|
|
 Re: أي بت شديدة بتحب ليها طُلبة (صبي بناي) (Re: طارق جبريل)
|
| Quote: يا الزينين كيفنكم ... |
Quote: طارق روق الناس ديل عازمننا في ايسكريم 41 في العمارات يوم الخميس المغرب...
- مو ياها الداندورمي دي.... ياخي نضربلهم تليفون من دكان الهادي ونودعهم وخلاص...
- انا غايتو ان بقيت مت ممغوس انت السبب...
|
ونحن متنا من الضحك .... متعك الله ...
| |
 
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: ياسر نجيلة)
|
ياد.طارق والله مستمتعين والضحك يجيب الطاش والماوس من القرقره يهتز براهوا
ذي الجوال في وضع الصامت فوق تربيزة قزاز والله ياطارق التوثيق ده والتصوير
البلاغي باللهجة الشايقية دي تشقق بنايات العمارات كلها من الضحك متعك الله
ياأخوي ويخلك وليداتك واصل بقينا مانفرق بين سحر والسحور نداقش ساي ونساسق
بالدريب الجاي من حداك أنا ماعارف مالي بس ماداير النهاية بعد ده كلوا تكون
مافي صالح عوض أنت دربك مرقك في المغرب باقيلنا عشاء عوض نصليهوا كم ركع ياربي
منتظرين الحلقة الجديدة في ميدان الوحدة وعيني علي قندراني عم جبريل وفي القطرة
عيال عيسي بيتجاروا فتك بعافية ياصاحبي.
،،،،أبوقصي،،،،
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
يا حبيب
Quote: وأول مرة أشوف إنه عندها فلجي سمحي خلاص واللسان ظاهر منها يمين بس جريدتين
وبيناتن سبيطي ألت مشرق ولا مطوطي (الرُطب)... |
اللهم إني صايم ..... يا زول كلامك ده ما ودر صيامنا شمار في مرقة
Quote: عينينك يا أعز الناس...
عينيك فيها أخطر ماس...
عينيك قوة ما بتنقاس... |
أيوه ... الفنان قال: عينيك فيها علم الطب ... عينيك علمنّي أحب. ما سمعت فنان قال المونة والمسطرين علمنّو الحب  بس إنت وعوض جبتوهو أشتر.
هسة كدي قول ..... قبل العيد بنتخارج والا يفتح الله؟
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
Quote: دا الحد القريتو
والفطور بعد دا بيفوتنى
وانا لا اسع فى الشغل
غايتو يا أبو الطروق خلينى أفطر وأجي اتم القصة
وبعدين عندى معاك كلام كُنر |
طرقوش كيفنك
يمين بهدلتني جنس بهدلة عشان القى مداخلتك دي
يا زول دة شغل رمشان ولا شنو
انا منتظرك في حوش عوض دة
بس النبي فوقك تضيف مداخلاتك في الآخر عشان ما تخليني أساسق بين الصفحاتD
محبتي الاكيدة:
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
لسه تاني ح ننتظر؟؟؟
تعرف انا ما صدقت انشغلت في رمضان دا وخالص ما دخلت البوست حقك..
جيت اليوم ومبسوط قلت القى الحكاية خلصت ونتمها بمزااااااااااااااج وخصوصا اليوم الخميس ومفضي نفسي للاخر..
مش كفاية علينا لغاية كدا والدنيا رمضان!!!!
ود القرشي
| |
|
|
|
|
|
|
|
|
 Re: أي بت شديدة بتحب ليها طُلبة (صبي بناي) (Re: طارق جبريل)
|
طارق جبريل
محبتي.. دقاق ودراش.. وملطم صاح
ياخي ما بالغت أشد الانبلاغة.
اسه اكان بتبني في برج من 12 طابق كان خلصت!!!
شنو!!!
بديت يوم 28-12-2006
واليوم 07/10/2007
بالغت وشذيت
وعوض دا اكان طلبه .. كان اترقى اسه وبقى معلم بناي كبير
طبعا لي شهوووور متابع موضوع عوض دا.. وعامل فيها الود غتيت وطُلبه من سنة دو.. ،، وبتابع من تحت لتحت
لكن خلاص يا طارف فاض بي رسميي وشعبي..
طبعا الشباب حرقو لي ورقي وكسرو طوبه في راسي وما خللو حته ما شكروها...
انا غايتو بهددك وبصلك في مغربك دا وبقبقبك اذا ما في خلال اسبوع خلصت موضوع عوض..
وما تنسى موضوع سحر كمان..
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
طارق جبريل
اسمع
اخوك زول ديامي!!!
فاهم دي؟؟
يعني حركاتك البتعملها للناس ديل ما بتخارج معاي
استنى شويه،، والنت قطع،،، وبكملها قريب................الخ
المكن دا بقسّم في الجكس بس..
عشان كدا جيبها من قاصرها وتمها سرييييع
فاهم!
ياخي 10 شهور شاري الناس
عاجبك الحال دا يعني؟؟
مرة ما عارف اليوم في المغرب 23 ساعة ومرات 22 ساعة
ان شاء الله فِرِد ساعة
اكتب بقية القصة ياخي
الله يهديك..
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
يا الزينين كيفنكم ...
سامحونا باقي كنا مشغولين مع لبس العيد أليل البُطان..
........
جاء الخميس يا الحبان وانا ماني راضي المشي وعوض شغال تحانيس...
دخلت عندهم سلمت علي خالتي سكينة وجريتلي بنبر جنبها وقعدت ممحن...
- مالك مبلم كدي....
- ياخي ولدك دة داير يوكرني وانا ماني قادر علي الشي دة...
- قالي عازمنكم الليلي في العمارات...
- أيي داندورمي...
- هي الداندورمي دايرالا عزومي...
- تقولي شنو نسوان مخهن ضارب...
- إييي الشي ماهو الداندورمي ديل دايرات يجيبن رجليك مع أخوك... نسوان قادرات...
- وإنت طبعا مبسوطي... تضحكي لي قعر أضانك...
- (ضاحكة) أييي يا ولدي عايزاك تتوكر مع أخوك... علي خايفي من أبوك... أمك ساهلي بقدر عليها.. علي أبوك صعب خلاص..
- يمين تقوليلو كدي علي يرصصك...
- بري يا يابا إنت بقيت علي الشي دة برسلو عمك عبد الله... قوم يا ولدي أمشي مع أخوك وبعدين لامن تجوا نتم حديثنا..
مشيت اخدتلي دُش وانجعصتلي في بنطلون وقميص وسرقتلي ريحي من عمكم جبيرين... ومشينا...
لامن وصلنا شارع 41 وحاتكم قلبي دة ينتل نتلي تقول ممتحن شفوي... واللغليغ كلو راح مني...
شويتين نشوفلكم البنيات معاهن خالتن ووواحدة من بنات خالن قدام المحل... شباب زي الألموظ...
سحر لابسالا بلوزي خضراء مع اسكيرت اخضر غامغ كدي علي السعدي (النجيلة)... والضفور في راسن برضو اخضر
وعاملالا أحمر شلاليف كبدي كدي وفوقه زيقا دهبي غامغ بس زي إعلان البرامج في قناة الجزيرة...
(والله ناس امي ضايعات أهلن دقولن شلاليفن بالأسود علي قعر الصاج وطلقوهن)...
والجفون مضرضرالا فيهن شيتن اخضر كدي وكتين تغمض يلمع زي الفوسفور الفي الشوارع السفرية (هاي وييز)
والرموش الليلي بقن طوال كدي علي قرون الاستشعار ألت الصراصير... والله يا الحبان وكتين تغمض وتفتح
العيون أكبر من الريال... انا نفسي يتخمة ضُمة ضُمة... واتشحتفلي شحتيفتا تقول صايم والآذان فضلو خمس دقائق..
- (خالت البنيات) أهلا بالشباب...
- سلام عليكم...
- تقعدوا برة ولا جوة
- والله كله كويس
- خلو طارق يختار نحن الليلة محتفلين بيهو...
- والله جوة أحسن...
- الحبشية ظبطت لينا طربيزة واتوهطنا في الكراسي....
- خلاص يا دكتور قربت...
- والله يومين كدة واسافر...
- حا تفرق معانا والله... اتعودنا نشوفك مع عوض...
- سحر: انا زعلانة منك...
- ليه ياخي....
- انا ما قلت ليك عايزة اشوفك قبل ما تسافر
- ما ياني هسا معاكم قبل ما اسافر...
- كتير علينا نشوفك براك
- والله انت شفت الظروف كيف... موضوع الشماليي لخبط الدنيي علينا
- عنوانك شنو في مصر...
- ساهل جدا مصر الزقازيق كلية الطب البيطري
- بس كدة ساهل... حا ترد علي لو رسلت ليك
- اكيد ياخي نحن ما بنصدق يجيك جواب من السودان...
- ممكن برضو نجي مصر اجازة راس السنة لو جينا بجيك...
يا ود الكرسني...
جات الحبشي تشيل الطلبات...
- اها يا شباب تاخدوا شنو
- سحر: اختار ليك على زوقي انا...
- جميل
- جكس عوض: انا غايتو بختار لي عوض...
الحبشيي مشت وجات جابتلها كبابي طوال كدة علي السنبريي وفيهن داندورمي كدي مدورة زي كورة التنس
شي احمر وشي اصفر وشي اخضر... وفوقن شيتن ابيض كدي ملولو وفوقه نقط حمراء زي لامن تكون مجروح
في أصبعك الكبير والشاش منقطة فيهو صبغة اليود...
سبحان الله حتى داندورمتم مختلفي.. نحن ألتنا في أكياس ممصرنة كدي يا قنقليز يا كركدي يا عرديب
ويقعد الواحد يمصمص فيه لامن يفضل التلج ويقعد يقرقش فيهو..
بقينا نبلع في الداندورمي دي والونسة شغالة... مالت علي خالة البنيات: ياخي بتنا دي ما جننتها جن ياخي انطق
قول ايي حاجة خليها تستريح... انت ما عايز تتحبة ولا شنو..
انا شبه حب... إن شاء الله بالمغسة التحش مصاريني وتقدقدِن...
- صعب أوعد بي حاجة أنا ما قادر أوفي بيها.... صعب شديد
- ياخي كله بيتسهل بس انت ارحم البنية دي والله بشتنتها بشتنة حرام عليك
- والله انا زعلان عشانها... ما بتستاهل... أيي شي فيها سمح... بس أنا ما عايز ابني حاجات في الهواء
- طيب دي حتة كويسة... يعني جواك في تجاوب بس انت خايف من المستقبل... ودي ساهلة بنحلها
تعرف أنا لو قلت ليها الكلام القلتو دة الليلة ما حا تنوم كله كله... أما لو قلتو انت ليها يمين تخلي ابوها يسفرها ليك هناك..
هي ما تنوم... انا عيوني اليتقدقدن...
- لا تعليق...
كملنا داندورمتنا واتونسنا ونسة عامة كدة ولمن وقفنا سحر زحت بي بعيد شوية كدة بي طريقة لا شعورية
- انا حا اراسلك عليك الله ما تتجاهلني
- ياخي انت بيتجاهلوك... ما ممكن يحصل
- وعد
- وعد
ودعت خالة البنات وبت خالهم ومشيت علي جكس عوض وودعتها لمن رجعت لي سحر تاني
وحاتكم قربت اغنيلا: كتير بتناسى ايديا واسيبا عنية فوق ايدك....
وسافرت...
.... ونواصل
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: مجدي عبدالرحيم فضل)
|
شكرا يا أبو الطروق ولا عدمناك
والعيد علينا وعليكم يتبارك
ـــــــــــــــــــــــــــــ
(1)
كيتا كدي في اخو البت الغزالة الكسر صاحب ناذر داك
انا بحكيلكم قصة صحبي عوض الله يطراهو بالخير...
دحين يا الحبان ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
ونحن مقدمين للجامعة بعد ما امتحنا الشهادة..
عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو
قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...
عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
ونواصل....
(2)
اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...
(3)
عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الحرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...
(4)
المهم يا الزينين زولكم بقى يهضرب بالبنية والبنية مكسرة فيهو... واصلو كان لي عوض ما عايز الطابق اليلم دا كلو كلو ما يتم... عوض المسكين الغنماية تاكل عشاهو بفى يغني شيتا: اساسق بالدريب الجايي بي حداكا.... وشيتا انا دستوري نازل هناك في العمارات... ودي ما بعرفو جابها من وين... دحين انا شفت زولي اتشعلقلو جنس شعليقة يفكو منها الله ساكت..
- شوف يا عوض انت راجل رفيق العمر كله القصة شكلها ما لافقة معاك
- ياخي ليه عشان انا فقير يعني
- ما كدة يا الحبيب بس انت لسة المشوار قدامك فيهو مليون كيلومتر
- ياخي بقطعوا معاها
- يا راجل البنية دي سميحة ما قلنا حاجة بس صعب تنتظرك حا يجي اي واحد مرتاح ومتمسح ويخطفها منك وانت تبقى فاتح خشمك زي العوير...
- ياخي انت مالك عايز تكسر مقاديفي
- هي وينة مقاديفك دي انت عندك بلتون اخوان وناس ابوك راجنك تقول لي مقاديف
زولكم عين لي كويس وكبسني بنية وخلاني مرمي ومشى...
(5)
المهم يا الحبان اخدت بنيتي ومشيت كمدتها في قلبي وكملت شغلي ومشيت للبيت...
اصبحنا الصباح وكان يوم خميس وطبعا يوم الخميس مهم جدا في حياة الطُلب لانه يوم صرف القروش... والواحد دايما بيكون قافل على كيلو باسطة وكدة..
المهم عوض جاء مبلم لا ناضمني لا ناضمتو... كل واحد فينا مشى لي شغلو...
عوض علي زعلتو مني البنية الصباح كلو كلو ما ظهرت... زولكم عيونه حمرت وعرقوا نازل يخرخر... ووشو بقى زي ملاح الويكة البايت.. تاوقت عليه من فوق لقيتو رفع فنيلتو العجيبة ديك لي نص كرشو..
اصلو زولي عندو كرش ومع رفع الفنيلة دة بقى عامل زي الزول البالع ليه (قُلة)... وعلي العليه قام رفع بنطلونه السجمان داك لي ركبتو... والرجلين تحلف تقول كُنش عصيدة...
هسا البت السجمانة دي العاجبها في الزول دة شنو ما عارف..
مشينا نفطر وزولكم حارن،،، وعوض في الاكل عندو اكل غريب خلاص وحاتكم يقع في صحن الفول دة جف جف جف جف زي الكلب لامن يكون عطشان ويشرب من صحن الطلس...
لكن زولكم شال ليهو لقمتين وقام...
بس ربكم ربك الخير مع رجعتنا ظهرت ام الحسان... كان اشوفلكم الراجل فرح وابتسم زي الزول العندو ام فريحانة...
قبضنا قريشاتنا من المعلم ومشينا لي بتاع الباسطة دغري ولهطنا باسطتنا في امان الله..
في الطريق الزول ما مبسوط وعايز يصالحني:
- انت لسا زعلان
- ازعل ليه انت حر انا حبيت بس انبهك
- تنبهني لي شنو
- لي وضعك والمشوار الطويل المنتظرك
- ياخي ما ممكن يمشا مع بعض
- ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
- عارف
- لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...
وصلنا بيوتنا كداري من العمارات وكل واحد فينا مشى لي بيتو...
بالله يوم الجمعة من اصبحت اشوف ليك زولي لابد جنب بتاع الدكان...
مشيت عليه وسلمت على بتاع الدكان... شويتين اكان نسمعلك جرس تليفون الدكان:
- بالله عوض جنبك.... ابو الزفت البنية السميحة على التليفون.. اتاريه مصنقر هنا من اصبحت
- الو صباح الخير (سبحان الله عوض وصباح الخير اصلهم ما بيتلموا)
وشوية انا والهادي بتاع الدكان نسمع في القرقراب والضحك تحلف تقول الولد مولود في مقاطعة سان جيمس ما في الامتداد
- والله انا ذاتي اشتقت ليك... دة الكلام
(6)
انا والهادي بتاع الدكان سكتنا ساكت وزولكم شغال في التليفون..
- والله انا زاتي ما عارف ليه عملوا لينا الجمعة دي اجازة
الزول دة اظنو الصلاة بقى ما فاضي فيها... وشوية شوية تسمع الضحك... بالله عوض الضحكة تمرق من حلقو زي قدرة الفول الهاجرنها بي حجر.. خخيي اهييييييييي اههههه..
- الليلة شربتي شاي الصباح بدوني...
