|
Re: أي بت شديدة بتحب ليها طُلبة (صبي بناي) (Re: طارق جبريل)
|
الحبيبن كيفنكم والله من وصلت الحتة دي غلبتني الكتابي كله كله... لي شنو آآآبعرف.. ــــــــــــــــــــــــــــــــ عوض كمل شايو ومشى علي محكمة المظالم ديك... والله وحده العارف الراجيهو شنو بي هناك... - سحر: يا دكترة انت طبعا ما بتشرب شاي عشان كدة انا جهزت ليك عصير المنقة البتحبو.... - جكس عوض: بختك الناس ماخدة بالها منك.. - سحر زولة حلوة ياخي وانا بحب الزول البيهتم بالتفاصايل دة - لكن يا دكتور انت ما حصل سألت نفسك الزولة دي ليه مهتمة بالتفاصيل حقتك - هيييي انت جكسيك مشى علي ابوك وجيتي تهريني بي هني - (ضاحكة) ياخي كدي خليني أسألك بي طريقة مباشرة: أنت عندك حاجة ما عاجباك في سحر ولا عندك ارتباط تاني وما قادر تقوله لينا - لا دة ولا دة أها شن قولك - طيب ممكن اعرف انت ليه متحفظ... تعرف انا بشوف نظراتك ليها من بعيد والله يا طارق نظرات زول ريااااااااااااااااااد شديد ومكتول عديل هههههههه.... بس حيرتنا معاك خفت يا الحباني لساني يغلبني وأقولها والله رايدها لامن واقع علي قفاي... واصلو ان بقى لي قلبي وحات الله يبق بق بي اسمها ليله ونهاره.... ووكتين اشوفها ولا اسمع صوتها حيلي يموت ضُمة ضُمة... والعجيب وكتين تغمد عيونها وتفتحن تاني والبياض الفيهن يبقى اكتر من السواد.. اصلي بس اقعد اعضعض في لساني وألولو فيه علي سمكة القرقور في السناري وكتين يطلعوها من المويي... والعجب وكتين تكون هاجرة نصها بي حزاما عريض كدي والشي التحت الحزام يتمايل مع مشيها من هني لا هني... وانا زاتي أزوزي معاهو متل البومة الشايفالا فار ورويسها يزازي معاهو.... - يا بت الناس انا ماني قاعد اشوف تحت رجليني... انا بشوفي لي بعيد.. واختك دي ان بقيت قلتها بريدك... ياني الاتورطت والله قال بي قولي... انا ماني قاعد اريد الخنقي... حتى ان بقى ماتلنا زول انا تلقاني آخر واحد ابكي واطمن نِفيستِي إنه لسة عايش... دحين اختك الله بيسألني الما يريدها ماهو نصيح... بس علي قول خالتي سكينة الناس وكتين كانت تلملم في القروش نحن ابهاتنا كانو مزازين الانادي والمريسي... وهسي واقفين علينا... ومستننا نشيلم ونربي باقي البُطان الصغار.... دحين باقيلك في الدوامي دي عندنا حلا لي حب ولا مستقبلا خاص... هاااا زولا هاااا قصتنا ماها بايظي من الليلي ولا من امبارح... وإن بقى علي القلب تراهو ممكون وصابر وأنا آآآبقدر اورطلي زول معاي في ظروفا متل دي... دحين ناري باكلها براي... - لكن يا دكترة دي تضحية فوق التحمل... وانتو ممكن تمشوا الحاجتين مع بعض لو عزيمتكم قوية... ياخي الحب دة ما ممكن يكون دافع يخليكم تمشوا لي قدام... - شوفي يا بت الناس... انت بتقولي كدي عشان في حاجات ماكي شايفاهن... هناك الدنيي ماها متل دنيتكم دي... الحياة واقفي وماها ماشي لي قدام كل شي بالصف... وكتين تكون طالع لازم تشوف برامج باقي اخوانك كيفن عشان ما تنطاقشوا في البناطلين والقمصان والشباشب... يعني الواحد فينا وكتين يكون عنده مشوار لازم يشاور باقي البيت في اللبس... ووكتين كنا في المدارس.. وحاتك ردا واحد وقميص ويحيد ومشيحيد تقومبو وتقعدبو والرجلين اصلهن بس تحشرن في «تموت تخلي».. تمشي العشش يفصلوهو ليك من لساتك العربيات القدام وتدخله في رجلك الدخلي الياها... يمين لامن سيورو تنطبع في قدميك... ووكتين تطلع رجليك بس فطيسي