واللة البوست عجبنى ولو انو متخصص حبتين فى اطار خارج عن تخصصى فى سودانيزاونلاين. معليش يا احباب بديت بالعبارة دى قبل التحية اولا شكرا منى خوجلى على هذا الابداع,واهداؤنا هذه القسمة من قسمات الجمال. ثانيا عزار شامى(وآسف على عزاز شامى حاف كدة عشان ما اخل بالشكل العام للمداخلات) تحياتى وماشاء الله عليكى (سوقك حار) وده باين من صراع الافيال اللطيف ده ابتداءا من دكين..محسن خالد.. انتهاءا بالمتكسر الاممى صديقى عادل عبدالعاطى ,الكل ياتى بجزيل العبارةوسمو المعنى... تذلفا وقربى الى صاحبة السمو والمعالى فلك التجلة .
سبب المداخلة: ابيات الشعر الآتية:
انا عبد الحياةوالموت احى من مهودها الى قبوره عبد اسمى اذيب نفسى وجسمى طلبا فى خلوده وظهوره عبد جسمى جعلت قلبى ماوآة فاضرمت اضلعى بسعيره ان جسمى عبد لعقلى وعقلى عبد لحسى والحس عبد الجمال يحيى بنوره
الامضاء عبدالمنعم
والتعديل عشان ما انسى اخونا عمر الفاروق وله التحيات الطيبات
يا دينا ودكين يعني أسة إنتو دايرين تصلو لي شنو ؟ الرهيفة تنقدّ ولّا الفرشة ترسم ؟ بني الجنسين كضّابين إلا من رحم ربي .. البنات ريّادات والبسمة تحرق في الحشا .. الأولاد بكّايين ووجعهم خرافي ..
ياخ أقول ليكم حاجة ؟ انا الكلام الفوق ده كتبتو سااااااااي وغرضي النكتة دي بس.. واحد لئيم زي دكين ده كجه إشترى ليهو ساعة جديدة قامت سألتو بت زي دينا دي كده وقالت ليهو : لو سمحت الساعة كم ؟ قال ليها خلااااااص قبّلتي عليها عايزة تكمّلي حجرها
جنس بيااااااااااااااااخة
01-27-2008, 12:33 PM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
مني خوجلــــــــــــــي تحياتي عــــــزاز الفنانه الجميله فاتني وكما يبدو كل جميل بهذا البوست وبرغم من الجرسه الحاصله لبعض الناس الا وانو استمتع بكل ما هو موجود الان بوست غايه الجمال وكان ما المشغوليات في هادي البلاد الا واكنت حاضرا قبلكم عزاز وين لاقاك الاسم ده؟ مني خوجلي ماظاهرة المانع خير اكيد محمد عليش
برجع ليكم
01-28-2008, 10:18 AM
DKEEN DKEEN
تاريخ التسجيل: 11-30-2002
مجموع المشاركات: 6772
إبتداءا مشكور يا عدولة على الرد الطويل الضافي.. وإليك ماخفي عليك..
Quote: يا دكين حالة كون المراة انثي هي حالة بيولوجية
انا ياعدولة ما عايز اخش في مغالطات لمعاني المفردات اللغوية .. وحين اقول انثى فانا لا اقصد مايقصده علما اللغة وحراسها..انا بسيط جدا وبتعامل مع الاشياء بنفس بساطتي دي.. انثى تعني عندي بت = مرة = فتاة= وما إلى ذلك.. ده الانطباع البجيني حين تقال مفردة انثى..اطلاقا لا اقصد بذلك حالة كونها من ذوات الثدي وانها تحيض وتحمل ومانحو ذلك من متلازمات الخواص البيولوجية للثديات.. بحب اتعامل مع المسميات حسب انطباعي عنها لا حسب انطباع اللغويين .. الشغل البيولوجي القتو ده بجيني لامن تقول انتاية وضكر بالكاف .. السودان مثلا اسم يراه البعض يدعو للرثاء وعنصري وغير ملائم وثمة بوستات ُفتحت هنا لتغيير الاسم الى اسم اخر .. وانا عندي الاسم ده ولوف جدا وحبيب جدا ويشير في دواخلي الى عودة حميدة ونهار قائظ وخريف وريحة مهوقني وونسات اصدقاء واشياء اخرى ولوفة..وقيم سمحة معتادة وبعض عراريق.. وده ماموضوعنا طبعا بس سقتو لتوصيف حالة الاسماء عندي.. اقول : يعني دلالات الاسم عندي ترتبط عندي بما وصلني في بواكير ايامي لا بما عرفه علماء اللغة وجرت به الشروحات في كتب القواعد والقواميس..
