فعلا يا الهادى ...انا بقيت بعرف الحاصل شنو.. فى البداية كنت بطلع فى المكنة وهاك يا جرى ... عدة مرات يونس شلبى حاول يقنعنى ان اعمل ال setting فى المكنة random واقيس القلب كل شوية .... تقريبا لى يومين بعمل كده ...
برضو يونس شلبى كان بشتكى لى ان ضغط الدم زايد ولم يستطع انزاله بالرغم انه حريص جدا جدا جدا فى الاكل (لمن ورانى نظامه الغذائئ ..امنت عديل)
وعدته اشترى ليهو حشائش المرمية اللبنانية لانها محلات بيعها فى منطقتنا ....
مرحب امير فى عالم الغنمايات... ناس كتار قبلك دقو صدرهم وقالو حنسوى وحنعمل و شنو شنو... وبرااااااااااااااااحة دقو الزوقة ....
ان شاء الله ما تكون حماسة لمدة يومين وتنتهى .... اصعب شئ هو الالتزام .... حاول ما تلتزم ببرنامج رياضة انت متاكد انو صعب يتوافق مع برنامجك اليومى (البيت ..العمل...الخ).... لانك لو ما قدرت تحققه حتحبط وح abandon المشروع كله .....
من تجربتى ..اكتشفت انو النصف ساعة رياضة يومية هى الوقت الميت عندى ... 9 صباحا ....لا شغل و لا مشغلة و لا اولاد .. ومافى موضوع نهائ... يعنى اكتر حاجة ممكن اعملها اجى البيت واتفرج فى التلفزيون واصاقر سودانيزانلاين ... انصحك بتجنب الالتزام برياضة فى الوقت "الذهبى" اليومى ... الوقت البكون فيهو التزامات ضرورية تجاه الاسرة ..تسوق...راحة الخ ......
غايتو نديك اسبوع ...يا بقيت غنماية نفتخر بها .. او لحقت الزواغين ناس فلان وفلان ....
الاربعاء 19 اكتوبر 2011 مرور اسبوع على بداية الريجيم.. جرى شديد فى المكنة ....عملت السرعة 8 ميل ساعة وجريت فترة قصيرة جدا ..كلمت يونس شلبى بذلك وهو يجرى فى المكنة المجاورة قال لى انه مرة جرى بسرعة 10 ميل فى الساعة...قال لى داير تجرب يلا نجرى مع بعض بسرعة 10 ميل فى الساعة ...وافقت ,,, ظبطنا المكنات (انا وهو) على 10 ميل فى السرعة وبدينا الجرى بسرعة الصاروخ (او كما بدا لى) بعد ثوانى بديت اكورك وخفت اقع ... الجماعة فى الصالة كلهم بدو يضحكو ويراقبو المنظر الغريب ...استطعت باعجوبة تنزيل السرعة وكان قلبى ينتح عديل... يونس شلبى عليهو نفس الحالة ...منتهى ... سالته .جرينا قدر شنو ؟ قال لى 35 ثانية .....لا حولا ...الموت ده كله 35 ثانية بس ....
بعد ان انتهيت قلت لى يونس انا حرقت 220 سعرة حرارية Calories قال لى فطرت بشنو؟ قلت ليهو كباية قهوة و muffin قال لى ال muffin فيها 300 سعرة يعنى تعبك ده كله ما غطيت حق ال muffin ..... عمل لى نفسيات ...
معانا فى الصالة واحد تانى زبون دائم فى الجمنازيوم بدا يشرح اهمية المداومة والاستمرار فى الرياضة واثناء حديثه قال لى اسلوب المقابر ده ما بنفع ... طوالى وقفته وسالت هل قلت مقابر ...ضحك قال لا انا قلت Sedentary lifestyle قلت ليهو معناتها شنو؟؟ شرحها لى ..
قلت ليهو انا سمعتها cemetery ....ضحك مرة تانية وقال الاتنين نهايتهم واحدة
Sedentary معناتها خامل لا يتريض
10-20-2011, 06:35 AM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
الهادى كنر خيرك على المعلومات ...ماقصرت تب ..... الحمد لله القصة طلعت نزله من النوع ابو لستك يادوب الليله قمت منها بعد 5 ايام فى البيت ومشيت على ال3 ميل حقتى النصرى مادايرين كسير وجبص.. يونس شلبى دا بغطس حجرك...درب السلامة للحول قريب اتوزنت يامريم لقيت ليك الميزان معلق فى ال77 قلت الحمد لله اخير من الزيادة ههههه
10-20-2011, 01:12 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
لووووووووووووول.. والله يونس شلبي ده ما ناقش ابو النوم... اسمع كلام الهادي ده.. هو كاواي واي شي، لكن بديك النجيضة... اهم شي في الرياضة الزمن البتقضيه وانت بتتريض (في بداية ممارستك ليها).. أهم من المسافة والجهد المذول.. يعني نص ساعة هروله او جري خفيف، احسن من جري سريع لمدة ربع ساعة... وعادة بقولوا ليك أي نشاط رياضي، بالذات cardio يستحسن انه يستمر أكتر من ثلث ساعة، لانه الابحاث وجدت انه بعد الثلث ساعة دي، الجسم ببدا يحرق دهون... خلي بالك العرق ما مؤشر لحرق الدهون دايماً.. ممكن تكون بتخسر موية، موش دهون... ان شاء الله ما تكون بتنسى قزازة الموية معاك؟ انا متأكده انه يونس شلبي بكون ورّاك ليها دي...
حمدلله على السلامة يا ابتهال ....النزلة احيانا بتكون اصعب من الملاريا..تهد الجسم كله...
الليلة بعد التهور بتاع امبارك داك والجرى بسرعة 10 ميل فى الساعة شعرت بالم بسيط اعلى الساق ...عشان كده اليوم كان عادى ومافيهو مفاجات الحاجة الجديدة الحاولتها ...فى نهاية التمرين ...عملت Fitness test والماكنة سالتنى من العمر والوزن والزمن المطلوب..دخلت المعلومات واخترت خمسة دقائق ... بعد دقيقتين ونص ..غلبنى عديل ...حاولت انزل السرعة ...ابت تنزل...خفت يا اخوانا ماقادر ..الروب...كوركت ليونس شلبى ...قال لى خفض السرعة ... كلمته المكنة مصرة تتم ال5 دقائق اختبار ... رافضة اى تنازل... لم يكن امامنا الا خيار واحد Emergency stop والمكنة وقفت ....
برضو فى بداية التمرين زدت ال incline (طلوع الجبل) الى اعلى درجة اظن 11 مع مشى بطئ 3.3 ميل دقائق ..استمريت لعدة دقائق واضطريت اوقف لصعوبته ...
والله يا مريم ..يونس شلبى بقى لى اكبر مشجع للمواصلة .. الزول ده فعلا مثال للتصميم والالتزام والصبر..... امبارح القريبة دى اتمرن اكتر من ساعة ونص ... ولمن يحكى لى عن وجباته ..جسمى بكش عديل .... ياخ غنماية امير بتاكل احسن منه .... اليوم جاء بملابس مختلفة لان القديمة بقت اكبر منه (عقبالنا)
امبارح مشيت البقالة واشتريت ليهو كيس بتاع مرمية لانه بشتكى من ضغط الدم وحاول كل شئ ولم يفلح ... وعدته فى خلال اسبوع الضغط حينزل لمستوى عادى (اوع المرمية تخزلنى)
10-20-2011, 05:57 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
والله يا شباب كانت مفاجاة جميلة... بالرغم من اننى لاحظت البنطلون بقى مالص شوية لكن برضو ما كنت متخيل انقص اكتر من كيلو فى اسبوع ... ده كله من الرغيف ........
اليوم الجمعة 21 اكتوبر فشلت للمرة الثالثة فى عبور امتحان اللياقة Fitness Test وهو 5 دقائق فقط ...السرعة الاخترتها كانت 4.5 ميل لكن المشكلة ان المكنة بعد مرور دقيقة من بداية الاختبار ترفع ال Incline (الصعود لاعلى) الى 5 درجات واجد نفسى وكاننى اطلع فى جبل عال ..... المهم المرة الاولى سقطت وتبقى لنهاية الخمسة دقائق دقيقة و 40 ثانية المرة التانية تبقت حوالى دقيقة و 50 ثانية ..... طبعا امبارح برضو سقطت فى الاختبار ده ....
ناوى ان شاء الله وبنهاية الاسبوع الجاى اتجاوزه واشوف غيره...
بالنسبة للجزمة ...عندى جزمة رياضية لكن ما برتاح البسها ولاحظت انو جزمة الشغل وهى باشبه بال boot مريحة معاى وطبعا انا سياستى اى شئ ما مكسور ما تصلحه ..
بعد الاصابة قبل يومين قررت اشترى جزمة جديدة فى عطلة نهاية الاسبوع ......
يونس شلبى جاء اليوم مبسوط منى بسطة ما عادية ..بدا يشرب فى المرمية وعجبته جدا وشرب منها اكثر من خمس اكواب امس واستمتع بيها وقال لى انه لاول مرة يصحى من النوم بدون صداع لان ضغط الدم يتسبب فيه قال انه سيقيس الضغط بعد كم يوم ... جاب لى معاهو صندوق بتاع شعير وورانى الطريقة طبخه .....
هى يا اسمارت هوى يونس شلبى ده رسميا هو ال mentor بتاعى عشان بعدين ما نبقى فى يانى مانى
10-22-2011, 11:16 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
باركوا لي.. نقصته 1.3 رطل... مكسب ضخم من مكاسب الشعب.. خاصة اني الاسبوع الفات كنت active بصورة كويسه... بالله صفقة يعني عشان المعنويات وكده.. ويا ابتهال، صرّة الوش نفعت مع الميزان...
الفيديو ده رسّلته لي زوله بثق في كلامها في موضوع الاعشاب والحاجات دي... وقالت لي دي وصفة سمحه... غايته عندي صاحبتي في الفيسبوك علّقت تعليق إيجابي... اسمعوا الوصفة واقروا تعليق صاحبتي... وجرّبوه... ملاحظة، الكمون مقصود بيه الشمار حق الفول..
I give you green light ya Maryom. Drinking water before food is 1, cinnamon is proven for immunity, memory & burning fat 2, lime/lemon enhances burning fat 3. It's also a strong anti-oxidant. Ginger is a magic catabolic ingredient 4... Just go ahead ;)
Quote: مرحب بي أمير معانا.. واهلا بيك... وgood luck، عندك اسباب كتيرة عشان تنجح.. من ضمنها زعلة ولدك دي ...
سلام يا بت الحسين وشكرا على الترحيب ... تعرفي السبب الرئيسي إنو نحن عندنا في العائلة السكري والضغط حماك الله وأهلك منه عشان كدة أخوك جبنة خااالص كل عشرة خمستاشر يوم بالكتير شهر بفحص السكري وتلقيني بقيت أفتش لي على جيم... طبعا ده بالإضافة للود الغياظ ده :)
** النصري تعرف غنماية أمير دي نقصت بيها 2.8 كيلو في أسبوع وإذا عايز الوصفة الما بتقدر عليها بكتبها ليك هنا... يا بتاع الأرطال انت ما تدلع نفسك وتقيف من التمرين من أول مرة تحس فيها بي تعب لأنو أي مجهود إضافي بتبذلوا بعد كدة ده هو الفيه فائدة.. وبعدين ياخي جرب استبدل العيش بي الخس يعني أعمل ليك سندويتش تونا بالموية في لفة خس مع نقطة ليمون عليهاوكل وأشكر ... جربت سندوتش جبنة فيتا محشية في خيار!!،.. عليك بشوربة الملفوف طاعمة وبتحرق :)
Quote: النصري...نجم هذا الاسبوع دون نقاش....استحمل تعب الرياضة و ستب العيش
سمارت سلام ... أها كمان أي شي ولا المحاباة في التحكيم !! خليني أنقص لي كما كيلو تاني ..ما رطل زي الحنكوش بتاعك بطل الأسبوع ده وبعدين نتفاهم.... بعدين انتي مفروض يكون وزنك مثالي عشان تحكمي على الرمتالة الزينا ديل .. ولا شنو:)
طلعته اخدته الاولاد مشوار بالكرعين، مشية صغيرونه، لكن حلوه.. الاكل برضه مظبوط... باكل كويس لكن من غير زيادة... الفي نفسي باكله..
حأعمل حاجه الاسبوع الجاي... يوم الخميس حأوزن على غير العادة (عادة بوزن السبت)... بعداك حأوقف وزن لحدي 11/11/2011.... بعداك حأقوم أوزن.. خلال الفترة دي حأنتظم في المشي وحأحافظ في الاكل بنفس طريقتي القاعده اعملها حسي...
