بوست لقراء سودانيز أون لاين

Quote: تحية طيبة استاذ حيدر تحية ومعليش المرة الفاتت نسيت اسلم عليك ودي حاجة نرفع بيها البوست بتاعنا ده مش الناس بترفع وبتشتغل حراسة لى بوستاتا اها دي مساعدة عشان بقية الاهل يجوا ويقولوا هنا واهداء للزولة الفارسة الاسمها هناية ديك ايوا وضاحة زولة بت بلد عديل رغم انها ما اظن فزعت او لقطة قطن او تيربت ودي من الموهلات الاساسية مشاركة على امل تنال الرضاء برضو الترجمة لاحقاً جبنة الموت ................ ابراهيم ود الاسيد طقاهو دابي ابدرق في حوش ناس عوضية بت الريح خبر عاجل رمته رية بت الخير من خلف حيطة ناس بخيتة خبر كافي لجعل الحلة جت ترابط امام منزل ناس ابراهيم .. مريم زوجته في حالة هستيريا رغم انها (مكجناهو) ولكن تخشى نسوان الحلة وهمزهن هو الوداهو يقلب في القصب شنو مالا عوضية ماعندها اولاد تخلى المسيكين ده يشيل القصب للبهايم بتاعتم مرة استغلالية والله صاح صاح اي زاتا بتاعت بوبار هوووي يانسوان اتضايرن جاي ولا جاي الزول ده نوديهو الاسبتالية هووووي ياود الخضر اسبتالية شنو في زول طقاهو ابدرق بودوه الاسبتالية ... ودوه شيخ احمد يقرالو ويطلع السنون؟؟؟؟؟؟؟؟؟؟؟؟؟؟؟؟ خلاص ماتعدنها نجيهة ونقة امشن شوفن شغلتكن في نشرة الواحدة ظهراً بتوقت شجرة النيم التى تتوسط بيت ناس حاجة زينب وعلى نسمات البن وهوهوة ###### ناس الرضى وطقطقت حبيبات الودع .. ابراهيم ده زولاً خدوم وفيهو مرورة الا الله ساي وقعوا في البومة دي هووي يانادية البت بتريدو وهو بريدا اتي الدخلك شنو ولا عشان كنت دايراهو لى بتك؟؟؟ بتي انا ... هو بقدر يدفع مهرا دي قاريها جامعة الخرطوم ونحنا غير دكتور مابنديها اجي اجي اجي هسي ماقلتي طيب وكت جات عندك بقيتوا بتاعين طب منعول ابوي لو جانا كان اديناهو بس بتي مخطوبة ...؟؟؟ هييييي مبروك ليها ماكلمتونا ... لا لسة ماحددو الوقت هي عندها كورس في مدني وبعدو بنحدد يعني حلتنا حيكون فيها حكيم تاني الله يتم على خير ماكلمتكن ؟؟؟؟؟. والله والله قالولك ابراهيم من امس حابس بول لا خلولو موية ساقطة ولا خلولو حرجل الشيخ قاليهم لو مرق من دي ما بتجيهو حاجة تاني غايتو نسيبتو فرحانة وجات مميزة ..؟ هوووي يانسوان دايرات تكتلن الراجل وهو حي ياتو يوم في زول كتلو دابي ظنيتكن مشتهيات ليكن موت ساي عشان تتجغمن الجبنة في ضل جنازتو (ليس هناك وقت محدد للمداخلات كلن يدلى بدلوه) وللللللللي وللللللللللللللللللللي وللللللللللللللللللي السكلي ده وين ياناس ياجنى منو المات البكاء ده مارق من بيت ناس سكينة يعني ما ابراهيم ده قالو الطاهر ابو نادية سجمي ابوييييييييييي كر علي وللللللللللللللللي ولللللللي ياحليل ابوي ياحليل ابوي البوب حي البوب حي امبلللللليلم امبلللليلم ياحليل ابوي ياحليل ابوي وااااااي ياحليلك ياعشى البايتات ياحليلك وياحليلك اوررررررررررررروب الخلا الخلا الخلا وي وي وي وي كر علينا استغفري ياحاجة كل من عليها فأن اسمعني يالصديق يالصديق شيلو المحافير عند ناس اسماعيل جيبو الصيوان دقوه في صالون ناس الشيخ ااا جماعة قربو على الديوان زحو من باب الحريم ده الفااااااااااااااااااااتحة الفاتحة عظم الله اجركم الموية ياولد الشاي .. و..