Quote: قال القائل " انثى ولا دستة رجال" ؛ تسائلت لماذا لم يقل "انثى ولا دستة ذكور" ؟
قال القائل ده سند دعيف يا عادل .. منو القال ليك انو القائل قال ما قال؟؟ اها انا بقول ليك انو القائل قال: (مرة ولا دستة رجال) مثلك ده ياخوي لايمكن الاتكال عليه والنجر فيه لايصال فهم..
مثلك ده يا حبيب يجب ان تسنده الى صاحبه لمراجعته فيما قال او دعه فهو حمال وقابل لللواكة.. بعدين ياخي حرف الـ(ذ) عند السودانيين صعب المراس ..وغير منطوق في غالب الاحيان.. لذا تجد انو كلمة ذكور دي بس في المجلات العلمية وكتاب العلوم بتاع سنة رابعة.. اُستعيض عنه بكلمة ضكور...ودي برضو لا يستخدمها السودانة في الاشارة الى الرجال لانها جرت سلفا في تعاريف الحيوان ..(لحمار الضكر والحصان الضكر ..) فالفلسفات بتاعة (تصانيف المرة والتطور الطبيعي والطابع الانساني) وماالى ذلك من مفردات وردت في سياق حديثك السابق دي كلها اشياء لاتدور بخلد المتكلم العادي وانما تدور فقط في صوالينكم وونسات اللغويين وابراج اللغة الصفوية..
فيا عادل تصنيفي للمرة كانثى لايعني بالضرورة اني اقلل من دورها في الحياة او اوطي من مستواها.. ياخ انا اكتر زول هنا ارى انو الانثى -او المرة زي ما بتحب انتا تسميها-هي اساس لاكثر من نصف ما كتبته هنا في هذا المنبر التعس الذي مافتأ يرى مني عدوا لها.. ودونك مكتبتي.. الانثى عندي إلهام.. منجم جمالي لاينفد ..ارى منهم حقائق لايراها إلا من رق قلبه وصفا وتسامى..وكان دقيقا حبيبا حفيا بهم.. وتجي تقول لي مكاجرة؟؟!! يكاجرك الكاجوري قول يامين.. ياخ انا لو عايز اشتم المراة واقلل من مستواها قالو ليك محتاج لي مفردة لغوية زي (انثى) اتكل عليها واركز فيها منجنيق شتايمي؟!! ماهدا المنبر مليان بائسات وذوات عاهات ومسترزقات ممكن امرق ليك منهم صفات ذميمة تغنيني حتى عن ايراد جملة مفيدة.. ارص ليك الصفات ساي كده مجردة بدون اي دلالات او حروف توصيل وانتا براك حتفهم انا قاصد منو وشنو وكيف..
Quote: او لصح قول السلفيين بجواز ترك المراة او عدم "اطعامها" ؛ اذا لم يمكن "الانتفاع بها"
الاستدلال بهذا القول في هذا المقام يجعلني في دائرة اولئك الجهلاء.. والراي انك اشتطيت كتير وحملتني ما لم اقصدة حين ادخلت الجملة اعلاه ضمن ردك علي.. فالمنبر به من الجاهلات غير الفارزات والجاهلين غير المدركين مايكفي لان يفهمن او يفهموا اني ارى ضمن من يرى انو المرة يجب ان تُـترك جائعة إن لم يكن ثمة نفعُ ُ منها او انها يجب ان لاتشرب من ماء زمزم طالما كانت حائضاً..او ماشئت من اباطيل البدع..
وجافيت المنطق السليم والذوق العام ياعادل وكأنك تستعجل ادانتي حين جمعت بين حكمة (ام علي ) حين قالت: (الزواج اربعين يوم والباقي سترة حال) وجمعت بينه وبين ما ورد عن علماء السوء.. لانو اصلا مافي مقارنة تستدعي قولك
Quote: ان الزواج هو شهر العسل فقط؛ او لصح قول السلفيين بجواز ترك المراة او عدم "اطعامها
فقول (ام علي) بان الزواج اربعين يوم فقط ليس المقصود بها انو المرة هي سبب تعاسة ماتبقى من ايام الزواج.. ولاينسحب على المرة(الانثى) بس وانما هو مثلُ ُ ينسحب على المرة والراجل في عكننة الحياة الزوجية..ويضع - من حكمته- الادوار مُـبهمة فلايدري السامع هل البؤس سببه المرة ام الرجل..
