|
|
|
 Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
الحبيب نادر
يا زول الشغل دا خالعني لحدي هسي رغم إني سمعتوا أكتر من مليون
مرة ... وفي كل مرة أتخلع زيادة. حاولت أشتغل معاك لكن في شغل في
النص (ما بعرف أسمو) لما تشتغلوا أنا بجاي بقعد بفتش للسلم في سقط
لقط ما بلم فيه.
محيرني الباص الشغال ورا دا شديد!!!
التسجيل دا تراكات؟؟
محتاج لي معاك قعدة بالجد يا نادر!
محبتي
أمير عمر
| |
 
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
يا امير سلام
سجلتة هذة العمل في تراكين للباص والتراك الثالث كان لالة الشكر // الايقاعية //
وهذة الالة لها قصة
الباص جيتار المستخدم لة 6 اوتار مما يساعد العازف للوصول لصوت اكثر غلظة
كما يساعدة للصعود لطبقات اعلي تتلامس مع منطقة الالطو والسبرانو
التراك الاول // الخلفية المصاحبة // للحن نفزت بطريقة التابن وهي طريقة تستخدم
اليد اليمني واليد اليسري للعازف لتكوين شكل هارمني ايقاعي لعدة اشكال لحنية
مصاحبة للملودي وهذة النوع من التكنيك يحتاج لتمارين ودراسة خاصة
التراك الثاني // فهوة زي مابيقولو الخواجات اصحابي تراك تقليدي // بمعني النغم
الاساسي ذائد الارتجال // الجقلرة//
ارجع ليك للشكر // الاقاع المصاحب // تخيلت ابو داؤود رحمة اللة بصوتة الباص الجميل
يغني دمعة الشوق وبيدة // كبريتة // يعزف عليها باصابعة جمل ايقاعية مصاحبة وصلتة
الغنائية ومن هنا كان فكرة هذة الشكل الايقاعي البسيط
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
نادر يا حبيب
والله الشغل أكتر من رائع وكل مرة الواحد بسمعوا بإسلوب مختلف
فكرة الباص (الستة أوتار) دي مبالغة وكنت عايز أعلق ليك
على أنو صوت الباص هنا في الـ high registers أقرب للجيتار (Lead) لكن بيني
وبينك خفت من السني يقيف لي في حلقي
المحيرني لحدي هسي هو شغل الإرتجال الأنت عاملوا في النص (البطلعني
من السلم) شغل غربي لكن ظابط جدا مع الأغنية وكأنه جزء لا يتجزأ من اللحن
يعني ما بتحس بأنه دخيل ولا مصتنع!
عارف يا نادر كنت بسمع للفلتة "ياني" قبل أيام مقطوعة nightingale سألت نفسي
طالما الراجل دا بشتغل شغل زي دا (بي سلم خماسي) شنو المانع أنو موسيقتنا دي
تتوزع بصورة جديدة عشان تخش العالمية؟! حاول تعيد توزيع لحن "بعد الغياب" على
الطراز (الياني) وح تفهم كلامي دا.
مستمتع حد الثمالة بهذا الأبداع
لك ألف شكر
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
Amir Omer
تحياتى لك
تعرف مـا فى اى شـــــى جمعنى بالسنـى دى لكننى كنت واثقا
من هذا الرجل نبــــــــــــــــــــيــــــــــــل
والله المسألة لا تعدو مجرد انطباع عـــــــــادى
لكن الايام كل يوم تثبت لى ان نظرتى لم تخيب ابدا .
متع الله محمد السنى بالعافية واعاده الى وطنه
واعاد الوطن لاهــــــــــــله .
لم يخيب ظننا فقد شرفنا بحديث من لم يتلجلج حول مسـرح
العرائس والفنون التمثلية للاطفال بقناة الجزيرة قبل شهرين تقريبا.
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: nourelhadi awad)
|
العزيز نور الهادي
والله (قطع الشك) الأنت أفترضته فيني لن يخيبه الله ، فالجمال يا صديقي صفة الرحمن
ونحن من روحه. لو بحثنا في دواخلنا لوجدنا ذلك الجمال ، ولولا جمالك يا حبيب
لما أستطعت أن ترى جمال الأخرين!
مداخلتك هذه كانت برداً وسلاماً عليَّ وأتتني في وقت كنت أحتاج لهذه الحميمية
والأصالة السودانية المتدفقة.
لك من المحبة ما تشتهي
أخوك أمير عمر
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
قلت لي تفتش السلم ما تلقى الوتر تلقى الوتر
ما تلقى البيز
تحسبو لعب
نادر من اول الناس الخلو البيز اكون ليهو ادوار تانية
غير المتابعة الإيقاعية
وأكد انو اي آلة موسيقية بتكون صماء لمن اجي
فنان عازف اكتشف امكاناته وإمكاناتو
ونادر من النادرين
وعرفت السبب التمرين التمرين
والله ضحكت من جملتك الصادقة لمن دموعي سالت
تحسبو لعب
تكنيك وحرفية ودربة
واصل التمارين
إمكن إظهر لينا نادر تاني
مودتي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
ضحكت لمن دموعي سالت
قلت لي كيف
تلقى النغمة ماتلقى السلم
تلقى السلم ما تلقى الحرفية
تلقى السلم ما تلقى التكنيك
تلقى الشنو ما عارف إظهر ليك
ابوالدودو
كده انت اتعقدت صاح وده المطلوب بتحسبو لعب
ده زول مجنون بتاع تمارين
لن يرضى بغير اول الدفعة
لوتابعتويا بقيت عبقري
يا جنيت
ويقيت تكرر جملة واحدة
دي عملها كيف ؟ دي عملها كيف ؟ دي عملها كيف ؟؟
التمارين التمارين
مودتي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
[ واللة ضحكتة من جملتك الصادقة لمن دموعي سالت]
يا سني اخوي المصداقية هي من اهم المفاتيح اللتي تكون دافعاً لنجاح اي
فنان فدواخل الفنان الحقيقي زي صفحة الماء النقي تعكس كل ماتراة فتترجمة
لنغم مسموع اولوحة مرئية او لحركة علي خشبة المسرح فلا تحتاج لمجهود كبير
لكي تعبر عن حالها بمالها من بريق صادق يجبر من يتلقاها ان يصبح تحت تاثيرها الساحر
لك حبي واشواقي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
Quote: ويقيت تكرر جملة واحدة
دي عملها كيف ؟ دي عملها كيف ؟ دي عملها كيف ؟؟ |
عارف يا السني
أمبارح بعد ما قفلت ومشيت أنوم جيت راجع وشغلت الكمبيوتر
وقعدت أسمع في شغل الإرتجال العاملوا نادر دا ...
عملها كيف دي كانت المرحلة الأولى .. هسي أنا في مرحلة
معقولة؟ معقولة؟ معقولة؟ وشوية شوية ح أخش في مرحلةالتعقيد
الأنت بتتكلم فيها.
يادوب أنا فهمت أنت أخترت مسرح ليه؟ لا سلم لا تراكات لا يحزنون
وجاي تخبط فيني أنا المسيكين دا؟؟ اها التمارين دي أنا ما بفكها
حتى لو أصابعيني أتقطعت زاتوووو
شايفك لقيت فرصتك تتفسح فيني ...
