الرائع محمد السني دفع الله يغطي سماء الرياض ..يا بروداب الرياض رحبوا به ونقوووووووم كده نحن بورداب الرياض نتكبكب ونتظبط وهاك يا اجتماع وانا امشي اشتري لي قميص جديد وبنطلون نظام الولد إستايل وده اللوك بتاعي يا السني ..
الموسيقار الموصلي بيننا هلمّوا بورداب الإمارات وده تلفوني لمزيد من التواصل والتنسيق 500500500 وهاك يا صور والناس اخر قشرة وموية الصحة ما تديك الدرب والتربيزة الفيها فوطة حمرا والكرسي الأبيض والناس تجي تداخل وبختكم يا بورداب الامارات والموصلي بينكم ويا موصلي عليك الله تعال لينا وقطر فركة رجل والبحرين بي جاي ..
رحلة نيلية يا بورداب الدوحة إحتفاء بي البوردابي الرائع حيدر بدوي ويا قريش ما تنسى الكاميرا وهاك يا غنا ورقيص وسجاير وطرب وصور وكمية من المداخلات تتحسر على عدم مقابلة هذا البوردابي الجميل وتلك البوردابية الرشيقة ..
منى خوجلي جاااااااتنا ناجي الملك وناذر الخليفة عملتوا لينا شنو ؟ هل الحلة في توتي ولا في حدائق نادي التنس ولا حا نمشي رفاعة رحلة نيلية .. وهاك يا مداخلات وبختكم منى جاتكم وأريتنا لو كنا هناك عشان نلاقي الرقيقة منى ويا ناس حيمورة بالله ما تنسونا من النفرة والشيرنق كم يا ملاسي وكانت لمة رائعة وكم انتم جميلون أيها البورداب ولن أنساكم وسأرحل وفي قلبي حسرة وكم أنتم رائعون يا بورداب الخرطوم ..
أها يا جماعة اخوكم كان بيقرا الحاجات دي ونظام بيكون مشتهي الإجازة إشتها ويا يوم بكرة ما تسرع تخفف لي نار وجدي .. وشطحت ونطحت ورسمت لي روحي هالة بوردية كبيييييييرة وفكّيتا في روحي وقلت انا فرقي من الناس ديل شنو ؟؟ والله أمشي الإجازة ويقووووووموا كده بورداب الخرطوم يسمعوا بي ويحلفوا علي عمر تجينا واقول ليهم ما بجي ويقولوا لي عليييك الله تجي وأقول ليهم ما بجي ويقوموا يقولوا لي عشان خاطر "زابيلا" تجي وأرخي شوية وصوتي يبقا واطي وأطنطن وفي النهاية أقول ليهم ما بجي ويحلفوا علي طلاق وحررررررررررم واقوم انا عشان ما اخرب البيوت اوافق ليهم .. وقمت كده مشيت ليك اسواق الرياض واشتريت لي ما يقارب لي ال37 لبسة النطلون ده لمن الاقي ناس عبير خيري والقميص ده لمن امشي عرس ناذر والبدلة دي لي لمة انور كينغ والجلابية دي لو عملوا لي الرحلة يوم الجمعة والبرمودة دي عشان اتجدع في النيل لمن يعزموني توتي والجزمة دي مطقمة مع الحزام داك حا أمشي بيها حملة أنقذوا بنات سنار والبدلة دي حا أمشي بيها تكريم الشاعر محجوب شريف بمناسبة نجاح ود جيرانهم .. وواصلت في الإستعدادات إشتريت تلاتة كتب لي ماركيز ومنصور خالد وإيزابيل الليندي وحفظت لي كم إسم رواية كده متأكد إني حا أحتاج ليهم في جلسات إنفرادية اثناء الحفلة الحا يعملوها لي .. جهّزت ردود لي بعض العبارات الممكن تواجهني: " والله يا عمر ما بتشبه كتاباتك " .. "بالجد انت زول ظريف خالص يا عمر طيب مالك هناك فقري كده " .. " أها يا عمر انت مالك مع تراجي وشابكا عجوز النحس والجدة بطة " .. " والله يا عمر شروق دي ما خليت ليها جمبة ترقد عليها مالك معاها ياخ خليها تغني" ..
