..رايحة منى ليها زمن طويل لقيتها واقعة تحت الهدوم ..اصلو انا زول عشوائئ.. الدبلة كان جزء من طقم فضى هدية من الصديق العزيز مبارك شمبول.. كنا خريجين جداد ومبارك كان شغال استاذ ثانوى عام مرتبه كله ختاهو فى الطقم دة
سلام وتحية للمجتهدين للحصول على الصحة والجمال والرشاقة
يا سمارت لله الحمد لا أعاني من أي توع من الامراض .. وكتير جدا من أصدقائي حاسدني على وزني ( حتى المدام) وبالمناسبة أنا من النوع المتعب جدا في الأكل لا أكثر من أي شيئ .. لا أكثر من النشويات ولا الدهون ولا السكريات ولا أشرب أي مشروب غازي (بكرهه عديل) وأشرب كباية شاي واحدة في اليوم (حجم صغير) .. وأحب رياضة الجري وأمارسها يوميا لمدة نصف ساعة (جكة) , عشان كده بحرق حتى شوية الموجود
لكن ذي ما قلتي انتي يا سمارت الواحد داير يملأ هدومه
شكرا كتير ليك يالنصري على البوست الشحمان ده ههههههه .. ... .. وقد ذكر في الحديث الشريف " المعدة بيت الداء والحمية بيت الدواء"
يلا شدوا حيلكم وربنا يوفقكم ..
12-23-2011, 10:53 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: ختي الدبلة الجديدية الكبيرة فى سلسل و البسيها دلاية عشان تتذكرى الايام الخوالى.
والله دي فكرة لذيذة خلاص يا سمارت... تعرفي، في طريقة بعملوها الفنانات عشان يراقبوا روحهم وما يزيدوا من غير ما يحسّوا، وهي انه الواحده بتلبس سلسل في خصرها يكون بالضبط على قياس الخصر.. وبكده لو زادت شويه السلسل بضيق عليها وبتحس بيه... ده بوريك برضه يا النصري انه مهم جدا قياس محيط الخصر، اكتر من الرقم بتاع الميزان...
انا طبعا الليلة اخدته مقاساتي ... وتاني ما حأقيس لحدي يوم 18/1... لاني يوم 19 مسافره لي سفره كده (لسه ما مؤكده، لكن احتمال كبير)، لكن عايزه اعتبرها كtarget لي.. ده غير اني حأرجع بكره للمشي ... يدي ما perfect لسه، ولو تعّبته روحي خلال اليوم بالليل بتألمني... زي أمس مثلاً... لكن لازم أتمشّى.. حأعمل حسابي عشان ما احرّكها كتير اثناء المشي... وده عهد هنا اني ما حأشوف الميزان تاني إلى في التاريخ الكتبته (رغم انه صعععععععب اني ما اشوفه) لكن عشان احافظ على كلمتي التزمته بيها قدّامكم... في حاجه تانية كانت مساعداني جدا في الفترة الفاتت عشان احافظ على اكلى... وهي، شُرب المويه.. الناس لاقين صعوبة في القصة دي، انا غايته اول ما اصحى من النوم وعلى الريق بشرب أربعة كبابي مويه (بارده)... هي ما بارده شديد، لكن بطّلته أسخّن المويه زي زمان لووووول... يعني بحسب درجة حرارة الجو عندنا، وطبعا برد الفترة دي... كده الزول بكون شرب نص الكمية المطلوبة في اليوم... وطبعا العلاج بالمويه شي شائع، انا ما عارفه هل القصة دي مفيدة ولا لأ... غايته ده مقال بتكلم عن الموضوع، لكن ما شكله كده علمي... المهم في الموضوع اني بحس بي راحه لما اعمل الحركة دي... http://www.knowledgebase-script.com/demo/article-113.html بعداك خلال اليوم ممكن اشرب كباية قبل كل وجبه... القصة دي بالجد هي اكبر شي غيّرته في الفترة الفاتت واعتقد انها ساعدتني.. برضه باكل خمسة وجبات... الsnacks بتاعتي غالباً بتكون تفّاحة... او موزه، حسب الموجود... ولو ما لقيت باكل اي شي... بس تكون حاجه كميّتها بسيطه..
المره الجايه، لما افضى بجي اكتب عن موضوع النوم، عندنا في السودان بقولوا ليك النوم الكتير بخلي الزول يسمن... على العكس من الscientific research البقول العكس تماماً!! good news للناس البحبوا النوم!... بجي اكتب بالتفصيل عن الحتّه دي....
