امتداد الدرجة الثالثة ذلك الحي المتفرد

Quote: الأعـزاء الإمتداداب الأحبة التحية والتقدير لكل أبناء جيلي من الإمتداداب بالبوست ، ويبدو لي راح أكون أكبرهم سناً إن لم تخني الذاكرة ، ما عدا أحمد جمعة ( جومو ) لأنو أنحنا أولاد دفعة و ساكنين في مربع واحد ( مربع 4 ) ، بس هو كان بيلعب في سلام 4 وأنا كنت في الردستار ، لأنو الاخ الشقيق عبدالغفار جاب سيرة الكورة وكمان أخونا العزيز والغالي عماد عويس جاب برضو سيرة البحر والواحد ليهو فترة طويلة جداً ما قعد مع نفسوا عشان يتذكر تلك الأيام الخوالي والتي لن تكرر ، ويبدو لي لو الواحد فتح موضوع الكورة دة ما راح نخلص منو لأنو لينا ذكريات من مربع 1 وحتى مربع 14 وفي كل مربع لينا ذكريات لا تحصى ولا تعد ، عشان كدة أحسن نخليهو شوية لي قدام ، والجايات أكتر . العزيز عماد عويس لك المودة والتحية ، وطبعاً يا أخوان برضو يمكن أكون أول من جلس مع عماد للإستماع بل وحضور وتسجيل بعض بدايات ألحان بعض الأغنيات ( في الصالون عندكم لمن نجيب كرسي الحديد ونخت فيهو المايك على السـنّـادة للتسجيل ) ونقعد نعيد المقاطع لأكثر من مرة ونحاول دوزنة العود لعدة مرات .. .. .. ، وصدقني يا عماد تلك الأيام ما بارحت الذاكرة على الإطلاق وكأنها حصلت أمس ، وموضوع تقعد لي إحتياطي في الكنبة عشان الشبل آنذاك وحارس مرمى فريق الإمتداد بعد ذلك الكابتن عاطف عبيد يتلحلح شوية لأنو لا إنا ولا أنت كانت عندنا ملكات وقدره عاطف للتعامل مع الكورة ويمكن لأنو كان عندنا شوية بعد نظر في الحتة دي ، وبعدين إنت خلقت للفن ودة كان راينا كلنا وكنت بتجامل فينا لما تجي وتلعب معانا الكورة ، فلك التحية والتقدير أخي العزيز . الاخ الشقيق عبده ( عبدالغفار ) لأنو كان الوحيد البيطلق عليهو إسم ( عبده ) لكن بعد شوية جانا الاخ ( عبدالخالق التوم ) وبرضو أهلو كانو بينادوهو بي إسم ( عبده ) فقمنا سمينا عبدالخالق ( عبده الفار ) وذلك نظراً لسمرة لونه ، وسار هذا الإسم حتى اليوم ، فللاخ عبدالغفار ذكريات لا تحصي ولا تعد وزي ماذكرت قبل كدة الواحد أكل وجبات كثيرة مع الحاجة ( حليمة ) وكل وجبة ليها ذكريات خاصة ، خاصة في وجود أخونا وحبيبنا ( بنقوري ) أحمد جعفر ، فلك التحية أخي وحبيبي وسدد الله خطاك . العزيز أمير الجمري لكم إفتقدنا تلك الأيام الخوالي والتي كانت تمر علينا بسرعة لم نحسبها أنها لن تعود حيث كانت القلوب صافية ويانعة ولم ندخل بعمق في مشاغل الحياة اليومية والتي ألهتنا كثيراً حتى من أبسط حقوق الآخرين علينا وهي الإتصال لمعرفة الأحوال العامة ، لكن لأبناء الإمتداد دوماً الرايات البيض ، ولعل البذرة التي بذرها أخي الأصغر طارق جبريل وساقي هذا البذور من بعده حبيبنا الرائع عامر تيتاوي كانت لها قدح السبق في تجلية وتلميع وإظهار مدى عمق العلاقات العامة بين أبناء الوطن ( الإمتداد ) ناهيك عن تلك الخاصة بيننا ، فلك التجلة أخي وليدم عليكم الله نعمة الصحة والعافية وأن لا يبعد عنكم الأولاد مرة ثانية لأنو شايف الحكاية دي كان مردودها ... ... ... .. ونواصل أخــوكم عبدالحليم حامد نعيم مربع 4 منزل 132