Quote: هن من يحافظن على الاسرة ومن يربين الاولاد ومن يقفن وراء الرجل او جنبه ومن يسندن شيخوخته .. كن خالقات الحياة والمحافظات عليها
ودي برضو كتابتك ليها في معرض ردك علي تضلل القُـراء ..فانا لم انكر عليها هذه الادوار .. لاني انا القائل بها ابتداءا وإن كان قولي بها في إشارت لاتخفى على القاري الفطن ..وانا احسبك فطناً لم تغب عليك وانما انت تغاشمتها قاصداً.. وانو المرة هي البتربي الاولاد في شراكة لها فيها العبء الاكبر..والمرة هي السند والمرة هي ..الخ من ادوار معروفة حفظتها حبوباتنا اللوائي عملن في حقول الفول واللوبيا وزراعة الجروف.. والحاجات الانا انكرتها واضحة وجلية وكتبتها ليك اختصارا (امور مايسمى بالجندر) فياخي ماترمي بهذه الاشارات ولو على سبيل الغشامة ..وكن دقيقا في ماتكتب عني بالذات في شؤون الإناث.. عشان ما تنزل اسهمي وسط الجكس انا اصلا اسهمي رهن جرابها والجراب في الواضة ..وماناقصة.. ماقصدته بإعمال القلوبلايزيشن هي الضجة التي ضجت بها كتابات النساء مؤخرا عن طلبهن حريات اكثر وهن احرار في بلاد ملكن فيها الحق في تقرير مصائرهن.. وعن شعورهن بالاضهاد وهو شعور كذوب اتينَ به من كتب فرنجيات كانن مضهدات فعلا .. فكان القياس عليهن ركيكاً لم يراعي الفارق.. وعن حقهن المغتصب في العمل وهن اصلا كانو ضمن عمالة الحقول وشغيلة العمل اليدوي وحقول الشمال وسعف النخيل المجدول تشهد..ووديان الغرب والابقار تشهد.. والتوج في الجنوب يشهد..والشرق على هؤلاء شهيدا.. القراءات الخاطئة غير المحققة وعدم قراية الواقع السوداني الذي يعج بما ليس له مثيل في كافة انحاء المعمورة.. ماقصدته يا عادل باعمال القلوبلايزيشن هو التقليد الغشيم لماحوته المستوردات.. والمتابعة اللصيقة لتطور حقوق المرة في الغرب والتهافت عليه .. تهافتن حتى تحدثت مهرقطة سودانية تدعي النضال عن حقوق المثليين.. وهكذا تتبعو اثارهم قصصا فدخلو جحر ضب فدخلو ورائهم .. فلا الضب خرج ولا نسوانا مرقن من الجحر.. فبقن في خلوة شرعية مع الضب .. نسوانا يا عادل في هذا الزمن العجيب في ذمة ضب ..
Quote: حين كان الرجل ذو العين الطائرة يبحث عن الانثي في كل مكان؛
وكأنك تنفي عن المرة صفة طيران العين.. صحي ياعادل انا معاك وبحب المرة وبحب استوفيهن حقوقهن بس كمان ليس على حساب سمعة الراجل.. ياخوي دي اشياء تجدها في الجنسين (زوغان العين والخيانات) وما الى ذلك من نواقص بشرية نزلت مع طبيعة البشر التى ترتقي يوما بعد يوم في رعاية الشرائع السماوية والتشريعات الانسانية والخلق القويم والنقد الذاتي.. فلا يجوز برضو ان تنسبها الى طرف دون الاخر ..والمابجوز بصراحة في كلامك الفات ده بالمناسبة كتير وانتا اغدقتنا من فيضو ودفقتا بي غادي.. كما وان ايراد عبارات من عيار
Quote: كن العاقلات والرزينات
Quote: وهن من يحافظن على الاسرة
Quote: كن الاكثر صبرا وقوة ومثابرة وتضحية؛
يعتبر كلام إنشاء ساي وجمل خبرية قابلة للتكذيب والغلاط ولان تكون صحيحة ايضاُ.. فالرجل ليس كما تظن او كما تظهره كتاباتك بالاعلى..وانا ما حاتكلم ليك عن عظمتو وقيمتو في الحياة لانها برضو مسالة قابلة للغلاط والمجادعة ..