اليوم كان اخر يوم فى الدورة الاخيرة من 2011 ..نسميها sign up لان كل عامل يوقع على قطع عمل ثابتة يؤديها كل اسبوع .. اليوم كان emotional ودعت كثير من زبائنى اليوميين .. احدهم اهدانى صندوق شوكلاتة وسيدة اهدتنى كرت معايدة مكتوب فيه مايلى:-
I wanted to say thank you for the times i was running for the bus and you slowed down and waited for me to make sure i made it to work on time Thank you so much. Wanted you to know that your kindness is remembered
Thank you
لم اتمرن اليوم بسبب تغيير جدول العمل بسبب ان المدرسة التى اخدمها يوم الجمعة حتقفل بدرى ...ساعمل 3 دوامات اليوم بدلا عن دوامين .....
وقفت فى سوبرماركت ..اشتريت سمك وخضارات .. زهجت من الفول ....
وزنت نفسى اليوم ..على بعد حربشات من ال 260 رطل المرجوءة ..
12-23-2011, 10:03 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
يا اخوانا شنو يعني !! الناس وين... أمير وغباشي طفشوا عديل كده.. وامير ده مع الطحنية بكون رجّع الخسره كلّه وفوقه حبة مسك!
محمد الحاج، ما تركلس، انت لسه باديء..
النصري، الاخبار شنو؟
سمارت يا حكم، طولتي ما اعلنتي خاسر اكبر...
يا ابتهااااااااااااااااااال
____________________________________________________________ "مالك ما بتسمني كان نايمه اليوم كلّه!!" النوم والوزن... ما العلاقة! احنا قلنا انه على العكس من الاعتقاد السائد، فإن النوم زيادته ما بتزيد الوزن، بالعكس... وجدت الابحاث انه قلة النوم بتخلي الزول تاني يوم ياكل زياده عن حاجاته... في كلام كتير عن دور الهرومونات في الحته دي، لكن أهم حاجه هي انه الجسم confuses قلّة النوم مع الجوع... يعني الزول يكون ناقصه نوم يجيه احساس إنه جعان.. يقوم ياكل... ومهما ياكل جوعه ده ما يتسد... والسبب انه هو محتاج لي نومه موش لي أكل... طبعا الأكل والنوم مباشرة زي ما قالت سمارت بخلي الزول يزيد وزن.. رغم انه في كلام علمي متضاد في النقطة دي، احنا نعمل الاتي: -نحاول ننوم كفاية (عارفاها صعبة، اسألوني انا!!) -نحاول ما ناكل قبل النوم مباشرة، او حتى لو اكلنا ناكل شي خفيف...
وزي ما بقولوا، ما تتكلوا على انه النوم بخلي الزول ينقص وزن وتفتحوا للجيم، لانه دي ما النظرية، النظرية انه عدم النوم بزيد الوزن، لكن موش العكس!
المصدر (فيه كلام علمي كتير للناس العايزين يحكّوها )
سبحان الله يا مريم حكاية النوم جات فى بالى زى مليون مرة وكلما اجلس على الكمبيوتر انساها ....
منذ فترة لاحظت انو نومى قل .... كنت ما بصحى الا بالمنبه ... وحتى المنبه نفسه مرات بضربه واخد لى خمس دقائق زيادة ...
كنت وبسهولة جدا ممكن انوم 12 ساعة فى اليوم (والله على ما اقول شهيد) 9 او 10 او 11 ساعة فى اليوم ...عادى جدا ...... والغريب بكون نعسان باقى اليوم .....(طبعا دى الايام الشغل بكون ضعيف)
دلوقت ومنذ اسابيع اشك اننى بنوم 8 ساعات فى اليوم ... وما بكون نعسان باقى اليوم .....
ما عارف دى ليها علاقة بالرياضة والريجيم ام هى دورة من دورات الدماغ تنتهى وترجع حليمة لعادتها القديمة
12-25-2011, 05:41 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
والله يا النصري ما عارفه بس نظريتك دي مختلفة عن كلامي... احتمال انك motivated عشان تقوم وتعمل شي.. عشان كده بتنوم أقل... بالمناسبة، انا القلت انه القياس مهم .. ما سمارت لكن يا زول اصلو ما عندك مشكلة... بس نخلص من يونس شلبي تجينا أم هاني... يعني اصلو مافي طريقة نفوز معاك...
بمناسبة القياسات... لقيت الكلام ده ومعاه كلام عن كيف نوزن نفسنا، انا شخصياً استفدته منّه وفسّر لي حاجه كانت مجنناني....
