امتداد الدرجة الثالثة ذلك الحي المتفرد

Quote: لقد كتبت عن عطيات وسأكتب عن حنا،لكن زول واحد مافكر معى للاحتفاء بتلك الأسماء النادرة،

لقد اوضعتم تخاجلنا

عزالدين عثمان شنو فاتح لينا كده، السلام سنة لا ريده لا محنة


راكوبة

عليك الله عامر ده لميت فيه وين؟؟؟ بالله عليك سلم عليه سلام شديد. طبعا مربع تمانية ده انا زمان كنت ساكن فيه سكنة صباح مسا لما كرهتم العيشة، انا من ما تمغرب جري مربع تماني، اها يوم عملت فيها زعلان وقلت ما بمشي ليهم وفعلا غبت منهم كم يوم، فقاموا سالوا مني الزول ده وين، قام واحد كلمهم قال ليهم الزول ده قال زعلان منكم عشان انتوا ما قاعدين تجوه، قام حاتم حمدتو، طبعا هول زول ظريف وساخر وصاحب نكتة سريعة جدا، قام حاتم قال ليه هو طيب ما يدينا فرصة عشان عشان نحن نجيه هو كل يوم معانا، يازول قاموا كلهم دوروا عرباتهم ناس حاتم وعامر ومجدي وشاهر وعادل بلة ...امكن 10 تنفار كلهم جو بيتنا خبتو الباب طلع ليهم ابوي ياسر وين قال ليهم ياسر طلع قالوا خلاص لما يجي قول ليه فلان وفلان وفلان لبحاج لما اتخلع وافتكر في مشكة، اها لما رجعوا قام حاتم قال ليهم الزول ده يكون لقى لي درب تاني ساكت

طارق جبريل

بعدين ياطارق في شخصيات بارزة جدا في الامتداد ما شايف في زول اتطرق ليها، زي اولاد عمك شداد في مربع 9 ناس كمال شداد وحامد شداد وتاني عندهم دكتور بتاع فيزيا زمان كان جنو يكتب في هلال رمضان كل سنة انه الهلال بيثبت ولا ما بيثبت وانه هلال بتولد بتين ومفروض يتشاف بتين وكده، لكن صراحة انا استفدت منه غاية الفايدة وقدرت اعرف معلومات كتيرة عن اثبات رؤية الهلال

وتاني في شارعهم كان في هاشم المواطن، كان راجل ظريف وحبوب وكريم لي ابعد ما يكون، وسبب التسمية مرة كانوا في رحلة واظنة مشى يهبش قام وقع في البحر، فالجماعة لحقوا ليك رموا ليه خشبة وبقوا يكروكو ليه: ياهاشم امسك الخشب... يا هاشم أمسك الخشب، المهم لغاية ما طلع، فاظنة من الخلعة قرب يذهلل، فجا الحلة بالليل كل ما يلقى جماعة قاعدين يقوم يقول ليهم انا المواطن هاشم...أمسك الخشب يا، فمن اليومة ديك قمنا سميناه هاشم المواطن

بعدين جمعية التحول، اسسها محمد عبدالرحمن ومجموعة من شباب مربع 14 ونهاية مربع 10 يعني كانت العضوية محصورة بس في هذا النطاق امكن شارعين او تلاتة وكانوا جميعهم شباب مستنيرين طموحين، وانا كنت امكن اول واحد انضم للجمعية من خارج هذا النطاق بدعوة كريمة من الاخ محمد عبدالرحمن فقد كنت ولا زلت اكن له احتراما كثيرا،وطبعا اخوه حيدر كان دفعتي من الابتدائي. وقد استطاعت الجميعة ان تقدم الكثير لأهل هذه المنطقة وبث الوعي فيهم وروح العمل الجماعي فكانت فعلا جميعية خطيرة جدا بالمعنى الايجابي وكانت الأولى من نوعها في الامتداد وامكن على مستوى الخرطوم فكانت مصدر اشعاع فكري وحضاري في زمن القحط والدكتاتورية، لذلك حاربها الكيزان بي ضراوة شديدة جدا. وبارك الله في الاخ محمد عبدالرحمن. لكن للأسف الشديد فقد كنت انا احد اسباب او أحد المساهين في اطفاء جزوتها بصورة غير مباشرة او بطريقة غير واعية، فكان كل ذلك بسبب تهور الشباب وقصر النظر منا جميعا الذين تسببوا في اطفاء هذه المنارة، فقد كنا في ذلك الزمان لا نزال يفع على اعتاب العشرين بعد

فقد رأيت الاخ محمد عبدالرحمن قبل فترة مستضاف في احد السهرات التلفزيونية عن الخرطوم عاصمة الثقافة العربية، واجتريت كل هذه الذكريات وانا استمع لحديثة اللبق.


يا خي الامتداد جميل وزكرياته جميلة لكن مهما كانت برضو ترديدها هي للقلوب مرءا وللحب اشارة

لكم التحايا جميعا