ياخ الموضوع كلو بسيط .. موضوع سلم!!
قال أتعقد قال
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
سوريا
الجمال
والأشواق
ركن الدين وعماده
شيخي وسيدي بن عربي
الصالحية وسوق الحميدية
والصلاة خلف الأرواح المجنحة من كل مكان
وفوقهم الحمام والعصافير
في المسجد الأموي
القباب من الذهب
عند حافة الأهلة يلمع الضوء
وينسرب الدعاء متوهجا يعلو نحو السماء الصافية
صفاء قلوب اهل دمشق والشام
يتردد الدعاء والأذان من اصوات متناغمة
ومن كل الأركان
يالطيف
الطف بنا
وأحفظنا
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
دخلت الى المدينة الفيحاء
دمــشــق
وبهرتني الأضواء تنهمر من الشبابيك
والعمارات المستلقية على جبل قاسيون
ونزلت في ساحة المرجة
ووجدت عددا من الشباب السوداني
دلوني على فندق سعره معقول
كم اكره الفنادق
والشقق العلب ألأسمنتية
ولكم احب البيوت والساحات والحدائق والعصافير
واه من بردى
بردى كان حلما
حتى وجدته توارى تحت أسفل المدينةيمر الى مصبه
من خلال الأنفاق والمجاري المخفية ولم يبق منه سوى جدول
حزين وباك
تريد ان ترى بردى إذهب اليه في منابعه وتمتع بالطبيعة
ما علينا المهم احتوتني المدينة
واحتويتها فأنا اعبد المدن القديمة
ودمــشــق أقدمها
بعد يومين في تجوالي الصباحي التقيت فتى من السودان
إسمه محمد العربي
دلني على تغيير نظام حياتي
بحث لي عن غرفة صغيرة (( كبسولة ))
صاحبها دكتور هادي الطبع وجميل المشاعر
رقيق الحاشية من عائلة اللحام
في هذ ه الشقة الكبسولة التقيت
بالفنان ياسر عبد اللطيف وزوجته الفنانة ماجدة فووتي
ياسر فنان متكامل الأحلام له مشروعه المستقبلي
ووجد في دمشق
حقله الذي زرعه بإخلاص وجد ودربة
ماجدة اكملت المعهد وشاركت في التمثيل مع ابناء وبنات جيلها
ونجحت وتخصصت في اعمال الكارتوون
كنت قبل سفري الى مصر بسنوات متيم بأدب اهل السودان
وكنت أفضل أدباء وطني على غيرهم وما زلت
اعتقد انهم يحملون غريب الكلام والأحلام وطقوس لم يسمع بها احد
وأجواء ساحرة ومن بينهم الأديب والروائي
ابراهيم بسير إبراهيم
كاتب الرحيل ، والزندية ، التي طبعها اتحاد الكتاب العرب بسوريا
ومجموعة من القصص القصيرة جمعها في كتاب
محمد احمد او الذي اهتزت له اركان المدينة
المهم ابراهيم كان يعيش وقتها في بيروت
وفي يوم من الأيام صباحا
اتبهت على صوت الجرس
وعندما فتحت الباب
اجد ياسر واقفا
اهلا ياسر تفضل
اهلا السني اقدم لك
ابراهيم بشير
وفعلا ظهر من جانب الباب
شابا مربوع غلى قصر
يرتدي تي شيرت ابيض وبنطلون اسود
تسبقه بسمته المريحة وصوته العالي المميز
وكانت البداية لمعرفة دمشق الفيحاء
ونواصل ....
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
صدقت يا صديقي
ذكرتني سارة بتي ما كملت سنتين لسه وتلقاها
بتبكي وعاملة شمطة مع أختها في لعبة وفجاءة
تشغل ليها موسيقى تلقاها تنطط وترقص ودموعها
في عيونها .. غايتو منظر يفطسك من الضحك
الموسيقى لها سحرها ومن قال أن الموسيقى غذاء
الروح لم يجانب الحقيقة!
صديقي مؤمن عبدالعظيم رجل مولع بالموسيقى لدرجة
أثرت على تصرفاته وكلامه فتجد نفسك تنظرب وأنت تتحدث
معه في أي حديث عادي لا علاقة له بالموسيقى!
وكأن الموسيقى هذبت شخصيته وجعلت منه إنسان رقيق
حتى في حكاويه العادية!
واصل يا عزيزي إستمتاعك بموسيقى نادر عشان تطربنا
بذكرياتك .. الموسيقى دي يا سني بتخلي الواحد يعيش
الذكرى كأنها قدامه!
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
علي الصوت يا أمير
وخلي الصوت يوديك
لي حكايتنا
عايز تعرف لي وين ودانا
ابراهيم بشير
علي الصوت يا أمير وخلي الموسيقى تنساب تملا
فؤادك
وأفتح الشبابيك
خلي الموسيقى تحلق في السما
تنزل لي غرفة رطبة وباردة
في بلاد البرد فيها مغطي شجر الأ رز
بالثلج والضباب
في الغرفة شاب لم يتجاوز الرابعة والعشرين من عمره
قابع في سجنه من زمن لايملك سوى الإنتظار
كده اتخيل شنو المنتظرو
تزكرة سفر عشان ترحعوا للسودان
كل مصيبتو انو حاول التسلل من الحدود الى حلم واحد
ان يصل ويعمل ليحقق أحلامه
تخيل راقد في غرفة رطبة
والموسيقى حوله نفس الموسيقى
وباقي دموع على الخدين
وعقل تعصف به المزلة
واحلامه متناثره حوله
يحاول ان يجمعها يرسلها مع بصيص الضوء الساقط من النافذة التي دخلت منها الموسيقى
وعصافير الأمل
كان هذا اول الحكايات التي سمعتها
من ابراهيم وعرفتني على عالم قاسي وظالم
انحفرت في داخلي
اه من الموسيقى
شجن
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
مرات يالسني اخوي القي روحي ما طايق اتكلم مع اي زول حتي مع اهل بيتي
وعندما تبدو علي اعراض هذة الحالة اشيل جيتاري والموسجل وشرايط فاضية
واقفل روحي في غرفة مظلمة تقدر تقول حبس انفرادي لمدة خمسة او ستة ساعات
اترك العنان لاصابع يدي وهي تحاول ان تجد مفاتيح اسرار هذة الحالة فتنساب انغام
من الجيتار وتتفاعل وتتلامس مع مكامن الوجع فاجد نفسي محلقا في عالمة فابكي واضحك
فتقتسل مواجعي وتستكين وارجع لحالتي الطبيعية
وبعد كم يوم ارجع لسماع ما سجلتة في خلوتي هذة فاجد اشياء لم تكن مفهومة او زات أشكال
واضحة لي وغريبة كما لو ولدت هذة الانغام في وقت لم ياتي بعد تمر السنين وعندة سماعي لنفس التسجيل
اجدة حالة نغميية فريدة لا تملها ازني فابدا في كتابة انغامة وتسجيلة في صورة نهائية
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
يا الله يا سني يا الله
لم أجرب هذا الطعم من الألم لكنك نقلته إليَّ بإحساسك الصادق
وكأني أقبع مع إبراهيم بشير في تلك الغرفة الرطبة الباردة
فيلسعني البرد وترتعش أطرافي وأنا لا أدري أن كنتُ أرتجف من
البرد أم من قسوة الأيام والخوف من غدٍ مجهول!
