|
ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟
|
بالغ جدا ارباب الهلال صلاح ادريس وهو يخاطب جماهير الرياضه السودانيه امس عبر برنامج الرياضه بالاذاعه السودانيه ويقول ان الحديث عن تهدئة الخواطر بين الاهلى والهلال وبين البلدين ماهو الا حديث للاستهلاك العاطفى وانه يجب على عصام الحضرى ان يعتزر لهيثم مصطفى وللشعب السودانى والا ...
وقد كان الارباب غاضبا جدا وحتى حينما انفعل واصبح يردد بان مافى تواصل ومافى كلام زى دا وحاول مذيع البرنامج ان يقاطعه انفعل اكثر ورفض المقاطعه وقال ان هذا منبر قومى ويجب ان يقول هو ما يراه مناسبا
وقد اتى كلام الارباب كرساله واضحة المعانى لجمهور الهلال بالشغب والاعتداء على بعثة الاهلى فى حال لم يعتزر الحضرى لهيثم مصطفى
واليوم مساءا لا ندرى بما سيفعله جمهور الهلال المشحون اصلا على الاهلى القاهرى بعد هزيمة القاهره المؤلمه والتى يرى جمهور الهلال انها لم تكن عادله وان الحكم السنغالى هو من تسبب فيها وخاصه اذا استصحبنا الاخبار التى وردت بعد المباراه من اعتداء لعصام الحضرى على كابتن الهلال وحصب جمهور الاهلى لحافلة الهلال بالحجاره
لكل ذلك واذا ما اضفنا حديث الامس الانفعالى لارباب الهلال والذى وضع فيه اشارات واضحة المعالم لجمهور الهلال بأن ياخد بثاره من الاهلى للاعتداء على كابتنه ولرد الصاع صاعين لعصام الحضرى فى حالة رفضه الاعتزار وان لايستمع جمهور الهلال للحديث العاطفى الذى يردده البعض عن التكامل ووحدة شعبى وادى النيل
اذا فالاهلى القاهرى اليوم موعود بالدخان والدماء ان انتصر او انهزم فالنتيجه واحده فان انهزم فستقوم بعض الجماهير المتعصبه والمنتشيه بالنصر برد الصاع صاعين والانتقام لمباراة القاهره وما اعقبها من احداث وان انتصر فلا حول ولاقوة الا بالله فستقوم القيامه عليه ولا منجى من غضب الجماهير الهلاليه الا رحمة ربى
انا من جانبى وبعد ان استمعت الى حديث ارباب الهلال اتمنى من كل قلبى ان تعدى مباراة اليوم على خير
|
|
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: على محمد على بشير)
|
اخاف على الهلال من حرب التصريحات
فلقد حدث قبل ذلك ان صرح بابا الهلال المرحوم الطيب عبد الله للاعلام فى الامارات قبل مباراه اقيمت هناك بين الاهلى المصرى والهلال السودانى على ارهاصات فوز الاهلى بكأس افريقيا وقضية لاراش الحكم المغربى
وقد صرح البابا يومها بان كل الدنيا ستعرف اليوم من هو البطل الحقيقى لافريقيا واننا سنحول مكاتب الاتحاد الافريقى لكرة القدم من القاهره
وكان الاهلى سيشارك فى المباراه الوديه بلاعبيه من الصف التانى ولكن وبعد تصريحات البابا الناريه اشرك الاهلى فى المباراه تشكيلته الاساسيه وانهزم الهلال بهدفين وكانت فضيحه مجلجله واتمسخر علينا المصريين وقتها كثيرا وضحكوا علينا وكثيرا ماكان يقول المصرى مبتسما وهو يقابل سودانى
- بتقول ايه يابيه .. عايزين تنقولوا الاتحاد الافريقى من مصر - بتقول ايه يابن النيل .. عايزين تعرفوا مين البطل الحقيقى لافريقيا
وقد حدثت يومها مناوشات واشتباك بين اقطاب الهلال فى الامارات بفعل الهزيمه المؤلمه وقد نشرت الجرائد يومها صوره لعبد الله السمانى سكرتير الهلال وهو يحمل فى وجهه ندوب وجروح قيل ان احد اقطاب الهلال الفاعلين هو من قام بها
قلماذا لا يتعلم الارباب من الايام ومن تجربة من سبقوه ؟
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: awad okasha)
|
Quote: ما معنى ان يصفع الحضري كابتن الهلال هيثم مصطفى ونقف مكتوفي الايدي ؟؟ هل وصل بنا الهوان الى هذه الدرجة ؟؟ لابد من رد الصاع صاعين نتيجة وكرامة .