ببدا اليوم بي إني أشرب لي لتر بتاع موية فاترة على فترات متقاربة بتبدأ من بعد صلاة الصبح، بعد ما انتهي من اللتر بتاعي دي بشرب لي شاي أخضر .. الساعة بين الساعة 8 و9ونص ببدأ برنامج الغنماية :) بجيب معاي خيار وخس وجبنة بيضة بفطر بيها ... بعد كم ساعة كدة بمسك لي تفاحة خضرا باكلها بي بذورها من الحرقة :) قبل الغدا بشرب لي كبايتين موية بمشي البيت أشوف لي أي حاجة يا مشوية يا كمان خضار مشكل مسلوق (مكون من ملفوف وكوسة وفاصوليا خضراء).. طريقة عمل المشكل ساهلة بس لو بتعرف الطيارة قامت تخلي الموية تغلي ترمي فيها الخضروات دي مع نص مرقة دجاج وحبة ملح).. بعد صلاة المغرب بطلع أتمشى برجع البيت بشرب لي عصير قريب فروت فريش I LOVE IT وبعد ماآكل لي قطعة جبنة بيضة .. قبل ما أنوم بي ساعتين كدة بشوف لي تونة بالموية مع خس أو تفاحة ولا جوافةأوبلو/بلاك/سترو بيري أعضيها وأمشي أتنيل أنوم!!
يوم الجمعة يوم بتاع محرمات (في الأكل) أي حاجةتجي في طريقي باكلهاوالمدام ما بتقصر يوم الجمعة بكون احتفالي في الأكل محمر ومشمر ومبوخ ورز أبيض ومشكل وهاك يا حلو ...
البرنامج ده حأستمر فيه لي مدة 8 أسابيع بعد ما أنزل الوزن وأكون قريب شوية من وزني بعد كدة حأكل أي حاجة بس بي كميات قليلة مع الرياضة.
هسع الأسبوع الأول انتهى وفي نص الأسبوع التاني ونقصت 2.8 كيلو مع العلم بي إني بوزن يوم السبت الصباح يعني بعد يوم الجمعة الحافل بالأكل.
لاحظ إنو البرنامج ده عدا الجمعة خالي تماما من السكر المكرر، الزيوت، الدقيق ومشتقاته، القهوة، الصودا.
هسع يا النصري عندي علبة بتاعت كعك فرش مجرد ما تدخل الكعكة في خشمك/فمك بتسيح، أصلا لمن تشوفها ساي لعابك بسيل جابوها لي من السودان أمبارح .. وأنا مدمن بتاع كعك .. منتظر يوم الجمعة الساعة 00:00 تجي عشان أدور فيه .. قول إنشاء الله ينفعني.
الأسبوع التاني ده ما متوقع أنقص لأنو المعدة بتكون اتعودت على الكمية الداخلة عشان كدة حأركز على الرياضة من جري ومشي عشان أنقص.
أها كدة كيف ممكن أعلق على الحكم ولا لسع عايز مداخلات.
بت الحسين حسب علمي انتي في السعودية لو في الرياض أنا زمان كنت بمشي بلف حول السور بتاع مدينة الملك فهد الطبية المسافة طويلة بس بتلقي مجموعة كبيرة بتتمشى بتتشجعي.
اخيرا نجحت فى اختبار اللياقة والنتيجة (حسب تقرير المكنة) ممتاز بدرجة 46
الصباح مشيت الصالة وانا زعلان من حكاية السقوط المتكرر فى الاختبار ده ... قلت كدى نسمع كلام امير و ما اعاين فى الساعة .. لحسن الحظ التلفزيون كان فاتح ...برنامج الرياضة ولقطات من دورى القدم الامريكى NFL ..انتهبت مع البرنامج خاصة واننى اكره كراهية عمياء فريق ميامى الذى انهزم للمرة السادسة على التوالى .. لمن انتهت الفقرات الرياضية لقيت الاختبار فى اخر دقيقة ... الحمدلله خلصت ال 5 دقائق .....
Quote: يا اسمارت هوى يونس شلبى ده رسميا هو ال mentor بتاعى عشان بعدين ما نبقى فى يانى مانى
ذى ما بتقول حبوبتى....بخيت وسعيد عليك منتورك يونس شلبى. و تانى نصايحى القيمة لكل رواد البوست ما عادا يونس شلبى protege
مريوم يا زوله جربى اى خلطة ....طول ما ما فيها حاجه مضرة.. لكن انا غايتو الدنيا علمتنى...ان موضوع نقصان الوزن ده عبارة عن حساب بسيط. الطاقة الداخلة (الاكل) تكون اقل من الطاقة المستهلكة ( السعرات الحرارية البيحتاجها الجسم عشان يشتغل ذى" القلب يدق , الامعاء تهضم, المخ يشتغل ومده"+ السعرات الحرارية البتتحرق فى الرياضة). و اكيد كل زول عندةا متابلزم ختلفة...لكن ما فى اى بحث علمى بيقول ان فى اى اكل بناكله ممكن يزيد المتابلزم بتاعتنا. و الله اعلم
Quote: سمارت سلام ... أها كمان أي شي ولا المحاباة في التحكيم !! خليني أنقص لي كما كيلو تاني ..ما رطل زي الحنكوش بتاعك بطل الأسبوع ده وبعدين نتفاهم.... بعدين انتي مفروض يكون وزنك مثالي عشان تحكمي على الرمتالة الزينا ديل .. ولا شنو:)
امير محمد...سلامات....انا (عجبك او لا) سمييييينة و امينة. انا عينت روحى حكم هنا براى.....و النصرى (اتمقلب) و وافق. بعدين منو اللى ح يحكم المسابقة و النصرى متسابق فيها ??? لازم زول ذى كده...لا ناقة له و لا جمل فى موضوع نقصان الوزن ده.....ما تخلينى اصور ليك شنطتى بتاعة الاكل البشيلها كل يوم المكتب
بالمناسبة...نظامك الغذائي صعب شديد...و اشك انك ممكن تستمر فيه لزمن طويل. يا جماعة (كلكم ما عدا النصرى...عنده مدرب خاص)اهم حاجه فى الرياضة و النظام الغذائي انهم يكونوا حجات معقولة عشان يبقوا style of life ....اكل الخضار مهم...و الفواكه و اللحمة. الاهم برضوا التقليل من النشويات و السكريات او تركها نهائي. مبروك اجتياز اختبار اللياقة يا النصرى....و كلنا فخروين بيك (رغم انف امير) ما تنسي...امشي جيب الجزمة يا اخى....
10-24-2011, 06:12 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: هسع يا النصري عندي علبة بتاعت كعك فرش مجرد ما تدخل الكعكة في خشمك/فمك بتسيح، أصلا لمن تشوفها ساي لعابك بسيل جابوها لي من السودان أمبارح .. وأنا مدمن بتاع كعك .. منتظر يوم الجمعة الساعة 00:00 تجي عشان أدور فيه .. قول إنشاء الله ينفعني.
هههههههههههههههههههههههههههههه، والله خطير يا امير... انا بضحّكني كتابتك وشايفاك مغيووووظ من الموضوع.. لكن واضح انه برنامجك عايز تواصل فيه.. فgo ahead والله وان شاء الله تنجح فيه... انا طبعا في الدمام... وحركتي صعبة جداً عشان عندي بيبي صغيرونه عمرها تلاته شهور.. عشان كده المرقه ما ساهله... لكن برضه عاصره على نفسي وبطلع مرّه مرّه... عندنا حديقة في الحي بتاعنا حولينا ممشى.. بخلي محمود يلعب في الحديقة وبكون بلف حوله في الممشى ومعاي البيبي في الpushchair..
Quote: مريوم يا زوله جربى اى خلطة ....طول ما ما فيها حاجه مضرة.. لكن انا غايتو الدنيا علمتنى...ان موضوع نقصان الوزن ده عبارة عن حساب بسيط. الطاقة الداخلة (الاكل) تكون اقل من الطاقة المستهلكة ( السعرات الحرارية البيحتاجها الجسم عشان يشتغل ذى" القلب يدق , الامعاء تهضم, المخ يشتغل ومده"+ السعرات الحرارية البتتحرق فى الرياضة). و اكيد كل زول عندةا متابلزم ختلفة...لكن ما فى اى بحث علمى بيقول ان فى اى اكل بناكله ممكن يزيد المتابلزم بتاعتنا. و الله اعلم
انا وصلت لنفس نتيجتك دي... عشان كده حاسه انه امير ويونس شلبي والنصري ممكن يتعبوا من برنامجهم ده.. التوازن أهم شي يا شباب... انا مرّه عملته دايت نقصت بيها 11 كيلو... أي والله... وحسي دي لو عايزنها بوريكم ليها... لكن بعد ما وقّفتها، رجعوا الحداشر كيلو وفوقهم حبّة مسك .... الخلطة دي يا سمارت بتخلي الزول ما ياكل كتير.. ولو قريتي كلام صاحبتي، بتحسي انها it makes sense... لانه الself-control is over rated يا قول Dr.Phill... شفتيني كيف وانا I'm quoting Dr.Phil
10-24-2011, 06:27 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: تخلينى اصور ليك شنطتى بتاعة الاكل البشيلها كل يوم المكتب
مبالغة... معقول يا اسمارت تمشى الشغل بالدكوة ... زكرتينى مرة سودانيين شغال فى مكان واحد ..قررو يوم يفطرو فول بوووش ... الحضور من الكندييين اقتنعو تماما انو الافارقة متوحشين لمن شافو المنظر ....
للاسف الشديد يونس شلبى لم يحضر للصالة اليوم ..فالباب مفتوح للمتطوعين لمدنا بالنصائح ......
نرجع لاخونا امير ... البرنامج بتاعك معقول بس حكاية اليوم المفتوح يوم الجمعة دى ما نافعة.. لانك ممكن تخسر مجهود الاسبوع كله فى اليوم داك .....
10-24-2011, 06:49 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: مبالغة... معقول يا اسمارت تمشى الشغل بالدكوة ... زكرتينى مرة سودانيين شغال فى مكان واحد ..قررو يوم يفطرو فول بوووش ... الحضور من الكندييين اقتنعو تماما انو الافارقة متوحشين لمن شافو المنظر
دكوة شنو يا اخى???انا اخر مرة اكلت دكوة بتكون قبل 25 سنة كده ... قلت لى بوش عديل كده ??? طبعا متوحشين....انا السودانية دى ما حصل اكلت بوش....فول محترم فى الصحن..معاه جبنة و من غير زيت و عيش...فول بالمعلقة....و ما فى زول يحشر يده معاى فى صحنى
شنطتى اليوم الاتنين ...كان فيها: للفطور فى المكتب: 1- نص كباية شوفان + ملعقى صغير زبيب+ نص كباية لبن. 2- عبوة كباية جزر مقطع صغير. للسناك حوالى الساعة 10 صباحا: 3- عبوة كباية عنب للغداء حوالى الساعة 12 منتصف النهار: 5- محشية فلفلية خضراء...ح اكلها من غير عيش... من غير المنطقى اكل المحشي بالعيش...كيف يعنى تاكل زر بالعيش????? 6- قطعة بسبوسة مقاس بوصة X بوصة ...للتحلية بعد الغداء. للسناك الساعة 3 ظهر: 7- معلقى كبيرة fat free cottage cheese + apple sauce
10-24-2011, 07:08 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: قلت لى بوش عديل كده ??? طبعا متوحشين....انا السودانية دى ما حصل اكلت بوش....فول محترم فى الصحن..معاه جبنة و من غير زيت و عيش...فول بالمعلقة....و ما فى زول يحشر يده معاى فى صحنى
وب علي! اعتبري نفسك ما اكلتي فول نهائي في حياتك!
10-24-2011, 07:18 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
لا كمان ما تصعبيها على يا مريم...زماااان (لما كنت صغيرة) كنت باكل عيش مع الفول. لكن موضوع الزيت ده هو اللى اصلوا ما واقع لى. و كنت بحرد الفول فى البيت لما يكبوا زيت. و احسن لى مليون مرة فتح فيه علبة سارين (بعد ما اصفى الزيت)....يا الله مبالغة
Quote: شنطتى اليوم الاتنين ...كان فيها: للفطور فى المكتب: 1- نص كباية شوفان + ملعقى صغير زبيب+ نص كباية لبن. 2- عبوة كباية جزر مقطع صغير. للسناك حوالى الساعة 10 صباحا: 3- عبوة كباية عنب للغداء حوالى الساعة 12 منتصف النهار: 5- محشية فلفلية خضراء...ح اكلها من غير عيش... من غير المنطقى اكل المحشي بالعيش...كيف يعنى تاكل زر بالعيش????? 6- قطعة بسبوسة مقاس بوصة X بوصة ...للتحلية بعد الغداء. للسناك الساعة 3 ظهر: 7- معلقى كبيرة fat free cottage cheese + apple sauce
يا سمارت تعرفي إنك واحدة حنكوشة!! ما بتاكلي بوش والفول بتاكلي بالملعقة ومن غير زيت !!!! قلتي لي ملعقة صغيرة من الزبيب هههههها ياخي الكلام الفوق ده كله أنا في ربع ساعة بكون لهطه/أكلته!! وكيف سمينة وبتشيلي معاك السامبلز دي للفطور كدة شككتينا في مصداقيتك كحكم ... قالت قطعة بسبوسة بوصة في بوصة!!! فكيتيها حامضة لكن! والله وتالله ربع كيلو بسبوسة أيام الجاهلية بشرب بيه شاي الصباح!! كدي ورينا مكتبكم ده وين عشان انتظرك جنب الباب أريحك من فطورك البايخ ده! ...
Quote: البرنامج بتاعك معقول بس حكاية اليوم المفتوح يوم الجمعة دى ما نافعة.. لانك ممكن تخسر مجهود الاسبوع كله فى اليوم داك .....