هو دة حب دة ولا صينية فطور...
- بس انا وحياتك لي هسا ما فطرتة وما اظني بقدر لانه شايك بتاع الصباح كان بيفتح نفسي...
جملة الايمان الزول دة الصينية اليقعد فوقها يلحقا امات طه.. يمين يقوم آخر زول ولو جو صورو الصحانة والصينية من بعدو بالاشعة ما يعرفوا كان فوقها شنو من شدة ما مسحها مسح...
- اها الليلة شربتي عصير المنقة ولا خلطي ليمون بس..
اول مرة اشوف لي حب في انواع الفواكه في سوق الخضار...
- تعرفي انا بتعجبني وجناتك شديد...
سبحان الله عوض كلامه كله طوب وملطم واسمنت الليلة كمان بقى يعرف الوجنات..
- لا والله ما بجاملك انا لو بجاملك معناها بغش في نفسي...
الزول دة بعد شوية حا يقول لي ما عايز اشتغل طلبة تاني..
- انت لو عايز تعرفي نفسك كويس انا بديك عيوني عشان تشوفي بيها نفسك..
شن طعم عيونك وهن عملات زي عيون الصبرا كدي ما فيهن اي تعبير..
- تعرفي يدك من شدة ما رطبة وناعمة لمن اسلم عليك شعر جسمي كله يقوم..
شعر جسمك قايم خلقة.. الزول دة بالله تقول ابو القنفد شعره كله قايم زي الابر
حتى شعر نخرينو طالع زي المسمار الداقنو معوووج في خشبة....
ربكم رب الخير جاب مصطفى اخوهو الصغير يناديهو للفطور حتى زولكم قطع المكالمة..
وقام جري للبيت... شفتو الزول النفسو مسدودة... يمين انطلق زي بيرك عربات السفراء
للفطور..
(7)
مشينا يوم السبت لي شغلنا وعوض السعادة ناطة من عيونه تقول عندو غدة درقية...
يمين ونحن في الطريق ضاربين الكدر للعمارات الزول دة اي اغنية حب وجلكسات غناها...
بس الوكرة الوكر فيه انه دا آخر اسبوع ومنه نحن نخلص الشغل هنا...
لمن قلت ليهو كدا زولكم نطط عيونه ونفخ الهواْء من نخرينو زي الحصان بتاع السبق.. وكضم الكضمة البي وشيها... انا قلت اسد ليه نفسه عشان يخلي الشغلانة لانها ما حا تلفق... اتاريني بوظتها تاني لانه زولكم بقى مهموم ويعضعض في لسانه زي الكلب الماسكو السعر....
فطرنا وجينا لقينالكم البنيي السميحي في الباب ومعاها اختها كمان انا سلمت فسراع وطلعت لي طوبي واسمنتيني... وخليتو براهو... الظاهر عليها اخت البنية كانت عايزة تشوف (ألان ديلون) بتاع الامتداد دة... تاوقت عليه من فوق لقيتو يقرقر ساكت مع البنيات وبعد شوية شال صفيحتو ومشى لي رملتو.. لامن طلع فوق جاء عندي..
- انت مالك مشيت فسراع كدي
- يا زول انت سيد الشغلانية من اولها تموت موتك
- اختها قالت لي صاحبك دة مالو مسيخ كدة بس سلم ومشى...
- انا راضي بي مساختي دي يا زول والله زاتو عشان عارفني مسيخ اختارلي قراية البيطرة
- ياخي ما تكابرني انا...
- يا زول اكابرك في شنو انت جنيت...
- يمكن اختها تعجبك..
- شوف يا ابو عويض انا ماني فاضيي للحب... ووجع القلب ماني قادر عليه فشان كدي لا بقدر احب هسا ولا حاجة يا زول المشوار طويل...والبنيات ديل ما بينتظرننا... هسا يجي واحدا متمسح ومليان قروش ويعرسها ويخليك فاتح خشمك ويمشي..
- ياخي انت مالك زول متشائم كدة
- ياخي انا عارف امكانياتي... ياخي انت بس شوف في ابو البنيات دي كويس... الراجل يلمع من النعمة.. ما حسدناهو لكن ما حا يقبلبنا نحن ناس قريعتي راحت ديل... ياخي الراجل تريان وجضومه مليانة لامن مدلدلة زي معلاق اللبن... وشوف انت جضومك مكرمشة كيفن علي السعن الناشف...
- بي شناتي دي البنية حبتني...
- مبروك عليك وخليك عايش في الوهم...
كملنا اسبوعنا ورجعنا لي امتدادنا وخليت عوض ما بين بيتهم وتلفيون دكان الهادي...
وبعد اسبوع انا سافرت مصر لي بيطرتي وهو مشى جامعة الخرطوم لي صيدلتو...
الجوابات بيناتنا ما انقطع... وعوض كلامه كله عن بنيتو وحبهم وانه بتجي عندو لامن تشتاق ليه في كافتريا الجامعة... يعني شغال خلط صاح...
لمن رجعت في الاجازة لقيت ليك النيران مولعة...
(8)
رجعت من الجامعة في مصر في الاجازة مهدود وجسمي كله قطايع وكسير... والله البيطرة دي فيها جنس جري من كفاي جداد لي مراح غنم ومن زريبة بقر لي حوش حمير.. وعلي العلي الله وقعني في مجموعة كلها سحاسيح ... شي شيراز وشي شيرين... بنات مدلعات كدة جوا يقروا بيطرة ليه ما عارف... لو في تور هاج: حصل يا طارق.. لو حمار حرن: شوفو يا طارق... المهم يا الحبيبين قلت في الاجازة دي انجمة شوية عشان اقوم اشوف البناي وين ونقوم نبدأ من جديد...
خالتنا سكينة ام عوض جات سلمت علي شديد وقالت لي: لامن ترتاح تعال لي انا عايزاك... قلت ليها ان شاء الله
حسيت انه عوض ساط ليهو سواطة شديدة لامن امه دي تجي وتقول لي عايزاك...
في المساء جاء عوض واتسالمنا ومشينا دكان الهادي نظبط البوش... شفت فيه شديد.. قام قال لي ما تعاين لي كدة عارف امي جات كلمتك... قلت ليه امك ما قالت لي حاجة بس سلامها وطريقة كلامها بتقول انك عملت ليك مصيبة ولا ناوي عليها...
ياخي انا قلت ليهم يخطبوا لي وبس..
- يخطبوا ليك وبس، انت قايل الخطوبة دي ساهلة، وبعدين ليه يعني يخطبوا ليك من هسا وانت لسة حتى ما وصلت في قرايتك للاسبرين..
- ياخي انا قلت ليهم نمش نقرأ الفاتحة وبس
- والفاتحة بيقروها ساكت كدة ما لازم بشيلوا معاهم حاجات وقولة خير وشكلاتة.... انت عارف البيت عندكم رزق اليوم باليوم... وانت ما عندك التكتحك ولا حا تديهم قزازة حامض الكبريتيك وكرتونة كلوريد الصوديوم
- ياخي ما تكسر لي مقاديفي انا والله راسي ضارب وما عارف اعمل شنو
- انت ليه عايز تخطب يعني من هسا الجديد شنو
- شوف انا بكرة حا اشوف الجكس وبعمل معاهو مواعيد عشان تسمع منها براك
الصباح عوض جاء البيت ودخل الصالون وفتح الدولاب وشال ليهو قميص من قمصاني ودخل فيهو ومشى وفي المساء لمن جاء قال لي بكرة نتقابل الساعة عشرة في كافتيرية الكلية قلت ليهو اوكي
الصباح لبست القميص بتاعي ودخلت لي في جينز ومشيت ليهم
- السلام عليكم
- اهلا د. طارق حمد لله على السلامة
- الله يسلمك دكتور شنو ياخي نحن يا دوب في مرحلة الارانب
- قميص عوض حلو في عوض بس ما حلو فيك (مع ضحكة)
- جابت ليها نبذ كمان مع انه القميص حقي بس قلت مافي داعي نشيل حال صديقنا مع انه لابس ليه قميص اصفر وبنطلون اسود عامل زي كبسولة التتراسايكلين كدة
- انت ليه رافض موضوعنا من الأول
- ياخي منو القاليك كدة
- عوض دايما بيقول لي طارق قال وقال وقال
- انا ما ضد الموضوع بس ظروف عوض بتصعب القصة كلها هسا... انت عارفة ظروفه في البيت كيف والمشوار قدامه طويل شديد ووراهو كوم لحم لانه اخوانه الكبار الحمل تقيل عليهم فهو لازم يحصل يشيل معاهم
- انا عارفة كل حاجة وهو حكي لي كل التفاصيل
- قاليك امه في البيت لابسة تموت تخلي
- قالها لي وانا عايزاهو كدة من غير كريمات (ابو الزفت الزولة شكلها واقعة لي اضنينها)
- طيب الله يوفق انا جيت اسمع ليك حسب كلام عوض وما عندي شي اقدمه ليكم سوى دعوات بالتوفيق
- لا انت ممكن تعمل حاجات كتيرة لانه عرفت من عوض انه ابوه وامه بيحبوك شديد
- ما اختلفنا بس موضوع زي دة صعب شديد اكلمهم فيهو بعدين انتو مستعجلين كدة ليه على الخطوبة دي
- لانه انا عندي مشكلة في البيت واحد من اولادي عمي اتقدم لي ومافيهو اي عيب مال وجاه وكله بس انا ما عايزة اتزوجه نهائي وابوي مصر عليه لانه ود اخوهو وانا كلمت امي بحكايتي مع عوض وقالت لي خليهو يتقدم وانا بقنع ابوك لانه عوض مستقبله مضمون
- طيب انا حا اشوف معاهم بس ما بقدر اوعدك باي حاجة لانه صعب جدا يستوعبوا الموضوع
الغايزني عوض كان بيتو نس مع اختها وآخر قرقراب ومخليني انا مع محكمة المظالم دي... النصيحة لي الله اختها ذاتها شديدة بس مافي طريقة في ظروفنا دي الحاجات دي عشم ابليس في الجنة
والله البنيات عزمونا غداء مدنكل ودفعوا القروش وكمان غمتوا لي عوض حق الرجعة كمان.... الله يسألني البت دي بتحب عوض دة جنس حب عمري ما شفت زيه
ونحن راجعين في الحاقلة سألني عوض: عرفت المشكلة وين
- عرفتها لكن حلها صعب شديد
(9)
تاني يوم بالعصرية دخلت بيت ناس عوض لقيت حاجة سكينة بتعوس ليها في لقيمات... وانا اموت في اللقيمات.... جريت لي بنبر وقعدت جنبها... الله ينعلك يا عوض المرة من العواسة والجري في تربية اولادها وشها سود وملامحها كلها حزينة شديد... الله بيسألني بتعوس في اللقيمات بالطشت عشان تملأ جرادلها بتاعة الطلس البيضاء ديك وتمشي تقعد جنب الدكان تبيعها وتلقط مصاريف الوليدات... شكل اللقيمات في الطشت زي قلاب الخرصانة... غلبني اقول ليها اي حاجة... ادتني صحن فيهو لقيمات وجابت لي شاي بي لبن وبقيت ابلع واحكحك في راسي... نوع خالتي سكينة دة السودان مليان بيهو وان اختلفت حكاياتهم الا انه النتيجة واحدة... كوم شفع وارادة تكسر الصخر عشان الشفع ديل يكملوا قرايتهم ويبقوا ناس كويسين.. وزي ما قال حميد ناس مجروة وتجر(تدين) عيشن كمهو وديشن هانقدر..
- طارق يا ولدي قول الداير تقولو ما تحرك عويناتك زي لستك الفلكسواجن كدي..
- انت انا ما حلفتك تاني ما تسفي الصعوط دة.. مقنطرة سفتك كدة زي درج القروش بتاع الدكان كدة
- (ضحكت لامن دموعها نزلت زي الماسورة المحلوجة ومربوطة بي دبارة).. تعرف يا طارق يا ولدي انا قاعدة اريدك ليه.. عشان بكون شايلة هم الدنيا كله فوق راسي وتجي وتخليني اضحك.... نان يا ولدي انا ما اسف كيفن من الشي البيسوو فيهو ناس عوض دة... انت ما تحمد الله الما شربتلي قزازة عرقي..
- افو انا خالتي تسكر
- نان يا ولدي عمايل صحبك دي يقبلوها كيفن والله فضل لي السكر... واصلو ان بقى كشف علي دكتور يمين الا يرشوني جبخان حا يلقوني منتهيي..
- طيب العمل شنو يا خالتي صاحبي حب البنية والبنية حبتو...
- حباهو برص... انتو مشيتو تشتغلوا ولا تحبوا.. بعدين انت مالك ما حبيت؟؟
- انا قلبي ميت ماهو قلب حب..
- (رجعت تضحك تاني)... هسا انت فهمك شنو
- نمشي نخطب ليهو وبعداك هو يموت موته مع اهل البت.. ياكل نارو
- طارق يا ولييييدي نخطبلوا بي شنو؟؟ باللقيمات الانت شايفها دي ولا بي صفايح الفسيخ اللا جوة ديلك؟؟
- ياخي البت ما قالت هي ما عايزة اكتر من الفاتحة؟؟؟
- في ذمتك يا ولدي الكلام دة كدي بيبقى؟؟؟ يا ولدي انا لابسالي تموت تخلي في كرعيني... شبشب زي النسوان ما عندي وتيابي كلها مهرودة ومقدقدة؟؟؟
- بنستلفلك الشبشب والتوب كمان...
- يا وليدي ما دايرة ولدي يتعلقلوا في حبالا دايبي
- كدي قولي بسم الله والله بيسهلها
- يا ولدي الله عرفوهو بالعقل ما شافوا
- انت كدي قولي خير وانا متاكد الله بيسهلها
- صمتت للحظة وبدا الظلام يتسرب الينا... انا يا ولدي هينة الكلام عمك عبد الله ان قدرت تقنعوا عديلة عليك وعلي صاحبك..
خليت خالتي سكينة تملا في جرادلها باللقيمات عشان تحصل تبيعها... ومشيت على الديوان لقيت عم عبد الله فاتح راديهو على اذاعة لندن وخاتي الرادي في صدرو زي كورة الشراب...
(10)
عم عبد الله شايفك ليك يومين ما مشيت الشغل وما سافرت
- يا ولدي منتظر لي قط بضاعة اسوقه لي بورتسودان ولي هسا ما ملوهو
- احسن ترتاح شوية
- انت ناس اذاعة لندن دي حقو يدوك وسام ياخي انا من قمت وانت تسمع ليهم
- يت ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة.
- ايوة بكرة ان شاء الله بمشي عليه الداخلية ازوره
- دحين انت فهمك شنو في الشئ البيقول فيه دة
- انت كدي باركها والله بسهلها... بس انت قول خير
- يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
- يا عمي هم موافقين كدة وحا يدبروا امورهم وبعداك انت عداك العيب
- يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
- يا حاج والله الله بيصلحها بس انت قول خير
- ياخي الولد دة من يومه وهو صغير عامل زي لوح التلج مجننا...
- يا حاج لوح التلج هسا عايز يعرس لو خليناهو كدة بيدوب
- ضاحكا بشدة.. الله يرضى عليك يا ولدي تقنعوا يخلي الموضوع دة وكمان ان بقى ما خلاهو امرنا لله...
- بس كدي انت قول خير وكله حا يتصلح..
- ربك كريم يا ولدي
اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البئر..
- أها خير إن شاء الله..
- كدي هسا فطرني بعداك نشوف الحاصل..
- ياخي انت غتاتك دي أصلك ما بتخليها..
جابت ليها غتاتة كمان.. طيب يا زول موت موتك انا ماشي...
- يا طارق روق عليك الله ياخي انا في شنو وانت في شنو
- انت الجكس موش حا يجي هسا
- ايوة
- خلاص انا لمن يجي الجكس حا اقول ليك الحاصل
- ياخي الجكس حا تجي معاها خالتها عشان تعرف الحاصل
- خلاص لمن تجي...
(11)
أها ونحن قاعدين في الكلية فجأة تطل علينا البت وخالتها وأختها كمان... جملة الإيمان خالتها اشد منهم كلهم... زولة منعمة ورايقة كدة... تقول رز بي لبن... انا في الأول قايلها ما متزوجة اتاريها فايتة الاربعين وعندها 3 أطفال كمان...
- سلام يا شباب
- عوض قام يتراشق: اهلا بالناس الحلوة... دة صحبي طارق.. ودي خالة الشباب حنان...