|
انا معك اخى عوض
ولكن فى النتيجه فقط لان ما فعله الحضرى سيظل وصمة عار فى جبينه فقط
Quote: Quote: اتمنى من كل قلبى ان تعدى مباراة اليوم على خير
ولا ما تعدي وين المشكلة ؟؟ |
المشكله انهالمباراه السابقه ليست اخر مباراه يلعبها الهلال فى مصر ولن تكون الاخيره والمشكله انو لو لا قدر الله الهلال لم يتاهل من هذه المجموعه فامامه السنه القادمه بازن الله والمريخ نفس الشئ .. وسنحقق فى الاعوام القادمه ما عجزنا من نحققه هذا العام هذا اذا جرت الرياح بما لاتشتهييه انفسنا والمشكله فى السمعه الجيده التى حققها السودان بصعوده الى نهائيات غانا والهلال لمجموعات الابطال الافريقيه والمريخ للكونفدراليه والمشكله ان المصريين يتعاملون معنا ببرود ونحن نتعامل بعصبيه زياده عن اللزوم فلكل مقام مقال .. والا شنو ياعوض
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: أبو ساندرا)
|
Quote: لو حصل ، الذي لايحمد عقباه ، بيكون صلاح إدريس منح الأهلي فرصة العمر حديث مسجل لرئيس الهلال يثبت التحريض
|
وعبر الاذاعه السودانيه يا ابو ساندرا وقد استمع له الملايين من الناس حتى انه وقبل مبارة المريخ امس كان النقاش بيننا نحن مجموعه من الهلالاب والمريخاب كان النقاش يدور بيننا حول تصريحات صلاح ادريس وقد لمست الاستنكار الواضح من كل الهلالاب الذين كانوا معنا امس
وقد انفرد احدهم بان مثل هذه التصريحات تضر بلاعبى الهلال قبل غيرهم وتحسب على انها شحن زائد وقد تؤثر على ادائهم داخل الملعب وبخاصه ان جمهورهم حول الملعب مشحون ومحتقن
لا .. دى ملعوبه يا ابو ساندرا
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: نيازي عبدالله مرحوم احمد)
|
Quote: عارف يا علي اكبر خطاء هو الشحن الزائد والكبير جدا من اعلام الهلال للجمهور وللاعبين بمساهمة ودعم صلاح ادريس مما يشكل عبئا ثقيلا علي اللاعبين وبالتالي سهولة الاستجابه للاستفزازات المصريه خصوصا انو المصريين بخبرتهم الكبيرة قادرين علي امتصاص اي نوع من الشحن قلوبنا مع الهلال |
كلامك صحيح اخوى نيازى وكدليل على كلامك دا هاك فقره مما كتبه الصحفى خالد عز الدين بعنوان لا نيل ولا نيله وقد فتح به بوست الاخ عبد الغفار
Quote: هو لقاء من نار وهو نار في نار ومن يخاف النار عليه ان يلتزم منزله |
Quote: هي مباراة من نار وشرارتها انطلقت من القاهرة وليس من هنا |
Quote: سوف نقاتل الاهلي في الملعب قتالا لا رحمة فيه وتحديدا الحضري الذي سيسمع الهتافات المضادة من بداية المباراة وحتي نهايتها وسوف نتابع بص الاهلي كما تابع الجمهور المصري بص الهلال ولن نقذف البص بالحجارة كما فعلت جماهير التلة ولكن سوف نلقن الاهلي درسا في كل شئ ..