أولا مبروك النجاح وعقبال ما تنقص ليك 10 رطل في شهر .. رطل قال :) بالعكس اليوم المفتوح يوم الجمعة ده بجهجه المعدة بخليها تتخيل إنو خلاص ليبيا فتحت وبعد كدة دي الكمية الحتجيها كل يوم !! لمن ترجع تقرض عليها من يوم السبت بتتحير ومعاها ببدا نقصان الوزن.
أها الموزة دي خربت عليك!! ياخي الكلام البتقول فيه ده حراق روح ساكت!!
Quote: قلت لى بوش عديل كده ??? طبعا متوحشين....انا السودانية دى ما حصل اكلت بوش....فول محترم فى الصحن..معاه جبنة و من غير زيت و عيش...فول بالمعلقة....و ما فى زول يحشر يده معاى فى صحنى
ياخي الكلام ده مزعلني شديد والله!!! نحن أيام الجامعة البوش ده بناكله في طشت طشت!! بنفت زي 60 عيشة كدة مع موية الجبنة .. موية جبنة يا حنكوشة والكلام ليك يا سمارت! تقولي لي ما في زول ياكل معاي في صحني!! أعضيك في راسك هسع!! غيظتيني .. أها بتاكلي فسيخ ولا يككي!
بت الحسين ربنا يحفظ ليك أولادك .. الدمام جميلة أنا اشتغلت لي زي سنة كدة في راس تنورة كنت بجي الدمام لي بت عمي كل خميس.... البرنامج بتاعي ده لي فترة مؤقتة يعني شهرين بالكتير أنقص شوية بعد كدة الواحد يعمل حسابه في الأكل ... هسع الأسبوع التاني قرب ينتهي الحمد لله.
تحياتي للجميع وبرجع ليكم بعد شوية نشوف قصة الفول بالمعلقة ده!!
أمير
10-25-2011, 05:12 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
امير يا اخي ما تطلع علي إشاعات . زمان كنت بأكل الفول بالعيش. بس هسي لو أكلت ربع عيشه بزيد ذي عشرة كيلو كده. زمان ايام الجاهلية ( ايام الجامعة) أنا و صحبتي كنا بننزل من المواصلات في ابو جابرة بتاع البيتزا. بنطلب بيتزا كبيرة و بناكلها كلها برااااانا. بعدها ما بنقدر حتي نقيف للمواصلات، بنقعد في الارض نستني الحافلة. بعدين أنا ما حنكوشه، عدم اكل البوش سببه أني , Germophobic و ما بقدر اكل مع زول في صحن واحد. و عندي مصران عصبي من رابعة ابتدائي عشان كده ما بقدر اكل حاجه فيها زيت كتير. بحب الفسيح جداً، و الفسيح هو الحاجه الوحيدة اللي بأكلها بالعيش و بعدها بصوم لباقي اليوم كده. أنا مستعده اكل اي شيء، بس يكون نظيف.
تعرف اليوم علي الساعة 3 الظهر كده جابوا لينا cupcake في المكتب. شلتا واحده و قاعده مسااااافة أعاين ليها. في النهاية تقلت دمي و اكلتها
سلامتك يا سمارتي ... الله يحرق الـIrritable colon أنا عندي الحاجة دي من بدري لكن ما شغال بيها .. باكل شطة الدكوة الما شبهك دي وأي حاجة بتهيجه ولمن أتعب شديد اليوم التاني ابدأ آكل زبادي بس صباح مسا
Quote: بحب الفسيح جداً، و الفسيح هو الحاجه الوحيدة اللي بأكلها بالعيش و بعدها بصوم لباقي اليوم كده.
خلاص في يوم من الأيام بعزمك فسيخ .. بس ما عايزين حنكشة حتاكلي معانا في صحن واحد!! وتاكلي بي أصابعك الخمسة ولازم على الأقل تقرمشي ليك 5 بصلات أثناء الأكل مش (بسبوسة بوصة في بوصة)! بس ما تخافي العيش حيكون فرنسي كرنشي :)
كدي خلينا نرجع للرياضة:(
أمبارح بعد المغرب على الرغم من إني تعبان قلت أتمشى وزعلان لأني لي يومين انشغلت ما قدرت أتمرن .. المهم طلعت ومشغل mp3 player وركبت الشارع مشي سريع في شارع رئيسي في المنطقة الفاصلة بين الاتجاهين .. بديت الساعة 06:17 دقيقة وفضلت ماشي وفي يدي قارورة:) موية ماشي لمن حسيت بي بطن رجلي بدت تسخن لمن عاينت للساعة لقيتها 07:23 دقيقة ده اتجاه واحد يعني لسع عندي رجعة .. شلت هم قلت لو رجعت نفس المسافة دي مشي حيكون over فكرت أركب تكسي لكن ما شايل معاي المحفظة وبدل ما أمشي بي تكسي وأتصل على المدام تطلع تحاسب التكسي أخير أمشي 5 ساعات تاني لأنها حتشيل حسي!! المهم قلت كدي خليني ابدا أمشي gently مسافة وبعدين لمن أقرب على البيت أجري... قبل البيت زي بي كيلومتر كدة بديت أجري لساني بقى جاري في الواطة .. وصلت البيت دايخ تقريباالساعة 08:32 .. وبقيت مهيبر لحدي الساعة 12 بالليل !! الصباح وأنا طالع للشغل قست المسافة بالعربية لقيت إني مشيت حوالي6.4 كيلومتر.
Quote: بس هسي لو أكلت ربع عيشه بزيد ذي عشرة كيلو كده.
أنا يا سمارت بالموية بسمن يعني هسع قبل ما أبدا البرنامج ده الوجبة الرئيسية هي الغدا لكن برضو الواحد زايد!!
كدي ورينا شنطة الفطور بتاعتك فيها شنو لي يوم الأربعاء عشان نتعلم منك.
تحياتي وموفور الصحة والهنا
أمير
10-25-2011, 05:15 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: بالعكس اليوم المفتوح يوم الجمعة ده بجهجه المعدة بخليها تتخيل إنو خلاص ليبيا فتحت وبعد كدة دي الكمية الحتجيها كل يوم !! لمن ترجع تقرض عليها من يوم السبت بتتحير ومعاها ببدا نقصان الوزن.
True... جسم الانسان لما يكون في حالة تجويع مستمرة بدخل في حالة بتخيّل فيها انه حصلت مجاعة... جسم الانسان ده مخزّن حاجات من زمن انسان الكهف... الكان بياكل بالحوجه... يعني ممكن يلقى صيد ياكله كله في يوم واحد، ويقعد اربعة خمسة يوم ما يلقى شي.. اها الجسم مبرمج انه لو اكل بعد جوع طويل يقوم يخزّن الاكل ده على شكل دهون وبالتالي يقوم يسمن... لكن لما تجهجه النظام بأكله معتبره وسط الاكلات الخفيفة دي... بتطلع من حالة الstarvation دي بدون ما يتخزن ليك دهون اضافية، والجسم برجع يحرق... وبحرق من المخزون الموجود and you loose weight....
بس ببقى التساؤل انه الزول حيقدر يلتزم بالبرنامج ده كتير؟ غايته حماسك مُعدي يا امير.. واعتقد انه دخولك للمسابقة حيخلي الناس تشد الهمّة أكتر...
Quote: True... جسم الانسان لما يكون في حالة تجويع مستمرة بدخل في حالة بتخيّل فيها انه حصلت مجاعة... جسم الانسان ده مخزّن حاجات من زمن انسان الكهف... الكان بياكل بالحوجه... يعني ممكن يلقى صيد ياكله كله في يوم واحد، ويقعد اربعة خمسة يوم ما يلقى شي.. اها الجسم مبرمج انه لو اكل بعد جوع طويل يقوم يخزّن الاكل ده على شكل دهون وبالتالي يقوم يسمن... لكن لما تجهجه النظام بأكله معتبره وسط الاكلات الخفيفة دي... بتطلع من حالة الstarvation دي بدون ما يتخزن ليك دهون اضافية، والجسم برجع يحرق... وبحرق من المخزون الموجود and you loose weight....
يا مريم انت كده جهجتينا بتاكيدك لكلام امير ده ... الكلام فىهو " ريحة" منطق .... لكن كمان ومن الجانب الاخر كيف الزول يعمل يوم مفتوح وياكل ما تشتهى النفس ويرجع باقى الاسبوع يحرم نفسه .....
ما اكضب عليك الكلام ده اول مرة اسمعه وكنت مفتكر امير بهترش برة من راسه
10-25-2011, 05:30 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: ... جسم الانسان لما يكون في حالة تجويع مستمرة بدخل في حالة بتخيّل فيها انه حصلت مجاعة... جسم الانسان ده مخزّن حاجات من زمن انسان الكهف... الكان بياكل بالحوجه... يعني ممكن يلقى صيد ياكله كله في يوم واحد، ويقعد اربعة خمسة يوم ما يلقى شي.. اها الجسم مبرمج انه لو اكل بعد جوع طويل يقوم يخزّن الاكل ده على شكل دهون وبالتالي يقوم يسمن... لكن لما تجهجه النظام بأكله معتبره وسط الاكلات الخفيفة دي... بتطلع من حالة الstarvation دي بدون ما يتخزن ليك دهون اضافية، والجسم برجع يحرق... وبحرق من المخزون الموجود and you loose weight....
مريوم و امير...انتو متاكدين من الكلام ده????الجزء ده من الكلا صحيح....
Quote: جسم الانسان لما يكون في حالة تجويع مستمرة بدخل في حالة بتخيّل فيها انه حصلت مجاعة... جسم الانسان ده مخزّن حاجات من زمن انسان الكهف... الكان بياكل بالحوجه... يعني ممكن يلقى صيد ياكله كله في يوم واحد، ويقعد اربعة خمسة يوم ما يلقى شي.. اها الجسم مبرمج انه لو اكل بعد جوع طويل يقوم يخزّن الاكل ده على شكل دهون وبالتالي يقوم يسمن
لكنه بيناقض الجزء ده:
Quote: لكن لما تجهجه النظام بأكله معتبره وسط الاكلات الخفيفة دي... بتطلع من حالة الstarvation دي بدون ما يتخزن ليك دهون اضافية، والجسم برجع يحرق... وبحرق من المخزون الموجود and you loose weight
انا شايفه انو امير بيجوع جسمه طوال الاسبوع ...لكن لما يجى الجمعة بياخد راحته...و بالتالى الجسم بيقول :خلاص امير الليلة صاد ديك يا الغزالة. و امير كسلان ما بيطلع يصيد طوالى عشان كده احسن لى اخزن كل الطاقة دى لليوم الاسود. و بالمناسبة الموضوع ده ما على مستوى الاسبوع او الشهر بس...حتى على مستوى اليوم. المصارعين اليبانيين السمااااان اياهم...عشان يسمنوا بياكلوا وجبة واحدة فى اليوم. الواحد بيجوع طوال اليوم...بالليل بياكل وجبة واااحدة. و الجسم بيكون فى starvation و بيخزن كل الاكل. عشان كده احسن طريقة لنقص الوزن اكل وجبات كتيرة صغيرة (6 وجبات فى اليوم...بس صغار شديد).
النصري امير فعلا بيهترش بره من راسه
مريوم...
Quote: Go losers! I mean it in the most positive way
...Go losers دى مفروض نعملها شعار البوست امير عازومة الفسيخ ما باباها....لكن بفرز عيشتى بدرى .....بدرى... و بغرف فى صحنى. و احمد الله بقرررقش البصل...بس يكون بصل اخضر. مبروك ال 6.4 كيلومتر....و عقبال ال 15 ... طبعا ح تهيبر لو جريت الساعة 8 مساء....اصحى الصباح بدرى اتريض يا اخى
والله يا اخوانا انا مبسوط بسطة... قابلت يونس شلبى اليوم بعد غيابه امس الاثنين... كانت تبدو عليه السعادة الطاغية ... قال لى انه ذهب لمقابلة الدكتور الذى تفاجا بمعدل ضغط الدم لاول مرة يصل لمستويات عادية ..بالحرف الواحد قال لى blood pressure almost perfect 180 على 78 الدكتور كان مستغرب جدا لنتيجة الكشف وقد طلب من يونس شلبى ان يحضر معه مرمية فى زيارته المقبلة ....
التمرين اليومى:- قمت باختبار اللياقة بنفس النسب (5 دقائق) واستطعت اكماله بطلوع الروح لكن للاسف النتيجة كانت "تحت المتوسط" below average وهناك الرقم 36 الذى لم افهم المقصود منه ....
Quote: ما اكضب عليك الكلام ده اول مرة اسمعه وكنت مفتكر امير بهترش برة من راسه
Quote: النصري امير فعلا بيهترش بره من راسه
والله أنا يا جماعة بتذكر السنة الفاتت كنت بتونس لي مع أخصائي حميات غذائية وهو قال لي ياخي لازم يكون في يوم تاخد فيه بريك وتاكل أي حاجة عايزة لي سببين الأول عشان ما تمل من الرجيم وتبدا الأسبوع التاني وتكمله وتاني حاجة لأنو لمن تبدأ الرجيم بتتغير الكمية والنظام الغذائي بشكل مختلف عما تعودت عليه معدتك ولذلك نقصان الوزن بكون أكبر في الأسبوع الأول من البرنامج الغذائي والأسبوع التاني بكون فلات flat يعني ما بتنقص عشان كدة تبدأ تزيد من جرعة التمارين الرياضية من الأسبوع التاني ولحدي ما ينتهي البرنامج عشان تنقص ليك من 1 إلى 2 كيلو في الأسبوع .. وإنو المعدة مثلا لو عودتها أسبوع على كمية وجيت كسرتها في يوم اليوم ده بالنسبة ليها بكون بداية كمية جديدة بتبدأ تحرق على أساسها.