وعشان ما يتم وصفي بي المغترب " البيض" تحصنت بي كم معلومة كده لزوم المواكبة والشفتنة :
" قالوا في بتاع أورغن إسمو الربع زول عزاااااااااااف شدييييد وبيعزف لي غرزة " .. "المتعافي عندو شركات طرق وإنارة وماسك العاصمة كلها مش ؟ والخرطوم بقت كلها شوارع ظلط" " البلد إتملت عربات .." " في راديو إسمو راديو الرابعة والعجب 104 الرياضية ومانقو وزمبيري "..
تخريمة من هسة يا جماعة وبعد 45 يوم بالضبط إن شاء الله عندي بوست جاااااااااهز حا يكون إسمو : "إنطباعاتي عن السودان خلال إجازتي"
07-11-2007, 10:22 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
انا في الخرطوم لي قريب الإسبوع وإجازتي قربت تنتهي وال37 بنطلون من المغسة لبست منهم 10 في مطرة أمبارح والبدلة خشّيت بيها كورة الهلال والترجي من الساعة 3 عصرا والحزام والجزمة مشيت بيهم طهور ود جيرانا ..
الروعة تطير قولوا امين
07-11-2007, 10:24 AM
lana mahdi lana mahdi
تاريخ التسجيل: 05-07-2003
مجموع المشاركات: 16049
عمر جيب لي صفق من شجرة جدك الشاهقة على خور أبو عنجة وأمانة في ذمتك صورها لي ممكن بكرة بعد بكرة يقلعوها! سلام و تحايا و سلم على الأهل و خاصة فادية العزيزة لنا
07-11-2007, 10:32 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
اهلا بك فى (الثورة ) وشخصيا ارحب بك بشدة وغايتو بصلك فى اى زمان واى مكان لانك عزيز على شخصى واركمت وفادتى انت وعلاء الدين وبعض الكرام ابان تواجدى معكم بالرياض فى قصة (سفر الجفا ) الشهيرة ، متذكر يا عمر ..
المهم حبابك الف وغايتو بس بؤكد ليك انو اى استقبال جماعى انا بره منو لانو السوابق فى المنبر دا خلتنا نحترم نفسنا وادميتنا ونعتذر عن حضور يا حشد بوردابى لان بعض الناشطين ان شاهدونا نلقى بالسلام على عضو نصبوا له ولنا المشانق وما قصة صورتى وبقال وبيان ببعيدة .. المهم مرحب ... بيك ... ونتلاقى فى الامسيات لو جيت (ابو الزهور خرق الدستور ) فى كوبرى النص بتلم فى اخوك ... وعازمك شية ابوالزهور ... وحجر تفاح والمك فى هلالاب متطرفين تقول صرب والله
07-11-2007, 10:49 AM
lana mahdi lana mahdi
تاريخ التسجيل: 05-07-2003
مجموع المشاركات: 16049
Quote: لحدي هسة ما جبتا سيرة الهلال و الترجي مش قلتا انك وازن اجازتك مع مباريات الهلال
يا زول أول شي مبروك لينا .. تاني شي وانت الصادق الليلة خشيت البورد لقيت الناس ما خلّت لي شي أكتبو .. ويا قردابي وماك طالبني حليفة يوم الكورة انا من الساعة 3 ونص في الإستاد خشيت ويا الله ويامين لقيت حتة أقعد فيها .. قلت نظام الود مغترب أدخل مقصورة أصلو بعيد عنك فكيت الريالات ونظام الود حنفولي وناس السودان ديل ناس مفلسين ساي.. وانت الصادق يا قردابي خشيت لقيت روحي أكتر زول مقطع في الناس ديل والناس الفي المقصورة البي 50 الف اكتر من ناس الشعبي (الشعبي بقا حق المغتربين) وهاك يا عصائر ومأكولات وانا العامل فيها مغترب بيقت أشحد فيهم لو سمحت جغمة يا معلم ويا حبوب أقسم معاك عيشة .. يا قرضابي الإستاد مليان من الساعة 1 ظهراً وجمهور الهلال هو جمهور السودان واليوم داك لو كنت في كنت عرفت عظمة الهلال (والعظمة لله) .. جمهور الهلال بقا يعمل الأمواج المكسيكية وواحد جمبي مشتري ليهو 100 جردية مع كل قون يوزع للناس عشان تحرق غايتو الزول ده لو حضر زمن العمم كان فلس .. الإستاد فيها الرجال والنسوان والكبار والصغار العاقل والمجنون النصيح والمرضان والواعي والمغبي الغني والفقير شي فوق الخيال والله .. والله يا قرضابي لو عندك طريقة بالجد جد تحاول تجي تلحق الكورة الجاية .. ده مولد ..