(ابو الزفت يا عوض الناس ديل شكلهم حا يطيروا حنانك زاتو)...
- اها فطرتو يا شباب
- والله انا فطرتة بس طارق دة لسة ما فطر
- انت عوض خلصت محاضرات ولا لسة
- خلصتة
(يمين زولكم كان عنده امتحان ملاحق كان قال كملت)
- خلاص نمشي نفطر كلنا مع بعض في اراك اوتيل
- انا دنقرت علي عوض في اضانه: ياخي شغلنا في البنا دة كله لو جمعناهو ما بفطرنا في اراك اوتيل دة اتخارج يا ولدنا انا عندي جنيهين بس حق الرجعة
- انت قاعد تقول لي صاحبك شنو
- لا ابدا
- ياخي انا عازماكم الليلة وعايزة اتعرف عليك انت بالذات كويس ممكن...
- يا ستي انا ما عندي مانع بس ليه انا بالذات يعني
- عشان انت وقفت مع الشباب ديل وقفة سمحة وبعدين انا عايزة اعرف عملت شنو مع اهل عوض عشان نفرح بيهم
- يا زولة انت مالك مكبرة القصة كدة انا حاولت اساعد صاحبي وبس رغم انه الموقف صعب جدا
- انا عارفة وحاسة كدة
..... ومشينا اراك اوتيل....
(12)
مشينا الاراك هوتيل..
- اها يا شباب تفطروا شنو انا بقترح ناخد سمك فرايد...
- شوف يا عوض قول لي الزولة دي تشوف لينا فول زيتو كتير عشان نتمسح بعد ما نكمل.. فرايد شنو
وهي زاتها فرايد دي تطلع شنو انا السمك البعرفو القرقور وكان بالغتة البلطي... انا عايز اغمس
- كدي روق يا طارق عليك الله وخلي جنك دة الزولة دي عازماك وعايزة تعرف ناس أبوي قالوا شنو
- انتو بتقولوا في شنو..
- لا مافي حاجة
ضربنا الأسماك والسلطات...
- يا شباب شاي ما بطال
- يا طارق كدي تعال اقعد جنبي
- اوكي
- اها الحصل شنو
- والله الناس ديل انا اقنعتهم بعد صعوبة لكن لي هسا
هم ما مقتنعين وشايفين القصة ما بتجي يمشوا يد قدام ويد وراء
- يعني ما حا يجوا
- لا ما كدة بس بصراحة كدة ما مقتنعين انه يمشوا مع ولد لسة بيقرأ
وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
- انت ما شرحت ليهم
- اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
وشايفين إنهم حا يجوكم عشان خاطر ولدهم .. يعني ما برضاهم
- ممكن انا امشي اقابلهم
- بيعتمد على الشئ العايزة تقوليهو ليهم
- انا بس عايزة اشرح ليهم انه نحن النسوان بس العارفين الأمور حا تمشي كيف...
لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
- والله أشوفهم وأرد عليك... بس حاولي إنك تفهمي نفسيتهم..
يعني لو حسوا انك بتجرحيهم حا تبوظي القصة كلها...
- هو ولد عمها دة ما حاسس إنه البت ما عايزاهو..
- حاسس بس هو مُصر
- ياخي الموضوع دة عجيب من أوله
- قالوا لي إنك معترض
- أنا ما معترض ولا حاجة ولا عندي الحق دة... بس أنا بعرف أهل عوض كويس..
ناس طيبين وفي حالهم.. ومنتظرين عوض دة ينتهي بتين عشان يساعدهم مع أخوانه
- كل شئ حا يتسهل..
الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
ومرة مرة يخت يدو في خدو تقول عايزين يصوروهو في جنة الأطفال
وأخت الجكس تراقب فينا أنا وخالتها زي رئيس العمال
- انت ما شايفة إنه الموضوع غريب
- غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
- عوض زول كويس شديد
- انا عارفة كدة كويس... عشان كدة نحن عايزين نشتري راجل... عندك اعتراض
- ابدا ابدا
- انت ما عندك مشروع زواج كمان
أها بدينا في الكلام الأعوج... كان كدي نقوم نمشي...
- لسة بدري.... المشوار طويل
- يعني ما عندك جكس
يا النبي نوح... بدينا في جرجير الكلام والبحيت
- لا على باب الله
- يعني مافي واحدة عاجباك
- حتى لو في حا يكون الموضوع سراب ساكت
- ياخي إنت ليه متشائم كدة
- ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
- حتى لو في ناس انت عاجبهم شديد
أهاااااااااااااااااااااااااااااااااااااااا
يا سيدي الحسن.....
(13)
يوم بالمساء اسمع صوت الحاج من الشارع مع العصرية بيكورك:
- يا طارق في جماعة عايزنك
ألقى ليك خالة البنية ومعاها واحدة تانية وعربية تقول يا ليل والله جنسها شنو ما عارف...
والله يستر الجلكيم خلى قراية الجريدة وبقى يشوف فينا
- سلام يا طارق
- وعليكم السلام
- ياخي نحن قلنا نسأل منك في الأول عشان إنت تدخلنا لي أهل عوض ودي اختي محاسن
- ما في مشكلة انتظروني دقيقة
دخلت لقيت خالة سكينة تعوس في اللقيمات ومقنطرة سفتها زي ترلة القندران
- يا خالة خليك من العواسة دي نسايب عوض جوا يشوفك
- النبي فوقك يا ولدي
- أيوة قومي شوفيهم
دخلت خالات البنية عند أم عوض ومشيت اقعد مع أخوانه
لأنه الجلكيم دة برة حا يبدأ يزرزر فيني برة عشان كدة اخير يزرزنا مع العشاء
وأصلو العشاء ياهو الفول دة مع زرزرة الجلكيم بيبقى تركين
......
شوية اسمع ليك يا طارق يا طارق
جيت جاري لقيت النسوان خلاص مارقين من جوة ويتبسمن
وأم عوض وأبوه مودعنهم لي برة.... شكلو كدة عوض خلاص اتورط
- أها يا جماعة فتناكم بي عافية ومن هنا اسبوعين تشرفونا وأنا قبليها بي كم يوم بجيكم براي
أبو الزفت الكلام دخل الحوش
- شوف يا طارق الناس ديل حا يجوا يتقدموا رسمي وانت لازم تكون معاهم
يا النبي نوح... وأنا في شنو
- ياخي إنت صاحب العريس ووجودك مهم جدا
- ام عوض: هو لو ما مشى أنا ذاتي ما بمشي ياهو ولدي التاني
- يا حاجة تاني شنو قولي ولدك العشرين
وكلهم ضحكوا لي قعر اضنيهم والنسوان ركبن عربيتن ومشن
وأنا مشيت لي زرزير أبوي
... خلاص بقينا على المشي ليهم بعد أسبوعين
(14)
أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان البلتون أليل عوض دة
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصي... والبيت مليان رجال غلاد غلاد
يمين حسين الجسمي بالنسبة ليهم ناعومي كامبل
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..
(15)
واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إن شاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليي الخاتنها في كوريي
لبسوا دبلم
وفجأة دخلت غنايتا غليييدي قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليلي
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
الولد عيونه محمري وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...
(16)
واصلنا سكسكتنا وسط النسوان القاهرات ديل..
.. حاجة سكينة جات مسكت ولدها وقلدتو وبكت بي حرقة شديدة خلاص
والله تقول عوض مات....
انا سبيت لي عوض ولي قلبو ولي العمارات وللفقر
... خالة البنية غمزت لي عشان انقذ الموقف
جيت مسكت حاجة سكينة من يدينها وجبتها لي وسط الجكس البيرقص
وقعدت ارقص معاها وقلتلا: انبسطي في خطوبة ولدك عشان اجيبلك سفة من أبان كروش ديل
والله قعدت ترقص وتضحك بي دموعها وطبعا الناس كلها مستغربة انا قلتلا شنو
خالة العروس جاتني: النبي فوقك نسيبتنا دي قلتلا شنو
- ياخي مالك مخصماني بالنبي الشي القلتو ليها آبيتقال.. انت موش كنت عايزها تنبسط اها انا خليتا ليكم تحتو قرض
- (ضاحكة) انت باين عليك داهية... أها مافي واحدة من الشباب ديل ملت عينك
- انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
وشيت عوض دة ان بقيت سويتو ابوي بيقطع راسي... هو جيتي معى عوض دي عندو فيها كلام
- بس نسوي شنو جيتو خليتو بناتنا يهضربن
يا ود الكرسني تحلني الليلة دي من الزرزير دة
انا كان عارف القصي حا تصل لي كدي كان شفتلي بناي جالوص واشتغلت معاهو
- شايفة الزولة اللابسة احمر ديك... شايفها متابعاك كيف
يا سيدي الحسن... اقولك حاجة... تعالي نرقص انا ما مني فايدي
- يلا... بس ما بنخليك
عوض يوزع في البسمات وغاتس في بدلتو زي قلم البيگ
مشيت قعدتة بينه وبين العروسة
- والله بي طريقتي دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك
- انت الزول الهناك دة ياهو الاخد الشاكوش...
- ايوة هو زي اخوي
- اتاريهو يلوغد في الخبايز كدي بي حرقة....
- انا غايتو من قبيل اعاين للباب كويس قلت كان قامت شكلي اقوم فاكي البيرك
ناسكم الغلاد دي ما بقدر عليهم وصحبي عليه العوض ومنه العوض ان بقى هبدوهو
- ياخي مافي زول حا يسألكم خلاص القصة اتحسمت
- انا خايف من خالتك دي تجيبلي دقة الليلة كلما ازوق تجي تجرني وسط البنات واعمامك ديل يحمرولي
- ضاحكة يا زول ما في زول شغال بيك
- كدة كويس
عوض ضحك ضحكة خبيسي كدي
- انت والله ما قعد تشوف
يا ود الكرسني تحصلني....
نقوم نهجج
(17)
بناتن السمحات ديل شغالات رقيص... ورجالن أبين كروش ديل جابلوم شيتن مقرطس كدي باقيلي كوكتيل شغالين يلوغدوا فيه
انا شفت ام اعوض دفرتو من يدها في الطربيزة وقلت لي عوض كدي خلني اللشوف امك دي واجيك صادي
- انت مالك دفرتي الشي دة
- يا ولدي ما فهمت فيهو شي
- انا عارفك في الزيفي دي دايرالك حرف أليل قراصي ومعاهو بصلتا خدرا تمسكيها زي المايك وتقعدي تلوغدي
- (ضاحكة) اي والله يا ولدي... الناس ديل شيتن كلو كُتُر
- انت مالك عليهم اسكتي اكلي البتعرفي والباقي ضوقيهو بس
- يا ولدي قلبي ماكلني علي ولدي ما بيقدر على الناس ديل... باين عليهم نسوانم قدرات ورجالن قاعدين طراطير
- هو وكر نفسي عندهم ... بعدين ما تخافي البنيي قاعدة تريدو شديد وباقية عليه عشرة
- أيي والله يا ولدي... باين عليها قاعدة تريدو ،سميحي صديرا زي الوزين
- انت قايلاهو متل أليلك علي المعلاق كدي
- ( ضاحكة) لامن دموعها جرن.... شكيتك علي الله يا ولدي والله الا امسكك ابوسك في جضومك ديل
- يلا سمح اكلي عشان الناس ديل عينهم عليك
... شويي كدي الفنانة الاسمها حواء قطر ولا شنو دي بدت تلعلع تاني والدنيا فارت من جديد
وقبل ما خالة البنية تصلني سوقت ام عوض وقعدت ارقص معاها وجن بناتم زي البلوم حاوطونا وهاك يا كشف
وام فستان احمر المري دي جات قاصداني عديل
قامت ام عوض قالتلي: انت يا طارق يا ولدي البنات ديل من قبيل انا شايفاهن وخالتن يحاحين فيك باقيلي دارنك لي واحدة فيهن
دحين يا ولدي ما تغتس انت ذاتك عشان الاتنين بتقدروا عليهن
- دايرة توكريني انا كمان ... والله جبيرين ان بقا سمعك علي يرصصك
- (ضاحكة) أييي ابوك صعب شديد
خالة البنية فكتني من ام عوض ومسكتني ترقص معاي
- الليلة ما عندك طريقة تزوق لازم تحسم حاجاتك
يا سيدي الحسن تنجدني
(18)
ونحن بنرقص مع غناء الخرابة الاسمها حواء دي قربت مني خالة العروس....
- أها يا طارق كيف الخطوبة بالله ماها سمحي..
- والله ما قصرتوا تب... واحسن شي خليتو الامور مغتغتة كدي
فشان اهل عوض ديل انت باقي عارفاهم ناس عندهم عزة نفس وكدي..
- يا زول عوض دربوا مرق وخلاص بقى ولدنا ومننا وفينا..
دة الكلام أماني ما وقع راجل..
- لكن لسة الدرب ماهو طويل..
- يا زول الأيام بتمشي زي البرق
- أيي ما قلنا شي بس لامن يشتغل ويكوِّن نفسه القصي دايرالا صبرا كتير
- ياخي مالك جنك حسيب كدي
- نان مو ياهو كدي ولا انتو كمان دايرين تعرسولوا..
- يا زول هوي نحن بنعرف كيفن نسويلُن شيتُن...
- أها إنت كيفن قصتك
... يا ود الكرسني.. بدينا..
- أنا لاني عندي قصي ولاني بتاع قصص.. أنا يا دوب أشوفلي كفاي أليل جداد
ولا مراح أليل غنم وأقعد أربرب جنبو... العرس والحب ديل ماني قادر عليهن..
- ياخي نحن عديل كدة عايزنك لي سحر بتنا.. وهي عينها عليك وانت باين عليك ود ناس...
... يا الوراريق يحلني الليلي..
- اقولك حاجة راجلك العامل زي فنطاز الجاز داك قاعد يشوف فينا
وإن بقا اللبع قام ماني قادر عليهو... دحين خليني اللمشي ارقص مع خالتي سكينة دي
- (ضاحكة) يا زول راجلي شباب وروحو شباب ما تقعد تزوق..
- انتو مالكم شيتكم كله كتور كدي
- (تضحك لامن دمعت) ياخي لا شيتنا كتور لا شيتين بس نحن بناتنا مربنهن على الصراحي
ونحن حسينا انها مايللاك وقلنا انت صاحب عوض وهو يشكر فيك وخالتك سكينة تشكر فيك
قلنا خلاص زيادة الخير خيرين... يا سحر تعالي جنبنا هنا..
... يا سيدي الحسن تنجدني..
البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
- سلام يا دكتور...
يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..
أهلا.. دكتور شنو ياخي نحن يا دوب في الأرانب... كيف...
- والله تمام.. عقبالك إن شاء الله
- وعقبالك كمان... أنا لسة بعيد
- مافي حاجة بعيدة
يا ربي أنا هسا أقبل وين... يمين الغنا في حِتي وانا رقصي في حِتي.. اشتر كله كله..
- اجازتك طويلة...
- والله زي تلاتة شهور كدة..
- وحا تقضيها كيف..
- والله حا اشوف البناي وبرنامجه كيف..
- تاني حا ترجع للبنا...
أها قمنا لي حركات الحناكيش...
(19)
والله يا بت الناس أنا ماني عندي شيتا أسويهو غير البنا..
- ياخي انت راجل دكتور بُنا شنو العليك..
- ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
- عجيبة.. المهم عايزين نشوفك في الاجازة دي
- إن شاء الله بنتقابل...
- خالتي سكينة: هيا طارق انت بي هني وانا افتش فيك
حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
- بعد إذنك بس أشوف الخالة عايزة شنو
... يمين البنية لوّت بوزها شبرين وكان في طريقي كانت رصصت أم عوض دي
- انت يا ابن الهرمة انا خرماني وانت اتاريك غاتس هني بين البنوت...
وتتلوى وتترقص علي الدابي..
- بنوت شنو وحاتك جيتي مرقتيني من خازوقا الله لا يوريك ليه..
- الرسول آآولدي ما تغتس مع أخوك دة.. والبنيي حلاتا..
- هسا إنت في السفي ولا في الغتسي عاملة شلاليفك زي غِتيات الكوريي كدي
- (ضاحكة).. بري بري يا ولدي شوفلي سفي
- ليه حق عم عبد الله يعرس فوقك انت مسوياها صعوط وهجيج
- إي عمك مطرطش وحا يقعد يربي في البُطان لامن يموت..
دحين شوفلي سفي وخلي كلامك المسيخ دة...
- مسيخ شنو.. بقيتي تكشفي كمان..
انطلقتي علي كُبرِك.. انت دحين قبُل دة أُمِك ما سِكرَت..
- أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
ومعاها كم قزازيي ألت بيرة الجمل...
جن هي وعمتي ستنور قدرها كدي وقالن يضوقن الشي دة.. وكبايي وراء كبايي
لامن طشمن ورقدن خَل وانبطحن في الرملة..
قامت عمتي سألتها: انت يا الزهرة نحن وين
قامت ردت عليها: إنت نحن وين ولا نحن ذاتنا مِنِنْ (من نحن)
واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
- (ميتة من الضحك) الله يرحمن.. كدي قوم شوفلي سفي أنا خلاص اتكهربت
شفتلي سفي وغمتها بيها ومشيت اهجج مع عوض
وفجأة قام أبو عوض قال: يا جماعة كتر خيركم وربنا يجمعنا في ساعة خير
- شرفتو كتير والله
- جات خالة العروس: يا جماعة ما بدري
- لا والله نمشي والليلة نحن ذاتو ساهرنا
- شرفتونا والله.. حبابكم عشرة
ونحن طالعين علي عرباتنا جرتني خالة المرة من يدي:
- انت وعوض ما تقعدوا
- عوض كان داير يقعد أليقعد علي أنا أبوي بيكون هسا شايلوا
كلاشنكوف ومنتظرني.. دحين هو إن بقا داير يقعد خليهو
... عوض حمر لي واعتذرلهم..
- خلاص انت وعوض تجو تفطروا معانا يوم الجمعة الجايي
- إن شاء الله
بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...
(20)
رجعنا لي بيوتنا وخيلان عوض واعمامو كل زول مشى علي بيتو...
- عوض: اسمع اقلع هدومك وتعالي نتونس برة..
- كويس كدي نشوف الجو كيفن لا جوة وبطلعلك..
دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
- أها مشيتو لي خطوبة الجن دي..
- أيوة.. (ماني قادر ازيد كلمي تاني يقوم يهيج فوقي لا ايدي لا كراعي.. عوض يخطب وانا اتزرزر)
- والله مسخرة وشغل نسوان وكلام فارغ وعمك عبد الله ذاته مطرطش
-......
دخلتلي في سروال وعراقي ومرقت علي عوض..
وقعدنا في الحجرين القدام البيوت... ياهم مكانا المفضل من زمن بعيد..
- هسا اليشوفك هسا ما يشوفك قبيل..
- ليه...
- قبيل مهندم وعندك قيمي شوف هسا بي بنطلونك المقطع دة لاهو لامي ردا ولاهو بنطلون
وفنيلة الحمالات المقدقدة علي سلك كفاي الجداد كدي...
- (يضحك) ياخي هسا نحن في شنو وانت في شنو..
- شنو تاني كمان خطوبة وخطبت وورطني سبعين ورطي... شنو تاني...
- هسا الجمعة الجاية كيف؟
- لا جمعة ولا خميس تموت موتك يا ابو الشباب... انا عايز اشوف البنا عشان نبدأ ندور تاني
- أها وبعداك..
- بعداك امشي اشوف قرايتي كمان..
- انت ما عايز تقعد مع سحر لي؟؟
- أها يا مرسال الشوق... شوف يا عوض انت عارف رايي كويس في الحتة دي..
انا لاني فاضي لي حب ولاني قادر علي خطوبة والأيام دي اسمع نصيحتي
إن بقيت لاقيت عمك جبيرين لا تكتر معاهو الكلام شي..
- ياخي والله البت حلوة وشكلها بتريدك والناس ديل ناس كويسين...
- (غلبني أقوله سمحة لامن تخلي الزول يتقلَّم حتت حتت).. ما قلنا شي.. انت الناس
ديل العاجبهم فينا شنو... لانا زينين متل الناس ولا اهلنا منغنغين... شي يحير..
- ياخي يضع سره في أضعف خلقه..
- إيي سر شنو إنت باقيلي بوم... هسا نحن سرنا شنو؟؟ اماتنا مقابلات الصيجان
ليلِن ونهارِن... وابهاتنا يعافروا من تصبح لامن تشرق وياهو قدح القراصي
وصحن الفول ولامن يقدحولنا بيض زي العندنا كرامي... نقرب نزغرد.. تقولي سِر...
- ياخي بي حالتنا البنيات عايزاتننا وراقدات خل... انت بس باركها وبتتعدل..
- عوض... انت باقيلي جنيت... انا جنس شيتك دا آآبسوي... يمين جبيرين علي
يطردني من البيت وانت بيتكم مافيهو محل لي إبري... وقتين داك أقبل وين انا...
- ياخي هي قالت بس نفسها تقعد معاك وتتونس معاك... لاها دايري خطوبي
لا شيتين.. وهي عارفاك سنيح وراسك دمق... دحين ياخي اجبر بي خاطرها بس
- انتو باقيلي حددتولي اعرسها متين... اتاريهو ضحكك القبيل عندو معني
وانا اقول عوض مالو يتبسم لا قعر اضانو...
- والله الكلام دة من زمان بس انت عامل اضان الحامل طرشة...
- عوض اقولك شي قوم نوم واحلم زي ماك عايز... انا خلني ماني وش نعمي..
وانت اصبر ساكت علي الراجيك...
(21)
أصبحت يا الحبيبين ومشيت قفرت البناي ولقيتو شغال في أركويت..
ظبطنا أمورنا وبدينا الهركي من جديد....
يوم الخميس بالمساء جاني عوض ومشينا نظبط بوشنا مع بُطان الحلة..
ضربنا زين لامن إتنْبَلنا وبقينا ندشى وجينا لي حجارنا قدام البيت..
- هسا بكرة كيف..
- يا اخوي هوي انا الاسبوع كله شغال سهرات وعضامي قايمات علي
دحين تمشي براك وتشوف نسابتك ديل... الله يسهلَك..
- يا طارق انت عارفني ما بقدر امشي براي ياخي كدي عليك الله باركها..
- مالك... مطهَر... ولا فوقك الوِرْدي (الحمى)...
- ياخي بس امشي معاي بكرة وانت معزوم وتاني ما تمشي...
-هسا يا عوض البت دي حا تعرسها متين...
- ما عارف لكن ما اكتر من خمسة ستة سنوات..
- هاالله هالله... باقيلي ابوك ود الجبل وماني عارف
- ياخي انت عارف بكرة حا يحصل شنو...
- ماني عارف بس عارف الله ما شافوا بس عرفوا بالعقل...
اقولك شي قوم نوم والله يعدلك خطوتك..
- بكرة بصحيك فجر...
مشيت علي عنقريبي لقيت ملايتو تهبهب وحاتكم صليت العشاء بس
وانبطحت عضامي يطقطقن وكلي مملخ..
.................
فجُر عوض جاني ناطي وشايل كبابي الشوب بي لبنا مقنَنْ ومعاهو اللقيمات
- بدينا في الرشاوي
- ياخي كدي قوم استحمى وباركها
ضربنا شاينا وقعدنا نتونس شويي وبيني وبينكم حنني عوض شديد..
شكله كدي ماهو قادر يمشي براهو ومهضلم تقول ماسكو الهيم (مرض يصيب الدجاج)
.. اتهندمنا وسرقنالنا ريحي من عمكم جبيرين ومشينا...
وصلنا جنب الباب وعوض قلبو يضرب تل تل تل وعرقو يخر
- انت مالك ضارب الجرسي من هسي
- يا طارق عليك الله روق وجوة لا تهضرب شي
ضربنا الجرس... ترن ترن ترن ترن
جا السواق فتحلنا الباب...
اتفضلوا اتفضلوا... دخلنا..
لقينالكم ابو البنيي قاعدلو في كرسي مهيل كدي في السِعْدي (النجيلة)
لابسلو ردا وفنيلة حمالات وكرشوا ناصلي من الفنيلة
ومدلدلة فوق الردا زي البخسة...وقاعد يقرالو في جريدي...
والخرابة تقول مزرّعلوا فتريتة في صدرو وتحت يدينو...
الشعر قايم احمر احمر في الصدر وتحت يدينو تقول قاعد يحننوا...
اخدنالنا قعدتاً جنبوا وهو يسأل في عوض وعوض مدنقر كأنه في امتحان شفوي...
جات أم البنيي... صلاتي علي محمد.. المساير يلمعِن والشبشِب تستخسر عليه
المشي في التراب... مرتاً سمحي ومهندمة... ماها طبوج...
- اهلا يا شباب اتفضلوا تعالوا لي جوة..
عوض لكزني: ياخي اتنحنح ولا صفق قبل ما تخش
- اييي نخنيح شنو اصلي داخلي مستراح... بعدين المرة قالت اتفضلوا
دخلنا علي صالة كدي ريحة البخور فيها تقول يا ليل
البت الشغالة شايلالها بطانيي تشهيك البرد
- معليش يا شباب حبوبتكم كانت راقدة هنا وقالت عندها حمى
... اريتها حمتي كان دي بطانية حبوبتنا... تعالي شوفي بطاطين ناس عوض
إن غتت رجليك ما تغتي راسك تقول ضاربها شيطان وريحة الكركار تدقشك
من خشم الباب...
... وفجأة تظهر جكسوية عوض... قادر الله.. الشعر فايت نص الضهر
... سلمت علينا بي يدين يمين زي حلاوة قطن مرطبة وناعمة...
- كيف يا شباب... اهلا يا دكتور...
- والله تمام والحمد لله
- ماما نسيتي البريل كريم حقك والأتريكس
البريل كريم عرفناهو.... علي الأتريكس دة يطرشنا....
- هي امك بتستعمل بريل كريم....
- أيوة عشان ما تجيها قشرة...
- قادر الله.... جملة الإيمان خالتي سكينة إن بقوا حكولها راسها بي منجل
القشرة تملالها كوريي...
... من العيد للعيد تقعدلها يومين في سوات الكركار
وترسل لي حسنة بت خليل عشان تمشطها... والخرابة غيليدي
تختلا تلات مخدات وتقعد فيهن وتهجر خالتي سكينة تحتها وكوريي فيها كركار
وقشر ليمون في الطربيزة وكوز الموية الكبير داك موهط
وبي سلك كدي تبعبص في راس ام عوض من تصبح لا عند المغرب
وما تخليلا مرة ما تقطع فوقها حتاً تكمل... وخالتي سكينة تسمع فيها وتقولها:
قبيل أنا أم النصر لامن مشيت عزيتها في أمها وأبت تشيل معاي الفاتحي قالت ما جيتها
في ود عمتها... أها هسا تكيل الرماد فوق راسها مافي زول بيجيها...
- لكن هي ماها طالباكي خمسين قرش في طهور مصطفى...
- برسِلن ليها مع فخرتاج... إييييي خوتها تطير...
ولامن ينتهن من مشاطن وقطيعتن.. وتشوف خالتي سكينة لافة المساير تحت أضانا
تحلف تقول سماعة كمبيوتر وشغالها بيها شات في الهوت ميل...
... سبحان الله شي شغال بريل كريم وشي كركار والدنيا كدي ماشي وكدي ماشي
وعوض يقولي يضع سره في أضعف خلقه... الأم بي بريل كريمها ويقولي سره...
... إيييي سر شنو...
... وفجأة تظهر سحر.... واااااااااااااااااااااضيقي أنا..
(22)
يمين يا الحبيبين البت سمحة سماحتا تخلي الزول بي ريالتو يلغلغ...
حاجبين زي البسطونة لامن يتنوها... العيون... نان هن عيون نصاح...
الجفون ليهن تنيي كدي ونعسانة موش زي ألاتي مدلدلات علي لِبدة الحمار كدي أكرمكم الله..
الرموش بالله زي جريد التَمْرة لامن تبقى رويانة... هسا دي رموش وألات عوض المتل شرا القندول ديل رموش؟؟
الشفايف مبسَمِن يمين تقيسو بالمل... وين لي شفايف خالتي سكينة زي الطُباقة من سف التُنباك..
ولا شلاليف عوض علي البزِديق (الدُلقان البيمسحوبوا الصاج)...
البنيي النخرة تقول شاحداها.. والفتحات ألاتها يمين البينسة يا دوب تدخل فيهن...
شفت فيها وفي نخرين عوض والصوف مارق منهن علي حفرة الدخان وعيدان الطلح مارقات منها...
استغفرتك يا مالك روحي... البت دي العاجبها في الزول دة شنو...
الرقبة تحلف يمين تقول مواسنها زي الحيطة لامن تتبيض....
يمين عِرقا ظاهر فيها مافي... موش زي ألت عوض عروقها ناطات تقول ضاربنه بي مقشاشة..
الصدير قدامها زي الوزين... والخصر يمين قرب يكون مافي كله كله...
أنا لامن وصلت لي رجلينا تحت... ريقي نشف وشلاليفي انشققن زي شقيق البرد داك...
وبقيت أبلع في ريقي... وارطب في شلاليفي بي لساني....
يمين اصابع رجلينها تقول مواسنهن بي قرقارة الأسود ديك...
وعاملالها هلال أبيض بالمنكير في راس ضفرينها بس هلال رمضان... إن شفتو في ضُلمي تقوم تصوم طوالي...
شايلالها صينيي ألت قزاز وفيها كبايتين ألات عصير منقة... يمين الكبابي مبعجات من هِني وهِني
وعاملات زي جنيفير لوبيز في حفل الأوسكار....
أما إن كان للأصابع الشايلة الصينيي... يمين منفخات زي القرقوش لامن يَخَمّر قبل ما يدخلوهو الفُرُن....
يمين أصابعينا دي إن قمعوها بي حِنيي تحلف تقول أم راس (البلح لامن يبدأ ينجض من راسو)...
- سلام يا شباب...
- اتفضل يا دكتور...
الدكترة تطير إن شاء الله...
... أنا هسا أبكي..
... ولا أكورك...
... ولا أعوعي رسمي...
وااااااااااا ضيقي.... وااااااااااا ضيقي.... وااااااااااا ضيقي....
يا سيدي الحسن تنجدني....
(23)
سحر قدمتلنا المنقي.. وسلمت علينا في يدينا...
جملة الايمان أنا لامن دقشت ايدي ايدها زي الضربني ماس...
عوض وبنيتو ابتسمولم ابتسامتا خبيثي كدي... والبنيي جات اتوهططلها في كرسي جنبي...
يمين زي الأبكم... الربريب كله طارلي في راسي.... وجسمي سخن وبقيت كلي ماشي مويي..
شويتين جات الام ومعاها الحبُوبَة... يمين الحبُوبَة باست عوض في جضومه العلي السعِن الناشف داك...
- كيفنكم يا الحبيبين..
- الحمد لله بخير...
- ناس امك كيفنهن يا عوض
- الحمد لله يا حاجة كويسين ما عندهم عوجة
- مالك ما جبتهم معاك
- والله مشغولين شويي... ايي مشغولين شنو... البلتون داك الداير يشيلو يجيبو شنو...
جكس عوض لابسالها فستاناً بصلي كدي فيهو خطوط حمراء خفيفة كدي
والشعر يلمع لاماهو لي وراء بي شيتا احمر كدي فيهو ورود... اذا كانت الام بتستعمل بريل كريم...
لازم البنيات بيستعملن شيتاً عمرنا ما سمعناهو...
الاضافرين راسن اخضر والباقي احمر علي البتيخي لامن يشقوها لي اتنين...
بيني وبينكم انا بقيت قاعد زي المعْسَم وعندي قطيعي لاني قادر اتلفت اشوف في سحر
ولاني قادر اشوف في عوض وبنيتو... يمين العوارة الفي الدنيا كلها جاتني في الوكت داك..
عاينت للصالة القدامنا ملياني زهريات وشِدَرا غريب غريب.. وواحدا ماشي مع الحيوط..
أنا من ولدوني غير النيم وصباح الخير والتَمُر والبرسيم آآبعرفلي شِدَر تاني...
دنقرت سرقتلي شوفي في رجلين سحر...
صلاتي علي محمد بالله جرحايي بالغلط ماها في والسفنجة حقتهم ذاتها مختلفي
يمين عاملي زي حلاوة لَكُوم...
-عوض بي خباثي: طارق انت نسيت لسانك في الامتداد ولا شنو...
- عوض اخطاني انا ان بقيت انفتحت تاني آآبسكت..
-سحر: أُخد راحتك يا دكتور....
- ياخي انت مالك شابكاني دكتور دكتور... نحن يا دوب في الأرانب...
- شنو يا دكتور التواضع دة كله...
- ابدا...
اتشجعت ولفيت واختلي شوفي في وجيها زي القمر في عز الصيف...
يمين عيوني قربن يقعاً في حجري من شدة البنيي دي...