Quote: انا شايفه انو امير بيجوع جسمه طوال الاسبوع ...لكن لما يجى الجمعة بياخد راحته...و بالتالى الجسم بيقول :خلاص امير الليلة صاد ديك يا الغزالة. و امير كسلان ما بيطلع يصيد طوالى عشان كده احسن لى اخزن كل الطاقة دى لليوم الاسود.
يا مفتحة انتي أنا ما بجوع نفسي أبدا وبتناول من 3 لي 6 وجبات بس بتكون تقريبا خالية من الدهون والسكريات وفي اليوم المفتوح ده بتناول أي حاجة أكسر بيها البرنامج.
بت الحسين يا كايداهم;) .. ما تشتغلي بي سمارت الأوبيييس دي كلامي وكلامك صح ومهني كمان .. خلي العايز يتأكد يمشي يغوغل... واصلي في برنامجك عايزين نحتفل يوم 11/11/2011 بالأربعة كيلو الحتنقصيها.
Quote: طبعا ح تهيبر لو جريت الساعة 8 مساء....اصحى الصباح بدرى اتريض يا اخى
أنا بصحى يوميا الساعة 04:50 دقيقة صباحا وكنت بتمرن الصباح في جيم قريب من المكتب بس هسع المكتب حينقلوهو مكان تاني وما عايز أجدد اشتراكي عشان ما أخسر:) التمرين الصباح ممتع جدا جدا ومفيد.
أمبارح اليوم كان شكله أوفف .. جيت أنوم الولد زي الساعة 7:30 نمت قبل ما ينوم وللصباح وما عارف أنا كنت نايم ولا دايخ! :)
تحياتي للجميع
أمير
10-26-2011, 04:59 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
النصرى....... جارتى البوسنية و استاذة ابنى لما كان فى الحضانة زارتنا امس و قالت ضغطها مرتفع جدا و ما فى اى حبوب نافعة. طق....اتذكرت انت و يونس شلبى. الزولة فى الستينات و خفتا اديها مرمية و انا ما مجرباها. اديتها tea bages بتاعة كركدى و قلت ليها جربيه حبة حبة. و قيسي ضغطك بعد كباية الكركدى بنص ساعة كده. و- ذى اى دكتور محترم- قلت ليها خلينا نتكلم بعد اسبوع...لو ما نفع الكركدى, بمشي دكان العرب اجيب ليك مرمية.
Quote: بت الحسين يا كايداهم;) .. ما تشتغلي بي سمارت الأوبيييس دي كلامي وكلامك صح ومهني كمان .. خلي العايز يتأكد يمشي يغوغل... واصلي في برنامجك عايزين نحتفل يوم 11/11/2011 بالأربعة كيلو الحتنقصيها.
بنت الحسين دى انت ما عارفا سااااى. خطرة (ما شاء الله عليها) وح تغلبكم كلكم فى النهاية. و هى من ناحية كايداهم....كايداهم......يا اخى انتو كلكم بغرتونى الايام دى
Quote: يا مفتحة انتي أنا ما بجوع نفسي أبدا
انت براك اللى شبكتنا غنماية...و ما عارفه ايه.... على العموم الميزان يكضب الغطاس....قصدى الاوبيس
للاسف الشديد لم استطع ان اتريض اليوم بسبب مواعيد مستعجلة مع احد الزبائن .... كان يمكننى تاخير مواعيد الرياضة الا اننى كنت قلق بعض الشئ و قررت الغاء التمرين اليومى ... ان شاء الله بكرة اعود للبرنامج واعوض اليوم المفقود ....
___________
يا جعفر محى الدين المواعيد قربت والسباق قائم فى مواعيده اا/11/2011 مسافات القصيرة 400 متر......
انت لابت كده مالك ؟ ...خوفتنى عديل.....
10-26-2011, 10:26 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: بت الحسين يا كايداهم;) .. ما تشتغلي بي سمارت الأوبيييس دي كلامي وكلامك صح ومهني كمان .. خلي العايز يتأكد يمشي يغوغل... واصلي في برنامجك عايزين نحتفل يوم 11/11/2011 بالأربعة كيلو الحتنقصيها.
تعرف يا أمير.. حكمنا الهُمام دي، كان جيت قلت ليها نقصته أربعة كيلو في اقل من اسبوعين حتركب الطيارة وتجي تدقّني... عشان كده انا بخاف منها.. وعامله حسابي.. وناوية على نقصان بطيء ولكن مستمر ان شاء الله
الليلة جيت ليكم بي تقليعه عملتني ليها فردتي في الفيسبوك... حاجه كده اسمها Zumba.. لسه ما بديت فيها... لكن شكلها لزيز للناس البحبوا الaerobics...
امشوا الYouTube بتلقوا عنها حاجات كتيره...
اها يا النصري، لقيت لي يونس شلبي خاص بي.. الزولة دي بتمارس الرياضة ستة أيام في الاسبوع... وما شاء الله عليها، سمبتيك خالص... حتقعد تنقّني عشان اتريّض انا برضه
10-26-2011, 10:56 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
يا اسمارت ما تضيعى زمن الحاجة دى ....الكركدى ضياع زمن ساى امش دكان اللبنانين واشترى المرمية الاعشاب (ما تشترى المعلبة فى شكل tea bags) خليها تشربها 3 او اربعة مرات فى اليوم وصدقينى فى اقل من اسبوع الضغط حينزل لمعدلات طبيعية جدا .... على مسئوليتى ....واراهنك اذا لم يحدث تحسن حافرتك الريجيم بتاعى وامشى KFC اضرب لى سندوتشين Double Down
الحكاية دى اتاكدنا منها تماما .. ودلوقت دكتور اخصائئ كندى عنده رغبة يعرف الحاصل شنو
*****
يا اخوانا مبروك الصفحة التالته ... عادة كده انا اى بوست بعمله بزهج منه بعد يومين تلاته لكن البوست ده ..الفورة مية (طبعا يا اسمارت ما عارفه الفورة مية معناتها شنو)
المهم ... تحسن رهيب ..شعور عارم بالنشاط ..... لاول مرة اربط حزام البنطلون فى حتة جديدة وبدون ضيق ... الله ده كريم ادانا من حيث لا نحتسب
Quote: تعرف يا أمير.. حكمنا الهُمام دي، كان جيت قلت ليها نقصته أربعة كيلو في اقل من اسبوعين حتركب الطيارة وتجي تدقّني... عشان كده انا بخاف منها.. وعامله حسابي.. وناوية على نقصان بطيء ولكن مستمر ان شاء الله
مريوم لو بقى على الدق هينة الزولة دي جابت كثافة الراجل بتاع أبل الاسمو جوب الظاهر السيغنال بتاع البلوتوث حقها بعيد المدى (عينها حارة) أعملي حسابك واتحصني :)
ZUMBA شفت عنه رفيو والله ممتاز شكله ومسلي منها رياضة ومنها الواحد لمن يمشي ليه حفلة يعمل فيها مايكل جاكسون !!
النصري المرمية دي نحن قاعدين نشرب بيها الشاي سادة زيها وزي القرفة والمستكة إضافة نكهة وكدة لكن أول مرة أعرف أنو المرمية بتنزل الضغط... لكن خلاص بعد ده بقشر بيها:)
سمارت عاملة شنو مع البسبوسة بوصة في بوصة:)
اليوم كان هادئ بالنسبة لي مشيت حوالي 40 دقيقة أوت دوور وجيت راجع البيت .. إنشاء الله يوم السبت الصباح بوزن وأجيب ليكم النتيجة لكن ما حاسي بي إني حأنقص حاجة على الرغم من إنو في إحساس بالراحة..
يا امير ..اعشاب المرمية بتنزل الضغط 100% اتاكدنا تماما من المعلومة دى بعد تجارب كتيرة جدا جدا ....
انا ما عندى مشاكل ضغط (والحمدلله) عشان كده ما شغالة بيها شديد .. برضو طعمها اشتر شوية ....
-------------
لليوم الثالث نجحت فى اكمال اختبار اللياقة لكن بتيجة تحت المتوسط below average ..ما عارف الحصل شنو لانو اول يوم كانت النتيجة ممتاز excellent ...هناك رقم يظهر عقب انتهاء الاختبار ..رقم اليوم كان 35.8 امس كان 36 وحرابيش ....
اليوم الجمعة 28 نوفمبر 2011 اتاكدت تماما انو لياقتى منتهية وتحت المتوسط ..قمت باجتياز اختبار اللياقة للمرة الرابعة وبنفس النتيجة below average ... يتريض معى فى الصالة زميل حبشى مسلم يتكلم اللغة السودانية بطلاقة.. سالته قبل شهر لماذا لا يجرى فى المكنات ويكتفى باجهزة شد العضلات ,, قال لى انه اخد نصيبه كاملا فى الجرى والمشى فى اثيوبيا ,,قال انه كان يمشى 6 او 8 ساعات فى اليوم متنقلا بين مدينته والمدينة المجاورة ... هو فى نفسى عمرى الا ان وزنه حوالى 180 رطل ...
طلبت منه ان يختبر لياقته فى المكنه حتى يمكننى المقارنة ..وافق.. ادخلنا البيانات ..5 دقائق ...الوزن العمر والسرعة 4.5 ميل ... بدا يجرى ولم تبدو عليه اى علامات تعب ,,,,, فى نهاية الاختبار كانت دقات قلبه 85 (انا كنت بين 135 الى 135) النتيجة فى الجهاز تقول ان دقات قلبه اقل من المتوسط وعليه ان يعيد الاختبار... اصطكينا شوية فى المعنى الا اننا اتفقنا ان فى الاخر ان السرعة عنده يجب ان تكون اكبر من 4.5 حتى ينشط القلب ويصل لمستويات مقبولة.... بالنسبة لى لانه لياقتى منهية وراقدة رز فالقلب يجتهد بكل سعته لاكمال الاختبار... نفسيات ...
تعرف في حاجة مهمة في الجري وهي إنو الواحد يجري بي تناغم وما تتنفس في خشمك/فمك عشان نفسك ما يقطع يعني لمن تجري شغل cruise control :) وأنسى وبعدين أجري ساكت ما تركز مع الزمن والمسافة مجرد ما تحس بي نفسك تعبت شد على نفسك شوية في الزمن ما في السرعة عشان تستفيد .. أناصراحة كنت بقطع بي سرعة بعدين جربت أشغل نفسي بي أي حاجة أسمع مزيكا أتفرج تلفزيون قدامي أفكر في حاجة ما عندها حل وأنسى إني بجري .. لأنو لو ما شغلت تفكيرك حيكون تفكيرك كلو في جريت قدر شنو.. أنا خلاس تعبت حاقيف ..وكفاية الليلة وتقطع وعد على نفسك إنو بكرة تزيد الجرعة وده ما يحصل بكرة!!
أول أمبارح حسيت بي ألم في الركبة اليمين ومشيت الدكتور أمبارح .. قال لي انت محتاج تنزل أربعة كيلو عشان تقدر تتمرن تمارين عنيفة شوية ولحدي ما تنقص أمشي جنتلي .. الحمد لله.
الليلة عندي صحبي بنافسني في حب الكعك اتصل علي قال لي إنو شاكي بي إنو عندو سكري وبالأرقام القالها بالتأكيد عندو سكري .. أنا طبعا خفت وطوالي قلت للمدام الكعك ده أنا ما عايز أشوف وشو تاني كرهته الله واحد!!! تخيل الزول ده ما شاء الله تبارك الله بقعد على علبة الكعك بقوم منها لمن يشبع .. يشبع!! .. الله يستر عليه وعلينا كلنا.
بكرة بجيب ليكم نتيجة الوزن ونسبة الدهون وkeep your fingers crossed.
لك الود كله أمير
10-29-2011, 00:15 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
والله يا اسمارت حكاية التنفس دى مجهجهانى .... انا بتنفس زى السمكة ...الخشم يفتح ويقفل زى ال garage door وما قادر اعمل تناغم ...مرات نفس طويل ومرات نفس قصير..... حاولت اتنفس بالانف لقيت روحى حاغمر ......
Quote: تخيل الزول ده ما شاء الله تبارك الله بقعد على علبة الكعك بقوم منها لمن يشبع .. يشبع
يا حليل ايام الجاهلية (قبل شهر ونص) كنت بقش اى حاجة تقع فى طريقى .. دلوقتى مستغرب فى روحى ...كيف وصلت المستوى ده من الاستهتار... الحمدلله الواحد استعدل من نفسه وما انجبر زى الناس البجيهم سكرى ويا دوب يبدو يغيرو فى طريقة حياتهم .....