|
رغم انو مقال الاخ خالد عز الدين جاء جميلا فى مضمونه وقويا فى طرحه ولكن لفت نظرى الاشارات السالبه فيه فهل سيتابع خالد عز الدين بص لاعبى الاهلى بعد المباراه ليمنع الجمهور من حصب البص بالحجاره او الاعتداء على من فيه ؟؟
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: على محمد على بشير)
|
الاخ علي تحياتي من هو هذا الحضري؟؟ انا غير متابعه للكوره لكن بوستك لفت انتباهي هل هو كابتن فريق الاهلي المصري؟؟
Quote: ما يمارسه ( المصارية ) من تذاكيات اعلامية وعاطفية من وحدة وادي النيل ، وابناء النيل ، وشمال وجنوب الوادي ما هي الا شعارات خاوية في محاولة لكسب بنتيجة المباراة . ما معنى ان يصفع الحضري كابتن الهلال هيثم مصطفى ونقف مكتوفي الايدي ؟؟ هل وصل بنا الهوان الى هذه الدرجة ؟؟ لابد من رد الصاع صاعين نتيجة وكرامة |
بعدين شايفه الصحفي المصري جمال جبر بيقول الاعتداء في بلد شقيق!! بقول له شقيق شقاكم الهم و الغم انتو خليتوا فيها شقيق؟؟ قال شقيقي قال تقتلوا لاجئيننا وتطاردوا الهاربين من بلادكم وتقتلوهم على الحدود وكمان تتطاولوا وتصفعوا كابتن منتخب الهلال؟؟؟ اي تطاول او وقاحه هذه؟؟؟ يجب تأديبهم.
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: Tragie Mustafa)
|
Quote: من هو هذا الحضري؟؟ انا غير متابعه للكوره لكن بوستك لفت انتباهي هل هو كابتن فريق الاهلي المصري؟؟
|
نعم ياتراجى هو كابتن فريق الاهلى المصرى وقد قام بالاعتداء على كابتن الهلال هيثم مصطفى وضربه بالبونيه بعد نهاية المباراه وهم فى طريقهم لغرف اللاعبين بالاستاد وقام بعض مشجعى الاهلى بحصب البص المقل للاعبى الهلال بالحجاره
Quote: بعدين شايفه الصحفي المصري جمال جبر بيقول الاعتداء في بلد شقيق!! بقول له شقيق شقاكم الهم و الغم انتو خليتوا فيها شقيق؟؟ قال شقيقي قال تقتلوا لاجئيننا وتطاردوا الهاربين من بلادكم وتقتلوهم على الحدود وكمان تتطاولوا وتصفعوا كابتن منتخب الهلال؟؟؟ اي تطاول او وقاحه هذه؟؟؟ يجب تأديبهم. |
يا تراجى قولى بسم الله القتلوا اللاجئين هم ليس لاعبى الاهلى المصرى
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: على محمد على بشير)
|
الاخ علي اولا كلام جمال جبر هذا كذب و قد تاكدت من ذلك بالاتصال بمن كان حضورا و لو كان صحيح لما تردد في نشر صورة البص من جانب الزجاج المهشم و انت ادري بحيل المصريين.. و قد كانت مجرد هتافات تركزت ضد الحضري ,,,,,,,,,,ثانيا انت عايز صلاح ادريس يكرر الكلام السمج البنسمع فيه طول عمرنا نحن اخوات و هلم جرا ,,,اين كانت اقلامكم حينما قال المسئول المصري ( البص حقنا و نحن كسرنا ايه دخل السودانيين في الموضوع ) و كذلك استفزازات الحضري قبل و بعد المباراة,,, يعني انتو عايزين تكونوا كاثيوليكيين اكتر من البابا ,,, و لا الموضوع فيه هلال مريخ ,,الموضوع يخص كرامة السودان و ليس هلال مريخ و بغض النظر عن نتيجة المباراة ,,,,,,,,
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: abdulgafar mohd saeed)
|
Quote: يعني انتو عايزين تكونوا كاثيوليكيين اكتر من البابا ,,, و لا الموضوع فيه هلال مريخ ,,الموضوع يخص كرامة السودان و ليس هلال مريخ و بغض النظر عن نتيجة المباراة ,,,,,,,, |
يا اخوى عبد الغفار
الموضوع رياضه فقط وليس كرامه واشياء اخرى اما رد كرامتنا من المصريين سيكون يوم ان تعود حلايب الى ارض الوطن وليس بجلد وسحل الحضرى او لاعبى الاهلى
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: abdulgafar mohd saeed)
|
اها رايك شنو يا عبد الغفار فى الكلام الذى نشر فى الصحف السودانيه اليوم
Quote: جماهير الهلال الغاضبة على الأهلي تشتبك مع الشرطة
اشتبكت اعداد غفيرة من جماهير الهلال مع شرطة العمليات التي حضرت باعداد ضخمة بغرض توفير الحماية لفريق الأهلي المصري الذي نزل استاد الهلال مساء امس لاداء تدريبه الرئيسي للمباراة وقد تحسبت الشرطة للشغب الجماهيري على خلفية الأحداث التي صاحبت مباراة الهلال والأهلي في القاهرة لذلك حضرت باعداد ضخمة ورغم ذلك كان الشغب اكبر من التحوطات الأمنية حتى اضطرت قوات الشرطة للاستعانة بمعظم القوة الموجودة في ام درمان حتى تمكنت من السيطرة على الموقف وحرمت الجماهير من الدخول لاستاد الهلال بعد ان فضل الأهلي ان يكون تدريبه مغلقاً.. ووعدت الشرطة بالمزيد من التحوطات الأمنية وناشدت الجماهير بالتحلي بضبط النفس حتى تخرج المباراة بصورة جيدة وتجنب الهلال متاعب وعقوبات من قبل الاتحاد الافريقي لكرة القدم.