Quote: اخونا عثمان محمد صالح؛ لم ينضج عقلهم بعد
وحرىُ ُ بك ان تعلم انو العبارة الشهيرة التي قالها قريبنا عثمان محمد صالح قيلت اول ماقيلت في إمراة في هذ المنبر .. إمراة انثى اخرى من المتبعات سبيل القلوبلايزشن بلا رشاد.. متقولبة ساي كده كأنها تسوق بهايم في جهات (طوكر) .. قال ليها في حكمة بالغة (متى ينضج عقلك)..
Quote: يا دكين الرجل السوداني هو قيد ثقيل في رجل المراة السودانية
بهذا الحديث فقد جافيت اخر منطق كان مباريك.. الرجل السوداني والله من براحو لامن انا ذاتي ماقادر ارد عليك.. ودونك قوانين العمل السودانية والتشريعات تجاه المراة..ودونك ايام الاتحاد الاشتراكي .. ودونك سيرة الرعيل الاول من السودانيات ودونك نفيسة كامل وفاطمة وسعاد آشا والتنظيمات النسوية حتى في عصر (هؤلاء).. وياخوي تاني ياتكلم كلام نجيض وموزون ومشفوع بي المنطق والدلالات ولا ما حارد عليك لو اجحفت في حق الرجل السوداني..الانشاء من عيار حقاني واخو اخوان وزول حارة وحامي الظعينة واخو فاطمة دي والله ارصها ليك هنا كتيرة كمثل قوتِ السنين المزروء في سنبله..
Quote: اما حديثك عن المراة المتخيلة والمراة التي لا تعلم من اين اتت؛ فهو يعبر عن مشكلتك يا دكين؛
مشكلتي كيفن ياعادل؟؟!!دي مشكلة العالم .. جميع الشعر الخالد كان في اوصاف ومفاتن الانثى المتخلية التي نفيتها.. كافة المعزوفات والسمفونيات والمسرحيات الرائعة كانت المراة سبا مؤسسا لها.. جميع الاغنيات الخالدة كانت الملهمات فيها نسوان بالغات الجمال.. ولو جيت مسكتهن حقيقة لما وجدت فيهن ربع ماقاله العبادي او المساح او سيدعبد العزيز ..او قيس او شكسبير.. كانت فقط ملهمة لاغير.. انتا قايل في نسوان بمثل ماقالوا؟؟ ما خيال والسلام.. وده فعلا المطلوب لانجاح دنيا الناس .. مزيدا من الخيال ومزيد من الحب والإلهام.. كل ماقيل من مدونات خالدة تلاتة ارباعو نجر من خيال اولئك المساكين.. الخيال الانتا (لاتعلم من اين اتت) هو المنبع الاول لتلك المعلقات والمقاطع التي اتحفنا بها اؤلئك العظماء الذين اغبنـتهم حقهم حين وصفتهم بـاوصاف من عيار (ممارسي الحروب الصغيرة والغبية) و(ذوي العيون الطائرة)و(ممارسي طفولتهن المتاخرة)و(الغارقين في اهتماماتهم واوهامهم الصغيرة) و(المتخلفون بجدارة)..ودي اوصاف حقو تعتذر عنها كونك زول واعد وليبرالي محسوب على جهات وكلامك يُحسب عليك وعليهم ولست مثلي ليبرالياً على طريقتي وسبهللي وغير محسوب على احد.. ..
Quote: قل معظم سودانيي الشمال النيلي - لا يعرفون المراة يا دكين؛
نحنا كان بابنعرف المرة حرم تاني المرة ذاتو مابتعرف نفسها.. وللضمان كده واجيك من الاخر البعجبك وبعب دينا خالد يعرفو ليها شنو في ذمتك.. ماشعر وقعر..