كيف نوزن نفسنا ---أول حاجة بالصباح ---أقل ملابس ممكنة ---ما نوزن بعد تمارين، لانه الرقم حيكون جايط ---لو الزول بعاني من حالة امساك (الله يكرم السامعين)، ما يوزن إلا لما يمشي الحمام، لانه كده انت بتوزن روحك والاكل الجوا جسمك كله... فالرقم بطلع غلط.. ودي المشكلة الكانت بتحصل لي... مرات ألقى نفسي زايده شديد... بعد كم يوم اوزن ألقى وزني ناقص كتير... ---بالنفس الفهم، لو الزول وزن نفسه خلال اليوم او بالليل، فمعناها بوزن معاه الاكل والشراب الاكلهم خلال اليوم
اذا الرقم طلع زيادة (الحته دي طمّنتني جداً) ---لو اكلنا ملح زيادة، الجسم بحتفظ بي الموية، بالتالي ما بالضرورة تكون الزياده دي دهون، غالباً بتكون وزن موية ---اذا احنا بنتريض، وزن العضلات البنعملها ممكن يوهمنا اننا زدنا وزن... ده النقطة البتحسمها قياسات الجسم ---ننتبه للإمساك... ---نتأكد من الميزان انه موزون صح، مرات لو قاعد فوق سجادة ولا شي بديك رقم غلط ---لو كتّرنا أكل الاسبوع داك، احتمال القصة تكون وزن زايد فعلاً
شفتو الكلام ده لزيز كيف، يعني زيادة الوزن ما حاجه ساهله انها تحصل! ما لخبطة يوم واحد ماشه تزيدك كيلوين تلاته!
كيف ناخد قياساتنا
---اهم شي ما نشد عضلاتنا واحنا بنقيس، مافي داعي للخرخره... ---نكون لابسين ملابس خفيفه ---ما نقيس كتير، مره كل شهر ونص كده، لانه القياسات دي ما بتتغير بسرعة
لناس الiPhone/iPod/iPad... في App اسمه fitter... مجاني، وبخزن ليك معلومات كتيره منها وزنك وقياساتك ... وبحسب ليك الBMI وBMR (####bolic rate( بتاعك... طبعا بالتقريب... برضه بحسب حاجه اسمه waist to hip ratio وبحسب الBody fat percentage برضها تقريبية.... لكن الapp لزيز وبوريك الprogress بتاعك...
انا بعد ده ببدا أعاقب.. أحسن ليكم تظهروا!
12-25-2011, 05:56 PM
غباشي غباشي
تاريخ التسجيل: 01-19-2007
مجموع المشاركات: 1729
سلام يا جماعة احنا مع الكريسماس جيم و نوم شديدين .... ما مشيت الجامعة لي من اول امبارح مشيت الجيم الجديد .... خرافي + نضافة عجيبة , بس الاجهزة ما عجبتني مع انها شاشات و قنوات و ملتيميديا عجيبة و للا عشان انا متعود على اجهزة الجيم بتاع الجامعة او بالتحديد ماركة Life Fitness و التريدميل بتاعتهم زلاقة و للا الـ running shoes بتاعي بقى ما تمام :) في النهاية جريت بسرعة 8.5 km/hr في عشرين دقيقة و قطعت زي 3.5 كيلو الاكل محافظ عليهو مافي سكريات , كاربوهيدرات و البسكويت سبب البلاوي برضو برة الايام دي بشرب هherbs و Ginger Tea دي عشان الـبطن تبقى flat .... اخوكم جادي في موضوع الـ six-pack شكراً يا مريم على التورينت نزلت الفيديو و وحاحاول اشتغل بيهو مع انه غرفتي ما فيها فرقة في الجيم بتاع الجامعة في مجموعات بتاعت aerobics و بيني بينكم عاجبني و داير اخش فيها من السنة الفاتت لكن المشكلة انو كلهم chicks اصحابي في الجامعة بيقولوا امشي خش معاهم احتمال تلقى your future wife among them غايتو لما الجيم يفتح في مقره الجديد حامشي اخش معاهم only for the sake of fitness
النصري سلامات داير ارد ليك على تعليقك القلتو لي بخصوص العرس , يا النصري ياخ احنا هنا في البلد دي لسة ضيوف و ما عندنا قدرة نفتح بيوت و ما معروف لسة اذا عندنا فيها رزق و للا لا , كدي في الاول نكمل قرايتنا دي و بعد داك نشوف موضوع شريكة العمر ووجع الراس المزمن دا (بصراحة يا جماعة حاسي بنفسي اتعودت على الـ bachelorhood) لكن لو عندكم لي عروس قولوا عوووووووك
موقفي في التحدي بتااع مدينتنا مطمن في المركز التالت, التصنيف بطلع كل شهر و على حسب الـ total loss بالله شجعونايا جماعة
صفقة قوية جدا جدا للنصرى Job well done يا النصرى الفرق ظاهر فى الصور...ما شاء الله تبارك الله. و كان ح يكون اوضح لو كنت اخدت الصور من نفس الزاوية
Quote: وسيدة اهدتنى كرت معايدة مكتوب فيه مايلى:- I wanted to say thank you for the times i was running for the bus and you slowed down and waited for me to make sure i made it to work on time Thank you so much. Wanted you to know that your kindness is remembered Thank you
دى يا النصرى واحده من الحجات اللى بتخلينى ما عاوزه ارجع السودان (انا ذيك رافعه شعار انى ما راجعة قريب). الحاجه هى كون انه الناس الحولك بيقدروا شغلك و مجهودك. اليوم الكرسماس و انا فى المكتب ...وحدى فى كل المبنى لانى وعدت زملائي اخلص ليهم شغل قبل نهاية الويك اند. اليوم فى عزومة (رجال سودانييين فى بيتنا) و عشان اوفق بين الاتنين (العزومة و الشغل) امس ساهرت لحدى 1 صباحا بجهز فى اكل العزومة. عملت كل شيء...ناقص بس اقطع السلطة. و صحيت اليوم مشيت المكتب. ناس العزوة (عارفاهم) ح ياكلوا بس. ما فى زول حتى ح يقوا لى شكرا على المحمر و المشمر. لكن ناس الشغل ح يقدروا مجهودى و تعبى.
