|
|
 عايز أحاكيكم أبت تظبط..
|
الرائع محمد السني دفع الله يغطي سماء الرياض ..يا بروداب الرياض رحبوا به
ونقوووووووم كده نحن بورداب الرياض نتكبكب ونتظبط وهاك يا اجتماع وانا امشي اشتري لي قميص جديد وبنطلون نظام الولد إستايل وده اللوك بتاعي يا السني ..
الموسيقار الموصلي بيننا هلمّوا بورداب الإمارات وده تلفوني لمزيد من التواصل والتنسيق 500500500
وهاك يا صور والناس اخر قشرة وموية الصحة ما تديك الدرب والتربيزة الفيها فوطة حمرا والكرسي الأبيض والناس تجي تداخل وبختكم يا بورداب الامارات والموصلي بينكم ويا موصلي عليك الله تعال لينا وقطر فركة رجل والبحرين بي جاي ..
رحلة نيلية يا بورداب الدوحة إحتفاء بي البوردابي الرائع حيدر بدوي ويا قريش ما تنسى الكاميرا وهاك يا غنا ورقيص وسجاير وطرب وصور وكمية من المداخلات تتحسر على عدم مقابلة هذا البوردابي الجميل وتلك البوردابية الرشيقة ..
منى خوجلي جاااااااتنا ناجي الملك وناذر الخليفة عملتوا لينا شنو ؟ هل الحلة في توتي ولا في حدائق نادي التنس ولا حا نمشي رفاعة رحلة نيلية ..
وهاك يا مداخلات وبختكم منى جاتكم وأريتنا لو كنا هناك عشان نلاقي الرقيقة منى ويا ناس حيمورة بالله ما تنسونا من النفرة والشيرنق كم يا ملاسي وكانت لمة رائعة وكم انتم جميلون أيها البورداب ولن أنساكم وسأرحل وفي قلبي حسرة وكم أنتم رائعون يا بورداب الخرطوم ..
أها يا جماعة اخوكم كان بيقرا الحاجات دي ونظام بيكون مشتهي الإجازة إشتها ويا يوم بكرة ما تسرع تخفف لي نار وجدي ..
وشطحت ونطحت ورسمت لي روحي هالة بوردية كبيييييييرة وفكّيتا في روحي وقلت انا فرقي من الناس ديل شنو ؟؟ والله أمشي الإجازة ويقووووووموا كده بورداب الخرطوم يسمعوا بي ويحلفوا علي عمر تجينا واقول ليهم ما بجي ويقولوا لي عليييك الله تجي وأقول ليهم ما بجي ويقوموا يقولوا لي عشان خاطر "زابيلا" تجي وأرخي شوية وصوتي يبقا واطي وأطنطن وفي النهاية أقول ليهم ما بجي ويحلفوا علي طلاق وحررررررررررم واقوم انا عشان ما اخرب البيوت اوافق ليهم ..
وقمت كده مشيت ليك اسواق الرياض واشتريت لي ما يقارب لي ال37 لبسة النطلون ده لمن الاقي ناس عبير خيري والقميص ده لمن امشي عرس ناذر والبدلة دي لي لمة انور كينغ والجلابية دي لو عملوا لي الرحلة يوم الجمعة والبرمودة دي عشان اتجدع في النيل لمن يعزموني توتي والجزمة دي مطقمة مع الحزام داك حا أمشي بيها حملة أنقذوا بنات سنار والبدلة دي حا أمشي بيها تكريم الشاعر محجوب شريف بمناسبة نجاح ود جيرانهم ..
وواصلت في الإستعدادات إشتريت تلاتة كتب لي ماركيز ومنصور خالد وإيزابيل الليندي وحفظت لي كم إسم رواية كده متأكد إني حا أحتاج ليهم في جلسات إنفرادية اثناء الحفلة الحا يعملوها لي ..
جهّزت ردود لي بعض العبارات الممكن تواجهني:
" والله يا عمر ما بتشبه كتاباتك " ..
"بالجد انت زول ظريف خالص يا عمر طيب مالك هناك فقري كده " ..
" أها يا عمر انت مالك مع تراجي وشابكا عجوز النحس والجدة بطة " ..
" والله يا عمر شروق دي ما خليت ليها جمبة ترقد عليها مالك معاها ياخ خليها تغني" ..
وعشان ما يتم وصفي بي المغترب " البيض" تحصنت بي كم معلومة كده لزوم المواكبة والشفتنة :
" قالوا في بتاع أورغن إسمو الربع زول عزاااااااااااف شدييييد وبيعزف لي غرزة " ..
"المتعافي عندو شركات طرق وإنارة وماسك العاصمة كلها مش ؟ والخرطوم بقت كلها شوارع ظلط"
" البلد إتملت عربات .."
" في راديو إسمو راديو الرابعة والعجب 104 الرياضية ومانقو وزمبيري "..
تخريمة
من هسة يا جماعة وبعد 45 يوم بالضبط إن شاء الله عندي بوست جاااااااااهز حا يكون إسمو :
"إنطباعاتي عن السودان خلال إجازتي"
|
|
 
|
|
|
|
|
| العنوان |
الكاتب |
Date |
| عايز أحاكيكم أبت تظبط.. | عمر الفاروق | 07-11-07, 10:13 AM |
| Re: عايز أحاكيكم أبت تظبط.. | عمر الفاروق | 07-11-07, 10:22 AM |
 Re: عايز أحاكيكم أبت تظبط.. | lana mahdi | 07-11-07, 10:24 AM |
| Re: عايز أحاكيكم أبت تظبط.. | عمر الفاروق | 07-11-07, 10:32 AM |
| Re: عايز أحاكيكم أبت تظبط.. | محمد حامد جمعه | 07-11-07, 10:43 AM |
| Re: عايز أحاكيكم أبت تظبط.. | lana mahdi | 07-11-07, 10:49 AM |
| Re: عايز أحاكيكم أبت تظبط.. | ALGARADABI | 07-11-07, 10:39 AM |
| Re: عايز أحاكيكم أبت تظبط.. | عمر الفاروق | 07-11-07, 10:50 AM |
| Re: عايز أحاكيكم أبت تظبط.. | طارق جبريل | 07-11-07, 10:56 AM |
| Re: عايز أحاكيكم أبت تظبط.. | عبد الله عقيد | 07-11-07, 11:01 AM |
| Re: عايز أحاكيكم أبت تظبط.. | الصادق صديق سلمان | 07-11-07, 11:08 AM |
| Re: عايز أحاكيكم أبت تظبط.. | ALGARADABI | 07-11-07, 11:21 AM |
| Re: عايز أحاكيكم أبت تظبط.. | almulaomar | 07-11-07, 11:08 AM |
| Re: عايز أحاكيكم أبت تظبط.. | فيصل نوبي | 07-11-07, 11:41 AM |
 Re: عايز أحاكيكم أبت تظبط.. | شهاب الفاتح عثمان | 07-11-07, 12:52 PM |
| Re: عايز أحاكيكم أبت تظبط.. | سامى عبد الوهاب مكى | 07-11-07, 01:56 PM |
| Re: عايز أحاكيكم أبت تظبط.. | Ahmed musa | 07-11-07, 02:51 PM |
 Re: عايز أحاكيكم أبت تظبط.. | نهال الطيب | 07-11-07, 10:26 PM |
| Re: عايز أحاكيكم أبت تظبط.. | Ahmed Abdallah | 07-11-07, 10:56 PM |
|
| |
عمر الفاروق
فيس بوك
تويتر
انستقرام
يوتيوب
بنتيريست