01-28-2008, 10:33 AM
DKEEN DKEEN
تاريخ التسجيل: 11-30-2002
مجموع المشاركات: 6772
يا زول آسف كتير لو نزلنا اسهمك في سوق البنات الجميلات ؛ ما كان القصد اطلاقا؛ بعدين انت تجاوزت عن فقرتي الاخيرة والتي اقول فيها ان قلبك قلب عاشق وشاعر؛ والبنات يحببن العشاق والشعراء؛ او هذا ما يتخيل لي ؛ ويا زول زي ما قالت ليك عزاز بتلقا بتلقا؛ بس خلي الجرسة الكتيرة وركز شوية يا اخوي ..
يا زول اظنك لم تنتبه لدلالة وصفي لك في المداخلة الاخيرة بدكين الحنين؛ بعد ان كنت اسميك دكين الشين؛ وفي الحقيقة انت لا شين ولا حاجة؛ بس حاجاتك مرات شينة ومشاترة؛ وبكون زعلان منها؛ زي ما بزعل من نفسي لمن اشاتر؛ فنحن يا دكين نشبه بعضنا كثيرا في الجوهر؛ رغم اختلاف المظهر .. وما تسميتي لك بالحنين الا لروية الحنية والمحبة طافحة في كلامك حين تصعد الى عليين؛ وما وصفي لك بالشين الا حين تسقط اسفل سافلين؛ وما حال القائل هنا بافضل من حال المُخاطب.
في قضة انثى / امراة كان هذا استطرادا على خلفية تصنيفك؛ والكلمات لها حياتها الخاصة يا دكين حتى لو كان فهمنا لها مختلفا؛ والقائل "انثى ولا دستة رجال" قالها في قصيدة يتغنون بها ويكررها علينا من يظنها مدحا؛ وكل كلمة لها محمولها الفكري يا دكين؛ ونحن في بحثنا عن واقع جديد نبحث عن حساسية جديدة تجاه اللغة؛ وفي صفنا تقف عزاز شامي كما اعتقد؛ فقول لينا انت معانا ولا مع الخيانة ؟؟
اما الجندرية فلا افهم حقيقة ما تقصد بها .. يا سيدي نسائنا جندريات من زمن الكنداكات؛ وكل ما تحدثنا عنه من الدور المتعدد للمراة هو من صميم الجندرة؛ وان لم يكن يسمى بهذا الاسم .. انظر الى اهم جندريات المنبر وقل لي ماذا تملك ضدهن؟؟ وماذا فقدن من انوثتهن عندما انحزن لانسانيتهن ؟؟ معاك اشراقة مصطفي ومعاك اماني الجندرية ومعاك عزاز شامي وغيرهن؛ ووين ومتين اقتبسن ودخلن في جحر ضب وراء الغربيات ؟؟ يا دكين دا الكلام الني والما نجيض وما موثق؛ فلا تهاجم نسائنا الجديدات باسم الجندرية المفتري عليها؛ وكن صديقا وشريكا لهن؛ تترب يداك.
اما حديثنا عن الرجل السوداني واختلافنا فيه؛ فهو ايضا لا يفسد للود قضية .. يا زول الرجل السوداني دا متخلف عديل كدا .. ولولا النساء السودانيات كان انقرض زمان مثله مثل الديناصورات ؛ ودي قناعتي وانا احسب نفسي ضمن اولئك الرجال السودانيين واعلم الكثير عن نفسي الامارة بالسؤء ان كنت احاول اصلاحها لعل وعساي ان انجح .. فلا تدافع عن رجال السودان الذين نراهم وانما دعنا نتطلب من نفسنا قبل ان نتطلب من النساء؛ لان تقصيرنا اكبر واعوجاجنا اشد .. اما قولك ان المراة السودانية كانت لها حقوقها فانت تعلم انه كانت لها واجبات اكثر من الحقوق؛ وانها كانت تكدح وتاخذ التمن كزوجة ونصف ما ياخذ اخيها في الميراث؛ فقط لكونه رجل وليس لاي سبب اخر .. فيا اخي لا تكرر لي كلام فاطمة احمد ابراهيم ان المراة السودانية حصلت على كل حقوقها اكثر من المراة الامريكية والاوروبية فهذا هراء؛ المراة عندنا لا تزال تعاني في هذا المجتمع المتخلف؛ الذي يعاني رجاله ونساؤه على السواء؛ ولكن معاناة المراة مزدوجة.