خصلة من شعرها نازلة بين عيونها يمين زي الصبيطي مختوتة في مرتبة ألت قطن منجدي جديدي
وأصلو إن كان لي قلبي يمين قرب يمرق عندها عديل...
الله لا تكسبك يا عوض... انا ماني قادر على الجهجهة دي.... شكيتك علي الله..
- بديت برنامجك يا دكتور..
- والله الحمد لله شغالين في أركويت الأيام دي
- لكن غايتو ناس عجيبين خلاص... طلبة جامعيين وشغالين طُلب...
- ما تخافي ما قاعدين ناكل الناس...
البت دي ضحكت لامن دموعها نزلن... يمين السنون مرصوصات وبُيُض علي غتيات أقلام الشيني..
ولامن ختت يدينها في وشها وصديرها طلع لااافوق... يمين اتشحتفتلي جنس شحتفتا بس زي الغرقان...
اليدين مليانات ومنديات بس تقول لقِيمَات ...
من الله خلقني ما شفتلي كيعان (جمع كوع) ناعمات وملس زي ديل... موش زي ألاتي مسودات ومقشرات
زي البُلطي قبُل ما ينضفوهو...
- بالغتة يا دكترة ما للدرجة دي...
ربكم رب الخير دخلت خالة البنيي ومعاها ويحيدتا مغتغتي من صوف راسها لي كرعينها... أسود في أسود
مافي شيتا فيها ظاهر غير عيونها علي التمساح لامن يكون مطلع عيونه فوق المويي... ومنزلالا قماشاً
أسود كدي من راسها لي عند كتفينا علي الشملي ألت الدخان... يا سيدي الحسن.... إييي دة شنو دة...
خالة البنيي سلمت علينا وقعدت...
- الزولة المغتغتة: معليش يا جماعة أنا لا أُصافح الرجال...
- منو القالك نحن رجال
- يمين الناس ديل بقو يزحوا من الضحك..
- دة كلام شنو يا دكتور
- ياخي نحن بُطان مانا رُجال....
(24)
ماني عارف... بس أنا باقيلي الناس ديل شايفننا أرقوزات...
اتونست معانا خالة البنية ودخلت لا جوة...
انا فشان اتفكى من الزرزير وقعتلي الخرابة المغتغتة دي في جرح...
وبيني وبينكم أنا عايز احاججها لامن الفطور يطلع ونمرق سالمين من هِني...
- هسا إنت شايفة سلامك لينا حرام...
- يعني غير مستحب...
- شوفي أنا ماني الشعراوي... بس أفشوا السلام بينكم...
- دة حديث في غير موضعه...
- إييي موضع شنو... سلام عليكم وحق الله بق الله دايرة تدخلك جهنم..
- ياخي انت بتبسط الأشياء بشكل غريب ومن غير أسانيد...
- ياخي ما تقعدي تحوقصي شي... وتمرقيلنا في الكلام الغلاد دة..
دحين سلامك علينا لاهو داير يغنينا ولاهو بيدخلك مع أبو لهب...
- شوف الجمعة الجاية إن شاء الله نخصصها للنقاش دة...
- يا سيدي الحسن هي فيها جمعة جاييي... أخير زرزيرنا...
جملة الإيمان عوض دة فقعلو ضحكة سنيني زي طير السُقدِي لامن صنا أضاني...
- يا طارق ياخي انت ما عندك منطق...
- إييي منطق شنو... يا سحر عليك الله هَوِّينا وعوض صاحبي دة إن بقى جاع شديد
يمين بطنو تقعد تكورك واغ ويغ بس الشافع الماسكلو حنبوكة يبعبص فيها...
دحين أمك دي شايفلي نسوان منفخات كدي دخلن معاها لي جوة لا يبقى حَتَّلَن اللحم الفي الحلة كله...
- (ضاحكة بشدة) يا دكتور ما تخاف إنت بس تأمر وكل العايزو بنعملوا ليك...
إنتو نظامكم كيف في الفطور... يعني سلطة أول وبعداك المين دش...
- المين دش... قادر الله... شوفي يا بت الحلال هِن أصلهن صنفين مافي غيرِن..
إما قراصي وحولينا بصلا أخدر... وتسمعي في القَرَشي: كُرُم كُرُم... قرَش قرَش علي عجلات القطر
لامن السكة تكون ملياني رملة والعجلات يضرُسن فيها...
وكمان إن بقى فول بي زيتو تسمعي في الجلَق جُلُغ جلَق جُلُغ بس متل الدلو لامن يقع في البير....
تقومي تقوليلي المين دش...
والله يا الحبان البت دي ضحكتلها جنس ضحكا يمين دموعها جرن... والله بسألني
الدمعايي تنقط زي عسل خشم القربة لامن يصفوهو... موش زي دموع عوض زي اللبخة
لامن تقطعلك منها وَرَقي...
- خلاص يا دكترة نستعجل الفطور وبعدين نتونس...
- أنا الونسة دي ياها ذاتا الخايف منها...
- كيف...
- لا مافي شي، بس شوفيلنا الفطور دة...
اخدنالنا حنكين مع جكس عوض ونادونا للصُفرة....
عوض جكسيهو ساقو من يده وقدمو وانا خالة البنيي جات مسكتني من يدي:
- إنت البنات ديل كنت بتقولهن في شنو لامن جن يضحكن كدي
- والله ونسة عادية...
دخلنا يا الحبات على الصفرة ... قادر الله... دة الكلام... الطربيزة ملياني...
في الأطراف كدي صحانة صغار كدي علي صفق المنقة فيهن زيتون أسود وشيتا
أبيض ملولو كدي علي عِمَمْ سواقين اللواري قالوا اسمه الجبنة المضفرة... وبيناتن
صحانة فيهن سلطة خضراء وفي الاطراف سُباتة فيهن العيش... وفي النص لحمة
مكبورة وتلاتة سراويس مليانات شيي من الله خلقني ما شفت زيها... لحما مدخلنوا
في عيدات ألات خشب كدي وزانقنه في بعضو بي بصل كدي بس رُكاب قطر كريمة
في الدرجة التالتة وشنط المنقة والبلح بيناتم... صلاتي علي محمد... المهم شي سلطة أسود
وحاجات تاني لي هسا ماني عارفها شنو...
أول ما قعدنا عشان ناكل عوض شال ليهو زيتونة وعاين لي وضحك... خالة البنيي حلفت
إلا تعرف عوض ضحك ليه... قام قالها خلي طارق يحكيلك...
- شكيتك علي الله... أنا عارف نفسي جيت معاك أرقوز... شوفوا يا الحبان
عندي عمة لي اسمها أم الخير كان عندها ولد بيحضر برة لمن جاء جاب معاهو زيتون...
قامت عمتي قالتلو: مُحومد إنت دة شنو المُر دة...
- يمة دة الزيتون أكل أهل الجنة...
- نان بعدين واااحناضلنا...
كأنها ضمنت الجنة خلاص...
(25)
ضربنا يا الحبان الوليمي الزيني دي...
رجعنا تاني للاوضة الكنا قاعدين فيها...
وجابوا الشاي وريحة القرفة والهبهان ما تديك الدرب...
عوض قالهم طارق ما قاعد يشرب شاي... جابولي كبايي ألت عصير منقي..
راس الكبايي فيهو شيتا محَترَب كدي وملون علي الصنفرة... وأنا بشرب في العصير
أختلي منه ضُوقي فيه.. لقيتو سكر... قادر الله... ودة ضرضروهو في زيق الكُبايي دي كيفن ماني عارف..
- خالة البنيي: يا طارق البنات ديل قالن انتو اكلكم مختلف عن حقنا...
- إييي أكل شنو... هو نحن عايشين.... نحن مانا في كله كله.... جملة الإيمان نحن مانا عايشين... النبي فوقك خليني ساكت
- كيف ياخي انا مشيت شفت بيوتكم وعيشتكم والله زي العجب...
- نحمد الله... نحن نقدر نقول شي غير نحمد الله...
الغايزني وفاقع مرارتي عوض قاعد يتونس تحت تحت مع جكسيهو... ومرة مرة تضربو في يدو
الزول الدُمق دة قاعد يقولها في شنو ولا العاجبها فيهو شنو... شئ يعلم به الله...
شويي جات داخلة الخرابة المغتغتي ديك... والله يا الحبان عندها أكل غريب خلاص
تشيل اللُقمي وتدخلها من تحت (الشملي) الدارعاها فوق راسها وتاكل... يمين بس فيل...
- السلام عليكم
- أنا ما برد على النسوان....
النسوَّان ديل انفقعن ضحك...
- ياخي أنا قلت ليك الجمعة الجاية بنتناقش..
- يا زولة هوووي أنا ماني فاضي لي جنس حديثك دة وحاجة واحدة العارفها... الدين يسر وبس..
أم البنيي اتوهططلها في كرسي مطرف بعيد كدي وتشوف فينا... باقيلي عندها فهم
ولا كمان مستغربة في بتها البتحب الطُلبة دة...
شويتين الحريم شربن شاين وبدن ينزرقن لا جوة واحدة وراء التانية...
جكس عوض قامت وقالت لي عوض تعال عايزاك ودخلوا لا جوة...
- خالة البني: عن اذنك يا دكتور عندي قطيعة مع اختي دي... اتونس مع سحر دي بجيكم هسا...
- سمح.... يا ود الكرسني...
البنيي صنقرتلها في كرسي قدامي وما خلتلي طريقي لا أتلفت هني لا هني... وحاتكم بقيت زي البتفرجلي في
كورة تنس عيوني يمشن لي قعر الأوضة من اليمين ويرجعن تاني للشمال ووقتين اقابل عيونها في النص لامن أتنهد..
- شنو يا دكترة إنت حا تسكت كدة كتير..
- ياخي هي ونستي شن طعمها.... أنا كل البعرفه الطوب والأسمنت والرملة وهسا كمان الأرانب والجداد والبقر..
- ممكن أسألك سؤال؟؟؟
- أتفضلي...
- إنت مرتبط...
يا ود حسونة تفكني الليلي...
- طيب خليني اعكس السؤال إنت مرتبطة؟؟؟
- لا... ليه؟؟؟
- يمين أولاد أهلك ديل الكتاحة في خشمهم...
- ليه يعني؟؟؟
- يعني أنت زولة سمحة وفيك كل المواصفات الممكن يتمناها أي راجل وأولاد أهلك ديل ما شاء الله مرتاحين
يعني ما ناقصهم إلا يفاتحوك... و...
- يعني إنت ما مهم عندك أنا أكون عايزة واحد من أولاد أهلي ولا لا....
- لا طبعا دة حقك... بس الله عرفوهو بالعقل..
- ياخي أنا من حقي اختار الزول الانا عايزة اعيش معاهو حياتي ولا شنو
- أكيد .. أكيد...
- بس أنت ما جاوبتني..
- والله أنا ما مرتبط... في حالتنا دي الارتباط صعب جدا...
- ليه يعني إنت فرقك من عوض شنو؟؟؟
- مافي أي فرق.. الظروف ياها نفسها... بس عوض مقامر شوية...
- يعني إنت ما مقتنع بالخطوة العملها ولا شنو...
- شوفي عوض بيحب أختك شديد.. وشايف إنه حياته كلها متوقفة على قصة نجاح حبهم
وهو اتصرف على هذا الأساس... بس أنا شايف الطريق طويل وظروف عوض تختلف تماما
عن ظروفكم هنا... ياخي نحن عندنا حِلِم واحد من ولدونا... نقرأ ونتخرج ونشتغل عشان نشيل أهلنا...
- ما ممكن تعملوا الاتنين مع بعض...
- صعب... صعب شديد...
يمين يا الحبان البت دي عيونها فيها كمية من الحزن تحير عديل...
- يعني انت ما عندك عزيمة عوض
- أنا اختلافي مع عوض... انا بشوف الواقع وببني عليهو حاجاتي..
والله يا الزينين بقيت كلي ماشي موية رغم انه صوت المكيف مالي الدنيا...
والبنيي القدامي دي وحات الله الما يريدها يبقى غبيان... علي العقل
بيقول الريدي دي محكوم عليها بالموت... ماني عايز اتشعلق زي صاحبي...
- دقيقة وبرجع ليك..
البت جات شايلالي منديلا سمح كدي ومطرز: من زمان كان نفسي أديك المنديل... وما تسألني ليه..
والله يا الحبان وقفت علي طولي وشلت المنديل منها وعيوني جن في عيونها...
وحاتكم كنت عايز اكورك باعلى صوت عندي: وووووووب ... وووووووب... ووووووووبين علي...
(26)
حبابكم يا الزينين...
يمين يا الحبان مسكت المنديل دة بين يديني وكضمت الكضمي الياها....
- دكتور مالك ساكت كدة...
- لا أبدا...
وحاتكم الكلام أبى يطلع كله كله بس زي معجون أبو صفقة داك لامن يكمل
وتقعد تعصر فيه فشان تتسوك وأصابعينك لامن يورَمِن
وما تقدر تطلع منو حِتايي وفي النهايي تحك الفرشي في الصابوني البيضة بتاعة الغسيل ديك وتتم سويكك..
جاء عوض داخل يتبسم ومعاهو جكسويتو... وتبعتم خالة البنيي...
- دنقرت علي عوض: قوماك نطلع من هِنيي...
-ليه مالك...
- ياخي قوماك وخلاص أنا إن بقيت زدتلي دقيقي هني حا أخطُب رسمي... دحين أمرقني من هِني...
ابن الهرمة عوض فقعلو ضحكي... بس خالة البنيي ما صدقت وجاتني وفي قعر أضاني:
- وصلت لااااا وييييييين يا دكتور....
- أنا لا وصلت ولاني عايش ولاني داير أعيش أنا داير أمشي لي أهلي وإن بقيت مُتة أخير...
- ضاحكة: كدي قول بسم الله مالك
- انتو بس خلوني أمرق من هِني وأنا ببقى كويس...
عوض قام علي حيلو وقالهم: يا جماعة الصلاة قربت ونحن يا دوب نصل عشان نصلي الجمعة
- سحر: ياخي السواق بيوصلكم ليه مستعجلين...
عوض ضحك وعاين لي لقاني مبَلِم وعرقي يخر وماسك المنديل وهاجرو في يديني
ومنطط عيوني علي حبوبة المطر (حشرة تظهر وقت الأمطار) وقالهم معليش نحن نمشي وبنجيكم تاني
أنا في سري قلتلو ما أظن لأنه إن بقيت جيت تاني هِني قدام سحر دي بمشي قاصد أبوي جبيرين رسمي....
- خالة البنيي: كدي دقيقة اختي عايزاك يا عوض...
أم البنيي جات شايلالا شيتا مغتغت كدي ومقصطر وقالت لي عوض دة شوية كعك وديهو لي ناس أمك...
قادر الله حتى كعكم ماهو ياهو... أليلنا يغتسوهو قبل العيد في جرادل طلس كدي والسكر مضرضر
فوقه علي الكوكايين ويرفعوهو فوق الفضية وبعد شهرين من العيد تلقاهو معتت ووكتين تاكل منه إن ما بقيت جريت فسراع
للمستراح يمين الإسهال يصل لي ركبتك زي الدكوة العاصرنلهم فيها ليموني ويكبسك الضبان الاخضر
داك وينوني فيك بس البقدونس في صحن سلطة الحُمص...
ودعناهم مع السلامة مع السلامة.... أنا لامن وصلت عند سحر غلبني النضمي كله كله...
وحاتكم ناقصاني الرِيالي رسمي... مديتلها يدي وسلمت عليها ولامن عيني جات في عيونها
كنت عايز اقولها: واااااااااااااااامغستي أنا... التراب في خشمي...
- طيب يا سحر مع السلامة وشكرا على الفطرة الحلوة دي
- طيب يا دكتور شرفتونا.... ممكن نشوفك تاني
- إن شاء الله...
- ضروري جدا خصوصا إجازتك قصيرة... بزعل لو ما شفناك تاني...
إنت تزعلي... أمال أنا أسوي شنو.... أنبطح في نص الظلط فشان يخفجني لوري...
ودعناهم وعوض أخدلو حنكين جنب الباب مع الجكس وأنا وقفت بعيد ولمحت سحر
في باب الصالة أشرت لي تودع فيني بي يدها وأنا هزيتلها راسي ورفعتلا يدي الشايلة
المنديل.... وعيني لي أبوها بي كرشو الغليدي ديك واقف جنب مرتو... يمين جِقِر
معرس فارة أم سيسي... لله في خلقه شؤؤن... حكم يعلم بها الله...