يا الله يا سني
أصعب لحظاتنا في هذه الدنيا هي لحظات الإنتظار!
كم أكره هذا الذي يُسمى بالإنتظار ، ويزداد كرهي له
لو كان الآتي مجهولاً غير معلوم الملامح!
الطاهر السقا وإبراهيم بشير ألآلام مكبوتة لا يعلم بها
أحد! كلاهما لم يُذنب حينما تجرؤا ليحلموا بعالمٍ مُخضّرْ بسيط!
لم يعلما أن الأحلام في هذا الزمن الردئ أصبحت محرمة
على أمثالهما! لو كانت أحلامهما من أجل الثراء والسلطة
لفهمتُ سبب محاربة الدنيا لهما ، ولكنها أحلامٌ أبسط من
أن يحاربهم عليها أحد!
والله يا سني ، منذ ليلة أمس ومنذ أن قرأت ما كتبه قلمك وأنا
أحاول الرد فعجزت أن أجد ما أكتبه أو أعبَّر به عن مثل هؤلاء!
ليتك تكتب عن إبراهيم بشير كما كتبت عن الطاهر السقا
وليتك تقف على مسرحك لتحكي معاناة إبراهيم بشير وأمثاله ،
فهم رغم الحوجة والضيق يتعففون عن أن يحكوا عن أنفسهم
حتى نظنهم أغنياء من التعفف!
يا الله يا سني يا الله
واصل يا صديقي فأحساسك بإبراهيم بشير جعلني أقشعر من البرد
والخوف في آنٍ واحد. لم أكن أعلم أن بإمكان أحد أن يشعرني بمثل
هذا البرد والخوف خاصة وأنا أتدثر بثيابي الشتوية ، وأجلس بالقرب
من مدفئتي في غرفة لا يعرف البرد طريقاً إليها!
محبتي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
عارف يا أمير
ابراهيم بشير ده حكاية
زي ما قلت ليك هو العرفني على
المدينة التانية
على الوجه المظلم من القمر
وفي نفس الوقت كان يملك مفتاح
بوابة الأحلام
عرفني بأجمل الفنانين والشعراء
والكتاب
معه عرفت دمشق الفنانة
معه ذهبنا الى
سعد الله ونوس
الى عبدالرحمن منيف
ابراهيم كاتب من الطراز الأول
الحكاية الحكاها عن الناس البتسسلل من الحدود
ذكره في واحده من القصص القصيرة الكتبها
سوف اقوم بتنزيلة هنا انشاء الله
سوف احكي لكم
عن دمشق الجمال
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
حدث ان مر بنا الدكتور المسرحي والباحث في التراث الشعبي
عثمان جمال الدين وعثمان من الشعراء المجيدين
وهومن شلة عثمان علي الفكي وصفوان عثمان
وعثمان البدوي وكلهم فناني مسرح
متعددي المواهب
وجاء الى سوريا وتجولنا في شوارعها ليلا ونهارا
وكنت وفتها خبرت المدينة تماما من خلال تجوالي فيها
وهذه عادة إكتسبتها من حبي للتاريخ والجغرافيا
ومن عشقي للمدن ..
كنت ارب اي حافلة متجهه الى اي مكان
المهم اروح واعود من اول محطة الى اخر محطة
هكذا احفظ المدن
كل حي لابد ان اتوه فيه
وعندما تجول عثمان معي في دمشق
وحينما عادالى السودان كتب هذا المقال
بعد إذنكم
الى المقال..
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
سرد رائع رائع رائع يالسني وانتم تجترون زكرياتكم اللتي تلامست
وزكرياتنا في سوريا ولبنان والاردن وتونس والمغرب ودول الخليج
ونحن نشارك في حفلات ومهرجانات مصاحبا العديد من كبار فناني
مصر والعرب في هذة الدول لقد احسست بكل كلمة في سردك الصادق هذة وكيف يعاني
الفنان السوداني وهوة يحاول ان يقدم فنة داخل اطار الوطن العربي والمضايقات اللتي
تواجة الفنان في مطارات وحدود هذة الدول وحالة الارهاب الفكري السياسي
وهوة يحمل الجواز السوداني ........................لم نكن نحن معشر الفنانين
طرفا في سياسات فرضت علينا لندفع ثمن سلبيياتها .................يديك العافية يالسني
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
والله ياسني متابع وبتفرج في السرد الرائع
الضيوف سافروا لكن اليومين الفاتت دي كنت
في حالة عشق جميل تمخض عنه البوست دا
بَعضُ عِشقِيْ ... يا أبيْ!
أكيد عارف العشق وحالاته...
تابع معاي بهناك برضو!
وأكيد ما بفوت البوست دا لأنه
فيه أشياء مبااااالغة وبكرة ح
تبقى ذكرى زي ذكراك البتحكي عنها.
لا أفشي سراً لو قلت ليك أني
بطبع بعض المداخلات في هذا البوست
وبحتفظ بيها في فايل جميل.
ح تقول لي بتعمل بيها شنو؟
بقول ليك ما عارف لكن أكيد ح يجي
يوم أستفيد منها في حاجة!
محبتي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
لبنان وياسلام علي خضرة جبال لبنان وفناني لبنان الرحبانية وفيروز ويا سلام يا زياد يارحباني يا سلام
كان لي حظ التعامل الفني مع الفنانة اللبنانية صباح // الشحرورة // عندما كانت عضو بفرقة عيون مصر
بقيادة الفنان عازف الجيتار // حسن الدكروري // اللتي كانت تصاحب هذة الفنانة الرئعة داخل وخارج مصر
وفي اول بروفة مع الفرقة اللتي تتكون من اكثر من ثلاثين عازف بدا رئيس الفرقة في تعريف اعضاء فرقتة
لصباح فلان عازف كزا وفلان عازف ......وعندما زكر اسمي // نادر السوداني عازف للباص // قالت صباح
يا حسن نادر سوداني سوداني ولا لقب اكد لها حسن نادر من السودان الشقيق وهوة عازف ومغني
وموزع موسيقي اسبت وجودة داخل غرف الاستوديهات والحفلات في مصر وخارجها فدار بيني وبينها
حديث طويل عن الفن السوداني كما زكرت لي اعجابها بالموسيقي السودانية زات الطابع الخماسي كما
تكلمت عن تجاربها مع الفنان // الراحل المقيم احمد المصطفي // وحبها لموسيقي الراحل المقيم سيد خليفة
تعلمت منها اشياء لم اجدها في الكثير من فناني بلادي فهي فنانة مثقفة وملمة بكل ما يدور من حولها في كوكب
الارض من فنون الموسيقي كما وجتها تبحث دائماً عن الجديد لتطوير موسيقاها // الكلمة // الالحان // التوزيع
رقم مشوارها الطويل ودرها الرائع وهي تتعامل مع ملحنين مصريين او لبنانين او عرب فهي تعشق التجديد
كانت تحضر البروفات في معادها ولم تتاخر دقيقة كما كانت داخل غرفة البروفات ملتزمة بكل ما كتبة من نوت
موسيقية بدقة تدعو للدهشة الفنان اللبناني مبدع الحياة الجبلية والخضرة والجمال زرع في احاسيسهم قوة في
الاداء وعمق في الوصف ونغم خاص بهم خلق من موضوعهم الموسيقي اشياء كثيرة داعمة لهم في خارطة الفن العربي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
أعزائي
تحية ود نضرة
قرأت هذا البوست من أوله لآخره وخرجت بالآتي :
- هذا الرجل - الأستاذ محمد السني دفع الله - يستاهل كل هذه المحبة والتقدير ولا يمكن أن تأتي كل هذه المحبة والتقدير لشخصه الكريم من فراغ.