قصة الالهام والتخيل انا لا ارفضها كخالقة للشعر والادب الخ؛ وهي مجال لك وللكاشف اخوك محسن خالد؛ ولذلك ستظلا طويلا تبحثان عن تلك المراة المتخيلة؛ وربما تجدانها وربما لا ؛ كل تضامني معكما في هذه الرحلة الشاقة؛ لكن نهاية مساهمتك كالعادة خربت كل دررك وكانت درابا على قول نجوان؛ وهي كفيلة بتطفيش "الجكس" منك مليون مرة اكثر من "تنظير" عادل عبد العاطي ..
لك المحبة ..
01-28-2008, 04:34 PM
DKEEN DKEEN
تاريخ التسجيل: 11-30-2002
مجموع المشاركات: 6772
لو ديل هم بس النسوان عندك في البورد ده انا بتعذر...
لكن عبارة
Quote: غيرهم
القتها دي من خمسة حروف وهوينة ..بس لامة لم السنين..وتتسع حتى لاناث بوردات سودان فور اوول.. وراجع بوستات المنبر ده تجد عجبا.. وهسي لو قعدتا بمرق ليك البوستات الانا قاصدها .. بس انا مافاضي القط بوستات العولاق واقعد اوثق ليهم .. ولو فاضي حرم ما بسويها ذاتو.. انا ماهاوي اتتبع سقطات النساويين هنا واقعد افخخ ليهم من حين واخر ..لكن البقولو ليك حاصل ياخوي.. وامشى من دربك ده وتتبع آثر ام ضراع وحتنتهي بيك عند جحر ضب المثليين.. عشان تاني ماتقول لي (كلام ني وماموثق) اللهم إلا تكون ماعاديها مع النساوين.. وذلك اسلم ليك ولينا..
Quote: ودي قناعتي وانا احسب نفسي ضمن اولئك الرجال السودانيين واعلم الكثير عن نفسي الامارة بالسؤء ان كنت احاول اصلاحها لعل وعساي ان انجح
اهااا..هنا بقى دي مشكلتك وما مشكلة الرجل السوداني.. فلا تسقط الاشكال علينا اجمعين.. انا -والحق يُقال -اعرف عنك سعيك الدؤوب نحو اصلاح نفسك وتهذيبها ونقدك الدائم لها وآمالك في عالم يقوم على الموضوعية والمؤسسية واحترام الحريات وسيادة ماهو متفق عليه كسيد..بس تجميعك لينا في خانة المتخلفين في مقارنة مع ادوار المرة السودانية مجحف.. وايرادك لمسالة ميراث النص ده احسبه حاصلا ُتريد به باطلا.. فالرجل السوداني ليس هو من انزل شريعة السماء عشان تحاسبو عليها.. وكونك تقول
Quote: فقط لكونه رجل وليس لاي سبب اخر
فذلك اجتهاد شخصي منك لا اكثر ولا اقل وقابل لكونه خطأ.. وهو في الحقيقة خطأ..وماداير اجتهاد ذاتو فليس من اسباب استحقاقة ذلك النصيب كونه رجلا (بيلوجياً)..وانتا عارف الكلام ده ومافايت اضنيك..بس اظنك محِـرش ساي..وباب الحديث هنا واسع وليس من ضمن اولوياتي..ولا حبابو ذاتو
Quote: فيا اخي لا تكرر لي كلام فاطمة احمد ابراهيم ان المراة السودانية حصلت على كل حقوقها اكثر من المراة الامريكية والاوروبية فهذا هراء؛ المراة عندنا لا تزال تعاني في هذا المجتمع المتخلف؛
مابعرف ..ولكن الشي البعرفو انو المراة هي ادرى بحقوقها منك.. كونها مرة ..بيلوجيا وغير بيلوجيا.. لو انتا شايف نفسك اعلم دي قصة تانية..
يابو اماليا تعلم انو هذا الحديث لايتجاوز هذا الكي بورد وهو راي ولايفسد ودا بيننا فلا تكرر مسالة الود البينا دي..فهو ود مقيم وله اسبابه..ولا حاجة لك بتذكيري اياه.. وحرم كان نابذتني -وانا اعلم انك لن تفعلها- فما انا برادها إليك..