لامن وصلنا الظلط عوض شافني ماشي طوالي...
- ياخي الشمس مولعة إنت عايز تمشي كداري ولا شنو خلينا نركب ياخي
- شوف يا عوض لو عايز تركب أركب أنا ماني راكب
ختيت المنديل فوق راسي ومشيت ومن وراي عوض...
(27)
الزينين كيفنكم...
صلينا الجمعة في الطريق... ومن طلعت من هناك أصلي ما نطقتلي بي حرف...
أبيت أمشي للبيت دخلت مع عوض في بيتهم وفي برندة مطرفة كدي لقيتلي عنقريب
فيهو مخدة انبطحت فيهو وغتيت وشي بالمنديل ونمت....
صحيت علي صوت خالتي سكينة يصحي فيني: طارق قوم يا ولدي تتغدى
- خالتي سكينة النبي فوقك أنا لاني عايز اتغدى لاني عايز اتسمم خليني
- انتو اصلهن النسوان ديل عمللكن شنو لامن جيتو مقهومين كدي انت وصحبك
- ياخي موش تبيخك دة الفيهو لحمايي في نص الصحن علي قلب الدينمو... ماني دايرو
- (تضحك) الله لا تكسبك انت وصحبك... أمك (الله يرحمها) من قبيل بي راس الحيطة تسأل منك
ياخي أُكلَك لُقمي مع الناس... إنت العنقريب دة مالك ما جدعتلك فيهو لحاف شوف شرط ضهرك دة كيفن...
- خالتي خليني أنا عارف حُبال العنقريب خلت ضهري علي بسكويت العيد كله مشرط.. دحين خليني
أقولك شي.. إنتو لامن الناس كانوا بيلموا ويسوا في القروش ناس أبوي وعم عبد الله ديل كانوا وين؟؟
- (ميتة من الضحك) كانوا مبارين العِرِس والضلَلَة وكبابي الشاي والمريسي والعرقي..
والعجب لامن يكون في شي أليل حكومي تسمعُن: عاش أبو هاشم عاش أبو هاشم...
ومن الله خلقني ماني عارفي أبو هاشم والمريسي ديل يتلَمَن كيفن...
- يعني عوض ما جابوا من بعيد ياهو أليل أبوهو
- إنت باقيلي مشيت وِكِرتَ ذاتك
- وحاتك يا خالتي أنا الليلي هضربتلي جنس هضريب...
يمين البنيي علي وش اللبن ناعمي وتقولها في كلاما يدقشك في قلبك لامن يفقهو نصين...
- إيييي كان كدي خلني اللجر البَنبَر وأقعد جنبك
- إييي بَنبَر شنو... نان أنا أحكيلك ياتو ولا أخليلك ياتو...
- النبي يا ولدي خلاص ناوي تغتس مع أخوك...
- النيي في.. علي أنا ماني عوض... أنا إن بقيت غرقت وجاء واحدا لفحها مني بجن رسمي
- يا ولدي أصبرلي الشي دة دايرلو سَفِي من صعوط المحسي اليكهرب داك
- إنت لليلي في جنك دة ما دايري تخلي... أنا أقولك البنيي علي وش اللبن تقوليلي أشوفلي سَفِي..
- شوف الشناط الجنبك دة أصلي أنا مغزغزة أكياس الصعوط هِني وهِني علي
بيوت الزرازير فشان تكون قريبي مني وكتين أخدَر ألقاها جنبي...
- أديتها التمباك.... أنا يا خالتي البنيي نفيستي فيها لكن آبقدر على شيت عوض دة
دحين وحاتك جيت كداري من هناك أقلب فيهو بي هِني وهِني لقيتو ماهو لافق معاي
- إييي ديل نسوان قادرات إن بقيت نويت بيحصلنك زي أخوك
- ما بيبقى يمين جبيرين أقولو كدي علي يقع من طولو وأصلوا إن بقى لي أمي (رحمة الله عليها)
إن سمعت بالشي بتكضم كله كله.... والله ماني عارف أقبل وين...
- أييي يا ولدي أمك تقولها روحك وين تقولي عند طارق ما ياكا الحتالي...
والله يا ولدي طممت بطني بي شيتك دة أنا ذاتي الغداء ماني دايراهو
- هو غداك شنو طعمو... أنا غايتو ووااااااااااااااامغستي
(28)
أها يا الزينين ...
مشيت علي بيتنا لقيت الدنيي صاني...
الاتغدى اتغدى والاخدلو تكيي اتكى..
دخلت علي الصالون وفتحت الدولاب ماني عارف محل اخت المنديل وين...
غتستو وسط العراريق وبي كدي ضمان مافي زول حا يجي يلفحو...
لأنه القمصان بيتلفحِن... أخير العراريق مافي زول شغالبهن...
اخدتلي حمام ومشيت علي أمي (رحمها الله) في التُكُل لقيتها تحسب في قروش الختي (الصندوق)...
- كدي جيبلك ورقي وقلم تعال سجلي النسوان الدفعن من الما دفعن...
- والله يمة جننتينا بي ختتك دي....
- يا ولد أنا أصلي علمتك لي شنو...
- هسا انا قرايتي كلها لي ختتك دي... كان كدي القراييي تطير...
- (تضحك) عليك الله يا ولدي ما تكتر الحِجي... وخلي اللّت والعجِن دة..
- سمح...
- اكتب: أم النصر (رحمها الله) دفعت
حسنة مرت علي دفعت
خادم الله قالت بتجيبن بكرة باقي الأيام دي مزنوقي في عرس ولدها
بت حاج طه قالت لي دفعت وانا قلتلا لا كدي خلها لا بعدين لامن نحسب القروش
حاجة مدينة دفعت
- دي مالك ما نقنقتي فيها عشان صاحبتك
- أقولك شي أكتب وقوم شوف أصحابك علي برة ما تغلِبني..
- أها....
- اكتب: فطين (رحمها الله) يا ربي جابتن... أيي رسلتن قبيل مع البعيو
رقية بت أبنعوف دفعت
حواء بت الطريف دفعت
نفيسة السمحة قالت عندها أوضة زنكيها يكُب دايري تصلها لكن بتجيبن باكر
فاطنة الجعليي....
- هسا يمة إنت كان قريتي ما كان ريحتينا...
- يا ولدي الله لا تجعلها ندمِي أمي الله يرحمها حمتني... يمين إن كان قريت أبوك مافاضي فيهو...
- إيييي كيفن الكلام دة..
- أبوك وصل الوسطى مجننا... يمين إن كان قريت سلام الله ما أديهو ليهو....
- أريتك يمة كان قريتي... كان الليلي نجدتيني...
- مالك آآآوليدي... أوع تقولي عايز تغبا غبا عوض...
- لاني عايز أغبا لا شيتين.... أنا قلبي من بعد صلاة الجمعة حشيتو بي منجل...
- يا ولد إنت مالك وشك دة ما ياهو.... الفي شنو...
- يمة مافي شي... إنت يمة عرستي أبوي دة كيفن...
- إنت الليلي مالك ماك نصيح...
- عليك الله قولي... خصمتك بالنبي...
- يا ولدي كيفن تخصمني بالنبي... أبوك كان صاحب أخوي محمد (رحمه الله)
جاء قال عايزني... كلموني... بعد شهرين عقدولنا ومشيت قعدت معاهو عند ناس جدك
- يعني لا حب لا شيتين...
- إييي حباك برص حب شنو... في شهرين حق الله بق الله لقيت نفسي متزوجي...
- والله يمة سوري ليك يعني لكن حياتك ضايعي...
- هي ضاعت من هسي ياولدي... الله يغتيكم ويحفظكم شي تاني آآآبعرفوا...
- يا ولد إنت نضميك مالو كُتور... باقيلي حبيت عند نسابت عوض...
........
كضاب إن قلتلك لا... كضاب إن قلتلك البنيي ما بتتراد....
وحاتك يمة المغسي كاتلاني والعبرِي واقفالي في حلقي...
أنا عايز أعوعي رسمي...
ما بعرف ليه اتذكرت حبوبتي نفيسي بت بُغداد (رحمها الله)... كان العايزة تسوي... تسوي...
يوم في البركل نزلتها من فوق وقعدت وسط الرجال أندادها وقالتلي جيبلي سجاري
وأملالي الحُقي دي من دكان العوضابي... صعوطو سمح...
لامن جيت لقيت عم عوض السيد (الله يرحمه) ميت من الضحك: قُلتي كيفن آآنفيسي الله لا تكسبك
- قلتلك جيت مندَلي لا تحت ماشي أجيبلي برسيم للنعاج لقيت ود عمكم نازل سلمت عليهو وقلتلو:
إنت مرتك ماتت ليها سني بقيت تحد متل النسوان كمان...
ضحك قالي عندك لي عروس...
قلتلو: أنا مالي ماك شايفني ما بتعرَس (تضحك)...
- الله لا تكسبك... أها (يضحك).
- قالي تعرسيني يا نفيسي...
- قلتلو الكلام لا يبقى ضُراط... هسا بمشي أكلم أبوي بس بعدين لا تنط...
- الله يقلعك يا الخرابة... أها...
- قالي كلميهو... مشيت لقيت أبوي يحفرلو تحت تمرايي وقتلو:
يابة ود ناس الطيب قال دايرني دحين نجض معاهو الكلام بعد صلاة العشا وحديثك لا يبقى ني...
ضحك وقالي سمح... وأنا طالعي قابلت ود عمكم وقلتلو الكلام لا يبقى فسو ساكت أبوي كلمته..
- الخرابة أتاريك قاهري....
- والله يا عوض السيد أتاوق لي جية أبوي والعشي بقالي طويل خلاص... لامن جاء سألتو
قالي: الكلام طلع صِح أها شن قولك
وحاتك فقعتلي زغروتي لامن حسي إنقرش وعرستو ومليتلو البيت بُطان...
- الله يقلعك... قهرتيهو لامن مات....
- إيييي موتو أجلو... العرس ما قاعد يكتلو زول...
رحمة عليك يا نفيسي... هسا أنا إن بقيت سويت زيك كدي مالووووووو؟؟؟؟؟
(29)
يا الزينين كيفنكم ...
اصبحت الدنيي ورجعنا لي بُنانا والقلب إن بقينا باريناهو بيودينا الآخري...
اسبوعين كدي ونحن شغالين ملاطم هني وعرش هناك في هجيرتا لا تخليك تحب لا تخليك تفكر فيهو...
كل جمعة عوض يحنس فيني فشان أمشي معاهو... أسويلو الكلام شمار في مرقة...
- يا طارق ياخي بتبالغ والله...
- ليه...
- ياخي والله والله العمارات كلها منتظرة جيتك...
- مالي وزير التخطيط...
- ياخي عليك الله بطل مساخة... والله والله يا طارق أنا ما شفت لي زول هايم ومشتاق زي سحر...
- هي تهيم فوق شنو أنا لا قلتلا بريدك ولا هي قالتلي... دحين الهيمان في شنو...
- ياخي والله البت حالتها صعبة خلاص...
- يا زول إنت موش قلت يوم الأحد ماشي الشمالية لي عرس ود خالتك... أمشي قشة ما تعتر ليك..
- شنو إنت موش مواعدني تمشي معانا نطيت ولا شنو..
- ياخي دي قصة حا تجر شديد...
- ياخي أبوي حجز لينا عربية درجة تالتة كاملة وبعداك أنا وإنت نرجع معاهو بعد العرس طوالي..
- وكلمت البلوم ولا لا...
- كلمته وأنا الليلة ماشي أودعها عشان يوم الأحد حا نسافر...
- الله يعدل خطوتك... أنا خلني...
- أصلك مجنون من يومك....
.............
يوم السبت بالليل عم عبد الله كلم لي أبوي عشان ما يحرن وقالو: القطر الراجع بجيبو ليك في يدي...
دخلت لقيت خالتي سكينة وأخواتها شغالين يسوا في الزوادي...
شي بيض مسلوق وشي طعميي وقراصة متمري... تقول القيامي دايرة تقوم..
أصبحت الدنيي ولملمنا شنطنا وملينا البكاسي بي أهل عوض ومشينا علي المحطة...
لقينا عم عبد الله جهز التصاريح وقالنا شوي كدي و(صعلوق المحطة-راس القطر البيلملم العربات في المحطة)
يكمل القطر ونشوف العربيي الحاجزنها...
المهم يا الزينين جهزت العربيي ودخلنا الشنط والزوادات... غايتو ناسا بسيطين خلاص...
اللابسلو تموت تخلي والداخلو في سفنجي رابطها بي دباري...
وأتاري خالو المفلهم داك جايبلو معاهو فنان أليل طنبور...
يمين الناس ديل بس وهطوا عفشهم والفنان والجنى المعاهو بدوا ينقرشوا في الطنبور والطبلي..
بالله العربيي دي فارت والصفيق باقيلي وصل للقصر الجمهوري... وتسمع في أبشروا بالخير..
والزغاريت ما تديك الدرب... المحطة كلها تتفرج فوقنا وأهل عوض يرقصوا في عربيتهم ما هاميهم زول...
وجملة الأيمان الفنان لامن بدأ يغني: آه يا خلايا فجولي الأشوفا..
يمين خالات عوض ظبطا مسايرِن وفكا مشاطٍ وبقَن يرقُصَن من أول العربيي لامن يصلن آخرها والرجال يصفقوا
وينططوا معاهن... وأنا عيني لي خالتي سكينة لليلي ما اتكهربت شالتلها سفي وغمتتها تحت لسانها فشان ما يشوفها زول...
طلعت فوق الزير الفي آخر العربيي فشان أشوف كويس... وحاتكم لامن الفنان بدأ يغني:
الله إن جابك يا عشاي
جيبلي راس سكر وتمنة شاي
نصه للبنوت المعاي
نصه لي أمي حبيبة قساي
بلالي متين يجي آآآيمة
*****
الرسول يا ود عمتي
إن دُرتَ راحتي
إن دُر جمتي
رسل التسريح اللجي
بلالي متين يجي آآآيمة
يمين خالتي سكينة دي تقول ضربتها كهربة... شاتت سفنجها قربت تجيبها في وشي..
وبدت ترقص وتترتر من أول العربيي لي آخرها وتاني تقلب تجي صادي زي اللوري الوحلانلو في طين... يمين تترتر في رجلينا زي هبار الشرك... انهردتلها جنس انهرادي.. والفنان شغال:
نركب البيسابق الريح
نمشي في الخرطوم نستريح
الخدامة تسوي التبيخ
وكل جمعة نزور الضريح
بلالي متين يجي آآآيمة
*****
الرسول يمة البدايي
قولوا لامي ماني جايي
كنا نشرب لبن السعايي
بقينا نشرب لبن الشرايي
الميي بالماسورة جايي
تبيخنا في الحلة أم غتايي
بلالي متين يجي آآآيمة
الدنيا دي كلها هاصت وأمة محمد الفي المحطة دي كلها تشوف فينا....
وفجأة كان أشوفلك جكس عوض ومعاها سحر نزلهم السواق...
يا ود الكرسني...
(30)
يا الزينين كيفنكم ...
البنيات جن يفتشن علي العربيي ألت العرس...
عوض بعد ما كان يصفق مع الناس جرى فِرِد جريي علي باب العربيي لاقاهن وسلم عليهن...
- يا طارق.. طارق..
خالتي سكينة ضحكت وجات عندي وقالتلي قوم شوف الراجيك تحت..
- شفتو.. يحلني الله..
خليتها تضحك لا قعر اضانها وتقطع فيني مع أختها ونزلت...
- سلام يا شباب...
- يا دكترة كيفك..
- والله بخير لله الحمد...
- جكس عوض: شنو يا دكتور انت مخاصمنا مالك...
- أبدا والله بس مع الشغل...
- كدي نسلم علي الجماعة فوق وننزل نشوفك مالك ما عايز تجينا...
رفعت راسي لقيت اهل عوض كلهم مادين روسينهم من الشبابيك.. بس فلسطينيين في سجن إسرائيلي..
البنات سلمن ونزلن... عوض قال: كدي نتمشى لي قدام اصلو القطر متأخر...
- شفتو قطر كريمة عامل زي شيّتكم ديك...
- سحر (ضاحكة) ياخي انت عندك تشبيهات عجيبة خلاص
- الناس ياهم اللحم والطرود ياهو البصل المغزغز بينات اللحم... مو ياهو كدي...
والبطاطين أُمات كركار ديك الفي الكنبات ياهن الكتشب...
- عوض: إنت جنك دة أصلك ما بتخلي...
- أها سكتنا...