|
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: أبو ساندرا)
|
Quote: لمهم نحن عايزين نتخطى الأهلي ونكسب المباراة وبالبيحصل ده ما ح نصعد حتى ولو فزنا عشان ناس الأهلي عندهم شكوى جاهزة ومضمونة وكفيلة بتحويل نتيجة المباراة للإهلي وبيكونو أولاد بمبة نالوا مقصودهم بحماقتنا |
ياريت يا ابو ساندرا لو فهم كل الهلالاب المنفعلين هذا الموضوع من هذه الزاويه وهو اذا حدثت اى انفلاتات من جماهير الهلال فسيحاول لاعبى الاهلى ان يصنعوا من الحبه قبه وسيخسر الهلال حتى ولو فاز بنتيجة المباراه
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: ملكة سبأ)
|
Quote: اين كانت اقلامكم حينما قال المسئول المصري ( البص حقنا و نحن كسرنا ايه دخل السودانيين في الموضوع ) و كذلك استفزازات الحضري قبل و بعد المباراة,,, يعني انتو عايزين تكونوا كاثيوليكيين اكتر من البابا ,,, و لا الموضوع فيه هلال مريخ ,,الموضوع يخص كرامة السودان و ليس هلال مريخ و بغض النظر عن نتيجة المباراة ,,,,,,,, |
يا عبدالغفار .. والله ده ابلغ كلام اقراهو من ما تعلمت اعرف حاجة اسمها كورة .. اقترح اي زول مريخابي ( عامل فيها) موضوعي .. الليلة بالذات يسدد بابو عليهو .. وكفاياكم استعباط علينا .. اخير منو استعباط المصريين.. نفس هذه الاقلام كتبت وكتبت .. لما الأهلي مارس هذه الممارسات في القاهرة .. المصريين ما بيهمهم حاجة .. ممكن يشتروا الحكم .. يشتروا الميدان . يشتروا اي حاجة .. بس المهم يقولوا ليك ( تحيا مصر ) .. بلاي خطو لينا خط تحت تحيا مصر دي .. وعلى ذلك قيسوا يا علي محمد علي والشلة البي وراهو .. نفس المجموعة دي .. كتبت بعد نهاية مباراة الأهلي ما كتبت .. والغريبة عارفين انو المسالة كلها ظلم في ظلم واستهبال في استهبال ..
ياخي اقول ليكم حاجة: انسونا من حركات المصريين دي .. يا مجموعة الاقلام المريخية الاتعودنا على حركاتكم دي .. وبقترح عليكم انكم تشيلوا اعلام الأهلي .. وتربطوها مع اعلام المريخ .. وتكتبوا بي خط عريض .. ( نحن زعلانين الهلال العظيم .. وحالتنا تحنن ) والحشاش يملى ( شبكتــكم ) .. الجبتوها لينا دي .. وعاملين لينا بيها وجع راس .. .. بقترح: فرانكلي .. رئيس رابطة المشجعين .. راكوبــا .. السكرتير والنايب بتاعو علي محمد علي .. امين الخزينة.. ثابت محمد .. ( رجل خط ) .. عشان كان ناس الأهلي شاتو كورة طلعت في الآوت .. يحسبه قووون .. وعلى شرط يكون عندو ( صفــاره ) ... اساسي .. يجيب الكورة من جــوه القووون .. لما نقول ليهو .. جيب من جووووه أما باقي الزعلانين .. بقترح انهم يكتفوا بي المتعة والدق المؤسس ..