- هذا الرجل يمتلك شخصية تجبر الآخرين لحبه وتقديره.
- هذا الرجل جمع بين شخصيته الانسانية العادية وشخصيته الفنية وبالطبع كلتاهما لا تنفصلان.
- هذا الرجل تفتقد جماهير الوطن بالداخل ابداعه الفني.
سؤال :
متي يرجع المبدعون للوطن الحزين بعد أن أصبح خاليا من كثبربن منهم في شتي المجالات؟؟
وأخيرا تحياتي وتقديري لك أخي محمد السني ولكم جميعا.
ودمتم ،،،
حسن طه
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: حسن طه محمد)
|
الأخ العزيز حسن طه
سعدتُ بمرورك وقراءتك الدقيقة لجُلْ المداخلات وتحليلك الدقيق.
كما ذكرت في بداية البوست ، لم أتعرف على السني إلا من (حكاوي) من
قابلوه ، وحقيقة أُعجبت وتعجبت من شخصيته الفذة ، وهذا البوست فعلاً
أكمل صورة السني الإنسان العادي ، وتركبية شخصيته الفنية!
رائعة هذه النقطة التحليلية:
| Quote: - هذا الرجل جمع بين شخصيته الانسانية العادية وشخصيته الفنية وبالطبع كلتاهما لا تنفصلان. |
أتمنى أن تواصل وتتواصل معنا ، فهذا البوست أصبح بمثابة بوست
تعريفي يُعرّفنا بكل مُحبي الجمال والنقاء!
شكري ومحبتي
أمير
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
الاخوة الاعزاء الاساتذة محمد السني وامير عمر
تحية وردية بيضاء.
أشكركم وتجدوني سعيدا بمعرفتكم وبالتواصل معكم.
محسوبكم حسن طه محمد من الواصلين الي الدوحة حديثا بفهم اهلنا بشمال السودان قبل سنة وخمسة شهور.
أول مرة سعدت بمشاهدة الاخ السني علي ما أذكر من خلال الاعمال المسرحية التي كانت تقدم في التلفزيون.
ثم في ليلة تدشين كتاب الراحل الأستاذ الخاتم عدلان بالدوحة.
ثم في حفل عيد الفطر الماضي بالدوحة .
وكذلك عبر قناة الجزيرة عند استضافتها له.
وأيضا عبر منبر سودانيز اون لاين الذي اصبح وسيلة من وسائل التعرف الناجعة . فالشكر للاخ بكري ابو بكر.
يذكرني الاخ السني ببعض الماضي الجميل الذي عشته قبل الاغتراب مع وبين بعض المبدعين من أمثاله من الأصدقاء من الفنانين والمسرحيين والأدباء والشعراء .
في المرة الأولي التي قابلت فيها الأستاذ السني بادرني بسلام ومحبة رفقاء الصبا والمدرسة والحي ..
شكرا لكم جميعا والي لقاء
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: حسن طه محمد)
|
الاستاز // حسن طة محمد في البداية اسمح لي بالترحيب وتواجدك معنا داخل دهاليز
الرئع محمد السني دفع اللة ونحن نطل من خلال نافذتة اللتي ملأت قلوبنا بالحب والاخاء
سؤآل
===
[ متي يرجع المبدعون للوطن الحزين بعد أن أصبح خالياً من كثيرين منهم في شتي ألمجالات ؟؟؟؟ ]
سيدي العزيز يقول المثل .......// الجابرك علي المر الامرة منة //
هنالك جيل من المبدعين مسرحين وموسيقين وهم بلاشك إمتداد لاجيال سابقة لهم تشربو من فنون من سبقوهم
تعلموا وجودو ادواتهم وعندما بدات حدائقهم تثمر قطعت وحرقت وحلة مكانها اشياء قد لا تمت أو قد لا تعبر عن
طموحاتهم وكما تعلم صديقي العزيز الفنان لا تحد افكارة اسوار فهوة حر طليق فعندما يجد فنة مقيد وموجة
لاي اتجاة تبدوا الاشياء لة قبيحة وغير صادقة وخالية من اي معني
دمرت مكتبة الازاعة بما كانت تحملة من تسجيلات نادرة رحلة من سجلوها للرفيق الاعلي و ضاعت دررها معهم للابد
وهي بالنسبة لنا كفنانين مراجع نعتز بها ورصيد لاجيال قادمة من بعدنا
انظر صديقي لمن يعتلون مناصب ادارية / داخل اروقت الفنون / عن ماهية تطلعاتهم وكيف ينظرون لمستقبل الفن في بلادي
هنالك العديد والكثير واكيد تعرف ما قد لا اعرفة
ياتي الرد علي سؤالك // كيف لاي فنان جاد ان يري ويعيش في مثل هذة الظروف يستطيع // ان ينتج ويطور ويدفع عجلة الفنون نحو
ما نتمناة لها ؟؟؟؟؟؟؟؟؟ لك مني كل الود
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
| Quote: دمرت مكتبة الازاعة بما كانت تحملة من تسجيلات |
الأخ الأستاذ السني
شكرا علي الدعوة الكريمة ومقبولة ان شاء الله مؤملا نفسي بالاستمتاع بالبروفة مسبقا.
بالمناسبة قبل الاغتراب وأيام الزمن الجميل كنت ارتاد مكاتب المسرح القومي في امدرمان كثيرا مع صديقي (المخرج المسرحي آنذاك ) الأستاذ محجوب عباس شقيق الاستاذ جعفر عباس أبو الجعافر.وكانت لي أيضا جلسات جميلةدائمة مع الأساتذة ، الراحل المقيم الشاعر عمر الدوش والشاعر التيجاني سعيد والفنان ابو عركي والشاعر الرقيق جدا الصديق مبارك بشير والبلابل وغيرهم من المبدعين.
السني أخوي ذكرتني بعضا من ماضي الجميل فشكرا لك .
وفي القول : التاريخ يعيد نفسه وان شاء الله أعيد هذا الزمن الجميل معكم. .
مع أمنياتي لكم بالتوفيق.
