امتداد الدرجة الثالثة ذلك الحي المتفرد

Quote: العم العزيز طارق ( طبعاً عم دي بعد كلام عمنا أمير الجمري عنك) ذ بعد السلام والتحايا لشخصك ولجميع المعقبين في البوسط تقبلوا تعازينا (المتأخرة) بوفاة الكثير من أهلي بالإمتداد وأخص بالتعازي : أمير الجمري والاسرة .. الفاضل سابل والاسرة وكل من الطاهر محمد عثمان وسامى وقمر والفاضل و الاخ على بدرى حارس الدينمو السابق والإدارى النشط بنادى الامتداد والتعازي الحارة لأسرة المرحوم محي الدين جنكز وجميع من سمعنا بموت عزيز لديه ومن لم نسمع بعد وجعلها الله آخر الأحزان .. ورحم أمواتكم وأدخلهم مدخل صدق عند عزيز مقتدر وتقبلوا ايضاً تهانينا القلبية بالنجاح والزواج والذرية الصالحة لكل ذي مناسبة سعيدة أما بعد تحايا خاصة لكل من سأل عن أحوالي وكل من أثلج صدره برؤية مشاركتي السابقة من الأخوان : عامر تيتاوي والأخ مجدي بركية وخالد أميقو وأمير الجمري والأخ الفنان قريبي عماد عويس والأخ أحمد جمعة ردود خاصة 1. عامر تيتاوي ومحمد مصطفى الذى كان الكبار يخشون مواجهته فى دافورى العجايز بميدان الردستار وقد سعينا فى فترة من الفترات لتسجيله فى فريق الامتداد ولا اتذكر التفاصيل لكن اتذكر تماما مهارته فى المراوغة والتى كانت تبعث الرعب فى نفوس الخصوم .. الناس خايفة من الجهجهة والترتعة والبهدلة خاصة اللواييق بمسكوهاليك .. كانت ايام جميلة شكراً والله ياعامر علي الإطراء المبالغ فيه - أما بخصوص تفاصيل التسجيل في صفوف الإمتداد فقد حدث بالفعل وكان يوم لاينسي - ساقونا أنا وكاموتة من ورشة عمنا إبراهيم جبارة وقمنا بإجراءات التسجيل في استاد الخرطوم وكان بصحبتنا خالد عثمان مدير الكرة وفتحي سكرتير النادي آنذاك .. وبعد التسجيل إنزوي خالد عثمان بكاموتة جانباً وأعطاه 20 جنيه عشان نرجع بالنقل الطارئ يعني حتي ماكلفوا نفسهم يرجعونا محل ماساقونا - باعتبارنا ابناء المنطقة ولازم ندفع الضريبة - ومازلت (أنكد) علي فتحي بذكر القصة كلو ماأقابلو وهو معانا هنا في نفس البلد - يقاسمنا حلاوة الذكريات ومرارة الغربة وإتمرنت كم تمرين وكم لعبة ودية في صفوف الإمتداد وسافرت قبل بدء الدوري 2. عماد عويس والله ياحليلك يامحمد مصطفي, ذاكرتك حديد والله .. ماشاء الله وبسأل عليك دائما واناعارف مقر اقامتك وين؟؟ يعني متابع.. انشاء لله الاسره الكبيره بخير وبرضو الصغيره تحياتي لك كتير وتلقي عنواني وتلفوني عند الفاتح الجوص ورينا اخبارك .... ياراجل ياجافي يعني لو شلت رقمي من الفاتح واتصلت علي مالو ؟ مش إنت الكبير برضو ؟ نحن كنا شفع صغار ياعمدة وإنت في بداياتك الفنية وبتحيي حفلات الحي (مجاناً) أنت بالعود والدرديري في الإيقاع وكانت أغانيك آنذاك : كان طلعت القمرة - الندامي - وأنت وقتها في عنفوان الشباب وعشان الذاكرة الحديدية القلتها دي ياعمدة أنا اذكرك بحدث مضحك ... وأنت تحي مناسبة في منزل ناس عوض أبنعوف ( تم حزف المناسبة لمسئولية النشر) فإذا بأحد الضيوف (من الزومة لنج) يمسك بالمايك لتقديم الفنان عماد عويس ويقول : والآن مع الفنان ... هو إسمو منو الفنان قلتو ؟ قالوا ليهو إسمو عماد عويس .. قام قال في المايك : أحمد العبيد .. سمعها كدة هو .. والناس ضحكت بصورة مبالغة ..نبقي علي اتصال ياعمدة إن شاء الله 3. أمير الجمري تطلع دفعة دكتور طارق محمد حسين انت حا تكون دفعة عم جعفر الله يرحمو يعني زرياب ومحمد مصطفى شكلهم ما حا يجيبوها لبر . امير الجمري أولاً تقبل تعاذينا الحارة يامجدي وجعلها الله آخر أحزانكم يارب وتقبل الله موتاكم قبولاً حسناً إن شاء الله وتحياتنا للاسرة الكريمة .. والأخ العزيز شهاب الذي أفتقدناه في ليالينا خارج أرض السودان علي أمل اللقاء بكم قريباً إن شاء الله 4. خالد أميقو كما سعدت بطلت الاخ العزيز/ محمد المصطفي من رومانيا اتمني له دوام الصحة والعافية ياسلامممممممممممممم والله البوسط جاب خيرة أبناء الإمتداد أحوالك ياخالد بالله ؟ والله سمعت إنك في السعودية يعني سائلين عنك والله إنت من زمن رومانيا لكن ؟ أنا حالياً في هولندا وبسيب ليك إيميلي في نهاية البوسط إن شاء الله 5. مجدي بركية التحية للشاب المهذب اللعاب محمد المصطفى أخجلتم تواضعنا يامجدي والله ..فأنتم أهل العلم والوجاهة والفن والأدب ونظل تلاميذكم ولنا شرف مجاراتكم التي لانجد من بعدها إلا أجر الإجتهاد أما الإصابة فسوف تظل حلماً يراود متطلعاتنا .. دمت أخاً كريما وبارك الله فيك 6. جوموووووووووووووو محمد مصطفى ولكن لعبت معنا لعب خشن نحن ناس سلام 4 والله مشتاقين ياجومو .. للأيام الجميلة .. والونسة علي ضفاف اللساتك مع ابو داؤود بعد إنتهاء الدافوري ..ليتها تعود ..وليك وحشة خاصة والله لكن سيرة اللعب الخشن ماتجيبا ياجومو .. بقوم اشهد عليك الناس دي كلها وأذكرك من كسرة عمار بتاع المريخ لحدي كسرة أنور أخو لايوقا .. بعدين سلام 4 في دمي بيجري ..وطن واحد وشعب واحد ..دفعتي من سلام 4 كانوا جميعاً زملاء دراسة في الإبتدائي ...ودفعتي من الردستار كانو زملائي في المتوسطة يعني من دقنو وفتللو .. زيتنا في دقيقنا ياجومو ... وندعو بالرحمة والمغفرة لفقيد الشباب إبن الإمتداد البار والسلام 4 خاصة الكابتن الفقيد خالد محي الدين ( رومونيقا) رحمة الله عليه .. وربنا يعوض شبابو الجنة إن شاء الله وتعازي حارة (برضو متأخرة) بوفاة أعمدة شارعنا الأعمام بشارة أحمد والعم محمود سليمان مالك - تقبلهم الله قبولاً حسناً وجعل الجنة مثواهم والتعازي موصولة لأهلهم وذويهم .. والسلام عليكم ورحمة الله وبركاته بريدي الإلكتروني لكل من يود مراسلتي [email protected] علي وعد بمواصلتكم أهلي الإمتداديون