(4) امتداد الدرجة الثالثة ذلك الحي المتفرد

Quote: الامتداد ذالك الحي العريق-لقد اتينا لهذا الحي الامتداد من بيوت الحجر ذالك الحي الذي بين حي الزهور مقابر فاروق وكان التحاقي بمدرسة الدبم شرق 2 مكسبا كبيرا بالنسبة لي لانة اتاحت لي فرصة التعرف بشخصيات عظيمة مثل نبيل محمد الحسن وعز الدين عبد التام وسيف الدين عبد التام ومحمد السناري وصلاح شبو والطاهر ابكرو السر منو كدة ماعارف.والمقداد وكثيرون لاتسعفني الذاكرة لذكرهم واذكر الاساتذة محمد نور وكمال بتاع العربي وكان دائما ينصحني بان اصير كمساري لاني دائما كنت اجيب اعد في الاملاء وكما اذكر الاستاذ بول الجنوبي والاستاذ محمد عبد الحمن الناظر وكثيرون=دة موش معلم= وبعد ان انتقلنا الي الامتداد كنت معظم الاوقات اذهب الي البيت من المدرسة بالبص الذي كنت اركبة من محطة التعاون وكنا نتباري في تجنب ركوب بص الهنغاري-هكذا البرجوازيون الصغار-ولا شنو يا بركات كنا نركب بص البدوفورد او البيعو كما كنا نسمية و في بعض الاحيان نمشي كداري الي البيت بعد ماناكل شطة بعجور لاحظ شطة بعجور وليس عجور بشطة طبعا بقروش البص-نخرج من المدرسة مع الديامة مرورا بالساحة الشعبية حتي نصل قصاد سوق الديم-السوق الجديد- فيختر في بالنا سيرة شيخ السوق الذي سمعنا عنةكثير من المغامرات وهو بري منهاولعل عبدرحمن بركات يسرد لناجز منها بحكم كونة ديامي ومن هناك نظل زاحفين الي ان نصل حلة البطل الثوري الفذ عبد رحمن بركات وحينها كنت لااعرفةوبعد معرفتة هو وشلة ذاك الحي كنت فخورا بهم ومازلت وماانفكا وما برح تاني في حاجة ونواصل المشوار وليس كما واصلة صاحب =ومشيناةخطا =الي ان نصل الكلية المهنية تلك الكلية التي يقطن باحتها رفيق الدرب محمد عوض امان=تعظيم سلام=فنخرج من البوابة الجنوبية لنقطع خور جانغي ونمسك شارع النص ونلف ذى مايلف البص و بعد شوية كدة نصل البيت مغبرين وهلكانين وشنو كدة ما عارف وحينما سكنا الامتدد كنا بنشوف مربع 1 من مربع14 لانو البيوت لسع ما بنوها-وكان في كربات كتيرة كربات دي ما كرباوي دي جمع كربة وهي نوع من العنكبوت وكمان بتذكر تلفزيون عمنا منو كدة ماعارف في مربع 8 زول كان بينزل في الانتخابات تلفزيونو بلم بية الاصوات زي ما نحن كنا بنلم بتلفزيونا الزبائن للدكانا في مربع14 ايوة بالظبط دكان البرابرة -بس ان ياهو ذاتو فيصل ود البرابرة اة الصحافات كانت فاضية وما فية الا شويت عرب وابقارهم فيصل تقلية وان عدتم عدنا (عدل بواسطة فيصل محمد خليل on 30-12-2005, 01:50 م) (عدل بواسطة فيصل محمد خليل on 30-12-2005, 01:53 م) (عدل بواسطة فيصل محمد خليل on 30-12-2005, 01:55 م) (عدل بواسطة فيصل محمد خليل on 30-12-2005, 01:59 م)