امتداد الدرجة الثالثة ذلك الحي المتفرد

Quote: الاخ الحبيب عامر تيتاوي طبعاً انا تاخرت في المشاركة بسبب تواجدي في السودان في الفترة الفاتت او تواجدي بصفة اخص في الامتداد ذلك الحي المتفرد .. السبب التاني انا رجعت الرياض يوم السبت ونزلت شغل في نفس اليوم ومن تاريخه وانا اطالع مزهواً هذا الملتقى الرائع ياااااااااااااا يا عامر ده شنو الجمال ده ودي شنو الروعة دي طارق جبريل انا ما بعرفو لكن والله والحق يقال عشقت هذا الرجل لهذا العمل الكبير الراقي والذي ينتظر منه الكثير المثير المفيد من كتابه ومداخلينه (ان صح التعبير) بصراحة انا لقيت معلومات كتيرة جدا كنت اجهلها عن حينا وبرضو في شخصيات لم احظى بشرف لقاءها وما ادري ما السبب !! المهم هو على اي حال منتدى او ملتقى سيكون له شأن كبير يجعل من متابعيه وانا اولهم بعمل تمثال كبير لذلك الفتى المدعو طارق جبريل على شرط عمل التمثال بين ميدان الرابطة ومستشفى الاكاديمة لسببين الاول لمنع زحف مامون حميدة باتجاه ميدان الرابطة والثاني لمرور اغلب مراجعيعبر هذا الممر المستشفى وما اكثرهم بعد تفشي العديد والجديد من الامراض بين اهلنا الطيبين وليعرف الجميع ان هذا الفتى هو مؤسس ملتقى او منتدى الامتداد ذلك الحي المتفرد والذي اصبو واروم ان يحقق امال وطموحات كبيرة متواجدة ومختزنة لدى ابناء هذا الحي القطر (الدولة) اما انت عزيزي الغالي وحبيبي فاتح و العلبة الغربة الكذبة معي في الرياض فحديثي عنك شهادة مجروحة لاننا واحد وللا شنو رايك نحن واحد لاننا نشانا في حي واحد في ظروف واحدة في بيئة واحدة امكن نكون ما قرينا ولا مرحلة في مدرسة واحدة لكن الاهم هو التواجد في منطقة واحدة ويالها من منطقة الامتداد ومربع 8 وابت الظروف انا تجمعنا بالمغرب رغم ترغيبك الشديد لي لان التحق بك هناك يالرغم من اني لم اكن محتاجاً لترغيب فوجودك هناك هو اكبر دافع للذهاب لكن برضو ما عارف السبب شنو !! والله يجازي الكانو والكانن السبب ونحن واحد لاننا مواليد سنة واحدة وبس انا اكبر منك بي 23 يوم لانك مواليد 10/10 وانا مواليد 16/9 وما في داعي نذكر السنة خلي الناس تخمن ونعملها مسابقة بس صديق حمدتو الهادي عبد الرحيم واحمد جمعة لا يسمح لهم بالمشاركة لانهم من منسوبي الشركة.. انا ما داير اطول وحا اتواصل معاكم باذن الله ولي عودة للتحدث عن الامتداد وناسو الحلوين .. المنتدى فخم وضخم وراقي ومريح ومنظف يزيل عنك طين وحل الغربة ويستبدله بريحة الدعاش والشم ريحة المويه المكشوحة في حيطة طوب .. تحياتي للرائعة دوماً منى عوض خوجلي ولبقية الكوكبة صديق واحمد جمعة وعمر محمد الحسن الحلو الطاعم وسيد سيدنا والهادي عبد الرحيم ياسر حنا محمد حسبو وكل من فاتني ذكره استميحه عذرا ولكم الود اخوكم امير الجمري خبر شين : (( تخيل يا عامر اننا بعنا بيت الامتداد وبدلناهو ببيت في جبرة مربع 18 وانا خليت ناس البيت على وشك الرحيل )) لكن سنظل امتداداب بكل الجوارح لانو جمراب جبراب دي شينة ولنا عودة

(عدل بواسطة طارق جبريل on 03-21-2006, 10:18 AM)