رسمي... أها دحين كان ما كانت القرايي مجان وحات الله يانا المدعوكين في البناء دة لامن تقوم قيامتنا... أها ناسنا ديل كبروا وراجننا نشيل باقي العتَّاب المكوم في بيوتنا داك... فشان كدي حرام تظلملك زولا معاك وتحشرو في جهنم ألتنا دي.... خصوصا ان بقى زولا تريدو وعندو عندك مكاني كبيري.... - بس يا طارق كلامك دة هسي ما اعتراف صريح بالحاجات الجواك... حرام ياخي الشي الحلو دة كله يموت في ضلوعك انت براك... - ياخي ما تجرجريني في الكلام... انا فضفضتة معاكي انت لانه غلبني اشيل الشي الجواي دة براي... انت وخالتي سكينة بس القلتلم الشي الماني قادر اقوله لي سحر.... - يا الله ياخي بس كدة ما كويس ياخي... قول ليها كلامك دة وريحها وخليها هي تقرر حاجاتها... يعني ما ممكن الحاجة تكون حقتكم الاتنين وانت تاخد فيها قرار براك.... كدة ما عدل.. - يا زولة أنا اصلي ما وعدتها بي شي... وأصلي ماني عندي شيتا اوعدها بيهو ولا شيتا اقدمو ليها... وان كان للألم أصلو ياهو أليلي تب.. قادر عليهو... لكن الماني قادر عليهو ... اخليلي زولا زين بالحيل متل سحر يتألم فشاني.. الدنيي دي مانا حارِلنا فيها شيتا نعيم.. وإن الله من كرمو لطف بنا كمان القسمي ألتو راضين بيها... - طيب ياخي انت ليه ما داير تقول ليها الحاجة الجواك دي... - موش أحسن من اعيشها في حلم مستحيل... واسببلها ألم وجرح.. في اللحظة دي دخلت علينا سحر شايلالها صيني فيها جك أليل منقي وكبابي.. وكتين ختت الصيني في الطربيزة ومالت فشات تقعد... شفت رُكْبينَها... الله بسألني تقول ما فيهن عضم... يشبهن المخدة وكتين يكونوا يا دوب منجدنها... وين لي ألات عوض عاملات علي رأس الكُنش كدي... عليمكم الله يا جماعة عندها وجنتين علي زبادي «الدانيت» البجيبو اعلانه في الام بي سي داك... تسكت تمطق وانت تشوف فيهو.. جكس عوض دخلت لاااجوة.. وسحر جرت الكرسي وقربت مني... وانا شلتلي مخدي من السرير وختيتها في رجليني وهجرتها علي صدري... فشان ادس النتلي أليل قلبي.. - عجبتك المنقة يا دكتور - تسلم يديك ياخي... حلوة شديد - عوض ما جاء - والله ما ظهر... خير ان شاء الله مافي عوجة - ما عارفة بس انا مقلقة وعمي دة بالذات ما قاعدة اريده - ياخي موش يمكن تكوني ظالماهو - لا لا لا اصلو من يجي ويقعد مع ابوي كدة براهم بعرف انه في حاجة في راسو قاعد يقنع ابوي بيها... ودايما بتكون مصيبة... وهسي حكاية ينادوا عوض دي براهم الله يستر فيها... - ما اظن في حاجة تخوف.. - الله يستر... عشان كدة انت ما عايز تقول حاجاتك... - وكتين تكون حاجاتك جواك وماك قادر تقرر فيها... او يكون قرارها عند ناس تانين او في علم الغيب... شن فايدتها.. - ياخي انت ليه متشائم كدة... اعمل اي حاجة.. قول اي حاجة.. - القول عندي يا بت الناس التزام... وانا ماني قادر علي التزام ماني قادر اوفيهو.... - طارق (الله بيسألني لمن نطقت اسمي دة زي الكبوا فيني موية مسخنة اضنيني حسيتبهن تقال ومسخنات... وحيلي مات): ياخي انا عايزة اعرف حاجاتي ماشة وين... انا لا قادرة أطمئن وأخطط.. ولا قادرة ارمي القصة كلها وراي وامشي... بعد تمت كلامها ده شالت يدينها وغتت وشها... وحسيتبها متوتري ودايري تبكي... والله يا الزينين لا عرفت اقولها بريدك... ولا اقوم اضمها لي صدري واعوعي... ولا اقعد تحت رجلينها واخت يديني في ركبتها ووشي فيهن ولساني براهو ينطق: بحببببببببببببببببببببببك..