يا اخو للاسف استاذى ومرشدى يونس شلبى عنده مشكلة فى الركبة والدكتور طلب منه عدم الجرى ... دلوقت انا راسى مقطوع وداير توجيهات
Quote: أنا مش قلت ليكم امير بيتكلم من برا راسه؟؟؟ امير يا مفتح، اهم حاجه حاجه في الجري ان الزول يتنفسم من خشمو. و ما تقولي أخصائي تغذية او خلافه
وحياتك خطأ مطبعي يعني كنت عايز أكتب ما تنسى تتنفس بي خشمك .. وجيتي انتي ناطة لي بالمرجع بتاعك كمان .. سامحنا يا النصري وانتي يا سمارت إنشاء الله تجي الأولى:P ... منتظراني أغلط يا بتاعت البسبوسة بوصة في بوصة! إنشاء الله حيجي اليوم وأشوف أثر الحاجة دي فيك :)
وبعدين ياخي قولي لي كفارة على الركبة البتوجعني:) حكم متحيز!!
أنا اليوم وزنت والحمد لله في أسبوعين نقصت 3.6 كيلو والدهون نقصت 3.1 ومواصل إنشاء الله بواصل البرنامج وتاني بوزن بعد أسبوعين... التمارين حتكون خفيفة يعني في الغالب مشي خفيف وإيروبيكس.
تحياتي أمير
10-29-2011, 10:58 AM
غباشي غباشي
تاريخ التسجيل: 01-19-2007
مجموع المشاركات: 1729
السلام عليكم يا جماعة بوست رائع يا النصري و اسمارت و باقي الشباب, ان شاء الله حانقل ليكم تجربتي و خبرتي في خسران الوزن و حاحكي ليكم كيف قدرت اتخلص من 21 كيلو في 4 شهور , بس ان شاء الله القى زمن مع الزرزرة الانا فيها دي ترقبونا
Quote: مريوم لو بقى على الدق هينة الزولة دي جابت كثافة الراجل بتاع أبل الاسمو جوب الظاهر السيغنال بتاع البلوتوث حقها بعيد المدى (عينها حارة) أعملي حسابك واتحصني :)
يخسي عليك يا امير ياخ، سمارت دي كانت حزينة خلاص لوفاته... واتصلته بيها كانت ما قادره تنوم من الحزن.. لكن عشان افسر ليك اكتر انا عندي بيبي معتمدة علي.. لو نقصته وزن كتير في وقت قليل دمي بكون مليان بالسموم النتجت من عملية حرق الدهون دي.. وحتمشي للبيبي في الحليب... عشان كده لازم انقص براحه عشان ما اضرّها... سمارت هي النبهتني للحاجه دي لما شكيت ليها اني بنقص سريع ....
الليلة طلعته اتمشيت مشية حلوه خلاص.. وجيت عايزه اعمل Pilaties ... دي من الرياضات الحلوه جدا لتقوية الcore muscles... يعني الجزء الاوسط من الجسم... الناس العندها كروشه بعملوها... هي ما ساهله، لكن فعّاله جداً...
اكلي ما جايطه فيه خالص، باكل بصورة متوازنه... حسي حأتعشى بي سلطة فواكه ظريفة ... بس فواكه فريش مقطّعه....
لازلت محاربه الميزان، ما حأشوفه إلا يوم 11/11/2011... واتمنى اني اكون نقصته لي كيلو ونص ... حلوين يا سمارت موش؟
10-29-2011, 09:32 PM
غباشي غباشي
تاريخ التسجيل: 01-19-2007
مجموع المشاركات: 1729
سلامات يا النصري انا طولي 183 سنت يعني طويل لكن مشكلتي كلها في نمط الـ Nutrition الخاطيء الكنت متبعو زمان كما ان العوامل الوراثية ايضاً لها دور كبير كما سيأتي شرحو لاحقاً بالاضافة لعدم الاهتمام بالرياضة الرياضة و التغذية الصحية اهم عوامل فقدان الوزن و الوصول للغاية المبتغاة في عالم الصحة و الرشاقة .... حكاية صعبة لكن ليست مستحيلة و تحتاج لصبر و عزيمة كبيرين
10-30-2011, 03:46 AM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
Quote: يخسي عليك يا امير ياخ، سمارت دي كانت حزينة خلاص لوفاته... واتصلته بيها كانت ما قادره تنوم من الحزن.. لكن عشان افسر ليك اكتر انا عندي بيبي معتمدة علي.. لو نقصته وزن كتير في وقت قليل دمي بكون مليان بالسموم النتجت من عملية حرق الدهون دي.. وحتمشي للبيبي في الحليب... عشان كده لازم انقص براحه عشان ما اضرّها... سمارت هي النبهتني للحاجه دي لما شكيت ليها اني بنقص سريع ....
الله يحفظ ليك البيبي وتتربى في عزكم إنشاء الله ... لا سمارت دي بس حسادة مني ساكت لأنها ما شاء الله عليها اكتيف وشكلها slim and vivid .. لكن مزعلاني قصة البسبوسة بوصة في بوصة دي .. ياخي أنا عندي صحبي كنا بنمشي نشتري كيلو بسبوسة ونص كيلو بسيمة من لارين في الشارقة ونشتري لينا أربعة لبن المراعي وندخل حديقة المجاز نتونس بيها وبعد داك نمشي البيت (المؤمن حلوي)هي تجي تقول لي بسبوسة بوصة في بوصة :)
أمبارح مشيت حوالي 40 دقيقة مشي اعتيادي لكن الحمد لله الواحد حاسي بي راحة في المعدة وخفة في الحركة.
Quote: والله يا اسمارت حكاية التنفس دى مجهجهانى .... انا بتنفس زى السمكة ...الخشم يفتح ويقفل زى ال garage door وما قادر اعمل تناغم ...مرات نفس طويل ومرات نفس قصير..... حاولت اتنفس بالانف لقيت روحى حاغمر ......
النصري...مفروض تخلى خشمك فاتح طوالى...و بيسموه ال dead fish اقرا الموضوع اللى ختيته لامير...ح تلاقيه مفيد كفارة ليونس شلبى يا اخى....ربنا يعينه.
مريوم ....شفتى انير ده شايل حسي كيف?!!! ال Pilaties دى يا اختى غلبنى كلو كلو براى....شكلى لازم اشوف لى class ...حتى اليوجا. شكلها دى الحجات اللى عاوزه مزاج و طولة بال. كيلو نص مناسبات.....بالتوفيق يا مريوم...
ولدنا غباشي....مرحب بيك....و اكيد ح تفيدنا شديد
ابتهال...ما تشتغلى بالموضوع....كنت بمسي جم فيه نساء بس. كان يشرح القلب...ناس وزنها 100 رطل و ناس وزنها 400 رطل...و كلهم ماخدين راحتهم و متصالحين مع روحهم
امير...ما تعقدنى يا اخى....انا قلت ليك سمينة و امينة. وخاصة الايام دى. بامر الطبيب ما ممكن اعمل اى رياضة غير انى اتمشي...عشان كده باكل بسبوسة بوصة X بوصة.
10-31-2011, 06:03 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
بالنسبة لي غايتو يا النصري، فمن وجهة نظري إنو من القواعد المهمة والأساسية لتعلم رياضة الجري والاستمرار فيه لفترات طويلة هي الآتي :
عند البدء بمزاولة الجري، حاول تخليك ريلاكس، وما تحاول تجري بسرعة من البداية، و بقدر الإمكان حاول أن تحافظ على تنفس طبيعي أثناء الجري، أجري براحة لحدي ما تضبط نفسك على إيقاع معين، وكل ما تلقى إنك you feel breathless أو بتتنفس بسرعة cool down وخفض سرعتك..
ممكن تكون انت أو أي شخص آخر شايف الكلام ده كلام عام، فنحاول التفصيل فيهو على قدر المستطاع ..
ولنبدأ من الكلام الموجود في الصفحة الجابتها "سمارت"، لمحاولة تعريف الإيقاع - الـ rhythm - أو التناغم زي ما سماه "أمير" في مداخلته والمقصود بيهو شنو بالضبط ؟؟
المقصود القدرة على إنو الواحد يقدر يعمل timing بين وقع خطواته على الأرض أثناء الجري أو الـ "foot-strike " وعملية الـ breathing - التنفس أو "الشهيق والزفير" أثناء الركض
و لتوضيح عملية الـ timing زاتا فيمكن فهمها من خلال النظر إلى النمط الموجود في أدناه :
فعلى سبيل المثال، لو أخدنا التكنيك أو النسق المسمى بـ "breathing rhythm "2:2 ، وهو الشائع عند العدائين النخبة واللي هو عبارة عن "أخذ شهيق في خطوتين، والزفير في خطوتين تاليات" فشرح النمط ده بتفصيل ممكن يكون كالتالي : Foot-strike: ( Left ) >>>>>>>>>>>> Breath “ in ” / begin inhale Foot-strike : Right >>>>>>>>>>>>>> Breath “ in ” /continue inhale Foot-strike: Left >>>>>>>>>>>>>> Breath “out “ / begin exhale Foot-strike: Right >>>>>>>>>>>> Breath “out “ /continue exhale ثم يستمر تواصل النسق... * الـ breath in والـ breath out بيكون قبل أن تطأ بقدمك الأرض.. ليصبح توقيت النسق على النحو التالي: ( inhale, foot strike >>>continue inhale, foot strike >>> exhale, foot strike >>>continue exhale, foot strike)
وليس شرطاً بالطبع أن يكون لديك نفس النمط أو النسق أعلاه، فهناك تكنيكات وأنساق أخرى (2:1، 3:2، 3:1، 4:1) ، بالإضافة لما هو مذكور في الرابط بتاع سمارت (2-2, 3-3, 2-3, 3-4)، كما يمكن التدريب على أنواع مختلفة، لكنه بروسس يحتاج لبعض الوقت ولإبطاء سرعة الركض لاستيعاب النسق والتعود عليه.. ومن المهم القول إنو كل شخص يستطيع أن يجد النمط الملائم معاهو من خلال التركيز أثناء التدريب، البعد عن التوتر، والحفاظ على تنفس طبيعي بقدر الإمكان..
والغرض من كل الكلام الكتير ده ليس التركيز على النمط في حد ذاته، ولكنها محاولة لإعطاء صورة عامة تساعد في فهم وتقريب مسألة الإيقاع أو التناغم هذه، لذلك أتمنى إنو تكون وقعت أو وضحت الفكرة من كل الكلام ده..
11-01-2011, 08:37 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
انا مستمره في المشي... واعتقد والله اعلم اني قاعده انقص.. الpilaties حلوه لانها بتشد المنطقة الوسطى من الجسم.. برضه اليوجا عندها نفس الاثر ده، لكن الpilaties احسن كتير.. نزلي الapp بتاعها في الايفون... لما الدكتور يقول ليك OK.. جربي...
11-01-2011, 09:14 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: بصفتى الحكم بعلن عن فشل الاتية اسماءهم....فشل زريع
تحياتي يا اسمارت ممكن الى حد ما تقولي علي فاشل لانو العشرين يوم الفاتو كنت بشتغل من 8 صباحا لغاية 10 او 11 بليل و ما عندي وقت لاي رياضة غير طلوع و نزول السلم و الاكل معظمو مطاعم ، و بعد بكرة ماشي السودان لمدة 25 يوم و اكيد هناك ما حيكون في اي محافظة مع الضحايا و لا برنامج رياضي غير الحوامة و مشاوير الفاتحات عشان كدا لو حافظت على الكيلو النزلتو دا بكون ماقصرت .
تحياتي يا النصري و مبروك التلاتة رطل و عقبال التلتين رطل :)
مريم كيفك و العيال و ابوهم و مبروك الرطل و شوية ، انا ماشي بكرة الظهر السودان لو عندكم حاجة ماشة لحقوني ليها .
مرحبا بالخاسرين الجدد و معليش حاكون غايب الفترة الجاية و نتلاقى بعد الاجازة .
11-01-2011, 10:41 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
شكرا الهادى على المعلومات المهمة.... تقريبا كل يوم بشعر بتحسن فى طريقة الجرى ..يعنى مثلا ..امبارح ..بديت بتسخين .. ثم عملت السرعة7 ميل... جريت بيها لغاية نفسى انقطع,,, خفضت السرعة وبديت امشى... بعد دقائق عملت السرعة 7 وبديت اجرى .... واستمريت هكذا لمدة 20 دقيقة ,,, برضو لى كم يوم بحاول انظم عملية التنفس .... ما وصلت لسه للصورة النهائية لكن فى تحسن مستمر .....
يا اسمارت ما قريت الوصلة بتاعتك لسه ....شوية كدة فى زحمة الايام دى... وغالبا تكون دى اخر مداخلة لى اليوم الثلاثاء 31 اكتوبر لان اليوم كلها مشغول ولن اعود للبيت قبل الساعة 9 مساءا ... (دلوقت الساعة 4:30 صباحا) لن استطع التمرن اليوم ولكن ساكون شغال شغل بدنى مرهق طوال اليوم ....
نلتقى غدا الاربعاء باذن الله بتفاصيل عن الريجيم (لان الرياضة خلاص اصبحت مضمونه فى الجيب)
بالسلامة يا حمد نتمنى ان تستمتع باجازتك فى السودان وان تجد جميع الاهل والاصدقاء بخير... اعتقد ان السودان فرصة كويسة لنقصان الوزن بسبب الجرى الشديد والمشغلومية الدائمة....