شوفوا هوووي: والله نحن ما قاعدين نخلي حقنــا .. مع المصريين ديل بالذات .. كورة زاتو ما عايزنها .. أهــا رايكم شنــو..؟
تمشوا تحضروا الكورة وشايلين معاكم اعلام الأهلي ... وتنجلدوا معاهم بطن وضهر .. والا تقعدوا هنا خشمكم عندكم .. وتبطلوا الاستهبال بتاعكم ده ... وبرضوا ( تنجلدوا) بطن وضهر ...
بالجد كدا .. ( تراكم ابلشتونا)
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: tmbis)
|
Quote: يا عبدالغفار .. والله ده ابلغ كلام اقراهو من ما تعلمت اعرف حاجة اسمها كورة .. اقترح اي زول مريخابي ( عامل فيها) موضوعي .. الليلة بالذات يسدد بابو عليهو .. وكفاياكم استعباط علينا .. اخير منو استعباط المصريين.. نفس هذه الاقلام كتبت وكتبت .. لما الأهلي مارس هذه الممارسات في القاهرة .. المصريين ما بيهمهم حاجة .. ممكن يشتروا الحكم .. يشتروا الميدان . يشتروا اي حاجة .. بس المهم يقولوا ليك ( تحيا مصر ) .. بلاي خطو لينا خط تحت تحيا مصر دي .. وعلى ذلك قيسوا يا علي محمد علي والشلة البي وراهو .. نفس المجموعة دي .. كتبت بعد نهاية مباراة الأهلي ما كتبت .. والغريبة عارفين انو المسالة كلها ظلم في ظلم واستهبال في استهبال ..
|
والله يا تامبا
زكرتنى واحد كدا قالوا ليك كان معزب ناس حلتهم جنس عزاب يمشى بالليل يسكر ويلط ويقيف زمبه ويجى ليك من الاندايه بالليل وفى حته معينه كدا وردلب يقع ليك ويجوا ناس الحله يشيلهو ليك ويوصلوه ليك لحدى سريره والحكايه دى بقت برنامج كل يوم لى ناس الحله
المهم يامان قال ليك مره كدا بالنهار حدث نقاش حاد بينه وبين واحد من ناس الحله وفى الليل صاحبنا جاء سكران ووقع فى المكان المعتاد وجوا الناس شالوه ليك وهو مستمتع بالحكايه دى وقال ليك كمان بيتلفت عشان يشوف الشايل منو والما شايل منو عينه وقعت ليك فى صاحبه اللى اتناقش معاهو بالنهار فقام طوالى كورك ليك فى الناس ياجماعه هوووى اقيفوا .. الجماعه وقفوا .. قام قال ليهم .. شوفوا يا اخوانا انا عندى اقتراح قاموا قالوا ليهو اها الاقتراح شنو صاحبنا قال ليهم اقتراحى انو الانسان الثقيل دا ما يشيل معانا واشار باصبعه للرجل الذى تناقش معه نهارا
اها يا تامبا
وطالما انو مادايرنى اشيل معاكم ح اخليك وح اخلى التعليق على كلامك دا كله لى بكره واتمنى وقتها بانو الهلال ينتصر وانو المباراه تكون قد انتهت على خير ونجى نكمل باقى الهرجه دى وللوكت داك ( لا تصجنا )
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: وليد محمد المبارك)
|
ساقولها رغم هلاليتي
لن يستفيد الهلال من هذا الشحن العصبى ، فاذا كنتم ترفضون ما يفعله المصريون ، فخطأ المصريين لا يبرر ما سنفعله اليوم ....
تري ما هو شعور لعيبة الهلال في ظل هذا الشحن ؟ كم اتمني ان يكون الجهاز الفني قد عزل لاعبي الهلال خلال اليومين الماضيين ؟
اذا فاز الهلال (وهذا ما نتمناه ) فلنحمدالله ، ولكن اذا خسر الهلال ، فقد تحدث كارثة لم تحدث من قبل .
