|
|
 الشاعر ابوسليمان يرد علي الشاعر هاشم صديق بديوان كامل
|
بدا الشاعر ابو سليمان في تجهيز ديوان من عدة قصائد شعرية للرد علي الشاعرهاشم صديق بعد تناوله في ديوانه الجديد الذي صدر بعنوان انتظري تعقيب ابوسليمان بقصيدته
تعقيب على قصيدة (قرنتية) لهاشم صدّيق
بتبكي على القرنتية
عجيب و غريب
عيونك في عيون الفيل
و تطعن في القرنتية
##
صحيح كتلوا القرنتية
(وليدات ناس رحـمـطلّة) لأنها شالت الغلّة
لأنها فلّت الحلة
لأنها أمّمت يلّة
و ضوّقت الخلق ذلة
و صادرت الزرع جملة
ولا خلّت قدُر حلّة
لأنها جد أنانية
و في الآخر
و بالنية
مشت بي هبّة شعبية
زي اكتوبر
ترابية
وزي يونيو
قبل ما تبقى قهرية
قبل سووها جبرية
##
صحيح كتلو القرنتية
لأنُّم شافوا منها الويل
و إنها جات بتدبير ليل
زي (رمضان) ـ (صَفَر)
.. تبديل
زي السرّاق
وزي السيل
و زي خيل العدو البتشيل
زي الحُمّى
التّـهد الحيل
هي من النيل
و ما شالت
طبايع النيل
شالت بس
طبايع ديل
الطعنوا الضل و خلّوا الفيل
طبايع ناس (ولد كورييل)
و ماتت إنتهازية ..
##
و هاك الجد ..
##
تكتل الناس
(سنة 70 )
و تبكي على قرنتية
تبيد الناس
ترشها رش
تحشها حش
تكشها كش
بعد سميتها (رجعية)
و تبكي على قرنتية
(محمد صالح ) الدكتور
معاهو (الهادي) ضهرية
معاهم كم
و كم آلاف
تِحِت دبابة روسية
وفوقهم (غارة
مصرية ) ...
و تلك الغارة ما خلّت
وِليداً
تبّ يادوبو
و لا كهلاً
بعد ما صلّى
لبّس رجلو مركوبو
و لا خلّتلو فروة (تيلو)
لا مسبحتو .. لالوبو
و في الخرطوم
بترقص بت
شويعية
مشبّعة (فودكا) (موسكية)
معاها ولد
بعد 30 ..
جا يبكي على قرنتية !!
##
(( أن نقتل
أصبح أسهل
من إلقاءِ تحية
أن نُطلق
في الرأس رصاصة
أن نغرز في الصدر الخنجر
أن نمسح حد السيف
بحدِّ اللحية
أصبح يا سيدنا ..
أسهل من إلقاء تحية ))
يمين و يمين
دا ما بننساهو يا لينين
دا قولكم في سنة 70
و تبكوا على قرنتية !!!
##
(بلل)11 شِن سوّا في (النيلين)
(بلل) و (اللقرع) المسكين
و (ود عبد الحكم)قبلين
(وداعة الله)
البجهِّز للعديل و الزين
عشان يدّي البلد
قمحاً ووعداً
من بنات و بنين
بقت ليهو النهاية
فِجامعة (أهلية)
على إيداً (ملاحدية)
ملطخة بى
دموم الناس
دموع الناس
و تبكي على
قرنتية..
##
سنة 70
فِرِت سنةً حكمتونا
و كتمتونا
بقت زي علبة التونا
البلد ديّة
##
صحيح ساقوها
لى حفرة
و لكن إنتوا
سقتوا الناس
(سنة 70 و ست سنين ) ..
إلى (حُفَرَاً جماعية)
دفنتوهم كمان حيين ..
و تبكي على قرنتية !!!
##
أبكي على الغلابة كِزِب
و قول (ابرول )
وقول (شاكوش)
وقول (منجل)
و غش بيهم وليدات الغلابة كِزِب ..
عشان تحكم
تسوّي (حِزِب)
فقط
خلي القرنتية ..
##
عرفنا الناس
بعَبْدوا حجر ..
و ناس تانين
بِعَبْدوا شجر
و ناس تالتين
بعبدوا حشَر
و ناس رابعين
بعبدوا بشر
و ناس خامسين
بعبدوا بقر
و يا عجباً على ناساً
لقت أحسن ..
قرنتية ..
##
عجيب و غريب
بعد نَفْقَ القرنتية
بقت دبابة برمائية !
بقت جاسوسة مدسوسة ..
بقت غواصة روسية
بقت جندية في (حركة)
بقت ( م . ن )
شيوعية ..
أبو سليمان
11/9/2001م
|
|
 
|
|
|
|
طلال اسماعيل حسب الرسول
فيس بوك
تويتر
انستقرام
يوتيوب
بنتيريست