11-02-2011, 07:33 AM
غباشي غباشي
تاريخ التسجيل: 01-19-2007
مجموع المشاركات: 1729
سلامات يا مريم و آسفين للتأخير , والله مزرزر زرزرة شديدة في الجامعة عندي Yearly PhD progress meeting و ان شاء الله بتفكا منها يوم الجمعة .. دعواتكم بالله
المشي مستمر والحمدلله.. دي براها نعمه كبيرة.. ما قاعده احسب بمشي كم، لكن بمشي كتير وسريع... وتلقوني كل شوية احاول اغني لوووووووول، لو قدرته اغني بزيد سرعتي....
برضه مشيت اشتريت لي ملابس جديدة، ملابسي بقت كبيرة علي.. لقيت روحي نزلته قياسين في الملابس... صفقوا لي بالله...
مواصلين يا شباب... شدوا الهمة
غباشي، منتظرينك .. انا عارفاها زنقة الannual report دي، الله يفك زنقتك... انا زنقتي كانت الشهر الفات... لكن صفقوا لي خخخخ... عليك الله اول ما تنتهي تعال احكي لينا ادينا معنويات بالله... حاكم الهادي ده يطفّش.. وامير يكاوي.. والنصري هو ويونس شلبي بتاعه ديل يجيبوا نفسيات.. شوف ابتهال زاتها اختفت كان موازراني يحليلها...
11-02-2011, 10:20 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
سلام للجميع وكل سنة وانتو وأهلكم طيبين وربنا يحقق أمانيكم ويمتعكم بالصحة والعافية وراحة البال.
back to business!!0
ما في بزنيس ولا حاجة !!! عندي زحمة شغل الثلاثة أيام الفاتت برجع البيت الساعة أربعة ونص بودي الولد الكاراتيه برجع البيت أنوم ساعتين بقوم أشتغل لحدي منتصف الليل أو ما يزيد وبنوم وبصحى الساعة خمسة إلا عشرة بتنيل أرجع المكتب تاني! لكن لمن الولد يدخل الصالة بلف حول الصالة كدة زي 30 دقيقة مشي سريع..
الحمد لله محافظ على البرنامج بتاع الأكل وهسي مرت 3 أسابيع ومافي مشاكل.
والله يا اخوانا زحمة مبالغ فيها.. حسى انا بكتب وجسمى كله بنتح من التعب ....
مشيت صالة الرياضة صباح اليوم ونسبة لضيق الوقت اكتفيت بربع ساعة فقط جربت فيها الجزمة الجديدة ...بالرغم من خفتها الا اننى شعرت انو حاجة شترة ...احتمال كبير بسبب عدم التعود....
انتهيت من الرياضة وبسرعة عندى مواعيد الساعة 10 صباحا لكدة سريعة ....
بالمناسبة الشغل الجانبى (غير الوظيفة) هو شغل نظافة (موكيت او carpet ..نظافة عامة و نظافة متخصصة لسقوف المطاعم والمحلات التجارية ceiling cleaning)
انا السودانى الوحيد فى العالم المتخصص فى نظافة وصيانة ال ceiling
11-03-2011, 07:51 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
اولا تحية كبيرة و صفقة قوية لمريوم على اجتهادها و مواصلاتها فى الرياضة رغم البيبى و الدكتوراة و مشاغلها. B] غباشي...ربنا يعينك مع القراية....انت و مريم تطفشوا من موضوع الدكتوراة ده كلو كلو.
الهادى ....شكرا ليك يا اخى. النصري ده ما بيسمع كلامى. كلمه ان احسن ليه يضبط طريقة تنفسه و يتعلم يواصل الجرى لفترا الطول قبل ما يركز على موضوع السرعة كم ده. امير ...ربنا يعينك...زنقة الشغل دى جايانى الاسبوع الجاى. نوم و امل بصورة صحية. حمد فتح الرحمن......طلوع السلالم ما بطال. و لما تمشي مطعم اختار بصورة حكيمة. الشكلة فى السودان و الحليف عشان شراب الصودا. الناس ما مصدقا انى ما بشرب صودا و هاك يا حليف. اتمنى ليك اجازة سعيد و تمشي و تجى بالسلامة
النصري....ما شاء الله عليك. تعرف انا نفسي اعمل لى بزنس براى كده بالجنبة. هسي راجية الولاد يكبروا شوية كده و افكر ح اعمل شنو.
طوالى يا امير يا اخى. نعمل لينا مطعم صغير...يكون فيه حجات بسيطة جدا..(المنيو الكبيرة مخسر) ممكن نعمل فيه طعمية و سمك محمر و جداد مشوى (كباب) و سلطة خظراء و سلطة تبولة و كركدى و قنقليز..... بس اهم شيء المطعم يكون صغير و نظيف. انا ذاتى طباااااخة....اسال النصرى...انا اللى وريته وصفة سجك ما تخرش الميه...بس هو اللى عامل ذي القطط...ياكل و ينكر...هسي يجى يقول يونس شلبى وراه وصفة السجك
11-04-2011, 09:01 AM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
Quote: نعمل لينا مطعم صغير...يكون فيه حجات بسيطة جدا..(المنيو الكبيرة مخسر) ممكن نعمل فيه طعمية و سمك محمر و جداد مشوى (كباب) و سلطة خظراء و سلطة تبولة و كركدى و قنقليز..... بس اهم شيء المطعم يكون صغير و نظيف
أنا حريف بتاع طعمية وفول مطبوخ وكباب والملاح الأحمر وملاح الروب وباقي الحاجات بتاعت الحبوبات دي اتعلمتها كلها من my mother in lawالباقي بخلي عليك انتي تهتمي بأمور النظافة وخدمة العملاء أنا بهتم بالطبخ وجودة الطعام ويا ريت لو المطعم كان في مكان فيه مطاعم عربية زي المكان بتاع دكاكين العرب في فيرجينيا سكاي لاين كدة عشان المنافسة..(YOU THINK I AM KIDDING!! RIGHT)
Quote: بس هو اللى عامل ذي القطط...ياكل و ينكر...هسي يجى يقول يونس شلبى وراه وصفة السجك
ههههها النصري ده بس بتكون خانته الذاكرة سامحيه لكن شوفي ابتهال تحت شكلها برضو قطة لأنو نسبت رجيم الغنماية لي نصري مع إنو أناصاحب الفكرة .. بس برضو بسامحها :)
Quote: ابتهال قاعدة وبقيت غنمايه عديل على قول النصرى من اكل الخضار والفواكة التي لاتسمن ولاتغني من جوع
Quote: نعمل لينا مطعم صغير...يكون فيه حجات بسيطة جدا..(المنيو الكبيرة مخسر) ممكن نعمل فيه طعمية و سمك محمر و جداد مشوى (كباب) و سلطة خظراء و سلطة تبولة و كركدى و قنقليز..... بس اهم شيء المطعم يكون صغير و نظيف
أنا حريف بتاع طعمية وفول مطبوخ وكباب والملاح الأحمر وملاح الروب وباقي الحاجات بتاعت الحبوبات دي اتعلمتها كلها من my mother in lawالباقي بخلي عليك انتي تهتمي بأمور النظافة وخدمة العملاء أنا بهتم بالطبخ وجودة الطعام ويا ريت لو المطعم كان في مكان فيه مطاعم عربية زي المكان بتاع دكاكين العرب في فيرجينيا سكاي لاين كدة عشان المنافسة..(YOU THINK I AM KIDDING!! RIGHT)
Quote: بس هو اللى عامل ذي القطط...ياكل و ينكر...هسي يجى يقول يونس شلبى وراه وصفة السجك
ههههها النصري ده بس بتكون خانته الذاكرة سامحيه لكن شوفي ابتهال تحت شكلها برضو قطة لأنو نسبت رجيم الغنماية لي نصري مع إنو أناصاحب الفكرة .. بس برضو بسامحها :)
Quote: ابتهال قاعدة وبقيت غنمايه عديل على قول النصرى من اكل الخضار والفواكة التي لاتسمن ولاتغني من جوع
Quote: سلطة خظراء
الأخت شهادة عربية ولا شنو:)
11-04-2011, 03:37 PM
جعفر محي الدين جعفر محي الدين
تاريخ التسجيل: 11-12-2008
مجموع المشاركات: 3649
الأخوة والأخوات الرابحون كل سنة وأنتم طيبون وعيد سعيد
يا اسمارت ياخي حطمتينا فشل ذريع عديل كده يعني فشل بس ما بتكفي ؟ المهم كان فشلنا شوفي لينا طريقة نبقى مساعد حكم وبالعدم كده مسطبة درجة أولى الحمد لله إنو الرياضة دخلت حياتنا من جديد وبحاول بقدر الإمكان أجري يوميا أو ع الأقل يوم بعد يوم
Quote: يا جعفر محى الدين المواعيد قربت والسباق قائم فى مواعيده اا/11/2011 مسافات القصيرة 400 متر......
انت لابت كده مالك ؟ ...خوفتنى عديل.....
تعظيم سلام ليك يا النصري والله أنا مبسوط من البوست بسطة شديدة وإن شاء الله يكون سبب في تغيير نمط حياتنا بس يوم 11 دا مالو جاء جري كده ما في مشكلة نخليك تفوز ونقول لروحنا الجايات أكتر من الرايحات
11-04-2011, 05:17 PM
غباشي غباشي
تاريخ التسجيل: 01-19-2007
مجموع المشاركات: 1729
سلام يا جماعة, جيناكم بعد زنقة كده الله لا وراكم ليها؟
Quote: المشي مستمر والحمدلله.. دي براها نعمه كبيرة.. ما قاعده احسب بمشي كم، لكن بمشي كتير وسريع... وتلقوني كل شوية احاول اغني لوووووووول، لو قدرته اغني بزيد سرعتي...
مريم ... ايوة keep going و اهم حاجة يكون في محفز عشان تزيدي الـ rhythm بتاع الاداء زي الغناء , بالجد بيزيد الحماس و بيخلي الاداء احسن بكتير , انا لما اكون ماشي الجيم لازم الـ IPod بتاعي يكون مشحون و الـ Playlist ليست تكون جاهزة عشان الـ Treadmill و كدة
Quote: غباشي، منتظرينك .. انا عارفاها زنقة الannual report دي، الله يفك زنقتك... انا زنقتي كانت الشهر الفات... لكن صفقوا لي خخخخ... عليك الله اول ما تنتهي تعال احكي لينا ادينا معنويات بالله... حاكم الهادي ده يطفّش.. وامير يكاوي..والنصري هو ويونس شلبي بتاعه ديل يجيبوا نفسيات.. شوف ابتهال زاتها اختفت كان موازراني يحليلها...
جيتكم يا يا مريم لكن و الله الزنقة كانت صعبة و ما زالت اثارها باقية .... اساساً الـ anual review بتاعي المفروض يكون اول الشهر الجاي .... لكن عشان الـ supervisor بتاعي مسافر ماشي تايوان قال لي نقدم الـ meeting الكلام داه كلوا كان يوم الاثنين الفات < جاني تاني يوم قال لي نعملوا يوم الجمعة دا غير باقي الشغل و كتابة thesis الثقيلة ..... و العجب في الـ convener قعد ينظِّر لينا في الـ report و في النهاية الحمد لله الموضوع مشى
[QUOTE]الحمد لله محافظ على البرنامج بتاع الأكل وهسي مرت 3 أسابيع ومافي مشاكل.[/QUOTE] امير keep it up و طالما و صلت الاسبوع التالت بدون مشاكل معناها جسمك متقبل الوضع الجديد باتياح و اصل على كدة و حزاري من اللخبطة بالذات في المرحلة دي , لكن لازم ولابد من الرياضة
[QUOTE]غباشي...ربنا يعينك مع القراية....انت و مريم تطفشوا من موضوع الدكتوراة ده كلو كلو.[/QUOTE] شكراً يا سمارت ..... و الله يا اسمارت عاد نكضب عاد الشغلة حاااارة لكن انتوا قدرها
Quote: سمارت تعالي نفتح لينا مطعم مع بعض أنا طبااااااخ
يا جماعة الناس تقول يا الله و انتو تقولوا استغفر الله؟ بالله لو سمحتوا ناقشوا مواضيعكم الهدامة بعيد you guys are distracting the loser's pursuit of losing weight
Quote: السقط السقط +الجوع الجوع= السمن السمن
سلام يا ابتهال .... في مرات كتيرة الاداء في الشتاء بيكون احسن بكتير من الصيف و دا من واقع تجربتي الشخصية My greatest accomplishment ever was entirely in the winter كتري من الموية و الفواكه بين الوجبات و خلي الفرق بين كل وجبة و التانية ثابت ... تابعي معانا و ان شاء الله حتتحسني
و نواصل كان ربنا احيانا
_____________ عندي مشكلة في البراوزر بتاع قوقل كروم
(عدل بواسطة غباشي on 11-04-2011, 05:24 PM) (عدل بواسطة غباشي on 11-04-2011, 05:26 PM) (عدل بواسطة غباشي on 11-05-2011, 02:49 AM)
والله يا اخوانا الظاهر البوست ده Picked up some steam lately لانو حسى الواحد ما عارف اعلق على شنو ولا يخلى شنو ولا يرد على جعفر محى الدين البقى زى المريخ داير ينسحب .....
