امتداد الدرجة الثالثة ذلك الحي المتفرد

Quote: اخي الفاضل / علي الخير ((صراحة خجلتني)) لك الشكر والتقدير والامتنان .. عزيزي علي انا طبعاً اقتحمتك الان وازلت عدم تشرفنا بلقاء بعضنا البعض وقمت عملت لي خلطة جميلة من يحيى وطارق الخير وعطنتهم في خليط من الطيبة والاصالة والشهامةوالكرم والكرامة والسماحة والاريحية فكونتك امامي وحادثتك : طبعا اخي الكريم بيتنا في الامتداد وكسائر بيوت الامتداد العظيم هو امتداد مصغر يلتقي فيه الشباب وكل حسب ود جيلو في البيت وكان ود الخير (يحيى) احد اصدقاء شقيقي الكبيرين بابكر وعثمان عليهما الرحمة وكنا صراحة نتلذذ بتجمعهم في البيت او حتى في الشارع بجوار البيت او في بيت العزابة ناس علي يحيى وعمر جبرة وكنا نحس بامان واطمئنان ونحن نرى هؤلاء الزمرة الطيبة من اخواننا الكبار وكان كل منهم اخا وموجها وناصحا ومربيا وسبحان الله يا علي لا زال كل من يقابلني من هؤلاء الرجال يزرف الدمع وهو يسلم علي مجترا ذكريات تلك الفترة الثرة وطبعا في جيلهم هذا رحل الكثير منهم من دنيانا الفانية وترك وراءه سيرة عطرة واذكر منهم الدكتور عبد الله ابو شامة وصلاح كبرنو وحمندي وعبد الله محمد احمد (الصج) رحمهم الله جميعا .. و بيوت الامتداد يا علي ابوابها كلها تعتبر نفاجات تكسر كل الحواجز بين اهاليها لان الاسرة واحدة والضمير واحد وكل الرجال آباء للكل وكل النساء امهات للجميع والشباب اخوان البنات وعشى البايتان والبنات اخوات الاولاد والكل في الامتداد نقي ونظيف وجميل .. واعرج اخي الحبيب على منزل اخونا يحيى الخير وزي ما قال ليك اخي (الصغير الكبير) صديق حمدتو فان بيت يحيى كان مركز تجمع ثقافي اجتماعي رياضي وادبي وترفيهي وطبعا البيت كان عبارة عن حوش من الجالوص وبداخله اوضة قبل ان يحوله اخونا يحيى ال صرح شامخ ( ماشاء الله) فكان لي شرف تسميته بالطابية اولا لقرابة شكله من بويتات الطابية في امدرمان وثانيا للترابط والتوادد الذي كان يربط بين مرتاديه وايمانهم ببعضهم البعض والحميمية والتوالف بينهم. رحم الله ( عثمان سعيد ) واعتقد يا علي ان اكبر تكريم للرجل هو ان اهل الانقاذ لم يوفوه حقه !!. لكن اقترح ان نقوم نحن الامتداداب بلمسة وفاء تكريما وعرفانا لمآثر هذا الرجل العظيم وافتح باب الاقتراحات لكيفية هذا العمل . طارق جبريل : اقتراحك ممتاز ممتاز ممتاز وانا اؤيدك واشد من ازرك وفعلا في كتير جدا من الناس اخبارم مقطوعة تماما ويا طارق الشيء الغريب ان غالبيتهم متواجدين في ليبيا وانا ما عارف قصة ليبيا دي شنو ؟!!!!!!! حقو طوالي نشرع في الامر ونبدأ بود جيرانكم وارجو ايراد اسمه عشان لو في واحد من مطالعي البوست عندو اي معلومة يدينا ليها . بدر الدين يعقوب : هل هلالك يا راقي طبعا صديق وصفك بأدق وأصدق وصف واي اضافة مني حا تشوه ذاك الجمال الصديقي الصادق .. وواصل يا جميل . مرحب مرحب مرحب بالصحافاب بيننا وهم امتداد للامتداد وبالمناسبة ( انا عندي فيهم عود مره يعني الناس ديل نسابتي) احييك الاخ حاتم ساتي وبالترحاب والتهليل نلقاك وهذا ديدن اهل الامتداد ومرحب بيك وبي كل ناس الصحافة شرق وغرب ووسط واهلا باهل مربع 29 ناس فريق الجزيرة .. ومربع معلم الاجيال واستاذي في مدرسة الخرطوم جنوب واحد المتوسطة الاستاذ السماني حسن طه . صديق حمدتو : طبعا هاشم زول جميل ولذيذ وطبعا كان بيستغل حماقتنا انت وانا بالذات والتي كانت تصل الى حد البكاء والفليق بالحجار وكنا مهما نعمل في الكورة برضو يسخر ويكاوينا واي حركة نعملها وننظر تجاهو يقوم هو يحول نظرو يعني ( ما شفتها ) والله كانت ايام . اما حكاية الصادق انا شايف عامر عمل زي قصة الزول القال البعرف كيسي ده فيهو شنو انا بديهو منو موزة .. شايفو جاب سيرة الورقة و( جيمس كلبنا ) عزيزي عموري : آهات وآهات وآهات ذكريات جزع الشجرة المتكول في ضهر بيتنا في دكان الترزي وذكريات سينما عبده خضر وصابر شريف وبالمناسبة يا جماعة صابر ده شقيق ابراهيم الروبي حارس مرمى فريق المريخ الاسبق وده برضو من مشاهير الكرة في الامتداد عليك الله يا عامر واصل وما تنقطع اتحفنا بالذكريات دي وخلينا نتغذى فقد انتحلت اجسامنا من طول الجفاء ومحل الغربة . ضرب لي حاتم حمدتو الرائع قبل شوية وكان تلفون مليء بالضحك وحاتم طبعا رجل لا يعرف العبوس والتجهم ضاحك حتى في الشدائد وكلامو مخلوط بالضحك يعني لو اتكلمت معاهو ما عندك اي مجال للعكننة .. والله يا حاتم انت زول حلو بشكل الله يخليك ياخي . يا اخوانا انا شايف نفسي سرحت وطولت بالرغم من اني كنت عاوز اختفي شوية عشان اعرف معزتي عندكم زي عابدين علي يوسف لمن رسل واحد لي بيتم وقال ليهم عابدين مات قال عشان يعرف اهلو بحبوهو قدر شنو .. دي بحكيها ليكم المداخلة الجاية بس بعد ما اعرف معزتي قدر شنو ونلتقي بعد ...... ايك سيد سيدنا وعمر القردابي الهادي عبد الرحيم منى عوض خوجلي انتو وين ؟ . امير الجمري