.... ونواصل
| |
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
السمؤل يا حبيبنا رمضان كريم ياخي والحاجة ان شاء الله تمام التماك ــــــــــــــــــــــ
(42) اها يا الحبان جيناكم.. البنيي سكتت ودنقرت... وانا الكلام كمل في حلقي... طبقت يديني بين رُكَبي واتمحنت.. الله بيسألني العرق نازل من يديني زي نقاع الزير.. هسي يا ربي انا اسوي شنو... يا رب انت من صفاتك العدل... دحين حلني... يا مالك روحي حل عقدة لساني... ولا كمان حلني وخلني امشي لي أهلي... ربكم رب الخير عوض جاء داخل... ووشو مقلوب ينعل قفاهو وعيونه محمري.. وينفخ في جضيماتو العلي السعن ديلك... انا زولي عارفو.. وكتين يكون ممكون ياها دي حالتو... - طارق نمشي - سحر: ياخي مالك مستعجل يا دوبها حداشر ولسة بدري علي الصلاة. - عوض: ياخي يا دوب نمشي نستحمة وانتو ذاتكم تمشوا تشوفوا بت خالتكم... - جكس عوض: شنو البسمع فيهو دة.. ماشين وين ياخي.. بعدين انا موش قلت ليك عايزاك.. - ايوة بس الوكت اتأخر شوية - كدي تعال انا عايزاك جكس عوض ساقت عوض ومشت لاااجوة.. وسحر قبلت علي: - صحبك مالو - والله ما عارف.. بس هو لمن يكون زعلان ما بيحب يتكلم، وشكله كدة في حاجة ما مرتاح ليها.. - انا ما قلت ليك.. عمي دة غير المصائب ما بتجي من وراهو حاجة - كان علينا نحن متعودين يا سحر.. الحزن دة بقى ساكن رسمي في بيوتنا، حتى ان بقى مشى بنستغرب موش بنفرح... - ياخي انا ما بحب نبرة اليأس العندك دي - دي ما نبرة يا بت الناس، دة واقع نحن بنعيشه بشكل يومي... اقدار ربنا صعب نهرب منها... عشان كدة انا كنت رافض الموضوع دة من اصله.. - يعني انت برضو عايز تكتل مشاعر الناس ديل زي اعمامي - انا لو علي عايزهم يتزوجوا من بكرة... يا بت الناس انا بقول كدة لانه بشوف الشئ الحوليني كويس.. الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته... - يا طارق أنا لمن قابلناكم حسيت انه الواحد لمن يكون عايز حاجة بيصل ليها.. انتو كنتو بالنسبة لينا أمل كبير خلاص... ممكن تقول قدوة عدييييل.. طلبة جامعيين وشغالين طُلب عشان يحققوا حاجاتهم.. ودة الشي الخلا اختي تحب عوض.. هنا أي نعم كل شئ متوفر بمقاييس القروش... لكن في حاجات كتيرة ناقصانا أقلها كيف نختار حياتنا بنفسنا... عشان كدة لمن اختي اصرت علي عوض ووقفت قدام البيت كله حسيت اننا ممكن نعمل حاجة.. ممكن لأول مرة نقول لي ابوي واعمامي نحن من حقنا نختار... انا ما عايزة يزوجوني زي بنات عمي ياخي... - يا الله ياخي... هنا وهناك نفس الشئ.. الألم سيد الموقف مع اختلاف اسباب هنا وهناك... تعرفي انا بعجبني جدا الونسة معاك بحس كأنه بتكلم مع زول بعرفه من سنين طويلة شديد... زول كدة لمن تقعد جنبه تنسى الكون... لكن.... ياخي نادي عوض خلينا نمشي - دة اعتبره نوع من الهروب - يا سحر... يا بت العمارات... انا ما عندي حاجة اهرب منها... انا بحاول اهرب من جواي... بحاول