|
Re: حسن عطية (Re: بكرى ابوبكر)
|
رياضه آخر الزمن ..... -------------------------
رابط "مكتبة شوقي بدري" في سودانيات: 12-10-2006, 08:41 PM
شوقي بدري Member -----------------------------------------------------------------
لصدمتنا عرفنا ان الصحف الرياضيه قد اغلقت لان المحررين تطرقوا لرجوله زملائهم وشرف نسائهم . هذه اشياء كانت غير مصدقه قديماً . وتذكرت هذا الموضوع القديم .
رياضه آخر الزمن ..... . اول شئ نحن كلنا اهل المريض المتواجد في العنايه المركزيه و المريض بتاعنا هو الكوره السودانيه و الرياضه السودانيه . اول حاجه الكوره ما كل شئ ، الكينيين و المغاربه و الاثيوبيين سحروا العالم بانجازاتهم في العاب القوه . و مصر صارت رقم يحتسب في كرة اليد و الاسكواتش و العاب اخري كثيره . التحزب الشديد بمنع الزول يستمتع باللعبه الجميله ، ايه المانع تستمتع بفوز الهلال و في نفس الوقت بي قون السعودي العملو بالمقص . مش قون جميل . ناس المريخ ديل ما اولاد امدرمان و فريق سوداني كبير . انا كنت مريخابي لانو اخوي الكبير الشنقيطي كان هلالابي و كان لاعب كوره جيد و مافي زول يكون قدم دمه للمريخ زي ما عملنا نحن زمان . اتدقينا في تمارين الملاكمه و في ماتشات الملاكمه في نادي الخريجين الخرطوم ، سلاح المهندسين و دار الرياضه الخرطوم و لكن كنا نحب صديق منزول و نقف في الشارع عندما يمر في طريقه الي منزلهم في شارع الفيل . و نفتخر بسليمان فارس السد العالي مهاجم الهلال الذي سجل اصابة الهلال اليتيمه في شباك الهونفيد المجري في 1956 و اشاد به الكابتن بوشكاش و بوجيك المجري . و كان ترنا كابتن المورده يعتبر بالنسبه لنا بطل و شخصيه اسطوريه . و بشهاده السعوديين فهو المدرب الذي خلق الكره السعوديه . و السعوديون يقولون لكدايس الكداره كدايس اقتباسا من السودانيين و ترنا . و كديسه و ككو و قرنتيه و ....هذه كلمات نوبيه . في سنة 1959 تكون فريقان نظريا في العالم بواسطة اتحاد الكره العالمي والمدربين العالمين ، احد الاثنين و العشرين لاعب و مثل ياشينوف حارس المرمي الروسي كان صديق منزول احدهم و فرحنا كسودانيين و ابتهجنا . و كان لي حب و ارتباط بالمورده فعندما سوئل السد العالي عن احسن الفرق السودانيه قال بلهجته المصريه (المورده بتلعب ) . اخونا بكري عثمان الذي عمل في رخص العربات في الخرطوم لسنين طويله و المعروف بود النوبه كان احد مشاهير فريق المورده و كان مشهور بانه يغيظ اللاعبين الاخرين و في احد الماتشات تطاول علي الامير صديق منزول ، و في الهاف تايم اشتكي الامير للكابتن عمر عثمان. و كما سمعت من كابتن السني الماظ ابن اخ لاعب المورده قديما صديقي الجاك الماظ فان عمر عثمان قطع لاخيه كف بتاع ناظر قائلا ( اوعك تقل ادبك علي صديق ، حتي لو خسرنا المباراة مش مهم ) فوقف بكري انتباه قائلا (حاضر ) . صديقى ود الاشول الذي نشا و ترعرع في المورده كان يلعب للهلال . و كان مشهورا بانه يستفز في الماتشات و عندما خطب الاستاذ هاشم محمد عثمان ( حارس مرمى المريخ ) زينب خضر رحمة الله الياس ابنه الحاوي و شقيقه الموسيقار عبداللطيف و حسين و اخرين ، قال ود الاشول للاستاذ هاشم عندما التقط الكره (بت الحاوي ) فخرج الاستاذ الجنتلمان هاشم من طوره و ضربه . و غضب كل لعيبة الهلال و المشجعين من ود الاشول و اجبر علي الاعتذار للاستاذ هاشم . الصداقات كانت تربط لعيبة الكره مع بعضهم البعض . و برعي احمد البشير المشهور بالقانون الذي كان بمثابة صديق منزول المريخ كان صديقا لصديق منزول و يذكر الاستاذ الطيب ميرغني شكاك ان صديق منزول اقنع برعي بالتوقيع للهلال في بداية الخمسينات . بمساعدة ادريس شكاك الهلالابي . و في كتابه الاحفاد يذكر انهم تناولوا معه طعام فطور رمضان قبل التوجه للتوقيع . و وقتها كان الاستاذ الطيب يسكن في مدرسة الاحفاد