بوست لقراء سودانيز أون لاين

Quote: الاستاذ طارق جبريل تحية طيبة من قارئ لسودانييز اون لاين انا من القراء المداومين لسودانييز اون لاين يوميا وفى اليوم اكثر من مرة. اجد نفسى اختلف معك فى دعوتك للقراء لتقييم (اعضاء) المنبر؛ فلا الاعضاء كتاب محترفين ولا القراء نقاد محايدين. مثل هذا النقد سيعتمد على مدى تفاعل القارئ مع كتابات العضو وستأخذ منحى شخصى فى التقييم. لا بد ان تتذكر ان الكتابات فى سودانيز اون لاين تعتمد على الاراء الشخصية للاعضاء. لذلك لا يمكن ان تقيم اى عضو على رأيه الشخصى الذى قد لا يتفق معه احد فيه ولكنه فى نفس الوقت لا يفرضه على الاخرين. بصراحة حاليا سودانيز اون لاين عاملة زى قعدة شباب فى ضل الشجرة فى الحلة؛ بيتونسو مع بعض ويغالطو ويشاكلو بعض وفى الاخر يتصالحوا وكل واحد يمشى بيتهم؛ ونحنا عاملين زى الناس البيمروا بيهم لو لقوهم بيقولو فى حاجة مفيدة بنقعد نستمع من غير ما نتدخل بينهم ولو الكلام ما عجبنا بنواصل فى دربنا. يعنى الموضوع وما فيهو انت بتكتب رأيك الشخصى وانا بقرا البيعجبنى من غير ما انتقد او احكم على شخصية الكاتب. كان ممكن الاستبيان يكون افضل لو سألت عن المواضيع الجذبت القراء واراءهم فيها بدون ما يتعرضوا لاراء الاعضاء الشخصية. انا لا انكر انو فى اعضاء بتعجبنى كتاباتهم وفى اعضاء ما بحب كتاباتهم وبطنشها؛ لكن دا ما معناتو انى احكم عليهم من خلال الكتابات دى. من الملاحظ فى الموقع انو فى اشخاص كتاباتهم على طرفى النقيض ودايما مختلفين (واختلاف شديد كمان)؛ لكن بعد داك تكتشف انهم خارج الموقع من اعز الاصدقاء وفرد شديييييييييييد وما بيرضوا زول يدخل بيناتهم. من الملاحظ ايضا انو فعلا لغة المنتدى بقت خشنة شديد وفيها تجاوزات شديدة ولا يوجد اى نوع من الرقابة من الاعضاء انفسهم او من المشرف. البوستات السياسية (زماااااااااان) كنت بحبها لمن كانت المواضيع تطرح ويتم مناقشتها بموضوعية وطولة بال والناس بتركز فى الموضوع وما بيشخصنو المواضيع. حاليا توجد مواضيع جادة لكنها قليلة. البوستات الرياضية هى المفضلة لى؛ مليانة مناكفات حلوة وفيها معلومات وتحليل رائع من الخبراء الشفوت (من غير ذكر اسماء حتى لا اهضم حقهم) ومافى زول بيهتم بالانتماء السياسى بتاع الباقين. بالمناسبة انا هلالابى ومنتظر اليوم الحنحلق فيهو شنب ودالقاضى. بصراحة اكتر مواضيع ممتعة؛ هى المواضيع العلمية التى يتدخل فيها اصحاب الجلد والراس ويفتفتو ليك الموضوع من الالف الى الياء لحدى ما يجيبو آخرو. استسمح الاعضاء انى ابعث بتحية خاصة للاخ تمبس على موقفه القوى تجاه البوست الذى تداخل فى خصوصياته. فى الاخر دى مشاركة بسيطة منى مع وافر شكرى وتقديرى للاعضاء والقراء. إياس سيداحمد