Quote: وهي كفيلة بتطفيش "الجكس" منك مليون مرة اكثر من "تنظير" عادل عبد العاطي
يازول الجكس يطير يقع في البير.. شِـن طعهم ؟؟
01-29-2008, 00:12 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
يا عزيزي لن ادخل معاك في مغالطات واتتبع الكلمة بالكلمة؛ لانو قصدي تفهمني وقصدي افهمك .. واعتقد دي كانت فرصة طيبة في حضرة منى خوجلي وعزاز شامي اننا نخرج من مجرد الاحتفال الشكلي والمجاملاتي بعزاز؛ الى الاحتفال بروح عزاز وبما تمثله عزاز شامي لمجموع او قل اغلبية من تداخل هنا ..
فعزاز ليست فقط بنتاً جميلة شكلا يتكسر فيها الناس ولهم حق؛ من رجال ونساء؛ بل هي انسانة جميلة الدواخل والعقل .. بل ازعم ان اجمل ما في عزاز هو عقلها؛ وعقل عزاز الجميل هو فيما اعتقد مصدر كل هذا الاحتفاء بها؛ وسبب التكسر الحقيقي فيها ؛ حيث في درب عزاز بيجي العميان شايل المكسر .. وعزاز هنا رمز للمراة السودانية الجديدة؛ مع كل تميزها كفرد ورغم كل تميزها؛ فهي حقا بذلك التفرد وبجمال روحها وعقلها وقدرتها الفائقة على اشعال الفرح والامل والاشياء الطيبة في الناس؛ تعبر عن المراة السودانية الجدبدة التي اشبهها بالزهرة التي تنبت بين شقوق الصخر .. وعزاز بتعبيرها عن اولئك النساء الجديدات الجميلات روحا وعقلا؛ تستحق منا الاحتفاء وتستحق ان نكون في حضرتها جميلين؛ وفي حضرة الجمال والنبل يصبح حتى القبيح جميلا ونبيلا .
مرة اخرى عذرا لعزاز ولمنى ولك ولجميع الحضور؛ ان انجرف الحوار الشعري الجميل الذي كان طابع البوست؛ الى مجادلة او شبه مناظرة حول وضع المراة السودانية والرجل السوداني؛ وهي مجادلة وان كانت مفيدة لحد؛ الا انه يمكن ان نواصلها في مكان آخر ووقت اخر .
لك ودي ..
01-28-2008, 08:43 PM
أحمد الشايقي أحمد الشايقي
تاريخ التسجيل: 08-08-2004
مجموع المشاركات: 14611
يا جميلة ومستحيلة إنتي دايماً زي سحابة الريح تعجّل بي رحيلها عيوني في الدمعات وحيلة أسمحيلها تشوف عيونك أسمحيلها انا لا الصبر قادر عليَّ ولا عندي حيلة
حدّثت عنّك نجمة جارة وزرعتَ إسمك حارة حارة في مناديل العذارَى وفي مشاوير الحيارَى في لحاء الأشجار كتبتو نحتّو في صُم الحجارة بُحتَ للشمس البتقدل في مدارها عيوني في الدمعات وحيلة أسمحيلها تشوف عيونك أسمحيلها انا لا الصبر قادر عليَّ ولا عندي حيلة
يا مراسي الشوق تعالي لا الليالي تمر بدونك هي الليالي من ضواحي الدنيا جيت جيت وعليْ رحالي لمداين في عيونك يا مُحالي ريّحيني أستري حالي عيوني في الدمعات وحيلة أسمحيلها تشوف عيونك أسمحيلها انا لا الصبر قادر عليَّ ولا عندي حيلة
إنتي منّك لا بداية عرفت لسّه ولا نهاية مرّة أسرح ومرّة أفرح ومرّة تغلبني القراية ولمّن أكتبلك وداعاً قلبي ينزف في الدواية يا صبيّة الريح ورايا خلّي من حُضنك ضرايا
01-28-2008, 10:39 PM
Elawad Eltayeb Elawad Eltayeb
تاريخ التسجيل: 09-01-2004
مجموع المشاركات: 5319
Quote: فعزاز ليست فقط بنتاً جميلة شكلا يتكسر فيها الناس ولهم حق؛ من رجال ونساء؛ بل هي انسانة جميلة الدواخل والعقل .. بل ازعم ان اجمل ما في عزاز هو عقلها؛ وعقل عزاز الجميل هو فيما اعتقد مصدر كل هذا الاحتفاء بها؛ وسبب التكسر الحقيقي فيها ؛ حيث في درب عزاز بيجي العميان شايل المكسر .. وعزاز هنا رمز للمراة السودانية الجديدة؛ مع كل تميزها كفرد ورغم كل تميزها؛ فهي حقا بذلك التفرد وبجمال روحها وعقلها وقدرتها الفائقة على اشعال الفرح والامل والاشياء الطيبة في الناس؛ تعبر عن المراة السودانية الجدبدة التي اشبهها بالزهرة التي تنبت بين شقوق الصخر .. وعزاز بتعبيرها عن اولئك النساء الجديدات الجميلات روحا وعقلا؛ تستحق منا الاحتفاء وتستحق ان نكون في حضرتها جميلين؛ وفي حضرة الجمال والنبل يصبح حتى القبيح جميلا ونبيلا .