بالقرب من المجلس البلدي و ادريس شكاك احضر الفطور من منزلهم . الاستاذ حسن عطيه طيب الله ثراه حضر لبراغ في الستينات للعلاج . و عندما استلم الفلوس التي سلمها نادي الهلال للمدرب الشيكي ستاروستا كانت بالسعر الرسمي بينما السعر الفعلي هو مرتين و نصف و لم يجد الاهتمام الكافي من الشيك كلاعب كبير مما اغضب طالب الطب وقتها و عبدالرحمن عبدالحميد عثمان و طالبه بان يبلغ نادي الهلال فرفض ابو علي قائلا (ما ممكن اشتكيه ، الراجل ضيفنا و مدرب الفريق القومي ، ازعزع ثقة الناس فيه ، اطلعه حرامي ، مش مهم حتي لو ما لقيت اكل ) . و في بعض الاحيان كان ياكل اكل الطلبه الذي لم يكن جيدا و يقدم في مطاعم تخدم الاف البشر و في بعض الاماكن عشرات الالاف من طلبه و عمال . اللعيبه كانوا يلعبون بحماس و تجرد . الشاويش جمعه الذي كان صول مدرسة وادي سيدنا كان يحضر بالدراجه بالرغم من بعد المسافه و الشارع الوعر و يتكل العجله و يدخل الماتش . و بعد الماتش يرمي الدينمو و يقفز علي العجله راجعا لوادي سيدنا . هذه هي الاخلاق الرياضيه و ما نبحث عنه الان هو هذه الروح الجميله للتعاون . فالرياضه اخلاق . ففي سنة 1964 و في ماتش في تونس اتي ضابط بوليس لغرفه لبس الفريق القومي السوداني سائلا عن سلسله ذهبيه تحوي صوره احد اللعيبه التوانسه و عندما انكر الجميع رؤيتها اشار الضابط ان ود الاشول قد التقطها في الميدان و شوهد و هو يضعها (في الحزه ) ، فانهار الكابتن ابراهيم كبير باكيا . و طرد ودالاشول من الفريق القومي و من فريق الهلال و ترك السودان. الكابتن الامير صديق منزول و اسرته اجبروا علي الرحيل من منزلهم في شارع السيد الفيل لانه كان بالايجار فمات اسطورة الكره السودانيه و هو لم يمتلك المنزل الذي كان يسكن فيه مع اسرته . فلننسي صديق منزول فلماذا لا نتعاون هلال و مريخ و مورده و تحرير و ...الخ لكي نساعد و نحسن وضع نجومنا اليوم . كما ذكرت في احد البوستات قديما فان الترسانه في بداية الخمسينات كان امامها اربعه ماتشات و اذا خسرت اي منهم فستهبط للدرجه الثانيه . فحضروا للسودان و اخذوا اسطورة الكره السودانيه عبدالخير و ودالجراح و كلول و حمتو و اخر لا اذكره . وفازت الترسانه في كل الماتشات و رجع عبدالخير الذي كانت امه عجوبه بائعه في سوق الشجره ليموت في امدرمان في فريق كلودو شرق السوق في غرفه ايله للسقوط بدون شبابيك و هذا في نهاية الثمنينات ، ماذا قدم الهلال له ؟ . و كرم حمتو بان جعله نادي الترسانه حارسا لبوابة النادي . فلنتعاون لنرفع الرياضه السودانيه خاصه كره القدم فنحن طيش الطيش في افريقيا .و لنبعد عن العدائات فكلنا اهل البكا يا جماعه. التحيه. " شوقي ".
|
|
|
|
|
|
|
العنوان |
الكاتب |
Date |
حسن عطية | بكرى ابوبكر | 06-17-07, 04:04 PM |
Re: حسن عطية | عبدالله الشقليني | 06-17-07, 04:07 PM |
Re: حسن عطية | ALGARADABI | 06-17-07, 04:11 PM |
Re: حسن عطية | خدر | 06-17-07, 04:16 PM |
Re: حسن عطية | بكري الصايغ | 06-18-07, 12:26 PM |
Re: حسن عطية | بكري الصايغ | 06-18-07, 12:33 PM |
Re: حسن عطية | بكري الصايغ | 06-18-07, 12:41 PM |
Re: حسن عطية | Hussein Mallasi | 06-18-07, 12:48 PM |
Re: حسن عطية | بكري الصايغ | 06-18-07, 12:58 PM |
Re: حسن عطية | بكري الصايغ | 06-18-07, 01:05 PM |
Re: حسن عطية | بكرى ابوبكر | 06-21-07, 07:56 AM |
Re: حسن عطية | Hussein Mallasi | 06-21-07, 07:59 AM |
Re: حسن عطية | بكري الصايغ | 06-21-07, 08:27 AM |
Re: حسن عطية | Hussein Mallasi | 06-21-07, 08:44 AM |
Re: حسن عطية | بكري الصايغ | 06-21-07, 08:56 AM |
Re: حسن عطية | Hussein Mallasi | 06-21-07, 12:10 PM |
Re: حسن عطية | بكري الصايغ | 06-21-07, 12:29 PM |
Re: حسن عطية | Hussein Mallasi | 06-21-07, 12:44 PM |
|
|
|