بعد عربيتين كدي لقينالكم جعليات لابسات ابيض ومحزمات في نصهن علي صفرجية الملك فاروق وشايلاتلهن
سيوف كدي وينقزن: يا سيد الحواشة... وكلاما كدي ماهو واضح...
قمت أنا قلت: إنتو القطر دة كله عرس ولا شنو.. لكن النسوان ديل مالهم رجالهم أبين شُنُبة محمرة زي سلك العدة
وكتين يصدي داك... مالهم ما قاعدين يبشروا... وشكلهم زعلانين كدي..
- عوض: طارق روق دة بكى ما عرس والنسوان ديل قاعدات يمنِحَن...
- إيه أنا والله قايلو عرس... ياخي دة بكى غريب خلاص...
يعني القطر دة إن بقيت داير تهجج فيهو تهيص.. وكمان إن بقيت محروقلك علي واحدا من أهلك تمشي كمان تفش مغستك
شويتين كان أشوفلك عوض وجكسيهو خابين مننا... يعني نحن حاقننهم...
مشيتلي علي عجلات قطر كدي جنب ماسورة وقعدت...
- سحر: شنو يا دكتور فتران ولا شنو... ممكن نقعد جنبك...
يا ود حسونة تمرقنا الليلي....
- وحات أمي مقلَّم رسمي بس عوض وخالتي سكينة ماهُن دايرين يخلوني...
- ياخي ما مجاملة وبتنتهي... على الأقل هم عندهم معزة عندك... موش زينا...
- ليه الغلط...
- ياخي أنا موش قلتليك عايزة أشوفك وبزعل لو ما شفتك.. يعني ما هببتو لي... عايزني أزعل موش كدة..
... تزعلي إنت... إنت تبري من الزعل... أنا الأزعل وأجوعِر كمان....
- أبدا ما كدة... بس أنا حا أجي بي صفتي شنو... يعني عوض عنده سبب أهو خاطب أختك
لكن أنا يا بنت الناس ما عندي سبب يجيبني وجيتي شكلها كدة ما ظريفة...
- ولا عشان خاطري أنا...
... يا سيدي الحسن...
- خاطرك أنت عارفاهو كبير عندي بس يا بت الناس هسا أبوك دة يقول شنو...
- أقول ليك حاجة بابا بيسأل منك حتى أسأل عوض...
... بابا.. البو اليشقني أنا..
- ياخي بس بيجامل في عوض ساكت...
- أنا بعرف بابا لو ما عايز حاجة ما بيسأل منها... أنت حا تسافر متين
- يعني أسبوعين تلاتة كدة
- يعني ما حا أشوفك ولا شنو...
- إنت شوفتي توديها وين... واحد طُلبة ورجلينو مشققات وحالو يحنن المسكين...
- ياخي مشتهية أتونس معاك.. بعدين إنت شايف نفسك زول طُلبة وما عارف شنو... إنت ما سألت نفسك نحن شايفنك كيف..
... يا ود الكرسني...
شويتين جاء راجل قدام الماسورة... أنا لي هسا ماني عارف مواسير محطات القطر دي مالها مصنقعة لااافوق..
المهم... الراجل أبو وشا كله قشور وحبوب دة علي المرة اللاتخالها لخوخة ونشفت في جضومها قعد يلقي وشو للماسورة
ويتنخم ويتفتف ويتمخت...
واحدة شابكاني بابا... ودة يقشقش في مخاخيتو كررررر ميييييييييط عييييط زي الزول البيشرطلو في دمُوريي... ياخي دة عالم شنو دة..
- قوماكي من هنا دة زول ما عندو زوق...
شويتين رجع عوض وجكسيهو ومشينا علي العربية ألتُم...
- سحر: حا تقعدوا كتير في الشمالية
- لا.. أنا غايتو حا أجي قالب في القطر الجايي
- جكس عوض: انت يا عوض حا تقعد ولا شنو...
- أقعد.. البقعدني شنو...
أبو الزفت يمين الزول إن بقى العرس ما كمل ياهو الراجع...
- سحر: طارق دقيقة عايزاك...
مشينا علي ضهرية العربية البت طلعتلها كيسا سمح كدة وأدتني ليهو...
- دة شنو...
- حبيت أجيب ليك حاجات حلوة شكلك بتحبها... اعتبرها زوادة مزورة...
- ياخي انت جمايلك دي كترت خلاص... ممكن أعرف فيها شنو...
- شوية جبنة مضفرة والباقي اكتشفوا براك...
- يا بت الناس جبنة مضفرة في قطر كريمي... دي ما لافقة كله كله... زي الواحد لمن يشتري مرسيدس ويكون لابس تموت تخلي...
تعرفي القطر دة مليان شنو... قراصة متمرة وطعمية وبيض مسلوق... يعني لو جعت وخبتوك بي حرف أليل قُراصي يمين إمساك جاهز...
من الله خلقني ما شفتلي زول في قطر كريمي جاهو إسهال...
البنيي يا الحبان يمين قعدت تضحك لامن دمعت وأول مرة أشوف إنه عندها فلجي سمحي خلاص واللسان ظاهر منها يمين بس جريدتين
وبيناتن سبيطي ألت مشرق ولا مطوطي (الرُطب)... يا سيدي الحسن هوووووووووووووي انجدني...
- تعرف إنت أجمل حاجة فيك شنو...
- شُفتي ليك طُلبة فيهو حاجة سمحة... وعلي العلي كمان بقرأ في بيطرة...
- ياخي عفويتك دي مبالغة...
(31)
يا الزينين كيفنكم ...
ودعنا البنات يا الحبيبين ورجعنا لي نقزينا وترترتنا...
شوف عيني جكس عوض ماها دايري تمشي كله كله...
سحر لبستلها نضاري سميحي كدي ودخلت العربية وأشرت لينا...
عوض بقى ملصق راسو في الشباك ويودع فيهن يمين بس راس نيفة معلق...
العربيي ألت القطر هاصت تاني والفنان نقر طنبورو:
عينينك يا أعز الناس...
عينيك فيها أخطر ماس...
عينيك قوة ما بتنقاس...
أنا المغسة كاتلاني يمين نطيت في نص العربية وقامت معاي خالتي
سكينة وبقينا ننقز أنا وهي ونترتر والزغاريد انفقعن... ايووووووووووووووووووووي
والصفاقين يقدمونا لي راس العربيي وياخدولم نطيتي ونحن تاني نرجعهم لي أول العربيي
يمين الأمة دي رقصتلها جنس رقيص كأنهم كانوا في سجن....
القطر لامن فات الجيلي كان عضامي انهرّن وتعبت...
قلت لي عوض أطلعاك نسطح فوق راس القطر شويي ونشوف الكيس دة فيهو شنو...
بالله مديت راسي لي سطح عربات القطر لقيتو مليان وكل واحد لافيلو عمي فوق راسو
يمين من بعيد عاملين زي سنابل القطن في مشروع الجزيرة....
طلعنا واتوهطنالنا في ضهر عربيي وفتحنا كيسنا وبقينا ناكل...
شي جبنة مضفرة وشي قراقير كدي فيهن جبني وزيتون... وحاجات تانيي ما عرفناها شنو..
- هسا يا طارق عليك الله سحر دي ما بتتراد...
- والله تتراد لكن الله غالب...
- ياخي انت وضعك شوية احسن مننا يعني ممكن تجازف
- عوض انا ماني عايز اتشعلقلي في حبال دايبي... البت سميحي لكن ما بتنتظرني...
- يمين يا طارق قالت بس يديني ريق حلو علي احارب الدنيا كلها فشانو...
- هي قالتلك كدة ولا الكلام نجرتو من راسك...
- والله من لسانها لي قعر أضاني....
- إن بقى في نصيب بنعرسها.... انزلاكا علي النقزي...
....
وصلنا الشماليي وصت الزغاريت والهيصي...
وأهل العروس وأهل عوض في البلد لاقونا علي القطر لامن وصلنا الطريف مكان العرس...
تاني يوم بدت مراسم العرس ونشوفلك في السُعون ألات التيران مليانات مويي..
والنسوان مكفيات علي الصيجان... والافران تطلع في العيش والخرفان انضبحن...
والتبايخ تتخابت... وبراريد الشاي ما تديك الدرب وتسمع في: كِبَلي آآجنا أنا لليلي ما طبَق (ما شربت كاسي التاني)..
الناس عقدوا في الجامع بعد صلاة العصر والقريي كلها فرحاني وتزغرد... وانا عوض بالنا هناك في العمارات...
وكتين امسى الليل... شغلوا مواتر الكهرباء والرتاين بقن...
والطنبور اشتغل تاني:
آآآآهههه يا خلايا فجولي اللشوفا...
خالتي سكينة كدي حنستلها وحيدتن من البلد باين عليها رقاصي شديد...
يمين يا الحبان المرة وكتين نزلت البلد دي كلها وقفت تشوف فيها...
بالله الساعة التديها جريي وترفع ايدينا في الرقيص يمين بس طيارة الكونكورد وكتين تعمل تيك أوف..
ووكتين تاني ترجع والصفاقين من وراها بس سمكة القرش والسمك الصغار داك اللاصق فيها...
ووكتين تقيف في نص الداري وترقص بي راسها بس الحمام الرقاص داك....
.....
تمينا عرسنا ورجعنا للخرطوم وأنا بديت في اجراءات السفر المسيخي ديك...
شي علاقات ثقافية وشي وزارة الداخليي وشي تحويل بنكي... وكلاما يزهج كدي...
وكتين فضلي خمس يوم جاني عوض ناطي في العصر كدي..
- ياخي الجماعة ديل دايرين يودعوك...
- ودعتهم الله والرسول...
- طارق روق الناس ديل عازمننا في ايسكريم 41 في العمارات يوم الخميس المغرب...
- مو ياها الداندورمي دي.... ياخي نضربلهم تليفون من دكان الهادي ونودعهم وخلاص...
- انا غايتو ان بقيت مت ممغوس انت السبب...
- ياخي ما تجوط بمش بس بي شرط..
- الونسي تبقى عامة وما تسوق بنيتك وتخليني وكران براي...
- (ضاحك) سمح اتفقنا
(32)
يا الزينين كيفنكم ...
سامحونا باقي كنا مشغولين مع لبس العيد أليل البُطان..
........
جاء الخميس يا الحبان وانا ماني راضي المشي وعوض شغال تحانيس...
دخلت عندهم سلمت علي خالتي سكينة وجريتلي بنبر جنبها وقعدت ممحن...
- مالك مبلم كدي....
- ياخي ولدك دة داير يوكرني وانا ماني قادر علي الشي دة...
- قالي عازمنكم الليلي في العمارات...
- أيي داندورمي...
- هي الداندورمي دايرالا عزومي...
- تقولي شنو نسوان مخهن ضارب...
- إييي الشي ماهو الداندورمي ديل دايرات يجيبن رجليك مع أخوك... نسوان قادرات...
- وإنت طبعا مبسوطي... تضحكي لي قعر أضانك...
- (ضاحكة) أييي يا ولدي عايزاك تتوكر مع أخوك... علي خايفي من أبوك... أمك ساهلي بقدر عليها.. علي أبوك صعب خلاص..
- يمين تقوليلو كدي علي يرصصك...
- بري يا يابا إنت بقيت علي الشي دة برسلو عمك عبد الله... قوم يا ولدي أمشي مع أخوك وبعدين لامن تجوا نتم حديثنا..
مشيت اخدتلي دُش وانجعصتلي في بنطلون وقميص وسرقتلي ريحي من عمكم جبيرين... ومشينا...
لامن وصلنا شارع 41 وحاتكم قلبي دة ينتل نتلي تقول ممتحن شفوي... واللغليغ كلو راح مني...
شويتين نشوفلكم البنيات معاهن خالتن ووواحدة من بنات خالن قدام المحل... شباب زي الألموظ...
سحر لابسالا بلوزي خضراء مع اسكيرت اخضر غامغ كدي علي السعدي (النجيلة)... والضفور في راسن برضو اخضر
وعاملالا أحمر شلاليف كبدي كدي وفوقه زيقا دهبي غامغ بس زي إعلان البرامج في قناة الجزيرة...
(والله ناس امي ضايعات أهلن دقولن شلاليفن بالأسود علي قعر الصاج وطلقوهن)...
والجفون مضرضرالا فيهن شيتن اخضر كدي وكتين تغمض يلمع زي الفوسفور الفي الشوارع السفرية (هاي وييز)
والرموش الليلي بقن طوال كدي علي قرون الاستشعار ألت الصراصير... والله يا الحبان وكتين تغمض وتفتح
العيون أكبر من الريال... انا نفسي يتخمة ضُمة ضُمة... واتشحتفلي شحتيفتا تقول صايم والآذان فضلو خمس دقائق..
- (خالت البنيات) أهلا بالشباب...
- سلام عليكم...
- تقعدوا برة ولا جوة
- والله كله كويس
- خلو طارق يختار نحن الليلة محتفلين بيهو...
- والله جوة أحسن...
- الحبشية ظبطت لينا طربيزة واتوهطنا في الكراسي....
- خلاص يا دكتور قربت...
- والله يومين كدة واسافر...
- حا تفرق معانا والله... اتعودنا نشوفك مع عوض...
- سحر: انا زعلانة منك...
- ليه ياخي....
- انا ما قلت ليك عايزة اشوفك قبل ما تسافر
- ما ياني هسا معاكم قبل ما اسافر...
- كتير علينا نشوفك براك
- والله انت شفت الظروف كيف... موضوع الشماليي لخبط الدنيي علينا
- عنوانك شنو في مصر...
- ساهل جدا مصر الزقازيق كلية الطب البيطري
- بس كدة ساهل... حا ترد علي لو رسلت ليك
- اكيد ياخي نحن ما بنصدق يجيك جواب من السودان...
- ممكن برضو نجي مصر اجازة راس السنة لو جينا بجيك...
يا ود الكرسني...
جات الحبشي تشيل الطلبات...
- اها يا شباب تاخدوا شنو
- سحر: اختار ليك على زوقي انا...
- جميل
- جكس عوض: انا غايتو بختار لي عوض...
الحبشيي مشت وجات جابتلها كبابي طوال كدة علي السنبريي وفيهن داندورمي كدي مدورة زي كورة التنس
شي احمر وشي اصفر وشي اخضر... وفوقن شيتن ابيض كدي ملولو وفوقه نقط حمراء زي لامن تكون مجروح
في أصبعك الكبير والشاش منقطة فيهو صبغة اليود...
سبحان الله حتى داندورمتم مختلفي.. نحن ألتنا في أكياس ممصرنة كدي يا قنقليز يا كركدي يا عرديب
ويقعد الواحد يمصمص فيه لامن يفضل التلج ويقعد يقرقش فيهو..
بقينا نبلع في الداندورمي دي والونسة شغالة... مالت علي خالة البنيات: ياخي بتنا دي ما جننتها جن ياخي انطق
قول ايي حاجة خليها تستريح... انت ما عايز تتحبة ولا شنو..
انا شبه حب... إن شاء الله بالمغسة التحش مصاريني وتقدقدِن...
- صعب أوعد بي حاجة أنا ما قادر أوفي بيها.... صعب شديد
- ياخي كله بيتسهل بس انت ارحم البنية دي والله بشتنتها بشتنة حرام عليك
- والله انا زعلان عشانها... ما بتستاهل... أيي شي فيها سمح... بس أنا ما عايز ابني حاجات في الهواء
- طيب دي حتة كويسة... يعني جواك في تجاوب بس انت خايف من المستقبل... ودي ساهلة بنحلها
تعرف أنا لو قلت ليها الكلام القلتو دة الليلة ما حا تنوم كله كله... أما لو قلتو انت ليها يمين تخلي ابوها يسفرها ليك هناك..
هي ما تنوم... انا عيوني اليتقدقدن...
- لا تعليق...
كملنا داندورمتنا واتونسنا ونسة عامة كدة ولمن وقفنا سحر زحت بي بعيد شوية كدة بي طريقة لا شعورية
- انا حا اراسلك عليك الله ما تتجاهلني
- ياخي انت بيتجاهلوك... ما ممكن يحصل
- وعد
- وعد
ودعت خالة البنات وبت خالهم ومشيت علي جكس عوض وودعتها لمن رجعت لي سحر تاني
وحاتكم قربت اغنيلا: كتير بتناسى ايديا واسيبا عنية فوق ايدك....
وسافرت...