الأخ الأستاذ نادر
صدقت والله في كلامك وعزانا أن المدعين دوما لا تحدهم أمكنة ولا أزمنة مع استعدادهم دوما لمناطحة الصخر من أجل بلوغ المرام.
حزنت علي هذا التدمير علما بأن لي بعض الاسهام المتواضع في هذه المكتبة ببرنامجين اذاعيين كنت قد كتبتهمل للاذاعة في دورتين متتاليتين وانا آنذاك طالب بجامعة الخرطوم اوائل السبعينات .
أرجو الا يكون قد مسهما التدمير أيضا.
مع تحياتي.
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: حسن طه محمد)
|
المجموعة الحلوة
ازف اليكم اجمل الأخبار
ان مكتبة الإذاعة
لم تفقد من عظمتها وموادها التوثيقية
الا التي تأثرت بضربة حائط المكتبة
ابان حركة حسن حسين
وبعض المواد التي تلفت ايام الفيضان
وبعض الأسطوانات القديمة جدا واتوجد لها بديل فيما بعد عند هولة وغاويين الطرب الأصيل
الان المكتبة مكتبة رقمبة متطورة جدا وفيها كل التراث القيم
ومحفوظ بصورة راقية جدا
بالمناسبة الإذاعة تقدمت جدا فبي استيوهاتها واجهزتها ومكتبتها
ومازالت محافظة على بريقها
مودتي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
أمس يأمير زارنا في البروفة
الأستاذ حسن طه
ياسلام ياامير
استاذ حسن استعدنا ايام
المسرح الحقيقي
واستاذ حسن كان صديق
للمخرج محجوب عباس
وهذا المحجوب كان مخرج متميز
وهو احد اهم مخرجي المسرح الجامعي
وحكى لك احتفى به الزملاء بزواجه
وكيف وردي حول العرس الى ساحة للغناء الوطني والأناشيد الثورية
وضحكنا ضحك طفلين معا ولهونا وسبقنا آمالنا
كانت ايام المسرح حينما يتحلق الممثلون والمخرجون
اصحاب كل في طاولته بساحة العم خالد بتاع البوفيه
هناك طاولة حمدنا الله عبد القادر
طاولة الشباب بعيد منزوية
كان الناس متوزعة على الطاولات وناس في البروفات
والعروض متناسقة طوال السنة والمواسم منتظمة
شكرا لك امير عرفتنا على حبايب
ونتمنى ان تلتقي يوما على المحبة
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
الإعزاء
السني ، نادر ، وحسن طه
عليك الله يا سني ما غنيت ليهو بزيارتك (مسرحنا) نورَّ؟
تكون بالغت عديل لو ما غنيتها ليهو!
عارف الواحد بعد مرات بسرح كدا ويقول يا ود
ما تمشي تفتش ليك شغل في الدوحة دي ..
هسي حسن طه جا داخل أمبارح سلم على السني
السني قال ليهو تعال البروفة .. اها اتلاقواً!
ياخ الحياة عندكم ساهلة سهولة مبالغة (اللهم لا حسد)
.
.
بعد إنضمام حسن طه أعتقد أن هناك الكثير من الذكريات
ح تتحكي في البوست دا .. عشان كدا مدّدنا إقامة البوست لفترة
ما بعد الأرشفة!
نادر مختفي وين اليومين ديل؟
على فكرة إن شاء الله كان الصفحة دي قلبت أنا حاجز لي طوبة
عشان أنزل لي أغنية بالعود .. بصراحة شديدة كدا خايف أنزلها
في بوست براها يقوم الهوا يشيليها ولا تجينا كتاحة
(أمانة يا السني ما تضحك فيني ياخ)
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
انت عارف يا امير يا اخوي انا والسني صحبي قررنا نديك استمارة خمسة
في البوست دة ........ها ها ها...... يا معلم قبل ان نصل لزرو هذة البوست
ونحن نوسق لفنان بقامة السني جريت خليتنة في صالونك نرحب بضيوفك
وجاي تقول لي غنية وعود وابوي ما بخليني اساهر برة البيت امانة ماتلومتة في دي ها ها ها
جقلرة
====
لكن برضو انت حبيبنة نزل االغنية ولو عاوزني اسحب المزيكة الفوق دي قولي ...... لك كل الحب
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
يا نادر هسي أنا هارش من لسان السني تقوم انت بدل ما تشجعني
تقوم تسل لسانك معاهو؟ أها لا غنية لا عود شوفوا ليكم فنان تاني
يحيي ليكم حفلتكم دي
بصراحة كدا العداد ما مخارج معاي هاهاها
.
.
وبعدين يا نادر بصراحة كدا ياخ .. نوع جقلرتك البطلعنا من السلم
دي هي زاتها الخلت اعصابنا تبوظ .. تشيل شنو يابوي البوست دا ما في
حاجة بتتشال منو نهااائي!
جقلرة على قدري:
رغم لسانك الطويل دا بركة الظهرت بس
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
أعزائي
لكم جميعا اجمل تحية
كدت أموت من الضحك وأنا أستمتع ببروفة المسرحية التي دعيت اليها من الحبيب السني.
ضحكت كثيرا ولكن كان ضحكا في معظمه من الداخل ( يعني ضحك مكتوم ) حتي لا أفسد روعة الأداء .
كنت الجمهور الوحيد وهي تجربة تحدث لي لاول مرة ولأول مرة في حياتي أجد في الأنانية متعة.