وهي فعلا كذلك...
شكرا لكم جميعا علي جعل هذا البوست مختلف.. مختلف في جمال لغته.. في شرح واضح لتفكير "بعض" الرجال في المرأه ..عن الأنثي وعن المرأه الأنثي.. في التفريق احيانا بينهما وفي الجمع بينهما.. اراه بوست يبحث في قضية الارتباط والأختيار بين الرجل والمرأه وما بينهما من شروط ورغبه.. علي الرغم من عدم الأسترسال أو التعمق الكبير فيه.. وكله من منطلق شباب لهم اعمار متقاربه ولكن مناهج تفكير بعضها مختلف تماما وبعضها متشابه فهنا من يفصح تماما عن أفكاره دون مواربه... وهنا من يتهم الآخر بأفكار معينه ولا يكشف عن أفكاره هو الخاصه.. وكله بمهاره.. ثم من يرمي بكلماته ويهرب من نفسه قبل الآخرين...فالنفس تحتاج للتحليل والأيمان أولا قبل أن تنطق رغباتها..
شكرا لامتاعنا بكل هذا الجمال...
وشكرا لكل من سال مني هنا أو هناك في البوست الآخر... وربنا يشفي كل مريض..
أتابع معكم واستمتع بكل ما تكتبون..
01-29-2008, 06:33 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
دكين وعادل عاطي: أفشلتو بي البوست ..بقا بيييييض للكتاش .. ذكرتوني لمّات الأهل في إحدى المناسبات الجميلة وفجأة كده تتقلب شكلة بين الخالات يا عادل والله الموضوع بسيييط جداً وإن مشكلتك بديت تحلّل كلام دكين بي مخيّلتك وبما تهوى نفسك وبالصورة اللي بتخليك تكون نصير للجندر .. يا زول كلام دكين ده لو أخدتو بي إطارو وفهمو العام حا تلقاهو كلام عادي جداً وواقعي خالص .. وصدقني يا عادل لو لاقيتك في ونسة في صالون الجيران ولا في عرس صاحب والدعوة غداء بيكون كلامك بيشبه كلام دكين ده .. دي ما إذدواجية في الأراء وإتهام ليك لكن الونسة العامة غير البيتكتب في البورد هنا ..
01-30-2008, 04:06 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
عمر الفاروق والله اتمنى الاقيك لانو ظاهر انك زول ظريف .. بعدين انت فهمتني غلط لانو كلامي في الونسة زي كلامي هنا ؛ وكلام دكين مع حبي ليهو بالنسبة لي ما عادي ولا واقعي ولا بيشبه كلامي .. لكين في الموضوع ما في شكلة وانما اختلاف وجهات نظر وتناصح؛ وبعدين الوقت كلو كنتا قايل نفسي بتونس مع دكين ..
01-30-2008, 09:56 PM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: فيا اخي لا تكرر لي كلام فاطمة احمد ابراهيم ان المراة السودانية حصلت على كل حقوقها اكثر من المراة الامريكية والاوروبية فهذا هراء؛ المراة عندنا لا تزال تعاني في هذا المجتمع المتخلف؛
Quote: مابعرف ..ولكن الشي البعرفو انو المراة هي ادرى بحقوقها منك.. كونها مرة ..بيلوجيا وغير بيلوجيا.. لو انتا شايف نفسك اعلم دي قصة تانية..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالمنعم خيرالله
munswor almophtah
عمر الفاروق
Ishraga Mustafa
دينا خالد
Mohamed Ahmaed Olyesh
Abdel Aati
أحمد الشايقي
Muna Khugali
انعام عبد الحفيظ
فيس بوك
تويتر
انستقرام
يوتيوب
بنتيريست