.... ونواصل
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
ودجبين
جيت غاشيك لقيتك مسافر
لما ترد بالسلامة اصلنا
حيطتنا اليستوها وقعت
والسقف الخريف خربو
راجين كارو عم سلمان يجيب لينا السيتقة
كل سنة وفايز في مباراة هدوم العيد
قضيتن يالممحوق ولا لسع
انا البنية الصغيرة نشفت لي ريقي
قال ايه قالت دايرة ليها جنز بمبي...
ما خابرو لي في لفك الفسوق؟؟؟؟؟
أبوالشوش
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: ماجدة عوض خوجلى)
|
استاذي العزيز : طارق
كل سنه وانت طيب وربنا يحقق جميع امنياتك
سنه حلو علي قلبك وربنا يحقق كل الممكن وبعض المستحيل
عليك الله كفانا تشويق
ياخي يعني انا منتظر القصه تخلص عشان اكتب ليك
لكن حلفت
وبقا بوست ادمان واول ما تدخل نت تفتش البوست ده حتي تبدا يومك
الله يديك العافيه
سريييييييييييييعععععععععععع شووووووووووووووووويه
كل الود
مهند حيموره
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
أها يا الحبان جيتكم صادي
عيدكم مبارك وإن شاء الله تحققوا الفي مرادكم...
معليش إتأخرنا عليكم بي سبب العيد وكمان الواحد كان مدبرس شديد...
أول مرة من ولدوني ما أقدر أقول لي أمي كل عام وانت بخير يا حاجة
السنة الجاية في عرفات... رحمها الله...
.....
رجعت لي قرايتي والهركي بين كفايات الجداد ومراح البهائم وزرايب البقر...
قرايتا تقصر العمر الوكرني فيها شنو آبعرف... السنة كلها أنت تساسق بين المحاضرات والزرايب...
بعد اسبوعين كدة بدت تجيني الرسائل...
عوض شغال يكب في الجلكسات ومقضي ايامه بين العمارات والكلية والامتداد...
في يوم كدي استلمتلي جواب كدي ماهو ياهو...
خليتو لامن وأنا طالع من المعامل تسعة بالليل بديت أقرأ فيهو:
دكتور طارق ازيك
دة خطابي الأول ليك
نفسي كان أرسل ليك معاهو شريط لي محمد ميرغني وفيه أغنية اشتقت ليك
من سافرت وأنا بسمع الأغنية دي كتير... ما تسألني ليه؟؟؟؟
وكمان عوض قال لي إنك بتحب الجابري شديد خصوصا أغنية بدون رسائل:
مافي حتة رسالة واحدة بيها أتصبر شوية
والوعد بيناتنا إنك كل يوم تكتب إليّ
لم آخر مرة شفتك قبل ما أودع و أغادر
كنت حاسس إني خايف إني متردد وحائر
داير أتصبر أمامك داير أضحك وماني قادر
حفظت الأغنية حرف حرف وبشغلها في اليوم ألف مرة وبتذكر كل كلمة كنت بتقولها
وبتذكر كمان ضحكك مع خالتي وتشبيهاتك اللذيذة ديك..
في حاجات كتيرة كان مفروض نقولها مع بعض...
كنت عايزة أقوليك كلام كتير وعايزة أسمع منك كلام كتير تقوله لي أنا ما لي خالتي
عوض بيقول إنك متشائم جدا عشان كدة ما بتحب تتكلم في أي شئ عن المستقبل
بس أنا عندي ليك سؤال: يا ربي في إنسان في الدنيا دي بيرهن عواطفه للزمن؟؟؟؟؟
جاوبني بصراحة وما تسألني هسا ليه أنا سألتك كدة بعد ما تجاوبني بوريك ليه
أنا طرحت عليك السؤال دة...
خالتي سكينة بتقول عنك كلام سمح شديد وباين عليها بتحبك شديد وأقول ليك حاجة
أنا شفت أمك (الله يرحمها) عند ناس عوض... بتشبهك شديد ومن غير ما اشعر سلمت
عليها شديد ما عارفة ليه وهي ذاتها سلمت علي شديد... يدينها طبق الأصل من يدينك
فيك حاجات كتيرة منها... قالت لي عوض: صحبك أمبارح رسلي جواب بعدين تعال فشان
تكتبلي ليهو جواب عشان يرسلي حبوب المصران من هناك باقي قايم علي...
قربت أقول ليها أنا بكتبوا ليك... لكن خجلت... بس حسيت بيها زولة كدة نقية شديد
فيها كمية من الحنية ظاهرة في عيونها... عرفت من عوض إنك الحتالة وبينك وبين
أخوانك الأولاد تلاتة بنات متزجات اتنين وواحدة في الجامعة...
عوض الأيام دي راسو مقطوع وعدم وجودك فارق معاهو....
بابا سألوا سؤالي عادي خلاهو يجقلب وقال لو طارق هنا كان فكر معاي...
وأنا شايفة السؤال عادي جدا: إنت متوقع تتزوج متين...
بس هو عمل منه حبة وقبة... وخلى جكسيهو متوتر ساكت...
عشان ما تقول أنا برايا ما حا أطول عليك...
متوقعة منك رد في السريع العاجل....
خلي بالك من نفسك شديد كان ما عشانا عشان أمك العسل ديك....
وجاوبني على الحاجات السألتك منها كلها...
في أمان الله...
سحر...
وحاتكم يا الحبان حسيت بالبرد دخل في عضامي وبقيت أرجف
وقمت لبست البالطو بالمقلوب وشكلي بقى زي مرضان في مستشفى المجانين
وكان سألني زول كنت بتعمل في المعمل شنو الليلة.. ماني عارف...
برايا... أبريني أنا وكسريني وتاني أبريني لامن أكمل كله كله وأدشدش....
والنشارة البتطلع مني ضرضريها في العمارات شارع شارع...
ولا أقولك ووقدي فيني النار ورمديني...
أنا واااااامغستي..... وااااااااضيقي....... التراااااب في خشمي...
عوض إن شاء الله يطير هو ونسيبو... شكيتم الاتنين علي الله...
.... ونواصل
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
العزيز المبدع طارق جبريل
Quote: أول مرة من ولدوني ما أقدر أقول لي أمي كل عام وانت بخير يا حاجة
السنة الجاية في عرفات... رحمها الله... |
الله يرحمها ويرحم أمهاتنا جميعاً .. أحياء وأموات.
ياخي إنت زول ما عادي .... تشيل كل الألم والحزن ده وتوزع علينا الفرح والسعادة.
كل عام وإنت وأولادك وجميع الأهل بخير.
صادق الود والمحبة
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: محمد أبوالعزائم أبوالريش)
|
ود أبو العزائم كيفنك
تعرف يا حبيب أنا بديت اكتب في الحكاية دي وانا قرفان جدا جدا
لانه الوالدة الله يرحمها كانت مريضة وزي ما عارف لمن انت تكون بعيد
بتكون القصة صعبة شوية ويبدو إنه أنا بديت أكتب دون وعي مني
في محاولة لربط الجسور بين عالم عايشته بكل تفاصيله المملة
وعالم أعيشه الآن... وحتى بعد الوفاة حرصت على أن أكتب إحياء لذكراها
لأنها عايشت كل التفاصيل المبعثرة هنا في هذا البوست....
رحمها الله كانت جبلا بقرب جبل البركل....
محبتي الأكيدة
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
سلام يا طارق،
Quote: حبوبتي نفيسي بت بُغداد
مشت الحج وكتين جات قام طلحة اخوي قالها ما سلمتي علي النبي
قالتلو لا
قالها ايي كان كدي حجك ضايع وكان مشى معاها عمي حسن
نادتو انت يا الحسن كيفن ما بتخليني اسلم علي النبي
ضيعتلي قريشات في الحج الله لا تكسبك كان سوينابن كرقي للبُطان
|
غايتو يا طارق اللي ما بمر على البوست دا بيكون ضائع وسط الزحام.
سؤال:
الجكس المعنيات في الحكي متابعات الكلام دا؟
متحكرين ومتابعين..
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: Rawia)
|
... المرة دي دخلت البوست ... لزوم العتاله ساي ...
طبعا انت والعوض عتالتكم زمان كانت مقابل القروش ...
بس نحناعتالتنا هسع مقابلها ...
متعة ... وامتاع ... واستمتاع
... واصل يالحبيب هذا الفيض من السرد الفني البسيط الممتع ...
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: ياسر نجيلة)
|
الحبيب طارق
اللهم نسألك المغفرة والرحمة للحاجة أم طارق (عشة الشايقية)
ونسألك أن ترطب لساننا بالدعاء لها ولكل موتنا ونسال الله أن
يجمعنا بهم في جنة عرضها السماؤات والأرض أعدت للمتقين ولك الود
ياصديقي ولك وللأسرة التحية والأحترام وعيد سعيد علي ريم ومحمد
وأمهم وكل الأسرة الجميلة بأمتداد آل جبريل أين ما وجدوا ونخص
سحر وعوض وجكس عوض بتهنئة عريضه بالعيد وكل عام والجميع بخير
وخطاب سحر بداية لنهاية كم نتمني أن لا تنتهي بدرامات العشق المجنون
فتك بعافية حتي الملتقي أن شاءالله .
،،،،أبوقصي،،،،
| |
|
|
|
|
|
|
|
|
 Re: أي بت شديدة بتحب ليها طُلبة (صبي بناي) (Re: مجدي عبدالرحيم فضل)
|
العزيز الزول السمح د ..طاارق
انا من المتابعين - بجنوون- لهذا البوست الرائع - وكل يوم بفتش المنبر دا زى المودر لىهو - سخله بعاااامية -
عاارف احتماال لانو رجعتنا لى زمن محاال يرجع تاانى -
بس مجرد سؤاال ساااكت - ياربى لييه البنيات زمااان بمووتن فى - الطلب-( دا مجرد سؤال من طلبه سابق )
عاارف والله نفسى فى يوميه كاااربه- لكننا ما عدنا نقوى على الرجوع-
مع خالص حبى وتحياتى
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
الحبيبين كيفنكم...
غايتو الواحد وكتين يكون قرفان الله لا وراكم ليه...
يا دوبة فكت مني...
......
الجوابات بقت نازلة فيني زي المطر من الجهتين...
عوض يكب في الجلكسات ومخلوع من أسئلة نسيبو:
والله يا طارق الراجل دة الأيام دي متلحني ما بعرفه مالو..
شابكني حا تعرس متين وحا تسكن وين ناوي تشتغل بالصيدلة ولا عندك مشروع تاني...
يعني هو ما عارف البير وغتاهو...
وبيني وبينك أنا قلبي ماكلني الراجل أبو جضوم دة ماني مرتاحلو...
وبقيت مهموم كله كله.... والله وكتين ازورهم أقول يا ربي يبقى ماهو في... والجكس
يطمن فيني وأنا حاسس في شي ماهو ياهو والأيام دي اعمامهم بيجوهم كتير خلاص
انا غايتو قلبي في يدي.. البت دي إن بقت فاتتني ياني الانتهيت...
...
عوض هممني في روحي دي وانا عارفه وكتين يكون الجن راكبو ويبخ في الهم
ويعقِد حواجبينو علي الفريني فوق عيونه... ويحقب يدينه وراء رقبتو علي الخروف
الموهطنو للضبح... ويلبس ويقلع في سفنجتو زي بساتم العربيي... وتسمع في بطنو
تكورك وتسوي في الغوووووغغغ غوووووغغ زي اللستك وكتين يكون نازل ويجربو فيهو
في برميل الموية عند اصحاب البناشر... والعجب لامن يكون مقنطر في الحجر قدام
باب البيت علي الجدادة الراكضي في البيض...
أنا حاسسبو فاقدني وماهو قادر يكُب همو لي زولا تاني..
رسلتلو قلتلو فضلي شهر وبجيك ناطي ونشوف الحكايي شنها... لانه شفته كتر في الجوابات...
وباقيلي القصي سخنت بهناك...
عوض مهموم وبنت الناس دي ودرت قروشها كلها في البوسطة...
تشيل وترسلي في الخطابات وأنا لاني قادرها أبرد حشاها وحشاي
ولاني قادر كمان أصبر... زي الزول لامن تكون عندو عوارة وخلاص قربت تبرا
وتقعد تاكل فيهو.. لا يقدر يحكها ولاهو قادر يصبر عليها...
يمين أحلم بي عويناتها بالليل أقوم مخنوق وماسكاني الوردي كله كله
وأسكت أبلع في المويي وعصاير القصب عند المصريين ديل...
اوكات أقوم من ليلي أصنقر في نص السرير في الشقق العلي المقابر دي
على الأقل في السودان إن بقيت صنقرت في عنقريبك تناضم السماء والنجوم
ويناضمِنَك... لكن هني الصنقير ذاتو يزيد العليك...
وحاتكم أصنقر وأتذكر في يدينها الناعمات ديك والصدير لامن يجيك دافر من بعيد
علي الهودج في الجمل... ولا فديع اليدين وجدعتن ديك... ومشيت الرجلين بالمهلي...
نفسي يضيق... وأناجي في ربي يشوفلي حل للكربة الوقعت فيها دي...
أرُدلا في رسايلا وألمحلها من بعيد كدي زي الغرقان وشافلو خشبي مطفحي...
وحاتكم وأنا بكتب في الحروف أصابعيني يرجفن زي زنبلك الساعة...
وأطلع وأنزل في السطور زي أولاد الكُتاب...
الله لا تكسبك يا عوض إن كان نجضتني معاك....
.... ونواصل
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
سلامات يادكتور
كل سنة و انت طيب
من حظى انى مااتشحتفت زى الباقيين
امبارح كريتا كلها فى يوم واحد
شغلى كان خفيف
لكن اتبهدلت
انا ماواعى لروحى
مكتبى قزاز
و الناس بى برا شايفنى بضحك
طريقة سردك رائعة و القصة اسرة
غايتو عوض دا اكان لى هسع ماعرس
و الامور نجضت
انا متبرع بندى القلعة
عشان تجى تغنيلو
يسلم لى عوض الليلة
تحياتى
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
الاخ ابو النسب
ارجو ان تكون بخير طولت منك لكن كل يوم بتاوق شابف اخونا ابوبكر دخل بصورة عملية
قايتو ان شالله يلحقا نيفاشا عافي منه عشان الشحتفه اللشحتفتنا ياها .
زمان كان عندني راجل حكاي جدا مشهور في كل المناسبات و مع ذلك يحب الاكل السمح ودايما تلقاه حاجز مكان في بيوت البكيات
وغيرها من المناسبات مكان مابتجي الصواني الكاربات .
وكان مشهور عنه انه يحكي قصة سيدنا يوسف واخوانه بطريقة جذابة جدا وتجعلها مطلوبة في كل مناسبة وحصل في مناسبة كان هذها الرجل
مشغول بشأن خاص و وصل مكان المناسبة متأخر جدا و مع اخر صينية وعند جلوسه للاكل طلب منه احد الضيوف ان يحكي له قصة سيدنا يوسف
فطلب من الرجل ان ينتظره حتي يكمل الغداء فقال له الضيف انا مستعجل ولاحق المركبة فما كان من عمنا الا ان يحسم الموضوع
فقال له قصة شنو راجل عنده ولد راح و لقاه ما اكتر من كده حصل مركبك خليني اللتغدي .
دحين يا طارق كان مشقول كتير قولينا طلبه حب بت وما عرسها
خلاص افقنا
| |
|
|
|
|
|
|
|
|
|
Re: أي بت شديدة بتحب ليها طُلبة (صبي بناي) (Re: طارق جبريل)
|
استاذ/ طــــــــــــــارق
سلام وتحايا وشوق عاطر..
قلنا (أبو بكر) يستفزك عشان تكمل أو على الأقل تحتج.. لكن الظاهر عليك شايل تقيل الله يعينك..
(ابو بكر) غايتو كتر خيرك ماقصرت في الرفع والعتالة.. لكن صاحبك الظاهر عليه مشغول شديد أو يمكن غير رأيه..
اقتراح: شيل مداخلاتك دي نفتح بيها بوست تاني ونضرب بيه ناس عوض وسحر.. رأيك شنو؟
| |
|
|
|
|
|
|
| |
ياسر نجيلة
مجدي عبدالرحيم فضل
طارق جبريل
osman righeem
محمد أبوالعزائم أبوالريش
اشرف السر
الصادق صديق سلمان
حاتم هاشم
showgi idriss
Muna Khugali
أبوالزفت
ماجدة عوض خوجلى
mohanad haimoura
السمؤال بدرالدين
waleed dawash
Nasr
عزيز عيسى
Rawia
عامر تيتاوى
anas hassan
أميرة فاروق عبد العال
فيس بوك
تويتر
انستقرام
يوتيوب
بنتيريست