بعد انتهاء البروفة ركبت مع السني قطار الذكريات وانطلق القطار ولكن كان هناك قطار آخر في انتظار السني وهو قطار هلال مريخ فودعته ليلحق به . وهنا أقول هارد لك أخي السني فأنت والهلال صنوان تحبون لأخيكم كما تحبون لانفسكم لأن الهلال لو كوش علي كل شئ يبقي ليس للرياضة طعم .ولا مش كدا ؟
نعود للذكريات فهي صادقة ونبيلة وهي دائما كالبرق تلمع في جنح الليالي ومن خلالها نجتر الماضي لنعيش الحاضر ونعبر للمستقبل .والذكريات لا تنسي كما قال الشاعر :
كيف انسى ذكرياتي
وهي في قلبي حنين
كيف انسى ذكرياتي
وهي احلام حياتي
انها صورة ايامي
على مرآة ذاتي
لكم خالص المودة،،،،
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
دي اصلها أغنية ولا كيس نايلووو
البشيلها الهوااااا
تعال وين مختفي
مالو البوست ده بشيل الف
نزلها هنا او انتظر قربت الصفحة تقلب
خلينا نستمتع
وطبعا شوفت كيف نادر النادر تنازل بروح شفيفة
وقال ليك شيلمقطوعتو ونزل بتاعتك
شوفت الحب ده كيف لكن بنصبر عليك لحد الصفحة ما تقلب
ايه رايك
بالمناسبة اهديتنا الأستاذ
حسن طه
ادب وصوت خفيض وحس عالي ورقي في التعامل
بسش الراجل غلط في حقو غلط كبير
ليهو زمن واقف من السيجار
اها بعد البروفة احتجت لي سيجار لقيت سيجارة واحدة
وعزمت عليها قال لي انا بطلت وقفت التدخين
لكن عشان الفرحة فتش في العربية لقى سيجارة ولعها بالمناسبة
المفرحة ان اتلاقينا بعد زمن المسرح الذهبي لي مسرح الشتات
وكانت اجمل سيجارة برغم النيكوتين الدخل صدورنا
انت جوازك اوربي يحق ليك العمل في كل حته في العالم
تعال لينا مرحب بيك في الخليج العربي
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
خلاس يا امير المرة دي سماح عاوزين ننكت من السني دة الحاجات المدسدسة في دهاليزو زي حاجات الازاعة ومسرح العرائس
وشقل فرقة الاصدقاء ................................ وإعدادالممسل .....ها ها ها
وهوة طبعا عارفني أنا شايت وين فتواصلك معنا مهم عشان ترابط الفكرة للفائدة العامة
جقلرة
====
وأة شن قولك لو غنيتك دي عجبتني بوزعة ليك وكمان بسجلة في الاستوديو أة رأيك شنو في الكلام دة قال عداد قال.... ارقد عافية
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
طبعا هلال مريخ
حكاية طويلة حكاية بتشبه واقعنا وحالنا
هلال مريخ هو السودان الموحد بي خبوبو وورودو
هلال مريخ هي ذكرياتنا واحلامنا ونحن ضغار
عشان كده ما بنبدله بي ريال مدريد
فيها مناكفاتنا وتعصبنا الأعمى والمفتح
هلال مريخ هي امالنا العراض بتاريخنا الذهبي
وتاريخنا المغتت وتاريخنا الجاي وعليو كل الأمال بأن نتجاوز
هلال مريخ بي سجمه ورمادا
عندنا بالدنيا كلها
لانو رمز حقيقي لي وحدتنا
هلال مريخ
ونيلين
وزعيمين
وحكومة ومعارضة
وشمال وجنوب
وغابة وصحرا
وشرق وغرب
وسودان متوحد بي محبتنا
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
خليني أقتبس كلام قريته في لقاء صحفي مع أبوي
عن الهلال في عصره الذهبي وكان رده على الحتة
بتاعت (العصر الذهبي) كالأتي:
الهلال هو الهلال اليوم وأمس وغداً .. لا فرق إلا في وجوه الناس الداخلين الى مداره والخارجين منه الى رحاب الله.
قال أمير الشعراء أحمد شوقي
ســنونٌ تــُعادُ ودهــرٌ يُـعيـد
لَعَمرُك ما في الليالي جديـــــــــد
أضــاء لآدم هــذا الهــــلال
فكيـــف تــقولُ الهـــلال الوليـــد
ليس هناك عصرٌ ذهبي بعينه، فعصر الهلال كله ذهبي.. الهلال شديد الشبه بالإسلام يكتسب عظمته من مُجرّد وجوده.. ومن غريب شبه الهلال بالإسلام أن له في كل زمان أعلام ورجال يحفظون سموّه وتفرّده، يراهم معاصروهم في مقام الصحابة ونراهم نحن في مقام القابضين على الجمر.. كلهم يُحبّه ولا يرضى له دون العلياء والصدارة.
___
معاك نتمنى أن نعود زي ماكنا نشوف الهلال والمريخ
بفهمك دا!
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
| Quote: وهوة طبعا عارفني أنا شايت وين فتواصلك معنا مهم عشان ترابط الفكرة للفائدة العامة |
أوعدك ياحبيب إنه مافي غياب تاني ..
هو أنا القاكم وين لمن أغيب؟!
| Quote: وأة شن قولك لو غنيتك دي عجبتني بوزعة ليك وكمان بسجلة في الاستوديو أة رأيك شنو في الكلام دة قال عداد قال |
قولي أنك راجل ملك بمعنى الكلمة ..
والله يا نادر كان عجبتك ولا ما عجبتك أنا ح أنزلها
إن شاء الله .. ياخ بعد كلامك دا في كلام زاتو بتقال تاني
ياخ إنت رجل فنان وملئ بالذوق ومسكون بالروعة!
عارف أنا لي أكتر من ساعتين بحاول أنزل الأغنية لكن كل
شوية يقول لي: bad file - MP3 وطبعا أنا مسطح شديد في
الحاجات دي .. لكن لازم ألقى ليها حل إن شاء اللهّ!
على فكرة .. أنا أصلا كنت مفكر أنزل الأغنية دي في بوست
منفصل وأسميه (نادر السوداني .. عايز رأيك!) لكن طالما
الموضوع كدا ح أنزلها هنا إن شاء الله ولو عجبتك تقوم تنزلها
في بوست براك عشان تستقبل العكاكيز براك وأكون أنا متحامي
بيك
شترة برة الزمن:
بالمناسبة كتبت مداخلة طويلة قبل فترة وضغطت على "أضف رد"
مشيت وجيت ما لقيتها ... الحاصل شنو؟ 
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
عارف يا سني البوست دا جمالو في الناس البتجي
تستجم فيه .. أنا مقتنع جداً أنه حسن طه ح يضيف
كتير للبوست دا .. ووصفك ليهو في حد ذاته مشوق
وبخلينا منتظرين الحكاوي الحلوة!
قلت لي كيس نايلون؟؟ ههههههههه
أنا تجربتي يا شفيف ما زي تجاربكم مدعمة بالدراسة..
يعني بنغني بالإحساس اللحظي الجاني في الوقت داك ،
عشان كدا ممكن أغني الأغنية زاتها بأكتر من صورة إعتماداً
على إحساس اللحظة! الهرشة من ناس هنا بقعدوا بحللوا ليك أي نوتة
ويقولوا ليك لالالا النوتة دي مفروض تكون كدا والنوتة دي
ما عارف شنو!! بكرة يطلعوني كمان إعاقة للمسيرة الفنية
في السودان
نادر دا إنسان رقيق جداً وزي ما قلنا قبل كدا .. الموسيقى
بتلعب دور كبير جداً في تركيب الشخصية والزول البكون عندو
أحساس فني عالي زي نادر دا لازم يكون زول رايق وحساس
عشان كدا ما أستغربت من الكلام بتاع يشيل مقطوعته عشان
انا انزل مقطوعتي .. ومقتنع جداً أنه ما قال الكلام دا
من باب المجاملة!
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: صلاح شكوكو)
|
العزيز والحبيب شكوكو
أسعدتني طلتك لنا في ظلال السني سعادة لا تستطع الكلمات وصفها!
Quote: السني .. أحيي من جعل أباك سنيا
ومن جعلم أسمك محمودا بين العالمين |
أعجبتني هذه الكلمات السلسة البسيطة والعميقة المعني والدلائل!
إلى أن يأتي السني ، دعني أشكرك بعمق على رسم أحرفك في تشابك جميل
لتزينَّ بها هذا المكان الذي أحس بالدفء فيه! كيف لا وهو مكانً نستظل فيه
بروعة السني ومرحه وأريحيته في الحديث من دون تكلف!
لا أُذيع سراً أن قلت أني أدمنت هذا المكان ، وأدمنت السني ، وكل جميل مثلك
يأتي به السني إلينا!