ابعد عن نفسي عشان اقدر اعيش، الجواي كتير وما عايز اجري وراهو عشان احققه... لانه ما بيتحقق.. - أول مرة احس بالمرارة الجواك دي... كنت دايما بحس انك مقبل على الحياة بتضحك من جواك... - بضحك من جواي يا بت الناس عشان ما اطرشق... عندي احلام كتيرة ما قادر احققها... والحياة اهي ماشة.. والمسافة من الامتداد لي مقابر الصحافة ما بعيدة... عشان كدة لازم اضحك واقرقر... انت زولة كويسة يا سحر... وجواك كمية من الحلم والأمل ممكن لو بذلتي مجهود بسيط انا متأكد بتصلي... ما زينا نحن.. - اصل بدون مقاديف... واصل لي منو؟؟؟؟ - المهم انك ما ترجعي وراء... انسي الامتداد.. فوتيهو وحا تصلي - حتى لو كان الامتداد دة المحطة الانا عايزاها وحاتكم لمن قالت كدة... جسمي خدر... واتذكرت انه دي السنة الاخيرة لي في الجامعة... وطريت اغنية حميد: حان الامتحان من وكتو بس فاضل شهر وما اظني من جور الزمان انجح واجيب ليكم نمر زينوبة كر من حالي كر قاعدلي في قيزان جمر
وقفت علي حيلي وجيت ماشي مسكتني من يدي زي الضربتني كهرباء: - طارق ما عارفة بس عليك الله ما تسافر قبل ما اشوفك - إن شاء الله قولي يا رب... نادي لي عوض عوض جكسويتو جات ماسكة في يده وبتنقنقلو تحت اضنينو... بس هو سارح.. القصي باين عليها كبيري... ودعناهن ومشينا علي أهلنا كداري لا ناضمني لا ناضمتو... استحميت ومشيت الصلاة لقيت عوض خاتي مصلايتو وكتين شافني قلبها وقعدت جنبو وطبقنا سفنجاتنا بي ورانا.. والواطة حر وسمومها لافح... وبدأت الخطبة... الله يرحمك يا العباسي امام الامتداد.. كانت الخطبة عن عذاب القبر... قربت امشي اقوله ياخي عذاب القبر دة خلو ترانا ماشينلو ماشينلو... كدة خلنا في عذاب الدني دي... كملنا صلاتنا عوض قام قبل ما يسبح وخلالي المصلاية ومشى... مشيت البيت اختلي غمدي واتغديت وصليت العصر ومشيت علي بيت ناس عوض... لقيت خالتي سكينة في مصلايتها تصلي جريتلي بنبر وقعدت جنبها.. بس مع السلام عليكم السلام عليكم قالتلي: - طارق ناولني حُقتي - انت اصلك لا تسبحي لا شيتين طوالي علي الصعوط - أي كدي أدني اللسف ياخي هو الله دة الماهو عارفه شنو فشان يوروهو ليهو - انت باقيلي جنيتي - أييي جنيت وكتين سمعت كلامك ومشيت خطبت لي صحبك - هو وينو ماني شايفو - ابى يتغدى وبس ساكت لبس سفنجتو ومرق.. يا ولدي انا قلبي ماكلني عليهو يا وليدي امشي شوفه وين... - ما تهمي شي انا عارف بلقاهو وين... ... ونواصل
| |
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
طارق جبيرين..حبابك يا صديق
طولت ما قريت لي كتابة مستمرة..غريبة ، اليوم بس ، بديت اقرا القصة دي (المحبين العظماء في الأرض..او قول اولاد الزمن المُر .. او قول اولاد اللعنة الأبدية) في منتدى الراكوبة..على بالحلال يا طارق مما جيت البلد الشينة دي (تقريبا تسع سنين) ما قعدت لي وكت خصوصي لحق خمس ساعات .. ساعة في ضنب ساعة..الإ اليوم مع القصة دي..
