امتداد الدرجة الثالثة ذلك الحي المتفرد

Quote: احبائي الامتداداب واصدقائهم اسعد الله اوقاتكم طبعا انا بقول امتداداب عشان ما ابقى زي ناس الحتة الانا قاعد فيها دي لانهم بقولو للمريخاب مريخيين هنا طبعا يا عامر الانتماء غلب بالرغم من انو الجماعة الهنا ديل ما عندهم مريخ عندهم هلال وبقولو هلاليين بس ما ممكن اجيب اسم الهلال وما اجيب سيرة الزعيم (دي خطرفات ساكت يا جماعة ما تزعلو يا الهلالاب) عامر تيتاوي ايها الرائع كلامك حرك شجوني واعادني بالذاكرة الى مراحل يصعب استرجاعها واستردادها لكن تبقى في الوجدان ساكنة ومتحكرة ومتمسكة بمكانها الذي تمتلكه بلا صك ولا شهادة بحث ومستندها هو الحب الكبير الذي يملأ كل جنباتها .. حب كبير وارتباط كبير جمع بين قاطني هذا الحي الجميل يظل يجمع الشمل حسا واحساسا حتى ولو شاءت الاقدار ان تفرق بيننا سنكون مسكونين بالامتداد كما قال اخي الاصغر صديق حمدتو الاديب المؤدب الفنان الجميل خلقا واخلاقاًوطبعا صديق زول متفرد ومتميز امبارح حصل موقف لذيذ جدا .. هو كان معاي في الماسنجر بعدين معاي زميلنا بكري هنا في المكتب قال لي ياخ عليك الله نشيد امي بتاع حنان الصغيرة داك بقول شنو قمت قلت ليهو بقوا امي تره رم بس كده . قال لي ياخ دي انا حافظها قول الباقي قلت والله ما عارفو لكن اقول ليك كلام اصبر لي شوية اسي بجيبها ليك وسألت الموسوعة ابو الاصداق فلم يخذلني واتى بالنص كاملا وبزهو شديد اديتو لبكري وانا اطري على حبيبي قيدص دي حا يفهمها هو بس قيدص دي وبالمناسبة حنان الصغيرة برضو طبعا كانت من سكان الامتداد مربع 7 . عماد عويس ياااا يا عمده والله ايام يا زمان ابكي واتحسر عليك .. ياخي والله الشوق بلا حدود والروح عطشى لرشف ما تجود به جلسات الندامة التي لا زال صداها في اذني بحنجرتك الذهبية واصالتك وطيب معشرك في كل الاحوال الله يجمعنا ياخي في ساعة خير . طارق جبريل .. التواضع من شيم العظماء وانت عظيم يا حبيبي نحن بلاك ما بنبقى واشكرك على هذا الاطراء يا غالي وطبعا اذا خليت المنبر بقدومي عشان تتفرج علينا زي ما قلت انا حا اعمل زي جعفر عباس مع الطيب صالح واقول ليهم انا قلت لي ناس المنبر يا جماعة هوي يا انا يا طارق جبريل ! .... ( قالو لي انت) عمر محمد الحسن ( ابن عمي العزيز) انت زول الحكي عنك صعب لانك قامة كبيرة وفارعة رغم قصر القامة انت اخوياً كبيييييير لينا ربنا يخليك ويحفظك يا غالي وتنثر ابداعاتك في هذا المنبر الثر تحياتي للجميلات ننوس وهدوية والصغيرولامهن. معليش طولت عليكم يا الغاليين لكن شوك الشوق بنقزني عامر تيتاوي ، صديق حمدتو ، طارق جبريل ، حاتم حمدتو ، عمر محمد الحسن وبقية العقد الفريد ازداد غروراً وفخراً كلما انحني امامكم تقبلوا تحيات عبد الغفار وبدر الدين وعادل محمد الحسن ود الشيخ شقيق عمر وهو اسي في الرياض