محبتي التي تعرفها
أمير عمر
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
الأعزاء السني وأمير ونادر السوداني
وكل أحباء البوست
تحية ممزوجة بالود والمحبة
ويا سني ويا أمير لساني وقلبي وعقلي ( وليس لساني فقط بالرغم من أن اللسان كما تعلمون هو حافلة التوصيل لما في القلب والعقل ) يعجزون عن الشكر .
وبصراحة كدا أخوكم راسه كبر لدرجة أصريت علي أم العيال ان تفتح البوست لتقرأ عن زوجها ما تستطيع من خلاله اكتشافه من اوله لجديد.
وبالأمس أخذت ابني الصغار محمد ومجتبي الي الحلاق لزوم حلاقة العيد( قبل الوقفة بيومين علي غير عادة السودانيين لانه يوم الوقفة شرط لحلاقة الصغار ).
بعد الغاء نظرة فاحصة شاملة علي راسي ، سألني الحلاق الهندي ان كنت أيضا مستعدا لوضع راسي تحت مقصه. بالطبع رفضت وفي دواخلي قراربعدم الحلاقة حتي يظل الراس كبيرا ولو الي حين مستمتعا بما أسبغه علي الكريمان سني وأمير من صفات لا استحقها.
أما صديقي الأخ صلاح شكوكو فهو ابن الحي ( المساكن الشعبية ببحري ) وكذلك زميل بوست الشعبية نجمة تتلألأ في سماء بحري وأجزم بان ابداعه في بوست الشعبية سيتواصل في بوست السني.
كلمة لا بد منها يا امير الأمير
بعشقك الواضح للابداع خاصة في المجال الفني جعلت من بوست نافذة السني عنوانا وممثلا حقيقيا لهذا الابداع الذي نعشقه جميعا.
نحن نتفق معك في ان الاخ السني يستحق كل هذه الاشادة فكل من يتحدث اليه او يشاهده وهو يؤدي احدي الجمل الفنية يتأكد لديه مدي حبه وعشقه للفن ومحاولته الدائمة في اخراج كل ما يمكن اخراجه بمهنية راقية لا تجدها عند الكثيرين من أهل مهنته.
أوعدكم بجهد المقل في هذا البوست الجميل باهله وموضوعه.
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: حسن طه محمد)
|
السني لي طلب سقنتوتي لكن في غاية الاهمية هنالك العديد من المتابعين لمشوارك الفني
من فترة الدراسة بالمعهد الي هذة اللحظة ومشوارك الطويلة مع الفن يا ريت يا جميل تكلمنا عن
1 / مسرح العرائس وبداياتة داخل حجر المعهد
2 / فرقة الاصدقاء ورؤيتهم لمستقبل الدرامة السودانية
3 / الاعمال الازاعية ودورها داخل المجمع السوداني في منتصف السبعينيات
4 / ومن هم المسرحيون الرواد من وجهة نظركم العلمية من اسرو ساحة المسرح
5 / مستقبل المسرح والدرامة في السودان وما هية معوقات حركت تطورة
اكيد كل موضوع من المواضيع اعلاة يحتاج للعديد من الصفحات لو قدرتة وسمح وقتك يا جميل
جقلرة
===
عجبنتي كيس النايلو والهوة شايلو ها ها ها
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
Quote: Amir Omer
العزيز والحبيب شكوكو
أسعدتني طلتك لنا في ظلال السني سعادة لا تستطع الكلمات وصفها!
أعجبتني هذه الكلمات السلسة البسيطة والعميقة المعني والدلائل! |
فارس رفاعة المغوار ((أمير عمر ))
ولولا مخافة أن أوصف بالا إنتماء
لوددت أن أكون من تلك الديار العصماء ,,
لك ولهم ولمنتداهم عاطر مودتي الخالصة النقية التقية المعقمة
وهو حب في الله .. أحمله جزالة من أجل أخوة عزاز منهم جاورونا
بالخير .. لأن هناك رجالا أمة .. مثلما أن هناك أمة أمه فقيهها دجال..
أشكر ورودك من مواطن الشكر ..
ولك الشكر مقدرا بقدرك ..
تحيتي لهم بمنتداهم السامر فقد حجبتنا عنه بعض الظروف
لكنها حالما تنقشع آيبون تائبون .. ( إن شاء الله )
Quote: صلاح شكوكو
التحية والمحبة
حنعمل ليك وجع رسايل
من خلال الشغل في الصبيان
لك مودتي
صلاح عندي ليك شخصية عايز ليها
حوارات ،،
شخصية بتاعة طفل نجاضة
بالمناسبة حانزل بوست بعنوان نجاضة
تابعوووه
|
الفنان (( ود السني ))
لك ولوالدك السلام .. ولك أهل بيتك ..
فمن كان سنيا بالميلاد حري بأن يكون من أهل الخير ..
الصبيان .. مدرسة تعلمنا منها أن نكون إنسانيين ..
نعطي ولا نأخذ .. نأخذ بالقدر الذي يمدنا بطاقة أن نعمل ..
(( زولك دا باين عليه نجاضة ))
رغم إنشغالنا سنحاول أن نكأفيء عشمك الجميل ..
Quote: الأعزاء السني وأمير ونادر السوداني
وكل أحباء البوست
تحية ممزوجة بالود والمحبة
أما صديقي الأخ صلاح شكوكو فهو ابن الحي ( المساكن الشعبية ببحري ) وكذلك زميل بوست الشعبية نجمة تتلألأ في سماء بحري وأجزم بان ابداعه في بوست الشعبية سيتواصل في بوست السني. |
إبن حيينا البار (( حسن طه محمد ))
لك التحية والود
ولأنك من أهل مكة فأنت أدرى الناس بضعفنا ..
وما هذا الإطراء منك إلا وجد جميل من رجل جميل ..
لك التحية وكل الود
نشكر لك هذا الإنتماء الراقي
وهذا الإحتفال الزاهي بحيينا الجميل
وجزاك الله عنا كل الجزاء
نتعشم في ملتقاكم في بواطن الخير
والتحية نقية وراقية
..