كدى نحاول نبدا خطوة خطوة ... مع ناس الشاورمة والفلافل ديل... قبل يومين ما اتمرنت لانو كان عندى شقتين لازم اظبطهم نص النهار بين الدوام الاول والثانى ..للاحتياط جبت معاى helper المهم الحمدلله الشغلانة مشت كويس وانتهينا من الشغل فى زمن قياسى.... اها كنت جعان مهوى ودايخ من الجوع ... وماعارف اكل شنو ...لانو كل المطاعم اكلها خارج اللستة بتاعتى ... فى النهاية مشيت شارع قريب من محل شغلى ...وجدت محلين ..واحد بتاع سمك محمر fish and chips التانى بتاع شاورمة وفلافل .... كنت متردد ايهما اقل ضررا ...فكرت فى السمك لكن اتزكرت انه مطبوخ بالزيت والبطاطس بتودى التوج ... بقيت على محل الفلافل ...... دخلت ..سلمت على صاحبه وطلبت سندوتش فلافل صغير و 4 طعميات على الجنبة وقزازة موية صغيرونية .... قال لى الحساب 11 دولار وحرابيش .. ياخ معقول السندوتش ب 6 دولار والطعميات الاربع 2.30 وقزازة الموية دولار .... كيف الحساب بقى 11
بديت اكل ومغيوظ من استهبال العربى صاحب المحل ومن ظرافته المصطنعة.... والشى البغيظ ..قال لى راقب لى المحل ماشى اصلى ..لو جاء زبون قول ليه حارجع بعد دقيقتين ...
حصلت ..تستنكحنى فى دولارين وتقول لى راقب لى الدكان .... الكلام حرقنى شديد وغلبنى اسكت ... مشيت ليهو قلت لى محلك ده غالى شديد.. بدا يتظارف ويقول لى داير انزل المعاش بسرعة .... طلعت وخشمى ملح ملح .... وتانى محله ده نهائئ ما حاجى بجنبه
فيا شباب لو دايرين تعملو مطعم اهم شى الامانة مع الزبائن
11-05-2011, 07:02 AM
EBTIHAL OSMAN EBTIHAL OSMAN
تاريخ التسجيل: 08-30-2011
مجموع المشاركات: 244
Quote: وقررت تسمية الأسبوع الأول (أسبوع الغنماية!Vege)
Quote: ههههها النصري ده بس بتكون خانته الذاكرة سامحيه لكن شوفي ابتهال تحت شكلها برضو قطة لأنو نسبت رجيم الغنماية لي نصري مع إنو أناصاحب الفكرة .. بس برضو بسامحها :)
اها يا امير عشان تصدق انى بقيت صحى مطششة من عدم الشبع ... ياسيدى لك العتبى حتى ترضى وان شاء الله ربنا يزيد ميزان حسناتك وينقص من ميزان كيلوجراماتك قول امين
Quote: e: سلطة خظراء
الأخت شهادة عربية ولا شنو:)
هى كل شى ولا الحكم حقنا دامابنرضى فيها...نظام كسير تلج وكدا هههه غباشى
Quote: كتري من الموية و الفواكه بين الوجبات
الفواكه مقدور عليها لكن شراب المويه دا غلبنى عديل كدا بالذات فى الشتاء ................ كمية المويه البشربا فى اليوم ماتامة ليها لتر النصرى ووين يونس شلبى لسه مابقى كويس ..اوعى تكون عيتو المرمية.. ركز بعد دا مع الحكم حقنا دا عشان مانبقى فى الخير اجقلب (سمارت ) والشكر لحماد(يونس شلبى)
Quote: الله يا اخوانا الظاهر البوست ده Picked up some steam lately لانو حسى الواحد ما عارف اعلق على شنو ولا يخلى شنو ولا يرد على منو
والله صدقت
11-05-2011, 08:38 AM
غباشي غباشي
تاريخ التسجيل: 01-19-2007
مجموع المشاركات: 1729
Quote: كمية المويه البشربا فى اليوم ماتامة ليها لتر
ابتهال .... كمية الموية البتشربيها دي بسيطة شديد و اقل من المعدل العام , المفروض على الاقل تشربي لترين , اما في حالة الـ Diet المفروض تكتري منها و دا سبب رئيسي في احساسك بالجوع لان شرب كمية كبيرة من الموية بتقلل الشهية suppress appetite عشان كدة لازم موية باستمرار. بعدين لاحظي انك ما بتشربي سوائل تانية زي العصاير و البيبسي الفيها سكر و ده بيخلي الجسم dehydrated و الـ dehydration دا هو المجوعك بالنسبة للتعويدة على الموية خلي عندك دايماً Bottle صغيرة ابو 500 مللي او اي حاجة portable كدة و ابدي اشربي منها كل نص ساعة و كل ما تخلصيها امليها تاني و خليها دايما معاك
11-05-2011, 12:36 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
ابتهال.. والله من حسي خايفة من الميزان.. انا مفروض اوزن السبت دور الليلة... وخاااااايفه القاه محلك سر... ببكي عديل كده بعد الجهد الباذلاه ده... عليكم الله عزوني لو جيتكم قلت ليكم واقف مكانه.. عشان ما اسيب البرنامج ده...
ههههههههههههههه بقى عندك discrimination ولا بتلاحظ ليهم ساي؟
المشي تمام... طلعته اتمشيت الليلة وامبارح الحمدلله.. المشيه بقت جزء اساسي من يومي، ما بحس بيه اكتمل كان ما مرقته اتمشيت... الحمدلله... النتيجة يوم الجمعه..الللللللللللله يستر!
الموضوع قرب يخستك عندي لأني فاكي اللعب من يوم الجمعة لحدي أمبارح!!!
يوم الجمعة أصلا يوم مفتوح وجا يوم السبت صيام والفطور كان عصيدة بي ملاح أحمر ونعيمية أول يوم العيد الغدا كمية بتاعت لحم ولمة عزابة معاي في البيت لحم وشطة وشعرية وشربوت وموت أحمر! لحدي منتصف الليل .. الأحد بيتزا بابا جونز ... المهم ما في تمارين لمدة أربعة أيام ترخيمة تقيلة .. الواحد رجع غنماية تاني من اليوم وقررت ما أوزن الأسبوع ده حأجل الوزن لحدي نهاية الأسبوع الجاي عشان ما تجيني نفسيات!!!
تحياتي للجميع
11-08-2011, 06:50 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
ابتهال...اسمعى كلام غباشي و اشربى موية. و ما تقولى:الجؤ بارد ح اشرب شاى بدل الموية. الشاى فيه كافين..و الكافين مدر للبول و بيخلى جسمك يتخلص من السوال اسرع. عشان كده مفروض تشربي لترين موية فى اليوم...و قصاد كل كباية شاى زيادة ...تزيدى كبايتين موية. الكلام ده للقوة برضو
غباشي...الحمد لله على السلامة...مرحب بيك. ما تنقطع...ادينا طلة مرة واحدة فى اليوم...على الاقل. مريوم...ما تشيلى هم..ان شاء الله الميزان يديك سمع الخير لو وزنك ما نقص لمدة اسبوع واحد واصلى فى نفس البرنامج لمدة اسبوع تانى. لو بعد الاسبوع التانى ما حصل تغيير (او لا سمح الله حصلت زيادة) غيرى نوع الرياضة. من مشي..اعمليه مشي اسرع شوية. او زيدى الزمن. من نص ساعة لعمليه 45 قيقية. و شوفى بيحصل شنو.
Quote: أنا حريف بتاع طعمية وفول مطبوخ وكباب والملاح الأحمر وملاح الروب وباقي الحاجات بتاعت الحبوبات دي اتعلمتها كلها من my mother in lawالباقي بخلي عليك انتي تهتمي بأمور النظافة وخدمة العملاء أنا بهتم بالطبخ وجودة الطعام ويا ريت لو المطعم كان في مكان فيه مطاعم عربية زي المكان بتاع دكاكين العرب في فيرجينيا سكاي لاين كدة عشان المنافسة..(YOU THINK I AM KIDDING!! RIGHT)
داير تعملوا مطعم للسودانيين ??? يا فرده الموضوع ده حاولوه ناس كتار و فشل. بعدين انا البرحلنى فرجنيا شنو? انا عايشة فى كلفورنيا الجميلة هسي شفت ليك هندى فاتح مطعم للهنود???كل الاهل لازم يكون متامرك...عشان الزباين الطعمية و السمك المحمر و الكركدى و التبولة والكباب و الكفتة دى كلها حجات انا جربها مع الامركان و طعمها بينفع معاهم. لما اعزم امركان فى للبيت بعمل اكل سودانى بمواصفات امريكية. المحشي is #1 ...لكن عمله فى مطعم صعب. الطعمية دى اساسا بيختفوها ختف. الكركدى...مشروب اساسي فى كل مناسبات مكتبنا. اسمع كلامى فى المنيو و ح تكسب. معليش يا جماعة...لكن موضوع المطعم ده انا بفكر فيه لى سنيين.
امير يا اخى شهادة عربية شنو يا اخى????? انا قارية تعليمى تحت الجامى و الجامعى كله فى السودان.
Quote: الحمد لله إنو الرياضة دخلت حياتنا من جديد وبحاول بقدر الإمكان أجري يوميا أو ع الأقل يوم بعد يوم
اخونا جعفر محي الدين ...معليش يا اخى. بس انت غطست غطسه شديده...و شكنا انك طنشتا. خليك ذى النصري اخونا ده...كان ما اتريض...يجى يقول ليك نفيي انقطع فى الشغل...الصيت و لا الغنا
النصرى....خلاص اليد انتهى...واليوم الاتنين....الحاصل?
11-09-2011, 04:21 AM
غباشي غباشي
تاريخ التسجيل: 01-19-2007
مجموع المشاركات: 1729
كل سنة و انتو طيبين يا شباب ... (ما داير اقول ليكم يا losers) و ينعاد عليكم و انتو في تمام الصحة و قمة الرشاقة
Quote: غباشي...الحمد لله على السلامة...مرحب بيك. ما تنقطع...ادينا طلة مرة واحدة فى اليوم...على الاقل
اهلا يا اسمارت ... الله يسلمك
جيتك يا مريم ... طبعا انا ما كنت سميين بمعنى سمين لكن كنت slightly overweight , طولي مساعدني شديد (برضو ما طويل شديد) لكن المهم يعني ما obese و اهم حاجة ما عندي كرش لكن مشكلتي الاساسية هي اني مرضان بي حاجة اسمها بسكويت ... (مدمن عديييل) , كنت مستعد اقعد اليوم كلو و ما اكل غير بسكويت اول مرة لاحظت لحتتة اني المفروض اعمل حسابي و انتبه لوزني كانت اثناء الفحص الطبي لما خشيت الجامعة (زماااااااان) المهم في الجامعة مع الدرش و القراية و الطلعة و النزلة نجحت انزل وزني لكن الكلام دا كلو كان بدون رياضة او ريجيم و كنت بشرب بيبسي و باكل عادي بس ما كتير .... الفطور في الجامعة و العشاء في البيت بعد ما ارجع .... لانو عادي كنا بنرجع من الجامعة قريب المغرب موضوع الرياضة في السودان ممل شديد و بياخد وقت خصوصاً لو ما عندك عربية و برضو كان مكلف نوعاً ما .... و بعدين فكرة انو يكون يكون متاح 3 مرات بس في الاسبوع دي بتخليك تطلع برا المود اذا جليت اي تمرين (انا بتكلم عن الوضع بتاع زمان من سنة 98 و لحدي 2005) بعدين ثقافة الرياضة كانت منعدمة الا عند القليلين , الرياضة بمعني الـ GYM مش الكورة و خلافها من مناشط , عشان كدة ما كان في اي تحفيز او تشجيع من الناس القريبين ليك المهم بقيت بعمل حسابي في حتة الاكل و بتذكر اني في سنة تانية فقدت 10 كيلو من وزني الدخلت بيهو الجامعة (طبعا سنة تانية في هندسة الخرطوم كانت موت احمر و هلاك محقق و للا ما كدة يا اسمارت؟ لما كنت في سنة خامسة قفلوا لينا الجامعة زي ستة شهور كدة ... مع اني كنت اكتر واحد محبط من الحتة دي لكن برضو استفدت شديد من ناحية مشروعي بتاع التخرج و من ناحية الـ GYM لكن مع دا كلوا ما بطلت البسكويت و دا كان السبب المباشر في رجوع بعض الوزن البفقدو الحكاية استمرت معاي و زادت زيادة لما سافرت السويد , بقيت مرضان بسكويت اكتر مما كنت في السودان , كنت بشتري بسكويت Digestive وهاك يا ضرب والله بتزكر انو في فترة كدة كنت عايش على الشاي بالبسكويت و على الـ No sugar juice (يعني الود لسة عامل حسابو) و الاظرف من دا كلو لما نكون بنعمل الـ shopping كنت دايما بأخر الجماعة عشان كنت بقرا الـ Nutrition facts
طبعا حالتي استفحلت (حالة الادمان) زيادة بعد ما كملت الماستر , بقى ما عندي لا شغلة و لا مشغلة , ابيت ارجع السودان طوالي كنت بفتش في وظيفة او دكتوراة , كنت بعسكر في البيت مع الشاي و البسكويت و عمكم قووقل و اقعد افتش في الـ Jobs و الـ PhD positions و لكم ان تتخيلوا كمية البسكويت و الشاي التي تم استهلاكها في تلك الفترة بما فيهم عمكم قووقل فما بنقدر على جزاتو كنتا ساكن في سكن بتاع طلبة جمب الجامعة (3 دقائق بس من غرفتي ) و دي لحكمة طبعاً عشان اوفر قروش كرت المواصلات الشهري ,
اها السكن بتاعنا دا عندو مداخل كتيرة , اقرب واحد كان فيهو سلم دائري او حلزوني زي ما بيقولوا المصريين اها بقيت احس بي الام في الركبة لما استخدم السلم دا الموضوع اتكرر معاي مع موضوع السهر قمت قررت امشي للدكتور, طبعا انا مشكلة تانية اني مهما اساهر ما بقدر انوم لحدي اكتر من الساعة 9 صباحاً طبعا السويدين عملوا لي دراما وطلعوني عندي Panic Attacks في النهاية قمت حكيت ليهم اني ما عندي حاجة تخليني مقلق و خايف قرايتي و خلّصتها , اها الكلام جاب الكلام و جبنا سيرة البسكويت و الشاي و عدم الرياضة قام الدكتور حسم لي موضوع السهر باني ما اشرب أكتر من كبايتين شاي في اليوم و قال لي بالنسبة للركبة لازم انزل وزني . لقيت لي محل GYM عامل تخيفضات قمت اشتركت فيهو , بديت اتحسن من ناحية الـ Fitness لكن الوزن في محلو تقريباً , مع انو النفسيات كانت تمام خصوصاً بعد ما بديت اجراءات الفيزا بتاعت نيوزلندا , حصلت تطورات بخصوص الفيزا اضطرتني ارجع السودان فقعدت في السودان 3 شهور زادت الطين بلة لانو بالجد وزني زاد زيادة ملحوظة , المهم استلمت الفيزا و جيت نيوزلندا جيت هنا باقامة مؤقتة 4 شهور لانو ما كان عندي Full Scholarship , و لما اتوفقت فيها , طلبوا مني فحص طبي كامل عشان اجراءات الاقامة الجديدة و هنا كانت نقطة التحول بالنسبة لي .....