Quote: دلوقت ومنذ اسابيع اشك اننى بنوم 8 ساعات فى اليوم ... وما بكون نعسان باقى اليوم .....
كلام مريوم عن النوم و الاكل صحيح. لكن اظن انك كنت تعبان طوالى و كسلان بسبب عدم الرياضة و الاكل الملخبط (طحنية و كده). الان جسمك كله ماشي كويس (الحمد لله و ما شاء الله) بسبب الرياضة. معدتك بقت مظبوطه احسن و نومك بقي بصورة معقولة. تعرف يا النصرى لو كنت مشت الدكتور قبل موضوع الرياضة و قست الكلسترول و الضغط و كل الحجات و قستها الان ...كنت ح تلاقي كل الامور اتصلحت. صفقية قوية تانى للنصرى
Quote: في حاجه تانية كانت مساعداني جدا في الفترة الفاتت عشان احافظ على اكلى... وهي، شُرب المويه.. الناس لاقين صعوبة في القصة دي، انا غايته اول ما اصحى من النوم وعلى الريق بشرب أربعة كبابي مويه (بارده)... هي ما بارده شديد، لكن بطّلته أسخّن المويه زي زمان لووووول... يعني بحسب درجة حرارة الجو عندنا، وطبعا برد الفترة دي... كده الزول بكون شرب نص الكمية المطلوبة في اليوم... وطبعا العلاج بالمويه شي شائع، انا ما عارفه هل القصة دي مفيدة ولا لأ... غايته ده مقال بتكلم عن الموضوع، لكن ما شكله كده علمي... المهم في الموضوع اني بحس بي راحه لما اعمل الحركة دي... http://www.knowledgebase-script.com/demo/article-113.html بعداك خلال اليوم ممكن اشرب كباية قبل كل وجبه... القصة دي بالجد هي اكبر شي غيّرته في الفترة الفاتت واعتقد انها ساعدتني.. برضه باكل خمسة وجبات... الsnacks بتاعتي غالباً بتكون تفّاحة... او موزه، حسب الموجود... ولو ما لقيت باكل اي شي... بس تكون حاجه كميّتها بسيطه..
يا جماعة اسمعوا كلام مريم ده كويس جدا. دى خلاصة البوست. انا شخصيا شرب الموية الصباح بيزبط لى بطنى و يبعد عنى الامساك (حماكم الله)
12-25-2011, 07:59 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
نجى لولدنا غباشي.... رافع راسنا فى مسابقة المدينة ان شاء الله.
عن موضوع العرس....يا ولدى عرس ما تنتظر القراية تخلص و لا حتى الشغل. فى سر انا ح اقوله ليك ( لكن ما تكلم زول ). احسن تعرس الان و انت طالب. لو لحقت اتخرجت و اشتغلت بدل "العريس طالب" ...ح تبقى "العريس استاذ جامى" او "العريس مهندس كبير" و تبقى فى الاعراس ام 50 الف دولار. مع ان الفرق ممكن يكون شهر وحد بين انك طالب و بين انك مهندس كبير...اعمل حسابك
12-25-2011, 09:59 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
smart_ana2001
مريم بنت الحسين
غباشي
Mohammed Elhaj
فيس بوك
تويتر
انستقرام
يوتيوب
بنتيريست