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
Quote: 1 / مسرح العرائس وبداياتة داخل حجر المعهد
2 / فرقة الاصدقاء ورؤيتهم لمستقبل الدرامة السودانية
3 / الاعمال الازاعية ودورها داخل المجمع السوداني في منتصف السبعينيات
4 / ومن هم المسرحيون الرواد من وجهة نظركم العلمية من اسرو ساحة المسرح
5 / مستقبل المسرح والدرامة في السودان وما هية معوقات حركت تطورة |
بالله ضيف لي على القائمة بتاعت نادر دي
6/ تجربتك كفنان مع العملاق عادل إمام(الإرهاب والكباب)
7/ فرقة الأصدقاء زي ما ذكر نادر وتخصص لينا كلام عن محطة التلفزيون الأهلية
قلت لي تحسبوا لعب؟ هاهاهاها
كدا ح ابدا اتسدا حقي كلوووووو
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
ياة ياة وآة آآآآآآآة ياسني رجعت بي الزكريات تحت شموع سنين عمري
الزي سرقت الموسيقي اجمل ما بة دراسة وتمرين وحفلات وداخل صالات
الاستوديوهات وسفر وورش عمل ولم اجد ما اتمناة حتي الان لموسيقي بلدي
كلما اري من علي البعد ملامح ماتمنيتة لها اجري نحوة بازلاً كل ما عندي من قوة
لمعانقتة فاجدة سرابا صعب المنال وابدا من جديد فاحس بانفاسي وخفقان قلبي
فهل يمكن ان تتحقق احلامي وتحصد سنين عمري مازرعت حتي لو تحققة زلك بعد مماتي فقد رضيت
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
نادر العزيز وعالي
السودانيين اكتر ناس متابعو
واكتر من اسمعو اذاعةلندن
وزمان الواحد لمن اكون مسافر السعودية
اقولوا ليهو جيب لينا معاك مسجل
هسي اقعد في الواطة وفلتر الموسيقى الكابة دي
ودق صدرك واعمل اسطوانة
ابحث عن الأستيوهات الرخيصة في التكلفة
المهم اعمل اسطوانة مزيكا
افرضوا على الناس ذوقكم البديع
بتعلموا اسمعو المزيكا الصرفة
اتلم انت وممدوح اتلاقوا في الفاهرة ولا لندن
سجل اعمالك اول حاجة بتربحو شوية
لكن في النهاية بكون الربح الأكبر
سنة حلوة ياجميل
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: محمد سنى دفع الله)
|
السني الجميل سلام بعد الارشفة
يا حليل ممدوح وشلة مزيكاتية فرقة السودانيين الجد جد
الحمد للة يا السني انا عندي استوديو زي ما تقول ومعمل صوتي خاص بي
والموسيقي المدورة في البوست وفي جهاز بكري متسجلة فيهو
والحمد للة عندي خمسة ماسترات جاهزة
واحد منهم موسيقي صرفة باسم //// كرنفال الموسيقي السودانية /// ويتضمن
عشرة مقطوعات شاركني بالعزف بعض المزيكاتية الامريكان
وبالمناسبة عندي CD ،عمل مشترك لمغني امريكي اسمة دان هبكن // CD للاطفال
باسم /// شوكولالا // وفكرة هذة الغنية // سمع بنت قريبتة وهي تبلغ من العمر
تسعة سنوات كانت تسمي كل الحاجات شوكولالا ومن الكلمة كتب لها هذة الغنية
اللتي قمت بتوزيع الموسيقي وتسجيلها في الاستوديو بتاعي وسوف افتح قريبا بوست
لهذة الغنية
جقلرة
====
نحن الان بصدد التعاقد مع بعض شركات الانتاج الامريكية لكن الموضوع عاوز تفرق ووكت
وبلد الجن القاعدين فية دي وقتها ممحوق لك .......كل الحب
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
الأحباء السني ونادر بعد الأرشفة ... سلامات
إن شاء الله تكونوا قضيتو عيد جميل بين الأحبة والأصحاب!
أمبارح يا نادر السني فاجأني ليك بتلفون زي التفاح (المنقة
في رواية أخرى)
قعدنا أتونسنا مسااااافة وجبنا سيرتك وكنا نتمنى نلقى
تلفونك عشان نعمل كونفرنس كول لكن الجايات أكتر إن شاء الله!
نادر .. إنت فنان مجتهد جداً وعشان كدا ح تعمل اللي ما قدر
يعملوا غيرك .. بس ما تُحبط ولا تخلي الزمن يسرقك! أنا معاك
أنه البلدان الغربية دي كلها الوقت فيها ممحوق شديد لكن
أنا غايتو شايفك زول حريف جدا وممكن تسرق الزمن قبل ما يسرقك
خاصة وأنت بتلعب باص .. يعني الزمن دا لعبتك
أجمل حاجة البوست دا ما زال موجود والونسة الحلوة دي ما تنقطع
طبعا السني نحن مدينك فترة راحة أيام العيد لكن تاني ح نرجع
ونذكرك بأسئلة نادر الفوووق ديك .. ما تعمل رايح ..طيب؟
نادر ياخوي لو عندك طريقة توريني أنزل الأغنية كيف تكون خدمتني
لأني شايف الصفحة قربت تقلب بس المشكلة الملف بتاع الأغنية MP3 وشايف
الإمتداد دا ما مقبول هنا في سودانيز. وريني أتصرف كيف بس!
عيد سعيد
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: Amir Omer)
|
يا امير تلفون السني دة لامن يجيك بتكون زي الرايحة منك حاجة عزيزة عليك ولقيتة
ربنا يدي العافية
[ لو عندك طريقة توريني انزل الاغنية ]
الملف بتاع الغنية MP3 !!!!!!!!!!!!
واللة يا امير ما فهمتة قصدك شنو // هل الغنية متحولة ل MP3 ولا عاوز
تحولة MP3 // لوكانت متحولة MP3 هنالك كزا مكان يمكنك ان ترفع الغنية للنت
اما ازا كنتة عاوز تحولة ل MP3
فهذة سهل من خلال itunes او اي صفت وير مشابة يمكنك تحويلها وتحميلها في النت
ولو كانت الغنية طويلة يعني اكثر من خمس دقايق مرات بيصعب نقلها وبعدين انا اكتر
زول كيشة في سمكرة النت // بعتمد مرات علي كستاوي وخالد الطيب وديل معلمين في الحاجات الزي دي //
| |
|
|
|
|
|
|
|
|
|
Re: رسالة خاصة في نافذة عامة ... للأخ محمد السني دفع الله (Re: نادر السوداني)
|
بيتر دياكونو
ونيكولاي بيقيتا
وزيزي الفنانة التشكيلية
حلو علينا من رومانييا
معلمين لفنون مسرح الأطفال
والتخصص في فن نادر وفريد
مـسـرح العرائس
ترجمة سارت اكثر من مسرح الدمى
وكنا طلابا يفع
ندرس في شعبة مسرح الأطفال فسم العرائس
كنا ثلاثة طلاب
الشفيع ابراهيم الضو
علي مهدي نوري
موسى عبدالرحمن الأمير يعقوب
محمد السني دفع الله
ثم تم ضم
الأستاذة بالمعهد ومصممة الديكور
بديعة الحويرص
وفنانين من المسرح القومي
المرحوم محمد رضا حسين
عبد الفتاح محمد عبد الفتاح
السماني محمد
محمد شريف على
وكانت التدريبات والدروس النظرية
في المعهد بالعمارات
وكنا ندرس تحريك عرائس
واخراج
وتاليف وتصميم عرائس وديكور
وبدينا البحث عن شخصية سودانية
للعرض الأول وكانت شخصية سالم التي صممتها زيزي فرانتيو
واصبحت فيما بعد شعار الفرقة السودانية للعرائس
| |
|
|
|
|
|
|
| |
نادر السوداني
Amir Omer
عبد الواحد أبراهيم
محمد سنى دفع الله
شهاب الفاتح عثمان
حسن طه محمد
على عمر على
صلاح شكوكو
فيس بوك
تويتر
انستقرام
يوتيوب
بنتيريست