ياخي جنس مزازة.. عمك قوقل يشيل و يجيب ليك.. لمن براي قلت ليهو يا قوقل ياخي نحن فايتنك شوية..
قريت تعضرك في منتدى الراكوبة..اها يا اخوي انا بقرا (بدعي اني بقري كويس).. كتابتك دي واصلة تب..عليك الله تاني ما تتعضر ساكت كده في السهلة..و لمن تفرغ منها بنقول ليك فهمنا فيها..
احييك على فكرة القطارة (طبعا انت قاعد تقول ما بتحب الكلام الغلاد غلاد..عشان كده مفاهيم الإثارة و خلق علاقة توتر مستمرة مع القارء/ة المتفاعل/ة دي نخليها لي بعدين)..
على بالحلال يا طارق يا اخوي فكرة المناحة البي السيوف دي كن دخلتها في مسابقة كتير الناس البتسقط فيها..و المفردات..و الصور.. وضبط ايقاع نبرة السرد (ياخي دي ما عندنا ليها مقابل بكلامنا التحتاني الواحد داك.. عشان كده مشيها لينا)..و القطر يا طارق.. ياخي القطر ده اكبر بطل في عالم الأدب لكن ساقط في حساب الذاكرة الأدبية السودانية .ز اللهم الإ كن يتيمة ود المكي (قطار الغرب)..و بعد داك الغنا.. لكن الرواية غايب فيها تماما.. طبعا ح تواصل من غير ما نطلب منك.. لكن تأكد انك بتكتب كتابة مختلفة شديد.. و ليها وضعها الخاص.. و دمت..
كبر
| |
|
|
|
|
|
|
Re: أي بت شديدة بتحب ليها طُلبة (صبي بناي) (Re: Kabar)
|
Quote: الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته |
دا كلام كبير يا دكترة .. بس الحب البيعرف قراءة ولا واقع
ولا بيعرف إستئذان بيجي براه داخل تووووش .. ووحاتك يا طارق تاني ما بينقدر
| |
|
|
|
|
|
|
Re: أي بت شديدة بتحب ليها طُلبة (صبي بناي) (Re: Kabar)
|
حبيبنا Kabar ياخي والله انت كلامك دة غلااااااااااااااااد بالحيل وانا راجل ضهبان ساكت ماني قادر علي الحمل دة كله احاول ان انقل هنا شئ من ما عايشته في احياء الحياة احياء ملح الارض.. الناس الكادحة بمعناها الحقيقي يا سيدي لو انتبهنا فقط لتلك الاحياء وما يدور فيها معارك حياتية لاخرجنا الكثير من الدرر الادبية هنا لكن للاسف لا املك ملكة الحكي والسرد ولا كنت قد اخرجت لكم هنا الكثير من الجواهر.. الله غالب... غايتو اقبلوا حكينا على علاته..
محبتي الاكيدة سوف احاول ان انزل بقية الحلقات هنا مع بداية اجازة العيد ان شاء الله
| |
|
|
|
|
|
|
|