Quote: بعدين انا البرحلنى فرجنيا شنو? انا عايشة فى كلفورنيا الجميلة
طيب مالو نفتحو في كاليفورنيا .. والله كاليفورنيا دي كاسرة فيني ضلع من وأنا صغير :) ياخي شوفي لي معاك شغل هناك .. مريم كلميها لي عليك الله!!!
وين النصري يا جماعة الزول ده لمن يغتس بجي راجع بي اتنين كيلو زيادة ألحقوه بكون قايم ليه بي صينية بسبوسة!
أمبارح أنا لقيت لي جيم قريب من البيت في زقاق كدة مشيت أكشف لقيتو ليك حاجة نضيفة وفيه ساونا وحمام سباحة والأهم من ده كله أبو الرخا .. سجلت ودخلت لمة فيني المدرب (ياخي عندو عضلات في بطنو كرشة عدييل بتشبه الصاج المقلوب!) المهم درشني زي ساعة ونص أنا طلعت ما عارف بيتنا بي وين ذاتو! لكن رجعت أخدت لي دش آخر فرفشة وهيبرا!! الليلة بمشي بدري شوية عشان أخلص بدري... ما في وزن قبل نهاية الأسبوع الجاي لأني كسرت البرنامج أيام العيد وما ناقص نفسيات!! الأسبوع ده بس نشوف نتيجة بت الحسين.
غباشي ياخي إذا ما حتكمل الحاجة ما تبداها!! أها نقعد ننتظر باقي القصة لمتين!
سلام يا شباب عيدكم مبارك وربنا يحقق امانيكم.. معليش كنت مدروش شوية اليومين الفاتو... الحمدلله I Survived العيد بدون اى خسائر... لحمة نهى حلاوة نهى رغيف نهى
اتخايل لى عشان البوست يكون جذاب ممكن المداخلات ما تقتصر على الانشطة الرياضية والريجيم.... يكون احسن لو اشتملت على "نفحة" او لمحة من ال life style بتاع الزول والحاجات الممكن تلعب دور مباشر او غير مباشر فى صحته وسلامته ووزنه ..زى عمله و اجتماعياته ,,,,
بالنسبة لى كان اسبوع حافل ,,,,,, احد زبائنى المخلصين طلب منى مساعدته فى التخلص من كميات كبيرة من اعواد الخشب القديم(طول الخشبة حوالى 3 امتار) وذلك لانه هدم مصطبة كبيرة deck ويريد ان يحل محلها نجيلة خضراء ...
انتهيت من دوامى الاول ..وجرى على صاله الرياضة ..عملت المعلوم وبسرعة ركبت اللورى ومشيت على موقع الشغل.... كميات الخشب كبيرة جدا احتجنا ان نعبى اللورى اربع مرات وفى كل مرة ندفع لبلدية المدينة 20 دولار نظير التخلص من الخشب القديم فى منطقة النفايات landfill
لسوء حظى واثناء جمع اعواد الخشب الضخمة والثقيلة وقع عود عريض المنكعين على زجاج اللورى الخلفى وهشمه.....لم اخبر الزبون بما حدث ..... انتهينا من الشغلة حوالى الواحدة ظهرا وجرى على البيت ..اخدت حمام سريع ومشيت على الدوام التانى .... رجعت المساء ..مدروخ ...لا بودى لا بجيب .... اليوم اتمرنت فى الصالة منها الى الحراش Junk yard واشتريت زجاج للورى ب 60 دولار لكنى لم اركبه بعد
واحدة من امتع الشغلانات عندى هى عملية نقل الكرور والنفايات الى كوشة المدينة landfill ما عارف السر شنو ...
عندى فيديو صغير صورته خلسة اثناء التخلص من بعض الكرور السنة الفاتت .... رفعته الى اليوتوب لكنه خاص لا يستطيع احد مشاهدته .. ساقوم بتغيير ذلك وعرضه هنا لمدة اسبوع
و الله يا غباشي طلعت حكاى...شكرا على السرد الجميل جدا. بسكويت Digestive ده مفروض يختوه مع المخدرات يا اخى....لما ابدا (ارعى) فيه ما بقدر اقيف.... انا قصتى قريبة من قصتك...فى ايام الجامعة ,رغم انى كنت بشرب كمية مهولة من البيبسي (ما بحب الكولا), مرات بتصل لاربعة قزازات فى اليوم لكن كنت underwieght (حبة كده)... وكانت بعضي عض اساسي. لكن مشكلتى انى ما كنت باكل برا البيت ...عشان كده بعد الفطور (الساندوتش اللى بتحشيه لى امى كل اليوم الصباح) بقعد جعانة لحدى المغرب لما نرجع البيت. خلصت الجامعة و اشتغلت فى شركة بترولية فى الخرطوم. بيرحلونا من البيت للشغل و بالعكس. نهاية الشهر بتكون الماهية ذى ما هى قاعدة فى الدولاب. لانهم بوصلونى ما كنت بتحاوم فى الاسواق و ابعزق القروش. انا و صحبتى بقينا نصرف فى الاكل. كل يوم بنتعشي فى مكان . و اظرف مكان كنا بنمشيه كان الهلتون و ابو جابرة (قلت ليكم...ما كنت عارفه اصرف الماهية فى شنو!!). و من هناك و بدا وزنى يذيد. جيت بلاد الفرنجة دى و ذيك عشت فى شقة داخل الجامعة...رغم انه المشوار من القاعات للسكن حوالى 20 دقيقية بالارجل...لكن كان فى بص كل نص ساعة. بعد سنة نص خلصت الماجستير و اشتغلت...بقيت قاعده فى المكتب حوالى 9 ساعات فى اليوم. بعد كم شهر فى الشغل بدات احس بالخطر. شفت اقرب جم عملت فيه اشتراك و بديت اجرى برضوا. من حسن حظنا ان بيتنا فيه حوض سباحة....بقيت لما الجو يكون مساعد اعوم شوية. لكن اى ام عندها اطفال بتكون عارفه الزيادات بتاعة الحمل وصعوبة نقصان الوزن بعده ...خاصة مع مشغوليات البيت و الاطفال و المجاملات. قبل حوالى فترة كنت برجع من الشغل احضر العشا و ارتب المطبخ و احضر اكل بكره و اجهز الاولاد للنوم (حمام, سواك, قراية كتب قبل النوم)...لما اخلص من ده كلو الساعة بتكون 9 مساء...بعد ده بغير بهدوم الجم و اتوكل...برجع البيت الساعة 10 و نص بللليل.
ما شاء الله يا امير....ماشي تمام...بالتوفيق.
مريوم....ده كله عيد???
النصرى....ما تنسى تنزل الفلم
11-10-2011, 07:53 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
نسيت اقول ليكم ان واحدة من افات الدنيا (بالنسبة لى) كانت استار بكس. كنت بمشي اجيب الشيء ده
ذى مرتين فى الاسبوع كده....البتاع ده طلع فيه قريب ال 1000 سعر حرارى. (زمان مان اكتر من كده ...لكن غيروا الوصفة باعته.) ما يتسفاد من القصة....????? ما تاكلوا و تشربوا ساااى كده من طرف. اى شيء لازم نكون عارفين ال Nutrition facts....حتى لو اخرتوا الناس ...ذى غباشي
شكرا يا النصري على الفيديو. كفارة على قزاز الترك فى نص الفيديو جانى شعور انك ح تلاقى زول ميت .ايوه.... بحضر افلام كتير. ح تقول انى منظراتيه...لكن اقول و السلام... جيب ليك بوت و بنطلون و قميص جنز تخيينين كده للشغل ده. ما تبشتن جزمك و قمصانك فى الشغل يا اخى. انا بحب اضرب بهية فى البيت...و عندى حيطين كده بغير لونهم كل فترة. لكن عندى حنز كده عينوا طالعة و معاه قميص يشرح القلب.....بستعملهم لضرب البوهية
11-11-2011, 03:19 AM
غباشي غباشي
تاريخ التسجيل: 01-19-2007
مجموع المشاركات: 1729
Quote: غباشي ياخي إذا ما حتكمل الحاجة ما تبداها!! أها نقعد ننتظر باقي القصة لمتين!
و الله مشغول يا أمير .... بحضّر لي مؤتمر آخر الشهر دا و لسة بكابس في قروش التزاكر و السكن ... دا غير انو الكيبورد بتاعي الفيهو عربي بيكون في المكتب و كالعادة طول اليوم بكون مشغول و لما ارجع البيت اول حاجة بكون منتهي و جعان يعني لحدي ما اخد دش و اصلي و اكل بيكون خلاص المفروض انوم و ثاني حاجة ما عندي كيبورد عربي , عرفت ليه التأخير بحصل ... حلمك علينا شوية يا حبيب اهو الويك اند جانا (مع اني بمشي كل يوم) و ان شاء الله حأكمل باقي كلامي ... دا لو بيكمل ... لاني و الله لسة عندي كلام كتير ... النصري و اسمارت تسلموا شديد
وين مريم ؟
بالمناسبة عندنا Weight Loss Challenge سجلت فيهو الاسبوع الفات, اي متسابق عندو فترة بتاعت 6 شهور و بعدها بيحسبو ليهو الـ percentage بتاعتو ومنها بيحددوا الفائز السنة الفاتت كان 3 شهور بس , العبد لله كان التاني مع انو حسابيا من ناحية الـ Weight loss المفروض أكون الاول لكن بالـ Percentage فاتتني واحدة كانت عاملة 20% و انا كنت 17.7% طبعاً الـ body mass بيلعب دورو لانو البت الفاتتني دي ما كانت سمينة (و انا برضو ) حتي شكلها زاتو ما اتغير كتير عما كان قبل الـ Challenge باختصار البت حجمها كان اقل من حجمي الاسيوع الفات مشيت الجيم تلات مرات و حسي قافل علي السبت و الاحد , الاكل منتظم كالعادة (عندي اكل خاص حاكلمكم عنو في القصة بعدين) الغرض الاساسي من الـ Challenge الجديد اني لاحظت لروحي بقيت بعد مرات بلخبط في الاكل و بي صراحة بقيت بلعب عدييل كدة , لأني بقيت ضامن اني عادي ممكن اتخلص من اي وزن جديد و دا في حد زاتو عامل لي قلق عشان كدة سجلت فيهو عشان انا بكون كويس شديد لما يكون في challenge و تاني حاجة عاوز اصل للوزن المثالي و بعد كدة ابدأ برنامج الـ Life Style طبعاً لما يكون وزني نازل بكون حاسي بروحي , عشان كدة ما عاوز اوزن الا في الـ Weighing in Day داير أشوف الـ Output بتاع الـ 10 يوم حيكون كيف , كل مرة في الجيم بعمل رايح لما اشوف الميزان لانو بيحبطني خصوصاً لما اكون قافل اخسر عدد معين و ما اصل ليهو, اما لما اكون زايد فما بقرب ليهو نهائي لان زي ما قلت ليكم بقيت عارف روحي , هسي خلاص الاسبوع الجاي حأمشي عشان اوزن في محل الـ Challenge لكن على العموم حاسي بنفسي بقيت خفيف (في الوزن ) دا غير الـ body shrinkage البقى واضح
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مريم بنت الحسين
smart_ana2001
غباشي
Elhadi
حمد فتح الرحمن
جعفر محي الدين
فيس بوك
تويتر
انستقرام
يوتيوب
بنتيريست