07-11-2007, 10:56 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22554
ودالفاروق تحية طيبة لك زرقاء بلون السماء التي يزينها الهلال الرصين
Quote: خشّيت بيها كورة الهلال والترجي
حرام عليك يا ودالفاروق تخش الكورة وماتجي تحكي لينا بالتفصيل الممل عن هذا الانتصار. لازم تفتح بوست وتحكي لينا كل الحكاية وعن رايك في استاد الهلال بشكله الجديد وياريت لو دعمتها بالصور.
أبوفتحية
07-11-2007, 11:21 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
أخي عمر الفاروق أولاً بحر المالح طمع ، وهذا يعني أن لا رحلات نيلية ولا نيله وبالتالي البرمودا راحت شمار في مرقه. فيما يخص التطقيم لابد لكي تحافظ على إناقتك أن تجيب معاك تويوتا برادو حتى لو تربتيك بشرط تكون فور ويل درايف لزوم الحفر والمويه الراكضه في الشوارع وأن تكون بتنظر للناس من مكان عالي محاكياً شاعر حلمنتيش الذي قال "أشوف بي فوق وبالمقلوب" ، لأنو ركوب وسائل المواصلات العامة من حافلات وأمجاد وركشات بالإضافة إلى العربات الزي ربع كيلو الجبنه ناس فيستو وأخواتها في الخريف هي والكداري واحد. أنا ما داير أطمم بنطك من البلد وأكرهك في الإجازة لأن فصل الخريف تزدهر فيه وجبة الفسيخ وموية الفول والسليقه وفي المقابل يتكاثر فيه الذباب والضبان وتخرج دابة الأرض والبعوض يتجدد شبابه أها والحال كذلك توقع أن تشرب شاي الصباح أحمر وبدون لقيمات لأن سيد اللبن قد لا يتمكن من الوصول إلى حيث تقيم من كثرة المياه الراكده أو أن تكون بهيمة الأنعام خاصته قد دخلت في إضراب مفتوح إحتاجاً على سوء المعاملة ، ما هو كمان حرام سبعة بقرات عجاف تديهم كليقة برسيم وشوية أمباز وداير يحلبو ليك برميل لبن في الصباح ونص برميل في المساء أنبئني بتفسير ذلك عمر أيها الصديق. أها الشمس الصباح في أى يوم ممطر عادة ما تطلع من الآخر وتجيك في وشك لمن تصر عينك من شدة حرارتها ، الكهرباء بين بين يعني ممكن تشتري كمية بتاعت كهرباء وتجي البيت وتنزلها في العداد تلقي الكهرباء قاطعه بس الكويس في الأمر إنو حقك محفوظ. الموية بتكون عكرانه شديد وزيها وزي موية المطرة عشان كده عليك أن تتبع التعليمات التالية عند الحمام إياك أن تنظر إلى الموية وأن تفتح الدش أو الماسورة يعني توش إنقطع تحت الدش وإتبلبل وعوم وإتخارج. برضو حاول تشرب الموية في إناء معتم غير شفاف يعني بلاش حكاية الكاسات الزجاجية الشفافه شوف ليك أى حاجة تحجب لون الموية لأنو نحن البلد الوحيد الذي حطم نظرية أن الماء لا لون له ولا رائحة ولا طعم والمغالط يجي الأيام دي. المهم يا الفاروق الكلام كتير لكين لمن تجي أعمل لي مس كول وأنا برد ليك المسكلة بأحسن منها ويبقي عليك بعديها تضرب لي عديل بإعتبار أنك مغترب مرطب وأنا مواطن معشكب. طبعاً لولا ضيق ذات اليد وذات الشامة وذوات الدم البارد كنت حا أكرم قدومك عشان كده حا نكون نحن الضيوف وأنت رب الدار لإعتبارات الكاش ، ومن ثم سوف أوريك أحسن محالات العضه في العاصمة القومية وخليك من الـ lucky meal والـ hot dog والبيتزا والتيك أوي دي كلها قشور حضارة مستوردة وخليك مع الزمن لا تعني أن نركب مثل هذه الموجة لأنها في النهاية سوف تتضح لنا أنها مجرد سراب أو قل بحر إبليس. إجازة سعيدة لكن بكل المقايسس لن تكن for rest & relaxation أبسطها من الناحية الجسمانية.