قد يستطيع المصريين خداعنا -كما يفعلون دائما - ولكن ان لا ننخدع ونمكر عليهم شئ ، وان نصبح مثلهم شئ آخر....
كم كنت اتمني ان يعمل الجميع علي تحويل طاقة الغضب داخل الجماهير الي سلوك تشجيعي ، ولنرهبهم بتشجيعنا ولعبنا .....
تري هل ستكون هذه المباراة آخر مباراة للهلال في البطولة ........ وبعدها تبدأ سلسلة من العقوبات ، والله انا خايف من هذا السيناريو ....
ياشباب ادعو معي ان ينتصر الهلال ، وتخرج المباراة نظيفة ......
بعدين لو انتصر الهلال وتأهل ، لربما قابلنا الاهلي في النهائى .... وستدور الدائرة مره ثانية ...
ربك يهون .....
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: Abd Alla Elhabib)
|
Quote: يا هلالاب...لكم النصر المبين بإذن الله
|
يسمع منك ربنا
Quote: حكاية الحضرى بسيطة..كلّموا جمال الوالى يقنعوا يقيف لى هيثم مصطفى يصفعوا وكدا خلاص درون
|
غايتو انا سمعت انو قبل المباراه اليوم سيعتزر الحضرى لهيثم مصطفى وان فعلها فسيكفى الله المومنين شر القتال ولو كنت مكانه لفعلتها امام الجماهير الغفيره لانو نحنا السودانيين ورغم اننا عصبيين الا اننا قلبنا ابيض من اللبن الحليب وسيخمد الحضرى الفتنه فى مهدها لو طلع رجل عاقل ولا داعى لتدخل جمال الوالى الغالى
Quote: وشعب الهلال يا تفتيحة...أوعك تغلط فى زمان الفهلوة. |
وهذا هو بيت القصيد
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: Deng)
|
Quote: صلاح ادرسي شخصية إنتهازية وهو ليس من أبناء الهلال المخلصين ولا علاقة له بكرة القدم أصلا. خطا فادح بأن يكون هذا الرجل رئيس لنادي قيادي في السودان. يجب فقط المقارنة بينه وبين من ترائس الهلال من قبل.
|
الكابتن دينق
مالك داير تجيب لينا الهوى احنا قلنا الشحن الزائد مافى داعى ليهو قاموا علينا قالوا لينا انتوا الدخلكم شنو .. يعنى جينا نساعدهم فى دفن ابوهم قاموا دسوا المحافير
| |
|
|
|
|
|
|
Re: ماذا يريد الارباب صلاح ادريس وهو يحرض جماهير الهلال على الشغب اليوم ؟؟؟؟؟ (Re: على محمد على بشير)
|
جماهير الهلال الغاضبة على الأهلي تشتبك مع الشرطة
اشتبكت اعداد غفيرة من جماهير الهلال مع شرطة العمليات التي حضرت باعداد ضخمة بغرض توفير الحماية لفريق الأهلي المصري الذي نزل استاد الهلال مساء امس لاداء تدريبه الرئيسي للمباراة وقد تحسبت الشرطة للشغب الجماهيري على خلفية الأحداث التي صاحبت مباراة الهلال والأهلي في القاهرة لذلك حضرت باعداد ضخمة ورغم ذلك كان الشغب اكبر من التحوطات الأمنية حتى اضطرت قوات الشرطة للاستعانة بمعظم القوة الموجودة في ام درمان حتى تمكنت من السيطرة على الموقف وحرمت الجماهير من الدخول لاستاد الهلال بعد ان فضل الأهلي ان يكون تدريبه مغلقاً.. ووعدت الشرطة بالمزيد من التحوطات الأمنية وناشدت الجماهير بالتحلي بضبط النفس حتى تخرج المباراة بصورة جيدة وتجنب الهلال متاعب وعقوبات من قبل الاتحاد الافريقي لكرة القدم.
ــــــــــــــــــــــــــــــــــــــــــــــــــــــــــــــــــــ
من الصحافه السودانيه الصادره اليوم
| |
|
|
|
|
|
|
|