امتداد الدرجة الثالثة ذلك الحي المتفرد

Quote: الحبيب الغالي اخي وعزيزي دكتور حاتم حمدتو (باسم ديمة) الله يديك العافية .. والله رجعتني لي زمن لذيذ بشكل زمن وليد اسماعيل حسن (محمد نعيم سعد حقنا) يؤلف ويمثل ويخرج وينتج لانو كل العدة الكنا بستعملها في مسرحية (طبلة) هي حقت الحاجة فتحية ابراهيم حميدة والدته امد الله في ايامها ووليد هو ابن الشاعر الفذ اسماعيل حسن شاعر اغلب روائع محمد وردي.. وطبعا انا كنت احد الممثلين في تلك المسرحية التي ضاهت شاهد ما شافش حاجة في زمن عرضها لاننا كنا بنعرضها لزمن طويل جدا بس طبعا بالمناسبات ما كل يوم وكان اكتر عرضنا لها في بيت ناس عمك عبد الاسد شفاه الله وعافاه وكانت ابنته الظريفة (ملح الحلة) اخلاص تدير روضة في حوش المنزل وكنا نعرض المسرحية والاسكتش وزي ما قال د حاتم الدخول كان بي القروش ( او بالاحرى بالتعاريف ) لانو الدخول كان بي اقل من قرش وكانت المسرحية تضفي على اولاد الروضة جو بهيج جدا ولذيذ وكنا نمثل بصدق وكانوا يتلقونها بصدق اكبر لاننا هم ونحن كنا مواعين نظيفة لم يلغوثنا الزمن بدهنه الكولوسترولي المسرطن( والله بقينا نسمع جنس حاجات) .. والمسرحية كانت بطولة وليد اسماعيل حسن ومشاركة عماد ميرغني (سعادة السفير) وخالد هاشم(كوري) وشقيقه المرحوم محمد (طيرة) وابراهيم عبد الله (نقد) ومجدي جعفر (بركية) وسيف عبد الاسد (دقلم) ومحمد الامين (ناجي) واحياناً اسامة حسين ونادر محمد الحسن وشخصي .. وكانت هذه المجموعة الجميلة تجتمع صبحا ونهارا وليلا ونتسامر وكان كل وقت بي لعبة معينة تناسبه ولعبات الصباح كانت كتيرة كمبليت وام الحفر وسكج بكج ودرديق الحفر بلي قزاز وبلي فريد بالاضافة الى دافوري الصباح والدافوري طبعا كان بزيد عدد المشاركين وكان على راسهم الحبيب صديق حمدتو ( احرف ليبرو في السودان لولا انشغالو بالقرايه .. قال عمار مرق قال) وايضا الغالي عامر تيتاوي والحبوب بكري الخليفة وعبده خضر ومحمد قسم الله ( كان لمن يتغلب يكورك لي قيصر اخوه يجيب ليهو الكدارة الكلوب عشان يكسرنا بيها ) وحافظ الحلبي وبالليل كنا بنلعب شليل وينو والبت يا لبوت او البد يا لبود ما عارف الصاح ياته فيهم وايضا كنا بنلعب الرمة والحراس وديل كان بشارك فيهم برضو الكتير من اولاد الحلة مثل الفاتح السماني والمرحوم ابو عاقلة وممدوح عبد الفتاح وكان في واحد برضو ساكن مربع اربعة واكيد بتتذكرو يا صديق اسمو محمد بليلة وخالد الجوك . يا جماعة والله انا رقرقت ودموعي خلاص عشان كده حا اقيف واواصل في مداخلة قادمة واعذروني للاطالة ( بس داير اذكر دكتور حاتم لمن اسماعيل سيد الدكان حرق قشر البصل زز تتذكر ود المرين قال شنو ؟) .. ويا طارق جبريل برضو الذكريات الجميلة دي ما كانت لولاك فيا أخي يوم شكرك ما يجي وبحذرك ما تلاقيني لانو فعلا بطني فايرة عليك ..لك التجلة والانحناءة. امير الجمري