07-11-2007, 11:41 AM
فيصل نوبي فيصل نوبي
تاريخ التسجيل: 09-16-2005
مجموع المشاركات: 14194
Quote: انا في الخرطوم لي قريب الإسبوع وإجازتي قربت تنتهي وال37 بنطلون من المغسة لبست منهم 10 في مطرة أمبارح ..
فــاصل فكاهي مبدع
Quote: انا في الخرطوم لي قريب الإسبوع وإجازتي قربت تنتهي وال37 بنطلون من المغسة لبست منهم 10 في مطرة أمبارح والبدلة خشّيت بيها كورة الهلال والترجي من الساعة 3 عصرا والحزام والجزمة مشيت بيهم طهور ود جيرانا .. ..
مسرحيه متكــــامله من ثلاث فصول..
Quote: وهاك يا عصائر ومأكولات وانا العامل فيها مغترب بيقت أشحد فيهم لو سمحت جغمة يا معلم ويا حبوب أقسم معاك عيشة .. ..
درامـــــــا بعنوان الاصطدام بالواقع....
اجازه سعيده...
07-11-2007, 01:56 PM
سامى عبد الوهاب مكى سامى عبد الوهاب مكى
تاريخ التسجيل: 01-06-2005
مجموع المشاركات: 4971
يا بورداب الخرطوم شهيتوني الشية وبطني كركرت ولعابي سال ومطقت !!! وغايتو لميت في تلفون عقيد حأعذبوا ضرب (قروش موكلين) ووصفوا لي قصة أبو الزهور دي وأسهبوا في جزئية الشية والشطة وجاييكم جاييكم بالاتوس الماخمج وتلفوني 0122024755 أحمد موس المحامي بوردابي جديد وشيابي قديم خالص
07-11-2007, 10:26 PM
نهال الطيب نهال الطيب
تاريخ التسجيل: 03-14-2007
مجموع المشاركات: 1606
ود الفاروق .... ارجاني انا جاي بعد اسبوعين و لايهمك اوديك تتثاقف في مركز عبدالكريم ميرغني و تفش بناطلينك و تي شيرتاتك في الاوزوووون و النادي الديلوماسي و ليك علي اجيب ليك بقال و عبدالفتاح و كمان نمشي نشوف مناوي و نعمل ليك قعدة بحواء بلنجة ............. و البرمودا دي في السودان عيب يا عمر ما بلبسوها في الشارع .. ود جمعة جهز شيتك و حجرك و الكاتبها الله بتقوم في ام ليمونة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
lana mahdi
محمد حامد جمعه
ALGARADABI
طارق جبريل
عبد الله عقيد
الصادق صديق سلمان
almulaomar
فيصل نوبي
شهاب الفاتح عثمان
Ahmed musa
نهال الطيب
Ahmed Abdallah
فيس بوك
تويتر
انستقرام
يوتيوب
بنتيريست